Seun

In Seun, wat op die gelyknamige outobiografie van die skrywer Dana Snyman gegrond is, vertolk die akteur Wilhelm van der Walt ’n hoofstuk in Dana se lewensverhaal waaroor hy lank nie gepraat het nie: Sy ervaring tydens die jare tagtig. Dié eenmanstuk, wat op Saterdag 25 April om 17:30 opgevoer word, is ’n intieme blik op Dana se lewe tydens die doodsnikke van apartheid, oor manlikheid en oor eer, en oor die liefde wat uiteindelik alles oorwin. ’n Kaartjie kos R220.

Op Sondagoggend 26 April om 9:00 is Dana Snyman self aan die woord om vir feesgangers van sy drie jongste boeke te vertel! Hy praat met Jaco Strydom (skrywer van verskeie geestelike boeke en die roman, Daka) oor “rugby, reise en die army.” ’n Kaartjie kos R120.

Ingrid: ’n Vlam in die sneeu

Ingrid: ’n Vlam in die sneeu is ’n teater- en musiekproduksie wat op die boek Vlam in die sneeu gegrond is. Dié opvoering op Maandag 27 April om 11:00, neem jou op ’n reis deur die ongesensureerde liefdesbriewe van die digter Ingrid Jonker en die skrywer André P. Brink. Lizelle Pike lewer ’n ontroerende vertolking as die jong Ingrid en Chanie Jonker is ’n meesterlike pianis. Die eenvroustuk is ’n viering van Ingrid se lewe − ’n vrou wie se woorde die wêreld getroos het, selfs al het haar eie hart gebreek. ’n Kaartjie kos R200.

Bacchus tot Bekker

In Bacchus tot Bekker (Saterdag 25 April, 12:00-13:00) gooi die gewilde voormalige RSG-omroeper Amore Bekker soos ’n wafferse keldermeester die elemente van komedie en klug, tragedie en melodrama in ’n glas saam. Teug saam met haar aan vermaaklike stories en soet herinneringe oor wyn. Op Amore se unieke manier vermeng sy dit met ’n goeie skeut nostalgie. Dis jou kans om Bacchus, die god van wyn, van naderby te leer ken! ’n Glas gratis wyn is by die kaartjieprys van R200 ingesluit. Amore het die teks geskryf en Tobie Cronjé (wat ook by die fees is om ’n rol in “Under Milk Wood” te vertolk) is die regisseur.

Besoek www.clarensartsfestival.co.za vir die volledige program. Jy kan ook jou kaartjies op dié webwerf koop.

Lees ook: 10 redes waarom jy rooi rose se April-uitgawe móét lees!

The post Kom kyk dié Afrikaanse toneelstukke by die Clarens-kunstefees appeared first on rooi rose.

Die fees word vanjaar van 1 tot 4 Mei gehou. 

Op die program:

Een van Suid-Afrika se gewildste akteurs Ian Roberts praat oor sy memoire Is dit jy? en speel vóór in Radio Kalahari Orkes se konsert. 

Clarens se eie musiekster Josh Mokoena kom huis toe met sy jazz-vertolking, terwyl die immergewilde André Schwartz met sy nuwe produksie “Gesigte” beloof om ‘n vol saal te trek. 

Die bekroonde musiekblyspel Vincent − met Daniel Anderson begelei deur Paul Ferreira − verken die lewe van die enigmatiese kunstenaar Vincent van Gogh. 

Kaartjies verkoop ook vinnig vir raconteur en Comrades-koning Bruce Fordyce se boekpraatjie Tales from the Road (Hy neem ook die voortou by die Clarens Parkrun op Saterdag 3 Mei).  

Die Aussie-superster Tony Park deel geheime oor die skryf van blitsverkopers en gesels oor sy liefde vir Suid-Afrika se natuurlewe. 

Uit Breyten se Boek:  

Skeppende kunstenaars Laurinda Hofmeyr, Bibi Slippers en Koos van der Merwe bring met woord en lied eer aan Breyten Breytenbach. Kaartjies is hier beskikbaar.

Storiekos: Frik de Jager:  

StorieKos is veel meer as net nog ʼn kookboek. In StorieKos nooi Frik de Jager jou uit om saam met hom op reis te gaan vanaf die Karoo tot in Kaïro en van Rusland tot in Rome. Dit is ʼn kos-reisverhaal waarin hy sy passie vir “peasant food” of plattelandse kos deel – resepte en stories van mense en ervarings versamel oor ʼn tydperk van bykans vier dekades. 

Hy deel die eenvoud en opregtheid van hierdie geregte wat die toets van tyd weerstaan het en deur die jare aangepas is in die kombuise van generasies van huiskokke. Kry jou kaartjie hier!

Sjampanje & Soetgoed:  

Kom vier die lewe saam met die skrywer en akteur Susan Coetzer en hoor die storie agter Haas en Harriët, haar jongste roman wat oornag sterstatus bereik het. As motiveringspreker − met ‘n rits boeke met ‘n geestelike inslag agter haar naam − trek sy landwyd vol sale met haar eg-menslike en humoristiese aanslag. Sorg dat jy nie die sessie saam met Susan op die daktuin van iL Castello misloop nie! (‘n Glasie borrels en ‘n paar happies by kaartjieprys ingesluit) 

Rillers & Raaisels:  

Die bekroonde joernalis, skrywer en uitgewer Marida Fitzpatrick vertel van die droom waaruit haar sielkundige riller, Mara ontstaan het. Nuweling Elmarie Viljoen-Massyn deel die verhoog met agtergrond oor haar nuwerwetse spanningsroman Vuurvoël wat met ‘n filmprys bekroon is. Marian Human-Nel van die Departement Afrikaans en Nederlands, Frans en Duits aan die UV lei die gesprek oor boeke wat jou laat naels kou. Klik hier vir kaartjies.

Op die dorpsplein trek sowat 40 visuele en beeldende kunstenaars saam om hul werk uit te stal. Vir die volledige lys van kunstenaars, klik hier.  

As jy brand om jou eie kunstigheid − of verbeelding − vrye teuels te gee, is daar werkwinkels wat jou sal besiel. As jy hou van poësie of pottebakkery, skryf of skilder, konsert of kook, boeke of bekendes; debatte of diepsinnige gesprekke … die Clarens Kunstefees bied iets vir elke smaak. 

Kyk na die volledige program en bespreek jou kaartjies hier. 

Lees ook: Vyf-vinnige-vrae met Anton Goosen oor die verloop van tyd en sy nuwe musiek

The post Kom Clarens toe vir die kunstefees op 1 Mei! appeared first on rooi rose.