Alles wat jy in Maart moet doen om vir jou rose te sorg deur Alice Spenser-Higgs. Vertaal deur Ilse Salzwedel.

Gepubliseer met toestemming van Garden and Home – oorspronklike artikel: Rose Care Guide January

• Alles wat jy in Maart moet doen om vir jou rose te sorg: 

Maart is ’n goeie maand om die vertoning van die verskillende roosbome in jou tuin te evalueer en vas te stel hoekom party nie so goed vaar nie.

As net een plant tussen al die ander swak blom, kan dit moontlik die variteit wees, of dit kon ’n knou gekry het toe jy vroeër die seisoen van die loof verwyder het.

Rose wat voortdurend vatbaar is vir siektes, verhoog jou hele tuin se siektelading. Oorweeg dit gerus om sulke plante te vervang met siektevrye variëteite soos Eco Chic.

As die probleem deur water veroorsaak word, oorweeg ekstra spuitkoppe vir jou besproeingstelsel, of skuif sprinkelpunte om die probleem aan te spreek.

Nog redes vir rose wat swak blom, is te veel skaduwee of struike wat hul spasie binnedring. Merk sulke roosbome en verskuif hulle in Mei/Junie.

• Water
  

Wanneer die dagtemperature begin daal, hoef jy net eenmaal per week water te gee.

• Bemesting
  

Wanneer rose begin voorberei vir winter-hibernasie, onttrek hulle voedingstowwe uit hul blare. ‘n Ekstra toediening van bemesting sal die plant help om die nodige voedingstowwe op te gaar en steeds genoeg te hê om tot diep in die winter aan te hou blom.

• Peste en plae

Swartvlek kan toeneem weens swaar dou-neerslae en lae temperature, en in sommige streke lei dit tot ‘n toename in roes en poeiermeeldou (downy mildew). Wissel die kombinasie van Ludwig’s se Insect Spray, Chronos en Ludwig’s Spray Stay with Rose Protector af vir ekstra beskerming.

Lees ook:

Alles wat jy in Januarie moet doen om vir jou rose te sorg

Alles wat jy in Februarie moet doen om vir jou rose te sorg

The post Alles wat jy in Maart moet doen om vir jou rose te sorg appeared first on rooi rose.

Plante wat selfs beginners aan die groei kan kry deur: Elandrè Swart. Hooffoto: Unsplash

Dracaena

Bekend vir sy gestreepte en lemmetjiegroen blare, is die Dracaena ’n mooi toevoeging vir binne of buite.

Die Dracaena groei die beste in semi-skadu areas en vereis minder water as die meeste binnenshuise plante. Gee slegs water wanneer die boonste laag van die grond droog voel.

Lees ook: Wenke vir binnenshuise plante

Varings

Varings is ’n diverse spesie en sal jou beloon met skouspelagtige blare.

Varings groei goed onder bome en is ideaal in skadu.

Alhoewel varings baie van water hou, kan jy jou waterverbruik verminder deur jou varings onder skadubome te plaas of binne in ’n badkamer om die plant klam en goed gehidreer te hou.

Lees ook: Plant slim, bespaar water

Vetplante

Vetplante is droogtebestand en maklik om te onderhou.

Alhoewel vetplante beter groei wanneer hulle nie direkte sonlig ontvang nie, moet jy ook die volgende in gedagte hou:

• As die een kant van jou vetplant geel of rooi raak, is jou vetplant besig om te veel lig te kry.
• As jou vetplant nuwe blare kry en dit is liggroen met verlengde stingels sal jou vetplant meer lig nodig hê.

Tydens die warmer maande van die jaar moet jou vetplant eenkeer ʼn week water ontvang. Wag dat jou vetplant se grond heeltemal droog is en gee dan goed water.

Tydens die wintermaande het jou vetplant net eenkeer ’n maand water nodig.

Lees ook: Inheemse waterwys plante

Begonias

Bekend vir sy mooi blomme, is begonias maklik om te kweek en sal kleur tot jou tuin toevoeg.

Begonias benodig middelmatige lig en ’n geventileerde omgewing.

Gee jou begonias slegs by die stam water om infeksie te keer en hou die grond klam, nie nat nie.

Lees ook: Maak tuin op jou balkon

Devil’s Ivy (Golden Phatos)

Die naam Devil’s Ivy is omdat dit amper onmoontlik is om dood te maak, daarom is dit die perfekte plant vir ’n beginner plantkweker!

Die Devil’s Ivy floreer in lae lig wat dit die beste maak vir ’n binnenshuise plant.

Die Devil’s Ivy vereis ’n matige hoeveelheid water. Hou die grond klam.

