Modeweek Eksklusief: Hugo Flear vier vrouwees met 2019-reeks deur Bea Lingenfelder en Susra Matthee. Hooffoto: AFI

Die tweede dag van Kaapstad se African Fashion International (AFI)-modeweek het afgeskop met die Fastrackprogram waar opkomende ontwerpersfinaliste die geleentheid gebied word om hul talente voor die oë van kenners en plaaslike ikone te vertoon. As huldeblyk aan die sukses van hierdie program, is Hugo Flear, wenner van die 2013 Fastrack-kompetisie, as Alumnus uitgenooi om sy 2019-reeks bekend te stel.

Nie net het Hugo weereens sy talent bewys deur pragstukke wat herinner aan Afrika se skoonheid op die loopplank te vertoon nie, maar het hierdie jaar die tema, “Ageless” sterk beklemtoon deur vroue-ikone as modelle te gebruik.

Hugo Flear tydens Kaapstad Modeweek met sy 2019-reeks

Foto: AFI

Hoe het vrouemode Hugo Flear se kenmerk geword?

Hugo se aweregse uitkyk op vrouemode het sy ontstaan gehad in Beaufort Wes, waar hy gebore is en skoolgegaan het. Die omgewing se vroue is praktiese mense wat naby die natuur lewe. Die afgesonderdheid van hierdie landstreek se leefstyl speel ’n groot rol om die vroue af te sonder van die invloed van pop-kultuur op modeneigings. Die resultaat hiervan is vroue wat hul innerlike krag deur middel van unieke klerekeuses uitstraal en nie vasgevang word in modegiere wat vinniger verander as ’n Karoo-tolbos oor die vlakte nie.

Vanwaar die unieke modelkeuses vir die Kaapse Modeweek?

Die “Ageless” tema is geïnspireer deur die Karoovroue se talent om die lewe se volhoubare waardes aan hul kinders en kleinkinders oor te dra. Mooi klere moenie as die wenstreep vir sukses beskou word nie, maar as ’n moerslot vir die voertuig wat jou op die pad na innerlike geluk vergesel. Daarom het Hugo besluit om vyf sterk vrouefigure as modelle te gebruik:

• Jackie Burger – Voormalige redakteur van ELLE-modetydskrif en stigter van Salon 58.
• Irma Jones – Sy is die aanbieder van die Kyknet + Kie-program, “Tussen Ons”. Weg van die kassie af lewer sy ’n integrale bydrae tot die bevryding en opheffing van Suid- Afrikaanse vroue deur hul oor goeie finansiële bestuur te leer deur middel van Mikateko media.
• Deborah Chambers – #deborahdarling het na die ouderdom van 50 jaar besluit om die helfte van haar gewig af te skud en die lewe met nuwe entoesiasme aan te durf. Sy gebruik sosiale media as haar platform om selfliefde en -waardigheid te promoveer.
• Shany van den Berg – Hierdie Stellenboschse kunstenaar raak jou siel deur haar kunswerke aan wat die elemente van ’n vrou-, moeder- en kunstenaar wees vergestalt. Kontemporêre temas soos identiteit, familie en verbindwees spreek die gehoor op unieke maniere aan wat elkeen aan hul eie ervarings herinner.
• Anja van de Zand – ’n Nederlandse leefstyl- en fiksheidsmagnaat wat 10 jaar gelede haar lewensdoel in Hangberg, Houtbaai ontdek het deur die kleuterskool, Angels to Little Angels te stig. Die doel van hierdie kleuterskool is om ’n gesonde grondslag vir die kinders van die Hangberg-gemeenskap se skoolloopbaan te bied.

Jou ontwerpe bevat ’n duidelike verwysing na Afrika-flora. Vanwaar het hierdie inspirasie ontstaan?

Die diversiteit van Suid-Afrika se inheemse blommeprag is Moeder Natuur se manier om vir ons te wys dat daar ’n plek vir ons elkeen is om te floreer.

Die nuwe reeks bestaan uit drie kenmerkende blomme:

Die Strelitzia verteenwoordig die warm Laeveld-klimaat. Daar is min mense wat weet van die verborge vyf koppe van ’n strelitzia-blom, dus word dit vergelyk met die mens se verborge talente wat soms uitstraal in ongewone omstandighede.

