Deur Rentia Mynhardt. Foto: Verskaf.   

Angeli Marais is ʼn gebore entrepreneur wat op tienjarige ouderdom haar eerste onderneming begin het. Dis waarskynlik die feit dat sy eers op driejarige ouderdom hare op haar kop begin kry het, wat haar liefde en belangstelling vir hare geprikkel het; ʼn liefde wat baie jare daarna tot groot sukses sou lei.

Dit is heeltemal normaal vir dogtertjies om met Barbie-poppe te speel, maar Angeli het veel meer met hulle gedoen as net mooi aangetrek. Hulle was haar eerste amptelike kliënte wat gewillig stil gesit het terwyl hul hare gedoen word. As kind moes Angeli se ma gedurig na haar nuwe besigheidsidees luister, wat sy dan ook kort daarna laat realiseer het. Tydens haar brugjaar ná matriek het Angeli ʼn modelagentskap vir dogters tussen vyf en 15 –  Flawless South Africa – op die been gebring, wat sedertdien tot een van die land se grootste modelplatforms van sy soort gegroei het.   

Dit was aanvanklik die regsfakulteit by Tuks wat Angeli, een van ʼn tweeling, na afloop van haar brugjaar nadergewink het, maar die entrepreneur in haar het die oorhand gekry en sy het uiteindelik haar graad in aanbodkettingbestuur voltooi, ʼn besluit waaroor Angeli veral deesdae dankbaar is, omdat sy dít wat sy studeer het daagliks in haar onderneming toepas. 

“Ná my studies het ek op ʼn internasionale produk afgekom wat later gepatenteer is. Ek het ʼn alternatief vir menshare uitgerol en Novella and Co. in 2022 aanlyn begin. ʼn Jaar later het ek beleggers gevind wat in die onderneming belê het en kon ek uiteindelik die gekonsolideerde skoonheidsateljee waaroor ek gedroom het in Pretoria oopmaak.”

Angeli vertel hoe sy na ’n naam vir haar onderneming gesoek het wat luuksheid moes weerspieël, maar ook die toets van tyd kon deurstaan. “Novella” beteken “nuut” of “storie”. “Dit was die perfekte naam waarna ek gesoek het.”

Sy het ʼn geleentheid in die mark gesien nadat sy self by verskeie salonne hare gedoen en as ambassadeur opgetree het. “Ek het gefrustreerd met die bedryf geraak omdat ek kon sien dat ons nie op internasionale standaard is nie. Ek wou nog altyd my belangstelling en liefde vir skoonheid met akademie verweef. Die skoonheidsateljee gee my die geleentheid om dit te doen.” 

Stringe hare word uit die westelike dele van Europa ingevoer. Elke string hare, wat minstens 30 keer gewas word, word eers getoets en word gesorteer volgens die kleur van die ondertoon om te bepaal of die hare blond gekleur kan word al dan nie. “Novella and Co. bring wetenskaplike innovasie met ’n kunstige visie byeen om produkte van hoë gehalte te verseker.” Wanneer die hare uiteindelik vele toetse deurstaan het, word dit in verskillende lengtes en kleure omskep wat die perfekte natuurlike kersie op talle kroontjies sit.  

Haar kliënte, waaronder talle bekende name soos Rolene Strauss en Aletté Winckler, word in groot luuksheid spesiaal laat voel, of hulle hul hare of naels doen, haarverlengstukke of wimpers kry, grimeer of masseer word, of selfs verslankingsbehandelings kry – hulle keer terug om weer hierdie ervaring uit ʼn Eerstewêreldland te kom ervaar. 

“Ons kliënte ontvang waarde vir hul geld en dis bekostigbaar om alles onder een dak laat doen,” verduidelik Angeli, terwyl sy trots na die unieke ligte, kandelare, houtpanele, fluweelafwerkings en Hollywood-spieëls kyk wat elke kliënt byna adellik kan laat voel. “Ons ateljee is regtig klassiek en enig in sy soort, met ʼn baie besonderse span mense wie se briljante werk lojaliteit by kliënte kweek.”  

Angeli sien haar grootste mylpaal as die dag toe haar sake-idee ’n tasbare werklikheid geword het. Sy en Lysle Turner, haar sakevennoot en liefde van haar lewe die afgelope ses jaar lank, het die projek om hierdie vlagskipwinkel die lig te laat sien self behartig.

“Elke liewe detail in hierdie skoonheidsateljee het ’n laat nag wat daaragter skuil. Dit maak die eindresultaat soveel meer bevredigend as jy sien hoe jou harde werk in iets omgeskakel word wat ander kan geniet.”

Behalwe dat sy daarna mik om Novella and Co die “Louis Vuitton” van die skoonheidsbedryf te maak, is haar droom dat haar onderneming en dienste op ’n internasionale platform erken sal word. “Ek wil mense beter af laat wees as vantevore en wil graag iets bou wat aan die volgende generasie oorgedra kan word en moontlik werkloosheid kan verminder.” 

Hierdie pragtige, blonde entrepreneur is stadig, maar seker besig om uitdrukking aan hierdie visie te gee, onder meer met die oprigting van die “Femme Tank”, ʼn platform vir vroue met sake-idees en -drome. “Femme Tank maak dit moontlik vir vroue om onder mekaar te netwerk en jou bestie in business te vind.” 

Die platform bied ʼn diens aan vroue waar hulle toegang tot beleggers kry wat moontlik in hul besigheidsidees kan belangstel. Daar word ook opleiding deur ʼn span gegee wat op besigheidsontwikkeling fokus. “Femme Tank neem ʼn besigheid van ʼn idee na ʼn werklikheid.”  

Volgens Angeli is daar iets unieks aan vroue se ervaring van die lewe en is sy oortuig dat hoe meer selfvertroue vroue in die besigheidswêreld kry, hoe meer vroue daar in senior posisies aangestel sal word. “Vroue het toegang tot ondersteuning, opleiding en hulpbronne nodig en die noodsaaklikheid om te netwerk speel ʼn groot rol hierin. Ons skep by Femme Tank ʼn wêreldwye susterskap waar vroue binne ’n veilige en kreatiewe ruimte kan netwerk sodat hulle die gereedskap kan kry wat nodig is om sukses te bereik.”