Lees ook: Alles wat jy in Februarie moet doen om vir jou rose te sorg

The post Plante wat selfs beginners aan die groei kan kry appeared first on rooi rose.

Gepubliseer met toestemming van Garden and Home – oorspronklike artikel: Rose Care Guide February  vertaal en versorg deur Ilse Salzwedel. Hooffoto: iStock/Konoplytska

Jou Februarie-roosgids

Versorg jou rose so

Breek net dooie knoppe uit – moenie stamme afbreek of stele afsny nie. Hoe meer blare daar op ‘n bos is, hoe makliker is dit vir die roos om koel te bly, want blare versnel die sapvloei en koel die stamme af.

Maak seker dat die beddings ‘n goeie deklaag het. Dit sal skaduwee verskaf aan die wortels en grond, wat nie net verdamping stadiger laat plaasvind en beperk nie, maar ook die water in die grond koel hou.

Selfs rose wat goed natgemaak is, kan vinnig verwelk in warm, droë toestande. As jy die rose van bo af natspuit, veral teen die middel van die dag, sal dit beslis help (en dit sal nie lei tot swartvlek nie).

Jy kan hierdie tyd van die jaar ook saans ‘n bietjie natspuit, want die blare word maklik droog.

Hoeveel water het my rose nodig?

Dit hang af van ‘n hele klompie faktore, soos grondtipe, die helling van die bedding en die temperatuur.

Hier is ‘n handige gids vir Februarie:

Lei daagliks nat as die dagtemperature hoër as 35°C is.

Net elke tweede dag as die temperature tussen 28°C en 35°C is.

Twee maal per week as temperature wissel tussen 22°C en 27°C.

Weekliks as temperature laer is as dit.

Wat van bemesting?

Wag tot einde Februarie met die bemesting, want dan is dit koeler. Bemesting moedig nuwe groei aan, wat die plant onder ekstra druk plaas in warm toestande.

Lees ook: Hou vlieë uit jou huis! Hier’s 10 afskrikmiddels wat jy self kan maak

Wat jy in Februarie moet doen om peste en plae te vermy

Besproei voorkomend met plaagdoder.

Lees ook: 10 redes waarom jy rooi rose se Februarie-uitgawe móét lees!

The post Alles wat jy in Februarie moet doen om vir jou rose te sorg appeared first on rooi rose.

Oorspronklike teks: Alice Spenser-Higgs, vertaal en versorg deur Ilse Salzwedel. Hooffoto: iStock/jxfzsy. Ander foto’s: pexels 

Gepubliseer met toestemming van Garden and Home – oorspronklike artikel: Rose Care Guide January

Versorg jou rose só in Januarie

Rose wat te hoog, dig of oneweredig gegroei het of netjies gemaak moet word, kan rondom die middel van Januarie gesnoei word. (Sien ons snoeigids onder).

Jou roos-versorgingsgids vir Januarie

Hoe moet ek my rose natlei?

Hou by die normale natlei-skedule tensy dit gereeld reën.

Na ‘n reënvalperiode van omtrent twee weke word rose se blare “sag”, en jou roosbome gaan meer gereeld water nodig hê totdat dit weer aangepas het by droër weerstoestande.

Onthou: Sorg deurentyd vir ‘n goeie deklaag in jou beddings.

Bemesting

Bemes met Ludwig’s se Vigorosa of ander roos-bemesting. Moenie die bemesting oor nat blare sprinkel nie.

Wat moet ek weet oor peste en plantsiektes in Januarie?

Peste en plantsiektes kan voorkom word met ‘n voorkomende roetine. Maar hou beslis jou oë oop vir torre en rooispinmyt (of rooispinnekop) – dit het soms meer intensiewe plaagbeheer nodig.

Somersnoeiwerk – maak so:

Verwyder gevurkte en fyn takkies en snoei ‘n bietjie terug om spasie te maak vir nuwe rose om te groei.

Bekyk elke roosboom deeglik, en sny slegs die terug met baie blare. Maak seker dat die deel van die plant onderkant die gesnoeide deel nog lekker vol blare is.

Wees op die uitkyk vir roosbome wat min blare het weens swart kolle op die blare. Dis swartvlek, of sg. black spot disease, wat eintlik ‘n swam is. Sulke plante kan wel gesnoei word deur al die kaal stamme heeltemal uit te knip. Snoei ook lote wat om dieselfde spasie meeding.

Die stamme wat oorbly behoort baie blare aan die punte te hê. Knyp gerus die blare aan die punte af – dit veroorsaak dat die roos laer uitspruit. Sodra die nuwe lote omtrent 20cm hoog is, kan die plant gesnoei word tot net bokant hierdie nuwe lote vir ‘n meer hanteerbare hoogte.

