In Augustus vanjaar, bring Vintage with Love duisende kopers, vrywilligers, skenkers, vennote en ander bymekaar vir die bekendstelling van The Big Week. Dis ’n nuwe hoofstuk in een van Kaapstad se gewildste jaarlikse fondsinsamelingsgeleenthede. 

Die week sluit die gewilde Big Sale én die splinternuwe Big Show in en vier volhoubare mode, bewustelike verbruik en die krag van mense wat saamwerk om ’n verskil te maak. Die Big Sale vind by die Cape Town Cruise Terminal plaas, terwyl die Big Show by Beluga, net bokant die terminaal, aangebied word. 

Meer as tien jaar gelede het Leigh Ord en Jacquie Myburgh Vintage with Love begin met ’n  eenvoudige maar kragtige idee: Tweedehandse mode kan in iets veel groters omskep word. Wat as ’n gemeenskapsinisiatief begin het, het ontwikkel tot ’n beweging wat reeds miljoene rande vir geletterdheids- en onderwysprojekte in Suid-Afrika ingesamel het, terwyl dit mense aanmoedig om meer verantwoordelike modekeuses te maak. 

Daardie missie is vandag net so belangrik soos toe dit begin het. 

Elke jaar kry duisende geskenkte kledingstukke ’n nuwe lewe. Só word tekstielafval verminder én noodsaaklike geld ingesamel vir opvoedkundige projekte wat ’n blywende verskil in gemeenskappe maak. 

“Ons wou vanjaar iets wat reeds groot is, nóg groter maak,” sê Taylea du Toit, senior bemarkingsbestuurder van Vintage with Love. 

“Ons is ’n klein span met groot drome wat daarna streef om ’n nóg groter impak te maak. Ons sien elke dag hoe klein gebare ’n groot verskil kan maak. Een geskenkte rok, een gekoopte hemp of een mens wat besluit om betrokke te raak, kan ’n kettingreaksie veroorsaak wat veel verder strek as wat hulle besef. Dit is die gedagte agter The Big Week.” 

Tracey Butler, besturende direkteur, voeg by: “Dit is ’n viering van gemeenskap, die vrygewigheid en die gedeelde doel wat hierdie werk moontlik maak. Dit is ook ons grootste geleentheid nóg om geld in te samel vir die sake waarvoor ons omgee.” 

Meer as net volhoubare mode 

Die kern van The Big Week is ware volhoubaarheid. 

Deur die lewensiklus van klere te verleng, help die Big Sale om tekstielafval te beperk en moedig dit meer verantwoordelike verbruik aan. Vir Vintage with Love gaan volhoubaarheid egter verder as net die omgewing. Elke kledingstuk wat verkoop word, dra ook by tot sosiale volhoubaarheid deur geletterdheids- en opvoedingsprogramme te finansier wat jong Suid-Afrikaners bemagtig en nuwe geleenthede vir toekomstige geslagte skep. 

Die Big Show 

Die eerste hoogtepunt van The Big Week is die Big Show, wat op 20 Augustus 2026 plaasvind. 

Die modeskou, wat in samewerking met Bridget Pickering van Ruff Tung/Therapy Boutique aangebied word, bring plaaslike handelsmerke, ontwerpers en rolspelers bymekaar wat hulle aktief vir volhoubare mode in Suid-Afrika beywer. 

Die geleentheid vier innovasie, plaas die kollig op plaaslike talent en skep ’n platform vir belangrike gesprekke oor die toekoms van mode. Bo alles bied dit nog ’n geleentheid om bewusmaking én fondse vir Vintage with Love se liefdadigheidswerk te verhoog. 

Die Big Sale 

Die tweede deel van The Big Week is die Big Sale, wat gedurende die laaste naweek van Augustus 2026 terugkeer. 

Vir meer as ‘n dekade omskep hierdie geleentheid geskenkte mode-artikels in geld vir geletterdheids- en onderwysprojekte, terwyl duisende kledingstukke ’n tweede kans kry. 

“Die impak van The Big Week strek veel verder as mode,” sê Debbie Smarts, hoof van fondsinsameling by Vintage with Love. 

“Elke artikel wat geskenk word, elke kaartjie wat gekoop word en elke kledingstuk wat verkoop word, help om geletterdheids- en onderwysprogramme te finansier wat lewens verander. Wat vir een mens na ’n klein gebaar lyk, word boeke in klaskamers, nuwe geleenthede vir kinders en ’n beter toekoms vir gemeenskappe. Dit is wat hierdie week so besonders maak.” 

Saam vorm die Big Show en die Big Sale The Big Week – Kaapstad se betekenisvolste week vir volhoubare mode. 

Dit is ’n week wat wys dat groot verandering selde met groot gebare begin. Dit begin by mense wat klein dinge met opregte bedoeling doen: ’n hemp wat geskenk word, ’n kaartjie wat gekoop word of ’n gemeenskap wat saamstaan. 

