1 Probeer die prettige pixie

As jy fyner hare het, probeer dalk ’n speelse pixie-snit, stel Shelene Shaer (eienaar van TANAZ Hair Body Nails) voor. Dit is ’n jeugdige styl wat baie vroue pas. Hou die snit kort genoeg sodat daar heelwat volume op die wortels is. As die hare te lank is, sal die styl eenvoudig plat lê.

Die pixie-snit is ook perfek vir ouer dames wat graag min tyd aan hul hare wil bestee, maar steeds jonk en modern wil lyk. Kies ’n styl wat jou gesig sal raam (met ’n kuif of daarsonder) en jou beste gelaatstrekke sal beklemtoon, is haarstilis Gary Rom se raad.

2 Die LOB is vleiend

’n Bob of ’n LOB (lang bob) is universeel vleiend vir byna alle gesigvorme en figure. Dit werk vir dun hare, dik hare, krulhare en reguit hare, sê Elsa Kruger, skoonheidskrywer vir verskeie publikasies. Gary Rom stem saam – die lang bob is steeds groot nuus onder oud en jonk. Ideaal vir vroue met fyner hare omdat dit jou hare voller laat lyk en boonop versag dit jou gelaatstrekke en dit laat jou nek langer lyk), wat ideaal is vir die ouer vrou.

Bonus – hierdie styl vereis lae onderhoud en kan in verskeie maniere gestileer word: dra dit reguit, krul dit effens of steek dit vas.

3 Gaan vir grys

Moenie bang wees vir grys word nie. Pak die proses saam met jou haarstilis aan en dit kan ’n avontuurlike reis word, stel Elsa voor. Grys hare is vandag hoogmode en die jonger generasie spandeer baie geld om hul lokke die perfekte grys skakering te kry. Haarstilis Shelene sê die beste sal wees om jou hare uit te groei hoewel min dames kans sien om met ligte wortels en donker punte rond te loop. Daarom stel sy voor dat ligstrepies aangewend word om die proses te versnel totdat jou grys heeltemal uitgegroei het. Dit kan tot ’n jaar neem vir die grys om uit te groei. Die belangrikste is om seker te maak jou hare bly deur die proses gesond. Moet dit nie aanjaag nie, wees geduldig!

#rooirosewenk: Gebruik ’n pers sjampoe of opknapper om te verhoed dat jou hare geel lyk en om die silwer/grys kleur te behou.

4 Hou dit lank

Dit is bog dat ouer vroue nie lang hare kan hê nie. As jy mooi hare het en lang hare jou vlei, kan jy dit dra so lank as wat jy wil. Boonop steek langer hare die plooie in jou nek weg én dit beskerm die delikate nekvel teen sonskade, sê Elsa.

Gary Rom sê ook jy moet vergeet dat jy geleer is om op ’n sekere ouderdom jou hare af te knip. As jy geseën is met gesonde en voller hare, kan jy dit beslis in ’n langer sjiek styl dra.

Kyk net hoe pragtig lyk Jennifer Aniston se lang hare:

5 Knip ’n kuif

Wees slim en knip ’n kuif of sagte lae rondom jou gesig, dit is dit beste manier om op botoks te bespaar! Shelene sê ’n kuif steek die plooie op jou voorkop weg en hare rondom die gesig versag die plooie rondom jou oë. As jy nie ’n kuif wil waag nie, kam jou hare in ’n skuins kantpaadjie, nog ’n vleiende haarstyl wat jou ouderdom sal versag.

Aktrise Anne Hathaway se haarstyl is die perfekte voorbeeld:

Haarwenke vir ouer hare

• Hidreer, hidreer, hidreer!

Net soos ons vel droër word met ouderdom, verdroog ons hare ook. Daarom is dit belangrik om hidrerende produkte te gebruik, stel Gary Rom voor. Kyk uit vir sjampoe, opknapper en maskers wat hidrasie gee. Probeer ook gerus ’n salon-behandeling wat intensiewe hidrasie bied.

#rooirosewenk: As jy voel jou hare benodig nog hidrasie, sluit ’n haar-olie by jou haarsorg-roetine in.

• Hou die blink kant bo

Gebruik ’n stileerproduk wat jou hare glans gee. Ouer hare verloor vinnig glans, maar gelukkig is daar verskeie produkte wat jou hare kan laat blink. Elsa sê daar is niks meer jeugdig as ’n pragtige en goed versorgde haredos nie.

• Beskerm teen hitte

Gebruik ’n produk wat jou hare teen hitte en omgewingsfaktore beskerm – dit sal verhoed dat jou hare enige ekstra vog verloor en boonop lyk jou hare meer gesond en voel sagter.

Lees ook: ‘n Velsorggids vir elke ouderdom

The post 5 haarstyle vir ’n moderne voorkoms appeared first on rooi rose.

Dit is nie sommer net nog ’n kompetisie nie. Dit is die eerste keer dat skoonheids- en welstandstoekennings van hierdie omvang eksklusief in Afrikaans in rooi rose aangebied word. Ons vier die innovasie, gehalte en passie van produkte wat vroue help om op hul heel beste te lyk en te voel.

