Louis en Albert was vir reekse soos Fynskrif, Troukoors en Die boekklub verantwoordelik en hulle het met Fraksie beslis weer ’n groep merkwaardige karakters geskep.

Edwin van der Walt, bekend vir sy werk in teater, in TV-reekse soos Fynskrif, Troukoors en Waterfront en in flieks soos Wonderlus en Die pro, vertolk die rol van Schalk Smit. Schalk is ’n beleggingsportefeuljebestuurder by T&M Holdings, wat aan die miljardêr Tiaan du Toit, behoort. Schalk se groot droom is om ’n dollarmiljoenêr te word en niks sal in sy pad staan om dit te bereik nie. Op die oog af is hy warm en vriendelik, maar onder alles skuil ’n sakeman wat nie bang is om kanse te vat nie. Hy is trots op sy rugbyspelende seun, verdra sy rebelse dogter en het ’n komplekse verhouding met sy vrou. Schalk is oorspronklik van Kimberley en smag daarna om tot die binnekring van Stellenbosch se elite toegelaat te word.

Karlien Meiring het by Edwin van der Walt gaan uitvind wat dit verg om so ’n komplekse karakter te vertolk en of dit sy lewensuitkyk as jonggetroude verander het.

Jy speel ’n komplekse karakter in Fraksie. Hoe het jy daarop voorberei om die pa, man en ambisieuse sakeman te vertolk?

Louis en Albert se tekste gee klaar vir ’n akteur al die “bestanddele” met die volronde akteurs wat hulle skep. Jy moet dan net die resep volg en jou eie speserye byvoeg om jou karakter in te kleur. Ek is nie ’n pa nie en dit was dus uitdagend. Dit was wel vir my makliker omdat ek teenoor Roeline Daneel, wat ’n ma is, gespeel het. Sy het baie gehelp om daardie omgewing natuurlik te skep. Ek het ook tyd saam met Alex van Dyk en Jana Malan, wat my kinders speel, deurgebring sodat ons ’n band kon vorm en só vertroue kon ontwikkel. My ervaring as kind het my ook gehelp.

Ek is onlangs getroud wat my gehelp het om Schalk as man te vertolk. Ek en Roeline het so lekker teenoor mekaar gespeel – sy is ʼn warm, talentvolle en lieflike mens en was bereid om saam met my “tennis” voor die kamera te speel. Ons het die meeste van die tyd op stel saamgelag hoewel ons in die tonele meeste van die tyd op mekaar gil.

Ek kon baie van myself in Schalk se gedrewe kant sien. Ons het onlangs ’n onderneming begin en ek het daar geleer dat die bestuur daarvan jou vereis om altyd die beste keuses te maak, al maak dit jou ongewild. Schalk word maklik gesien as iemand wat oor ander mense loop, maar hy het wonde uit sy grootworddae en verlede. Ek wou wys dat daar ’n rede vir sy komplekse morele kompas is. Dit was seker my grootste uitdaging, om impulse te ontwikkel wat heeltemal anders as my eie is en nie op empatie gegrond is nie. Ek kon regtig kanse met my spel vat.

As jy enige ander karakter in Fraksie kon vertolk, wie sou dit wees en hoekom?

Ek is mal oor die karakter Bibi, Nina se suster. Ek dink die karakter is ‘n enorme uitdaging om te vertolk. Mense maak haar dalk af as ’n interessante karakter wat vir bietjie humor sorg, maar daar’s groot weerloosheid agter haar dryfkrag. Dit moes as ’n akteur ’n lieflike karakter gewees het om in te delf. Om daardie humor met soveel weerloosheid te kon uitbring, sou vir my ‘n groot uitdaging gewees het en dus ook vir my die lekkerste gewees het.

Hoe was jou en Izel se wittebrood? Waar het julle dit gevier en wat is jou hoogtepunte?

Ons wou oorspronklik Thailand toe gegaan het, maar het toe besluit Turkye was ‘n beter keuse omdat ons al soveel goeie dinge daarvan gehoor het. Ons het nie verwag dat dit só ongelooflik lekker sou wees nie! Kappadosië, die streek waar die lugballonne in die oggend opstyg, was ’n groot hoogtepunt. Die atmosfeer in daardie klein woestyndorpie was amper magies. Ons het in ‘n grot-hotel gebly en kon sien hoe die lugballonne saam met die son opkom, dit was ’n ongelooflike ervaring. Daar is regtig nie woorde of eers foto’s wat daardie tipe mooi kan vasvang nie. Die immergroen kusdorpie Kaş, was net so lekker met sy nou stegies en restaurante met lewendige musiek. Ons het ook op ’n antieke teater afgekom wat my net weereens laat besef het dat as dié teater ná al die jare nog bestaan en saak maak, moet daar tog ’n doel met teater wees. Ek is mal oor kosmaak en het aan Turkye se frikkaddelkoftas gesmul, ek het dit seker sewe keer bestel!

 

View this post on Instagram

 

A post shared by Marguerite van Eeden (@margueritevaneeden)

Bron: @margueritevaneeden Foto: @robynnephotographyby

Het jou karakter, Schalk, jou iets geleer oor hoe om ’n goeie huweliksmaat te wees?

Hy het my beslis baie geleer oor watter tipe huweliksmaat ek nié wil wees nie! Ek het raakgesien hoe selfsug en narsisme iets is waarvan ’n mens baie bewus moet wees omdat dit maklik is om onbewustelik in gewoontes te verval waar een mens altyd die besluite maak. ’n Mens moet doelbewus jou maat in ag neem sodat julle nooit ophou om mekaar te ken nie. Schalk vra nooit in Fraksie vir Nina wat haar drome is en of hy haar kan help met haar eiendomsagentskap nie. Dis ‘n les wat ek en my vrou by ons ouers ook geleer het; dit wat vir jou huweliksmaat belangrik is, moet jy ook belangrik ag en voortdurend in belangstel.

Met watter karakter wat jy al vertolk het, identifiseer jy die meeste en hoekom?

Daar is iets in elke karakter wat ek altyd moet vind waarmee ek kan vereenselwig. Die aspekte van die karakter waarmee ek dalk nie kan vereenselwig nie, vereis dat ek soortgelyke oomblikke in my eie lewe gaan soek wat ek met die karakter s’n kan vergelyk. In elke karakter wat ek al vertolk het, is daar iets van my. Ek hou byvoorbeeld altyd dagboek vir ‘n karakter waarin ek hul gedagtes en idees neerskryf. Dis nie altyd maklik as akteur om hierdie ongemaklike deure oop te maak wat ’n mens weerloos maak nie. Ek voel egter dis my verantwoordelikheid om eg te wees sodat kykers hulself of iemand wat hulle ken, in ’n karakter kan raaksien. Ek het al gevind sulke eerlike toneelspel is waarby kykers ook die meeste aanklank vind.

Moenie Fraksie op Dinsdae om 20:00 op kykNET (DStv-kanaal 144) misloop nie. Dit is ook op Catch Up beskikbaar.

Volg Edwin op Instagram!

Lees meer: Vyf-vinnige-vrae-Vrydag met die Suid-Afrikaanse avonturier Chris Bertish

The post Vyf-vinnige-vrae-Vrydag met Fraksie-akteur Edwin van der Walt appeared first on rooi rose.

Nóg Suid-Afrikaanse bekendes en hul troetelkinders! – Deur Zoë Salzwedel. Hooffoto: Pixabay

Lees ook: Plaaslike bekendes en hul troetelkinders!