En wanneer duisende mense hul kragte vir dieselfde doel saamsnoer, word die impak werklik buitengewoon. 

Vir almal wat glo mode behoort méér te doen as om net mooi te lyk, is The Big Week ’n geleentheid wat nie misgeloop moet word nie. 

Kaartjies vir Vintage with Love se The Big Week 2026 is nou beskikbaar. Besoek die webwerf vir volledige besonderhede oor die fondsinsamelingsmodeskou, die program en die inkopie-ervarings. https://www.vintagewithlove.co.za/event-details/the-big-week-2026?srsltid=AfmBOorSUZPVFaqKppABsC9YdP_e2Nsi5X6Osqk2BccX4m6TXtNZp7u9. 

10 Gelukkige lesers kan elk ’n kaartjie na The Big Sale ter waarde van R350 wen!

Donderdag 27 Augustus | Vanaf 17:00 

Wees eerste deur die deure. 

Jou kaartjie sluit in: Eksklusiewe eerste toegang om by Die Groot Uitverkoping te koop voordat dit vir die publiek oopmaak

Eerste keuse uit duisende ongelooflike tweedehandse/reeds geliefde artikels 

’n Verwelkomingsdrankie en happies

’n Onvergeetlike openingsaandatmosfeer terwyl jy ’n goeie saak ondersteun  

Om in te skryf, voltooi die onderstaande vorm:

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za  

Sluitingsdatum: 21 Augustus 2026    

Lees ook: WEN ’n Willem Botha Beauty-geskenkpak ter waarde van R3 050!

The post Kaapstad vier volhoubare mode met ‘Vintage with Love’ appeared first on rooi rose.

Deur Susra Matthee

Handsakke raak te dikwels die opgaarplek vir rommel soos gebruikte sneesdoekies, ou kwitansies en krummels.

Marie Kondo se nommer een reël is om gereeld jou handsak skoon te maak. Makliker gesê as gedaan, maar volgens Marie kom ’n mens gou in roetine.

Sy beveel aan dat jy elke dag jou handsak leegmaak wanneer jy by die huis kom. Hierdie wenk is veral handig as jy gereeld handsakke ruil.

Kry ’n plek in jou huis, soos ’n laai of kassie, om jou daaglikse benodigdhede vir jou handsak te stoor, soos jou beursie. Pak dan elke oggend net die items wat jy daardie spesifieke dag nodig het – só sal jou handsak altyd netjies bly. ’n Maklike manier is om ’n skoenboks in jou kas of laai te sit en al die items in jou handsak daarin te pak. Hierdie metode sal ook verseker dat jy niks die volgende dag vergeet nie.

Die gemors wat dan in jou handsak oorbly, gooi jy weg. Volgens Marie sal hierdie skoonmaakproses verhoed dat jy ou kwitansies, los papiere en enige onnodige items in jou handsak ronddra. Dit sal ook verseker dat jy nie jou handsak oorlaai en rugpyn veroorsaak nie.

Om seker te maak dat die binnekant van jou handsak netjies en skoon bly, stoor jou grimering in ’n grimeersakkie. Jy kan ook ’n sakkie gebruik om los goed soos haarrekkies, medisyne en ander los goed in te stoor.

Beperkte stoorplek in jou kas? Marie beveel aan om kleiner handsakkies in jou groter handsakke te stoor – sodoende spaar jy nie net spasie nie, maar beskerm jy ook jou handsakke dat dit nie sy vorm verloor deur te verdruk nie.

The post Organiseer jou handsak soos Marie Kondo appeared first on rooi rose.

Deur Susra Matthee

Die swart leerbaadjie

Dié sexy item hoort in jou versameling. Jy sal nooit spyt wees as jy in ’n duursame leerbaadjie belê nie. Dra dit in die winter saam met ’n swart denim en in die somer oor ’n rokkie vir daardie kenmerkende stadstyl-voorkoms.

Swart leerjas. Foto: Woolworths

Die wit hemp

Die wit kraaghemp is ’n pasmaat by alles – of dit nou by denims, ’n snyersbroek of patroonromp is. Dit is ook die perfekte item om laag op laag te dra. Knoop dit toe tot bo en verf jou lippe rooi vir ’n sjiek voorkoms. Wees egter versigtig om te veel op hierdie hemp te spandeer, omdat die kleur se leeftyd beperk is. Koop eerder slim en skaf elke tweede seisoen ’n nuwe een aan.

Wit hemp. Foto: Bash

Leerstewels

Die lengte van leerstewels wissel elke jaar, maar die stewel wat altyd op die rakke sal bly, is die perdrystyl. Hierdie item waarborg jou ’n stylvolle voorkoms sonder om ure aan jou uitrusting te beplan. Gaan vir die kenmerkende denim van kop tot tone of wissel dit af met ’n maksirok en baadjie. Onthou om jou leerstewels af en toe te politoer om ’n lang leeftyd te verseker.

