Dra gordels só. Deur Bea Lingenfelder. 

Ons het ’n paar kitswenke saamgestel waarop jy hierdie winter ’n ogie moet hou.

Gordel-moets

Onthou hierdie punte wanneer jy ’n gordel koop en aantrek.

Hou die gespe stylvol

Hoewel die bonkiger trend nou hoogmode is, beteken dit nie jy kan jou gordel met daardie groot cartoon-karakter uit jou kinderjare onder in jou kas gaan uitgrawe en dit weer dra nie. Fokus eerder op die breedte van die gordel as die grootte van die gespe. Dit is belangrik dat jou gespe en gordelband in verhouding met mekaar is. Dus, hoe breër die gordel om jou lyf, hoe groter kan die gespe wees. Ons is gaande oor die tendens waar daar baie detail op die gespe is: Dit is minimalisties, maar steeds besonders en uniek.

Pas by die geleentheid

’n Mens sal verbaas wees hoe groot ’n verskil gordels aan jou voorkoms kan maak – die kleur, grootte en styl speel alles ’n rol in die afronding van jou uitrusting. ’n Klassieke swart of bruin gordel bly ’n wenner vir enige geleentheid. As jy egter ’n meer formele geentheid, soos ’n troue, bywoon, is die gewilde silwer gordel ’n goeie keuse. Dun gordels word as tydloos beskou en smelt dikwels makliker by jou uitrusting in. Helder kleure het egter die afgelope paar seisoene die voorgrond ingetree en ons moedig jou aan om ook ’n gordel in jou gunsteling kleur te koop vir daardie avontuurlustige dae!

Lees ook: Verleng jou trui se lewe

Koop met ’n doel

Wil jy hê die gordel moet by jou uitrusting pas of moet dit uitstaan? Gordels wat die hooffokus van ’n voorkoms is, vereis dikwels dat die res van jou uitrusting eenvoudig moet wees. Dit beketen egter nie jy hoef “vervelig” aan te trek nie: ’n Kleurvolle gordel wat saam met ’n effekleurige uitrusting stileer word, vertoon ’n opvallende prentjie. Swart van kop tot toon is altyd ’n gewilde keuse, omdat dit die gekleurde gordel net nog meer laat uitstaan. Ontwepers soos Paul Smith bewys ons dat ’n mens ook met teksture in plaas van kleure kan eksperimenteer. Dra byvoorbeeld ’n blinker-gordel saam met ’n woljas of trui van dieselfde kleur en skep só ’n buitegewone effek aan jou voorkoms.

Gordel-moenies

Vermy hierdie algemene slaggate.

Té dun gordel

’n Dun gordel is die veilige opsie vir alle voorkomste, behalwe as jy die nuut-en-nou-trend wil probeer met oorgroootte baadjies en bonkige truie. ’n Dun gordel kan dan maklik tussen jou lae verdwyn en verloor sy doel. As jy dit saam met lospassende items wil aantrek, kies ’n breedte wat net so wyd is soos die breedte van jou vier vingers (sonder duim), sodat dit jou middel steeds beklemtoon. ’n Dun gordel werk goed by fyner style, soos knopieshemde of fyn gebreide truie.

Nie te lank wees nie

Daardie lang lip wat om jou lyf flap is net ’n irritasie en dis glad nie vleiend nie. Maak seker jou gordel is groot én klein genoeg vir jou liggaam. Meet jou gordel om jou heupe as ook jou middel en maak seker daar is een of twee gaatjies aan elke kant sodat jy dit volgens jou ligaamsgrootte en styl kan verstel.

Spaar op gordels

Gordels is iets waarby almal kan baat, of jy dit dra as tendens, of om jou broek bo te hou. Belê in ’n egte leergordel wat duursaam is en lank sal hou. Die gesegde “goedkoop koop is duur koop” is beslis hier van toepassing. Indien jy ’n buitegewone gordel koop om ’n tendens na te boots, is dit egter nie noodsaaklik om jou beursie dun te koop nie, veral as jy weet dit is net ’n tydelike kopie. Elke vrou moet ten minste een swart en/of bruin gordel besit van egte leer – dit pas by alles en sal jou nooit in die steek laat nie.