Laat jou produk skitter

Is jou produk die geheime wapen in duisende vroue se daaglikse roetine? Of dit nou ’n deurbraak in velsorg, luukse grimering, of ’n noodsaaklike welstandsproduk is, ons wil daarvan weet. Deelnemers word nou genooi om hul produkte in te skryf vir ’n kans om daardie gesogte rooi rose-stempel van gehalte te verower. Om te wen, beteken nie net erkenning in die bedryf nie, maar ook direkte blootstelling aan ’n lojale gemeenskap van lesers wat waarde heg aan uitnemendheid.

Sewe kenners, een doel

Om te verseker dat slegs die heel beste produkte bekroon word, het ons ’n gedugte paneel van sewe beoordelaars saamgestel. Hierdie spesialiste, elkeen ’n leier in hul onderskeie velde binne die skoonheids- en welstandbedryf, sal die beoordeling met die grootste sorg en integriteit hanteer. Van wetenskaplike formulering tot praktiese resultate – elke aspek sal onder die vergrootglas geplaas word.

Moenie hierdie kans misloop nie

As jy glo dat jou produk die standaard stel vir skoonheid en welstand in Suid-Afrika, is dit tyd om na vore te tree.

Inskrywings is nou oop! Klik hier vir meer besonderhede en laat jou produk die erkenning kry wat dit verdien.

Lees ook: 10 redes waarom jy rooi rose se Maart-uitgawe móét lees!

The post Is jou produk ’n rooiwarm wenner? rooi rose se skoonheids- en welstandstoekennings is hier! appeared first on rooi rose.

Deur Karlien Meiring. 

Meer as 100 000 follikels bestaan op die kopvel, saam met sweet en talgkliere wat daagliks olie en sebum afskei – en dit alles kan vasgevang word op die hare met daaglikse borsel, sê Penny James, gesertifiseerde tricholoog en stigter van die internasionale Penny James salon.

As jy soms droë sjampoe, jel of haarsproei gebruik, gaan jou borsels dit versamel. Daardie produkopbou, hare en dooie velselle van jou kopvel beland dan in wese terug in jou hare en op jou kopvel as jy nie jou kamme en borsels gereeld skoonmaak nie.

Lees ook: Haarstyle vir fyn hare

Om jou haarborsels behoorlik te week en te was, is belangrik om dit in stand the hou en hul lewensduur te verleng.

Hier is ‘n paar stappe om te volg om jou haarborsels behoorlik te was:

1. Verwyder enige hare in jou haarborsel deur ‘n wyetand-kam te gebruik. Dit sal dit makliker maak om die borselhare skoon te maak.
2. Spoel die haarborsel af onder warm water, maak seker dat enige oortollige hare of produk wat in die borselhare vassit, verwyder word.
3. Vul ‘n wasbak met warm water en ‘n klein hoeveelheid sjampoe of skottelgoedseep. Vir ekstra skoonmaakkrag kan jy 1 tot 2 teelepels koeksoda byvoeg. Roer die water goed.
4. Plaas die haarborsel in die wasbak en laat dit vir ten minste 20 minute week. Dit sal help om enige opgedroogde produk of vuil wat moeilik is om te verwyder, los te maak.
5. Nadat jy dit geweek het, gebruik jou vingers om die borselhare saggies te skrop, sorg dat jy dit nie buig of beskadig nie.
6. Spoel die haarborsel deeglik af onder warm water totdat alle seepskuim verwyder is.
7. Laat die haarborsel heeltemal droog word (die borsel se borselhare moet ondertoe wys) voordat jy dit weer gebruik.

Dit word aanbeveel om jou haarborsels ten minste een keer per maand goed te was, of meer gereeld as jy gereeld produkte op jou hare gebruik.

Lees meer: 10 gewoontes vir gesonde hare

The post Hoe om jou haarborsel behoorlik skoon te maak (en hoekom jy moet!) appeared first on rooi rose.

Haarstyle vir fyn hare deur Suzanne Kotzé. 

Chad Hanna, stilis en eienaar van Chad Hanna Hair Team gee raad

• Lyne met gewig is belangrik

As jy ’n styl kies, onthou dat jy lyne met gewig nodig het; soos ’n bob wat tot net op jou skouers kom, maar met langer, hoekige lyne na voor gesny word om jou gesig te omraam.

Lees ook: 9 wenke vir hemelse hare

(Foto: Alberto E. Rodriguez/Getty Images)

• ’n Eenvoudige bob styl werk goed

’n Bob met ’n eenvoudige, skoon snit wat net om jou ken area val, is ’n goeie keuse.

Lees ook: Werk só met fyn hare

Foto: Wella Proffesionals

• Sê ja vir assimetrie en tekstuur

Die heel beste style vir fyn hare is korter pixie style, wat assimetries of in oneweredige (choppy) lae geknip is.

Foto: Wella Proffesional

• Ligte lae vir skouerlengte hare

Vir die “strand-voorkoms” is skouerlengte hare met ligte lae op jou eindpute ’n goeie keuse. Onthou die regte haarkleur vir jou veltoon is baie belangrik en kan ook jou hare voller laat lyk. Kyk net hoe mooi komplementeer hierdie kleur die snit om die hare voller te laat lyk.