Snoei gerus jou roosbome korter, solank jy seker maak dat daar nog blare oor is aan die stam onderkant die gesnoeide gedeelte. As dit baie warm en droog is, verdeel die snoeiwerk in twee fases sowat een week uitmekaar. Dit sal lei tot die minste versteuring van sapvloei. Wanneer die sapvloei verminder, raak dit warmer onder die plant se bas, wat kan lei tot stamkanker.

Lees ook: Loer hier na Garden & Home se oulike snoeigids vir rose

Vir nog goeie tuinmaakraad, loer hier

The post Alles wat jy in Januarie moet doen om vir jou rose te sorg appeared first on rooi rose.

Natuurlike maniere om van slakke, vlieë, miere, kokkerotte, miere en muskiete ontslae te raak deur Cornel Dunn.

Sit goggas op hul plek!

Dit is nou die tyd om met nare goggas klaar te speel op ’n natuurlike manier. Hier is goeie raad.

Slakke

Om van slakke ontslae te raak, maak knoffelhuisies fyn in sonneblomolie en laat staan oornag. Dreineer die olie en voeg by water. Gooi die vloeistof in ’n spuitbottel en gebruik teen slakke. Jy kan dit op die slakke self spuit, of op die plante/oppervlaktes waar hulle voorkom.

Jy kan ook slakke direk sproei met koue koffie.

Vlieë

Maak die volgende mengsel aan:

• 4 koppies appelasyn
• 2 eetlepels olyf-, canola- of minerale olie
• 1 eetlepel opwasmiddel
• 20 druppels roosmarynolie
• 20 druppels basilieolie
• 20 druppels pepermentolie

Gooi dit in ’n sproeibottel en gebruik soos nodig. Spuit dit in die lug waar hulle vlieg.

Lees ook: Kruiemengsels vir jou voete wat jy self kan maak

Muskiete

Vir muskiete is daar vele raad.

Kies een van die onderstaande mengsels en spuit dit in die vertrek.

1. Suurlemoen en bloekomolie
2. Pepermentolie en klapperolie
3. Appelasyn en essensiële-olie-sproei
4. Teeboomolie en klapperolie
5. Sitronella-olie en alkoholsproei
6. Laventelolie, vanielje en suurlemoensap

Lees ook: Hoe om jou hond se ore reg skoon te maak

Miere

Kies een van die drie onderstaande vloeistowwe en spuit dit op oppervlaktes waar jy miere vind, of direk op die miere.

1. Asyn
2. Asyn en water (50/50 mengsel)
3. Kies een van hierdie essensiële olies: Peperment-, laventel- of bloekomolie en meng een eetlepel per 500 mℓ met water in ’n sproeibottel.

Kakkerlakke

Meng een teelepel opwasmiddel met een koppie water. Sproei direk op die kakkerlakke.

Indien jy die wegkruipplek van die kakkerlakke wil sproei, voeg koeksoda by die mengsel.

Lees ook: Nog maniere om van miere ontslae te raak

The post Natuurlike maniere om van slakke, vlieë, miere, kokkerotte en muskiete ontslae te raak appeared first on rooi rose.

10 maklike kruie vir die kombuis wat jy moet kweek deur Liesl van der Walt. Foto’s: Unsplash

Goed gekrui!

Maak jou tuin nuttig en organies met kruie wat ook kleur en geur gee. Saai en plant hulle in potte, in ‘n formele kruietuin of in ‘n blombedding naby die kombuis.

10 maklike kruie vir die kombuis

1. Soet basiliekruid

• Plant die sagte jaarplant in die lente.
• Dit groei goed in die son, maar hou van halfskadu in die midsomer.
• Maak gereeld nat.
• Pluk die jong blare soos jy dit nodig het.
• Knip die groeipunte en blomme af om die plant jeugdig te hou.

2. Grasuie

• Die klein bolletjie is familie van uie en knoffel. Sny die blaartjies af, maar los 3 cm vanaf die grond vir nuwe groei. Pluk die eetbare, pienk blommetjies wanneer hulle oopmaak.

3. Platblaarpietersielie

• Die tweejarige plant hou van ryk, klam grond en baie son.
• Pluk die blare met stingels en al.
• Die platblaar-variëteit het meer smaak.

4. Kruisement

• Die vinnig groeiende kruid hou van klam, ryk grond in die vol son of halfskadu.
• Plant ‘n paar soorte met verskillende smake.
• Hoe meer jy pluk en snoei, hoe beter sal dit groei.

5. Roosmaryn

• Die geharde struik gedy in byna enige grond, met min water en minimum aandag.
• Pluk deur die jaar takkies van die staatmaker en stroop die blare af.
• Knip vars blommetjies vir slaai.

