Willem Botha tooi alledaagse vroue én bekende persoonlikhede in ’n pragprentjie met sy talent én gehalteprodukte.   

Een leser kan ’n Willem Botha Beauty-geskenkpak ter waarde van R3 050 wen.

 Dit sluit die volgende in:  

• Oogskadupalet
• Borsel-stel
• Blosserpoeier
• Highlighterpoeier
• Sculptpoeier
• Lip-gloss
• Liquid Matte Lipstick

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

*Slegs een inskrywing per persoon    

Sluitingsdatum: 25 Junie 2026    

Lees ook: Beklemtoon die kleur van jou oë

The post WEN ’n Willem Botha Beauty-geskenkpak ter waarde van R3 050! appeared first on rooi rose.

Dit kan stresvol wees om ooggrimering te koop. Daar is so baie kleure dat dit soms intimiderend kan wees, maar sodra jy die regte kleure gevind het, maak dit die proses heelwat makliker. Die regte skakering oogskadu kan die kleur van jou oë laat uitstaan.

Onthou: jou persoonlikheid speel ’n groot rol in die grimering wat jy kies, jy moet gemaklik wees met wat jy dra. Daar is een groot reël van grimering … daar is geen reëls nie! Eksperimenteer ’n bietjie met die grimering wat jy het en kyk wat vir jou werk.

Blou oë

“As jou oë blou is, vermy koel kleure en probeer eerder ’n warmer kleur, dit sal jou oë se natuurlike kleur beklemtoon. Skakerings van grys en bruin is perfek vir diegene wat blou oë het, vermy blou oogskadu.” Dit is die raad van Muzi Zuma van die grimeerreeks 3INA.

Probeer ook meer oranje skakerings, soos koraal of self sjampanje.

“Brons of bruin werk ook goed. As jy jou grimering aanwend, maak ’n driehoek in die derde van jou oog en eindig dan deur ’n sagte roomkleurige oogskadu onder jou wenkbroue aan te wend.”
– David White van L’Oreal

Groen oë

As jy groen oë het, is dit reeds helder en het jy nie noodwendig baie oogomlyner of helder oogskadu nodig nie. Wat vir my werk, is skakerings van bruin of selfs ’n bietjie pers. Vir ’n aandjie uit kan jy eksperimenteer met metaal- of helder kleure, maar as jy jou daggrimering aanwend, probeer iets meer natuurlik.

“Die warmer skakerings is baie vleiend vir diegene met groen oë. Probeer skakerings soos sepia, roesbruin, donkerpers, pienk/appelkoos, goud en ligpers.” Stel Muzi voor.

“Jy kan ook ’n pers maskara probeer.” stel David voor.

Bruin oë

Vroue met bruin oë is gelukkig, want amper enige kleur sal hul oë komplimenteer.

Probeer ’n sagte, neutrale kleur soos ’n sagte pienk of bruin en eindig dit af met ’n oogomlyner. “Neutrale bruin skakerings met ’n diepblou oogomlyner sal die oë vars laat lyk” sê David.

“Jou persoonlikheid gaan ’n groot rol speel in die kleur wat jy kies. Skakerings wat baie goed sal werk, is goudbruin, rooi, blou, groen, brons, helderblou, ligblou en pers.” Stel Muzi voor.

Grys oë

“Donker skakerings werk die beste. Begin met ’n silwerwit kleur in die hoek van jou oog en wend donkerder grimering aan die buitenste gedeelte van jou oë, stel Muzi voor.

Jy kan ook eksperimenteer met olyfgroen, helderblou, swart, donkerbruin en pers.

Lees ook: WEN ’n Willem Botha Beauty-geskenkpak ter waarde van R3 050!

The post Beklemtoon die kleur van jou oë appeared first on rooi rose.

Dit is nie sommer net nog ’n kompetisie nie. Dit is die eerste keer dat skoonheids- en welstandstoekennings van hierdie omvang eksklusief in Afrikaans in rooi rose aangebied word. Ons vier die innovasie, gehalte en passie van produkte wat vroue help om op hul heel beste te lyk en te voel.

Laat jou produk skitter

Is jou produk die geheime wapen in duisende vroue se daaglikse roetine? Of dit nou ’n deurbraak in velsorg, luukse grimering, of ’n noodsaaklike welstandsproduk is, ons wil daarvan weet. Deelnemers word nou genooi om hul produkte in te skryf vir ’n kans om daardie gesogte rooi rose-stempel van gehalte te verower. Om te wen, beteken nie net erkenning in die bedryf nie, maar ook direkte blootstelling aan ’n lojale gemeenskap van lesers wat waarde heg aan uitnemendheid.

Sewe kenners, een doel

Om te verseker dat slegs die heel beste produkte bekroon word, het ons ’n gedugte paneel van sewe beoordelaars saamgestel. Hierdie spesialiste, elkeen ’n leier in hul onderskeie velde binne die skoonheids- en welstandbedryf, sal die beoordeling met die grootste sorg en integriteit hanteer. Van wetenskaplike formulering tot praktiese resultate – elke aspek sal onder die vergrootglas geplaas word.

