Deur Bea Lingenfelder Hooffoto: pexels.com

Nuwe lengtes

Skouerlengte-oorringe is vir ’n rukkie al groot nuus en baie gewild. Boonop pas dit amper by enige styl of gesigvorm. Dit kan jou nek slanker laat lyk, maar in dieselfde asem kan dit net so vinnig jou neklyn laat verdwyn … Dus moet jy ’n lengte kies wat vir jóú reg is: die onderste punt van die oorring moet net-net oor jou skouer skuur as jy jou kop draai. As jy ’n meer dramatiese voorkoms wil probeer, eksperimenteer met oorringe waar die punte op jou sleutelbeen rus. Hierdie opvallende lengte skep ’n verslankende illusie en boonop beklemtoon dit jou sleutelbeen. Die laasgenoemde styl werk baie goed by oopskouer-toppies, waar jou skouer en sleutelbeen ontbloot is. Maak seker dat jou hemp nie te besig is by jou skouergedeelte nie, byvoorbeeld met valle en borduurwerk, want dit kan die doel van die oorringe teenstaan.

Buitengewone knoppies

Ons almal het daardie klassieke paar diamantjies of pêrels en hoewel dit tydloos en veilig is, moedig ons jou aan om ’n bietjie te waag. Jy sal verbaas wees hoe baie ’n paar eenvoudige knoppie-oorringe jou voorkoms kan beïnvloed! Die style van die tagtigerjare keer op die loopplanke terug, maar nie almal van ons is groot aanhangers van daardie kenmerkende effekleurknoppe en -hoepels nie. Die styl word gemoderniseer met borduurwerk, blinkers en diamant-afwerking wat jou ’n fokusitem van 2018 bied. Kies ’n grootte wat by jou gesigvorm en ore pas – moenie ’n knoppie die grootte van ’n R5-munt forseer as jy klein ore het nie.

Kies slim met diamante 

Wie kan nee sê vir ’n skitterende diamant? Diamant-oorringe is sinoniem met deftig en jy sal nooit verkeerd kan gaan met ’n klassieke enkelstring-oorring of -halssnoer nie. Ontwerpers soos Dior bewys egter ook dat meer soms mooier kan wees, maar daar is tog ’n dun lyn wat die waarde van jou diamant-bykomstighede bepaal. Replikas (“costume jewellery“) het veroorsaak dat dit moeilik is om tussen egte en nagemaakte juwele te onderskei. Ons moedig jou aan om in ’n duursame ontwerp te belê as dit moontlik is. As jy op ’n kandelaarstyl besluit, dra dit alleen as fokusitem.

#rrwenk: Te veel blink of diamante saam kan vinnig nagemaak lyk, waar ’n meer klassieke styl dikwels in waarde styg.

Speel met motiewe

Ons is baie opgewonde oor al die motiewe en vorms wat tans in bykomstighede voorkom. Tropiese woude, diere, vrugte, geometriese style, hoepels en balle … Dit maak dit soveel makliker om jou uitrustings in ’n knipoog op te kikker. Nou het jy geen verskoning om vaal te lyk (en te voel) nie. Selfs jou klassieke style kan vernuwe word met ’n moderne motief. Ons moedig jou aan om met al hierdie keuses te eksperimenteer – vind ’n oulike dieremotief wat tot op jou skouer hang en trek dit saam met ’n maksirok of denim aan. Blaarmotiewe word deesdae herhalend op loopplanke gesien in winter- en somertrends. Maak seker jy het ten minste een waaghalsige styl wat jy op daardie spesiale geleenthede kan uithaal en met selfvertroue dra.

Meng materiale

As buitengewone vorms effens te uitdagend vir jou voel, kan jy altyd met materiale rondspeel. Tossels is orals te sien en word elke keer met net nog meer drama bekendgestel! Pom-poms bied ’n speelsheid vir beide jou voorkoms én gemoed. Dit kom boonop dikwels in helder kleure voor, wat beteken dat jy nie in die oggende jou kop hoef te krap oor hoe jy jou uitrusting interessant kan maak nie – voeg ’n paar pom-pom-oorringe by en trotseer die dag met ’n huppel in jou stap.

Is jy lief vir uitdagings? Meng verskillende materiale bymekaar, byvoorbeeld skulpe saam met pom-poms, of vere, stene en tossels.