6. Lourier

• Een boom is genoeg en ‘n moet vir elke kombuis. In ‘n pot kan die groot, immergroen boom netjies gesnoei en kompak gehou word.
• Beskerm jong bome teen ryp en wind.

7. Salie

• Die salie hou van baie son, goed gedreineerde, arm grond en min water op sy blare.
• Pluk deur die jaar blare van die stadig groeiende grondbedekker.

8. Tiemie

• Van die verskeidenheid beskikbaar, word Thymus vulgaris die meeste gebruik.
• Die geur is die sterkste in midsomer.
• Pluk liggies in die winter wanneer die plant nie aktief groei nie.

9. Sitroengras

• Die tropiese graspol groei in die meeste grondsoorte en het min water nodig.
• Sny dit gereeld om dit weliger te laat groei.

10. Orego

• Die grondbedekker vorm ‘n digte mat in die vol son en het nie baie water nodig nie.
• Knip die punte van die jong, nuwe takkies vir gebruik.

Lees ook: Begin jou eie groentetuin

#rrWenke vir jou kruietuin

Hier is ’n paar dinge om te onthou wanneer jy jou kruietuin beplan.

• Gee jou kruie son: Die meeste kruie is sonliefhebbers.
• Dreinering: Potte en plantbeddings moet goed dreineer, kruie wil nie in water staan nie.
• Grond: Spit om en verryk met kompos. Beskerm die grond met ‘n komposdeklaag.
• Water: Water volgens die verskillende kruie se behoeftes.
• Voer: Voer potte en plante wat jy gereeld oes met organiese bemesting.
• Snoei: Snoei gereeld om kruie kompak te hou en nuwe groei te stimuleer.

Loer hier vir nog goeie idees

Lees ook: Skep ’n voëlvriendelike tuin

The post 10 maklike kruie vir die kombuis wat jy moet kweek appeared first on rooi rose.

6 dinge wat jy nou in jou tuin moet doen om voor te berei vir die winter deur Cornel Dunn. Hooffoto: pexels

Ons het by Julie van Deventer van Stilbaai se Busy Lizzie tuinbouklub gaan kers opsteek. Sy deel ses dinge wat jy nou in jou tuin moet doen om dit gereed te kry vir die winter, en sodat jy in die lente die ’n pragtuin sal hê.

Lees ook: Natuurlike maniere om ontslae te raak van insekte in jou huis en tuin

1. Dis tyd om te snoei

Dit is nou die tyd om al jou vormplante te snoei.

Daar is soveel verskillende plante en elkeen word op sy eie manier gesnoei. Hierdie is die algemene aanwysing – pas dit dus aan soos benodig:

• Snoei sowat 1 cm bokant die botsel.
• Sny weg van die stam af in ’n afwaartse rigting.
• Pasop om nie te na aan die botsel te sny nie.
• Wanneer jy met ’n groep botsels te doen kry, sny slegs die af wat na die binnekant van die plant groei.

Lees ook: Kry nou jou huis reg vir die winter en vermy skade

Hoe om die perfekte plantheining te kweek

2. Saai nou hierdie plante

Saailinge soos primulas, petunias, pronk-ertjies en phloxies blom tot 3 maande lank.

Saad is soveel meer waarde vir geld. As jy bereid is om ’n bietjie meer moeite te doen, is die beloning tienvoudig.

Probeer ook allysum (heuningblommetjies), kosmos, vingerhoedjies, gousblomme en coreopsis vir ’n blomtyd van 3 maande.

Lees ook: Hiberneer in styl – 7 mooi idees vir ’n winterhuis

Hoe om jou kombuis reg te organiseer

3. Dis nou ’n goeie tyd om bolle te plant

Omdat die grond nou koeler is, is dit ’n gepaste tyd vir ’n verskeidenheid bolle in jou tuin. Freesias, gladioli, babiana, sparaxis en die beeldskone afodille is nou in hul groeitydperk.

Lees ook: Versier self potplanthouers

Die beste wenke vir binneshuise plante

4. Hierdie plant is ’n winter-wenner

Vir vrolike kleur hierdie winter stel ons voor dat jy osteopermus plant.

Hierdie plant is lief vir koeler weer en sal jou tuin dwarsdeur die winter inkleur.

Lees ook: Berei jou tuin voor vir reën

Maak tuin op jou balkon!

5. Vir die voëls!

Onthou die voëllewe!

Maak nou jou voëltjiebad behoorlik skoon om die plesier van voëllewe in jou tuin werklik te kan bly geniet vorentoe.

Maak só:

• Verwyder alle saad en afval.
• Gebruik ‘n mengsel van 1 deel witasyn en 9 dele water om die badjie mee te skrop.
• Skrop veral oral waar die voëltjies land.