Lees ook: 9 modefoute wat jy onbewustelik maak

The post Dra gordels só appeared first on rooi rose.

Die 7 gewildste bykomstighede vir winter 2019 deur Susra Matthee en Bea Lingenfelder. Hooffoto: Country Road

1. Slangveldruk

Glibberige velle het hul oomblik op vanjaar se herfs/winter-loopplanke gehad, veral slangvel- en luiperddruk het koning gekraai onder die dierepatrone.

Hierdie tendens was in alle kleure en style te sien – van die natuurlike en werklike kleur tot juweelskakerings – en die goeie nuus is dat dit steeds gewild gaan bly!

Lees ook: Die mooiste modedinge onder R500

Enkelstewel (POA) Witchery

2. Booghandvatsels

Die handsak met ’n booghandvatsel word deur ’n stewige struktuur gekenmerk. Die handsak behou sy vorm wanneer jy hom neersit en dis ook makliker om iets daarin te kry.

#rrWenk: Hierdie styl handsakke werk ewe goed by ’n T-hemp en denims as vir ’n deftiger aandjie uit.

Lees ook: Ons top 10 winteritems

Handsakkie (R699) Witchery

3. Groot serpe

Serpe is nie net prakties in die kouer maande nie, maar dit maak ook ’n modestelling!

Die oorgrootserpe is nou weer net so gewild soos die kleiner syserpies. Bind die kleiner serpies om jou kop of handsak vir ’n moderne voorkoms, terwyl ’n snoesige, groot serp knus om jou nek gedraai word.

Lees ook: Die eenstuk, ’n item vir elke seisoen

Serp (R220) Queenspark

4. ’n Gordel uit die tagtigerjare

Moenie vergeet van die jare tagtig se dik middellyf-gordels nie. Bind ’n gordel oor jou truie, rokke, baadjies en jasse, want hierdie winter vereis ’n gedefinieerde middellyf.

Lees ook: Wat het ons gedink? 10 trends wat ons laat kopkrap

Fluweelgordel (R49.99) Mr Price

4. Slouchy-stewels

Staan opsy, perdrystewels. Indien jy die winter daaraan dink om stewels aan te skaf, maak seker dit is ‘n paar afsakstewels. Dit beteken ’n paar ingekrimpte voue en ‘n pyp wat redelik wyd om die been sit. Dra die stewels veral saam met rompe en rokke.

Stewel (R449) Call It Spring

6. ’n Handsak wat laag hang

Skuins oor die lyf, of om die skouers geswaai, die jare sewentig se handsakke met lang skouerbande is met mening terug. Die sewentigerjare se palet van sjokolade- en botterskorsiekleur gaan nêrens heen nie.

Boonop kan hierdie handsakke saam met enigiets gedra word – en dis ook geskik vir die dag en aand.

Handsakkie (R1990) Willow Tree

7. Hoofbedekkings

Jy is nie die winter volledig geklee as jy nie ‘n hoed op jou kop het nie. Jy kan uit hordes style kies – van bucket, fedoras, fascinators (’n gestruktureerde hoed met baie versierings) tot snoods en mussies om ‘n paar te noem.

Wat ook al jou bui, daar is ‘n hoed wat daarby pas.

Mussie (R199) Old Khaki

Verbruikersgids

Witchery

Queenspark

Mr. Price

Call It Spring

Willow Tree Designs

Old Khaki

The post Die 7 gewildste bykomstighede vir winter 2019 appeared first on rooi rose.