Zak Hendrikz

Die gewilde akteur, vervaardiger en regisseur is mal oor donkies – tot dié mate dat hy selfs met hulle boer! Zak en sy vennoot, Jesse Christelis, se plaas en onderneming is op ’n kleinhoewe buite Randfontein geleë waar hulle met donkies van ’n baie skaars en gesogte bloedlyn teel – ’n bont donkie met blou oë.

Saam het Zak en Jesse in 2012 The Donkey Diary gestig, en ook besluit om voorheen mishandelde donkies te koop en te rehabiliteer. Teen Oktober 2016 het Zak en Jesse (persoonlik) meer as 250 donkies gerehabiliteer en uitgeplaas. Dié taak val onder hul sekondêre maatskappy, Donkeys and dwarf goats SA.

The post Nóg Suid-Afrikaanse bekendes en hul troetelkinders! appeared first on rooi rose.

Die Afrikaanse akteur Arno Greeff is skaars 22 jaar oud en het reeds ’n rits verskynings in films en op televisie gemaak – insluitende sy debuutverskyning op kykNET se gewilde sepie Binnelanders plus die reeks wat ’n sepie geword het, Getroud met Rugby. Vir sy nuutste rol vertolk hy die karakter van Texan Kirby in die film-weergawe van Anoeschka von Meck se boek, Vaselinetjie. Ons het met Arno oor hierdie rol, sy belangstellings en sy toekomsplanne gesels.

Jy vertolk die rol van Texan Kirby in die film Vaselinetjie. Hoe het jy voorberei vir so ’n komplekse karakter?

Ons het ’n hele paar dae aan repetisies spandeer saam met Corné van Rooyen (regisseur) waar die karakter begin vorm vat het. Vandaar het ek besluit om sy raad te volg en ’n dagboek te hou waarin ek die lewe, soos Texan dit sou ervaar, neergeskryf het. Dit het baie gehelp om ’n agtergrondstorie vir die karakter te ontwikkel en van daar af was dit makliker om die emosie te vind in elke toneel.

Voel jy daar is ooreenkomstes tussen jou en Texan?

Vir ’n lang tyd was ek ook, soos enige ander tiener, kwaad vir die lewe en het maar baie kwaad geraak – nes Texan. Soos hy het ek ook nie gedeal met goed in my lewe nie, maar nou het ek al vrede gemaak.

As jy vir Texan in een sin moet opsom, wat sou dit wees?

Die rebel met ’n rede.

Anoeschka von Meck het die boek geskryf waarop die film gebaseer is. Het jy ooit die boek gelees en het julle ooit kans gehad om met Anoeschka te gesels?

Ek moet bieg, eers nadat ek uitgevind het ek is deel van die fliek, het ek die boek gelees. Dis moeilik want almal het ’n verskillende prentjie van die boek en die karakters, so ek het maar net probeer om dit uit te beeld soos ek die karakter verbeel het toe ek die boek gelees het. Ek het Anoeschka eers ontmoet die aand van die première by hierdie jaar se Silwerskermfees. Sy’t my darem gegroet so ek glo ek het die karakter regverdig met my vertolking.

Hoekom dink jy is ’n film soos Vaselinetjie, wat sosiale kwessies uitbeeld, belangrik?

Films het die krag om lewens te verander. As die regte fliek vir die regte mense gewys word kan dit inspireer, motiveer en help om mense te transformeer. Mense het soms nodig om hulleself te sien in die karakters en stories op die skerms voordat hulle kan vrede maak met sekere goed in hul lewens of kan oorspring in aksie as dit nodig is.

Jy geniet duidelik TV en film, maar doen jy ook verhoogwerk?

Ek sou graag wou, maar die teaterwêreld is ’n moeilike een om by in te kom. Ek begin nou maar my eie stukke te skryf met die hulp van ’n paar vriende sodat ek weer op die verhoog kan wees.

Jy doen glo ook videoverwerking en redigering. Wat is dit wat jou laat belangstel in hierdie “agter die skerms”-tipe werk?

Ek was nog nie deel van ander programme nie maar ek doen deeltyds advertensies vir klein besighede en doen soms ook sketse saam met ander akteurs. Ek het ook nou saam met ’n vriend ’n produksiemaatskappy begin. Ek hou daarvan om stories te vertel en die hele proses daarvan te beleef. Van skryf tot kamerawerk, klank, regie, redigering en dan soms nog bemarking ook. Ek was nog altyd iemand wat nooit uitsonderlik goed in een ding was nie, maar altyd ’n bietjie van als wou doen. Ek probeer om van al die verskillende fassette van die bedryf te leer.

Wat is jou belangstellings buiten toneelspeel?

Ek is baie lief vir musiek: ek speel kitaar en sing meestal in my aftyd. Verder hou ek daarvan om aktief te wees. Ek speel een keer ’n week rugby en/of sokker en ek probeer om 5 keer ’n week by die gym uit te kom.

The post Ons gesels met akteur Arno Greeff van Vaselinetjie appeared first on rooi rose.

Vaselinetjie (oftewel Helena Bosman) woon by haar liefdevolle ouma en oupa in ’n klein dorpie in die Noord-Kaap. Op 10-jarige ouderdom word sy na ’n weeshuis in Gauteng gestuur omdat sy wit is en nie haar bruin grootouers se biologiese kleinkind is nie.

Dit is 1993 en Suid-Afrika staan op die rand van onherroeplike verandering en soos die land transformeer, word Vaselinetjie ’n jong vrou.

Die weeshuis in Johannesburg is ’n vreemde, ongenaakbare en gevaarlike wêreld van skomgatkinders en kwaai koshuismoeders; van entjies rook, hare afskeer en planne maak om te whallap (weg te loop). Daar traak niemand hulle oor jou nie, en leer jy ook om jou oor niemand te traak nie. Dit is eers wanneer Vaselinetjie verlief raak op ‘Texan Kirby’, ’n aantreklike, vurige kinderhuisseun dat een van haar grootste uitdagings aangespreek word: Die waarheid oor haar herkoms.

‘Vaselinetjie’ is ’n film oor die soeke na identiteit en die lang oorlewingstog om te ontdek wie jy werklik is. Die film is ’n huldeblyk aan die krag van die menslike gees, die mag van liefde en ons vermoë om ten spyte van alle struikelblokke te triomfeer.

Die film is deur Corné en René van Rooyen tot draaiboek verwerk en Corné is ook verantwoordelik vir die film se regie. Saam was hierdie paartjie ook die medeskrywers en -vervaardigers van die film ‘Hollywood In My Huis’ wat in 2014 vrygestel is. René was die draaiboekskrywer en regisseur van ‘Mooirivier’ (2015) en Corné het die regie van ‘Sy Klink Soos Lente’ (2016) behartig.

Nicole Bond en Marguerite van Eeden maak onderskeidelik hulle silwerskermdebuut as die jong en ouer weergawes van Vaselinetjie Bosman. Die rolverdeling sluit ook in Arno Greeff, Elzet Nel, Elani Dekker, Marise Loots, Anchen du Plessis, Daniah de Villiers en veteraanakteurs Royston Stoffels en Shaleen Surtie-Richards.

‘Vaselinetjie’, word op 22 September 2017 vrygestel.

Kyk hier na die amptelike lokprent

The post Vaselinetjie se lokprent bekendgestel appeared first on rooi rose.

Vertel ons van jou karakter.

