Dis sy tweede vollengte album binne twee jaar en beloof om net so introspektief soos sy eerste aanbod, Sangoma Sandilands & Jou Pa se Posse – Maanskyn te wees.

Volgens Sandilands was musiek ’n liefde lank voor hy begin toneelspeel het. “Dit was moontlik die eerste vreugde in abstraksie wat ek as mens kon beleef. Dis miskien vanweë hierdie ‘liefde’ dat dit my omtrent ’n halwe leeftyd gevat het om by die beoefening en aanbieding daarvan uit te kom.”

Die album word 1 Mei bekend gestel en bevat temas van protes, odes, hartstog, twyfel, metafisika, geskiedenis, gatvolheid, behoud, verganklikheid, vriendskap en menswees. “Dis die inklusiefste, mees universele album wat ek moontlik kon maak terwyl dit terselfdertyd ’n onmiskenbare aanvaarding is van hoe my bakkies oor tyd vervorm het. Dit is vir man, vrou, kind en brak en dit sêvra bloot: “Hier is ons nou. Wat nou?”” sê hy.

Allegaarkie vir ’n Askeet gee krediet aan invloede soos CJ Langenhoven, NP Van Wyk Louw, Ingrid Jonker, Koos Kombuis, Anton Goosen, Bob Dylan, Gert Vlok Nel, Jan Blohm, Johnnie Cope en Tennessee Whiskey.

Sandilands sê die album is ’n samewerkingsproduk. Aanhangers sal Tarryn Lamb, Gian Groen, Qadasi & Maqhinga, Hanna de Wet, Lelethu Zulu en Sibongiseni Wani se stemme hoor. Daar is snare, strykinstrumente, blaasinstrumente, klawers, dromme en tromme, ’n trompie, elektronika en selfs ’n saag wat tot die klankverskeidenheid bydra.

Karlien Meiring het meer oor sy jongste musikale meesterstuk gaan uitvind.

Hoe het jou klank sedert jou laaste album ontwikkel?

Dis ’n enorme vraag. Daar is net soveel nuanses waarop ek kan uitbrei, maar ek sou sê dat hierdie album “doelbewus” was, waar die vorige een amper “terloops” was. Die aanbod op Allegaarkie vir ’n Askeet is ryk in die sin dat dit al die elemente van vorige werke wat ek op Sangoma Sandilands & Jou Pa se Posse, Die Groot 5 en Die Groot Niks, wat goed gewerk het, weer ingespan het. Soos die musikante, die veelvuldige gebruik van inheemse tale en so meer. Die nuwe album se lirieke is baie getrou aan my eie lewenservaring, dis persoonliker. Theo Crous het die stem droër en rouer gemeng. Die lirieke is so uiteenlopend soos die instrumente wat gebruik is (waar ’n mens van ’n saag en trompie kan hoor!) Ek glo ek sal dié tipe album net een keer só kon maak. Ons het onsself so ver gedruk as wat menslik moontlik was binne die beskikbare tyd was.

Wat is jou gunstelingsnit op die nuwe album en hoekom?

Dis ’n onregverdige vraag, maar ek sal probeer. Uhm, nope. Kan nie. Ek kan bloot nie. Hulle is almal my kinders. Die een waarvoor ek miskien effens minder voel, is die enkel-dekweergawe van Bob Dylan se “The Times They Are A’Changin’”. Die ander 13 snitte kom almal uit my pen. Daar is natuurlik altyd die vraag of ’n mens werklik elke lied tot sy reg laat kom het? Ek dink elke kunstenaar voel in ’n stadium só. Dis baie makliker om uit te wys waarvan jy nie hou nie, of wat jy moontlik sou heroorweeg. Ek is trots op elke snit op die album. Hulle staan elkeen op hul eie bene, skewe neuse en al.

Kan jy ons deur die kreatiewe proses van hierdie album lei?

