As hierdie tekens bekend klink, besoek ’n endokrinoloog om dit te bevestig.

Lees ook: Lys van kosse wat suur verminder en vermeerder

So lyk iemand met lipodeem

Mense met lipodeem lyk op ’n ander manier “vet” as ander oorgewig mense. As jy een van daardie mense is wat maklik in nommer tien-toppies inglip maar glad nie skinny jeans kan dra nie, het jy moontlik lipodeem. Hierdie soort vet klou om die onderlyf en bene. Lipodeem is dus meer as net groot heupe. As jy jouself in die spieël van bo na onder bekyk, sal jy tipies soos volg lyk, sê prof. Tess van der Merwe, endokrinoloog van Midrand.

• Dit lyk asof jy ’n pofbroek aanhet

Jou middel- en bolyf is normaal, maar van jou naeltjie af onder toe is jy buitengewoon groot. Jy dra ’n broek wat twee en meer nommers groter is as jou bragrootte. Party mense ontwikkel tog lateraan limfedeem van die vetweefsel om die middellyf.

• Jou bene is regaf en dik

As jou bene jou aan twee stewige boomstompe laat dink, is dit nog ’n teken van lipodeem. Buiten blokbene het jy moontlik ook ’n vetrolletjie bokant jou knie en kuiltjies op die bobene, wat soos selluliet lyk. Jy kan nie broeke met smal pype soos skinny jeans en sigaretpypbroeke of lang stewels dra nie.

• Jou voete is fyn en skraal

Een van die opvallendste kenmerke van lipodeem is dat jou voete fyn, skraal en selfs klein is in vergelyking met jou stewige onderlyf en swaar bene. Tog, met gevorderde limfedeem van die vetweefsel swel die voete ook mettertyd.

• Jou enkels is so blokkerig soos jou kuite

Waar ander mense se enkels duidelik smaller as hul kuite is, loop joune regaf ondertoe. Enkels is normaalweg benerig maar joune is vlesig.

• Daar is ’n voutjie of rolletjie net bokant jou voet

Kyk hoe jou enkel by jou voet aansluit: het jy ’n voutjie of vetrolletjie net bo jou voet? Gewoonlik loop die tipies skraal, benerige enkel sonder enige ekstra weefsel oor in die ewe benerige enkel.

• Jy het lemoenskil-vel op jou bobene

Kyk weer na jou bobene: sien jy duikies en kuiltjies oraloor? Met ander woorde, dit wat ander mense selluliet noem? Lyk jou bene soos opgestopte worsies?

• Jou arms lyk normaal

Kyk na jou arms. Jy het min of geen vet op jou bo-arms nie. As jy ouer is en jou lipodeem reeds ver gevorder het, kan jy wel lipodeem van die arms ontwikkel. Net soos jou voete skraal is, sal jou hande ook skraal wees, met ’n voutjie of vetrolletjie tussen jou pols en hand.

Kry mans ook lipodeem?

Liopodeem is nie eksklusief aan vroue nie. Mans kan ook lipodeem ontwikkel. Dit is net nie so algemeen onder mans as vroue nie.

Lees ook: Verkoue, griep of iets erger? Só weet jy

The post 7 tekens van lipodeem appeared first on rooi rose.

Tienermeisies is meer vatbaar vir anorexia nervosa. As ma kan jy baie help om haar houding oor kos in ’n gesonde rigting te stuur. Ons het die tien beste antwoorde bymekaar gemaak, om jou te help.

Anoreksie is in ons gewig-behepte samelewing steeds springlewendig. En mooi, talentvolle meisies met ’n toekoms vol potensiaal sterf steeds daaraan.

Lees ook: Raad vir ’n tienervel

Dit gebeur méér dikwels as wat mens sal wil glo. Volgens ANAD (anad.org) sterf tot 20% van mense aan anoreksie, as iemand nie ingryp nie. 20% is lewenslank so ernstig geknou dat hulle nooit sal kan werk of na hulself kan omsien nie.

Waar begin dit?

Gene speel ’n rol. Maar ook jou gemoedstoestand, groepsdruk, kommersiële druk (advertensies en winkels wat die skraal figuur as ideaal bevorder) en persoonlike persepsies, wat gevorm word in die ouerhuis, vriendekring, media, en wyer gemeenskap.

Volgens die American National Institute for Mental Health ontwikkel een in drie ‘normale’ diëters eetprobleme, met 20-25% wat volledig of semi- anoreksies of bulimies raak. Lees meer hier.

Is daar oplossings? Kan jy dit keer?

