bekende aktrise | rooi rose

Vyf-vinnige-vrae-Vrydag met Roeline Daneel, aktrise in die nuwe goedvoel-Kersfliek, Desemberdiewe

Karlien Meiring — Fri, 16 Dec 2022 08:30:52 +0000

Wat is die Kerstyd sonder ’n goedvoel-Kersfliek? Hierdie Desember vier kykNET die feestyd met ’n fliek wat die feestyd deur die oë van kinders sien. Desemberdiewe is ’n rolprent wat die hele familie saam kan geniet.

Die vollengte fliek word op Saterdag 17 Desember 20:00 op kykNET (DStv-kanaal 144) uitgesaai en bevat temas van omgee, vriendskap en mededeelsaamheid wat deur volwassenes en kinders se verskillende perspektiewe van Kersfees verken word.

Die rolverdeling sluit onder andere die geliefde aktrise Roeline Daneel in. Roeline bekoor al lank kykers in veral Fraksie, Fynskrif, Die boekklub, Binnelanders en Kompleks.

In Desemberdiewe vertolk sy die rol van Retha, ’n verpleegsuster in ouetehuis op die klein dorpie waarheen sy en haar dogter, Jó, onlangs getrek het. Retha werk verskriklik hard en probeer haar bes om ’n goeie ma te wees, maar Jó beproef daagliks haar geduld. Veral wanneer sy besluit om Kersgeskenke van die rykes te steel en aan die kinders by die weeshuis uit te deel om aan die heelal te bewys sy verdien beter behandeling …

Karlien Meiring het by Roeline meer oor hierdie nuwe fliek en die uitdaging van ma-wees en ma-speel gaan uitvind. (Hooffoto: Nardus Engelbrecht)

Foto: Nardus Engelbrecht

Waaroor gaan jou nuwe fliek, Desemberdiewe?

Desemberdiewe is ’n regte goedvoel-Kersfliek. Jó en haar oorwerkte enkelma, Retha, trek vanaf die stad na ’n klein dorpie. Al wat Jó wil hê, is om terug te trek en om ’n selfoon vir Kersfees te kry, maar sy leer van karma en dat goeie dade beloon word. Só kry sy die idee om Kersgeskenke by die ryk kinders te begin steel om aan die weeskinders te gee. Die fliek is mooi, snaaks en laat ’n mens sommer warm in die hart voel.

Glo jy aan karma soos jou karakter se kind, Jó?

Ek dink, helaas, die lewe is meer willekeurig as dit, maar ek glo tog dat positiwiteit en hulpvaardigheid raakgesien en gewaardeer, dalk selfs beloon, word.

Hoe het jou uitkyk op die lewe verander vandat jy ’n ma geword het?

Ek is selfsugtiger met my tyd, want daar is ’n allerbelangrikste wese wat baie daarvan nodig het. Ek is banger – oor veiligheid, die toekoms, geleenthede – omdat ek nie net meer vir myself lewe nie. Ek is terselfdertyd ook vreesloser, omdat nietige dinge meer gesien word vir wat dit is.

Wat het jou karakters, Retha (Desemberdiewe) en Nina (Fraksie), jou geleer oor wat dit beteken om ’n goeie ma te wees?

Retha leer my van tough love en Nina leer my van lojaliteit. Al twee van hulle het minder ondersteuning van ’n mede-ouer / village as wat ek het. Só hulle leer my van die veerkragtigheid van vrou- en ma-wees.

As jy met een van die karakters wat jy al vertolk het, moes lewens uitruil, met wie sou dit wees? Hoekom?

Klara, die bulhond-prokureur in Fynskrif. Dit moet baie bevrydend wees om so min om te gee wat ander mense van ’n mens dink soos sy!

Foto: Nardus Engelbrecht

Kykers kan Saterdag 17 Desember om 20:00 op kykNET (DStv-kanaal 144) inskakel vir Desemberdiewe – ’n fliek wat die hele gesin saam kan geniet. Dit sal ook op Catch Up beskikbaar wees.

Lees ook: kykNET se Desemberdiewe is 2022 se goedvoel-Kersfliek

The post Vyf-vinnige-vrae-Vrydag met Roeline Daneel, aktrise in die nuwe goedvoel-Kersfliek, Desemberdiewe appeared first on rooi rose.