Als wat jy moet weet oor blomkranse deur Bea Lingenfelder en Susra Matthee. Hooffoto: Pexels

Blomkranse van toeka tot nou

Van troues, musiekfeeste tot net ’n koffie-afspraak, hierdie kopversiering is al ’n geruime tydjie gewild. Hoewel blomkranse die afgelope paar jaar weer hoogmode is, het bruide aanvanklik hierdie kroon as ’n simbool van romanse, feesviering en vrugbaarheid gedra. Adelikes soos dié uit Griekeland het weer hul dankbaarheid aan voorvaders bewys en oorwinnaars van hul weermag se prestasies vereer deur blom- of blaarkranse aan helde te oorhandig.

Sedert die jare sestig het blomkranse ’n kenmerk van die hippie-beweging geword en dit was veral gewild by musiekfeeste. Hoewel daar nie ’n spesifieke gedokumenteerde betekenis agter hierdie modegier bekend is nie, beweer modekenners dat die kranse juis in teenstryd teenoor die simbool van troukranse gestaan het – vir die hippies het dit vryheid, onafhanklikheid en sorgeloosheid verteenwoordig.

Bekende blomkranse

Rembrandt se bekende skildery, Flora, is ’n uitbeelding van sy swanger vrou, Saskia van Uylenburgh, wat ’n blomkrans dra om vrugbaarheid in die aarde en vroue te simboliseer.

Marie Antionette het ’n blomkrans na spesiale geleenthede gedra om haar status as adelike voor te stel.

Frida Kahlo is bekend vir haar meer manlike modestyl en leefstyl vir die tyd, maar na haar troue het sy ook meer tradisionele Meksikaanse vrouemodes aangeneem. Tesame met die swaar borduurwerk op bloese en rokke is haar hare met baie blomme versier wat later deel van haar ikoniese figuur geword het.

Elizabeth Taylor het ’n blomkrans van hiasinte tydens haar troue met Richard Burton gedra.

Die sanger Lana del Rey het oornag bekendheid verwerf vir haar moderne liedjies met ’n “vintage“-gevoel – veral uitgebeeld in haar musiekvideos en kleredrag. Dramatiese blomkranse is kenmerkend aan haar modestyl wat leen by die hippies. Jonger generasies het onlangs ’n belangstelling in hierdie tydperk ontwikkel en daarom glo modekenners dis die rede hoekom hierdie sanger se modestyl so gewild is om na te boots.

Die tydskrif Vogue is bekend vir hulle buitegewone voorblaaie en het sedert die jare sestigs hul voorbladmodelle met blomkranse versier. Jean Shrimpton was een van die eerste Vogue-modelle wat met ’n blomgestalte op die voorblad gepronk het. In 2017 het Elle Fanning met haar porseleinpop-gelaat op die voorblad verskyn met ’n sagte pienk rooskrans en rok van eenderse kleur. Hierdie jaar het die bekende sangers Beyoncé en Rihanna tegelyk op Vogue se September-voorblaaie verskyn. Die Beyoncé-voorblad van die Amerikaanse Vogue het bestaan uit ’n elegant-gekleede sanger in wit met en juweelkleurige blomme wat jou so amper aan ’n Renaissance-skildery laat dink. Die Britse Vogue met Rihanna is kontemporêr, modern en helder. Die sanger is met neonkleurige klere en helder blomme vertoon wat jou die gevoel van ’n tipiese popkultuur-kunswerk gee.

The post Als wat jy moet weet oor blomkranse appeared first on rooi rose.