The post Fokus op oorringe appeared first on rooi rose.

Teks en Hooffoto: Bea Lingenfelder

Groot oorringe is groot nuus in die modewêreld, veral die kandelaar- en hoepelstyle. Hoewel groter deesdae as beter beskou word, raai ons jou aan om seker te maak jy kies ’n grootte wat by jou nek en gesiggrootte pas. Langer oorringe kan jou nek mooi slank laat lyk, maar sodra dit té groot vir jou proporsies is, kan dit die teenoorgestelde effek hê. Maak seker jou oorring skuur net so liggies bo-oor jou skouer, sodat dit steeds maklik en vrylik beweeg as jy jou kop draai. Net daardie bietjie beweging skep die illusie van ’n lang, verslankende nek. As jy eerder ’n korter styl soek, maak seker jou oorringe eindig dan parallel met die punt van jou ken. As jy baadjies of kraaghemde dra, maak seker jou oorringe verdwyn nie tussen die voue nie of oorweeg eerder ’n halssnoer as jou fokusitem.

Halssnoere word ook met oud en nuut gekombineer. Laag op laag word gedra met ’n fyner ketting bo en ’n groter, bonkiger en meer moderne styl na onder. Moet egter nie te veel lae dra nie – twee of drie is genoeg. ’n Langer halssnoer skep die illusie van ’n langer bolyf – kies dus een wat net bo jou naeltjie eindig om te verhoed dat jou bolyf in twee gedeel word. Let ook op na die bloes wat jy dra – As jy ’n v-nek hals het, kies ’n halssnoer wat saam met die v-nek hang, een met ’n hangertjie aan die onderpunt.

Kry gerus die April 2018-uitgawe van rooi rose vir nog wenke rakende die bonkig-en-besonderse-style.

Agter-die-skerms-foto’s

Fotograaf: Niquita Bento

Hare en grimering: Cheryl Parker van Supernova

Model: Kayla Hansen van Boss Models

Moderedakteur: Susra Matthee

Agter-die-skerms-foto’s: Bea Lingenfelder

The post Agter die skerms by ons April-modefotosessie appeared first on rooi rose.

– Deur Bea Lingenfelder Hooffoto: Twitter Follow @AnneMichelleBH

Strooimandjies of -sakke is een van die stapelitems hierdie somer. Deur die jare is dit vir huisdekor, pieknieks en see-uitstappies gebruik, maar danksy die modekenners kan hierdie item nou in die plek van ’n handsak gedra word. Hoewel Jane Birkin dié modetrend reeds in 1970 aan die wêreld voorgestel het, het modekenners soos Alexa Chung en Camille Charrière tydens 2017-modeweke weer met strooi-bykomstighede aan hul arms gepronk.

The post Strooimandjies: Jou nuwe somer-gunsteling appeared first on rooi rose.

Sportief

’n Sportiewe styl kan in nog onderafdelings verdeel word, bv. in oefen, modieus, ens. Die styl word uitgeken aan sy groot gesig en syfers sodat jy maklik die tyd kan lees. Daar is dikwels ook ander funksies (datum, stophorlosie) vir veelsydige en praktiese gebruik. Dit is effens meer bonkig as jou standaard vrouehorlosie, maar het steeds ’n elegante voorkoms. Rubber- of silikoonbandjies is baie gewild onder hierdie styl, omdat dit baie beweeglik is.

Klassiek en tydloos

Minder is meer met hierdie styl, maar dit beteken nie dit is vervelig nie. Die klassieke ontwerpe word deesdae met verskeie teksture opgekkiker maar behou steeds sy simplistiese ontwerp. Die kenmerkende silhoeët met die ronde gesig en maklike leesbare syfers gee ’n elegante afronding aan enige voorkoms en sal inpas op enige plek in die tydlyn.

Vroulik en fyn

Hoewel hierdie ontwerp soortgelyk is aan die klassieke styl, is die vroulike styl uitkenbaar deur sy polsbandjie wat effens smaller is –  vir ’n fyner voorkoms. Dit word dikwels met die tradisionele vroulike elemente soos diamante op die raampie van die gesig versier en die bandjies bestaan hoofsaaklik uit leer of ’n ketting-ontwerp wat die horlosie meer na ’n armband laat lyk.