Lees ook: Skep ’n voëlvriendelike tuin

Plante wat selfs beginners aan die groei kan kry

6. Lei jou tuin hierdie tyd van die dag nat

Maak die tuin in die middel van die dag nat sodat die plante kan tyd kry om uit te droog en die grond kan opwarm voor die aand se kilte.

Lees ook: Maak self die mooiste wegpakplek vir jou tuingereedskap

10 kruie wat jy vir die kombuis moet kweek – dis maklik!

The post 6 dinge wat jy nou in jou tuin moet doen om voor te berei vir die winter appeared first on rooi rose.

Deur: Elandrè Swart. Hooffoto: Unsplash

Hoekom binnenshuise plante goed is vir jou

Dit suiwer die lug

• Plante omskep koolstofdioksied in suurstof en ons het suurstof nodig om te lewe. Hoe skoner die lug, hoe beter. Doen dus wat jy kan om die gehalte van die lug in jou huis so hoog as moontlik te maak.

Dit help om siektes te beveg

• Plante het die vermoë om die vogvlakke in die lug te verhoog en stof te verminder. Studies het al bewys dat groenigheid ’n mens se geestesgesondheid verbeter.

Stres verminder en produktiwiteit verhoog

• Om ’n potplant in jou werkruimte te hê, verminder jy jou stresvlakke.

Jy slaap beter

• Plante wat ’n kalmerende uitwerking het, soos laventel, jasmyn en aloe vera, kan die gehalte van jou nagrus verbeter as jy een of meer van dié plante in jou slaapkamer hou.

Dit maak jou huis ’n tuiste 

• Bring nuwe lewe in jou leefruimte met ’n binnenshuise plant of twee vir ’n gesonde, kalmerende en vrolike huis.

Hoe om vir plante binne die huis te sorg

Lig

• Maak seker jou binnenshuise plante kry genoeg natuurlike sonlig of jy kan self ’n groei-lig kry as jou huis nie baie sonlig kry nie.

Water

• Water jou plante tot die water onder die pot uitkom (maak seker jou pot het ten minste een gaatjie in).
• Moet nie te veel water gee nie. Wanneer ’n potplant te veel water kry, raak die grond versadig en die plant sal uiteindelik verdrink as gevolg van ’n gebrek aan suurstof.
• As jou plant se blare geel en/of hangend is, moet jy van enige oortollige water onderin die pot ontslae raak en wag totdat die grond droog is voordat jy weer water gee.

Potte

• Plaas jou pot op ’n piering of dreineringsbak met ’n duim van growwe sand. Die growwe sand hou water en sal vogtigheid rondom die plant verhoog (veral nuttig in die winter). Maak seker die watervlak bereik nie die bodem van die pot nie. As die plant se wortels in die water sit, sal hulle vrot, wat sal veroorsaak dat die plant vrek.

Peste

• Wanneer ’n plant min water en sonlig kry, ervaar dit stres wat veroorsaak dat peste die plant makliker aanval.
• Insekte: Word vlak, naby die are aan die onderkant van die blare aangetref en lyk soos wit skubbe. Omdat hulle so goed weggesteek is, is dit soms moeilik om daarvan ontslae te raak.
• Rooispinnekop: Jy sal weet hierdie klein spinnekoppie is daar as jy klein druppeltjies water sien wat in amper onsigbare webbe aan die onderkant van die blaar vasgevang is. As die blare grys of geel word, het die inval versleg. Die goeie nuus is dat dié spinnekoppe glad nie van koue water hou nie. Spuit dus jou plant twee keer per dag met koue water en maak seker dat die water die onderkant van die blare en enige ander wegkruipplekke dek.
• Plantluise: Hierdie klein groen of swart insekte het lang monddele om sap te kan opsuig. Om ontslae te raak van hulle, probeer om die plant met ’n mengsel van louwarm water, ’n lae dosis brandspiritus en skottelgoedseep te spuit. Doen dit saans sodat die son nie die plant verbrand nie.

Lees ook: Kweek sprietuie in jou kombuis

The post Wenke vir binnenshuise plante appeared first on rooi rose.

Vetplante vir beginners deur Cornel Dunn. Foto’s deur pixabay.com

Hier is 9 dinge wat jy moet weet om die mooiste, gesondste vetplant te versorg.

1. ’n Goeie houer is ’n moet

Hierdie is een van die belangrikste dinge wat sal verseker dat jou vetplant goed sal groei: Kies ’n houer wat goed dreineer sodat die plant nie verrot nie.

#rrWenk: Jy kan altyd die houer in ’n groter, mooier pot plaas, maar plant die vetplant in ’n houer wat sal verseker dat jou plant oorleef.