Moenie hierdie kans misloop nie

As jy glo dat jou produk die standaard stel vir skoonheid en welstand in Suid-Afrika, is dit tyd om na vore te tree.

Inskrywings is nou oop! Klik hier vir meer besonderhede en laat jou produk die erkenning kry wat dit verdien.

Lees ook: 10 redes waarom jy rooi rose se Maart-uitgawe móét lees!

The post Is jou produk ’n rooiwarm wenner? rooi rose se skoonheids- en welstandstoekennings is hier! appeared first on rooi rose.

Wenke vir sagter, soenbare lippe vir Valentynsdag deur Corné Greeff. Hooffoto: Unsplash

Sagte, soenbare lippe

Jou lippe se vel is dunner en meer delikaat as die res van jou gesig en daarom word dit vinniger en erger geaffekteer deur omgewingsfaktore. Maar met die regte sorg kan jy jou lippe satynsag en soenbaar kry.

• Wend gereeld ’n lipsalf aan wat jou lippe bevogtig
• Probeer enige lipstiffies met ’n mat-tekstuur vermy, want dit gaan net jou lippe meer uitdroog. Probeer eerder ’n lipglans of  ’n gekleurde lipsalf.

#rrWenk

• Raak ontslae van droë velletjies deur Vaseline aan jou lippe te smeer en dit dan liggies met ’n sagte tandeborsel te borsel
• Jy kan ook ’n afskilferaar om van die velletjies ontslae te raak

Lees ook: Die geheim van sagte lippe? Rooibos! Probeer hierdie skrop

Lipvlek vs Lipstiffie

Deur ’n helder lipstiffie aan jou lippe aan te wend sal jy nie net meer vol selfertroue voel nie, maar jy beklemtoon dan ook jou lippe.

Indien jy weet jy gaan gesoen word, is dit dalk beter om eerder ’n lipvlek te gebruik in plaas van ’n lipstiffie, omdat die lipvlek nie gaan afgee nie, plus dan hoef jy nie die hele aand te wonder of jou lipstiffie al afgegaan het nie.

#rrWenk

• Vir ’n meer natuurlike voorkoms, kies ’n pienk lipkleur wat twee skakerings donkerder as jou lipkleur is.

Lees ook: Bikini-wasgids: 20 goed wat almal moet weet

The post Wenke vir sagter, soenbare lippe vir Valentynsdag appeared first on rooi rose.

Deur Suzanne Kotzé. Hooffoto: anneleven/iStock images

As jy kontaklense dra, weet jy waarskynik hoe erg dit voel as jy per ongeluk grimering op jou lense kry. Dit sit vas aan jou lense, irriteer jou oë en kan selfs ontsteking veroorsaak. Gary Sher van Eyesupply gee raad.

Begin

• Onthou: was altyd jou hande voordat jy jou lense insit.
• Sit jou lense in voordat jy jou grimering doen.
• Probeer om hipo-allergeniese en olie-vrye grimering te gebruik.

Oogskadu

• Kies ’n romerige oogskadu, water-gebasseerd en olie-vry (olie kan dit loperig maak en so in jou oë beland). Poeierige oogskadu is ook meer geneig om in jou oë en lense te beland.
• As jy wel poeier-oogskadu’s verkies, kies die saamgepersde tipe oogskadu bo los poeier. Skud jou kwassie goed af nadat jy dit in die poeier gedompel het om ontsale te raak van enige los deeltjies.
• ’n Voorbereidingslagie vir jou oë (eyelid primer) sal help dat jou grimering beter aan jou ooglede klou en nie in jou oë beland nie.
• Vermy oogskadu wat blinkers bevat. Die glinsterende deeltjies kan tussen die lens en oog vasgevang word en jou oë krap wat tot langtermyn skade kan lei.

Oogomlyner

Moet nooit oogomlyner in jou waterlyn (die pienk deeltjie binne-in jou ooglid by jou oë) aansmeer nie. Wend jou oogomlyner slegs aan die buitenste deel van die ooglid. Vermy ook vloeibare oogomlyner, veral as dit nie meer splinternuut is nie, want as dit uitdroog kan dit afskilfer en in jou oë beland.

Maskara

• Kies ’n hipo-allergeniese olie-vrye maskara.
• Vermy maskara wat jou wimpers verleng, omdat die veselrige deeltjies in jou oë en onder jou lense kan beland.
• Moet nooit waterdigte maskara kies as jy kontaklense dra nie.

Onthou

• Verwyder altyd eers jou kontaklense voordat jy jou ooggrimering verwyder.
• Vervang jou ooggrimering gereeld – elke twee tot drie maande om te verhoed dat bakterieë wat tot infeksie kan lei, in jou grimering groei.
• Moet nooit ooggrimering met iemand anders deel nie.
• As jy daarvan hou om elke dag taamlik baie ooggrimering te dra, kies eerder daaglikse kontaklense. Dit is effens duurder, maar die moeite werd en beter as krapperige, rooi oë.