Fiela se Nina oor onvoorwaardelike liefde en jou sê sê

Zoe Salzwedel — Thu, 12 Sep 2019 12:06:29 +0000

Fiela se Nina oor onvoorwaardelike liefde en jou sê sê – Deur Zoë Salzwedel. Hooffoto: verskaf

Melissa Willering, die 21-jarige Suid-Afrikaanse aktrise is veral bekend vir haar rol as Chrissie Bekker in die gewilde kykNET-sepie Getroud met Rugby (GMR). In November 2015 het sy haar matriek voltooi en in Januarie die volgende jaar het sy by die Bekker-gesin op GMR aangesluit, waar sy tot onlangs nog die rol van ’n opstandige tiener vertolk het.

Melissa is in Pretoria gebore en het haar laerskool- en hoërskoolloopbane aan Dirk Postma voltooi. Onder leiding van Esther Bredenkamp kon sy haar kreatiwiteit uitleef deur dramaklasse as ’n buitemuurse aktiwiteit te neem. In 2014 het sy haar deurbraak in die vermaaklikheidsbedryf gemaak nadat sy die ATKV- en Villa Rosa se Sterrejag-kompetisie gewen het. Deur dié kompetisie het sy die tienerrol van Ilse Momberg gekry.

Vanjaar maak sy haar rolprentdebuut in Fiela se Kind. Dié fliek is gegrond op Dalene Matthee se gelyknamige en geliefde roman, en Brett Michael Innes is in die regisseurstoel. Melissa vertolk die rol van die volwasse Nina van Rooyen.

View this post on Instagram

Ek mag uiteindelik hierdie nuus deel! Dit was nog altyd ‘n droom van my om in ‘n Dalene Matthee meesterstuk te speel. En ek kan met dankbaarheid sê dat ek die voorreg het om vir Nina van Rooyen nuwe lewe te gee op 13 September 2019!!?

A post shared by Melissa Willering (@melissawillering) on May 13, 2019 at 2:05am PDT

Ons het gaan hoor wat sy alles oor dié besonderse rolprent te sê het:

Wanneer het jy besef jy wil graag eendag in die vermaaklikheidsbedryf werk?

Ek kan nie die spesifieke ouderdom onthou nie, maar ek weet dit was al op laerskool. Ek het eers in graad agt met dramaklasse begin, maar was dadelik mal daaroor – dit het my “veilige hawe” geword waarna ek weekliks kon ontsnap!

Toe ek in 2013 die eerste keer op die stel van Villa Rosa (waarin ek in daardie stadium ’n vakansierol gespeel het) gestap het, het ek geweet dat ek dít vir die res van my lewe wou doen.

Wat is vir jou die opwindendste deel van ’n lewe in dié bedryf?

Beslis die oomblik wanneer jy hoor dat jy ‘n rol gekry het! Niks kom by daardie gevoel nie. En dan natuurlik ook om op stel te kom en dít te doen waarvan jy hou. Elke dag is anders, jy het nooit dieselfde dag op stel nie. Ek dink dis waarom ek dié loopbaan bo enige ander werk verkies.

Wat wens jy het jy geweet voordat jy besluit het om ’n beroep in die kunste te volg?

Ek wens ek het werklik besef hoe moeilik dit gaan wees om te vryskut – ek het geweet dit gaan moeilik wees, maar ek het nooit regtig besef wat dit alles vereis nie. Boonop het ek drie jaar lank in ’n sepie gespeel, en ek het nie besef hoe moeilik die “spaar en wag vir werk”-deel gaan wees nie.

View this post on Instagram

Chrissie being Chrissie. ? #kyknetgmr

A post shared by Melissa Willering (@melissawillering) on Jan 19, 2018 at 7:49am PST

Wat is jou droomrol?

Ek wil baie graag die rol van ’n sterk vrou van my ouderdom vertolk; ’n vrou wat deur verskeie uitdagings in haar lewe worstel, maar sterker aan die ander kant uitkom. ’n Regte emosiebelaaide rol.

Wat beteken dit vir jou om deel te wees van ’n groep kunstenaars wat aan ‘n Dalene Matthee-storie lewe gee?

Alles. Die feit dat dit my eerste fliekrol is, is ’n baie groot voorreg. Ek wou van my skooldae af in ’n Dalene Matthee-storie speel, want sy het my nog altyd geïnspireer. Sy skryf oor sterk karakters wat soveel ontwikkel, en dít is die soort karakter wat ’n mens graag wil vertolk. Hierdie geleentheid is nie een wat elke dag oor ’n mens se pad kom nie. Ek is vreeslik dankbaar.

