Volgens Helene Vermaak, direkteur van The Human Edge, is die rede vir ons stilswye die moontlike konflik wat daaruit kan ontstaan.
“Ons is bang dat indien ons oor sekere kwessies praat, die uitkomstes daarvan heel waarskynlik negatief gaan wees,” meen Vermaak.
So ook kan ons onvermoë om in kritiese gesprekke te tree ook daartoe lei dat ons dié tipe gesprekke vermy. Ons gedrag tydens dié gesprekke, soos bitsige kommentaar of sarkasme, kan ook die rede wees waarom ons verkies om eerder stil te bly.
Tog is daar verskeie tegnieke wat tydens gesprekvoering geïmplementeer kan word om die gewenste, positiewe uitkomstes te kry. Ons deel ons gunstelinge.
Lees ook: Hoe om van ’n senior kollega te verskil
Dink andersom
In pleks daarvan om aan die moontlike gevolge van die gesprek te dink, dink eerder aan die nadele wat sal ontstaan indien jy nié praat nie. Weet dat as jy nie jou mening lig nie, jy met die uitkoms van die situasie sal moet leef hoewel jy die geleentheid gehad het om dit te verander.
Sit jouself in ander se skoene
Voordat jy in ’n ernstige gesprek tree, dink eers na oor die gevolge wat dit vir die betrokke persoon mag inhou. Op dié manier sal jy albei kante van die saak op gelyke vlak kan aanspreek en daarvolgens ingeligte besluite kan neem.
Lees ook: Werk jy lekker?
Skep ’n veilige omgewing
Die probleem met kritiese gesprekke is die sterk emosies wat daardeur na vore kom. Tog kan dié emosies beperk word deur die situasie te monitor en sodoende diegene wat betrokke is veilig te laat voel. Maak dit duidelik dat jy elkeen se mening net soveel soos jou eie respekteer. Die doel hier is om te verseker dat ’n basis van gemeenskaplike respek gevestig word.
Bevorder dialoog
Nadat jy ’n veilige omgewing geskep het, is dit wesenlik om die betrokke persoon te nooi om sy/haar kant van die saak te stel. As jy bereid is om na ander te luister sal hulle ook bereid wees om na jou te luister. Op dié manier word ’n gemedieerde gesprekvoering bewerkstellig waartydens al die betrokke persone op gelyke voet staan.
Lees ook: Maak vriende met stres