Eerstens het ek weer saam met Theo Crous gewerk, net soos met die vorige werke. Ons het probeer om alle selfopgelegde of sistemiese inhibisies sommer van meet af aan in die asblik te gooi. Meeste van die werke is in die buiteland geskryf terwyl ek met projekte in Meksiko, Nieu-Seeland, Australië en Amerika besig was. So daar’s natuurlik daardie “andersheid”…’n tipe universele weerspieëling.

Ek vat die opnames wat ek sommer op my foontjie gemaak het ateljee toe, en ons neem dan “guide tracks” op. Dis net ek en my stem met ’n kitaar of my ukelele. Dan stuur ons dit vir die musikante wat ons graag wil gebruik. Van hulle het ateljee toe gekom, ander het verspreid in ander ateljees gewerk en vir ons hul aanbod deurgestuur. Qadasi en Maqhinga vanuit KwaZulu-Natal, Shannon Mowday vanuit Noorweë, Mauritz Lotz vanuit Johannesburg. Moenie van loadshedding vergeet nie.

Dis ’n lekker komplekse legkaart om te bou. As al die instrumente in plek is, voeg ons die vokale by. My stem, sowel as die ander stemme wat ’n mens op die album hoor. Ek noem graag ’n paar name: Tarryn Lamb, Hanna de Wet, Gian Groen, Qadasi & Maqhinga, Lelethu Zulu en Sibongiseni Wani.

Dan pleeg Theo sy toorkuns met die klankvermenging en ander geheime speserye. Laastens stuur ons die gemengde snitte na Rogan Kelsey om “meestersnitte” van te maak. Dis min of meer om te sorg dat die totale album samehangend in dieselfde klanklandskap woon.

Dis nie eers die einde nie. Die kreatiewe proses? Ek werk al 48 jaar daaraan.

Hoe het jou ervarings as akteur jou werk as musikant beïnvloed, en omgekeerd?

Ritme kom eerste. Elke mens begin mos met ’n hartklop. Ek dink akteurswerk help omdat ek die liedjies “vertolk” eerder as om dit bloot te sing. Ek vertel myself maar dis hoekom die mense daarvan hou, omdat ek hulle ietsie laat voel. My stem het beperkings, maar ek het geleer om dit min of meer aan te wend om die luisteraar se aandag te kry.

Ek dink my ervarings as akteur en die roetes waarna dit my gelei het, kom deur in die lirieke en die emosionele reikwydte wat in die album vervat is. Elke karakter wat ek al gespeel het, en daar was baie, het mos sy unieke persoonlikheid en emosionele begrip. Dit help om die menslike kondisie beter te verstaan. Seg ek.

Hoe die musiek my akteurswese beïnvloed het, was nog altyd ’n implisiete gegewe. Ek dink enige vertolker wat sy sout werd is,  behoort musikale aanvoeling te hê. Veral om te weet waar jy in die ensemble pas. As jou werk bloot is om die piccolo (klein dwarsfluit) te speel, sorg dat jy op tyd is en speel dit met oorgawe. ’n Cow bell kan miskien te veel wees.

Hoe hoop jy sal jou aanhangers op die nuwe album reageer?

Ek hoop my totale oeuvre raak stapelvoedsel. Dit kan moontlik die wêreld red. Whahahaha! Daar’s mos nou net een antwoord vir dié tipe vraag. Ek hoop mense luister daarna en voel ná die luister daarvan ietwat beter. Iets soos dit.

Ek wil egter noem dat die aanbod die album is, nie die onderskeie snitte nie. Daar’s ’n rede hoekom ek snit een plaas as snit een en snit 14 as snit 14. Die album is ’n reis. Sit die ligte af, gooi ’n knerts, sit gemaklik. Kom saam.

Kry die album op 1 Mei hier:  https://linktr.ee/neilsandilands

Lees ook:Vyf-vinnige-vrae-Vrydag met Neels van Jaarsveld – oor sy nuwe leefstylprogram, Op reis met my beste vriend

The post Vyf-vinnige-vrae-Vrydag met Neil Sandilands – oor sy nuwe album appeared first on rooi rose.