Lees ook: Plante wat selfs beginners aan die groei kan kry

2. Kies die regte grond

Kies grond wat spesifiek vir vetplante bedoel is. Hierdie plante verkies ’n ligte grond wat vinnig dreineer. Gewone potgrond is gewoonlik te swaar en hou te veel vog binne.

#rrWenk: Gesels met iemand by die kwekery as jy nie seker is watter grond om te gebruik nie.

Lees ook: 3 tuinmaak-apps wat alle tuiniers van moet weet

3. Maak seker die plant is gesond voordat jy dit koop

Kies ’n plant met ’n mooi vorm en gesonde kleur. Dit moet insek-vry wees en geen dooie of verrotte blare hê nie.

Lees ook: Plant heerlike kruie vir jou voete

4. Hóé jy dit plant is belangrik

Haal jou vetplant versigtig uit die kwekeryhouer. Plant in die regte grond en maak seker die wortels is goed bedek.

#rrWenk: Moenie te veel grond insit nie, want dit sal mors wanneer jy die plante water gee.

Lees ook: Kweek jou eie groente

5. Dink aan Gouelokkies wanneer jy die vetplant water gee

Soos Gouelokkies het vetplante nét die regte hoeveelheid water nodig: nie te min nie, nie te veel nie. Gee net genoeg water sodat dit nie in die houer opdam nie. Dit kan wissel van een dag per week tot een dag in ’n paar weke.

#rrWenk: As die blare begin droog lyk, kort hulle nog water. As die blare pap word, gee jy te veel water.

Lees ook: Berei jou tuin voor vir reën

6. Dis lekkerder in die lig

Vetplante benodig vier tot ses uur se oggendlig per dag. In die somer kan dit soms nodig wees om hulle in die huis te sit om hulle teen fel sonlig te beskerm.

Lees ook: Die beste wenke vir binnenshuise plante

7. Kry die perfekte voeding vir jou vetplant

Soos alle plante, benodig vetplante ook goeie voeding. Vra by jou plaaslike kwekery na die perfekte voeding vir jou vetplante.

8. Oppas vir dié insekte

As jy enige meelagtige insekte by jou vetplante kry, vee die plant af met ’n wattestokkie wat in alkohol gedoop is. Neem andersins ’n foto van die pestillensies en kry raad by jou plaaslike kwekery.

9. Hou die temperatuur matig

Al is vetplante gehard, is hulle ook sensitief. Wintertyd moet jy eerder vir hulle ’n plekkie binnenshuis kry sodat hulle nie koud kry nie.

Lees ook: Plant slim, bespaar water

The post Vetplante vir beginners appeared first on rooi rose.

Deur Cornel Dunn. Hooffoto: Ricardo Gomez Angel vir Unsplash

Die balkon is ’n verlenging van jou huis

Vir klein balkonne is dit belangrik om die buitekant na binne te lei. Vir groter balkonne het jy die luukse om ’n sit-area te akkommodeer. Klein spasies benodig innoverende denke om hierdie kleinood optimaal te benut.

Begin klein

Tuinmaak is ’n langtermynprojek en ’n balkontuintjie verskil nie veel nie. Moet nie te groot begin en die klein spasie met te veel plante oorlaai nie. Ontwerp jou spasie met ’n einddoel in sig. Begin met ’n paar plante en kyk eers watter floreer op die balkon. Dan kan jy byvoeg en leer.

Lees ook: 35 slim truuks vir jou tuin

Groen

Baie groenigheid skep ’n gevoel van ruimte – binne sowel as buite. ’n Balkon met baie groenigheid skuif die grense van my mure na buite.

Immergroen

Immergroen plante sal jou deur die jaar seën met ’n groen balkon – selfs in die Winter. Kies dennehout, bloekom en tiemie.

Seisoenale plante

Voeg seisoenale plante by vir verskeidenheid. Gebruik van saadjies tot bolle vir kleur. Kies Krismisrose, viooltjies, violas en wilde suring vir kleur.

Lees ook: Plante wat kleur en geur by jou tuin sal voeg

Kies slegs drie kleure

Groen moet een van bogenoemde wees om te verhoed dat die balkon te besig raak. Gebruik verskillende skakerings van een kleur of ’n kontrasterende palet. Ook die potte moet eenvormig wees en in ’n gedempte neutrale kleur.

Son

Indien jou balkon baie son kry, is dit wys om ’n bolaag op jou plante te plaas. Dit hou die plante klam en verhoed dat die son dit so vinnig uitdroog. Rivierklippies of houtskaafsels werk goed.

Inspirasie

Lees ook: Skep ’n voëlvriendelike tuin

The post Maak tuin op jou balkon appeared first on rooi rose.