Die Kaapse fynbos en Koningsprotea is waarskynlik die bekendste van ons blommeprag. Min mense weet egter dat hierdie spesie die sensitiefste van ons inheemse plante is en dat die geringste versteuring aan die wortelstelsel die plant kan laat vrek. As ons om ons kyk, kan ons met ons medereisigers op ons lewenspad identifiseer: alhoewel sommiges sterker wortelstelsels as ander het, bly elkeen steeds broos.

Die Aalwyn van die Karoo lê Hugo baie naby aan die hart. Die uithouvermoë van hierdie plant stel dit in staat om selfs in vyandige omgewings te oorleef. Daar is ook bekoring in die wete dat die aalwyn, met sy galbitter smaak, tog wêreldwyd bekendheid verwerf het vir hul gesondheidsvoordele.

Watter ander tendense vergestalt die 2019-reeks?

Die bogenoemde plante dien as basis vir die Hugo Flear 2019-reeks wat uit 100% linne bestaan.

Die breedvoerige gebruik van ritssluiters in hierdie reeks beklemtoon nie net ’n nuwe modeneiging nie, maar weerspieël ook die onderliggende jaarringe van ’n moderne vrou wat (soos met ’n ritssluiter) ontsluit kan word om haar heerlikheid aan die wêreld te vertoon. Terselftertyd word hierdie tegniek in kontras gebruik om ook die moeiliker aspekte  van die lewe toe te vou en te beskerm.

Watter boodskap word deur die handelsnaam, Hugo Flear, vergestalt?

Die “Ageless” tema van sy vroueklere met natuurelemente vang Hugo Flear se liefde vir die natuur vas wat met sy ander liefde, mode, gekombineer word. Die hoofdoel van sy ontwerpe is om vroue te inspireer om altyd voluit te lewe. “Verskonings soos ‘ek is te oud, te jonk, te kort, te lank, te maer, te vet of te arm’ is almal net sinnebeelde van die verbeelding.”

Sy deurlopende tema bewys dat ’n mens oud genoeg is om vreesloos te lewe én jonk genoeg is om dit te geniet.

“Want die pad is lank en ek is kort; party dae pas ek in my skinny jeans en ander dae is ek dankbaar vir al die kos wat ek kon eet, want al is ek nie ryk nie, is my siel nie arm nie.” –  Hugo Flear

Foto’s: AFI

Lees ook: 5 vinnige modetruuks wat jou uitrusting afrond

The post Modeweek Eksklusief: Hugo Flear vier vrouwees met 2019-reeks appeared first on rooi rose.

Saamgestel deur Anélle Tewson. Foto’s deur Eunice Driver, Eunice Driver Photography. 

Mode-ontwerpers van regoor die land werk al maande lank om reg te maak vir die onthulling van hul nuutste skeppings by die Suid-Afrikaanse modeweek 2018.

Hierdie maand was die SA-modeweek by die Protea Court Rooftop, Sandton City.

Hier is ons gunstelinge:

The post SA-modeweek Lente/Somer 2018 appeared first on rooi rose.

Deur Bea Lingenfelder. Foto’s: © 2018 AFI – African Fashion International Fashion Week

Die gunstelinge

MaXhosa by Laduma

Geliefde ontwerpers soos MaXhosa by Laduma en Imprint het die gehoor meegevoer met hul Afrika-reis op die loopplank. Die MaXhosa-reeks is bekend vir sy “moderne, kontemporêre kleredrag wat die inwoners van Afrika sou aantrek as die kultuur nog in sy oorspronklike vorm omhels kon word.” Patroonryke wintermateriale soos wol en ander weef-kombinasies is in ’n warm, helder kleurpalet vertoon. Klere is soos Afrika-komberse om die modelle gedrappeer, vernuwe met moderne elemente soos leerbelde, vlieënierbaadjies en oopskouerrokke.

Leigh Schubert

Met ’n string erebenoemings agter haar naam het Leigh Schubert ons weer verlief gemaak op die klassiek-met-’n-kinkel gevoel. Wit hemde, kimono’s en ander stapelitems is omskep tot iets speels en besonders. Haar sukses word as gevolg van haar “toeganklike, gesofistikeerde, maar tog opvallende unieke styl” gekenmerk. Dit is ’n styl wat jy van die loopplank direk tot in jou klerekas kan koop.

Die dramatiese items

Die eerste aand se vertonings is met betowerende ontwerpe van Quinteria & George afgelsuit. Die reeks is deur hul besoek aan Swaziland geïnspireer. Hierdie land se koninkryk is as die ondertoon van die reeks beskou en die droomagtige atmosfeer het die drome van jong dames uitgebeeld wat nog altyd ’n koningin of prinses wou word.