Deur Zané Wegner. Hooffoto Pexels

Hier is 10 redes hoekom ons mal is oor mussies:

1. Niks kan ’n bad hair day so goed wegsteek soos ’n mussie nie – veral as die oorsaak waterbeperkings of die Kaap se nare suidooster is.
2. Daar is iets omtrent mussies wat, nes serpe en stewels, nooit uit die mode sal gaan nie en altyd ’n klassieke, tydlose item bly.
3. Die bonus van mussies is dat dit jou kop en ore heerlik warm en snoesig hou.
4. Daar bestaan ook nêrens een soort of styl mus nie. Speel met style in dik, bonkige wol of klein stekies breiwerk.
5. As dit só koud is buite, is dit nie prakties om jou juwele saam met jou uitrusting uit te stal nie, kies eerder ’n pragtige mus met jou uitrusting.
6. ’n Mens moet nooit bang wees om vurige rooi of sonskyngeel te dra nie: ’n Tikkie kleur hier en daar bring vrolikheid op enige grou dag.
7. Probeer om nie net eenkleurmusse te dra nie, speel met verskillende patrone.
8. Jy hoef nooit te wonder of ’n mussie saam met jou uitrusting sal pas nie – mussies is sjarmant en lyk oulik by als.
9. Mussies gee ons net daardie snoesige gevoel. As jy mussies dra weet jy dit is koud, maar slegs koud van buite – en warm van binne.
10. Mussies is ’n moeitelose item wat jy halfpad by die deur uit oor jou kop kan trek en steeds mooi lyk.

Lees ook: Brei ’n mussie

The post 10 Redes hoekom ons mal is oor mussies appeared first on rooi rose.

Deur Bea Lingenfelder. Hooffoto: Pexels

Om heupsakkies te dra het nie in (of eerder, om) almal se broek gesit nie. Boonop was dit geensins vleiend vir jou figuur nie. Maar met die die voordele dat albei jou hande vry is, jy nie ’n swaar gewig oor jou skouer hoef te dra nie, en dat dit boonop kan dien as ’n gordel, kon ontwerpers soos Gucci dit nie weerstaan om hierdie sakkie met ’n kinkel terug te laat keer nie – en dit het lekker skelmpies ons onkant gevang! Ons deel met jou ’n paar veranderinge, nuwe style en hoe om heupsakkies te dra.

Steeds klassiek

Vir diegene tussen ons wat vasklou aan dié ouer styl: Heupsakkies kom nou in kleurryke materiale voor en word met blinkers en borduurwerk versier. Jy kan dit steeds om jou heup dra soos in die verlede, maar die nuutste gier is eintlik om dit soos ’n skouersakkie skuins oor jou lyf te laat hang. Kies ’n grootte wat by jou pas – eerder kleiner as te groot – en onthou dat dit nie jou klere moet skeefdruk as dit oor jou lyf hang nie. Ons hou ook van hoe Kim Kardashian-West dit onder haar baadjie dra om makliker aan en uit te trek.

The post Heupsakkies is terug! appeared first on rooi rose.

Deur Bea Lingenfelder. Hooffoto pixabay. 

Een

’n Silwer handsakkie kan jou staatmaker-uitrusting in ’n oogwink vernuwe.

Twee

Silwer juwele was nog altyd gewild, maar waag dit bietjie meer hierdie seisoen en fokus op geometriese vorms saam met blaar- en diermotiewe.

Lees ook: fokus op oorringe

Drie

’n Paar silwer tekkies kan die oplossing wees om jou donker, welige, winteruitrusting woema te gee.

Vier

’n Futuristiese tema is in al die nuutste modes te sien en al besluit jy om net ’n bietjie silwer by te voeg, kan dit jou op ’n subtiele dog modieuse manier laat deelneem aan dié nuut-en-nou-trend.

Vyf

Wie kan nou die kenmerkende voorkoms van ’n sneeukoningin in wit en silwer weerstaan?

Ses

Silwer pas saam met net mooi enigiets! Ja, jy kan dit selfs saam met goud dra.

Sewe

Silwer en jou gunsteling klein swart nommertjie bly altyd ’n wenresep.

Agt

Het jy ’n dag-tot-aandgeleentheid aan? ’n Silwer aangliprok werk perfek saam met ’n denimbaadjie deur die dag. Verruil die baadjie later vir ’n syserpie en hakke.