Deur: Elandrè Swart. Hooffoto: Benjamin Combs  vir Unsplash

Nie seker hoe om te bepaal of ’n plant waterwys is of nie? Kyk uit vir die volgende:

• Klein of naald-agtige blare

Hoe kleiner die oppervlak van die blaar, hoe minder water raak verlore as gevolg van verdamping. Voorbeelde sluit in erikas, akasias, roosmaryn, oreganum en tiemie.

• Verlaagde nommer van blare/sluitende blare

Sekere plante skei blare of halveer hul blare deur om dit te vou om vogverlies te verminder. Hierdie plante sluit hul blare om die hoeveelheid blaar wat aan direkte sonlig blootgestel word te verminder. Voorbeelde sluit in Karee-boom, akasia en buffelsdoring.

• Grys ​​blare

Die kleur grys weerspieël die sonstrale van die plant af, dit hou die plant koeler en verminder vogverlies. Voorbeeld: laventel en gousblom.

• Harige blare

Die funksie van hare op blare is om lugbeweging langs die blare te verlaag en sodoende waterverlies te verminder. Voorbeeld: silwerboom en geelblomsalie.

• Blare wat ligter onder is

Wanneer hierdie plante waterstres ervaar, draai hulle die ligter kant van hul blare opwaarts om die son te weerspieël. Voorbeeld: wilde olywe.

Lees ook: Plante wat kleur en geur by jou tuin sal voeg

Ander idees vir waterbesparing

• Watertenks

As jy die spasie het, installeer ’n tenk om reënwater op te vang, koppel ’n gryswaterstelsel by jou bad en stort. Water slegs op stil, windvrye oggende om verdamping te verminder en direkte water na die plantwortels te verseker.

Lees ook: Waterwys met watertenks

• Groepeer plante

Groepeer plante met soortgelyke waterbehoeftes saam. Skep ’n area waar al die plante soortgelyke waterbehoeftes het sodat jy water doeltreffender kan maak.

• Deklaag

Deklaag gereeld om waterverdamping te verminder en onkruide en matige grondtemperature te voorkom. Vir die beste resultate, gebruik ’n 2 tot 3 duim deklaag in plantbeddens asook om bome en struike.

• Bewaar grasperke

Plant droogtebestande grassoorte soos Bermuda- en buffelgras, wat 20% minder water gebruik as ander tipes.

• Plaaslik is lekker

Inheemse plante wat goed gevestig is, is die beter keuse vir jou landskap omdat hulle nie baie water vereis nie. Hulle is ook algemeen bestand teen plae en siektes in die omgewing en benodig nie veel kunsmis nie.

Vir meer inligting oor waterwyse plante, besoek jou naaste kwekery.

Lees ook: 35 slim truuks vir jou tuin

The post Plant slim, bespaar water appeared first on rooi rose.

Hoe om self kruie te kweek deur Cornel Dunn. Hooffoto Pexels.

Houers

Die materiaal vir jou houer kan wissel. Dit kan klei, hout of metaal wees, solank dit genoeg dreinering het.

Glasflesse vertoon pragtig in ’n kruietuin, maar is nie effektief nie. Die wortels van die plant sal uiteindelik vrot as gevolg van gebrek aan dreinering.

Kies ’n pot wat volgens sy grootte by die plant se grootte pas.  Indien die pot te groot is, sal die plant te veel sukkel om ’n wortelstelsel te vestig.

’n Te klein pot stop weer behoorlike ontwikkeling.

Kies jou kruie

As dit jou eerste poging is, begin eenvoudig. Pietersielie, kruisement en basielkruid is ideaal vir ’n pot. Hulle kan ook gereeld geoes word.

Basielkruid

Dit is maklik om hierdie krui te groei. Dit doen veral goed in ryk grond wat baie water kry.

Kruisement

Hierdie krui groei goed in sy eie houer en in direkte sonlig. Dit kan tog ’n bietjie koelte hanteer.

Origanum

Origanum is klein met geurvolle blaartjies. Dit verkies vol sonskyn met hope dreinering.  Hierdie plantjie is broos en moet in die winter liefs na binne gebring word

Pietersielie

Sjefs verkies gewoonlik die platblaar pietersielie bo die gekrulde een. Dit het blykbaar meer geur. Pietersielie gedy in goed gedreineerde grond met gedeeltelike skadu.

Tiemie

Tiemie is baie geurig en het minder water nodig. Hierdie plant verkies goed gedreineerde grond en vol sonlig.

Tiemie is baie geurig en het minder water nodig. Hierdie plant verkies goed gedreineerde grond en vol sonlig.