Bruce is ’n manipulerende wolf in skaapklere wat op ander teer. Hy is ’n skurk wat smokkel met gesteelde goedere en die leier van ’n groep latte wat die dorp rot en kaal besteel. Bruce se bravade is gegrond op die feit dat hy alles weet van almal op die dorp, sodoende kan hy op enige gegewe oomblik ’n gevaar wees vir iemand.

Wat van die teks het jou aangegryp?

Suid-Afrika se filmindustrie is besig om uit sy nate te bars. Ons sien hoe skrywers, regisseurs en filmmakers meer kanse begin vat met die stories wat vertel word. Nul is Nie Niks Nie is vol dinamiese drie-dimensionele karakters wat ten volle hul stemme laat bulder in hierdie brawe film. Die film het hart en praat met verskeie teikenmarke. Ek dink die hoeveelheid hart in die storie is iets wat my aangegryp het.

Wat was die lekkerste en moeilikste deel van jou rol?

As akteur streef ek altyd daarna om uitdagende rolle by die horings te pak. Ek het ingeloop by die oudisie vir Bruce met die minste verwagtinge. Ek het glad nie gedink die rol was vir my beskore nie. Nietemin het ek alles gegee tydens die oudisie. Die oproep het gekom en ek het begin met my voorbereiding. Die lekker ding van Bruce is sy absolute verontagsaming van reëls. Hy doen soos hy voel en net wat hy wil. Die moeilikste deel van Bruce was om die oomblikke te vind waar sy menslikheid hom kniehalter en wat sy reaksies sal wees. Hy sien menslikheid amper as ’n swakheid en wanneer sy eie menslikheid hom bedreig, weet hy nie hoe om te reageer nie.

Die tema is aangrypend. Wie dink jy moet die fliek sien?

Ek glo almal moet dit sien. Daar is baie storielyne waarby verskillende mense aanklank kan vind. Die temas van lewe en dood, om aktief en passief deur die lewe te verkeer, maak vir ’n baie inspirerende verhaal.

Luan Jacobs en Francois Jacobs

Hoekom sal jy sê moet veral ouers die fliek gaan kyk?

Ek hoop dat dit diskoers kan vorm tussen kinders en ouers en dat hul verhoudings sal groei. Daar is baie liefde en empatie vir veral die drie hoofkarakters is onvermydelik. Dit is ’n ongelooflike storie vir oud en jonk.

Wat is vir jou die somtotaal van hoop? 

Empatie. Daar is baie lig in die harte van mense wat die tyd neem om aktief iemand anders te help. Ek dink die wêreld sal ’n beter plek wees as meer mense begin om vir mekaar om te gee.

Hoe was dit om saam met Dania, Jaden en Pieter te werk?

Dit was ’n fees. Hulle was uiters professioneel en vriendelik op stel. Ons het vriende geword. Jaden het die vermoë om die perfekte “selfie” te neem met enige iemand se foon! Pieter het my gat geskop in Pokemon Go. Dania is die vriendlikheid self.

Wat beteken vriendskap vir jou?

Vriendskap en familie is alles.

Wat sal jou altyd bybly van die film?

The post Luan Jacobs oor Nul is Nie Niks Nie appeared first on rooi rose.

Pierre van Pletzen wat tans as Manie Kraaywinkel op kykNET in PHIL 101 te sien is, hou sommer baie van hierdie quirky, onvoorspelbare, eksentrieke ou met sy unieke manier van dink. Kan ook nie anders nie – Pierre is ook nie juis ’n hoofstroomdenker nie.

Hy ryg deesdae die produksies in. Naas PHIL 101 het hy ook onlangs aan Meerkat Maantuig gewerk, ’n rolprent wat op Riana Scheepers se boek Blinde Sambok gegrond is.

Aanhangers van sy 7de Laan-karakter, Oubaas, het niks te vrese nie. Pierre het nog genoeg tyd vir die Laan.

“Sedert ek op ’n roepbasis by die Laan is, is dit makliker. Almal moet maar meet en pas.”

Dit was vir hom heerlik om saam met regisseur Johan Cronjé aan PHIL 101 te werk. Johan was ook medeskrywer en onder sy leiding kon Pierre die karakter analiseer en uitbou.

“Dit was nie maklik om Manie te speel nie. Trouens, geen rol is rêrig maklik nie. Wanneer ’n akteur sê ’n rol is ‘maklik’, probeer hy nie hard genoeg nie. Dit was ’n goeie en uitdagende kombinasie van makliker en moeiliker tonele.”

PHIL 101 word as ’n “histeriese” komedie beskryf en die wanfunksionele filosofiedepartement aan die Sentrale Universiteit van Suid-Afrika beloof om die kykers voor die TV vasgenael te hou. Die reeks word op kykNET (DStv 144) uitgesaai en sluit akteurs in soos Frank Opperman, Bennie Fourie, Retief van der Liefde, Stiaan Smith en die nuweling Cintaine Schutte. Dis ’n spanpoging wat satiriese vermaak op sy beste verseker.

Die sentrale karakter, Phillip Coetzee, is idealisties, wanaangepas en effe vreemd. Sy menseverhoudinge is nie van die beste nie en hy word aan die diep kant ingegooi toe hy hoof van die departement word. Hy is ’n man met baie boekekennis en min mensekennis!

Die karakters, soos die antagonistiese baas, Dok Knipoog Knoetze en natuurlik ook Pierre se Manie, is groot pret.

Die skrywers het vreemde karakters geskep om met die werklike lewe die draak te steek. Die mense en hul verskille, asook die vreemde eksentrisiteit wat van elke karakter ’n individu maak, sal die kyker laat voel hy ken baie mense wat net soos die karakters in die reeks is.

Spelers soos Philippus Boshoff, Marie Molefe van Heerden, Corné Koegelenberg, Mila Guy, Sandra Vaughn, Bibi Slippers en Elma Postma maak ook ’n draai op die skerm en elke karakter kry lewe uit die pen van teksskrywer Jakus Eloff van Binnelanders-faam.

Die skrywer en regisseur van die reeks het ’n gesofistikeerde, nuwe soort komedie geskep, sê Anneke Villet, ’n opdraggewende redakteur van die reeks. “Dit het ’n tong-in-die-kies aanslag en elke karakter is outentiek.”

Die vervaardigers is hoogs in hul skik dat hulle twee sulke ervare komedie-akteurs soos Pierre en Frank in die rolverdeling het. Dit is die eerste keer in dekades dat hulle weer saamwerk.

Dit was nie vir Pierre so moeilik om ná jare as Oubaas direk in ’n nuwe rol te klim nie. “Natuurlik is dit maklik om na sewentien jaar van 7de Laan in Oubaas se vel te klim. Maar nou kom ander faktore ter sprake, soos tegniek, ervaring, inlewing en ’n vars benadering.”

Foto: Hema Patel

Hy vat beslis nie ’n rol of karakter huis toe nie.

“Dalk gebeur dit in die eerste paar jaar van jou toneelspelery maar as ’n geskoolde en geslypte werker neem tegniek en ervaring oor en dit word baie makliker om jou in ’n nuwe rol in te werk.”

Hy sal wel ’n ogie daarop hou en sy regisseur ook vra om seker te maak dat hy nie van Oubaas se maniërismes oordra nie. “Maar aan die ander kant is iets nuuts weer so ’n stimulasie dat die adrenalien en muse sterker werk.”