Sy glo dat geslagsgelykheid ʼn nuwe aanslag, nuwe produkte en nuwe dienste sal meebring, en om vroue met vaardighede toe te rus, gee aan hulle ’n stem en selfvertroue om dit te kan bereik. “Vroue moet aangemoedig word om hul stemme te laat hoor sodat sosiale norme kan verander en skadelike stereotipes afgebreek kan word. Vandag se pioniers vorm môre se geleenthede wat tot voordeel van ander is.”

Dit eindig nie daar nie. Daar is selfs franchise-geleenthede beskikbaar, sou jy ook ʼn geleentheid soek om jou liefde vir skoonheid na ʼn volgende vlak te neem. Hoewel Angeli voel dat entrepreneurskap uitdagend is, voel sy ook dat dit van jouself afhang hoe jy kies om dit te hanteer. 

Haar onderneming word digitaal bemark, maar sy erken ook dat mondelinge kommunikasie geweldig belangrik is. “Word of mouth is een van die belangrikste maniere hoe jou onderneming se beeld versprei word. Jy moet sorg dat die gehalte van die produk en diens wat jy lewer iets is waaroor mense wil praat.”  

Wanneer jy met mense werk, kan jy beslis weet dat almal een of ander tyd met mekaar gaan verskil of ontevrede gaan wees. Angeli gebruik die woorde van Bill Gates as riglyn om dit te hanteer:   

• Bly kalm, ongeag hoe ontsteld jou kliënt raak.
• Luister en wees empaties teenoor jou kliënt en hul bekommernisse.
• Gee ʼn vinnige antwoord.
• Vind uit wat gebeur het.
• Bied ʼn oplossing.
• Sny jou verliese.
• Skep ʼn konflikoplossingsplan.
• Leer daaruit!

En léér, leer sy beslis graag! Wanneer sy nie oplossings vir uitdagings binne die sakewêreld kan vind nie, doen sy graag navorsing oor spesifieke mentors wat vir hul oplossings en uithouvermoë bekend is. Sy sien haar eie ma ook as een van haar mentors, wat nie net ʼn sakevrou is nie, maar ook al ʼn hartstilstand oorwin het. Dit is duidelik waar Angeli se veggees vandaan kom!

Verder toer sy graag deur Londen, en gee sy haar gewillig oor aan Indiese kos. “Ek kan net nie genoeg daarvan kry nie. Net soos die winter – ek is mal daaroor!” Sy hou nie net daarvan om mense goed te laat voel oor hul uiterlike nie, maar hul innerlike ook, want enigiemand wat al iets uit Angeli se kombuis geëet het, sien haar as ʼn bobaaskok! 

By die huis is sy en Lysle groot hondeliefhebbers, en sy beskryf haarself as ʼn regte “hondema”. “Ons Liver nose Rhodesian Ridgeback en drie Hongaarse Vizslas is ons alles.”

Dit is duidelik dat Angeli hier is om die wêreld ten goede te verander en dat sy ook vroue wil bemagtig om dieselfde te doen. Haar selfvertroue straal uit haar uit en sy kyk die lewe met sy uitdagings vierkantig in die oë. Sy droom groot en gaan in alle waarskynlikheid hierdie drome binnekort ʼn werklikheid maak.

Toe sy jare gelede met haar Barbie-poppe “besigheid” gedoen het, en haar brownie-mengsels reeds as klein dogtertjie regdeur die land versprei het, moes die wêreld al gesien het dat hier iets groots aan die kom is wat absoluut tot voordeel van die ekonomie in die algemeen sal wees.

Wanneer Angeli Marais nou sê dat sy nie sal omgee om eendag die Forbes 30 Under 30-lys te haal nie, kan jy nie help om te dink dat dit dalk nie so onwaarskynlik is nie.

Kyk saam met ons:

rooi rose en ontbytSAKE op kykNET en kykNET&kie (kanale 144 en 145) fokus op ’n reeks – vrouesake.

Kyk Saterdae om 07:30 met sewe herhalings in die week. 

Vir meer inligting, besoek gerus Ontbytsake se webtuiste.     Lees ook: 10 redes waarom jy die Augustus-uitgawe van rooi rose móét lees!

The post Femme Fantasties: Angeli Marais is ʼn gebore entrepreneur appeared first on rooi rose.

Instagram-verifikasie was nog altyd ’n gesogte statussimbool wat net vir bekende en invloedryke persone beskore was.

Maar het jy geweet dat dit nie meer die geval is nie?

Sedert Februarie 2023 is hierdie verifikasie-wapen, wat eens ’n byna onmoontlike eer was om te hê, te koop, en basies kan enigiemand – ja, selfs die normale alledaagse gebruiker – dit kry.

Die groot vraag is net of dit die tyd en koste werd is?

Magriet Groenewald, bekende sosialemediakenner, het besluit om dit te probeer en haar ervaring met ons te deel.

Tot baie onlangs was die blou merk op Instagram ’n statussimbool wat slegs aan diegene wat as “nuuswaardig” beskou is deur Instagram, op grond van kriteria wat dikwels onduidelik was, toegeken is.

“Ek het ’n paar plaaslike bekendes gehelp om hul rekeninge geverifieer te kry en het eerstehands ervaar hoe moeilik dit was. Een van my kliënte se rekeninge is selfs afgekeur, ten spyte daarvan dat dit 200 000 volgelinge gehad het en dat die persoon ’n geliefde Suid-Afrikaanse persoonlikheid is,” deel Groenewald.

Hoewel dit baie mense frustreer het, het die eksklusiwiteit daarvan om ’n geverifieerde rekening te hê tot baie unieke saamwerkgeleenthede gelei.

Die hele prentjie het egter verander na Mark Zuckerberg Meta Verified bekendgestel het – ’n intekenpakket wat ’n verifikasie-wapen insluit. Hierdie diens was oorspronklik net in sekere streke beskikbaar en die oomblik toe Suid-Afrika ook hieruit kon voordeel trek, het Magriet besluit om dit te probeer.

