As jy op soek is na ’n peuselhappie wat soos ’n bederfie voel, maar steeds goed vir jou welstand is, is macadamias die antwoord. Dié neute is bekend vir hul ryk, botterige geur en delikate krakerigheid, en bewys dat voedsame keuses nie beperkend hoef te wees nie – dit kan werklik lekker wees en geniet word.

Die tipe vet wat jou liggaam waardeer

Vet was jare lank in die voedings-kruisvuur, maar nie alle vette kan oor dieselfde kam geskeer word nie. Die gesonde vette in macadamias word erken vir hul rol in die ondersteuning van hartgesondheid, die vermindering van inflammasie en om die liggaam van binne af te voed. Voeg daarby hul natuurlike antioksidante, vesel en noodsaaklike voedingstowwe, en jy het ’n kragtige toevoeging tot jou daaglikse roetine wat tot langtermynwelstand bydra.

Macadamias is natuurlik laag in koolhidrate en suikers, terwyl dit propvol voedingstowwe is en ryk aan belangrike minerale soos magnesium en mangaan. As ’n volwaardige, natuurlike voedsel bied dit ’n bevredigende en gesonde manier om ’n gebalanseerde dieet te verryk – met ’n geur wat baie meer soos ’n bederf voel as wat dit werklik is.

Eenvoudige maniere om meer macadamias te geniet

Een van die beste eienskappe van macadamias is hul veelsydigheid. Hulle kan moeiteloos in soet en sout en alles tussenin geniet word:

• Gee ontbyt ’n hupstoot: Voeg gekapte macadamias by hawermout of jogurt vir ekstra krakerigheid, of meng dit in ’n smoothie vir ’n romerige tekstuur.
• Peusel slim: Hou ’n klein hand vol (ongeveer 30 g of 10 tot 12 neute) byderhand. Dit is gerieflik, versadigend en heerlik verslawend.
• Rond aandete af: Gebruik fyngedrukte macadamias as ’n kors vir vis of hoender, of strooi dit oor geroosterde groente vir ’n botterige krakerigheid.

Moenie die olie miskyk nie

Macadamia-olie is ewe indrukwekkend. Met sy hoë rookpunt en subtiele, botterige geur is dit ’n stabiele en veelsydige kookolie. Rooster groente, braai vleis, drup dit oor slaaie, of voeg dit by marinades en braaigeregte vir ekstra diepte. Dit versterk geure sonder om dit te oorheers.

Klein veranderinge, betekenisvolle voordele

Om macadamias by jou dieet in te sluit, vereis nie dat jy jou hele dieet hoef te verander nie. Dink meer aan ’n hand vol macadamias in plaas van verwerkte peuselhappies, ’n lepelvol in jou smoothie, of ’n skeut macadamia-olie in plaas van jou gewone kookolie. Hierdie klein veranderinge kan met gemak geur, tekstuur en waardevolle voedingstowwe bied. Goeie smaak én voeding kan beslis hand aan hand gaan.

Love Macadamia bied eenvoudige resepte, voedingswenke en daaglikse inspirasie om macadamias te geniet. Besoek www.lovemacadamia.org en volg hul op Instagram en Facebook. Vir plaaslik beskikbare opsies is ’n saamgestelde versameling van Suid-Afrikaanse macadamia-handelsmerke beskikbaar onder die “Brands We Love”-blad op die webwerf.

Lees ook: 10 wenke teen stres wat werk

The post Jou dieet kan doen met macadamias! appeared first on rooi rose.

Minder suiker, minder geprosesseerde kosse. Ons hoor dit elke dag. Maar hoe doen mens dit? Wat gee jy vir jou altyd-lus peutertjie en laerskoolkinders wat soos riete opskiet en uitrank? Wat hou jy in die koskas vir hongerige tieners wat hulself wil help? Daarby wil ons almal ons kinders help om hul volle potensiaal te verwesentlik, wat daarop neerkom dat ons nie net hul lyfies nie maar ook hul brein wil voed.