Nege

Silwer mode beteken nie meer net daardie rubberige metaalglans nie. Silwer gare word nou in woltruie en jasse ingeweef vir ’n stylvolle wintervoorkoms. Blinker-afwerkings is ook gewild op die moue van hemde, truie en broeksome.

Tien

As jy steeds nie oortuig is dat silwer die kleur vir jou is nie, kan jy altyd veilig speel met ’n silwer belt. Hierdie item sal altyd ’n tydlose item by enige uitrusting bly, of dit nou hoogmode is of nie.

Gaan loer gerus in die winterstylgids van ons Mei 2018-uitgawe vir silwer items waarmee jy kan rondspeel!

The post 10 redes hoekom silwer en winter pasmaats is appeared first on rooi rose.

Deur Bea Lingenfelder Hooffoto: pexels.com

Nuwe lengtes

Skouerlengte-oorringe is vir ’n rukkie al groot nuus en baie gewild. Boonop pas dit amper by enige styl of gesigvorm. Dit kan jou nek slanker laat lyk, maar in dieselfde asem kan dit net so vinnig jou neklyn laat verdwyn … Dus moet jy ’n lengte kies wat vir jóú reg is: die onderste punt van die oorring moet net-net oor jou skouer skuur as jy jou kop draai. As jy ’n meer dramatiese voorkoms wil probeer, eksperimenteer met oorringe waar die punte op jou sleutelbeen rus. Hierdie opvallende lengte skep ’n verslankende illusie en boonop beklemtoon dit jou sleutelbeen. Die laasgenoemde styl werk baie goed by oopskouer-toppies, waar jou skouer en sleutelbeen ontbloot is. Maak seker dat jou hemp nie te besig is by jou skouergedeelte nie, byvoorbeeld met valle en borduurwerk, want dit kan die doel van die oorringe teenstaan.

Buitengewone knoppies

Ons almal het daardie klassieke paar diamantjies of pêrels en hoewel dit tydloos en veilig is, moedig ons jou aan om ’n bietjie te waag. Jy sal verbaas wees hoe baie ’n paar eenvoudige knoppie-oorringe jou voorkoms kan beïnvloed! Die style van die tagtigerjare keer op die loopplanke terug, maar nie almal van ons is groot aanhangers van daardie kenmerkende effekleurknoppe en -hoepels nie. Die styl word gemoderniseer met borduurwerk, blinkers en diamant-afwerking wat jou ’n fokusitem van 2018 bied. Kies ’n grootte wat by jou gesigvorm en ore pas – moenie ’n knoppie die grootte van ’n R5-munt forseer as jy klein ore het nie.

Kies slim met diamante 

Wie kan nee sê vir ’n skitterende diamant? Diamant-oorringe is sinoniem met deftig en jy sal nooit verkeerd kan gaan met ’n klassieke enkelstring-oorring of -halssnoer nie. Ontwerpers soos Dior bewys egter ook dat meer soms mooier kan wees, maar daar is tog ’n dun lyn wat die waarde van jou diamant-bykomstighede bepaal. Replikas (“costume jewellery“) het veroorsaak dat dit moeilik is om tussen egte en nagemaakte juwele te onderskei. Ons moedig jou aan om in ’n duursame ontwerp te belê as dit moontlik is. As jy op ’n kandelaarstyl besluit, dra dit alleen as fokusitem.

#rrwenk: Te veel blink of diamante saam kan vinnig nagemaak lyk, waar ’n meer klassieke styl dikwels in waarde styg.

Speel met motiewe

Ons is baie opgewonde oor al die motiewe en vorms wat tans in bykomstighede voorkom. Tropiese woude, diere, vrugte, geometriese style, hoepels en balle … Dit maak dit soveel makliker om jou uitrustings in ’n knipoog op te kikker. Nou het jy geen verskoning om vaal te lyk (en te voel) nie. Selfs jou klassieke style kan vernuwe word met ’n moderne motief. Ons moedig jou aan om met al hierdie keuses te eksperimenteer – vind ’n oulike dieremotief wat tot op jou skouer hang en trek dit saam met ’n maksirok of denim aan. Blaarmotiewe word deesdae herhalend op loopplanke gesien in winter- en somertrends. Maak seker jy het ten minste een waaghalsige styl wat jy op daardie spesiale geleenthede kan uithaal en met selfvertroue dra.