“Die nuwe betaalde verifikasiefunksie verander die hele scenario. Dit is fantasties vir iemand soos ek, wat fokus op die deel van waardevolle inhoud en die bou van ’n persoonlike handelsmerk, en ek kon nie wag dat dit in Suid-Afrika beskikbaar moes wees nie. Ek het egter simpatie met beïnvloeders wat hard gewerk het om hul blou merk op die harde manier te verdien in plaas daarvan om daarvoor te betaal. Is dit regverdig teenoor hulle? Waarskynlik nie, so ek vermoed dat daar nog veranderinge van Meta se kant af sal kom.”

Die hoofdoel van verifikasie, volgens Meta, is om inhoudskeppers te help om hul profiele en gemeenskappe te laat groei, terwyl dit ook die toenemende probleem van skelmstreke en robotte op Instagram aanspreek.

Om deur Meta Verified geverifieer te word, vereis ID-verifikasie, waar die naam op jou ID moet ooreenstem met jou Instagram-rekening. ’n Kop en skouers-foto wat ooreenstem met jou ID-foto is ook nodig.

Sy merk op: “Aanvanklik kon ek nie my foto geverifieer kry nie en moes ek ’n ander een gebruik wat ek nie noodwendig as my profielfoto wou hê nie. Maar op die ou einde kon ek gelukkig ’n ander meer geskikte foto geverifieer gekry.”

Kom ons kyk kortliks na die voor- en nadele daarvan om vir Instragram-verifikasie te betaal:

Voordele:

1) Vertrouensfaktor: Die geverifieerde wapen maak jou profiel meer geloofwaardig, wat noodsaaklik is wanneer jy ’n persoonlike handelsmerk bou.

2) Rekeningbeskerming: Instagram belowe om te monitor dat jou rekening nie gedupliseer word nie, wat ’n ekstra vorm van sekuriteit bied.

3) Identifisering van skelmstreke: Die blou merk help gebruikers om te onderskei tussen egte en valse rekeninge, alhoewel dit steeds nodig is om versigtig te wees.

4) Kliëntediens: Hoewel daar beweer word dat jy prioriteitsdiens sal ontvang, meen Magriet dat jy nie te veel moet verwag nie.

Nadele:

1) Die grootste nadeel is die maandelikse fooi wat jy moet betaal van R239.99 (ongeveer $13 tot $15).

Nadat sy bogenoemde inligting in ag geneem het, kon sy tot die volgende gevolgtrekking kom:

“Dit is ’n absolute moet as jy ernstig is om jou persoonlike handelsmerk te bou. Die voordele oortref die koste vir iemand soos ek wat aktief sosiale media gebruik vir besigheid en persoonlike bemarking. Dit mag egter nie ’n lonende belegging wees as jy Instagram slegs gebruik om foto’s van jou hond of aandete te plaas nie.”

Oor Magriet:

Groenewald is die eienaar en stigterslid van www.magriet.co/, ’n aanlyn sosialemediabesigheidskool. Hierdie kreatiewe brunet se passie is om entrepreneurs, besigheidseienaars en beïnvloeders te bemagtig om hulle aanlyn-voetspoor te vergroot en sodoende hulleself, en hulle produkte, beter te bemark. Gedurende agt opwindende jare in die bedryf, het sy al saam met verskeie bekendes soos Schalk Bezuidenhout, Erns Grundling. Karlien van Jaarsveld, Minki van der Westhuizen, Leandie du Randt en Simoné Pretorius gewerk.

Sy woon tans in Somerset-Wes saam met haar man en drie van hul vyf kinders.

 

View this post on Instagram

 

A post shared by Magriet Groenewald (@magriet.co)

Lees ook: Magriet Groenewald oor Threads vs. Twitter: Watter platform gaan seëvier?

The post Is dit die moeite werd om jou Instagram-rekening te verifieer? appeared first on rooi rose.

Hooffoto: Facebook (Entrepreneurs Arena)

Pick n Pay het hul medelye op sosiale media gedeel en gesê hulle is diep hartseer oor die verlies van hul stigter.

“Met diep hartseer kondig ons aan dat Raymond Ackerman, stigter van Pick n Pay, oorlede is,” lees die kleinhandelaar se plasing.

”n Visioenêre entrepreneur, filantroop en wonderlike Suid-Afrikaner. Ons land het ’n briljante patriot verloor wat altyd ’n positiewe toekoms vir Suid-Afrika gesien het.’

Die kleinhandelmagnaat het saam met sy vrou, Wendy, die prominente supermarkketting in 1967 gestig nadat hulle hul eerste vier winkels in Kaapstad gekoop het.

Oor meer as ‘n halwe eeu het die ryk tot meer as 2000 afsetpunte gegroei, insluitend winkels regoor Suid-Afrika, Namibië, Botswana, Zambië, Nigerië, Eswatini en Lesotho.

Sy pa het Ackermans kort ná die Eerste Wêreldoorlog gestig.

Die prominente sakeman het ook meer as twee dosyn onsuksesvolle geskille teen die regering oor prysverlagings geloods.

In die laat tagtigerjare het hy saam met ‘n groep sakemanne ‘n beroep op die vrylating van Nelson Mandela gedoen, kort na die aanstelling van FW de Klerk as president.

Hy het later die Raymond Ackerman Akademie vir Entrepreneuriële Ontwikkeling in 2004 in vennootskap met UCT en die Universiteit van Johannesburg gestig.

Hierdie inisiatief het voortgegaan om honderde nuwe sake-eienaars op te lewer.

Ackerman en sy vrou het uit die direksie van Pick n Pay Winkels Beperk getree en in 2010 ere-lewenspresidente geword.

Teen die tyd dat hy die voorsitter se leisels aan sy seun Gareth oorhandig het, het Pick n Pay 20 hipermarkte en 402 supermarkte regoor Suid-Afrika bedryf, terwyl die groep se omset op byna R50 miljard gestaan het.