Lees ook: 13 haarwasfoute wat almal maak

Foto: Wella Proffesional

Jean Witte, eienaar van Synergy Hair Salon se raad

• Kies ’n kuif by jou bob

Hierdie tipe bob style werk goed vir fyn hare, en deur ’n kuif te knip laat jy die styl meer edgy voel, en dit laat jou hare voller lyk.

Fotograaf: Tracy Loubser Artistic Imagery; Stilis: Jean Witte

• Kort, met langer hare bo

Hierdie tipe styl waar daar meer lengte bo is en korter onder, laat jou hare dikker en voller lyk en jy kan jou hare glad en netjies dra of meer deurmekaar.

Foto: Wella Proffesional

Lees ook: Somerwenke vir jou hare

Onthou ook

• Hou jou hande uit jou hare! Jy het waarskynlik ’n olierige kopvel as jy fyn hare het, en deur die heeltyd aan jou hare te vat, versprei jy net die olie en maak jy jou hare meer olierig en papper.
• Minder is meer; moenie te veel produkte aansit nie, want dit kan jou hare swaar maak en laat pap hang.
• Sit opknapper net op jou haarpunte aan.
• As jy ’n haarmasker gebruik, spoel jou hare goed uit. Een van die beste wenke wat ek al ooit gelees het, is om jou hare uit te spoel tot jy dink jy het alles uitgekry, en dit weer te spoel.
• Droë sjampoe is nie net vir vuil hare nie; dit is wonderlik vir volume wanneer jou hare plat/pap val deur die dag.
• Seewater sproei is ’n goeie keuse vir meer deurmekaar style.

Lees ook: Raad vir olierige hare

The post Haarstyle vir fyn hare appeared first on rooi rose.

As jou kankerbehandeling haarverlies veroorsaak, sal jou hare (ook die op jou lyf), twee tot vier weke ná behandeling begin uitval. Dit kan vinnig of geleidelik gebeur en jou kopvel kan ook teer voel. Jy kan niks daaraan doen nie, maar jy kan jou daarop voorberei, en frustrasie en angs daaroor beperk.

Voor jy met terapie begin

Behandel jou hare sagkens

• Moenie jou hare permanent golf, kleur of bleik nie; dit beskadig jou hare. Laat jou hare self droog word en vermy stileertoestelle soos haarysters, krultange en warm rollers.
• Oorweeg dit om jou hare te sny. Kort hare lyk voller as lang hare, en haarverlies wys minder. Dit maak ook die oorgang na geen hare minder angswekkend. As jou hare begin uitval, sal dit minder sigbaar wees wanneer jou hare kort is.

Beplan hoe jy jou kop gaan bedek

• Dit is een aspek waaroor jy beheer het. Besluit of jy ’n pruik gaan dra, ’n serp om jou kop gaan bind, of niks gaan doen nie. Vra jou dokter om vir jou ’n voorskrif vir ’n pruik te gee, want sommige mediese fondse kan help om die koste te dek.

Lees ook: Kanker: Wat om te sê en nie te sê nie

Tydens terapie

• Werk saggies met jou oorblywende hare.
• Gebruik ’n sagte borsel.
• Was jou hare slegs wanneer nodig.
• Gebruik sagte sjampoe wat geen kleur, parfuum of sulfate bevat nie.
• Oorweeg dit om jou hare te skeer as jou kopvel geïrriteerd of seer is. Dit kan jou minder verleë laat voel oor haarverlies. 

Lees ook: Borskanker: 5 dinge wat jy móét weet

As jy geen hare oorhet nie

• Beskerm jou kopvel. Uitermatige hitte of koue kan ’n sensitiewe kopvel irriteer, en met min of geen hare sal jy gouer koud kry. Daarby kan jou kopvel selfs in die winter deur die son gebrand word. Gebruik elke dag sonroom.
• As jy ’n pruik dra, haal dit snags en self deur die dag af sodat jou kopvel kan asemhaal.
• ’n Sy-kussingsloop is sag en gemaklik as jou kopvel teer is.
• As jy jou haarwasroetine mis, probeer Charmain van Schalkwyk, nasionale werkswinkelkoördineerder van Look Good Feel Better (LGFB) se raad: Maseer jou kop met natuurlike olies; dit sal nie net jou kopvel laat beter voel nie, maar kan ook help om ’n gesonde omgewing vir die groei van nuwe hare te skep.
• Was jou kopvel met ’n sagte gesigwas. Vermy produkte vir aknee, dit is te skerp vir ‘n teer  kopvel.

Na terapie

• Wees geduldig, jou nuwe hare sal waarskynlik stadig teruggroei. Dit kan anders as voorheen lyk; dalk krullerig of grys, maar namate ou haarselle herstel, kan dit weer verander.
• Jou eerste nuwe hare sal baie makliker breek. Vermy voorlopig stileerprodukte, hittetoestelle en kleur- en bleikmiddel, tot jou hare behoorlik en sterk uitgegroei het.

Lees ook: Trauma na borskanker: vang dit jou?

The post Hare en kanker-behandeling: Wat jy moet weet appeared first on rooi rose.