Perdrystyl-boetse. Foto: Bash

Die soldaatjas

Jy kan maar op hierdie snit spandeer, want dit sal nog lank in jou kas hang. Kies een van duursame materiaal – soortgelyk aan die Burberry-jasse. Maak seker die lengte van die jas pas by die lengte van jou lyf. Indien jy kort is, moet jou jas tussen jou heupe en knieë hang, maar ’n langer persoon kan dit met ’n ekstra lang jas ook waag.

Soldaatjas. Foto: Bash

Parka

Die parka is perfek vir naweekdrag en jy sal dit elke naweek wíl dra. Kies dus ’n kleur wat by baie van jou ander klere pas, sodat jy dit elke keer ’n ander voorkoms kan gee. Die gewildste is om dit saam met donker denims en wit tekkies te dra.

Parka. Foto: Woolworths

Kasjmier-trui

’n Kasjmier-trui is een van jou beter beleggings, mits jy mooi daarna kyk. Dit lyk nie net duursaam nie, maar dit voel ook sag teen jou vel en sal jou beslis warm hou. Wit is die perfekte kleur vir ’n crew-nek kasjmiertrui.

Kasjmier-trui. Foto: Woolworths

Donker denims

Die eerste ding waarna jy gryp op ’n koue wintersoggend. Daar is net iets omtrent donker denims wat dit ’n gunsteling vir wintersdrag maak. Die donker kleur skep daardie effense netjieser voorkoms wat jou stylvol laat lyk. Belê in meer as een van hierdie items vir die tye wanneer een in die was is. Hierdie een van Woolworths is gemaklik, baie vleiend en sal jou nie ’n plaas se prys kos nie.

Donker denim. Foto: Woolworths

Swart enkelstewels

Jy kan nooit verkeerd gaan met swart nie. Jy vertoon op jou beste as jy swart van kop tot tone dra. Hierdie enkelstewels is jou beste maat in die winter, omdat dit ’n praktiese lengte vir enige geleentheid is en jy lyk altyd netjies.

Swart enkelstewels. Foto: Bash

The post Winter-items waarin elke vrou moet belê appeared first on rooi rose.

Deur Bea Lingenfelder

1. Gee die eenvoudige t-hemp en jeans nuwe lewe

Almal van ons het daardie gunsteling t-hemp-en-jean-uitrusting waarop ons staatmaak. Ruil die klassieke denim- of leerbaadjie vir ’n helder pofbaadjie. Die baadjie gee net daardie tikkie andersheid wat jou uitrusting nuwe lewe sal gee.

2. Daar is ’n styl, kleur en materiaal vir elke vrou

Verkies jy satyn, pienk en bonkig of eerder wol, swart met ’n effense langer snit? Hoe jy ook al die dag voel, daar is ’n styl vir elke voorkeur.

3. Dit kan selfs saam met oefenklere gedra word

Van die gim tot die winkels. Die athleisure-styl is nou hoogmode en wat is meer gepas as om die sportiewe voorkoms verder met ’n pofbaadjie te beklemtoon?

4. Jy kan dit opkikker met borduur- of appliekwerk

Speel veilig met eenvoud, of dra dit soos op die loopplanke met verskeie motiewe en patrone van borduur- of apliekwerk. Skerp jou naaldwerkvernuf op en werk self ’n paar pronkpleisters aan die moue en rug om dit daardie stadstyl te gee.

5. Die pofsnit steek ongewenste kurwes weg sonder om jou uitrusting lomp te laat voorkom

Bonkig beteken nie noodwendig lomp nie. Sommige van ons is nie altyd gemaklik met styfpassende style nie, en dis waar die pofbaadjie tot jou redding kom. Die oorgrootte snit skep ’n gemaklike voorkoms wat jou informeel, tog sjiek sal laat lyk.

Lees ook: Winter: Almal dra ’n jas

The post 5 redes hoekom ons van pofbaadjies hou appeared first on rooi rose.

Mode in oormaat: pasop vir die slaggate deur Bea Lingenfelder en Susra Matthee. Hooffoto: EVG Kowalievska, Pexels

1. Vermy ’n slordige voorkoms

Om klere laag op laag te dra kan soms slordig lyk.  Onthou om nie klere van te dun materiale as jou onderlaag te dra nie.

’n Gevoude en gekreukelde bloes wat onder jou trui uitsteek, lyk nie afgerond nie – steek eerder daardie bloes in, of kies ’n materiaal soos denim wat nie sommer frommel nie.

’n Maksijas is ook lekker vir laag-op-laag en ’n staatmaker as jy deftig en elegant wil lyk.