As jy dink daar is ’n probleem, kry professionele hulp. Maar jy kan baie doen om te keer dat dinge so ver ontwikkel. Een van die moeilikste kwessies is om die persoon se beskouing van kos te normaliseer. Dit is waar jy inkom. Die vertrekpunt van ’n gesonde lewe begin by ’n gesonde verwysingsraamwerk oor kos. Met ander woorde, dit gaan oor ’n houding wat jy by jou kind vaslê. En dit doen jy in jul dag-tot-dag gesprekke. Om die tafel. Wanneer julle uiteet. In die motor op pad skool toe. Wanneer jy kos koop. As jy jou kind dan gesonde perspektief gee, is die stryd gewen.

Lees ook: As jy sekere kosse weier, ly jy dalk aan ‘Avoidant, restrictive food intake disorder’

Hier is ’n paar idees vir goeie, positiewe antwoorde:

Jou tiener sê: Kos maak vet.

Jou teenantwoord: Ongesonde, verkeerde kosse maak vet.

Jou tiener sê: As ek eet, gaan ek vet word.

Jou teenantwoord: As jy eet en nooit oefen nie, gaan jy vet word.

Jou tiener sê: Niemand sal van my hou as ek vet is nie.

Jou teenantwoord: Ek sal altyd van jou hou.

Jou tiener sê: Vet meisies kry nie dates nie.

Jou teenantwoord: Baie verskillende soorte lyfies is mooi vir mans. Benerigheid is ook nie mooi nie.

Jou tiener sê: Ek is nie goed genoeg nie.

Jou teenantwoord: Vir mý is jy absoluut wonderlik, pragtig en perfek. Ek is trots op jou soos jy is.

Jou tiener sê: Ek lyk nie goed genoeg nie.

Jou teenantwoord: Vir mý is jy absoluut pragtig en perfek, so mooi soos die dogtertjie waarvan ek altyd gedroom het.

Jou tiener sê: Mense sê ek het vet geword.

Jou teenantwoord: Mense dink eintlik altyd oor hul eie gewig, selde oor ander s’n. Hulle vergeet gou van joune, en praat nie regtig ooit lank daaroor nie.

Jou tiener sê: Ek gaan goed lyk as ek nog net twee kilo’s verloor.

Jou teenantwoord: Jy gaan ook so moeg en pap voel want jou liggaam gaan verswak.

Jou tiener sê: Hoe minder ek weeg, hoe mooier is ek.

Jou teenantwoord: Jy is klaar pragtig. Ek wil niks aan jou verander nie.

Jou tiener sê: Klere lyk die mooiste aan die maerste mense.

Jou teenantwoord: Klere lyk die mooiste as dit goed gesny is en pas by jou lyfvorm.

Jou tiener sê: Niks pas my nie want ek is te vet.

Jou teenantwoord: Daardie styl is nie reg vir jou nie. Kom probeer hierdie styl, want dit vly jou.

Jou tiener sê: Ek pas nie meer in ’n nommer tien nie.

Jou teenantwoord: Jy het gegroei. Jy is mos nie meer agt jaar oud nie.

Jou tiener sê: Net skraal meisies is mooi.

Jou teenantwoord: Glad nie. Jy is so mooi soos wat jy voel. Jy is so mooi as wat jy jouself versorg.

Jou tiener sê: Mense sal my ophou kritiseer.

Jou teenantwoord: Mense kritiseer ander mense in elk geval. Dit is hoe mense is.

Jou tiener sê: Sodra ek maer is, sal ek gelukkig wees.

Jou teenantwoord: Depressie is ’n newe-effek van eetversteurings.

Jou tiener sê: Ek mag nie eet nie want ek het my gister ooreet.

Jou teenantwoord: Moenie jouself uithonger en afskeep nie. Dit maak jou gespanne en angstig, en dan gaan jy môre weer ooreet.

Jou tiener sê: Hoe kon ek so baie geëet het?

Jou teenantwoord: Kos is mos lekker. Almal het dit geniet. Jy mag kos geniet.

Jou tiener sê: Ek is simpel, sleg en useless want ek is vet.

Jou teenantwoord: Ék is gek na jou. Ek dink jy is oulik, kosbaar en dierbaar.

Lees ook: 10 dinge wat jy nooit vir jou tiener moet sê nie

The post Anoreksie: swaai jou kind se kop oor dieet, gewig en kos appeared first on rooi rose.

Een van die verrassende nuwe denkrigtings van die afgelope dekade is dat jou dermkanaal net so ’n sterk beheer oor jou gevoelens, sensasies en denke het as wat jou brein daaroor het. Jou dermkanaal is letterlik jou tweede brein. Die derm word ook so genoem: waar die brein as jou sentrale senuweestelsel bekend staan, word jou dermkanaal as jou enteriese (derm-) senuweestelsel beskryf.

Volgens hierdie siening is jou derm veel meer as die plek waar ensieme kos afbreek. Die mikroflora daarin is in werklikheid aktiewe, kosbare medewerkers wat ’n hele reeks molekules help produseer wat elke aspek van jou liggaam beheer.

