Genoeg vir 12

Eendburgers met bruinbotter-mayonnaise

Serves: 12 Nutrition facts: 200 calories 20 grams fat

Ingredients

Brioche-broodjies
Genoeg vir 12 klein rolletjies
• 65 g suiker
• 5 ml (1 t) sout
• 10 g (1 sakkie) kitsgis
• 500 g broodmeel
• 375 ml (1½ k) louwarm melk
• 75 g botter, gesmelt
• 1 eier geklits saam met ’n knypie sout
• 15 ml (1 e) sesamsaad
Eend
Genoeg vir 12 klein burgers
• 4 eenddytjies en boudjies
• 12 naeltjies
• 3 steranyssade
• sout en swartpeper
• 330 g eendvet
• 2 kaneelstokkies
Bruinbotter-mayonnaise
Maak 250 ml
• 250 g botter
• 4 vars salie-blaartjies
• 10 ml (2 t) Cointreau (lemoenlikeur, of gebruik brandewyn)
• 10 ml (2 t) lemoensap
• 2 eiergele
Koolslaai
Genoeg vir 12 klein burgers
• 10 ml (2 t) gemmer, fyn gerasper
• 60 ml (¼ k) witwynasyn
• 10 ml (2 t) strooisuiker
• 1 klein rooikool, dun gesny
• 1 klein groenkool, dun gesny
• ½ rooiui, dun gesny

Instructions

Brioche-broodjies

1 Gebruik ’n elektriese menger met ’n deeghaak.
2 Gooi die suiker, sout, kitsgis en broodmeel in die mengbak.
3 Meng die melk en botter en gooi stadig by die meel terwyl die masjien hardloop.
4 Meng vir sowat 10 min. tot die deeg glad en elasties is.
5 Bedek die bak met ’n skoon kombuisdoek en laat die deeg vir 1 uur rys tot dubbel in grootte.
6 Knie die deeg vir 1 min. Rol die deeg in rolletjies van 40 g. Sit die broodjies op ’n bakplaat en hou eenkant vir 30 min.
7 Smeer met die eier en strooi die sesamsaad oor.
8 Bak vir 15-20 min. of tot goudbruin en gaar.

Eend

1 Verhit die oond tot 150 °C.
2 Pak die dytjies en boudjies op ’n klein, diep oondpan uit.
3 Sny met ’n skerp messie kepe in die vel en druk die naeltjies en steranys in die kepies.
4 Geur met sout en swartpeper. Skep die eendvet bo-op en voeg die kaneelstokkies by. Bak vir 1½ uur of tot sag en goudbruin.
5 Laat effens afkoel en trek die vleis met ’n vurk in rafeltjies van die been af.

Bruinbotter-mayonnaise

1 Smelt die botter in ’n middelslagpan oor matige hitte. Voeg die salie by. Braai vir 2-3 min. of totdat die botter bruin word en neuterig begin ruik.
2 Gooi die botter deur ’n sif in ’n beker. Hou eenkant totdat die botter tot by kamertemperatuur afgekoel het.
3 Klop die Cointreau, lemoensap en eiergele in ’n klein bakkie tot net gemeng.
4 Drup die botter versigtig by die eiergele terwyl jy deurentyd klits.
5 Hou aan tot al die botter ingemeng is en ’n dik sous vorm. Geur met ’n knypie sout.

Koolslaai

1 Klits die gemmer, witwynasyn en strooisuiker in ’n groot mengbak totdat die suiker opgelos is.
2 Meng die rooi- en groenkool en rooi-ui deur die sous.

Bou die burgers
3 Stapel op elke rolletjie ’n bietjie koolslaai, fyn eendvleis, blaartjies en ’n lekker skeppie mayonnaise.