’n Maksirok saam met jasse is groot nuus en ’n maklike manier om tekstuur en dimensie te skep.

The post Mode in oormaat: pasop vir die slaggate appeared first on rooi rose.

Stoor kleiner juwele in pilhouers

As jy ringe, klein oorringe of ander juwele het wat maklik verlore kan raak, pak dit in ’n pilhouer (dié wat elke dag van die week aandui). Dit is perfek om jou klein juwele bymekaar en heel te hou.

Ryg halssnoere deur ’n strooitjie

Sny ’n paar strooitjies middeldeur, trek dan ’n enkele string van jou halssnoer of armband daardeur. Maak seker dat ’n gedeelte van die halssnoer of armband aan elke kant uithang, sodat jy dit steeds kan vasmaak. Dit sal verhoed dat die item nie knoop nie.

Gebruik kleefplastiek

Sit jou juweliersware tussen twee velle kleefplastiek om te voorkom dat dit in jou tas rondskuif. Kleefplastiek is ideaal om jou halssnoere afsonderlik te verseël, sodat hulle nie inmekaar vasgevang word nie. Wanneer jy dit wil dra, trek dit uit die plastiek en seël dit weer om dit netjies te hou.

Ziploc-sakkies

Plaas halssnoere in ’n Ziploc-sakkie en sorg dat ’n gedeelte van die kettinkie by die sakkie uitsteek. Maak dan die sakkie in die middel toe en rol dit op sodat die halssnoere nie verstrengel raak nie.

Pak dit tussen jou klere

Pak jou juwele plat tussen gevoude klere sodat die platgedrukte klere die juwele in plek hou. Jy kan ook langer halssnoere in sneespapier rol en dit in die oop gleuwe tussen jou klere sit, sodat dit nie aan jou klere haak nie (die bogenoemde Ziploc-sakkies en kleefplastiek sal verhoed dat die kettings aan jou klere haak.)

Koop ’n juweelorganiseerder

’n Juweelorganiseerder werk uitstekend vir wanneer jy reis. Maak net seker dit is sterk, prakties en bevat individuele kompartemente.

Lees ook: Beklemtoon die kleur van jou oë

The post 6 reiswenke vir jou juwele appeared first on rooi rose.

Die ekstra lang jas

Die ekstra lang snit het die loopplanke verlede jaar reeds getref en dit gaan nog lank daar bly. Hierdie snit is veral gewild omdat dit saam met enige uitrusting gedra kan word. Dit is egter belangrik om die regte lengte vir jóú te kies. Hoe lank of kort jy ookal is, maak seker jou jas se soom eindig tussen jou kuit en enkel. Sodoende verhoed jy dat jou uitrusting nie reghoekig voorkom nie, en jou enkel vertoon ook dunner onder die jas.

Die koekon

Net soos ’n koekon, omvou hierdie snit jou lyf soos ’n silinder en dit werk die beste saam met noupassende klere. Hierdie jasstyl is kenmerkend aan sy wyer middel en nouer some – daarvandan die koekon-naam. Dra dit toegerits saam met skouerlengte-oorrringe, of oopgerits saam met ’n fokus-nekstuk. Kies dunhakskoene met gepunte tone vir ’n meer formele voorkoms.

Soldatejas

Almal herken dié sjiek, regafsnit met sy dubbelry-knope. Hierdie klassieke jas is tydloos en sal altyd op ons top-lysie wees. Dit beteken egter nie jy hoef outyds te lyk nie – Vernuwe die styl deur jou jas met verskillende belde vas te maak. Boonop sal dit jou middel beklemtoon, veral as jy bonkige klere saam met die jas dra. Die soldatejas kom in baie lengtes voor om almal op haar beste te laat lyk.

A-snit

Dié styl is soortgelyk aan die soldatejas, maar dit klok effens uit van die middel na onder en eindig by jou knieë. Dus kan jy die jas alleen as ’n rok ook dra saam met ’n paar lang stewels en ’n serp. Bekendes soos Kate Middelton is veral lief vir hierdie snit, omdat dit ’n vleiende silhoeët, soos ’n uurglas, vertoon wat jou middel beklemtoon, maar ook breër heupe kan verdoesel.

Lees ook: Verleng jou trui se lewe

The post Almal dra ’n jas appeared first on rooi rose.

Verleng jou trui se lewe deur Susra Matthee en Bea Lingenfelder 

1 . Verstaan die tekstiel

Voor jy ’n trui koop, bestudeer die weefwerk van die materiaal (veral op wol- en kasjmier-items). Die weeftegniek en tipe wol moet styf voel: Hoe losser die weefsel, hoe groter is die kans dat jou trui klein wolballetjies gaan vorm.