Hy is baie dankbaar dat hy sy ervaring as TV-akteur kon bou op die fondament van die eerste dekade van sy loopbaan op die verhoog.

Hy het in ’n stadium gevoel dat hy genoeg verhoogwerk in al sy vorme gedoen het, maar aanvanklik was daar net hier en daar ’n rolprent en later televisie.

Maar toe kom 7de Laan en sy loopbaan verander drasties: ’n gereelde inkomste, vaste ure en blootstelling aan televisiewerk en regie.

Daar is so baie wat hy nog wil doen. Veral rolprentwerk. “Ek het aan niks meer as tien prente gewerk nie en ek sal nie omgee om meer te doen nie.”

Maar, sê hy, die verhoog sal altyd ’n trekpleister bly. Dis die slagaar van ’n akteur of regisseur, hoewel die dissipline wat ’n lewende gehoor van jou eis, altyd ’n uitdaging vir enige akteur sal inhou. Dis die plek waar hy immer tuis sal voel.

Ateljeewerk is nog ’n groot liefde

Hy hou van die geborgenheid van ’n gebou en alles wat die genre uniek maak. Maar op die oomblik is rolprentwerk sy gunsteling. Die ervaring maak hom gelukkig en skep nuwe uitdagings. Hy pak elke rol voluit aan en sal nooit by ’n bepaalde soort karakter vashaak nie. Dié dat hy in die toekoms nie weer ’n tipiese “Oubaas”-karakter sal speel nie.

Dis vir hom lekker om gereeld saam met ander skrywers en regisseurs te werk, soos Hanneke Schutte, wat ook die regisseur van Meerkat Maantuig is.

Die werk aan die prent was ’n wegkomkans uit die 7de Laan-ateljee. Hy het die rol van ’n oupa in die prent gespeel en Rika Sennett was die ouma aan sy sy. Die 13-jarige Anchen du Plessis was hul kleinkind.

’n Taamlike nuwe rol waarin hy hom beslis inleef, is dié van ’n oupa in die werklike lewe. Sy dogter, Zetske, en haar man, Altus Theart, het onlangs ’n seuntjie gehad en volgens dié oupa “is hy die oulikste kind op aarde!”

Dit is vir hom ongelooflik lekker om oupa te wees. Hy is immers mal oor babas. “Maar nou is dit my dogter se baba en nog meer van ’n wonderwerk. ’n Kind is ’n geskenk van God.”

Hy is vreeslik trots op Zetske en Altus. “Hulle is wonderlike ouers. En natuurlik is klein Alexander die oulikste, mooiste en slimste baba op aarde. En nee, ek’s glad nie subjektief nie!”

Pierre en sy vrou, Sandra, is baie na aan sy kinders, Zetske en Peach, uit sy eerste huwelik met Elzette Maarschalk. Hulle is boonop almal in die vermaaklikheidswêreld betrokke.

“Daar is nie ’n geheim wat verseker dat ’n familie hegte bande smee nie, sê hy. Vir hulle het dit net vanself gekom en liefde, waardering. respek, ruimte, vriendskap, waardering en meer dra alles daartoe by.

Pierre is ’n gesonde, hardwerkende akteur en naas die stent wat hy ’n paar jaar gelede gekry het, het hy niks om oor te kla nie, dankie. Dis nou ondanks die talle kere wanneer “oud” of “ou” met verwysing na sy karakters gebruik word.

Maar as hy oor iets mag kla, sal dit sy knieë wees. Dié keil hom deesdae ’n bietjie op maar sal ook eersdaags aandag kry.

Hy hou sy gesondheid dop en sy huwelik met die “wonderlike Sandra” dra beslis daartoe by. “Haar liefde en onderskraging is vir my van onskatbare waarde.”

The post Pierre van Pletzen oor oud word appeared first on rooi rose.

Drie susters – Julia (Milan Murray), Anna (Rolanda Marais) en Kate (Trix Vivier) – is van kleins af omring deur die romantiese swier en status van hul pa (Dawid Minnaar) se bootbou-onderneming. Hul paaie het reeds jare terug geskei, maar ’n familie-tragedie bring al drie van hulle terug na die plek waar hul jeug en kinderdae afgespeel het – die Waterfront in Kaapstad. Hierdie wêreldberoemde toeriste-aantreklikheid dien as agtergrond vir dié splinternuwe drama wat onder die glansryke oppervlak van die seiljagbedryf duister geheime van die Myburgh-familie ontbloot.

Waterfront, wat vanaf Oktober op kykNET (DStv-kanaal 144) te sien sal wees, bring ’n gedugte span voor en agter die kameras bymekaar. Die drama is geskep deur Marida Swanepoel en word vervaardig deur Lion’s Head Productions. Leon Kruger het die draaiboek geskryf. Die verfilming begin eersdaags in Kaapstad onder leiding van die veelbekroonde regisseur Jaco Bouwer, onder meer bekend vir die gewilde misdaadreeks Die Boland Moorde en hoog aangeskrewe teaterstukke soos Rooiland en Samsa-Masjien.

Die Myburgh-susters se ma word vertolk deur Joanie Combrink, terwyl Stian Bam en Edwin van der Walt onderskeidelik die eggenoot en seun speel van die middelste suster, wat weens omstandighede moes terugkeer uit Londen met meer as net haar bagasie.

Dinge raak warm wanneer die bankstate nie meer met die luukse leefstyl van die Myburghs klop nie en ’n onverwagse dood ’n draadjie lostorring wat dreig om alles te laat ontrafel.

Ander bekende akteurs wat in Waterfront ’n buiging maak, is Euodia Samson, Paul du Toit, Erica Wessels, Hannes van Wyk, Charlton Lee George, Albert Pretorius, Neels van Jaarsveldt en Tarryn Wyngaard.

Besoek kykNET se webblad vir meer besonderhede.

The post Nuwe kykNET-drama: Waterfront appeared first on rooi rose.

So David, ek het ’n voëltjie hoor fluit dat jy in Junie vanjaar die Ironman in Durban gaan aanpak! Nou is my groot vraag: Hoekom die Ironman? Dis dan mos vreeslik uitmergelend!

Dit is verseker uitmergelend! En om te dink die Ironman in Junie is net die halwe een (1.9 km swem, 90 km fietsry en dan boonop ook 21.1 km se hardloop). Ek is gek oor enigiets wat my uithouvermoë toets, iets wat vir my wys hoe vêr ek myself fisies en geestelik kan druk.

Waar kom jou belangstelling in sport vandaan? 

Ek het in ’n ‘sport-huis’ grootgeword en was boonop ’n kranige sportman op skool. Ek het in elke sportsoort waaraan jy moontlik kan dink provinsiale klere verwerf. Dít het dissipline in my gekweek wat ek tot vandag toe, in elke aspek van my lewe en selfs in my loopbaan as akteur, toepas.

Wat is die “most extreme” ding wat jy al ooit in jou lewe aangepak het?

Beslis die volle Ironman –  3.8 km van swem in die see, gevolg deur 180 km se fietsry en daarna 42.2 km se hardloop. Dit moet boonop alles in ’n sekere tyd voltooi word omdat elke item ’n afsnytyd het. Buiten die Ironman het ek ook al gaan bungee, valskermspring en in ’n hok tussen haaie en krokodille geduik.

Vertel ons van jou sportprestasies. Wat staan vir jou uit?