Lees ook: Jou grimering se raklewe

The post Ooggrimering vir vroue met kontaklense appeared first on rooi rose.

1. Verbloemer is ’n moet

’n Moet-hê produk vir jou smuktas is beslis ’n verbloemer, om daardie ongewenste donker kringe onder jou oë te versag. Elsa Kruger, skoonheidskrywer vir verskeie publikasies gee raad: “Bobbi Brown sê nie verniet verbloemer (concealer) is die geheim van die heelal nie. Leer hoe om jare van jou gesig af weg te toor met die regte verbloemer onder jou oë en op ander merkies op jou vel. As jy nie weet hoe nie, gaan vir ’n gratis les by ’n grimering-toonbank.”

#rooirosewenk: Moenie net verbloemer onder jou oë gebruik nie – wend dit aan die binne- en buitehoeke van jou oë, die buitekante van jou neus en aan die kante van jou mond. Siedaar, ’n varser jy!

2. Stadig met die poeier

Wanneer jy aan ’n jeugdige gelaat dink, dink jy aan ’n vel met ’n gesonde glans. Poeier doen die teenoorgestelde en laat jou vel afgemat voorkom.

Elsa sê: Poeier laat jou oud, en jou vel dof en tam lyk, dit beklemtoon ook jou lyne en plooie. ’n Sagte gloed op jou vel is jeugdig en soos wat ’n mens ouer word, skei jou vel minder olie af, dus sal jou gesig nie sommer blink as jy die poeier laat links lê nie. Klad eerder enige blinkheid by jou neus, voorkop en ken (die T-sone) met ‘skin blotting pads’.

3. Sê JA vir glansende onderlaag

Namate ons ouer word, verloor ons vel daardie soepelheid en glans soos selhernuwing verminder wat ook veroorsaak dat ons velle gewoonlik droër is en minder olie afskei. Vermy eerder ’n swaar en mat onderlaag wat maklik tussen fyn lyne op jou vel gaan sit en plooie meer sigbaar maak.

Kies ’n lig-reflekterende onderlaag, sê haar- en grimeerkunstenaar Cheryl Parker, wat jou vel verhelder en daardie douagtige glans gee. Hierdie tipe onderlaag is ook gewoonlik meer hidrerend en laat nie die vel droog en trekkerig voel nie.

4. Blosser is jou beste vriend

Blosser is beslis die vinnigste manier om jou voorkoms op te helder wanneer jy vaal en uitgewas voel. Kies ’n roomblosser wat jy sommer ook as ’n lipstiffie kan gebruik – die roomblosser se tekstuur gee ’n deursigtige glans aan jou wange wat meer natuurlik lyk, stel Cheryl voor.

Elsa herinner: gebruik jou blosser op die regte manier, die doel is om jou gesig se kontoere te verander, daarom moet jou blosser hoër op teen die wang geplaas word, en nie direk langs jou mond nie!

#rooirosewenk: Hou hierdie veelsydige blosser in jou handsak en swiep liggies met jou vingers oor jou voorkop, wange en lippe vir ’n gesonde gloed.

5. ’n Basislagie is belangrik

Gebruik ’n voorbereidingslagie/basislagie (primer) om jou vel voor te berei. Hierdie lagie vul jou fyner plooie en laat ook vergrote porieë meer egalig lyk. Boonop maak die voorbereidingslagie die aanwending van jou onderlaag makliker en laat jou grimering ook langer hou.

Daar is verskeie tipes voorbereidingslagies beskikbaar. Kies een wat vir jou sal werk, stel grimeerkunstenaar Ryno Mulder voor. Daar is olievry, of dié wat glans verleen, selfs vir diegene wat sukkel met rooiheid is daar groen skakerings wat rooiheid teenwerk.

6. Sê NEE vir blink grimering

Enigiets wat beskryf word as frosty, glitter, glimmer of shimmer beklemtoon elke plooi, vergrote poriëe, crêpe-agtige ooglede en lyne, waarsku Elsa. Sê vaarwel aan blink (glitter) en frosty grimering en naellak na 40. Kies eerder ’n mat oogskadu en met roomteksture, dit is meer vleiend vir ouer ooglede.

7. Hou oogomlyner bo

Blameer dit op die tagtigerjare, maar oogomlyner wat net op die onderste ooglid aangewend word, is ’n trend wat eerder moet waai, sê  Ryno. Hierdie voorkoms trek jou oë afwaarts en beklemtoon die donker kringe en plooie onder jou oë. Oogomlyner en maskara op die onderste ooglede en wimpers kan ook makliker afsmeer wat verder byvoeg aan daardie ongewenste donker kringe.