2. Werk saggies met jou trui

Dit is nie goed om jou trui te veel te hanteer nie – dit sluit in die manier hoe jy die trui was, ophang, droogmaak en wegpak. Anders as katoen en sintetiese materiale hoef wol nie gereeld gewas te word nie. Soms kan jy net die vlekke behandel en dit buite oor ’n tafel of droograk hang. Jy sal verbaas wees hoeveel langer jou trui sal hou as jy dit versigtiger hanteer.

Lees ook: Verleng die lewe van jou gunsteling-jeans

3. Weet hoe om jou trui te was …

Deesdae hoef truie nie meer nét met die hand gewas te word nie. Die beskermende waslagie op wolvesels maak wolprodukte bestand teen vlekke en hulle gaar ook minder stof op aangesien wol natuurlik anti-staties is. Dit beteken jy kan jou trui op ’n ligte siklus in die wasmasjien was sonder om die materiaal te beskadig.

4. … Maar wees tog versigtig

Met verloop van tyd sal natuurlike liggaamsolies, sweet en parfuum op die trui opbou. Dié opbou kan veroorsaak dat die beskermende vesels van die trui afbreek. Met betrekking tot die vorige wenk, moet jy steeds woltruie versigtig hanteer – jy kan dit liggies, met min seep en koue water met die hand was of op die wolsiklus in ’n wasmasjien. Dit verhoed dat die trui krimp. Verwyder dan oortollige water met ’n handdoek deur die trui in ’n handdoek toe te rol en saggies te druk.

5. Moet dit nie lank in water los nie

As jy jou trui was, moet dit nie te lank in water laat week nie. Wol hou nie van langdurige blootstelling aan water nie en kan jou trui vinnig laat uitrek of die kwaliteit beskadig.

6. Moenie jou trui ophang nie

Moet nooit ’n trui hang om dit droog te maak nie, dit kan die weefsel rek (veral wanneer die vesels swaar is met water) en vernietig jou kledingstuk se vorm. Laat jou trui plat lê oor ’n droograk.

Lees ook: Wen ’n R5 000-geskenkbewys van American Swiss om ’n geskenk vir Ma te kies!

7. Was al jou truie saam

Harde materiale soos denim kan wolballetjies veroorsaak op wol en ander delikate materiale. Net soos met jeans, is dit beter om jou trui eers om te dop voordat jy dit was. Vir ekstra beskerming, hou breistofitems apart in ’n onderklere-sakkie.

8. Los eerder die tuimeldroër uit

Al sê die versorgingsetiket dat jy jou kledingstuk in die droër mag gooi, raai ons jou aan om nie daardie risiko te loop nie – plaas dit plat op ’n handdoek en jy sal voorkom dat die trui krimp of wolballetjies vorm.

9. Maak sò met wolballetjies:

Tog sal alle wolmateriaal tot ’n sekere mate wolballetjies vorm. Dit gebeur meer algemeen by sagter vesels en kom dikwels voor in die areas waar dit met ander materiale in kontak kom, byvoorbeeld waar jou arm teen jou lyf skuur. Wanneer die balletjies vorm, kan die kledingstuk slordig lyk. Verwyder dit deur die breistof met ’n truikam te versorg of dit versigtig te skeer met ’n skeermes.

10. Ons beste wenk: Dra altyd ’n katoenhemp onder jou trui

Dit verhoed dat liggaamsolies en sweet na die tekstielvesels van die trui deurdring, wat beteken dat dit langer skoon bly voor jy dit weer moet was.

Lees ook: Vanjaar se Met Gala-tema bekendgemaak

The post Verleng jou trui se lewe appeared first on rooi rose.

Foto’s: Getty Images

Die jaarlikse Met-gala is ’n glansgeleentheid waar die wie’s-wie verskyn in interessante – soms pragtige en soms vreemde – ontwerpe.

Wat is die Met-gala?

Die Met-gala is in 1948 gestig om geld in te samel vir die Metropolitan Museum of Art in New York en alhoewel dit ’n effense gedaanteverwisseling oor die jare ondergaan het, bly dit steeds ’n sosiale instelling. Bekendes woon hierdie glansryke geleentheid by om fondse in te samel vir die museum en om hul nuutste uitstalling te open. Elke jaar is daar ’n tema wat verwant is aan die nuutste uitstalling en bywoners word aangemoedig om volgens hierdie tema aan te trek.

Wat is hierdie jaar se tema?

Hierdie jaar se tema is Mode is kuns.

Hier is vanjaar se mees indrukwekkende skeppings:

Emma Chamberlain

in Mugler

Kendall Jenner

in Zac Posen

Beyoncé

in Olivier Rousteing

Chase Infiniti

in Thom Browne

Sabrina Carpenter

in Dior

Anne Hathaway

in Michael Kors

Janelle Monáe

in Christian Siriano

Lees ook: Wen ’n R5 000-geskenkbewys van American Swiss om ’n geskenk vir Ma te kies!