Watter boodskap neem jý uit Fiela se Kind?

Ek neem die boodskap van onvoorwaardelike liefde saam. Fiela was vir Benjamin nét so lief soos vir haar eie kinders. Dit maak nie saak wat ’n mens se ras of identiteit is nie, ware liefde is onvoorwaardelik.

Watter les het jy by jou karakter, Nina van Rooyen, geleer?

Ek het by haar geleer om sterk te wees en my sê te sê wanneer dit nodig is. Sy is hardkoppig en volg haar eie kop wanneer dit by haar lewe kom, en ek respekteer dit van Nina.

Wat was die moeilikste deel van die hele verfilmingsproses?

Vir my was dit die feit dat ek ’n ikoniese karakter vertolk wat so baie mense reeds ken. Die gehoor gaan in die teater stap met ’n vooropgestelde idee van hoe elkeen van die karakters moet optree. Maar ek het probeer om vir Nina ’n nuwe “baadjie” aan te trek en ’n nuwe lewe te gee – nes die teks van my verwag het. Ek het getrou aan my teks gebly.

View this post on Instagram

A post shared by Melissa Willering (@melissawillering) on Jun 17, 2019 at 2:02am PDT

Hoe lyk ’n tipiese dag op die stel van Fiela se Kind?

Ons staan vroeg op, eet ontbyt saam, gesels oor ons scenes vir die dag, dan word hare en grimering gedoen, ons oefen woorde en skiet tonele. Die hare en grimering het dikwels lank gevat omdat ons elke dag van voor af in “vuil bosmense” moes verander. Ons moes ook gewoonlik ’n hele rukkie wag terwyl hulle die skote opstel, en dan het ons akteurs sommer saam deur ons woorde gelees. Die skiet van tonele kon dikwels ure neem, maar elke dag het verskil. Ons was ook nie elke dag dieselfde tyd on call nie.

Ons het een dag (op ons afdag) saam ’n berg gaan uitklim en sommer net die pragtige natuur van die beeldskone Knysna om ons geniet. Dit was ’n wonderlike ervaring om in die regte Knysnabos te verfilm.

https://www.instagram.com/p/BxZaR1ghnSB/

Waaraan werk jy tans?

Ek vryskut, en tussendeur werk ek baie hard aan my studies. Ek studeer sielkunde deur UNISA en dit neem baie van my tyd in beslag, maar ek maak darem aan die einde van vanjaar klaar.

View this post on Instagram

A post shared by Melissa Willering (@melissawillering) on Nov 17, 2018 at 2:21am PST

Fiela se Kind sal Vrydag, 13 September landswyd in teaters begin draai.

Kyk gerus hier na die amptelike lokprent van Fiela se Kind:

Vir nog lekker onderhoude met plaaslike bekendes, klik hier

The post Fiela se Nina oor onvoorwaardelike liefde en jou sê sê appeared first on rooi rose.

Bekende Hollywood-ster binnekort weer op televisie

Nicole Kemp — Mon, 10 Oct 2016 09:00:21 +0000

Die nuwe televisiereeks, Divorce, is SJP se jongste projek wat haar nie net voor die kamera plaas nie, maar ook agter-die-skerms as Uitvoerende Vervaardiger.

Parker speel die rol van Frances, ’n vrou wat begin om haar lewe en huwelik met manlief Robert (vertolk deur Oscar-benoemde Thomas Haden Church) te heroorweeg. Dit word egter gou duidelik dat dit nie so maklik is om ’n huwelik te ontknoop nie en die kyker word van die intreeslag af saam met Frances geneem terwyl sy dié nimmereindigende proses begin.

Kykers kan uitsien na ’n sterbelaaide rolverdeling met akteurs soos Molly Shannon (Enlightened), Talia Balsam (Mad Men), Tracy Letts (Homeland), Sterling Jerins (World War Z) en Charlie Kilgore (Moonrise Kingdom).

Met sy unieke benadering tot egskeiding en die effek wat dit op die alledaagse vrou het, beloof Divorce om ’n wenner van ’n reeks te wees!

*Divorce begin op Dinsdag, 11 Oktober op M-Net Edge (kanaal 102) met ’n Express from the US-uitsending om 01:00, met ’n latere uitsending op Vrydag, 14 Oktober om 21:00.

The post Bekende Hollywood-ster binnekort weer op televisie appeared first on rooi rose.