Grimeerkunstenaar Cheryl stem saam, gebruik eerder oogomlyner net op die boonste ooglid en probeer die ‘katoogomlyner’ tegniek aan die buitehoek van jou oë met ’n vloeibare oogomlyner wat verder jou oë sal lig.

8. Vul jou wenkbroue

Deur die jare word ons wenkbroue al hoe minder en boonop dalk grys ook. Jou wenkbroue lyk ligter en dunner en so verloor jou gesig definisie. Voller wenkbroue skep ’n raam vir jou gesig en ‘lig’ jou oë.

Kies ’n mat-wenkbroupoeier twee skakerings ligter as jou haarkleur vir ’n naturlike voorkoms. Gebruik ’n skuinsborseltjie en vul enige gaatjies in jou wenkbroue – kort opwaartse hale werk die beste. Kam dan die haartjies netjies in plek met ’n wenkbrouborseltjie.

#rooirosewenk: Laat tint jou wenkbroue en wimpers as jy nie altyd tyd het om jou wenkbroue te vul nie.

9. Natuurlike lippe

Vermy eerder donker of bruin lipstiffies wat jou lippe laat dunner lyk, ons lippe word al hoe dunner soos ons ouer word, kies eerder ’n natuurlike skakering.

Om jou perfekte natuurlike skakering te vind, trek jou mond pruim terwyl jy vir jouself in die spieël kyk. Die kleur aan die binnekant van jou lip (’n paar skakerings donkerder as jou buite lipkleur) sal die vleiendste natuurlike skakering vir jou wees, stel Cheryl voor.

10. Leer hoe om te beklemtoon

Beklemtoner is ’n ouer vel se grootste vriend. “Behendige beklemtoner (highlighter) op jou wangbene, neusbrug, voorkop en kakebeenlyn gee ’n jeugdige glans en trek die oog na jou beste gelaatstrekke toe,” sê Elsa.

Lees ook: Grimeerwenke vir brildraers

The post 10 grimeerwenke vir ’n jonger voorkoms appeared first on rooi rose.

• Hou dit eenvoudig

’n Bril trek baie aandag na jou oë – hou dus jou grimering eenvoudig. Minder is beslis beter. Grimeerghoeroe Bobbi Brown stel voor jy trek ’n lyn bo jou wimpers, gebruik ’n neutrale oogskadu op jou ooglid en ’n dun lagie maskara aan jou boonste wimpers.

• Sê ja vir helder lippe

’n Helder lipstiffie sal enige brildraer se gesig dadelik optof. Kies ’n sterk lip óf sterk ooggrimering, moet liefs nie albei saam dra nie.

• Gee aandag aan jou wenkbroue

’n Brilraam vestig ook die aandag op jou wenkbroue en jou wenkbroue raam verder jou gesig. Maak seker dit is goed versorg. Pluk die oortollige hare en vul kaal kolletjies met ’n wenkbroupotlood of -poeier in, sê Meriek van den Berg, ’n oogkundige by Mellins i-Style wat daagliks met met pasiënte werk.

• Verbloemer is ’n moet

Die glas in jou rame kan moontlik ’n skaduwee onder jou laat. ’n Verbloemer onder jou oë is een van die produkte wat dadelik jou gesig meer helder sal laat vertoon. Kies ’n verbloemer wat een of twee skakerings ligter is as jou huidige onderlaag om enige donker kringe of skaduwee onder jou oë te versag, stel Bobbi Brown voor.

• Gebruik ’n wimperkruller

Om jou wimpers te krul, sal dadelik jou oë groter en meer oop laat lyk. Bonus: as jy langer wimpers het sal dit keer dat jou wimpers teen jou bril se lens vasdruk.

• Werk netjies

As jou voorskrifbril jou oë kleiner laat lyk, skep die illusie van groter oë met ’n fyn, ligte lyntjie onder en bo jou oë. Die teenoorgestelde geld wanneer jou bril jou oë groter laat vertoon. Wees ekstra versigtig met die aanwending, want die vergroting gaan slordige grimering nog opsigteliker maak. Bobbi Brown

• Kies ’n oogskadu met lig-reflekterende tekstuur

Gebruik ’n glinsterende oogskadu op die vou van jou ooglid – onthou teksture wat lig reflekteer trek aandag na jou oë en sal so ook jou oë laat groter lyk, sê Keagan Capito, professionele grimeerkunstenaar van M.A.C Cosmetics

• Trek ’n netjiese lyn

Om seker te maak jou oë staan agter jou brilrame uit, kies ’n 1950’s-benadering tot jou grimering

“Wend ’n donker vloeibare oogomlyner op jou boonste wimperlyn aan – dit sal jou oë raam en definisie gee. Onthou om netjies te werk en ’n mooi lyn te trek” Sê Keagan.

Wenk: gebruik ’n oorstokkie met grimeerverwyderaar om die lyn netjies te maak as jy sukkel om jou lyn netjies en reguit te hou.