3 gesonde vette

Jou kind het baie vette nodig, spesifiek gesonde vette soos die omega 3’s, want rondom 60% van sy brein bestaan uit vette. Die omega 3’s help veral dat sy neuro-oordragstowwe op hul beste werk, sodat hy op en wakker is, alles inneem wat in die klas gebeur en flink reageer. Wat kan jy in jou koskas aanhou vir snoepgoed propvol gesonde vette?

1. Avokado – net so, op broodjies, of in skyfies gesny en in sesam- of pampoensaad gerol
2. Neute – al die soorte. Nota: dit is altyd beter om rou, ongesoute neute te koop. Geroosterde neute kan hul voedingswaarde verloor. Daarby wil jy nie ’n smaak vir sout by jou kind ontwikkel nie.
3. Grondboontjiebotter – net so, en op skooltoebroodjies en dbrosbeskuitjies

14 vrugte en groente

Dit is die hoofbron van vitamiene en anti-oksidante. Jou kind se brein het veral B-vitamiene nodig vir sy neuro-oordragstowwe om goed te werk. Vitamien C help hom yster opneem, wat op sy beurt help om suurstof na die brein te neem en vitamien E en C help vermoedelik met verbale vaardighede. Wat hou jy in die huis vir snoepgoedjies?

4. Appels – dink aan gedroogde appelringe, gebakte appels, kits vrugteslaai van skyfies appels en skyfies lemoene
5. Pere – vars of gedroog
6. Waatlemoen
7. Spanspek – in vrugteslaai of groenslaai, saam met botterslaaiblare en jonguie
8. Mango – vars of gedroog
9. Nektariens, perskes, appelkose – vars of gedroog
10. Piesangs – vars of gedroog
11. Kiwi-vrugte
12. Druiwe
13. Dadels – gekap saam met neute en geroosterde lynsaad
14. Komkommer – gesny in vingers of ringe, saam met maaskaas as doopsous
15. Droë vrugte, vrugtelekkers, vrugtestafies. Nota: Die beste is die soort wat nie in suiker gerol is nie.
16. Wortels – slaai, stokkies, stokkies saam met dadels
17. Alle groente – Min kinders gaan hieraan dink as tussenhappies, maar vars ertjies wat jou kind self uitdop en dop-en-al eet is weer iets anders.
Sorg dat jou kind saam met elke ete ten minste een groentesoort inneem. Sorg dat jy altyd enige vyf van hierdie in jou yskas het: ertjies, komkommer, slaai, kool, boontjies, pampoen, rissies, skorsies, botterskorsies, murgpampoen, blomkool, brusselse spruite, broccoli, blaarslaaie, jonguie en kruie.

5 stysels

Dit is die energiebrandstof vir jou kind se lyf èn brein. Die brein word beskou as die energie-ondoeltreffendste orgaan in die hele liggaam – met ander woorde, breinwerk verbrand net so baie energie as rondspeel, al lyk dit nie so nie. Growwe stysels verskaf ook vesel vir daaglikse gereeldheid, wat nodig is om toksiese stowwe, wat ook vir die brein skadelik is, uit te werp.

Wat kan jy aanhou?

18. Springmielies
19. ‘Bruin’ stysels soos heelgraanbrood, rogbrood, steenmeelbrood
20. Hawermout – verskuil dit in muesli en mueslilekkers
21. Tuisgemaakte koekies en beskuit met bestanddele soos semels, hawermout, neute, sade en klapper. Nota: Een per dag is genoeg.
22. Sjokolade – dit tel onder die beste van die lekkers omdat dit anti-oksidante, sink en vitamien A bevat. Maar hou by ’n blokkie of twee per dag, omdat dit baie suiker bevat.