The post Mode-meesterstukke by vanjaar se Met-gala appeared first on rooi rose.

Hierdie Moedersdag gaan dit alles oor haar.

Die een wat altyd daar is, alles doen, en dit op die een of ander manier moeiteloos laat lyk. Sy is jou ikoon, en by American Swiss glo ons haar geskenk moet presies dit weerspieël.  

Van juweliersware wat nooit uit die mode raak nie tot horlosies wat haar in pas met die jongste neigings hou, ons het ’n uitgesoekte keuse van bederfstukke saamgestel om haar in styl te vier. Stukke wat deurdag, relevant en duursaam voel, want slegs die beste is goed genoeg vir haar.

Of jy nou na iets tydloos of modieus op soek is, dit is jou kans om vir haar ’n geskenk te gee wat net so spesiaal soos sy is. Dink aan iets moois wat sy elke dag kan dra, iets uitsonderliks wat die aandag trek, of ’n moderne klassieke stuk wat soomloos by haar leefstyl kan aanpas. Dit gaan daaroor om die perfekte balans tussen nou en vir altyd te vind – styl waaroor sy vandag mal is en ’n skat wat sy vir jare sal koester.

Sy verdien meer as net ‘n geskenk. Sy verdien iets wat erken wie sy is – sterk, stylvol en absoluut uniek. En soms is die beste bederf een wat haar die keuse gee om presies te kies wat sy wil hê, want sy ken haar eie styl die beste.

Van modieuse juweliersware en tydlose goud wat ’n toekomstige skat kan word, tot hierdie seisoen se noodsaaklike horlosies – ons het die beste bederfartikels vir haar.

Koop aanlyn by Bash of in die winkel om The Trend Edit-versameling te ontdek.

Maak hierdie Moedersdag betekenisvol!  

Een leser kan ’n American Swiss-geskenkbewys ter waarde van R5 000 wen!

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

*Slegs een inskrywing per persoon

Sluitingsdatum: 24 Mei 2026

Lees ook: Ons Moedersdaggeskenkgids: Bederf vir Ma!

The post Wen ’n R5 000-geskenkbewys van American Swiss om ’n geskenk vir Ma te kies! appeared first on rooi rose.

Foto’s: Getty Images

Die Oscar-toekennings is die grootste aand op die Hollywood-kalender, en lewer altyd van die beste rooitapyt-modes van die seisoen. Hierdie jaar was geen uitsondering nie.

Van romantiese balletcore-rokke tot dramatiese vere en opvallende blom-borduurwerk, die sterre het vanjaar weg van veilige minimalistiese style beweeg en eerder tekstuur, beweging en sterk silhoeëtte gekies.

Hier is die ses grootste neigings wat die mode-kollig gesteel het:

Vere oral

Vere het vanjaar vir drama en beweging op die rooitapyt gesorg. Hierdie speelse tekstuur gee rokke onmiddellik ‘n dinamiese gevoel.

Balletcore

Die Ballet-geïnspireerde voorkoms was oral. Ligte lae van delikate materiale soos tule in sagte pastelle het ’n romantiese elegansie geskep.

Strukturele silhoeëtte

Baie sterre het weg van eenvoudige, reguit rokke beweeg en eerder sterk, argitektoniese silhoeëtte gekies. Korset-bolywe en dramatiese vorms het ’n moderne, modebewuste gevoel geskep.

Wolkwit-elegansie

Met Pantone se kleur van die jaar, Cloud Dancer, ’n sagte wit, wat duidelik steeds as inspirasie vir stiliste dien, het talle sterre in romerige skakerings van wit opgedaag.

Blom-borduurwerk

Delikate blom-borduurwerk het rokke soos klere-kunswerke laat lyk en ’n romantiese, couture-gevoel by baie voorkomste gevoeg, Dit was beslis een van die mooiste detailneigings van die aand.

Vurige rooi

Waar pastelle gewoonlik oorheers, het vanjaar se rooitapyt ook ’n oplewing van vurige rooi gesien. Is rooi die nuwe swart?

Lees ook: kykNET kraai koning by die Saftas

The post Vere, blomme en wolkwit: Die grootste mode-neigings by vanjaar se Oscars appeared first on rooi rose.

Van sagte wit tot dramatiese ou-Hollywood-glans, was die 83ste Golden Globe-toekennings by die Beverly Hilton-hotel ‘n bewys dat rooitapyt-mode in 2026 tydloos én waagmoedig kan wees.

Met Pantone se kleur van die jaar, Cloud Dancer, ’n sagte wit, wat duidelik as inspirasie gedien het, het talle sterre in romerige skakerings van wit sowel as swart opgedaag, terwyl helder kleure en dromerige teksture vir ’n vars, moderne voorkoms vir ander bekendes gesorg het.