As ‘n ou seun van Bishops Diocesan College, was Ackerman president en later beskermheer van die Old Diocesan Union.

Deur die loop van sy loopbaan het hy ook sewe eredoktorsgrade van plaaslike en internasionale universiteite verwerf.

Burgemeester van Kaapstad, Geordin Hill-Lewis, het ook vinnig sy simpatie aan die familie oorgedra en Ackerman ‘n ‘ware Kapenaar’ genoem wat ‘n beduidende nalatenskap nagelaat het.

‘Hy was werklik ‘n wonderlike Kapenaar! Raymond laat ‘n groot nalatenskap in die ekonomie van ons land en die burgerlike lewe van ons stad na,” het Hill-Lewis geplaas.

“Ek het vroeër vanjaar die plesier gehad om ’n geskenk uit die Stadsargief aan mnr en mev Ackerman te oorhandig – ’n foto van hulle by een van hul vroeë winkelopeninge in Kaapstad.

‘Ek het die foto gegraveer, “Met dankbare dank vir alles wat jy vir Kaapstad en haar mense gedoen het,” ‘n sentiment wat ek vandag herhaal.’

Hy word oorleef deur sy vrou, Wendy; sy kinders, Gareth, Kathy, Suzanne en Jonathan; sy 12 kleinkinders en vier agterkleinkinders.

Lees ook: Vyf-vinnige-vrae-Vrydag met baanbreker tydrenjaer Elvéne Vonk

The post Raymond Ackerman, stigter van Pick n Pay, sterf op 92 appeared first on rooi rose.

Daniel Strauss (41), skrywer van die topverkoper Dink soos ’n miljardêr, se jongste boek, Werk soos ’n miljardêr vertel die verhaal van Dan, ’n werknemer wat bloot van salaristjek tot salaristjek leef. Hy streef daarna om sy eie onderneming te begin en om sy eie baas te wees, maar hy staar verskeie uitdagings in die gesig. Hoe gaan hy, sonder enige geld, ’n suksesvolle onderneming begin? Op ’n dag kom Dan voor ’n groot besluit te staan wat sy hele toekoms handomkeer verander …

Daniel se jongste boek is nie ’n vervolg op sy vorige boek, Dink soos ’n miljardêr, nie.  In Werk soos ’n miljardêr deel Daniel nuttige, praktiese raad waarby alle entrepreneurs sal baat. Die storie van Dan se reis is propvol waardevolle wenke oor hoe om welvaart te skep, hoe om jouself beter te leer ken, terug te gee en volhoubare ondernemings te bou. Hy sluit ook Suid-Afrika se wonderlike natuurskoon in en skryf oor die sewe “naweek-wonders”, wat Dan moet besoek.

Soos in sy vorige boek kom sy sakefilosofie “Dink bo die lyn” weer na vore. Hierdie keer,  word dit duideliker wat dit is om “bokant die lyn” te dink en identifiseer jy as entrepreneur maklik met Dan.

Foto’s: Suzanne Swart

Daniel is self ’n suksesvolle entrepreneur wat in klein- en mediumgrootte ondernemings belê om hulle te help om vinniger te groei. Hy is die Strauss in die beleggingsbeheermaatskappy, Stocks & Strauss en het as jong seun in ’n klein dorpie, Keimoes, grootgeword. Hy het vakansies koerante verkoop om ekstra geld te verdien en nie die voorreg gehad om ’n eerste werk by ouers se ryk vriende te kry nie. Hy het ’n belofte aan homself gemaak dat hy eendag sal teruggee en sy kennis sal gebruik om mense te leer hoe om hul denke te verbreed en só hul kanse om sukses te behaal te vergroot. Hy woon tans saam met sy vrou, Rolene, en hul twee seuns in die Kaapse Wynlande.

Daniel glo ons is die sterk mense wat die goeie tye skep en dat jy jou omstandighede kan bestuur. “As daar genoeg entrepreneurs is wat saamkom en op dieselfde vlak dink, kan dit ’n reuse-verskil maak: Dit kan die ekonomie help groei, werkloosheid verminder en ’n beter Suid-Afrika vir almal bou,” sê hy.

Hy gesels juis met talle invloedryke sakelui soos Christo Wiese, dr Chris van der Merwe en Jo-Ann Strauss hieroor en oor die lewenslesse wat hulle geleer het in sy nuwe TV-program, Meer as net ’n loopbaan, wat spesiaal vir VIA opgeneem is en vanaf 8 Mei op die kassie te sien sal wees.

Karlien Meiring het meer oor sy nuwe boek en TV-program gaan uitvind.

Wat dink jy is die grootste uitdagings wat Suid-Afrikaanse entrepreneurs vandag in die gesig staar, en hoe kan dit oorkom word?

Toe ek as entrepreneur begin het, was my grootste uitdaging dat ek nie geweet het wat ek nie weet nie. Dis een van die hoofredes waarom ek die boek geskryf het en seminare aanbied. Ek sien dikwels dat ander entrepreneurs ook nie altyd weet wat hulle nie weet nie. Ek was so bevoorreg om ongelooflike mentors te hê en ek wil baie graag hierdie goed wat ek by hulle en uit my eie ondervindinge geleer het, oordra aan soveel as moontlik ander entrepreneurs sodat ons hulle waarskynlikheid van sukses kan verhoog.

Wat is volgens jou die inspirerendste aanhaling wat op entrepreneurskap van toepassing is?

“The most successful people don’t create luck, they just know how to create an environment where the probability of luck is increased.”

Wat dit so inspirerend maak, is die feit dat jy nie alles reg hoef te doen en alles te weet nie, maar as jy net jou waarskynlikheid vir sukses kan verhoog, is jou kanse vir sukses uiteraard hoër. Dis al waarop ons eintlik op ’n konstante grondslag fokus wanneer ons saam met entrepreneurs werk.

As jy vir ’n dag plekke met enige entrepreneur kon ruil, wie sou dit wees en hoekom?