Een sportprestasie wat beslis vir my uitstaan is toe ek Cravenweek gespeel het. Dit is verseker ’n hoogtepunt in my lewe! ’n Ander prestasie wat vir my spesiaal is, was toe ek deel was van die Mpumalanga-tennisspan en ons die toernooi, teen al die ander provinsiale-spanne in Suid-Afrika, gewen het.

Wat geniet jy die meeste van sport? 

Wat ek die meeste van sport geniet, is die feit dat jy oor die algemeen as ’n span moet saamwerk om een gemeenskaplike doelwit te bereik. Dit is ’n beginsel wat nie net in sport van toepassing is nie, maar ook in die besigheidswêreld daar buite. Natuurlik hou sport my ook fisies en geestelik gesond en daarom dink ek dat dit die beste stokperdjie is.

David was ook in die fliek Modder en Bloed te sien

Vertel ons ’n bietjie meer van jou produksies vir kinderteater.

Die kinderproduksies wat ek behartig sluit soveel verskillende aspekte in – by kleuterskole doen ons vertonings waar ons die kind op ’n magiese reis neem en hulle op daardie manier help om hul verbeeldings te ontwikkel. Ons voer gewoonlik by laerskole produksies op met temas waarby die spesifieke skool en die probleme wat hulle op daardie stadium onder die kinders beleef, aanklank vind.

Wat het jou geïnspireer om dit te doen?

Die uitvoerende kunste is so ’n magtige medium wat tot ieder en elk spreek – maak nie saak hoe jonk of oud jy is nie! Ek wou deur my produksiehuis ’n boodskap bring wat relevant is en ’n verskil kan maak onder jongmense. En natuurlik was dit ook ’n gulde geleentheid om werk te skep vir ander akteurs in die industrie.

Soos ek verstaan, sluit die temas onder andere boelies, selfrespek en gesondheid in. Hoe het jy op die spesifieke temas besluit?

Dit is alles basiese temas wat regdeur die jaar in omtrent alle skole behandel word. Dit is alombekende onderwerpe wat aangespreek moet word en hoe dan beter as deur ’n kreatiewe teaterstuk.

Wat geniet jy die meeste daarvan?

Ek geniet dit vreeslik om daardie gesiggies dop te hou wanneer hulle saam met jou op reis na ’n ander, verbeeldingryke wêreld, gaan. Dís nou wat ek noem … Magic!

Ek hoor jy gaan later vanjaar as mede-vervaardiger optree. Hoe voel jy oor die belangrike rolle wat jy skielik gaan aanneem? 

Soos jy seker reeds opgemerk het, is ek iemand wat konstant op soek is na nuwe uitdagings en avonture. Om mede-vervaardiger te wees, van ’n projek so na aan my hart, is beslis ’n reuse voorreg.  Soos in al my vorige avonture gaan hierdie een ook ’n “rollercoaster”-rit wees, maar daar is wel een groot verskil: op hierdie rit gaan daar passasiers wees waarna ek moet omsien en mense wat op my staatmaak!

*Dié plaaslike film gaan na verwagting ’n komedie-drama wees wat van die land se gewildste akteurs insluit, maar vir eers kan ons nie te veel daaroor verklap nie. Ons sien vreeslik uit!

The post David Louw: ysterman met ’n hart van goud appeared first on rooi rose.

Ons gesels tussen tonele op die stel van 7de Laan waarin Dann-Jaques tans te sien is as Justin. Met die groetslag kry jy die indruk van hoflike terughoudendheid. Die onderhoud bevestig dit: oor homself praat hy nie graag nie, maar oor die interessante karakters wat hy al vertolk het, praat hy geesdriftig. Dis byna asof hy in karakter gaan, want wanneer hy oor Noem My Skollie, of die lewe op die Vlakte praat, slaan die Kaapse Afrikaans plek-plek deur.

Vir dié talentvolle dertigjarige akteur is daar talle raakpunte tussen sy lewe en dié van John Fredericks, die fliek se draaiboekskrywer en die man op wie se lewe die fliek gegrond is. Behalwe die paar jaar wat hy kleintyd in Windhoek gewoon het, ken Dann-Jaques die lewe op die Kaapse Vlakte maar te goed. Hy kon hom van die eerste lees van die draaiboek reeds vereenselwig met die wêreld van bendes, armoede en die daaglikse stryd om ’n reguit pad te bly loop.

Lees ook: John W. Fredericks gesels oor sy skryfdroom

“Met die oudisie kry jy net ’n toneel om te speel, nie die hele draaiboek nie. So, jy ken nie die konteks nie. Maar ek was dadelik op die karakter verlief,” vertel hy.

Sy bewondering vir Boeta John, soos hy na John Fredericks verwys, is tasbaar.

“Hoe meer ek die draaiboek gelees het, hoe meer het ek gevoel maar ek ken mos die man! Sy trials en tribulations het tot my gespreek; sy moed, die kans wat hy daar in die tronk gevat het om nie die nommers te vat nie, die verhouding wat hy met sy vrinne gehad het.”

Hy ken ook die invloed wat vriende op ’n Vlaktekind se lewe het. “Ons was ook maar wintie. Ons het ook so op die hoeke ge-chill soos Boeta John-hulle.” En al is hy vandag ’n suksesvolle akteur, onthou hy maar te goed dat nie almal in sy vriendekring aan die Vlakte kon ontsnap nie. “Een van my vrinne van laerskooldae af is vandag steeds ’n gangster. Ek weet nie eens of hy nog leef nie. Maar hy het destyds vir my gesê : ‘Jy moet hier uit. Moenie die nommers maak nie – gaan doen iets met jou lewe. Jy is beter as hierdie.’” Dis daardie soort vriendskap wat hom ook aangegryp het in Skollie.

Nes in John se geval, ken Dann-Jaques ook die effek wat ’n afwesige pa op ’n seun se lewe kan hê. “Maar soos hy, het ek ook die liefde van ’n moeder en susters geken.” Daarom is van die aangrypendste temas in die fliek vir hom juis AB se verhouding met sy ma en susters. “My ma was ’n enkelouer, maar ons was darem nooit so arm soos Boeta John-hulle nie. En my ma het my altyd ondersteun toe ek ’n akteur wou word, al was my familie nie juis mal oor die idee nie.”

Dit bly vir hom wonderlik om deur sy werk as akteur aan ’n karakter soos AB te kon lewe gee. “Ek moes Boeta John se visie skep, maar ek moes getrou bly aan sy storie en aan hom as mens.” Dit was vir hom kosbaar dat John op stel was sodat hulle soms oor bepaalde tonele kon praat. “Dit het immers oor hom gegaan. Hy het hierdie lewe geleef waaroor ons ’n fliek maak. Ek wou elke toneel reg speel.”

Lees ook: Ons gesels by Silwerskermfees 2016 met Dann-Jaques

Wat was vir hom die moeilikste van sy rol?

“Om ’n fisieke representation van Boeta John se karakter te skep. Hy is hierdie hardcore ou wat op die straat grootgeword het, maar hy het ook ’n elegansie aan hom. En hy is ’n goeie mens – dit was belangrik om dit reg uit te beeld. Onthou, hy wou nooit ’n gangster word nie – hy is deur ’n tragedie daartoe gedwing. Hy was in die eerste plek ’n storieverteller. En al maak die strate ’n mens hard, het hy steeds net sy ma se seun gebly.”