6 suiwels

Melk help jou kind se geheue bou. Melkdrinkers vaar tot vyf keer beter in geheuetoetse as nie-melkdrinkers, en dié wat minstens een glas melk per dag drink, vaar beter met alle breinfunksies as dié wat minder of niks drink nie. Melk sal die brein as geheel help.

Wat sit jy voor?

23. Melk – melkkos, gegeurde melk, melkysies. Nota: Gekoopte gegeurde melk kan geweldig baie suiker bevat. Klein porsies hiervan is oorgenoeg. Koop liewer melkgeurmiddels, maak dit van die begin af flou aan sodat jou kind nie te gewoond raak aan baie soet smake nie, en bedien die melk in klein glasies.
24. Jogurt – kies liewer die volvet, suikervrye jogurt as laevet jogurt wat gewoonlik baie suiker bevat.
25. Kaas – skyfies, blokkies, gerasper, gesmelt … op énige iets!
26. Smeerkaas, kaaswiggies – dit word deesdae as ’n gesonde produk beskou.
27. Vla – heerlik gesond, as jy dit tuis maak en min suiker gebruik
28. Roomys – heerlik gesond as jy dit self maak en min suiker gebruik.

5 proteïene

Dit help nuwe breinselle bou en help veral met langtermyn geheue, sodat jou kind die feite wat hy nou leer oor ’n jaar (of tien jaar) steeds sal onthou. Die volgende lyk al te veel na gewone kos, maar dit is ook uitstekende happies omdat veral groeiende tienerseuns ekstra proteïene gebruik om spierweefsel te bou.

Wat sit jy voor?

29. Eiers – Tieners kan heerlik met eiers eksperimenteer en self eiers kook of roer, en met allerlei bestanddele opkikker. Stimuleer hul ondernemingsgees en lus om te eksperimenteer deur gekookte eiers af te dop en te rol in paprika, of gekapte knoffel, jonguie of tiemie.
30. Hoender – kouehoender, vlerkies, boudjies, skyfies borsies vir ’n slaai
31. Vis – maak kamma-sushi met blikkie-tuna, gepekelde gemmer,sojasous en wasabi
32. Frikadelle – groot, plat frikadelle op ’n broodjie, klein, rondes in ’n slaai of sop, ’n sosatiestokkie met klein frikkadelle en babatamaties
33. Gaar wors – in ’n worsrolletjie, saam met kaasblokkies

The post 33 gesonde kosse sónder suiker vir jou en jou kinders appeared first on rooi rose.

Wat kan jy vir iemand in die hospitaal saamneem wanneer jy gaan kuier?

• Maak dit iets wat gesondheidswaarde het, want navorsing wys 40% van pasiënte wat langer as ’n week in die hospitaal is, ly aan wanvoeding.
• Kos ryk aan vitamien C, sink en proteïen help om wonde gouer te laat genees. Maak jou presentjie iets ryk hieraan, soos:
• Vir proteïen en sink bring biltong, biltongpoeier om oor kos te strooi as hulle sukkel om te kou, kaasblokkies, neute (veral kasjoeneute), droëwors, vars volroommelk, gegeurde melk en volvetjogurt. Sjokolade bevat ook baie sink.
• Vir vitamien C bring vars vrugte, veral kiwi’s, aarbeie en bessies wat nie so baie suiker bevat nie.
• Vir iemand met min eetlus werk ’n maaltydvervanger goed. Meng dit in pap, jogurt, melk of fyn gedrukte groente vir ekstra voedsaamheid.

The post Help iemand gouer genees appeared first on rooi rose.