Buitengewoon

Maak ’n horlosie jou fokus-item deur ’n styl te dra wat die koppe sal laat draai. ’n Verskeidenheid vorms, kleure en patrone laat jou toe om ’n pasmaat vir jou persoonlikheid te kry. Jy kan hierdie styl dikwels uitken deur ’n buitegewone gesigvorm. Die ontwerp is nie altyd maklik leesbaar nie, wat bewys dat hierdie styl hoofsaaklik ’n mode-item in plaas van ’n tydlees-item is.

The post Stylvolle horlosies appeared first on rooi rose.

Juwele gaan kop toe

Lyk prinses-mooi met ryklik versierde krone en juwele in die katedraal-styl in jou hare.

Ingeryg

Armbande wat om jou voorarm ingeryg word, het onlangs opslae gemaak en is nou nog mode. Dra jou horlosie aan dieselfde arm as die armbande.

Knus aan die arm

Dié armbande is nie veronderstel om aan jou polse te klingeling nie – skuif dit op tot net onder jou elmboog en dra een of meer aan ‘n arm.

Ringe op ’n ry

Jy kan verskillende ringe saam dra, of koop ’n stel wat bymekaar pas. Die midi-ringe wat net bo die kneukel sit, is hoogmode.

The post Bykomstighede: goud en baie ‘bling’ appeared first on rooi rose.

Ontmoet die kenners

1 Kies die regte broek

Met die jare verskuif die kontoere van ’n mens se lyf (soos jou middellyf wat sommer oornag verdwyn!) – al behou jy dieselfde gewig, meen Elsa Kruger. Kies daarom ’n broek wat beter aan jou lyf sit.

Minnette Oliver se raad is om eerder weg te bly van ’n wye pyp of bootleg-broek. ’n Noupyp of regaf broek is op die oomblik ’n meer moderne snit en jy sal nie lyk asof jy in die jaar 2003 agter gebly het nie. Boonop is dit verslankend en dus meer vleiend.

Denim is steeds ’n groot trend op die oomblik en is iets wat enigiemand van enige ouderdom kan dra.

#rooirosewenk: Kies ’n denim wat ’n klein bietjie rek. Dit laat die denim nader of bo jou middel sit sodat daar geen muffin-rolletjie is nie. ’n Denim in donkerder skakerings is altyd meer vleiend.

2 Dra gerus wit

Wit naby jou gesig lig jou gelaatstrekke. Coco Chanel het gesweer by ’n wit kragie, ’n string pêrels of ’n wit kameliablom naby haar gesig. Elke vrou moet ’n perfekte wit hemp hê, is Elsa se raad. Minnette se stylraad is dit eens: donker kleure naby jou gesig beklemtoon donker kringe onder jou oë waar wit weer die teenoorgestelde effek het en jou gesig verhelder en verlig.

Kies ’n bloes in ’n interessante styl, meen kenner Cathi Trevor. Bloese is steeds groot nuus hierdie seisoen. Besluit op een met ’n unieke kraag of wyepyp mou (veral vleiend vir daardie bo-arms wat beweeg).

3 Waag ’n trend

Een van die jongste modeneigings op die oomblik is die trainer trend (tekkies). Cathi sê dit is een van die beste trends nog. Dit lyk nie net koel nie, maar dit is super gemaklik, stylvol en ’n veelsydige item in jou klerekas. Jy mag dalk dink “Ek sal dit nooit kan dra nie”, maar dink weer. Jy kan dit dra by broeke, rompe, rokke en selfs by jou jou werkspakkie.

Minnette se stileer-wenke

• Wys jou enkels. Minette sê: “Daar moet geen sokkie uitsteek nie, die doel is om jou enkels te sien.”
• Rol jou broekspype om (1 tot 2 cm), dit sal jou enkels en bene slanker laat vertoon, omdat dit die dunste deel van jou been beklemtoon.
• Probeer jou tekkies by meer formele uitrustings vir die beste “sports luxe“-voorkoms.

#rooirosewenk: As jy nie weet watter styl om te kies nie, kies ’n paar tekkies in swart en wit, wat enige uitrusting sal komplimenteer.

4 ’n Goeie kwaliteit baadjie

’n Mooi getailleerde baadjie is een van die veelsydigste kledingstukke wat jy in jou kas kan hê. Dit werk ewe goed by ’n denim as by ’n eenvoudige slooprok of romp, sê Elsa.