Ek wil nie graag plekke met enigiemand ruil nie, want ons sakeprofiele verskil waarskynlik soveel dat ek die sakeomgewing wat ek vir myself geskep het en waarin ek konstant tot my eie sterkpunte kan werk, sal mis. As ek nou in iemand anders se posisie moet wees, gaan ek heeltyd goed moet doen wat tot hul sterkpunte spreek en nie noodwendig tot my eie nie. Dit sal baie van my energie steel eerder as wat dit vir my energie gee. Ek verkies dus maar my eie lewe!

Ten spyte daarvan, dink ek dit sal nogal lekker wees om meer by Warren Buffett te leer oor presies hoe hy entrepreneurs identifiseer en seker maak dat hul karaktereienskappe van so ’n aard is dat die waarskynlikheid van sukses in hul ondernemings hoër is as ander mense s’n. Hy en Charlie Munger is baie goed daarmee en dit sal wonderlik wees om meer insig daaroor te kry.

Wat is die interessantste of onverwagste ding wat jy oor jouself tydens jou reis met entrepreneurskap geleer het?

Ons sê altyd dat in entrepreneurskap dit geweldig belangrik is dat die mens vinniger as die onderneming moet groei – persoonlike groei is ’n ongelooflike belangrike deel van entrepreneurskap! Ek het van myself geleer dat ek tot soveel meer in staat is as wat ek oorspronklik gedink het. Dinge wat 10 jaar terug vir my ongelooflike groot uitdagings sou wees en ek as ’n onoorkombare berg voor my sou sien, is nou maar net ’n molshoop waaroor ek vinnig kan tree en dan met my lewe aangaan. ’n Mens moet besef dat jy tot soveel meer in staat is en dit dan deur persoonlike groei ontsluit. Dit was een van my grootste openbarings tydens my reis.

Hoe het jy besluit op die gaste met wie jy op jou nuwe TV-program, Meer as net ’n loopbaan, gesels?

Ek het met amper al die gaste wat op my program verskyn reeds ’n goeie verhouding of het hulle voor die tyd geken. Dit was amper vir my asof ek saam met my mentors en vriende koffie drink! Ek ken hierdie mense en ek weet wat hul sterkpunte is. Dit was vir my ’n wonderlike ondervinding om tyd saam met hulle almal te deur te kon bring en nog meer by hulle te leer.

Die boek word deur Tafelberg, ’n druknaam van NB-Uitgewers, uitgegee en is van vandag af aanlyn en in boekwinkels beskikbaar.

Lees ook: Vyf-vinnige-vrae-Vrydag met Neil Sandilands – oor sy nuwe album

The post Vyf-vinnige-vrae-Vrydag met Daniel Strauss – oor sy nuwe boek appeared first on rooi rose.

In die begin, wanneer dit veral oorweldigend is om ’n onderneming te begin, kan ander entrepreneurs se raad jou help om op die regte spoor te kom. Karlien Meiring het gaan uitvind wat Cindy se topdriereëls is wat sy volg om haar onderneming, wat nou al 11 500 volgelinge op Instagram het, suksesvol te bestuur.

Cindy Kinnear, die eienaar van Dear Dawn Clothing.
Foto: Insane Photography

Cindy se eerste reël: Niemand sal soveel in jou produk glo soos jy nie.

Die naam Dear Dawn kom uit die Bybel uit. Dawn verwys na ’n nuwe dag, wanneer die son deur die wolke breek en dit lig, nuwe hoop sowel as perspektief bring. Cindy se hoop is dat wanneer ’n vrou ’n Dear Dawn-kledingstuk aantrek, sy goed sal voel en asof sy deur die donkerte van die wêreld kan skeur om haar lig te wys.

Iets wat eie aan Dear Dawn is, is hul toewyding tot volhoubare sakepraktyke. Hulle is ’n slow fashion-onderneming wat beteken hul klere word nie in groot volumes gemaak nie, maar word eerder plaaslik in kleiner hoeveelhede vervaardig. Hul klere is gevolglik ook van ’n hoër gehalte.

Slow fashion-ondernemings soos Dear Dawn voer niks in nie en maak alles self. Hulle koop by plaaslike materiaalwinkels, was en stryk die materiaal by plaaslike wasserye, waarna die kledingstukke na vroue in die gemeenskap gaan wat die stikwerk doen. Laastens, word dit verpak en met ’n plaaslike koerier na kliënte gestuur.

Dit is belangrik om slow fashion-ondernemings te ondersteun, want op so ’n manier ondersteun jy ook plaaslike werkskepping en help jy klein ondernemings om te groei.

Cindy se tweede reël: Geleidelike groei is volhoubare groei.

“Volg jou droom. Moenie wag vir iemand wat dit vir jou sal doen nie. As jy dit graag wil hê, spits jou gedagtes daarop en begin. Hou net aan vorentoe beweeg, selfs al kruip jy!”

Cindy waarsku entrepreneurs dat wanneer ’n droom te groot is, loop ’n mens die risiko om nooit daaraan te begin bou nie. Sy moes haar groot droom in kleiner drome opbreek en wanneer sy nou terugkyk, kan sy sien hoe haar aanvanklike groot droom verwesenlik word.

Cindy se droom vir Dear Dawn is om aan te hou klere maak wat elke vrou van elke grootte en kleur geliefd sal laat voel. “Ek wil ook hê Dear Dawn moet so groot soos die Poetry-handelsmerk word, maar om hierdie doelwit te bereik, probeer ons eers kleiner, haalbare doelwitte te bereik wat ons in staat sal stel om teen ’n volhoubare pas te groei,” sê sy.

Volgens haar is die uitdagendste deel daarvan om ’n klein onderneming te bestuur, die motivering om voort te gaan – veral omdat sy ’n “one man show” is. In moeilike tye, haal Skrifgedeeltes haar egter deur. Behalwe om gemotiveerd te bly, sê sy ook as ondernemingsbestuurder moet jy seker maak jy bestuur en verstaan jou administrasie goed.

“Bly getrou aan jouself, jou onderneming, jou waardes en bly aan die voete van Jesus, want dan selfs wanneer die golwe kom, sal jy oukei wees.”