Om John geloofwaardig te kon speel het Dann-Jaques probeer om sekere fisieke eienskappe te probeer namaak, soos die manier waarop die ouer man loop. “Toe een van sy seuns later na my toe kom en sê hy het sy pa gesien in die manier waarop ek in die fliek loop, het ek geweet ek het geslaag.”

Hy bewonder die manier waarop John deur dekades bly glo het sy verhaal kan ander inspireer.

“Hy het alles opgegee vir die storie, selfs sy werk bedank. Om 15 jaar lank te bly werk aan ’n draaiboek terwyl jy hoop iemand sien die potensiaal daarin, wil gedoen wees.”

Wat was vir hom die mooiste toneel in die rolprent?

“Die dag toe AB se pa vir hom die tikmasjien daar op die vullishoop gee. Dis dieselfde tikmasjien waarop Boeta John uiteindelik die draaiboek getik het. AB se verhouding met Jenny, sy jeugliefde, is ook inspirerend. Deur haar het hy dit reggekry om sy rug na misdaad te draai.”

In die regte lewe is John en sy vrou al meer as veertig jaar getroud.

Dann-Jaques se lewensverhaal lees ook so ’n bietjie soos ’n storie. Sy ma, Elfilina Mouton, het gesorg dat haar jongste na ’n goeie skool gaan. Dis juis by Wynberg Senior Secondary in die Kaap dat die dramagogga hom gebyt het.

“Dié skool het op die kunste gefokus, en Brian en Trish Notcut was my drama- en dansonderwysers.” Hy onthou die eerste keer toe hy op die verhoog was maar te goed. “Ek was in graad tien en ons het Grease opgevoer. Ek was Roger, een van die groepie manlike hoofkarakters.” In graad elf het hulle Paul Slabolepszy se Saturday Night at the Palace opgevoer. “Daar is die saadjie by my geplant, maar ek het eers ná matriek besef ek wil akteur word.”

Dit was amper of Dann-Jaques het nooit akteur geword nie. Ná matriek het hy gaan werk, want geld vir studeer was daar nie. “Ek het allerhande odd jobs gedoen. Ek het in ’n fabriek gewerk wat plaveiselstene vervaardig, later in ’n plastiekfabriek. Ek het servette gepak en ook as kelner en kroegman in ’n hotel gewerk.” Hy het ook gedurende sy studie aan die Universiteit van Kaapstad gewerk om homself te onderhou, en lag so effens toe hy vertel dat hy selfs in ’n stadium in ’n speelgoedwinkel gewerk het.

Maar nadat hy in 2006 vir ’n oorbruggingskursus by die New Africa Theatre Academy in Athlone gegaan het, wou hy niks anders as akteur word nie. In 2009 het hy sy dramadiploma aan Ikeys verwerf. “My eerste rol ná universiteit was as Oberon in Shakespeare se A Midsummer Night’s Dream by die Maynardville-teater.” Die jaar daarna was hy ook te sien in die produksie van Anthony en Cleopatra onder regie van Marthinus Basson.

Teater bly ’n groot liefde – daarvoor het die byna vier jaar tussen sy studie en sy hoofrol in Jans Rautenbach se rolprent Abraham in 2014 gesorg. Hy was ook te sien in toneelstukke soos Die Rolbalspeler, Balbesit en Siener in die Suburbs. Daar was ook ’n rol in die kykNET-sepie Binnelanders, en in die rolprent Tess, teenoor Christia Visser.

“Ek het nooit destyds op skool gedink ek sal vandag hier voor jou sit nie. Ek is baie bevoorreg om te kan sê ek is nogal besig, want net om ’n bestaan te maak in hierdie bedryf, is klaar moeilik. Ons was omtrent dertig studente in die eerstejaardramaklas en net die helfte het klaargemaak. Van daardie vyftien of so werk net omtrent vyf van ons as akteurs. Dis nie maklik nie.”

Ons gesels enkele ure nadat dit bekend geword het dat Jans oorlede is. “Ek is so dankbaar dat Jans my ’n kans gegee het om Abraham te speel. Ek het Abraham net so intens ervaar soos AB, en ek moes ook diep in myself delf om hom te kon speel. Ek hoop dat ek in die toekoms nog baie die kans sal kry om sulke rolle te vertolk.”

Om in Skollie te kon speel, het hom baie geleer. “’n Mens moet aanvaar wie jy is en nie bang wees vir waar jy vandaan kom nie. En jy moet glo in jou drome en bly werk om dit waar te maak. Maar dít kan jy net doen as jy dit graag genoeg wil hê.”

The post Noem My Skollie se Dann-Jaques Mouton oor akteur-wees appeared first on rooi rose.

Die akteurspaar Tinarie Van Wyk Loots en Erik Holm het onlangs op die mees romantiese manier verloof geraak. Hier is ’n kort uittreksel uit ons EKSKLUSIEWE onderhoud met hulle in die Januarie 2017-uitgawe van rooi rose.

’n Liefdespondokkie op ’n berg

Hulle het nog nie ’n idee wanneer hulle gaan trou nie.

“Seker iewers nader aan die einde van aanstaande jaar, maar die belangrikste is dat ons weet ons toekomspad loop nou amptelik saam.”

Was die verlowing vir haar onverwags?
“Ek dink my liefste Erik dink dit was, maar ek ken hom só goed,” giggel sy. Sy het vermoed hy voer iets in die mou. “Dit het my minstens kans gegee om my mooi rokkie aan te trek!” (Tinarie het verloof geraak in een van die rokke wat sy vir rooi rose se voorbladfotosessie aangehad het.)

Erik het vir haar ’n vlug bespreek om vir hom op sy ouers se plaas naby die Hartbeespoortdam te kom kuier. Die vliegtuig het skaars grond gevat toe hy per SMS laat weet sy pa sal haar kom haal. Op pad huis toe het dié gesê hy wil gou vir Tinarie die nuwe paadjie gaan wys wat hulle teen die berg uit gemaak het. “Toe ons bo kom, staan daar ’n houthuisie met ’n uitsig oor die hele wêreld. Die deur was met ’n groot slot gesluit en toe kondig die oom aan dis nou waar hy my verlaat en gee vir my ’n sleutel vir die slot.

“En daar staan ek en drink die mooi uitsig in. Voor die huisie was ’n opgestopte speelgoedhond, speelgoedvarkies, ’n kampie en ’n straatnaambord wat sê dis die hoek van Van Riebeeck- en Voortrekkerstraat, die straathoek waar ons die eerste keer ons liefde aan mekaar erken het.”

Toe hoor sy ’n diep stem uit die huisie na haar roep. “Ek het die slot met bewende hande oopgesluit, en daar sit my stralende lief binne-in die mooiste liefdespondokkie met ’n fluweelboksie in sy hande, en vra my om met hom te trou! Dit was die mooiste, spesiaalste oomblik.”

En haar reaksie? “Ek het dadelik begin giggel en lag! En natuurlik dadelik ‘ja’ gesê!”

Erik het op sy eie oor die ontwerp van die ring besluit en sy neef het dit gemaak.

Kyk hier na die agter die skerms-video tydens ons voorbladfotosessie met Tinarie en Erik:

Ons verklap ook ’n paar foto’s wat nie in die tydskrif gebruik is nie:

The post Agter die skerms met Tinarie Van Wyk Loots & Erik Holm appeared first on rooi rose.

“Erik is só sterk en terselfdertyd ook so sag. Hy het geweldig baie deernis met ander maar hy het ook so ’n vrye gees.” Lees die volledige EKSKLUSIEWE onderhoud met Tinarie en Erik in die Januarie 2017-uitgawe van rooi rose.