Cathi is in akkoord en meen ’n goeie kwaliteit baadjie is ’n moet-hê item. Spandeer gerus daardie ekstra bietjie geld op goeie materiaal en teksture, maar maak seker dit sit goed aan jou lyf. So ’n baadjie is ’n tydlose belegging. Kies een in swart, vlootblou of grys om seker te maak dat dit by soveel moontlik uitrustings pas.

#rooirosewenk: Rol jou moue op vir daardie ekstra tikkie cool.  Probeer ook ’n leer- of denimbaadjie wat ’n jeugdige voorkoms gee.

5 Moenie bang wees vir bykomstighede nie

Probeer ’n slag iets nuut. Verruil jou alledaagse oorbelle vir ’n interessante ontwerp of ’n deftige halsnoer. Sien byskomstighede as jou geheime wapen wat nuwe lewe aan ’n doodgewone uitrusting kan gee. Maar die belangrikste, sê Cathi, is dat jy dit moet geniet om met bykomstighede te speel en te stileer.

Hoe ouer jy word, hoe meer kleurvol, flambojant en eksentriek kan jy met jou bykomstighede wees. Mooi groot, duursame en stylvolle (nie goedkoop Made in China nie) ringe, armbande, halssnoere, hoede, serpe en oorbelle laat jou interessant en byderwets lyk, is Elsa se styl-raad.

6 Wees jouself!

Styl-ikoon Jackie Burger se raad is om jouself te wees! Selfaanvaarding is onvoorwaardelik en fokus altyd op jou bates.

“Hoe ‘ouer’ ek word, hoe meer bevrydend voel ek oor my styl en wie ek is. Ek baklei baie dae teen die plooie, sagter lyf, meer rondinge en al die ander skadu-gedagtes wat op ’n af-dag oor my skouer loer en my spieëlbeel tart. Dan haal ek diep asem en vra myself eerlik of ek regtig die horlosie wil terugdraai. Die antwoord is toenemend speels en aspris en môre durf ek weer ’n nuwe kleur lipstiffie aan, groei vir ’n slag my hare omdat ek lus is en verf my naels ’n prontuit rooi. Ek dra my vintage tuxedo-baadjie oor ’n kraakwit hemp met oordadige moue en my ou gebleikte jeans voel sexy en gemaklik. Wit sneakers met metaal-detail vir lekker loop en ’n tikkie aweregs!”

Ons stem saam. Beklemtoon jou goeie bates en geniet jou styl-avontuur.

Loer gerus na Ari Seth Cohen se Advanced Style Instagramblad vir inspirasie!

https://www.instagram.com/p/BH3LCdRA315/?taken-by=advancedstyle

The post Trek só meer modern aan appeared first on rooi rose.

Vat jou hare terug en voel selfversekerd met spoggerige oorbelle. ’n Vrou voel sommer spesiaal met ’n paar van haar gunstelingoorbelle.

Dra oorbelle met glinsterende stene vir die aand, of kies neutrale oorkrabbertjies vir die dag – dit is ’n aanwins omdat dit as ’n veelsydige item dien wat by die meeste van jou klere sal pas. Geometriese oorbelle is ’n groot trend vir die komende seisoen.

Hier is ’n paar van ons gunstelinge …

The post Skitterende oorbelle appeared first on rooi rose.

Albertus Swanepoel is internasionaal bekend vir sy hoed-ontwerpe. Hy het al verskeie reekse en ontwerpe bekendgestel wat elke keer met bewondering en applous ontvang word. Besoek gerus sy webblad vir ’n kykie in sy ongelooflike kreatiwiteit. Die blad is interaktief en noukeurig ontwerp met visuele elemente wat beïndruk. Klik hier

 

The post ’n Hoed is ’n moet appeared first on rooi rose.

Wat was die inspirasie agter Code Afriquette S1.15?

Ek het laasjaar oor Afrika gevlieg en dit, en my besoek aan Suid-Afrika het my geïnspireer met patrone van die natuur en die styl wat ek waargeneem het. Tendense beïnvloed die seisoenale benadering op ’n natuurlike manier, net soos kunsuitstallings, musiekvideo’s en wat ons ook al voel in die mode is. Hierdie seisoen se films het ’n groot invloed gehad met Her, Star Wars, Gattaca en Bicentennial Man hoog op die lys vir inspirasie. Ons het ’n versameling geskep wat kunsmatige intelligensie meng met Afrika-stamtradisie en wat spreek tot retro-futurisme, die nuwe hippie, Art Deco en feminisme. Mimco bevat harmonieuse kontraste!