Hierdie bekendes se uitrustings het werklik uitgestaan:

Selena Gomez in Chanel

Emily Blunt in Louis Vuitton

Tessa Thompson in Balenciaga

Kate Hudson in Giorgio Armani Privé.

Chase Sui Wonders in Balenciaga

Miley Cyrus in Saint Laurent

Brittany Snow in Danielle Frankel

Lees ook: PAS BEKEND | Ontmoet die dames wat vir Ruan se hart meeding in Op my eish!

The post Golden Globes 2026: Ons 7 gunsteling-uitrustings! appeared first on rooi rose.

16 Maniere om geld op jou klerekas te spaar deur Susra Matthee en Bea Lingenfelder. Hooffoto: Pexels

Wees versigtig vir tendense

Sommige trends is vinnig in en net so vinnig weer uit en moet dus deur die begrotingsbewuste vermy word. Sodra die tendens se “oomblik” verby is, is dit in jou kas en jy dra dit nie meer nie.

Jy probeer dalk jouself oortuig omdat dit ultra-nuwerwets en op uitverkoping is,  dat dit die moeite werd is. Maar dink hieraan: As jy voortdurend die nuutste tendense koop en dan nie lank dra nie, is dit dan regtig so goedkoop?

Koop slegs nuwe trends as jy regtig daarvan hou en as jy dit weer kan dra wanneer die tendens nie meer so gewild is nie.

Koop beter stapelitems

As dit kom by stapelitems (wit knoophemp, netjiese swart broek, klassieke t-hemp) is jou opsies eindeloos. Dit is die klere wat jy oor en oor, jaar na jaar kan dra. Met hierdie items is dit slim om in kwaliteit te belê: Jy sal die verskil in snit en materiaal kan sien en voel.

Betaal met harde kontant

Baie van ons val in die lokval van ’n kaart. As jy jou kontant fisies by die kassier moet uittel, laat dit jou soms twee keer dink oor ’n kopie. Indien jy dit nie kan bekostig nie, moet dit nie koop nie.

’n Kassier het eenkeer vir my gesê: “Nou is jou geld ons s’n” en dit spook nou nog by my!

Onthou “goedkoop” en “afslag” is nie “verniet” nie

’n Mens raak so gou opgewonde oor ’n goeie winskopie en promosie, veral as jy geld kan spaar deur dit hierdie maand te koop. Dit veroorsaak dat jy ’n oorhaastige besluit maak en iets koop wat jy nie nodig het nie. Ons koop ook baie keer iets nét omdat dit afgemerk is. Vra jouself eers: “Sou ek volprys vir hierdie item betaal het?”

Tel tot by 3 (of 30) voor jy iets aanlyn koop

Aanlynwinkels en promosies dwing ons om vinnig besluite te neem. Voor jy net outomaties op die koopknoppie klik, teken eers uit jou aanlynprofiel uit, vat ’n blaaskans en kom later terug. Soos die Engelsman sê – “when in doubt, do without.”

Vra jouself die volgende vrae:

Voordat jy ’n item koop, beantwoord hierdie vrae:

1. Gee 3 redes hoekom jy hierdie item moet koop
2. Is daar ten minste drie ander items in jou kas waarmee jy dit kan dra?
3. Dink aan drie komende geleenthede waarheen jy dit kan dra.

Kanselleer e-posse wat uitverkopings bemark

Jy mag dalk dink jy is ’n kundige verbruiker deur altyd nuwe items teen laer pryse as hul handelswaarde te koop, maar jy val in die bekende verbruikersielkundige gewoonte om meer te koop. Vermy die versoeking en teken uit van al die e-poslyste wat jou uitlok om goed te koop wat jy nie moet koop nie.

Koop vir die lewe wat jy nou het

Pasop om jouself te probeer oorreed oor hoe goed jy in ’n paar jeans gaan lyk as jy 5 kilogram verloor het. As jy jeans nou nodig het, koop ’n paar wat nou pas. Jy kan gerus droom oor môre, moet net nie vandag jou geld daarop spandeer nie.

Koop een goeie item

Koop eerder een goeie item as ’n hoop goedkoop items. Al die goedkoop items gaan jou in die lange duur meer kos. Belê eerder in een betroubare, duursame item. ’n Goeie voorbeel is ’n swembroek: ’n Duurder swembroek pas dikwels beter en hou langer indien jy dit mooi oppas. Nadat jy dit gedra het, spoel dit uit of week dit in koue water om sout, chloor, sonskerm en ander olies te verwyder wat die stof kan beskadig.

