Christiaan Ackerman is te sien as Juvan Bester, Nelius se kleinseun wat gewoond is aan net die beste in die lewe. Deoudoné van der Merwe is Tomi, ’n jong vrou wat alles in haar vermoë sal doen om die aarde te red. Juvan en Lomi is jeugliefdes, maar hoe sterk is hierdie liefde?

Christiaan Ackerman is te sien as Juvan Bester

Vertel ons meer van Juvan, die karakter wat jy vertolk?

Juvan is die kleinkind van Nelius, wat beteken hy is met die silwer lepel in die mond gebore. Hy het baie selfvertroue en is altyd reg vir ’n lekker kuier. Juvan swem by die Swart Marlyne, maar dis ook net omdat sy oupa aandele in die klub besit. Hy besef nie eintlik wat harde werk beteken nie omdat hy gewoonlik net alles in die lewe op ’n skinkbord kry.

Jy vertolk die rol van Nelius se kleinseun. Jurgen Hellberg is ’n legende in die TV-bedryf. Hoe voel dit om saam met hom op stel te wees?

Om saam met Jurgen te werk is ’n reuse-voorreg. Ek kon agterkom hoe lank hy al in die bedryf is deur tonele saam met hom te doen. Sy natuurlike reaksies en uitvoering van dialoog is iets waarvan ek baie geleer het. Hy laat my so gemaklik voel met elke toneel waarin ons is.

En die ander akteurs op stel? Hoe is dit om saam met hulle in ’n telenovela te speel?

Dis dieselfde met die ander akteurs op stel. Hulle is ontsettend vriendelik. Dit het baie gehelp om vinnig chemistry te bou wat dan bydra tot chemistry op die skerm. Ek het in die begin besef hulle is ’n familie wat al lank saam werk en ek is ’n gas in hulle huis, maar hulle het my so vinnig deel van hulle laat voel, en daarvoor is ek baie dankbaar.

Vertel ons meer van jou agtergrond?

Ek kom oorspronklik van Hoedspruit, Limpopo, af. Ek was 16 toe ek verlief geraak het op filmmaak en ek klein skits saam met my broers begin maak het. Ek het toe die voorreg gehad om verder te studeer en het toe reeds vir oudisies begin gaan om die nodige ondervinding in die filmbedryf op te bou.

My eerste werk as akteur was in ’n advertensie gewees. Toe het ek so ’n bietjie reality TV vir Via gedoen, in ’n kykNET Storiefilm gespeel en in ’n opvoedkundige film vir Primestars verskyn. En nou is ek in Diepe waters te sien!

Sonder om iets weg te gee, waarna kan kykers uitsien met Juvan se storielyn?

Met Juvan se baie spontane en impulsiewe persoonlikheid, glo ek kykers gaan gereeld wonder wat hy volgende gaan aanvang. Wat ek baie van Juvan geniet, is dat hy nie soos die ander karakters is as dit by drome en doelwitte kom nie. Hy gaan maar net met die vloei van die rivier en is nie altyd opreg nie. Dit maak hom lekker om te speel.

 Lees ook: Willie Esterhuizen gaan jou nog ‘n slag laat lag, dié keer met ‘Banana Air’

Deoudoné van der Merwe is te sien as Tomi

Vertel ons meer van Tomi?

Tomi is so ’n lekker karakter om te kan speel! Sy is quirky en vergeetagtig, maar terselfdertyd is sy regtig oppit. Aanvanklik was sy baie skaam, maar sy het haar stem gevind toe sy besef hoe groot haar passie vir die natuur en wêreldbewaring is. Sy is ook eintlik ’n baie ernstige mens.

Hoe is dit vir jou om deel van die Diepe waters-rolverdeling te wees?

Dit is AWESOME! Sulke warm, egte mense wat jy op stel en van stel af regtig goeie verhoudings mee kan bou. Ek is baie bevoorreg om saam met sulke legendes in ’n reeks so goed soos Diepe waters te kan speel. En die tegniese span is almal gefokus, vriendelik en baie goed met wat hulle doen. Cast en crew kuier lekker saam.

Hoe verskil jy en jou karakter?

Kom ons begin met haar klere – sy het so ’n interessante styl Ek is nie vegan nie. So, dit is natuurlik ’n hele ander verwysingsraamwerk wat mens moet gaan ondersoek, verstaan en dan kyk watter van jou eie oortuigings oorvleuel.

Wat was sover vir jou hoogtepunte op stel?

Dat ek nie in die koue swembad moes swem nie. Ek grap! Maar ek haal regtig my hoed af vir die swemmers. Junie en Julie is nie ’n lekker tyd vir swem nie. My ander hoogtepunt was om weer saam met Righard van Jaarsveld te kan speel. Ons karakters was in ’n verhouding in die film Die val (2022). Diepe waters is die eerste keer wat ek weer in ’n Afrikaanse produksie verlief raak en ook weer teenoor Righard kan speel.

Sonder om iets weg te gee, wat wag op Tomi?

Tomi en Juvan het in skool begin uitgaan. Hulle kon mekaar help om uit hulle doppe te klim, en albei het so baie in die laaste twee jaar gegroei. Daar kom wel ’n punt in lang verhoudings waar ‘n mens herevalueer oor hoeveel julle nog eintlik in gemeen het.

Tomi gaan mense ontmoet wat haar werklik verstaan. En behalwe vir liefde, gaan sy teen aardverwarming op allerhande maniere baklei, soveel soos sy kan.