• Moenie van blosser vergeet nie

’n Blosser is ’n moet vir almal, of jy nou ’n bril dra of nie – dit is die vinnigste manier om jou voorkoms op te helder en die veelsydigste toording in jou smuktas. Jy kan dit vinnig en liggies oor jou wange, voorkop, ooglede en lippe swiep vir kleur én ’n gesonde gloed.

• Kies die regte onderlaag

“Kies ’n onderlaag wat nie maklik afvee nie en waterdig is. Dit sal voorkom dat onaantreklike lyntjies onder jou bril en aan die kant van jou neus vorm. Jou bril kan ’n skaduwee op jou gesig vorm, so gebruik ’n onderlaag wat een skakering ligter as jou natuurlike velkleur is in hierdie areas. Wend ’n dun lagie aan die ooglid en onder die oë, sê Meriek.

• Wenke vir kontaklensdraers

Meriek stel verder voor dat kontaklensdraers altyd eers hul lense moet insit voordat grimering aangewend word. Dit sal keer dat grimering nie onder die lense beland nie. Die deeltjies kan jou oë laat traan wat grimering loperig kan maak.

Lees ook: Tuiskleur-haarwenke

The post Grimeerwenke vir brildraers appeared first on rooi rose.

Die nuwe HANNONS-Foundation Perfecting Primer kombineer unieke bestanddele om ‘n bevogtige en ‘n satyngladde basis vir ‘n perfekte grimeerafwerking te vorm.

Besoek www.hannon.co.za om die HANNONS-Foundation Perfecting Primer teen slegs R 275 te bestel.

Tien gelukkige lesers kan elk ‘n HANNONS-Foundation Perfecting Primer WEN!

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, vul die onderstaande vorm in.

Sluitingsdatum: 29 Maart 2025

The post 10 gelukkige lesers kan elk ‘n HANNONS-primer WEN! appeared first on rooi rose.

Vyf wenke wat sal help dat jou grimering langer hou

1. Gebruik ’n voorbereidingslagie (primer)

“’n Voorbereidingslagie gee jou onderlaag iets om aan vas te klou,” sê Lucoh Mhlongo, Elizabeth Arden se bekende grimeerkunstenaar. Trevor Rothwell, Dior se nasionale grimeerkunstenaar, sê ’n voorbereidingslagie help ook dat jou onderlaag nie van kleur verander nie, veral vir vroue met ’n olierige of kombinasievel. Dit help ook om jou vel se kleur te korrigeer.

Kies die volgende kleure vir die volgende probleme:

• Rooiheid: kies ’n groenkleureige voorbereidingslagie
• Donker kringe onder jou oë met ’n ligte vel: kies geel
• Donker kolle en verkleuring: kies appelkoos.

Smeer eers jou vogroom aan, en dan ’n voorbereidingslagie oor jou hele gesig (ook oor jou ooglede).

2. Kies ’n onderlaag wat lank hou

“Kies een wat weerstand bied. As dit SPF-beskerming ook bevat, sal dit beter beskerming teen die son bied,” sê Lucoh.

3. Werk sagkens

“Moenie rof werk as jy jou grimering deur die loop van die dag heraanwend nie, anders sal jy jou grimering en onderlaag verwyder. Gebruik ’n ligte sneesdoekie en klad liggies op jou gesig om olie en sweet te verwyder, en wend ’n ligte lagie gepersde poeier aan,” sê Lukoh.

4. Sproei jou gesig

“’n Gesigsproei is perfek vir ’n warm somersdag. Dit hou jou koel, hidreer jou vel en gee jou vel ’n mooi glans. Hou die botteljie omtrent 15 cm weg van jou gesig wanneer jy dit aanwend,” sê Lukoh.

5. Bly koel

“Drink koue water om jou liggaam af te koel en te hidreer, en bly so veel as moontlik in die skaduwee. Dra ligte kleure, ’n hoed en sonbrille,” sê Lukoh.

Lees ook: Bevogtig jou somervel

The post Laat jou grimering langer hou appeared first on rooi rose.

Lipstiffie: Vind die perfekte kleur vir jou vel

Bepaal jou velondertoon

Jou vel se ondertoon moenie met jou velkleur verward word nie. Terwyl die natuurlike kleur van jou vel dít is wat jy kan sien as jy in die spieël kyk (met ander woorde hoe lig of donker jou vel is), verwys jou ondertoon na die skakering onder jou vel se oppervlak. Dit bepaal watter kleur kledingstukke, hare en juwele die beste by jou pas – en dieselfde geld ook vir grimering.

Maak seker jy watter van die drie velondertone jou die beste beskryf.

Koel ondertoon

Hierdie eienskappe beskryf jou goed:

• Jou vel het ’n rooi, pienk of blouerige skynsel.
• Die are aan die binnekant van jou pols vertoon blou.
• Silwer juweliersware lyk die mooiste op jou.
• Jy brand rooi as jy tyd in die son deurbring.

