Suzelle DIY word ’n moewiester

Anastasopoulos speel die rol van Tali, ’n self-obsessiewe prinses van Sandton wat na Kaapstad verhuis. Sy huur ’n dokkie-kameraspan om die opbou na haar troue met die eiendomsagent-verloofde, Darren, te verfilm.

Tali’s Wedding Diary is die eerste in Showmax se reeks oorspronklike produksies.

Tali se karakter is gebaseer op die van Anastasopoulos se SuzelleDIY-karakter.

Lees ook: Lag-lag doen Suzelle dit self

Sedert SuzelleDIY op YouTube bekendgestel is, is meer as 70 video’s vervaardig wat byna 22 miljoen kykers gelok het. Een van die video’s, How To Make A Cinderblock Bench, het meer as 2,5 miljoen kykers gelok.

Ari Kruger, mede-skepper en regisseur van Tali’s Wedding Diary, is ’n ervare regisseur van advertensies, musiekvideo’s en aanlyn-inhoud. Sy kortfilms het al groot aandag aanlyn getrek en is by rolprentfeeste wêreldwyd vertoon.

In 2014 het hierdie kreatiewe vennootskap hul vaardighede en passie vir komedie gekombineer en ’n projek buite hul kommersiële werk ontwikkel. SuzelleDIY is nou ’n volskaalse handelsnaam en besigheid. Julia en Ari het sedertdien ’n produksiemaatskappy, Sketchbook Studios, begin wat SuzelleDIY ,asook ’n verskeidenheid nuwe karakters vir die aanlyn-mark produseer.

Anastasopoulos sê toe sy en Ari Showmax genader het, het hulle geweet hulle het ’n goeie konsep beet, maar hulle was nie seker of die produksie aanvaar sou word nie. “Dit is moeilik om in Suid-Afrika steun te kry vir ’n produksie. Showmax het dadelik gehou van wat ons probeer doen. Dit is presies die soort ondersteuning wat die rolprentbedryf in hierdie land nodig het,” sê sy.

Benewens Tali’s Wedding Diary werk hulle ook aan iNumber Number, ’n oorspronklike medeproduksie met Mzansi Magic. iNumber Number is ’n misdaad- en korrupsiedrama-reeks gebaseer op die bekroonde gelyknamige 2013-fliek.

Chris Savides, uitvoerende hoof van Showmax Africa, sê dit is deel van hul strategie om Afrika-produksies te steun. “Daar is ongelooflike talent en kundigheid op hierdie vasteland, so hoekom moet mens elders soek as jy outentieke, plaaslik relevante stories wil vertel? ”

Tali’s Wedding Diary is ’n reeks van agt episodes wat in Desember 2017 op Showmax uitgesaai sal word. Elke episode sal ongeveer 20 minute lank wees.