Sam Smith: Aantreklik, plat op die aarde en uiters suksesvol! deur Zoë Salzwedel. Hooffoto: Rexfeatures  / Greatstock

Samuel Frederick Smith is op 19 Mei 1992 in London in Engeland gebore. Dié jong sanger en liedjieskrywer het op al 26 meer sukses behaal as die gewone jong man. Hy het immers reeds ’n duet gesing saam met die musieklegende Mary J. Blige, liedjies van gunstelingsangers soos Bruno Mars, Whitney Houston en Tracy Chapman gecover en spog met niks minder nie as 27 toekennings agter sy naam – waarvan vier Grammy-toekennings en een ’n Oscar-toekenning is. Sam het ook op 30 Oktober 2018 ’n groot verkoopsmylpaal bereik nadat sy albums saam meer as 20 miljoen verkope wêreldwyd oortref het – hy het dít bereik met slegs twee albums, In The Lonely Hour en The Thrill of It All.

The post Sam Smith: Aantreklik, plat op die aarde en uiters suksesvol! appeared first on rooi rose.

Minder blou, meer Spoegwolf! Deur Zoë Salzwedel. Hooffoto: Verskaf

Spoegwolf is ’n Afrikaanse alternatiewe rockmusiekgroep van die Paarl en is in Februarie 2012 gestig. Sedertdien het hulle reeds drie albums vrygestel, Swaartekrag, Somer en Die Donker Toring, en spog hulle met talle optredes, en nommer een-treffers agter hul naam – in 2018 alleen het die manne van Spoegwolf 150 uitverkoopte konserte regoor die land met hul aanhangers gedeel.

Spoegwolf bestaan uit Danie du Toit (sang en kitaar), Chris von Wielligh (kitaar en klavier), Moskou du Toit (dromme en sang) en Albert van der Merwe (baskitaar, sang en kletsrym). Van hulle gewilde treffers sluit in “Loerie”, “Lenie Blou”, “Bittermaan” en “Somerset-Wes”.

Die groep besit ’n opname-ateljee waar hulle baie produksiewerk doen, maar ’n groot deel van die opnames word by Sunset Recording Studios buite Stellenbosch gedoen. Hul nuutste album, Koma, is op 14 Februarie 2019 vrygestel en ons het besluit om te gaan uitvind wat ons van dié nuwe album kan verwag.

The post Minder blou, meer Spoegwolf! appeared first on rooi rose.

Rolene wil inspireer met haar album vol lewenslesse deur Zoë Salzwedel. Hooffoto deur Marnus Meyer

Buiten haar titels as Mej. Suid-Afrika en Mej. Wêreld in 2014, het Rolene ook in 2017 haar MBChB-graad in Geneeskunde aan die Universiteit van die Vrystaat verwerf. Dié skoonheidskoningin, ma en sakevrou hoop om te inspireer met haar nuwe projek en gesels-album, Secrets to My Growth.

Hierdie projek is egter nie al waarmee dié voormalige skoonheidskoningin, wat in Volksrust grootgeword het, besig is nie. Sy het ook vroeër vanjaar ’n holistiese gesondheidsentrum, RevitaHealth, op Val de Vie-landgoed in die Paarl saam met haar skoonsus, Dr Ledivia Strauss, oopgemaak. Alhoewel sy nie by die kliniese aspekte betrokke is nie, is sy wel baie betrokke in die sake-aspek van die nuwe onderneming.

Rolene is verder ook die voorsitter van The Strauss Foundation, ’n nie-winsgewende organisasie wat probeer om ’n positiewe verskil in die samelewing te maak deur gesondheid, opvoeding en liefdadigheid te bevorder. Die instansie is in 2016 deur Rolene en haar man, D’Niel, en hulle onderskeie families op die been gebring.