Jou haarwasfoute

1. Jy maak nie jou hare nat genoeg nie. Jou hare MOET behoorlik nat wees.
2. Jy gebruik te veel sjampoe en opknapper. Jy benodig min of meer die hoeveelheid van ’n 50c-stuk in die palm van jou hand.
3. Jy mors sjampoe deur dit aan al jou hare te wend. Wend dit slegs aan die wortels, want dit is waar die natuurlike olies opbou.
4. Jy gebruik meer sjampoe sodat jy jou hare beter kan was. Gooi eerder ’n paar druppels water by en beweeg jou hande in sirkels.
5. Jy probeer om jou hare skoon te skrob. Onthou: hare is nie wasgoed nie! Jou hare is baie delikaat en jy kan dit beskadig deur te hard te was. So, werk versigtig.
6. Jy was heen en weer. Werk altyd afwaarts, van die wotels na die punte in die natuurlike rigting van haargroei en moenie op en af beweeg nie.
7. Jy gebruik jou vingerpunte te veel. Hierdie is sleg as jy olierige hare het, want jou vingerpunte stimuleer olieproduksie.
8. Jy was jou hare elke dag en dan kry jou hare se natuurlike olies nie kans om jou hare te voed nie. As jy met olierige hare sukkel, moet jy veral probeer om jou hare minder te was.
9. Jy vryf jou hare met ’n handdoek droog. Wees versigtig en klad dit eerder droog of gebruik ‘n T-hemp om die water saggies ‘uit te druk’, dit sal kroeserigheid verminder. As jy jou hare vryf, sal jy dit net beskadig en koek.
10. Jy wend opknapper aan al jou hare. Konsentreer op die mid- tot eindpunte.
11. Jy spoel jou hare nie goed genoeg af nadat jy opknapper aangewend het nie. Dit kan jou hare pap en selfs olierig laat lyk.
12. Lang hare: Jy vergeet om opknapper deur te kam. Begin onder in jou nek en kam dit stukkie vir stukkie uit tot bo.
13. Jy wend opknapper met jou handpalm aan. Versprei dit na jou vingerpunte deur amper te maak asof jy handskud met jou twee hande, handpalms opmekaar en trek dit dan na jou vingers toe sodat die opknapper daaraan vaskleef.

Inligting verskaf deur Tobita Booyens, mede-eienaar van Training and Progression House, wat onder andere haarstiliste oplei.

Lees ook: Wenke vir fyn hare

Lees ook: 10 gewoontes vir gesonde hare

Nuwe trend

Wend eers opknapper aan en dan sjampoe, veral as jy baie fyn hare het wat maklik koek terwyl jy was. Wend opknapper aan, los dit vir ’n paar minute, spoel af en was dan met sjampoe. Ons gebruik daarna haarolie op klam hare om dit makliker uit te kam.

Lees ook: Beskerm jou hare teen hittebeskadiging

The post 13 haarwasfoute wat jy maak appeared first on rooi rose.

Wat is jou top haarwenk, die een belangrike “reël” waarsonder jy nie leef nie?

Dit is uiters belangrik om ’n produk te gebruik wat beskerming bied teen hitte-stilering, veral as dit deel vorm van jou daaglikse roetine. Om in sulke gevalle nie ’n hitte-beskermer vir jou hare te gebruik nie, kan vergelyk word met die effek op jou vel wanneer jy vir drie ure in mid-Desember op die strand baljaar sonder sonblok.

Wat lyk vir jou mooi by ’n vrou met lang hare?

Persoonlik is ek ’n groot aanhanger van die deurmekaar bolla hoog op die kroon – sag en romanties met ’n moeitelose en natuurlike voorkoms.

Wat is die grootste haarfout wat ’n vrou kan maak?

Die meeste vroue verval in die gewoonte om hul hare dadelik met ’n borsel droog te blaas terwyl die hare nog sopnat is. Dit het egter ’n negatiewe effek op die haarskag omdat dit die hare uit hul natuurlike vorm rek, wat veroorsaak dat die hare hul elastisiteit, glans en volume verloor. Die beste stappe om te volg, is om die hare met die vingers tot so 80% droog te blaas en dan eers die borsel nader te trek vir finale stilering.

Wat is jou raad vir vroue met blonde hare?

Met blonde hare is een aspek uiters belangrik – behandeling! Blonde hare is ’n styl wat baie toewyding verg. Dit moet gereeld behandeling word om die hare aan te vul en dan natuurlik is dit bealngrik om ’n produk te gebruik wat sal help dat die kleur nie na ’n geel skakering vervaag nie.

Is daar tuisprodukte wat vroue kan gebruik vir sagter, gesonder hare? 

Vir tuis-gebruik stel ek voor dat jy een keer per week opknapper vervang vir die gebruik van ’n masker. Maskers verhoog die hare se elastisiteit wat die hare sagter, blinker en met meer volume agterlaat.

Wat is die geheim vir ’n tydlose haarstyl?

Ek verkies die natuurlike, moeitelose voorkoms – vir beide mans en vroue. Stilleer-metodes waar meer natuurlike, sagte teksture gebruik word.cDie belangrikste effek van enige haarstyl is dat dit die persoon as geheel moet komplimenteer waar die haarstyl opsigself nie die hoof-aantrekking is nie maar eerder die kroon van ’n alreeds merkwaardige persoon.

Terence Jansen van Vuuren (Foto: Verskaf)

Lees ook: Ons voorbladsterre verklap hul gunsteling-parfuum!

The post Kennerswenke vir gesonde hare appeared first on rooi rose.