Meng materiale

As buitengewone vorms effens te uitdagend vir jou voel, kan jy altyd met materiale rondspeel. Tossels is orals te sien en word elke keer met net nog meer drama bekendgestel! Pom-poms bied ’n speelsheid vir beide jou voorkoms én gemoed. Dit kom boonop dikwels in helder kleure voor, wat beteken dat jy nie in die oggende jou kop hoef te krap oor hoe jy jou uitrusting interessant kan maak nie – voeg ’n paar pom-pom-oorringe by en trotseer die dag met ’n huppel in jou stap.

Is jy lief vir uitdagings? Meng verskillende materiale bymekaar, byvoorbeeld skulpe saam met pom-poms, of vere, stene en tossels.

The post Fokus op oorringe appeared first on rooi rose.

Teks en Hooffoto: Bea Lingenfelder

Groot oorringe is groot nuus in die modewêreld, veral die kandelaar- en hoepelstyle. Hoewel groter deesdae as beter beskou word, raai ons jou aan om seker te maak jy kies ’n grootte wat by jou nek en gesiggrootte pas. Langer oorringe kan jou nek mooi slank laat lyk, maar sodra dit té groot vir jou proporsies is, kan dit die teenoorgestelde effek hê. Maak seker jou oorring skuur net so liggies bo-oor jou skouer, sodat dit steeds maklik en vrylik beweeg as jy jou kop draai. Net daardie bietjie beweging skep die illusie van ’n lang, verslankende nek. As jy eerder ’n korter styl soek, maak seker jou oorringe eindig dan parallel met die punt van jou ken. As jy baadjies of kraaghemde dra, maak seker jou oorringe verdwyn nie tussen die voue nie of oorweeg eerder ’n halssnoer as jou fokusitem.

Halssnoere word ook met oud en nuut gekombineer. Laag op laag word gedra met ’n fyner ketting bo en ’n groter, bonkiger en meer moderne styl na onder. Moet egter nie te veel lae dra nie – twee of drie is genoeg. ’n Langer halssnoer skep die illusie van ’n langer bolyf – kies dus een wat net bo jou naeltjie eindig om te verhoed dat jou bolyf in twee gedeel word. Let ook op na die bloes wat jy dra – As jy ’n v-nek hals het, kies ’n halssnoer wat saam met die v-nek hang, een met ’n hangertjie aan die onderpunt.

Kry gerus die April 2018-uitgawe van rooi rose vir nog wenke rakende die bonkig-en-besonderse-style.

Agter-die-skerms-foto’s

Fotograaf: Niquita Bento

Hare en grimering: Cheryl Parker van Supernova

Model: Kayla Hansen van Boss Models

Moderedakteur: Susra Matthee

Agter-die-skerms-foto’s: Bea Lingenfelder

The post Agter die skerms by ons April-modefotosessie appeared first on rooi rose.

– Deur Bea Lingenfelder Hooffoto: Twitter Follow @AnneMichelleBH

Strooimandjies of -sakke is een van die stapelitems hierdie somer. Deur die jare is dit vir huisdekor, pieknieks en see-uitstappies gebruik, maar danksy die modekenners kan hierdie item nou in die plek van ’n handsak gedra word. Hoewel Jane Birkin dié modetrend reeds in 1970 aan die wêreld voorgestel het, het modekenners soos Alexa Chung en Camille Charrière tydens 2017-modeweke weer met strooi-bykomstighede aan hul arms gepronk.

The post Strooimandjies: Jou nuwe somer-gunsteling appeared first on rooi rose.