 

View this post on Instagram

 

A post shared by Rolene Strauss (@rolenestrauss) on Nov 14, 2018 at 8:15pm PST

Wat was die motivering agter die album Secrets to my growth? Hoe het jy op die konsep besluit?
Secrets to My Growth is geskryf en opgeneem met die doel om die dinge wat ek al in die lewe geleer het, deur omstandighede of mentors, met ander te deel.  Ek glo dat daar soveel foute is wat ’n mens nie noodwendig hoef te maak nie, maar liewer daaroor by iemand anders kan leer. Secrets to My Growth bestaan uit die dinge wat ek met my jonger self sou wou deel en eendag met my kinders gaan deel.

Wat het jy die heel meeste geniet van dié nuwe projek?
Omdat die projek ’n groot en nuwe uitdaging was, het ek dit vreeslik baie geniet. In Suid-Afrika is daar nog nie ’n “spoken word”- album vrygestel nie. Dit was verfrissend om die lesse wat ek al geleer het bymekaar te kon sit en so terug te kyk na alles wat ek reeds bereik het, waar ek vandaan kom en hoe ek self al gegroei het. Ek sien natuurlik baie daarna uit om te sien hoe dit ander se lewens aanraak – dit is immers die doel wat ek met Secrets to My Growth het.

Die Spoken Word-genre is baie gewild oorsee en word beskryf as digkuns vir lewendige optredes. Secrets to my growth  is een van die eerste pogings wat plaaslik aangewend word om ’n album in dié styl uit te bring. As baanbreker op die gebied, wat was vir jou die uitdagendste deel van die projek?
Die uitdagendste deel van Secrets to my Growth was juis dat ons plaaslik die eerste poging aangewend het om só ’n album vry te stel. Ons het niemand gehad om by te leer nie, en ook nie presies geweet hoe om die projek aan te pak nie. Die skryf van die album was nie uitdagend nie en behalwe vir die deel waar ek gesing het en heeltemal buite my gemaksone was, het die opname van die album ook beter afgeloop as wat ek verwag het.  Die uitdagenste deel was om die perfekte “underscore” (agtergrondmusiek) vir elke snit te kry. Op die ou einde, na vele meningsverskille, het ons besluit om iemand te kry wat die agtergrondmusiek spesifiek vir elke snit skryf – net soos wat jy die agtergrondmusiek vir ’n Disney-fliek laat skryf.

Foto deur Marnus Meyer

 

Watter boodskap wil jy graag met die album aan jou aanhangers en volgelinge oordra?
Daar is 14 snitte op die album en elke snit het ’n ander boodskap wat ek graag wil oordra. Die eerste snit is ’n inleidingssnit en verder het elke ander snit ’n ander tema waar ek ’n bietjie van my lewensstorie vertel – dit wat ek al uit die lewe geleer het en in sommige snitte deel ek ook ’n paar praktiese wenke. Een van die boodskappe is dat ’n mens wel kán verander, en ek deel graag die dinge wat my lewe verander het met ander. Ek sal so graag met elke persoon wou gesels en dit persoonlik met hulle deel, daarom is Secrets to My Growth ideaal, en kan ek verskeie mense op ’n groter platforum aanraak.

Hoe sou jy jou ervaring en die maak van ’n album beskryf?
Die ervaring was beslis uitdagend, maar ook opwindend! Dis die eerste groot projek, buiten die opening van ons gesondheidssentrum  (RevitaHealth) wat ek aanpak nadat ek Mej. Wêreld was en my mediese studies voltooi het. Dit was vir my lekker om aan iets nuuts te werk. Dit is selfs na die produksie van die album steeds vir my uitdagend omdat ek nog nie weet wat die mense se gevoelens daaroor gaan wees en hoe die album aanvaar gaan word onder die publiek van Suid-Afrika of internasionaal nie. Ek deel verskeie persoonlike stories, en dit voel amper soos ’n babatjie wat ek in die wilde wêreld instuur. Ek is wel steeds opgewonde oor die moontlike impak wat die album kan hê, aangesien die doel daarmee is om lewens aan te raak. Indien ek ’n impak op net een persoon se lewe kan hê, sal dit alles die moeite werd wees.