Volg die volgende wenke vir wanneer jy besluit om jou hare tuis te kleur:

1. Moet jou hare vir minstens twee dae voor jy dit kleur, nie was nie. Vermy ook enige produkte wat sal keer dat die kleur jou hare binnedring, veral produkte soos haarpoeier en haarwaks.
2. As jou hare langer as skouerlengte is, sal jy twee bokse kleur benodig.
3. Jy kan jou hare of wortels elke 4 tot 6 weke weer kleur.
4. Wend ’n klein bietjie Vaseline om jou haarlyn om te keer dat die kleur jou vel vlek (dit sal ook maklik afvee).
5. Gebruik ’n donker handdoek oor jou skouers om jou klere te beskerm.
6. As jy jou hare gereeld kleur en net jou wortels wil kleur, wend eerste die kleur aan jou wortels en los vir 15 minute – hierdie stap verseker dat jou wortels die kleur eerste absorbeer. Maak oor seker jy werk tot op die wortel-area.
7. Wend hierna die kleur van die mid-lengtes tot die punte van jou hare vir tien minute om te verseker die kleur op die wortels en die kleur op die punte is dieselfde skakering.
8. Nadat jy jou hare gekleur het, kam sagkens met ’n kam deur om seker te maak al die hare is gekleur.
9. Onthou een van die goue reëls van tuiskleur is om nie meer as twee skakerings donkerder of twee skakerings ligter as jou huidige kleur te kies nie.
10. Hou altyd ’n rekord van die kleurskakering wat jy gebruik – knip die kleur se nommer uit of neem sommer ’n foto met jou selfoon sodat jy die skakering vir volgende keer sal onthou.

Nasorg

Onthou: dit is belangrik om ekstra aandag aan jou hare te gee, nadat jy dit gekleur het. Gebruik ’n weeklikse hidrerende haarmasker.

Lees ook: Jy kan jou eie haarmasker maak

The post Tuiskleur-haarwenke appeared first on rooi rose.

Beskadigde en droë hare

Klapperolie is ’n fantastiese, liggewig bevogtiger vir jou hare. Meng met olyfolie om jou hare te voed.

Metode: Meng 2 koppies klapperolie met 1 koppie olyfolie. Meng goed en smeer aan jou hare, veral aan die punte. Draai jou hare in ’n bolla bo-op jou kop, bedek met ’n stortkappie en laat rus vir 15-30 minute (afhangende van hoe beskadig jou hare is.) Spoel jou hare goed af en was soos gewoonlik.

Lees ook: 10 grimeerwenke vir ’n jonger voorkoms

Versterkingsbehandeling

Rou eier is ’n kragtige voedselsoort. Dit is ryk in vette en proteïene en dis ’n natuurlike hidreerder. Weens die hoë gehalte van ensieme, verwyder eier ook ongewenste olies en versterk dit jou hare. Vir normale hare, gebruik die hele eier. Vir olierige hare, gebruik net die wit; en vir ’n droë of bros hare, gebruik net die eiergeel.

Metode: Klits ½ koppie eier liggies en smeer aan skoon, klam hare. As daar nie genoeg eier is om die kopvel en hare te bedek nie, gebruik meer eier. Hou die mengsel vir 20 minute aan. Spoel met koue water en sjampoe die hare. Gebruik maandeliks vir goeie resultate.

Lees ook: 10 gelukkige lesers kan elk ‘n HANNONS-primer WEN!

Dowwe hare

Oormatige gebruik van stileringsprodukte asook blootstelling aan lugbesoedeling kan ’n film op die hare laat wat vog uitdroog en natuurlike glans verwyder. Suiwelprodukte soos suurroom en gewone jogurt bevat melksuur wat vuilheid liggies afstroop, die hare hidreer asook die skade behandel.

Metode: Masseer ½ koppie suurroom of gewone jogurt deur klam hare en laat rus vir 20 minute. Spoel af met warm water, gevolg deur koel water. Sjampoe soos normaalweg. Vir goeie resultate, behandel jou hare elke tweede week op hierdie manier.

Lees ook: Die geheim van sagte lippe? Rooibos! Probeer hierdie skrop

Produk-opbouende hare

Te veel produkte wat op die hare begin opbou, kan met koeksoda behandel word. Die natriumbikarbonaat breek alle suur af. Wend dit aan in ’n pasta-vorm. Dit sal produk-opbou voorkom.

Metode: Meng 2 eetlepels koeksoda met klein hoeveelhede water tot ’n dik pasta begin vorm. Masseer in klam hare en laat rus vir 15 minute. Spoel hare met water af en sjampoe daarna. Behandeling kan elke twee weke toegepas word.

Lees ook: Ons 10 beste haarwenke

The post Jy kan jou eie haarmasker maak appeared first on rooi rose.