Klik hier vir jou rooi rose-eetplan

Nota: Mid-oggend- en mid-namiddag-happies kan vervang word:

Vrye groente-tabel:

• Aspersie (blikkie en vars)
• Babamielies
• Baba-pampoentjies
• Brokkoli
• Brusselse spruite
• Kool
• Blomkool
• Seldery
• Komkommer
• Eiervrug (brinjal)
• Franse slaai
• Lemoen-pampoentjie
• Groenbone
• Groen, geel en rooi soetrissie
• Slaaiblare
• Baba-ertjies
• Sampioene (blikkie en vars)
• Pietersielie
• Jong pampoentjies
• Radyse
• Rhubarb
• Duitse Suurkool
• Spinasie
• Spriete
• Baba-ertjies in peul
• Tamaties
• Sprietuie
• Vars kruie
• Uie (klein hoeveelhede)
• Blikkie tamatie en ui-mengsel

www.lilabruk.co.za
www.adsa.org.za

The post Die rooi rose-dieet appeared first on rooi rose.

Ons daag drie vroue uit om drie verskillende diëte te toets. Volg hulle weeklikse dagboekinskrywings saam met ons.

Dieet: Slender Wonder deur Body Renewal

www.bodyrenewal.co.za

Persoon: Adriana Grundlingh

Meer oor Slender Wonder:
• Mediese dieet, oorsien deur ’n dokter
• Glo vetsug word veroorsaak deur lae leptienvlakke
• Tydens die eerste besoek word die inhoud van liggaamsvet asook sentimeters gemeet
• Motiveringsgesprek en oorsig deur dokter, eetprogram en boekie wat alles verduidelik
• Opvolgbesoek, inweeg, meet en motiveringsessie elke tweede week
• Spuit jouself daagliks in met HCG (’n hormoon wat natuurlik in jou liggaam voorkom as jy swanger is)
• Neem daaglikse aanvullings
• Vervang een maaltyd met ’n lae GI gesondheidskommel
• Lae GI-dieet met beperkte kilojoules
• Daaglikse aanvullings (in die vorm van pille)
• Ses week program met twee weke wash out (geen inspuitings en meer kilojoules) voor jy weer kan begin
• Moet elke tweede week nuwe HCG en inspuitings koop

Adriana se dagboek: Week 1

Ek was super opgewonde toe Suzanne,rooi rose se skoonheidsredakteur, my die geleentheid bied om Slender Wonder te doen! Ek het al so baie daarvan gehoor en dit ook op Maatband (kykNET) gesien.

Die naweek het ek regtig alles waarvan ek moontlik hou, geëet – al daai verkeerde kossies! So ek was reg vir aksie.

Dinsdag het ek my eerste afspraak by Body Renewal in Willowbridge gehad. Die senuwees het geknaag. Ek weet nou nog nie hoekom nie, dalk omdat ek so lanklaas op ’n skaal geklim het en die afwagting om te sien wat “Mnr Skaal” sê, het my onder gekry. Die meisies wat daar werk is almal so vriendelik en behulpsaam! Hulle het my mooi verduidelik hoe alles gaan werk en toe was dit tyd vir die weeg en meet (“Aarde sluk my in”)! Ek was vir ’n paar minute geskok, maar besef toe net daar – dis nou iets van die verlede, die nuwe EK gaan anders lyk en voel, maak nie saak wat “Mnr Skaal” nou sê nie.

Die program begin met normaal eet (vir my verkeerd) vir dag 1 en 2. Glo dit of nie, maar ek kon nie dink aan iets wat ek nog wou eet nie en vir die eerste keer in my lewe was ek te mismoedig om iets te eet! Ek het nogtans die aand ’n sjokolade croissant met n groot glimlag geëet.

Donderdag (dag 3) was my “detoks”-dag waar ek net 900g vrugte kon eet. Dit klink dalk baie maar glo my dit is nie! Ek was vir alles behalwe vrugte lus, en ek het die middag ’n hoofpyn begin kry wat nie wou weggaan nie. Teen die aand was ek te bang om die yskas oop te maak, te bang ek sien of ruik iets lekker. Vroeg in die bed…om te vergeet. (My man het dit eintlik aanbeveel – hy kon seker maar sien my draadjie is baaaie kort!)