Erik oor Tinarie

“Hartverskeurend-mooi”

Dolverlief. Dis seker die beste beskrywing vir Erik Holm.

Nog voordat hulle amptelik verloof geraak het, was al die tekens daar dat Tinarie die rede was vir sy vertrek uit die sepie Binnelanders én die groot trek Kaap toe.

Som haar op in tien woorde, as jy kan?
“Sjoe, net tien? Droomdierdiepverliefbeeldskoonhart … dit tel as een woord. Hartverskeurendmooi is nog een. En vrotvandietalentenhardwerkend is ’n derde een. Maar nee, ek kan haar onmoontlik nie in net tien woorde opsom nie! Daar is nie woorde wat lank genoeg of mooi genoeg is nie.

Wat betower jou van haar?
“Haar oë. As ek eers dáár verdwaal, kry jy my nie sommer weer nie.”

Hoe voel jy oor hierdie nuwe hoofstuk in jou lewe?
“Trots, gelukkig, verlief.”

Ons het tydens die voorbladfotosessie by Glenshiel in Johannesburg ook EKSKLUSIEF agter die skerms met hulle gesels. Kyk hier na die video-onderhoud:

The post Agter die skerms met Erik en Tinarie appeared first on rooi rose.

Luister na die aangrypende gesprek tussen Ilse Salzwedel en John W. Fredericks op RSG. Gaan na www.rsg.co.za/potgooi-soek.asp en soek Skrywers en Boeke. Tik dan die sleutelwoord John W. Fredericks in. *Die program is op 10 Augustus 2016 uitgesaai.

Meer oor Noem My Skollie

Noem My Skollie het die land aan die gons. Die verhaal speel hom af op die Kaapse Vlakte, ’n wêreld waar broer teen broer baklei in nimmereindigende bendeoorloë. AB Lonzi (vertolk deur Mouton) en sy drie vriende probeer van kleins af die bendewêreld vermy, maar dis nie altyd moontlik nie. Wanneer AB weens ’n tragedie in die tronk beland, besluit hy om tot elke prys uit die nommerbendes (die berugte 26’s en 27’s) se tentakels te bly, want hy wil meer wees as “’n bandiet en ’n gangster”. Maar om dit reg te kry, moet hy beskerming teen hulle kry, en daarvoor moet
hy iets doen wat respek afdwing.

Daardie “iets” is stories vertel, en soos wat Scheherazade in die legendes van 1001 Arabiese Nagte vir die sultan stories vertel het, het AB saans vir die manne in sy sel stories vertel. Nadat hy sy vonnis uitgedien het, besluit hy dat die binnekant van ’n tronk hom nooit weer gaan sien nie, en dat hy ’n skrywer gaan word, kom wat wil.

Skollie is meer as ’n mooi storie – dis die inspirerende lewensverhaal van John. W. Fredericks, ’n eenvoudige man van die Kaapse Vlakte wat nooit wou moed opgee dat sy verhaal ’n rolprent sal word nie. Dit het hy nou in sy sewentigerjare reggekry, en ook die draaiboek geskryf.

Die fliek is ook benoem as Suid-Afrika se amptelike inskrywing vir die Oscars.

Plek-plek skok die storie, maar dis die kameraadskap, liefde, volharding en Fredericks se geloof dat daar iets groter en beter as sy situasie móét wees, wat ’n mens inspireer en bybly. Ook sy liefde vir boeke, want deur stories kon hy aan sy uitsiglose bestaan en swaar lewe ontsnap.

Die rolprent het rekordgetalle kykers gelok, en die amptelike première was in die Pollsmoor-gevangenis, juis daar waar Fredericks se lewe kon geëindig het as dit nie was vir stories en sy brandende begeerte om as meer as net ’n bendelid onthou te word nie.

Lees ook ons onderhoud met Dann-Jaques Mouton op bl. 24 van die Januarie 2017-uitgawe van rooi rose.

Lees ook: Dann-Jaques Mouton oor Noem My Skollie

Lees ook: Noem My Skollie op pad Oscars toe

The post John W. Fredericks gesels oor sy skryfdroom appeared first on rooi rose.

Ruan Wessels

Vertel ons van die oomblik toe jy uitvind jy het die rol gekry? Wat het jy gedoen en hoe het jy dit gevier?

Ek het baie goed gevoel en ek was verskriklik opgewonde. Ek het myself sommer bederf en ’n pizza bestel.

Vertel ons meer van jou karakter, Marko?

Marko is die coolste ou in die skool. Hy is baie soos enige ander skoolseun. Hy is mal oor sport, veral krieket, hy haat wiskunde en hy hou daarvan om tyd te spandeer saam sy vriende.

Watter uitdagings as akteur het jy tydens die verfilming van Jou Romeo ervaar?

Ek sou sê die grootste uitdaging wat ons ervaar het, was die weersomstandighede. Ons het twee-uur soggens in yskoue water geswem – in die koudste kouefront wat Gauteng al gehad het!

Hoekom, dink jy, moet hoërskoolleerders Jou Romeo kyk?

Hoërskoolkinders gaan die fliek baie geniet omdat sosiale media baie ingetrek is en daar is baie moeite gedoen met die kamerawerk en dit is DIE beste tienerfilm wat al ooit gemaak is.

Wat is jou toekomsplanne? 

Ek wil volgende jaar graag begin skryf. Daar is een fliek, Kampterrein, wat volgende jaar gaan uitkom. En ’n reeks, Seepglad, wat ook volgende jaar begin draai.

Lees ook: Nuut in die flieks – Kampterrein

Christopher van der Westhuizen

In watter hoërskool is jy? 

Ek is tans ’n matrikulant in Hoërskool Randburg. Die skool is baie goedgesind teenoor ek wat die film kon doen tydens my Matriekjaar.

Hoe het jou hoërskoolloopbaan jou voorberei om die rol van Tyler te speel?

Ek is in my hoërskoolloopbaan dikwels as die buitestaander gesien en ek het soms ook so gevoel. Ek het maar altyd die kultuuraktiwiteite gedoen en veral in my senior jare myself in die dramaklas bevind. Ek is baie betrokke met die kultuur by my skool, soveel so dat ek hierdie jaar gedien het as die hoofverteenwoordiger van kultuur op ons leerlingraad. As ek kyk na die karakter van Tyler het daar beslis aspekte van my skoolloopbaan ingeglip. Dit is maar so met alle karakters wat jy as akteur vertolk. Jou karakter word amper die spraakbuis vir jou eie gevoelens soos jy as akteur probeer om die “bladsy-karakter” in die werklikheid te skep.

Een van die goed wat my skoolloopbaan my beslis van die film geleer het, is hoeveel politiek daar in die skoolsisteem is. Veral as ons begin kyk na die korrelasie tussen sport en kultuur. Dit gaan maar oor wat die populêre ding is. Te dikwels verskoon skole die menslike sensitiwiteit wat gepaard gaan met die mense wat sy gange loop. Om self in ’n skool te wees het my toegelaat om dit raak te sien en dit te probeer uitwys in my karakter.

Is daar enige ooreenstemmings tussen jou (as Christopher) en jou karakter?