Wenke vir gesonde hare hierdie somer deur Corné Greeff. Hooffoto: Unsplash

Van die grootste foute wat mense maak

• Elizma Crous, opvoedkundige bestuurder van Modern Hair & Beauty sê, “van die grootste foute wat mense maak is om hulle hare self te kleur en nie by die salon nie. Hulle gebruik ook die verkeerde produkte. Gewone kleur wat jy by die huis aanwend het die geneigdheid om jou hare se kondisie en gesondheid te beskadig. Daarenteen  bevorder professionele kleur en tuissorg-produkte jou hare se kondisie en help dat jou hare gesond bly.”
• Angela Smith meen dat “mense vergeet hoe belangrik dit is om die regte behandeling in die salon te kry. Dit is nie altyd genoeg om net jou hare self by tuis te behandel nie.”
• Elizma Crous, opvoedkundige bestuurder van Modern Hair & Beauty stel voor dat wanneer jy donker hare het jy eerder nie ’n drastiese transformasie moet ondergaan en jou hare probeer blond maak nie. Dit gaan net jou hare beskadig. “Wanneer jy wel besluit om dit te doen moet jy jou haarstilis vra om iets soos die WellaPlex te gebruik wat jou hare sal beskerm.”
• Maak jou hare op verskillende hoogtes vas. Jou haarbandjie beskadig die gedeelte van jou hare waar jy dit heeltyd vasmaak.
• Onthou om altyd jou hare 2 keer met ’n reiniger te was voor jy jou opknapper aanwend, so maak jy seker dat al die vuiligheid verwyder is.

Lees ook: Maak jy enige van hierdie 13 haarwasfoute?

Wat jy eet, is belangrik

Die hare wat jy sien (jou haarskag) is dalk dood, maar terwyl dit vorm, is dit lewend. Elke haarvlies waaruit die haar gevorm word, bestaan uit ’n netwerk van senuwees, bloed en spiere. Die bloedvaatjies in jou haarvlies stel voedingstowwe aan die lewende selle vry soos wat hulle in verhoornde proteïene verander wat by jou kopvel uitgroei.

Die voedingstowwe wat jy deur jou dieet inkry, is ook wat jou hare voed en die kondisie beïnvloed.

Goeie koskeuses vir jou hare is:

• Eiers (’n bron van proteïen en biotien)
• Bessies (anti-oksidante en vitamiene soos veral vitamien C)
• Vetterige vis (omega-3)
• Patats (vitamien A)
• Avokado’s (vitamien E, essensiële vetsure en anti-oksidante)
• Neute (vitamien E, B, sink en essensiële vetsure)
• Soetrissies (vitamien A en C)
• Garnale (proteïen, vitamien B en D, sink en yster)
• Bone (proteïen, yster, sink, biotien)
• Vleis (proteïen en yster).
• Maak ook seker jy drink genoeg water!

Lees ook: Hoekom heuning goed vir jou vel en hare is

Begin jou somer met ‘n goeie haarsny

Maak sommer al voor jou vakansie of wanneer jy meer tyd in die son, see en swembad gaan deurbring vir jou ’n haarafspraak. So kan jy ontslae raak van droë- en gesplete punte voor dit nog erger raak.

Indien jy voel dat jou hare weer begin droog word, moet jy dalk eerder weer jou punte laat sny.

Moenie bekommerd wees nie, jou hare groei gewoonlik vinniger gedurende die somermaande.

Elizma Crous, opvoedkundige bestuurder van Modern Hair & Beauty stel voor dat jy minstens elke 8-12 weke jou hare se punte laat sny en dan sommer ook jouself bederf met ’n behandeling vir jou hare by die salon.

Lees ook: 8 dinge wat jy moet weet voordat jy jou hare blond kleur

Beskerm jou hare teen die son en ander omgewingsfaktore

Die son en ander omgewingsfaktore beskadig nie net jou vel nie, maar kan jou hare ook baie erg beskadig, Ulrica Maia, tegniese raadgewer by JOICO se beste raad is, “die regte tuissorg is baie belangrik wanneer dit kom by beskerming teen omgewingsfaktore. Glo dit of nie, maar besoedeling kan veroorsaak dat jou hare breek, sy glans verloor en ook veroorsaak dat jou hare sy kleur vinniger verloor.”

Angela Smith beveel ook aan dat jy produkte gebruik wat  UV-beskerming bevat en jou hare so min as moontlik aan die son en ander omgewingsfaktore bloot te stel wat dit kan beskadig.

Maak daarvan ‘n gewoonte om ’n hoed te dra wat jou hare beskerm teen die son se strale. Dink net aan die skade wat die son aan jou vel kan aanrig, dus is dit belangrik om jou hare ook teen die son te beskerm. ’n Lekker sonhoed sal nie net jou hare beskerm nie, maar ook jou kopvel, ore en ander areas wat sensitief is vir die son.

Lees ook: Selverbruining – sonder die geel strepe!

Beskerm jou hare teen hitte

Tarryn Aboud, opvoeder by ghd se beste raad is, “gebruik altyd ’n hitte-beskermingsproduk voordat jy jou hare stileer.”

Ulrica van Joico sê, “Dit is baie belangrik dat jy ook hitte-beskermingsprodukte gebruik wanneer jy jou hare was en droogblaas, asook die dae daarna wanneer jy dit weer stileer. Jou hare begin te smelt wanneer dit aan temperature van meer as 205 °C blootgestel word en wanneer jou hare nie beskerm word nie is dit amper asof jou hare ’n slagoffer met baie erge brandwonde is.”