Roosmaryn

Hierdie blare is besonder geurig. Die kruie verkies koel weersomstandighede met genoeg son en klam grond. Bring ook roosmaryn na binne gedurende die winter.

Grondvoorbereiding

Maak seker dat jy potgrond en nie tuingrond vir jou kruietuin koop. Hierdie grond dreineer baie beter. ’n Laag klippies onderin die pot sal ook baie help met dreinering. Maak ook seker jy voeg gereeld voedingstowwe by die grond om die plante optimaal te laat groei.

Lees ook: Plante wat selfs beginners aan die groei kan kry

The post Hoe om self kruie te kweek appeared first on rooi rose.

Die 3 mooiste herfskranse en versierings wat jy vir Paasfees moet maak deur René Slee*

Paaskranse

Die 3 mooiste herfskranse wat jy vir Paasfees moet maak

Maak so:

Druk goed deurweekte, groot oasisringe vol verkleurde wingerdblare.

Vul die ringe op met malvablare (vir hul geur en vorm), Viburnum-blare (vir hul helder groen kleur en spitsvormige blare), groen krismisrose (vir die lemmetjiegroen kleur) en alle bessies waarop jy jou hande kan lê.

Hier is druiwetrossies, blomappels (Malus), Pyracantha en Viburnum-bessies en kwepers gebruik.

’n Soorgelyke effek kan verkry word deur die verkleurde blare van Liquidambar, Acer palmatum (Japanse esdoring), naaldeik en populierbome as basis te gebruik.

Die krans kan verder opgevul word met Ilexblare (huls), Myrtus communis (Engelse mirt), Leucadendron, kamelia, konifere, sipresse, en varings.

Vir bessies: Crataegus, Cotoneaster, koemkwats, noem-noems en dadelpalms.

Lees ook: Die 10 lekkerste Paasfees-resepte wat jy nou moet bak

Paaseierkrans

Die 3 mooiste herfskranse wat jy vir Paasfees moet maak

Maak so

Behang ’n krans met sjokolade-eiers en geverfde hoendereiers om die Paaseierjag af te rond. Maak ’n gaatjie aan albei kante van die hoendereiers en blaas die binnekant uit. Laat jou kinders die eiers verf en versier.

Bind vislyn stewig aan ’n kort stokkie vas. Steek die stokkie in die eier in en draai dit dwars sodat die eier daaraan hang. Die sjokolade-eiers word op dieselfde manier opgehang.

Ryg stringe klein klokkievormige blomme soos die individuele blommetjies van agapante en frangipani aan vislyn en hang ritse daarvan tussen die eiers.

Lees ook: Die heerlikste Paasfees-spyskaart 

Paaskruise

Die 3 mooiste herfskranse wat jy vir Paasfees moet maak

’n Verskeidenheid Paaskruise teen ’n verweerde tuinmuur word deur twee sementengeltjies opgepas.

Lees ook: Die 3 mooiste tafeldek-idees vir Paasfees

The post Die 3 mooiste herfskranse en versierings wat jy vir Paasfees moet maak appeared first on rooi rose.

Maak self kweekglasies om plante uit te stal of as geskenke deur Liezel Norval-Kruger. Foto: Neville Lockhart

Wenke vir klokflesse:

Alledaagse voorwerpe word spesiaal wanneer hulle onder ’n glaskoepel uitgestal word. Dit geld ook plante, maar dit het natuurlik ’n praktiese doel.

Gebruik dit om jong plante teen die koue te beskerm of om steggies te kweek.

Klokflesse is beskikbaar in allerhande groottes en vorms, maar is taamlik duur. Soek in die kombuiskas vir ander stylvolle opsies soos ‘n doodgewone waterglas. Stal uit in groepe vir die grootste visuele effek.

Hou die volgende in gedagte:

• Kondensasie aan die kant van die glas is ’n goeie aanduiding dat daar genoeg vog is.
• Toets die grond een keer per week, dit moet klam wees, nie papnat nie.
• Plaas in helder, gefiltreerde lig, nie direkte sonlig nie.
• Plant die plantjie uit sodra die glaskoepel te klein raak

Lees ook: Verwyder slegte reuke in jou huis vinnig

Kweekglasies

Benodigdhede

• glase
• teëls of pierings
• Dymo tape of ander etiket
• ou eierhouertjies
• plantjies

Maak so

1. Skeur ’n ou eierhouer om individuele houertjies te vorm en vul met ryk grond. Plant plantjie daarin.
2. Plaas die houertjie op ’n teël of piering en keer die glas daaroor om.
3. Skryf die plant se naam op Dymo tape of ’n ander etiket.

Vir nog goeie idees, loer hier

The post Maak self kweekglasies om plante uit te stal of as geskenke appeared first on rooi rose.