 

View this post on Instagram

 

A post shared by Dear Dawn (@dear_dawn_clothing)

Cindy se derde reël: Moenie jou werk los om aan jou droom te bou nie.

Cindy het grondslagfase-onderwys studeer. Sy het ’n jaar lank as graadeenonderwyseres gewerk en toe nog ’n jaar oorsee gaan woon. Sy vertel dat God ’n begeerte in haar hart geplant het om vroue deur klere te bereik waardeur hulle hul identiteit in Jesus sal vind.

“Die begin van Dear Dawn het baie vasberadenheid en baie gebed geverg, maar het my meer geleer en gegee as wat ek ooit kon dink. Selfdissipline, geloof, uithouvermoë, vriendskappe en soveel meer. God skep ’n manier waar dit lyk of daar geen manier is nie. Dit het nie maklik gekom nie, maar dit was die moeite werd,” sê sy.

Die bestuur van Dear Dawn is nie Cindy se voltydse werk nie: Sy werk as ’n digitale bemarker vir ’n maatskappy in Pretoria.

“Hoewel ek saamstem met die konsep “spring, vlieg en hoop vir die beste” moet ’n mens slim wees wanneer jy ’n onderneming bou omdat ’n mens tog moet eet! Om ’n ander werk te hê terwyl jy aan jou droom bou, sal jou van heelwat stres bevry. Sodra jou onderneming eers volhoubaar is, kan jy jou vaste werk verlaat.”

Besoek Dear Dawn se webtuiste en volg hulle op Instagram!

Lees ook: Organiese materiale in jou huis

The post Drie goue ondernemingsreëls vir entrepreneurs appeared first on rooi rose.

Meer as nét ʼn surfer! – Deur Zoë Salzwedel. Hooffoto: verskaf

Jy herken hom dalk as die blondekop, blou-oog, branderplankryer van die Wes-Kaap, maar van een ding is ons baie seker: Rudolp Danté de Villiers is meer as nét ’n surfer!

Ons gesels met die sewende seisoen van MNet se gewilde werklikheidsreeks, Survivor SA, se eie Aquaman. Hy vertel vir ons van sy liefde vir die see, waarom hy teruggekeer het na Suid-Afrika en die alledaagse uitdagings van ’n maand op ’n eiland.

Jy het vir 6 jaar in Israel gewoon. Vertel ons hiervan

Ek het op ’n klein eiland in Thailand gewoon waar ek my eerste Israeliese meisie ontmoet het. Ek was dadelik verlief op die taal, die kultuur en hoe doelgerig en passievol sy (hulle) is. Ons het besluit om Israel toe te trek en het vinnig daar ’n pragtige klein plekkie in Eilat (teen die Rooisee) gevind waar ons albei dadelik tuis gevoel het.

Publieke vakansiedae in Israel is baie gerig op familie, vriende en kos. Siende dat ek die enigste blondekop was (my meisie was van Yemen) by die gróót familie-geleenthede (die familie was rondom 35 – 50 mense, vanaf pasgeborenes tot ouma- en oupagrootjie) was dit elke keer ’n belewenis. Boonop was haar pa ’n gelowige Jood en is ek tydens elke Shabbat deur die hele ritueel geneem. Dit was soms uitdagend, maar is beslis ’n ondervinding wat ek vir niks sal verruil nie.

Wat het die lewe in die buiteland vir jou geleer? En watter raad het jy vir jong Suid-Afrikaners wat ’n lewe in ’n ander land oorweeg?

Ons as mense leef eintlik eers werklik sodra ons buite ons gemaksones is. En dít is presies wat die buiteland is. Dit forseer jou om vrae te vra, te luister na ander se opinies en om te leer om op te let na ander se maniere van dink en doen. Jy raak ’n beter mens deur uit jou gemaksone te beweeg, en dit is die dryfkrag vir my eie kreatiwiteit.

https://www.instagram.com/p/Bss1UcXAmrd/

Waarom het jy teruggekeer Suid-Afrika toe?

Na ’n paar jaar in Israel het ek en my Israeliese meisie uitgemaak en het ons paaie geskei. Dit het net mooi op presies dieselfde tyd gebeur waarin ek besef het dat ek gereed was vir ’n nuwe uitdaging – ek wou ook graag terugkeer na die Weskus. Alhoewel ek vandag voel dat Eilat my huis is, is die Weskus in my bloed. En jy kan vêr en wyd weghardloop en wegkruip, maar as jy soos ek grootgeword het op die strande van die Kaap, sal hy jou ook altyd terugtrek.

Jy besit Columbine Co. in Velddrif in die Wes-Kaap. Wat was jou inspirasie vir die koffiewinkel? En vertel vir ons van jou lewe as entrepreneur.

Ek is nog altyd maar meer van ’n dromer as enigiets anders. Ek kan ure lank in een plek spandeer en nét dagdroom, maar daarvoor kort ek beslis ook ’n uitsig! Die klein bokkomhuis was my oupa sʼn. Hy was destyds ’n visserman. Na hy oorlede is, het ouma Kitty daarop aangedring dat die huisie gehou moet word. Deur die jare het my buurman die huisie gehuur om sy vis in te verwerk. Met my terugkeer na Suid-Afrika het ek die plek skoongemaak, uitgeverf en besluit om weer die deure vir almal oop te maak om saam die pragtige erfenis en geskiedenis van bokkomlaan te geniet – dit alles natuurlik met ’n koffie in die hand, ’n halva en vriendelike pelikane. Nou kan ek dagdroom terwyl ek oor die Bergrivier staar.

Wat is die ultimate droom – persoonlik en besigheidsgewys?

Ons groei elke dag. En nes ons leer, hoor, sien en ervaar, verander ons ook gereeld ons opinie en idees oor die lewe. Ek voel drome gaan gepaard daarmee. Iemand kan my elke dag dié spesifieke vraag vra, en ek mag dalk net elke keer ’n ander antwoord hê. Maar in die groter prentjie van dinge is geluk en gesondheid altyd deel van my antwoord. Op dié huidige oomblik, sal ek nie omgee om nog 5 handevol Land Rovers in my garage te hê nie.

https://www.instagram.com/p/B1vw7jpptgO/

Kom ons gesels bietjie oor Survivor. Waarom het jy besluit om hiervoor in te skryf?