Vrydag is my eerste dag op die eetplan. Ek het steeds ’n effense hoofpyn maar ek het sommer meer moed vir die dag want ek weet die spyskaart sluit nie net lemoene en appels in nie! ’n Provita’tjie het nog nooit so lekker gesmaak nie! Ek wil die naweek seker maak my tekkies is afgestof, sodat ek Maandag kan begin oefen.

Opsomming van my gevoel oor week 1 (al het week 1 eers REGTIG Donderdag begin):
* Ek is baie sleg met pille drink, so die baie pille is nogal ’n aanpassing, en hulle is groot! Die inspuiting is baie maklik – selfs   ek wat bang is vir naalde het dit tjoef-tjaf baas geraak.
* ’n Mens voel maar ’n bietjie lam en jy het vir die eerste paar dae ’n hoofpyn.
* MAAR … ek is reg vir week 2!

Dieet: Healthy Weight-program by The Sport Science Centre in Kaapstad

www.ssisa.com

Persoon: Daniela Nothnagel

Meer oor Healthy Weight:
• 8 week-program
• Fokus op oefening, ’n gesonde eetprogram, psigologiese konsultasies en opvoeding om ’n gesonde gewig te bereik.
• Emosionele staat (soos angs, depressie en woede) word tydens die eerste besoek vasgepen en weer tydens jou laaste besoek.
• Fiksheidsvlakke, gewig en sentimeters word ook tydens die eerste besoek geneem.
• Drie groep uurlange oefensessies per week, aangebied deur ’n biokinetikus
• Persoonlike eetprogram deur ’n dieetkundige uitgewerk
• Verloor gewig en verbeter jou fiksheidsvlakke

Daniela se dagboek: Week 1

Die woord “dieet” maak my senuweeagtig. Vir my het dit ’n aaklige woord geraak, wat my dadelik honger en oorweldig laat voel. So dit help dat hierdie nie ’n dieet is nie, maar eerder ’n eetplan. ’n Eetplan wat enige normale persoon daagliks behoort te eet, so eenvoudig soos dit. Beteken dit dan dat ek tot nou toe “abnormaal” was met my eetgewoontes? Ja! Vir my is kos alles of niks, ek was tot nou toe óf op ’n baie streng dieet, óf ek het my vergryp aan my gunsteling kos, want “Maandag sal ek met my dieet begin.” Ek het nog nooit ’n goue middeweg gehad wat kos betref nie, en met hierdie eetprogram sal ek hopelik een aanleer.

My eetplan is ontwerp om my vet- en suikerinhoud te verminder, sonder dat ek oorweldigende hongerpyne kry en steeds genoeg energie het om te oefen. Ek eet ontbyt, ’n peuselhappie, middagete, peuselhappie, aandete en weer ’n peuselhappie. Ek is egter vreesbevange oor die oefenprogram waarmee ek nog moet begin. Ek haat dit om te gim, ek haat tekkies, ek haat sweethanddoekies! Hierdie gedagtes sal moet verander en ek sal die gim en oefening in ’n gelukkige plek moet verander. Ek hoop my 8 weke plan sal my hiermee kan help, om my te leer om reg te eet en hoe om te oefen (en om langer as 8 minute in die tou by McDonald’s te staan, tel nie meer as oefening nie!)