Kies hierdie kleure:

Nes jou velondertoon behoort ’n lipstiffie met ’n koeler ondertoon pragtig by jou te pas. Jy wil dus kleure met blou of perskleurige ondertone hê – dink byvoorbeeld aan ’n skakering van dieppruim en kersierooi (in plaas van ’n rooi wat meer neig na oranje). As jy ’n natuurliker kleur verkies, stel ons voor jy fokus op roos- of pienk vleeskleurige skakerings.

Lees nog: Skoonheidsprodukte: Regpak, wegpak en uitgooi

Warm ondertoon

Hierdie eienskappe beskryf jou goed:

• Jou vel het ’n goue, gelerige of olyfkleurige skynsel.
• Die are aan die binnekant van jou pols vertoon groenerig.
• Goudkleurige juweliersware lyk die mooiste op jou.
• Jou vel word bruin eerder as rooi as jy tyd in die son deurbring.

Kies hierdie kleure:

Warm skakerings is perfek vir jou gelaat en sal jou vel waarskynlik die beste komplementeer. Hier werk lipstiffies in kleure van baksteenrooi-, terracotta-, koper- en oranjerooi die beste.

Neutrale ondertoon

Hierdie eienskappe beskryf jou goed:

• Jou vel het ’n pienk en geel skynsel.
• Die are aan die binnekant van jou pols vertoon blou én groen.
• Jy lyk goed in silwer- en goudkleurige juweliersware.

Kies hierdie kleure:

Daar is werklik nie ’n reg of verkeerd vir diegene met ’n neutrale ondertoon nie – enigiets van ligte vleeskleurige skakerings tot ’n dieprooi sal lieflik lyk. Hier kan dit wel tot jou voordeel wees om jou velkleur in ag te neem. As jy ’n ligte vel het, sal jy goed met ligpienk skakerings lyk. ’n Medium velkleur gaan uitstekend gepaard met ’n lipstiffie in skakerings van ligpers, terwyl ’n donkerder vel pragtig met bessiekleurige lippe lyk.

Hier is ’n paar interessante feite oor lipstiffie

• Het jy geweet dat destydse lipstiffie met bestandele soos dierevet, skaap sweet en die beenmurg van osse gemaak was? Een bestanddeel wat egter steeds gebruik word is visskubbe wat aan lipstiffie sy glans verleen.
• Hoewel ander skoonheidsprodukte gedurende Die Tweede Wêreldoorlog gerasionaliseer was, was lipstiffie egter steeds geproduseer, omdat Winston Chruchill geglo het dat dit mense se gemoedere ’n hupstoot gegee het.
• In die vroeë 1500’s was daar geglo dat lipstiffie oor magiese kragte beskik het. Selfs Koningin Elizabeth het dit geglo en sy het na bewering op die dag van haar dood oor ’n sentimeter dik se lipstiffie aangehad.

Lees nog: Ons top tien-wimperwenke

The post Dis Nasionale Lipstiffie-dag! Vind die perfekte kleur vir jou vel appeared first on rooi rose.

Stap 1

Kry ’n glasbeker met koue water en maak jou grimeersponsie of kwassie nat (jy kan dit ook onder ’n lopende kraan nat maak)

Stap 2

Gebruik nou jou grimeer-skoonmaakmiddel (jy kan haarsjampoe gebruik) en plaas ’n ertjiekorrelgrootte daarvan in jou hand. Vloeibare skoonmaakmiddels is effektief op kwassies wat lanklaas gewas is of op produkte wat moeilik uitwas.

Lees ook: Raad vir wintervel

Stap 3

Druk nou die kwassie in die skoonmaakmiddel en werk die skoonmaakmiddel met jou vingers in die kwassie of sponsie in sodat dit skuim.

Stap 4

Spoel nou die kwassie of sponsie in die glasbeker af as jy water wil bespaar, of andersins onder lopende water. Spoel af totdat daar niks meer grimering uitvloei nie. Poeierbasis grimering was makliker uit as vloeibare grimering terwyl jel-oogomlyner, room-oogskadu en onderlaag dikwels vereis dat jy die kwassie of sponsie ’n tweede keer was en uitspoel.

Stap 5

Druk die kwassie of sponsie versigtig met ’n sneesdoekie of skoon handdoek droog. Druk nou die kwassie of sponsie met jou vingers terug in sy vorm want dit is die vorm waarin dit gaan droog word. Laat lê die kwassie op ’n plat oppervlak.

Lees ook: Verbloem só fyn plooie

Wenke

• Moenie jou grimeerkwassies in die son laat droog word nie – dit verswak die handvatsels en laat die gom mettertyd lostrek.
• Moenie ’n kwassie in ’n beker laat droogword nie. Die vog sal in die handvatsel terugloop en die kwassie beskadig. Vog wat binne die kwassie agterbly, is ’n broeiplek vir bakterieë.
• As jy jou kwaste net op jou eie gesig gebruik, hoef jy dit net eenmaal per week skoon te maak.
• As jy ’n grimeerkunstenaar is, moet jy jou kwaste skoonmaak na elke persoon op wie jy dit gebruik het en moet jy dit gereeld ontsmet met mediese alkohol wat jy by ’n apteek kan koop.
• Volg dieselfde skoonmaakstappe as hier maar vervang net die wasmiddel in sproeivorm met alkohol in ’n spuitbotteltjie.