Gebruik die een-in-een-uit-reël

Vir elke nuwe kledingstuk, paar skoene of bykomstighede wat jy koop, moet een van die huidige items in jou kas na liefdadigheid gaan of aan iemand gegee word. Dit is nie altyd maklik nie, maar dit kan die verskil wees tussen ’n volmaakte klerekas en ’n gesonde bankbalans en oorloopkaste met ’n leë beursie.

Probeer op alternatiewe maniere koop

Winkels is nie die enigste manier om nuwe klere aan te skaf nie. Probeer klere ruil met vriende. Kry ’n paar vriende bymekaar en ruil onderlangs met mekaar klere wat julle nie wil hê nie. Dié uitruilpartytjie is ’n gratis manier om jou kas te verfris én skep die geleentheid om tyd saam jou vriendinne te spandeer.

Brei jou opsies uit met bykomstighede

Maak jou basiese klerekas meer opwindend met bykomstighede. Gebruik halssnoere, armbande en serpe wat jy kan meng met uitrustings wat jy reeds besit.

Hou droogskoonmaakkostes in gedagte

Kyk na versorgingsetikette voordat jy iets koop. As jy iets koop wat jy slegs na droogskoonmakers moet neem om dit skoon te kry, moet jy in gedagte hou dat dit nie die laaste geld is wat jy op die item gaan spandeer. Jy moet die droogskoonmaakkostes inreken vir elke dra.

Pas jou klere op

Deur mooi na jou klere te kyk, sal hulle langer hou. Gebruik sagte skoonmaakmiddels en vermy die tuimeldroër wanneer moontlik. Versorgingsetikette is daar vir ’n rede, lees dit en maak altyd volgens die spesifikasies jou klere skoon. Hetsy dit slegs met koue water gewas moet word, plat moet drooglê of met die hand gewas moet word. Dit sal die lewensduur van jou klere aansienlik verleng.

Leer hoe om jou klere reg te maak

As jy leer hoe om ’n paar eenvoudige verstellings aan jou klere te maak, kan jy baie geld spaar. Nie almal het die vermoë om jeans of ’n rok te verstel nie, maar begin deur die basiese beginsels te bemeester, soos om knope vas te werk of ’n soom in te sit. Dalk word jy geïnspireer om die moeiliker take ook aan te pak!

Roteer jou kas

Dit help om nie te vergeet van die klere in die agterkant van jou kas nie, en so ook nie jou gunsteling klere op te dra nie. Om dit te kan doen, hang die nuutgewaste klere aan die agterkant van jou kas.

Lees meer: WEN een van drie Jockey-geskenkpakke, elk ter waarde van meer as R1 000!

The post 16 Maniere om geld op jou klerekas te spaar appeared first on rooi rose.

Jockey South Africa het in September sy Lente/Somer 2025-versameling bekendgestel, wat die vryheid, optimisme en selfvertroue vier wat die seisoen definieer. Deur gemak, styl en gehalte te kombineer, weerspieël die versameling byna 150 jaar se Jockey-erfenis deur ’n moderne modebewuste lens.

Die reeks, wat vanaf September 2025 tot Januarie 2026 beskikbaar is, word plaaslik ontwerp en vervaardig, wat die kreatiwiteit en vakmanskap van Suid-Afrikaanse ontwerp beliggaam. Elke stuk toon deurdagte detail, pas uitstekend en is gemaklik sonder om enigiets prys te gee – waardes wat lank reeds die kern van die Jockey-handelsmerk vorm. Deur plaaslik te produseer, bly Jockey met sy vervaardigers verbind, ondersteun dit plaaslike vaardighede en verminder dit die afstand tussen die skepping en draer, wat integriteit en sorg by elke stap verseker.

Die seisoenale kleurpalet ontwikkel van vars pastelle en sitrusskakerings in die lente tot sterk tropiese helder kleure, oseaanblou en ryk juweelkleure in die somer, voordat dit versag na gedempte groen, blou en sagte neutrale kleure. Hierdie progressie weerspieël hoe mense aantrek en voel soos die seisoen ontvou, en bied veelsydige noodsaaklikhede wat moeiteloos met die lewe en styl saambeweeg.  

Jockey se Lente/Somer 2025-versameling is meer as net ’n reeks. Dis ‘n viering van individualiteit, selfvertroue en moderne leefstyl – ontwerp om elke dag moeiteloos gemaklik en eg aan jou te laat voel. Die versameling sal beskikbaar wees by Jockey-winkels regoor die land, toonaangewende kleinhandelaars en aanlyn by www.jockey.co.za, met nuwe aankomelinge wat maandeliks van September tot Januarie bekendgestel word.  

WEN een van drie Lente/Somer 2025-geskenkpakke, elk ter waarde van meer as R1 000!

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

Sluitingsdatum: 5 Januarie 2026    

Lees ook: Pas jou bra reg?

The post WEN een van drie Jockey-geskenkpakke, elk ter waarde van meer as R1 000! appeared first on rooi rose.