Die modeweek is Saterdagaand op ’n nostalgiese noot afgesluit. Orapeleng het die gehoor meegevoer met ontwerpe kenmerkend aan vroulike ikone soos Audrey Hepburn, Diana, Grace Kelly, en so meer. Die reeks “Beyond the Grave” lê klem op die 50 jaar waarin baanbrekervroue ’n aansienlike invloed op velde soos mode, ekonomie en die film-industrie gehad het. Daar was swewende aandrokke tot blinkerpakke, en uiteindelik die applaustrekker-rok wat almal betower het.

Khosi Nkosi

Met die hedendaagse veldtogte oor liggaamsvorme is dit amper onmoonlik om nié ’n reeks te verbreed wat vir alle liggaamtipes beskikbaar is nie. Die Boss Lady-reeks het hulde aan vroue gebring met ontwerpe wat vleiend is en aangepas kan word tot enige liggaamstipe. Van sweetpakbaadjies met oop skouers tot meerminstert-maksirokke – die “Boss Lady” is vereer in al haar eienskappe. Die ontwerper het met hierdie aanhaling haar vertoning begin:

“Being a Boss Lady does not necessarily mean that you’re the CEO of XYZ company. Anyone can be a boss lady, whether you’re at work or at play, an employee or an employer. A boss lady is a respectable femme fatale in her own right – she is naturally strong, poised and holds her presence in a crowded room.”

Hulde aan familielede

Craig Port

Emosies het hoog geloop met die vertoning van Craig Port se reeks: Tell Laura I love her. Hy het die reeks aan sy onlangs oorlede suster, Laura, opgedra. Volgens Craig het sy suster hom oor die verandering van die popkultuur geleer en hom blootgestel aan ’n prettige, pittige en glansryke wêreld. Sy reeks skep ’n vroeër jare “disco”-atmosfeer met uitklokbroeke van fluweel, blinkerversierings en silhoëtte wat beweging skep met elke tree. ’n Paar verrassing-verskynings is deur sy dogter en familie se kinders gemaak wat die gehoor se harte verder gesteel het.

The post Alles wat jy moet weet van Kaapstad Modeweek 2018 appeared first on rooi rose.

– Deur Bea Lingenfelder Hooffoto: Twitter Follow @AnneMichelleBH

Strooimandjies of -sakke is een van die stapelitems hierdie somer. Deur die jare is dit vir huisdekor, pieknieks en see-uitstappies gebruik, maar danksy die modekenners kan hierdie item nou in die plek van ’n handsak gedra word. Hoewel Jane Birkin dié modetrend reeds in 1970 aan die wêreld voorgestel het, het modekenners soos Alexa Chung en Camille Charrière tydens 2017-modeweke weer met strooi-bykomstighede aan hul arms gepronk.

The post Strooimandjies: Jou nuwe somer-gunsteling appeared first on rooi rose.

Oscar de la Renta kies nuwe loopplank

Die ontwerpers Laura Kim en Fernando Garcia het bewys hoe prakties hul ready-to-wear-ontwerpe kan wees deur die modelle hul verskyning op ’n roltrap te laat maak. Die minimalistiese en industriële galery van Sotheby’s York Avenue is as ligging gekies om die helderkleurige ontwerpe te kontrasteer. Maryam Nassir Zadeh het ook van die alternatiewe loopplank-idee gebruik gemaak deur haar vertoning op ’n atletiekbaan te hou.

Gigi laat haar nie onderkry nie

Die bekende model Gigi Hadid het al meer as een keer bewys sy is haar sout werd, maar selfs sý erken dat om in ’n modeweek met net een skoen te loop, ’n eerste is. Tydens Anna Sui se vertoning het Gigi met net een skoen die loopplank aangedurf. Twitter was onmiddelik deurspek met kommentaar oor hoe goed Gigi hierdie situasie hanteer het en sommiges het selfs erken dat hulle skaars die onklaarheid opgelet het! Tydens die finale rondte het Gigi se jonger sussie, Bella Hadid, ingespring en sy aan sy saam met Gigi geloop om haar te ondersteun. Kan hierdie susters enigsins nog ouliker wees?

The post Ons top 10 oomblikke by New York-modeweek appeared first on rooi rose.