Diepe Waters word Maandae – Donderdag om 18:30 op kykNET (DStv-kanaal 144) uitgesaai. Dis ook op DStv Stream en Catch Up beskikbaar.

Lees ook: EKSKLUSIEWE FOTO’S: Donnalee Roberts vier veertig keer om die son!

The post Vyf-vinnige-vrae-Vrydag met ‘Diepe waters’ se twee nuwe karakters appeared first on rooi rose.

Jy kan dalk dink Deoudoné van der Merwe se TV-loopbaan het laas jaar met ’n knal afgeskop as mede-aanbieder van die rugbyvasvraprogram Koppestamp, wat vir opgewondenheid vir die Wêreldbeker-rugbytoernooi gesorg het. Maar voor dit het sy reeds haar stempel as die energieke Stella, die gesig van kykNET tydens hul 21ste verjaardagveldtog, afgedruk.

En nou is sy as Ciska Nortjé, die rabbedoe-niggie van Nicolette (vertolk deur Kate Roothman) in Binnelanders te sien.

Lees ook: Vyf-vinnige-vrae-Vrydag met ‘Binnelanders’ se Luandri Reynders

“Dis lekker om die kykNET-kykers bietjie ‘range’ te wys, omdat Stella ’n karakter met baie energie was. Toneelspeel in ’n sepie is baie uitdagend! Ek het so baie geleer,” vertel sy.

Deoudoné, een van ses dogters, se grondslag vir haar toekoms in die kollig is by Oakfields College gelê waar sy drama en musiekteater studeer het.

Volgens haar is die Binnelanders-stel ook ’n waardevolle leerskool.

“Ek het my geheue-spier baie geoefen: Dis baie teks wat jy met die meeste regisseurs woord-vir-woord perfek moes geleer het! Ek moes ook heeltyd oop vir terugvoering wees, vinnig kon aanpas en gemaklik raak met tegniese aspekte wat baie onnatuurlik kan voel.”

Sy sê die grootste les wat sy tot dusver deur haar vertolking van die rebelse suster Ciska geleer het, is dat daar nie iets soos ‘perfek’ in toneelspel is nie.

“Die storie begin dalk lig, maar ons hanteer baie ernstige onderwerpe. Ciska gaan deur ’n hele reeks emosies; dit was as aktrise so ’n lekker uitdaging!”

Karlien Meiring het meer oor Deoudoné se reis na TV-roem gaan uitvind.

Waar kom jou liefde vir toneelspel vandaan en hoe het jy in die vermaaklikheidsbedryf beland?

Ek was al as kind baie dramaties en mal daaroor om normale daaglikse take in “breaking news”-tonele te omskep. Dit was eers toe ek baie ouer was, dat dit ’n loopbaanopsie geword het. Ek was op die punt om onderwys te gaan studeer, want ek het in my oorbruggingsjaar by ’n skool gewerk wat vir my studies sou betaal het. Toe ek my pa van hierdie plan vertel het, was sy woorde: “Maar dit is mos nie wat jy wil doen nie? Jy wil act!” En met daardie ondersteuning het ek van koers verander en drama (vir ’n jaar), musiekteater en dans (vir drie jaar) studeer. Ek het TV en rolprente in my studies ontdek en daarop verlief geraak! Dis so “real” – as jy as akteur dit voel, dan voel die kykers dit ook.

Watter aspekte van Ciska se karakter in Binnelanders vind jy is die uitdagendste of interessantste om uit te beeld?

Haar hardkoppigheid en hoe sy gesag net minag. Ek is definitief meer van ’n reëlvolgeling. Ek is ook baie meer van ’n vredemaker en sal eerder dinge uitpraat en iemand se kant probeer insien as net myself vervies. Dit was dus interessant en uitdagend om ’n paar baie kwaai tonele te speel!

Was daar enige rolmodelle in jou lewe wat jou reis in die vermaaklikheidsbedryf geïnspireer het?

Vandat ek besluit het om drama te swot en besef het hoe groot my passie daarvoor is, is ek werklik deur elke akteur teenoor wie ek al gespeel het, geïnspireer – selfs tydens oudisies. Ek weet Charlize Theron is nie meer baie Suid-Afrikaners se gunsteling nie, maar sy is regtig vir my inspirerend. ’n Meisie van Benoni wat ’n Oscar wen? Dit is baie, baie indrukwekkend!

Buiten toneelspel, wat is van jou gunstelingstokperdjies?

Ek is kunstig en is mal oor verf en skets (Kyk hier na van haar kunswerke) Ek het ook verlede jaar begin om toneelspel-werkswinkels vir vriende by my huis aan te bied – snaaks genoeg vir meer mense wat nie akteurs is nie en dit is vet pret!

Wat is jou loopbaandrome vir die toekoms?

Ek is mal oor ons plaaslike bedryf en is trots Afrikaans! Dit is lekker om stories in jou eie taal te kan vertolk, maar my groot droom is om ook in internasionale rolprente te kan speel. Ek het nog ’n ver pad om te gaan en baie wat ek moet leer, maar my ek glo: “Aim for the stars and you might reach the sky.”

Skakel weeksaande om 19:30 in op kykNET (DStv-kanaal 144) vir die jongste drama en intrige wat in die gange van Binnelanders uitspeel.

Lees ook: Ivan en Donnalee stel nuwe kykNET-reeks bekend

Lees ook: Vyf-vinnige-vrae-Vrydag met Nicole en Hennie Bosman oor ‘Wanderlus’ se jongste seisoen

The post Vyf-vinnige-vrae-Vrydag met Binnelanders-nuweling, Deoudoné van der Merwe appeared first on rooi rose.