Vra enige persoon (my ouderdom) wat die een realiteitsprogram is waarmee hy/sy grootgeword het, en ek is seker almal se antwoord sal Survivor wees.

Wie wil nie daaraan deelneem nie? Jy kan leef in jou Speedo, baie vis vang, op die mooiste strand bly en boonop R1 miljoen rand wen. Wat kan tog beter wees?

https://www.instagram.com/p/Bz-OK02pQdb/

Was dit (en die lewe op ‘n eiland) dit wat jy verwag het?

Niks en niemand kan jou voorberei vir die eiland nie. Punt. Daar’s níks soos dit nie!

My gunstelingdeel was natuurlik om baie tyd in die see te spandeer en om met slegs die basiese gereedskap te leef.

Wat was die moeilikste deel van Survivor?

Honger wees. Die baie reën. Min tot geen slaap.

Die eerste 7 of 8 dae het ons nie ‘n krummeltjie kos ingekry nie, jy was meeste van die tyd sopnat, en jy moes snags regop sit omdat dit onophoudelik gereën het. En tussendeur die reën, ongemak en honger-wees moes jy boonop probeer konsentreer op Survivor.

Jy staan bekend as Survivor (en Suid-Afrika) se eie “Aquaman”. Ons verstaan beslis hoekom, maar wil graag weet waar jou liefde vir die see vandaan kom?

Ek kom uit ’n familie wat elke naweek iewers heen op pad was om te gaan visvang. My pa het vir die Westelike Provinsie vis gevang, en my ma was net so lief vir lyn natmaak. As kinders was ek en my broer gedurig iewers op ’n strand besig met gevriesde mossels of sardientjies. So, ek het grootgeword met branderplank ry. En as ’n tienerseun wat groot geword het op Melkbosstrand, het ek twee opsies gehad: of tyd in die see, of kattekwaad… (Ek het ’n streng balans gehandhaaf!)

Wat is jou gunstelingtydsverdryf?

Ek is mal oor die buitelewe. As ek nie ín die see is nie, is ek naby hom. Solank as wat ek in die son kan wees, is ek gelukkig!

Na my deelname aan Survivor maak ek ’n punt daarvan om elke week iewers te gaan kamp en nuwe plekke te ontdek.

Wat interesseer jou?

Alles interesseer my. Die sterre. Blomme. Poësie. Kuns en beweging. Daar’s iets spesiaal aan dinge wat bloot net natuurlik voorkom – sonder grense of voorwendsels.

Wat is jou motto in die lewe?

Ek luister graag na filosofie en geniet dit om te leer oor hoe ander die lewe sien en wat hulle idees is van ’n volmaakte lewe. Ek self probeer net om elke dag ʼn beter persoon te wees as die een wat ek gister was, al is dit ook net so klein soos 0.1%.

Vertel ons van die liefde in jou lewe?

Ek het vir Maayan ontmoet net voordat ek teruggekeer het Suid-Afrika toe. Op daardie stadium was sy reeds besig om vir haar toer te spaar. Sy en haar hond (Chai) sou Chili toe vlieg, daar ’n minibus koop en dit inrig met ’n bed en ’n kombuis, en dan vir twee jaar deur Suid Amerika toer – nét die twee van hulle.

Ons albei se fokus was reeds so gevestig op ons eie planne – ek met my koffiewinkel en sy met haar Suid-Amerikaanse toer – dat ons besluit het om daarmee voort te gaan. Ons het wel vir 18 maande lank daaglikse kontak gehou, totdat ek eendag ’n oproep ontvang het: “Dis dit. Ek wil kom kuier!”

Ongelukkig het dié oproep gekom slegs ’n week nadat ek ingeskryf het vir Survivor. Ons het toe saam besluit dat ons vir nog vier of vyf maande sou wag totdat ek ’n antwoord het. Toe ek gehoor het dat ek wel gekies is om aan die nuwe seisoen van Survivor deel te neem, het alles met nóg vier maande aangeskuif.

Die dag met my terugkeer van Survivor af het ek haar dadelik gebel. En twee weke later stap sy en Chai deur die lughawe se deure. Vandag is ons ’n driemanspan wat kamp en die buitelewe geniet.

En laastens wil ons graag die storie van julle pragtige hond hoor. Watter rol speel hy in jou lewe? En wat was die inspirasie om vir hom sy eie Instagram-profiel te skep?

Maayan het ses jaar gelede vir Chai aangeneem en sedertdien is hulle onafskeidbaar. Hulle gaan orals saam met mekaar – van klas tot werk en partytjies tot verskillende lande. Chai is absoluut Maayan se skaduwee! Hulle doen alles saam, sonder uitsondering. Suid-Afrika is Chai se negende land – hy trek al by sy tweede paspoort! Deesdae, as hy nie besig is om vis te vang of saam met ons te kano nie, verwelkom hy almal by die koffiewinkel met vriendelike stertswaai en ’n groot glimlag.

https://www.instagram.com/p/B1PICyvBRLR/

Maayan het besluit om vir hom sy eie Instagram-profiel te skep bloot vir die rede dat sy vir hom ’n lewe vol avontuur belowe het die dag toe sy hom aangeneem het. So met die tyd het sy met oorsese besighede wat diereprodukte maak en vervaardig in besigheid getree, en doen sy tans baie werk vir hulle deur haar profiel.

https://www.instagram.com/p/B2TkIyOBBbf/

The post Danté de Villiers: Meer as nét ’n surfer! appeared first on rooi rose.

Sosiale media-influencer’s onder 25: Helé Ananté Wansbury – Deur Zoë Salzwedel

In ons reeks Sosiale Media-Influencers onder 25 gaan ons met ’n paar van Suid-Afrika se gewildste, invloedrykste en snaakse influencers onder 25 onderhoude voer. In ons vyfde artikel in dié reeks gesels ons met die jong entrepreneur en enkelma, Helé Ananté Wansbury, oftewel @_lytjie_wansbury.

