Melinda Viljoen het dalk nog meer fasette aan haar persoonlikheid as Tracy en dis duidelik dat sy die lewe voluit aanpak. Sy is ’n gebore Pretorianer, het op skool al in drama belanggestel en in skoolvertonings begin optree. Ná skool het sy besluit om by die dramaskool, die Performing Arts Lifestyle Institute (PALI), in te skryf. Hier het haar studentetoneelstukke in professionele teatervertonings ontwikkel en dit het uiteindelik tot ’n oudisie vir Binnelanders gelei.

Kykers is gaande oor Tracy “juis omdat sy nie op haar bek geval is nie,” sê Melinda.

Karlien Meiring het meer oor Melinda se passies en liefde vir haar karakter gaan uitvind.

Foto: Brandon Barnard Photography

Het jy enige voornemens vir 2023?

Ek glo nie regtig in Nuwejaarsvoornemens nie. Ek het natuurlik goed wat ek anders wil doen, of meer of minder van wil doen, maar ek leer elke jaar om my drome, planne en hartsbegeertes na Jesus toe te vat. Ek voel ek is in ’n seisoen van voorbereiding: Ek leer baie van myself deur sy oë, ek laat gaan, en ek gryp dit aan wat Hy op my hart lê. Ek is by ’n plek in my lewe waar ek werklik nie iets soek wat nie vir my bedoel is nie, al dink ek ek wil dit hê.

My droom is om vreesloos geleenthede te verwelkom, maak nie saak wat dit is nie. Ek is vol vertroue dat wat vir my bedoel is, myne sal wees en my enigste werk is om fisiek en geestelik mooi na myself te kyk. Ek is gereed vir wat die Here in sy goedheid vir my wil gee.

Wat is die grootste les wat jou karakter, Tracy jou al geleer het?

Tracy, Tracy, Tracy … Wel, daar was beslis ’n paar lesse oor wat om nié te doen nie … Een van die beste lesse is in selfvertroue ten spyte van haar tekortkominge. Ek bewonder haar konstante dapperheid al voel sy nie so opgelei, geleerd en begaafd soos ander om haar nie. Sy’t my geleer om met deursettingsvermoë stroomop te swem.

Wat is jou gunsteling-sêding van Tracy?

My gunsteling-sêgoed van Tracy is gewoonlik wanneer sy so bietjie feisty raak. Sy sê “Come again?”, “Really?” of “Whatever” lekker maklik en dis dan wat sy nié sê nie, met lyftaal en gesigsuitdrukkings, wat vir my so lekker is van haar!

 

View this post on Instagram

 

A post shared by Melinda Viljoen (@melinda_viljoen)

As jy enige ander karakter op Binnelanders kon vertolk, wie sou dit wees en hoekom?

Oe! Ek het deur die jare al ’n paar interessante karakters beleef, maar as ek moet kies, sal dit seker Annetjie wees! Ek love Annetjie, maar ek sal beslis nie Lorraine se skoene kan volstaan nie. She’s just too good!

Wat sal mense van jou verbaas?

Ek is mal oor kosmaak en wil eendag my eie restaurant oopmaak. Een van my grootste passies is om met smake te eksperimenteer. Ek probeer ook so kreatief as moontlik te wees met verf, bou, breek … Ek vind nog my eie taal in my kuns. Ek is behep daarmee om te oefen en geniet dit ongelooflik baie, veral boks. Miskien doen ek eendag Boxop!

Ek is regs, maar ek doen meeste aktiwiteite links, soos eet en pool speel. En my gunstelingdrankie sal altyd ’n bier wees!

 

View this post on Instagram

 

A post shared by Melinda Viljoen (@melinda_viljoen)

Volg Melinda op Instagram!

Skakel weeksaande om 19:30 in op kykNET (DStv-kanaal 144) vir die jongste drama en intrige wat in die gange van Binnelanders uitspeel.

Lees ook: Vyf-vinnige-vrae-Vrydag met avonturier en inhoudskepper Iana Strydom

The post Vyf-vinnige-vrae-Vrydag met Binnelanders se Melinda Viljoen appeared first on rooi rose.

Swartwater is ’n fiktiewe dorpie wat in die Overberg afspeel. ’n Mikrokosmos van Suid-Afrika met ’n mengsel van mense wat teen korrupsie en swaarkry veg, smee ’n nuwe identiteit in ’n onseker wêreld.

Phillip word in ’n sel geplaas saam met ’n paar vreeslike antagonistiese selmaats. Hy is egter nie té bekommerd nie en is amper seker daarvan dat hy binnekort ontslaan sal word, maar toe sy borgtogverhoor uiteindelik die lig sien, is dit vir R2 miljoen en skielik vat sy prokureur die pad.

Annelien word in ’n geestelike-instelling opgeneem en Karien lê ’n besoek aan die rehabilitasiesentrum af.

Francois moet aanvaar dat sy huwelik totaal en al verby is, maar hoe kan hy as hy dit nie WIL aanvaar nie? Dit gaan ons op’n wipwarit vol emosies stuur soos hy die vrou wat hy liefhet van selfvernietiging probeer red. Langs die pad bevind hy homself goed toegewikkel in die donker onderwêreld van prostitusie en mensehandel.

Jy wil nie’n episode misloop nie! Kyk Swartwater Dinsdae-aande om 19:00 op SABC 2. Die nuwe seisoen begin op 14 Maart 2017.

Hier is ’n voorsmakie van die eerste episode:

The post Swartwater seisoen 2 appeared first on rooi rose.

Suidooster speel af in Kaapstad se Ruiterbosch en handel oor vyf families en hul onderskeie besighede by die Suidooster-sentrum.

“Ons is dankbaar vir die wonderlike ondersteuning wat Suidooster wyd en syd kry!” sê Karen Meiring, direkteur van kykNET-kanale by M-Net.

Karen sê dit is veral vir kykNET belangrik dat Suidooster ’n vars briesie is, wat baanbrekerswerk verrig deur die wonderlike variante en kulture van Afrikaans te bevorder.

“Só is Suidooster se Samsodien-familie, deesdae van die geliefste Afrikaanse karakters op televisie en is ‘shukran’ en ‘kanalla’ op almal se lippe.”

Kitsfeite oor Suidooster:

• Dit is die eerste Suid-Afrikaanse sepie met ’n Moslemgesin as hoofkarakters.
• Verlede jaar het dit ’n blitsvinnige vyf maande en 15 dae geneem om alles gereed te kry – van die aankondiging op 1 Junie 2015 tot die eerste episode op 16 November 2015 uitgesaai is.
• Die 178ste episode word op Suidooster se eerste verjaarsdag uitgesaai.

Suidooster word Maandae tot Donderdae om 18:00 op kykNET en kykNET & kie uitgesaai, met ’n herhaling om 20:00 op kykNET & kie en ook om 22:30 op kykNET.

Suidooster verjaarsdag

The post Suidooster word een! appeared first on rooi rose.