Lees ook: Die mooiste lipstiffies wat jy hierdie somer moet dra

Gee jou hare ‘n ruskans

Angela Smith meen “wanneer jy jou glansende hare wil terughê, moet jy jou hare minder stileer, werk saam met jou hare se natuurlike styl deur dit nie elke dag met ’n warm-stileerder te stileer nie.”

Laat jou hare self droog raak, of maak ’n vlegsel voor jy gaan slaap, Slaap met ’n vlegsel en word wakker met golwende hare.

Mya Holder, haarstilis by Gary Rom se beste raad is, “onthou, wanneer jou hare nat is “rek” dit en wanneer dit droog word, krimp dit weer. Moet eerder nie jou hare styf vasmaak in ’n bolla of poniestert nie, want dit sal veroorsaak dat jou hare breek.”

Lees ook: Vakansieskoonheid SOS

Borsel gereeld jou hare

Deur jou hare gereeld te borsel, stimuleer jy die bloedsirkulasie na jou kopvel. Sodoende word jou haarwortels gevoed en bevorder dit die hare se groei, omdat beter bloedsirkulasie sorg dat daar meer suurstof en voedingstowwe na jou haarfollikels gaan.  Maak ook seker jy vervang gereeld jou haarborsel, wanneer dit lyk of dit al beter dae gesien het, is die kanse groot dat dit het. ’n Wyetand-kam werk ook beter as ’n gewone haarborsel. Gewone borsels sal jou nat hare trek en dit dan laat breek.

Lees ook: 20 dinge wat jy moet weet voordat jy ’n bikini-waks kry

Kies produkte wat jou hare bevogtig

Elizma Crous, opvoedingkundige bestuurder van Modern Hair & Beauty meen, “‘n goeie bevogtiger vir jou hare net so belangrik soos water vir jou liggaam. Onthou om altyd ’n opknapper te gebruik na jou reiniger. Gebruik ook ’n masker op jou hare elke vyfde keer wanneer jy jou hare was, asook wanneer jou hare begin droog voel, of wanneer jy baie tyd in die swembad of see deurgebring het.”

Lees ook: Leer jouself weer liefkry

Slaap op ‘n sy-kussingsloop

Slaap op ’n sy-kussingsloop, dit verminder wrywing terwyl jy slaap en trek nie aan jou hare soos gewone katoen of linne nie. Sy help ook jou hare en vel om bevogtig te bly terwyl jy slaap.

The post Wenke vir gesonde hare hierdie somer appeared first on rooi rose.

Deur Suzanne Kotzé. Foto: Theme Photos vir Unsplash

Shelene Shaer, mede-eienaar van Tanaz Hair in Johannesburg gee raad:

1. Wees geduldig

So baie mense besoek die salon en verwag dat hulle binne ’n dag blond gaan wees. Dit werk nie so nie. Dit is ’n lang proses en dit rig skade aan jou hare aan. As jy jou haarstilis aanjaag, is die kans goed dat jou hare geel of oranje gaan uitkom. Hoe stadiger die bleikmiddel aangewend word en hoe meer tyd jy dit gee om reg te ontwikkel, hoe beter is jou kanse om nie hierdie oranje ondertone te kry nie.

“Tyd, moeite, sorg en geld; dit is wat jy benodig hiervoor.”

2. Beplan jou “blond-word” reis

Kommunikasie is belangrik. Bespreek hoeveel tyd, geld en moeite jy bereid is om te spandeer om blonde hare te kry met jou haarstilis. Wees ook duidelik oor hoe blond jy jou hare wil maak, want daar is baie verskillende skakerings. Beplan saam die verskillende stappe en jou besoeke aan die haarstilis.

Byvoorbeeld:

Besoek 1: Donkerbruin na rooibruin balayage

Besoek 2: Rooibrun balayage nou na goue balayage

Besoek 3: Goue balayage na ’n ligter skakering.

3. Donker wortels is gelukkig in die mode

Balayage (donkerder wortels wat geleidelik verander na ligter punte) of skadu-wortels (die meer subtiele weergawe van balayage) is gelukkig op die oomblik in die mode. Met hierdie tipe kleurstyl hoef jy nie so gereeld te kleur soos wanneer jou wortels ook lig moet wees nie.

4. Dit kos tyd en geld

Dit gaan nie net duurder kos omdat jy jou hare moet kleur nie, maar omdat die proses skade aan jou hare aanrig, gaan jy ook gereeld vir behandelings by jou salon moet gaan. Dit verg tyd en ekstra geld. Jy moet seker maak jy is bereid om die moeite te doen om jou hare op te pas.

5. Wees eerlik oor jou “kleur-geskiedenis”

Dit is belangrik dat jou haarstilis presies weet watter kleur en produkte jy die afgelope twee jaar op jou hare gebruik het. Dit kan beïnvloed hoe jou kleur gaan uitkom.  Wees eerlik hieroor, selfs al weet jy jou stilis gaan nie noodwendig daarvan hou om te hoor jy het “boks-kleur” gebruik of self jou hare probeer bleik twee jaar terug nie …

6. Dis baie belangrik om self tuis vir jou hare te sorg

Gebruik pers sjampoe om geel en oranje ondertone te neutraliseer. Gebruik ook sjampoe, opknapper en ’n masker wat jou hare (wat nou ekstra breekbaar is) sal voed.