Loer ook na ons onderhoude met Marko met ’n K, Julipoeli, Plumboyy en Katinka die Kat 

Op 19 is sy reeds die hoof uitvoerende beampte en stigter van twee besighede, ’n gekwalifiseerde grimeerkunstenaar en inspirasie vir ander. Met hope ambisie en harde werk het sy dit reg gekry om haar drome te bewaarheid en haarself as suksesvolle jong entrepreneur te vestig.

Vertel vir ons van jou mooi seuntjie Zayn. Hoe het hy jou lewe verander? En hoe pak jy die uitdagings van enkelma wees aan?

Zayn het my lewe beslis verander – baie verander – maar ek verruil hom vir niks in die hele wye wêreld nie. Ek spot altyd en sê as ek my matriekjaar moes oordoen, sou ek alles presies dieselfde doen. Ek kan my lewe nie sonder hom indink nie! Ek verstaan nou eers vir die eerste keer régtig hoe lief ’n ma haar kind kan hê sedert ek self ’n kind van my eie het. Om ’n ma te wees is ’n voorreg – dalk harde werk, maar beslis steeds die moeite werd.

Ek word gereeld gevra oor hoe dit voel om ’n tienerma te wees … Wel, ek glo vas dat ek nie na iets kan verlang wat ek nooit gehad of geken het nie. Ek was nooit in ’n ander situasie nie. Om op 19 ’n ma te wees, is al wat ek ken so ek maak die beste daarvan. Dit is eintlik vir my vreeslik lekker om nog so jonk te wees want ek kan saam met Zayn groei, en moederinstinkte kom natuurlik. In my opinie is ek net so ’n goeie ma soos baie ouer vroue met kinders. Miskien spandeer ek dalk selfs nog meer tyd saam met my seuntjie omdat ek 19 is en baie energie het.

Dieselfde geld vir enkelouer wees. Ek weet nie hoe dit voel om ’n man te hê wat betrokke is by sy seun se lewe nie, so dit is nie vir my vreemd of moeilik om daarby aan te pas nie. Ek dink vroue moet besef dat hulle baie sterker is as wat hulle dink. Ek het wel baie ondersteuning van my ouers gekry en iemand ontmoet toe Zayn nog baie baie klein was. Berno het vir Zayn aanvaar soos sy eie kind en ek is baie dankbaar vir die rol wat hy in ons albei se lewens speel.

The post Sosiale media-influencers onder 25: Helé Ananté Wansbury appeared first on rooi rose.

Toe ek vyf jaar gelede besluit het om my eie besigheid te begin, was die eerste vraag van mense: “Hoe gaan jy dit regkry? Jy is 31 jaar oud, jy ’n 31-jarige vrou en jy is ’n 31-jarige wit vrou in Suid-Afrika.” Ek was geskok oor die eng en seksistiese siening. Vroue is die uitvoerende hoof van huishoudings. Dink mense nie hulle weet darem iets van hoe om ’n besigheid te bedryf nie? Vroue kan veelvuldige take verrig, is nie bang vir harde werk nie, is gewoonlik goeie luisteraars, en kan baie vasberade wees.

Om ’n vroulike entrepreneur te wees, is al wat ek ken. Ek werk hard en doen van kleins af my beste in alles wat ek aanpak. Ek was nog altyd gemotiveerd en daag myself uit om die beste te doen.

Soos in enige bedryf, behaal mens nie sukses as jy nie hard werk nie.

Ek sou nie sê ek is ’n vrou in ’n “man se wêreld” nie. Dis net makliker om uit te staan as jy ’n vrou is. Jy staan natuurlik uit as jy konsekwent verwagtinge oorskry ongeag of jy ’n man of ’n vrou is.

Lorinda Voges, uitvoerende hoof van 4Elementsmedia vertel:

Hoe vind jy balans tussen jou besigheid, vriendskap en jouself?

Ek glo aan die integrasie van werk en lewe want daar is geen manier om dit alles te balanseer nie. Ek geniet harde, doelgerigte werk en my geluk- en sukses- barometer is afhanklik van elke faset van my lewe. Ek is baie deursigtig oor wie ek is en wat my prioriteite is. As ek nie 100% tevrede is met myself en nie ’n doelgerigte lewe het nie, sal ek nie suksesvol kan wees nie.

Hoe vernuwe jy jouself?

Dit vereis veerkragtigheid, eerlikheid, deursigtigheid en uitstekende kommunikasie. Baie hang af van hoe jy ’n situasie hanteer as jy ’n laagtepunt bereik. Dit wys jou karakter, integriteit en intelligensie.

Watter Suid-Afrikaanse vroue is volgens jou gedrewe?

Ek het gelukkig ’n sterk ma wat my van kleins af geleer het om vir myself op te staan. Farah Fortune van ASC en Vicky Crease van Vicky Crease Catering was my mentors in hierdie bedryf. Patience Stevens, Basetsana Kumalo en Khayni Dhlomo is almal spel-wisselaars in ons bedryf en ek het die grootste respek vir hulle. My suster, Leandri, en my beste vriendin, Tanya, is die rotse in my lewe. Hulle aanvaar my vir wie ek is en moedig my aan om te groei en my doel na te streef.

Wat is jou top drie wenke vir vroulike entrepreneurs?

1. Aanvaar mislukking, want daar is so baie om uit ervaring te leer soos wat jy op ’n professionele vlak sal doen of nie moet doen nie as die situasie hom weer sou voordoen. Op persoonlike vlak leer jy wat jou waardes is en wat jou gegrond hou, wie jou vriende is en hoe om jou intuïsie te vertrou.

2. Wie is jy nou en wie sal jy in 10 jaar wees. Dit is goed om oor 10 minute van nou af iemand nuut te wees as jy leer en groei. As jy 10 sekondes gelede uitgevind het jy hou nie van wie jy is nie, gooi die ou vel af en plant jouself in nuwe grond.

3. Doen waarvoor jy lief is en die geld sal volg.

Besoek 4Elementsmedia se webblad hier.

The post Passievolle entepreneur appeared first on rooi rose.