 

View this post on Instagram

 

Pssst! It’s LIVE!!! ? SECRETS TO MY GROWTH ? Pre orders are officially open ? *Link in my bio* Let me know what you think of the first two tracks and video available from pre-orders Would love to hear your thoughts! ______________________________ #secretstomygrowth #spokenword #album #live #linkinbio @applemusic @itunes @umgsa @inhoudhuismusiek

A post shared by Rolene Strauss (@rolenestrauss) on Nov 15, 2018 at 8:35pm PST

Wat is jou droom vir die album – wat hoop jy om te bereik?
My droom vir die album is om mense se lewens aan te raak. ’n Verdere droom is ook om op hierdie album voort te bou. Ek het ’n hele paar dinge in gedagte wat ek in die toekoms sal wil doen, maar ek is definitief passievol hieroor en mense kan gerus my platforms dophou vir meer inligting.

Volg Rolene op Sosiale Media: facebook, Instagram, en haar webwerf

As jy Secrets to my growth in een sin moes opsom, wat sou dit wees?
Secrets to my Growth is vol stories, persoonlike verhale, lewenslesse wat ek reeds geleer het en praktiese wenke wat ek met ander wil deel.

Foto deur Marnus Meyer

SECRETS TO MY GROWTH kan nou bestel word by: https://inhoudhuis.lnk.to/RoleneStrauss

The post Rolene wil inspireer met haar album vol lewenslesse appeared first on rooi rose.

Sy sukses met “Vergeet wat jy weet van liefde”, “Eendag as ons groot is” en “Sewentien” het hom Ghoema en Tempo-toekennings besorg.

Nog goeie nuus is dat hy later vanjaar landwyd toer.

Dewald sê sy bewonderaars moes lank wag vir die nuwe album omdat die hele produksiespan rêrig hard gewerk het om seker te maak hulle bring ’n album uit met net die beste materiaal wat hulle op die oomblik kan vervaardig.

Hy slaag daarin om emosie oor te dra met sy liedjies.
“Mense het baie goed gereageer op my werk. Ek het nooit geweet soveel mense identifiseer met dieselfde probleme en temas as ek nie. Dis ’n ongelooflike gevoel om te weet jy’s nie alleen nie. Jy word aanvaar.”

Die inspirasie en tema van liedjies op die nuwe album kom uit sy reise die afgelope twee jaar.
“Dit het beslis bygedra tot liedjies soos ‘Amsterdam’, asook ‘Stroom op en been-af’, wat ek in Venesië geskryf het. Die temas is beslis breër as op die vorige album. Ek raak ’n bietjie aan liefde, maar ook aan hoop, oorwinning en selfs ’n klein stukkie politiek.”

Die nuwe album het ’n vars klank.
“Dis grootendeels te danke aan my kitaarspeler en goeie vriend, Danny Smoke. Hy het die meeste van die verwerkings gedoen. Ek het ook bietjie meer volwasse geword, en wou graag ’n meer internasionale klank skep vir die album. Johan Vorster het saamgestem dat dit tyd is vir iets nuuts in Afrikaans. Die klank is die produk van ’n handjievol mense wat saamgewerk het aan een doel.”

Hy werk lekker in ’n span saam met Johan Vorster, beken hy.
“Ek ken vir Johan al sedert ek EDEN se beligting begin doen het in 2008. Ons het ongelooflik baie professionele respek vir mekaar, en die verhouding is van so aard dat ons mekaar kritiek kan gee … negatief en positief natuurlik. Hy is ’n meester in sy veld, en dis ongelooflik inspirerend om saam met hom te werk, en by hom te leer. Ons het ook saam met Christoph Kotze geskryf, wat ’n baie positiewe energie na die hele projek verleen het. Hy is ongelooflik talentvol en energiek.”

* Sluit sommer vandag nog aan by sy 21 000 Twitter-volgelinge as jy op die hoogte wil bly van alle nuus rondom die nuwe CD en opkomende vertonings @DewaldWasserfal

The post Dewald Wasserfall stel binnekort nuwe CD vry appeared first on rooi rose.