Lees ook: Jy kan jou eie haarmasker maak

7. Vermy hitte-stilering

Hitte-stilering soos krultange en haarysters kan jou hare geler laat voorkom. Jou reeds beskadigde hare sal danksy die bleikmiddel ook meer breekbaar wees. Wag eerder tot die proses voltooi is, jou kleur reg is en jou hare weer in ’n goeie toestand is.

8. Die ondertoon van jou vel is belangrik

Probeer gerus die webtuiste Matrix. Hiermee kan jy virtueel jou haarkleur verander en sien watter tipe blond by jou vel se ondertoon pas.

Lees gerus: 5 haarstyle vir ’n moderne voorkoms

The post 8 Dinge wat jy móét weet voordat jy jou hare blond kleur appeared first on rooi rose.

Ervaar die skoonheidsrevolusie met L’Oréal Paris en hul produkte wat met hialuronsuur geformuleer is. Sê totsiens aan droë vel en hare en “hello” vir ‘n wêreld van bevogtigting en glans.

Revitalift Filler serum: Ontdek die krag van hialuronsuur om plooie te verminder en ‘n jeugdige gloed te verkry. Die Revitalift Serum gebruik die hidrerende eienskappe van hialuronsuur om jou vel binne net 1 uur weer plomp te maak*. Gebruik dit saam met die oogserum vir nog meer voordele.

Elvive Hydra Hyaluron sjampoe en opknapper: Transformeer jou haarsorgroetine met die magie van hialuronsuur. Die Elvive Hydra Hyaluron-reeks is spesiaal geformuleer om ontwaterde hare aan te spreek en laat dit voller en blinker lyk.

True Match onderlaag: Vind jou perfekte skakering-pasmaat terwyl jy die hidrerende voordele van hialuronsuur geniet. Geniet ‘n foutlose gelaat wat natuurlike skoonheid uitstraal en die hele dag hou.

Colour Riche lipstiffie: Geniet die luuksheid van plomp, gehidreerde lippe wat ‘n blywende indruk laat met hierdie hialuronsuur-lipstiffies.

Sluit aan by die skoonheidsrevolusie en omhels die opwinding van hialuronsuur-produkte van L’Oréal Paris. Maak gereed om jou innerlike glans te omhels en met selfvertroue enige seisoen met gehidreerde, plomp en glansende skoonheid aan te pak.

Staan ’n kans om ‘n hialuronsuur-geïnspireerde geskenkpak ter waarde van meer as R1000 te WEN!

Dit sluit die Elvive sjampoe en opknapper, True Match onderlaag, Color Riche lipstiffie, Revitalift Filler serum, en Revitalift Filler oogserum in.

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, volg @rooirose op Instagram en voltooi die onderstaande vorm:

Sluitingsdatum: 22 Mei 2024

The post WEN ‘n L’Oréal Paris-geskenkpak ter waarde van meer as R1 000! appeared first on rooi rose.

Stap 1

Stap 4

Lees ook: 9 wenke vir hemelse hare

The post Werk só met fyn hare appeared first on rooi rose.

1. Beskerm altyd jou hare teen hitte, droogblaas, krultange en haarysters.

Ons sê probeer:

• TRESemmé Heat Defense Spray (R 120 by Clicks)
• Umberto Giannini Heat Protection Spray (R 160 by Clicks)

2. Laat jou hare af en toe natuurlik droog word.

3. Gebruik minstens een keer per week ’n haarmasker.

Lees ook: Jy kan jou eie haarmasker maak

Ons sê probeer:

• Pantene Pro-V Mask Smooth & Silky (R 130 by Clicks)
• Elvive Hydra Hyaluronic Moisture Wrapping Hair Mask (R 133 by Clicks)

4. Wees versigtig met nat hare. Hare breek makliker wanneer dit nat is, die reël is om nat hare te kam en droë hare te borsel. As jou hare baie koek wanneer dit nat is, wend ’n paar druppels haarolie aan en kam saggies deur.

Lees ook: Hoe om jou haarborsel behoorlik skoon te maak (en hoekom jy moet!)

5. Laat sny gereeld jou haarpunte, so raak jy ontslae van enige dooie punte en jou hare lyk gesonder en varser.

6. Eet gesond. ’n Gesonde, gebalanseerde dieet bevorder ’n gesonde kopvel en so ook gesonde hare.

7. Gebruik produkte spesifiek geskik vir jou hare. As jy droë hare het, gebruik ’n hidrerende sjampoe, as jy olierige hare het gebruik ’n “clarifying” sjampoe en opknapper.

Lees ook: 13 haarwasfoute wat jy maak

8. Slaap op ’n sy kussingsloop, dit verminder wrywing terwyl jy slaap en trek nie aan jou hare soos gewone katoen of linne nie.

9. Maak altyd jou hare op verskillende hoogtes vas. Om jou haarbandjie daagliks op dieselfde plek vas te maak, beskadig daardie gedeelte van jou hare.

10. Beskerm jou hare teen die son. Net soos ons vel, is dit belangrik om ons hare teen die son ook te beskerm, nes enige hitte-stilering maak die son ook jou hare droog. Die son kan ook moontlik veroorsaak dat jou haarkleur vaal word.

Lees ook: Beste somerskoonheidswenke

The post 10 gewoontes vir gesonde hare appeared first on rooi rose.