Lees ook: WEN Vitamien C-velsorg van Sorbet!

The post Was jou grimeerkwassies reg appeared first on rooi rose.

By die onlangse Gala Met was dramatiese oogomlyner ’n groot gunsteling en dit is ook ’n tendens wat nog lank in die mode gaan bly. Sterre soos Gigi Hadid, Kylie Jenner, Shakira, Amanda Seyfried en Demi Lovato se grimering en oogomlyner het perfek gelyk.

As jy die “geen grimering”-voorkoms wil skep, is ’n bietjie oogomlyner en maskara jou beste opsie. Of jy nou daarvan hou om ’n dunner lyn of die katoog-voorkoms bo jou wimpers te skep, kan dit help om die aandag op jou oë te fokus en dit groter te laat lyk. Skep ’n elegante voorkoms met oogomlyner (vir ’n aandjie uit of selfs vir ’n werksdag), en laat jou wimpers so langer lyk.

Corné Visser, grimeerkunstenaar vir Bobbi Brown, se raad

• Wanneer jy oogomlyner aanwend, moet die lyn geleidelik dikker word van binne die oog na buite om ’n katoog-voorkoms te skep.
• Maak seker daar is geen gapings tussen jou wimpers en die oogomlyner nie.
• Gebruik ’n pikswart oogomlyner.
• Rond die voorkoms af met swart maskara.

Kleur ook in tussen jou wimpers

• Trek jou ooglid op deur jou vinger onder jou wimper te sit en dit dan op te trek.
• As jy af kyk, sal dit help om die omlyner makliker aan te wend.
• Gebruik ’n oogpotlood om tussen jou wimpers in te kleur (in die waterlyn van jou oë).
• Maak seker dit is ’n waterdigte potlood (sodat dit nie jou oë brand as jy dalk ’n traan pik nie).
• Maak seker die potlood is nie te skerp nie en ook nie te dik nie.

Om die oogomlyner-tegniek te bemeester, kom nie vir almal ewe natuurlik nie. Dit vat tyd, maar as jy dit eers onder die knie het kan jy daardie perfekte bokkie-oë maklik skep.

Lees ook: WEN ‘n L’Oréal Paris-geskenkpak ter waarde van meer as R1 000!

The post Gebruik oogomlyner vir langer wimpers appeared first on rooi rose.

Agt wenkbroureëls as jy jou wenkbroue laat uitgroei

1 Sit jou haartangetjie weg. “As dit moet, gooi die tangetjie weg en los jou wenkbroue vir minstens ses tot agt weke uit.” Meer en meer haartjies sal nader aan  jou wenkbroulyn groei en jou wenkbroue sal voller lyk.

2 Baie vrouens glo aan ’n wenkbrouserum en ’n mens kan dit gerus oorweeg. Die meeste serums bevat peptiede wat groei van die haarwortels aanmoedig. Onthou, jy moet die serum elke aand gebruik, anders gaan bitter min gebeur.

3 As ’n serum vir jou aan die duur kant is, probeer ’n bietjie kasterolie. Oosterse vroue gebruik dit al eeue lank om haargroei te bevorder. Masseer elke aand ’n klein bietjie olie in jou wenkbroue in.

4 Skilfer die wenkbroue met ’n ligte gesigafskilferaar af. As jy min tyd het, doen dit sommer terwyl jy jou gesig afskilfer en skilfer bo-oor die wenkbroue ook. Jy kan ook ’n ongebruikte maskaraborseltjie gebruik, maar werk saggies.

5 Gebruik ’n jel of waks om die wenkbroue te tem. Ons weet die versoeking is groot om daardie wilde uitgroeihaartjies te pluk maar staan sterk!

6 Gebruik wenkbroupoeier om gate in te vul. Jy sal aan die begin waarskynlik sit met ’n paar dele wat kaler as die res lyk. Vul hulle in met wenkbroupoeier en/of ’n -potlood vir ’n netjieser voorkoms.

7 ’n Bietjie verbloemer kan jou wenkbroue netjieser laat lyk. Daardie haartjies wat in die uitgroeiproses wild en woes staan, kan irriterend wees, want onder meer kleef grimering daaraan. ’n Truuk van baie grimeerkunstenaars is om ’n klein bietjie ver-bloemer net bo en onder die wenkbroue te gebruik wat die wenkbrouvorm mooier laat lyk.

