Deur Maryke Roberts. Foto’s: Clifford Roberts

Die inspirasie vir JAN Franschhoek kom uit die TV-program, JAN RSVP, wat op VIA gekyk kon word en wat op Showmax stroom. Die kulinêre ervaring word in ’n historiese kothuis, Veepos, reg in die middel van die Franschhoekvallei se skilderagtige laventellande aangebied. Die aand is ’n perfekte pasmaat van ’n nostalgiese storie met kos en voortreflike wyn, en gaste ervaar die verhaal deur Jan Hendrik se interpretasie van onthoukos uit ons jongdae.

Jan Hendrik vertel dat hy in sy jonger jare altyd by die pragtige huisie in die laventellande by La Motte – wat van die pad sigbaar is – verbygery het. “Ek onthou ek het altyd gewonder hoekom dit nie ’n super eksklusiewe eetplek is nie. En hier is ons deur nou oop vir die kulinêre nuuskieriges.”

Hy beskou hierdie nuutste avontuur as ’n huldeblyk aan sy vroeë jare in die wynlande, toe hy besig was om sy vaardighede te slyp en die skoonheid van die omgewing te ontdek.

“My jare in die wynlande het so ‘n groot deel van my kulinêre en ontwerpopleiding gevorm dat ek nog altyd wou terugkom vir meer. Ek dink dit is soos om ‘n goeie wyn te drink. As jy eers ’n proe gehad het, wil jy aanhou om dit te geniet.”

Gaste arriveer by die historiese La Motte herehuis vir ’n glas vonkelwyn en word dan na die klein Veepos oorkant die pad vervoer. Die geboutjie is horingoud en met gedroogte kruie wat uit die dak hang, moerkoffie wat op die oop vuurherd prut en ou sepiafoto’s, kan jy jou verbeel dis op oupa en ouma se plaas donkiejare gelede.

Daar word hande in ’n waskom en beker gewas, voor die spys en drank bedien word. Daar is net een langtafel wat 16 gaste kan huisves en almal kuier oor en weer, soos in die ou dae, vertel Jan Hendrik.

JAN Franschhoek neem gaste op ’n sensoriese reis wat bestaan uit bestanddele wat deur die berg en rivier geïnspireer is. Voor elke gang verduidelik een van die sjefspan wat die beduidenis van die dis is en met watter wyn dit geniet gaan word. Wanneer Jan Hendrik nie self in die land kuier nie, word die nostalgiereis voortgesit onder leiding van JAN Groep se uitvoerende sjef, Antro Davel en hoofsjef Anzette Klynhans.

Die maaltyd wat ten tyde van ons besoek bedien is, het onder meer biltong Lamingtons, ’n braaibroodjie makrolletjie en bobotie jaffel choux as verwelkomingshappie met ’n glas Vin de Joie Rosé 2018; daarna forel-en-komkommer somerslaai met Pierneef Sauvignon blanc 2022; koolstoof roosterbrood consommé met koue botter en baba mosbolletjies met La Motte Chardonnay 2020; gevriesde appel, tête de moine, Bergrivier tilapia met skelvis-melk velouté met die JAN White Blend; kookkos met die Pierneef Syrah Viognier 2019; en pap brandsel, kaas en konfyt met die JAN Red Blend ingesluit.

Die tameletjie meringue is met Boekenhoutskloof Noble Late Harvest Semillon bedien. Diegene wat nog plek gehad het, kon moerkoffie en mignardises geniet.

Die wyne van La Motte sluit die Vin de Joie Rosé 2018 en die La Motte Chardonnay 2020 in. Die Boekenhoutskloof Noble Late Harvest Semillon word saam met die nagereg bedien.

Jan Hendrik se restaurante sluit ook twee kulinêre afsetpunte in, die JAN Innovation Studio in Kaapstad en Klein JAN by Tswalu en Restaurant JAN in Nice, Frankryk.

Lees ook: Nuwe enkelmout whisky voltooi sirkel vir Nels

The post JAN se nostalgiereis in die Franschhoek laventellande appeared first on rooi rose.

Suid-Afrika se gewildste lys van restaurante vereer vanjaar (vir die tweede opeenvolgende jaar) weer die beste eetplekke in die land. Die wenners van die Eat Out Mercedes-Benz Best Everyday Eateries vir 2016 word bepaal deur die restaurante (in verskillende kategorieë) volgens 5-ster graderings. Die resultate word bepaal deurdat lede van die publiek vir hul gunstelingrestaurante stem. Daar is vanjaar ook drie splinternuwe kategorieë op die lys.

2016 se kategorieë is as volg

• Best African Eatery
• Best Asian Eatery
• Best Bistro
• Best Burger Eatery
• Best Coffee Shop
• Best Country-Style Eatery
• Best Indian Eatery
• Best Italian Eatery
• Best Seafood Eatery
• Best Steakhouse
• Best Food Truck (*nuut)
• Best Tapas Eatery (*nuut)
• Best Mexican Eatery (*nuut)

Anelde Greeff, Eat Out se uitvoerende redakteur, sê: “In antwoord op die skare se gunstelinge en om die jongste kos- en restaurant-trends regoor die land te reflekteer, het ons besluit om nog drie kategorieë vir 2016 in te sluit.”

Mercedes-Benz is weer die hoofborg van vanjaar se toekennings.

Hoe werk dit?

Lede van die publiek word genooi om, regdeur die jaar, Eat Out se webblad te besoek waar hulle die standaard van die verskeie eetplekke kan bepaal en resenseer. In elke kategorie vir elke provinsie sal die restaurante met die hoogste tellings tussen Oktober 2015 en 30 September 2016 kwalifiseer en by vanjaar se Eat Out Mercedes-Benz Best Everyday Eateries bekroon word. Daar sal twee geleenthede hiervoor wees, een in Kaapstad en een in Gauteng. Restaurante wat goed vaar in hul kategorie maar nie aan al die kriteria voldoen om te wen nie, kom in aanmerking vir Highly Recommended-sertifikate.

Jy kan ook stem of een (of meer) van die restaurante resenseer. Besoek www.eatout.co.za en stem vir jou gunstelingrestaurant.

The post Eat Out Mercedes-Benz – SA se beste restaurante appeared first on rooi rose.