Dieet: Sureslim

www.sure-slim.co.za

Persoon: Sandri Hough

Meer oor SureSlim:
• Eerste 30 minute konsultasie is gratis
• Gaan vir ’n bloedtoets wat bloedsuiker, cholesterol, ens. toets
• Eetplan uitgewerk op grond van resultate van bloedtoetse. Duur 1 tot 3 weke
• Terwyl jy wag vir jou eetplan, moet jy probeer om slegte eetgewoontes te verander
• Sureslim-konsultant help jou om persoonlike doelwitte op te stel
• Besoek konsultant elke week vir motivering, meet- en weegsessies
• Wanneer eetprogram gereed is, verduidelik die konsultant dit vir jou, daarna is weeklikse besoeke (weeg, meet en motivering), deel van die program
• Drie gebalanseerde maaltye per dag, lae karbohidrate en GI
• Geen versnaperinge tussen maaltye

Sandri se dagboek: Week 1

Vandag is die dag. DIE dag! Langer kan ek nie meer uithou met my ongemaklikheid nie. Ek voel ongemaklik in my eie lyf, ek is seker daar is ’n maer meisie binne-in my wat veg om uit te kom.

Eintlik gee ek nie om oor maer wees nie, wat my pla is dat ek ongemaklik voel oor myself. Alhoewel my mentor by SureSlim vir my ’n getal gegee het om te bereik (eeeeeeeeeeeeeeeeek!), gee ek nie regtig om oor wat die skaal sê nie. Ek sal mos weet wanneer ek is waar ek wil wees wat my gewig betref: wanneer ek in ’n klerewinkel kan instap en nie met vier verskillende groottes na die aanpaskamer toe hoef te ploeter nie:

• ’n Nommer 10 – want dis wat ek altyd was, so kom ek loer hoe lyk dit
• ’n Nommer 12 – want dit is wat ek laas jaar nog kon aankry, so kom ek loer hoe vêr het ek van die pad afgewandel…en wie weet, dalk is dit ’n groot snit
• ’n Nommer 14 – want dit is waar ek nou is, die sweet tap sommer van my voorkop af
• ’n Nommer 16 – net om seker te maak dat ek nog nie daar is nie

Kort-kort wonder ek hoe ek vir ander mense lyk, ek is vreeslik selfbewus. Sien mense my as onvermoënd omdat ek oorgewig is? Asof ek nie beheer het oor my persoonlike lewe nie? Kom ek as professioneel voor by my werk?

My SureSlim mentor vertel my dat ek sowaar ’n BMI-klas verby gevat het – en dit is nie ’n goeie ding nie. Met my ouderdom, lengte en beenstruktuur in ag, staan ek offisieel op die eerste trappie van obesiteit. Wat? Hoe is dit moontlik?!

Dit maak my sommer moedeloos. Maar die skok laat ook my adrenalien vinniger pomp. Dit is dit! Die einde van my stryd met vet. Vandag is die dag!

Ek kry nog nie vandag ’n eetplan nie, ek moet eers deur die week vir ’n paar bloedtoetse gaan. Maar ek moet solank alles wat ek eet in my SureSlim-lêer neerskryf. Omdat my eetplan spesifiek vir my bepaal word, moet ’n klomp mediese toetse eers gedoen word om te sien hoe lyk my glukosevlakke en totale cholesterol. Dit laat my nogal gerus voel – hierdie eetplan gaan net vir my bedoel wees.

So stap ek by die kliniek uit met my sakkie aanvullings en ek maak ’n wilsbesluit om hierdie ding deur te sien. Nie net halfpad soos wat ek meeste dinge doen nie, maar voluit.

My kop is vandag reg!

Ek het Woensdag al my bloedtoetse laat doen. Dis glad nie lekker nie, maar ek weet mos hoekom ek dit moet doen. Op pad werk toe koop ek vir my ’n slaaitjie en ek smag na ’n toebroodjie. Ek weet dat ’n toebroodjie nog nie taboe is nie, ek het mos nog nie met my eetplan begin nie, maar ek probeer regtig solank kyk na wat ek eet, aangesien ek dit later in my SureSlim-lêer gaan moet neerskryf. So, ek stap eerder verby. Sjoe, hierdie gaan moeilik wees, maar my kop is reg!

Ek moet daarop fokus om al my vitamines te drink, asook genoeg water – baby steps!

The post Dieet-uitdaging: Week 1 appeared first on rooi rose.