Ek dink as jy dit vir enige akteur sal vra, sal hy/sy die vraag met ’n ja kan antwoord. Iets wat my nog vir ’n lang tyd bygeval het, is ’n paar wyse woorde wat ek raakgelees het in my voor-slaap-Facebook-scrolls, ek kan nou nie onthou wie dit gesê het nie maar dit lui so: “No matter how different your character is, always look for yourself.” Hierdie help nogal baie om ’n realistiese, geloofwaardige karakter te skep.

Ek beweeg nou van die punt af. Ek en Tyler het wel ooreenkomste. Ons albei wil die meeste van die tyd net hê wat die beste is vir ons familie (vriende wat familie word), naamlik: Yvette en die brigade se Show. Al is die maniere hoe ons dit probeer regkry nie altyd so goed nie, ons motiewe bly suiwer.

Ons is ook albei soms effe dramaties. Tyler wel meer as ek. Maar ek sukkel om myself so aggressief soos Tyler te sien. Dit was juis ’n ding wat moeilik was vir my om in die karakter te kry, hoe kwaad en aggressief die karakter is teenoor baie van sy medekarakters.

Hoekom, dink jy, moet hoërskoolleerders Jou Romeo kyk?

Hierdie film is vir my verskriklik relevant. Die gemiddelde ouderdom van die spelers is dieselfde as die meeste matrikulante, wat verseker dat dit nou toepaslik is. Dit is vinnig, gepas en relevant vir sy tyd en gehoor. Onder André Velts se spelleiding is daar ’n eerlikheid in die film wat ek voel mens nie sommer sien nie. Maar behalwe dit, weg van die tegniese interessantheid en spel wat so lekker speel, voel ek die vraagstuk wat die film raak is veral relevant.

Ek persoonlik dink dit is iets wat ek sou wou hoor toe ek as groentjie met my hoërskoolloopbaan begin het. Dat die skool-omgewing ons almal in boksies probeer druk, maar eintlik pas ons saam in een boks, dit is dat ons almal mense is. Ons ontmoet mekaar daar en sien die liefde in mekaar raak, sien hoekom iemand iets doen en nie net die ding wat gedoen word nie. Kyk na motief, nie noodwendig na die aksie self nie. Daar is redes hoekom mense goed doen. Dit is maar net een van die goed wat die film probeer wys maar wat ek voel die meeste vir my uitgestaan het.

Wat sê jou vriende oor die feit dat jy ’n hoofrol in ’n fliek vertolk?

Ek is al ’n ruk bedrywig in die bedryf. Ek het my eerste rol in graad ses gekry (Die ongelooflike avonture van Hanna hoekom), so my vriende het geweet ek probeer al lank, so dit was vir lank op die sy gewees tot onlangs. Toe ek self die goeie nuus gekry het, kon ek dit nie heeltemal glo nie, maar toe Lelia Etsebeth vir my vertel, het ek gedink dit is tyd om die nuus te breek. Hulle was amper net so bly soos ek. Sommige van hulle was effe bekommerd oor my matriekjaar wat ook nog voltooi moet word. Nou dat dit amper ’n werklikheid is, en die skerm amper gaan flikker met my gesig daarop, sien ons almal verskriklik baie uit. Ek is ongelooflik geseën om die vriende te hê wat ek het. Juis soos Tyler is dit vriende wat eintlik nou familie is.

Wat is jou toekomsplanne?

Sjoe, dis ’n vraag wat dikwels gevra word hier teen die einde van matriek. Ek wil baie graag aangaan met wat ek nou doen, die ontdek van mense. Dit wat ons almal laat tick … stories. Ek wil dit baie graag my lewe lank doen. Ek weet ek gaan dit doen, al wat nou sal verander is waar en hoe. Dit was vir nou eers skool wat moes klaarkom. Nou is die toekoms oop vir speel en avontuur binne hierdie kunswêreld!

Ruan Blum

Wat is jou gunsteling Shakespeare-toneelstuk en hoekom?

My gunsteling-Shakespeare is “The Merchant of Venice”.  Ek is mal oor die storie en lewensles wat mens daaruit leer. Op skool het ons dit in diepte bestudeer en het dit my liefde vir Shakespeare begin. Ek moet ook bysê, Al Pachino wat die rol van Shylock in die film vertolk, het ook ’n groot impak op my gehad.

Hoe het jy vir jou rol voorberei?

’n Groot voorbereiding wat ek gedoen het, was die krieket-oefeninge. Ek het nog nooit in my lewe krieket gespeel nie, en om letterlik die basics te leer en beter te raak, het ek nogal lief geraak vir die sport. Ek haal my hoed af vir professionele krieketspelers, dit is nie so maklik soos wat dit lyk nie.

Wat is die snaaksste ding wat tydens verfilming gebeur het?

Iets wat ek nooit sal vergeet nie was toe ons die Brink “party scene” geskiet het. Dit was 4-grade daai aand, net toe die jaar se eerste kouefront getref het. Ek sal nie sommer vergeet hoe die ekstras en Ruan Wessels tweeuur die oggend in die koue water moes swem nie. Ek het lekker vir hom gelag, maar meer vir die feit dat ek bly was dat dit nie ek hoef te wees nie nie. #Respect

Hoekom, dink jy, moet hoërskoolleerders Jou Romeo kyk?

Omdat dit ’n vars romantiese komedie is, wat veral hoërskoolleerders sal raak. Omdat dit in die hoërskool-wêreld plaasvind, en omdat soveel leerlinge hulself met van die karakters sal kan vereenselwig. Om ’n lekker tyd te hê, om te lag, en om ’n romantiese tiener-komedie te sien wat op ’n baie unieke en moderne manier gedoen is. Daar is iets vir almal, van krieket-jocks tot drama-nerds.

Wat is jou toekomsplanne?

Op die oomblik is dit net om as akteur te kan werk, en om my drome te volg. Ek vat dit maar soos dit kom, en probeer elke oomblik geniet.

Kyk hier na die lokprent van Jou Romeo

The post Ons gesels met die akteurs van Jou Romeo appeared first on rooi rose.

Morne Lane vervaardig en skryf die jongste Suid-Afrikaanse fliek Kampterrein, wat in Maart 2017 in fliekteaters begin draai.

Marcus Muller, wat bekend was vir sy rol as Liam de Lange in die sepie Egoli, het sy lyf mede-vervaardiger gehou vir hierdie fliek wat in Augustus vanjaar op die ATKV Buffelpoort-terrein in Rustenburg geskiet is.

Lane het ook ander fliek soos Hartsbegeertes, Forsaken en Suiderkruis vervaardig en het al met groot name in die bedryf gewerk, soos Hykie Berg, Johan Sholtz en Angelique Gerber. Muller en Lane het ook saam in die fliek Sewentig x7 gespeel, waarvan Lane die vervaardiger was.

Regisseur Luhann Jansen sê Kampterrein is ’n gesinsfliek wat almal sal laat lag.

“Verskillende families met verskeie agtergronde en kulture saam vir twee weke van die jaar, hier kom sports!”

Die fliek gaan jou laat hunker na ’n kampvakansie. Verwag om vermaak te word van die eerste tot die laaste toneel.

Die akteurs Louw Venter, Johan Botha, Ruan Wessels, Juanita de Villiers Velts, Jürgen Hellberg, Edrien Erasmus, Kaz McFadden, Zenande Mfenyana, Marlee van der Merwe en Josias Moleele sorg vir dié grapperige vermaak.

Kampterrein sal op 24 Maart 2017 in fliekteaters begin draai.

Kyk hier na die lokprent:

The post Nuut in die flieks: Kampterrein appeared first on rooi rose.