Wat was die publiek se reaksie?

Ons het ’n baie entoesiastiese reaksie gekry van die vroue wat by ons koop. Die patroon, tekstuur, detail en materiaal wat ons gebruik het, sowel as die fotografiese veldtog met Ajak Deng, is goed ontvang.

Wat is jou gunstelingstuk in die versameling?

As ek dit moes beperk tot een belangrike aankoop vir die seisoen, sou dit die MIMCO Gatta swart handsakkie wees. Die styl is elegant en gesofistikeerd en die mengsel en detail saam met die kettingband bied ’n ekstra gevoel van luuksheid. Dit is groot genoeg om al die noodsaaklikhede in te pas en is die perfekte sak om kantoor toe, en ook saans na ’n funksie te dra.

Die beeldmateriaal van die veldtog is asemrowend. Waar en hoe is dit geskiet?

Ons het geskiet by die bekroonde Landskapargitektuur, Cranbourne Botaniese Tuine, net buite ons tuisstad Melbourne, Australië. Ons wou ’n oop ruimte hê waar ons beweging in die skote kon vasvang. Die tuine is vol beskermde inheemse flora en fauna, maar die omgewing was ook magies weens die pragtige argitektuur. Christian Blanchard het die veldtog geskiet en hard daaraan gewerk om futuristiese skote met inspirasie van pienk en helder geel te skep. Baie werk en liefde gaan in ons veldtogte in en ons klein, knap span skep saam wonderlike eindresultate.

Hoe lyk die ideale MIMCO-vrou?

Die vrou wat getrou is aan haar eie styl. Sy wil nie dieselfde lyk as ander nie en soek na maniere waarop sy haar eie persoonlikheid en die handelsmerk en stukke wat sy koop, kan kombineer.

Ajak Deng is die gesig van hierdie veldtog. Hoekom het jy haar gekies as model?

Ajak Deng verpersoonlik die MIMCO-vrou. Sy is energiek en het selfvertroue. Sy het haar skoonheid en ’n rou, natuurlike energie na die veldtog gebring, en soos jy sê, die resultate spreek vir hulself. Sy was die perfekte keuse!

Wat kan ons in die toekoms verwag?

Ons gaan vanjaar ’n paar nuwe winkels in Suid-Afrika oopmaak. MIMCO is volgende jaar 20 jaar oud en ons beplan ’n groot feesviering. Ons kyk na hoeveel ons vroue reis en die toebehore wat sy vir hierdie reise nodig het. Kyk uit vir ons Kersfees-versameling. Ons beplan ons somer-veldtog met ’n baie opwindende internasionale gesig. As als goed verloop, sal ons gereed wees vir die volgende ses tot 12 maande en daarna.

Wat is die ideale mode-styl vir KODE: Afriquette?

KODE: Afriquette se vrou is eklekties, maar nog nie oorwerk – en probeer nooit te hard nie. Sy wys haar individualiteit deur ’n unieke stuk of twee, en is sterk genoeg om haar persoonlikheid die held te laat speel. Sy hoef nie in blink goed begrawe te word nie. Sy blink self uit.

Beskryf die nuwe reeks in een sin.

Grafies, atleties, ontspanne glans, eklekties en individualisties.

– Cathryn Wills van MIMCO –

The post MIMCO se Afrika-inspirasie appeared first on rooi rose.

Karl Lagerfeld is verseker een van die mees bekende en ikoniese ontwerpers wêreldwyd! Hy is bekend vir sy sterk ontwerpers styl en voortdurende herskepping van idees in die mode wêreld. Hy is deur Vogue bestempel as ’n persoon wat mode weergaloos interpreteer. Hy ontwerp onder sy eie naam en is ook die groot dryfveer agter welbekende handelsmerke soos Chanel en Fendi.

Die Karl Lagerfeld horlosie versameling is vanaf November maand in Suid-Afrika beskikbaar! Die Perspektive Platform horlosie is van vlekvrye staal en het ’n intense blink afwerking wat dit ’n opvallende prag bykomstigheid maak. Vir verskaffers inligting skakel 021 418 0045.

The post Karl Lagerfeld se horlosies appeared first on rooi rose.