8 Laat ’n wenkbrou-ekspert jou wenkbroue vorm. Jy het nou die harde werk gedoen om jou wenkbroue te laat uitgroei, maar om dit te probeer vorm is nie so maklik nie. Vra ’n kundige om die wenkbroue te vorm en moenie skaam wees om raad te vra oor hoe jy die perfekte vorm in stand kan hou nie.

Vul jou wenkbroue só

Stap 1 Borsel jou wenkbroue se haartjies opwaarts.

Stap 2 Onderstreep jou wenkbrou met ’n wenkbrou-potloood naaste aan die kleur van jou wenkbroue.

Stap 3 en 4 vul “gaatjies/oop spasies” in met ’n potlood (onthou: gebruik opwaarste haaragtige hale) of wenkbroupoeier. Kam weer met ’n wenkbrouborseltjie. Maak seker dit is eweredig en nie streperig nie.

Dit het jy nodig

’n Wenkbroupotlood met ’n borseltjie of ’n wenkbrou-poeier wat ook langer sal hou:

Hooffoto: Alan Chapman/Dave Benett/Getty Images

Lees ook: Ons 20 beste grimeerwenke

The post Hoe om jou wenkbroue uit te groei (en in te kleur) appeared first on rooi rose.

1. Moenie onderlaag weggee omdat jy ’n skakering te lig of te donker gekoop het nie; gebruik dit om te kontoer. Donker om weg te steek en lig om te beklemtoon.

2. Lyk dadelik maerder deur verbronsingspoeier rondom jou gesig van oor tot oor op jou kaak te gebruik.

3. Jou blosser en jou lipstiffie moet in dieselfde kleurfamilie wees; perske-skakerings saam met bruine en oranje lipkleure en pienk saam met pienk of rooi.

4. Skud altyd oortollige blosser van jou grimeerkwassie af om te keer dat jou blosser mors of dat jou wange soos die van ’n “porseleinpop” lyk.

5. Blosser laat ook donker kringe minder sigbaar lyk; die warmer ondertone neutraliseer die kouer ondertoon van jou donker kringe.

6. Gebruik leë pilhouertjies (daardie deurskynende soort waarin jy jou week of dag se pille kan stoor) om lipstiffie wat gebreek het te stoor.

7. As jy gesigpoeier aanwend, vee die kwassie ook sommer oor jou wimpers voordat jy maskara aanwend. Die poeier op jou wimpers sal dit laat voller lyk.

8. Druk jou boonste wimpers liggies terug en trek ’n fyn lyntjie in die binnekant van jou ooglid (die waterlyn) met vloeibare oogomlyner; dit sal jou wimpers voller laat lyk.

9. As jy nie ’n wenkbrou-kammetjie het nie, gebruik sommer ’n ou maskara-borseltjie.

10. ’n Truuk om jou wenkbroue voller te laat lyk: kam dit opwaarts.

11. Jy het nie spesiale wenkbroupoeier nodig nie; jy kan ’n oogskadu wat geen glinsterende dele bevat nie, en ’n skakering donkerder as jou wenkbroue is, saam met ’n ferm kwassie gebruik.

12. As jy jou wenkbroue invul, trek altyd strepies of gebruik die kwassie in dieselfde rigting as jou natuurlike haargroei sodat die strepies of poeier soos haartjies lyk.

13. As jy van plan is om swaarder ooggrimering te gebruik, begin met jou oë en wend daarna jou onderlaag en verbloemer aan. Anders mors die oogskadu dalk op jou wangbene of onder jou oë en dan moet jy weer jou onderlaag afhaal en aanwend.

14. ’n Romerige oogskadu is blitsig om aan te wend as jy haastig is.

15. Gebruik ligte oogskadu met ’n effense glinster in die binne-V van jou oë; dit laat jou oë oper lyk.

16. Vermy donkerblou en swart skakerings op jou oë as jy met donker kringe sukkel; dit sal dit beklemtoon.

17. Rooi lipstiffie is die vinnigste manier om “gedoen” te lyk. ’n Ligte onderlaag, ’n bietjie blosser en maskara is al wat jy nodig het as jou tyd beperk is.

18. As jy moeg is vir jou natuurlike oogskadu en met kleur wil begin eksperimenteer, is diep pers (’n eiervrug skakering) die maklikste en ook ’n kleur wat wonderlik lyk by alle oogkleure. Jy kan dit saam met natuurlike of brons skakerings meng of selfs swart vir ’n meer dramatiese, rokerige voorkoms.

19. Gebruik eerder meer verbloemer om merkies te verdoesel en minder (swaar) onderlaag. Jou vel moet steeds deur jou onderlaag skyn. Kies ’n deursigtige poeier bo-oor om dit langer te laat aanbly.

20. Trek eerder ’n wit hemp as ’n swart hemp aan; die wit reflekteer lig op jou gesig. ’n Donker kleur kan ook donker kringe onder jou oë beklemtoon.

Lees ook: Waag dit om rooi lippe te dra

The post Ons 20 beste grimeerwenke appeared first on rooi rose.