Serotonien en jou derms

Om net een stof as voorbeeld te noem: serotonien. Jy ken dit as jou goedvoelhormoon. Mense met te min daarvan sukkel tipies met depressie. Psigedeliese middels soos LSD veroorsaak hul high juis deur baie ekstra serotonien in die brein vry te stel.

Waar kom hierdie serotonien vandaan? Nie van die brein, soos wat ’n mens sou dink nie. Sowat 90% daarvan word in ons dermkanaal gemaak. Hiervandaan werk dit ongelooflik wyd en op allerhande onverwagse maniere regdeur jou lyf. Neem beendigtheid, wat so ver verwyderd van depressie is as wat kan kom. Of so dink ons.

Volgens ’n artikel in die April 2015-uitgawe van die wetenskapjoernaal Cell, het muise met lae vlakke van serotonien in die brein ook osteopenia. Hulle bou dus min nuwe beenselle, en kan potensieel osteoporose ontwikkel. Toevallig – of dalk nie – is dit terselfdertyd bekend dat mense met depressie ook meer tot osteoporose geneig is.

Ander toestande wat teen sowat 2007 deur talle ondersoeke aan jou serotonienvlak verbind word, sluit in diarree (dink aan prikkelbare dermsindroom, hardlywigheid), bloedstolling (dink aan beroerte en hartsiektes), immuniteit, borsmelkproduksie, eetlus, libido, pyn op die maag, bloedsuikervlakke, diabetes, versadiging, oorgewig, ondergewig, vervette lewer, artritis, stres, dag-nag ritme en selfs sosiale status.

Wat het serotonien met jou dermflora te doen? Dit is juis die punt van hierdie Cell-artikel. Sekere soorte derm-organismes verbeter serotonienvlakke, terwyl ander dit verlaag. Die navorsing in muise het gewys dat muise sonder dermflora baie lae vlakke serotonien het, terwyl “goeie organismes” hul serotonienvlakke opstoot, en nadelige dermflora dit verlaag.

Daardie hol kol op jou maag of lekker gevoel van wel-wees begin presies waar jy dit voel … in jou buik, by jou dermflora.

Outisme

Net soos serotonien, word ’n hele aantal ander neurostowwe ook in die dermkanaal in samewerking met dermflora gemaak.

’n Rits uiteenlopende ondersoeke is aan die gang. Party klink vreemd maar lewer die allerverrassendste resultate, soos ’n klein ondersoek op 18 kinders met outisme wat in Januarie 2017 groot opslae gemaak het.

Sowat 70% van outistiese kinders sukkel ook met spysverteringsprobleme. Navorsers aan die Arizona State University wou kyk of hulle die probleem kan verlig deur fekale oorplanting van goeie organismes direk na die dermkanaal van hierdie kinders.

Die resultaat? Dit hét tagtig persent van die kinders se dermprobleme verbeter en op die koop toe ’n groot verskil aan hul gemoedstoestand, konsentrasie en 20 ander indikators van gedrag gemaak – die tellings hiervan het met 20% – 25% verbeter. Dit lyk asof ons letterlik so gelukkig, gesond én slim soos ons dermkanaal is.

Kan jy jou dermflora aanhelp?

Moet jy solank probiotika gebruik, tot daar meer duidelikheid is? Dit is immers die beste beskikbare mediese ingryping.

Volgens dr. Michael Conlon van die Australiese Organisasie vir Wetenskaplike en Nywerheidsnavorsing (SIRO), is vesel die kortste en verreweg die beste pad na ’n gelukkige mikro-bioom (soos jou dermkanaal en al sy mikro-organismes saam genoem word).

“Ons het aanvanklik gedink die vesel in groente is hoofsaaklik growwigheid wat die noodsaaklike volume verskaf om die dermkanaal op die konkrete manier te help ledig.

“Ons besef nou dit gaan eintlik oor fermentasie. Veral sekere dermflora het die vermoë om vesel te fermenteer. In die proses vervaardig hulle ook kortketting-vetsure, soos butiraat, asetaat en propionaat. Ons begin nou maar eers insien hoe noodsaaklik en voordelig hulle vir jou gesondheid is.

“Al die wonderlike nuwe bevindings trek ongelukkig ons aandag van die basiese beginsel af: jou mikrobioom smag na vesel.”

Planne vir jou dermflora

1 Eet met elke ete groente. Dit is die heel beste strategie. Hoe groter die verskeidenheid, hoe beter vir jou dermflora.

2 Beperk suiker en meel. Dit laat die verkeerde bakterieë floreer.

3 Eet Bulgaarse jogurt. Dit is nog beter as jy jou eie maak. Enige gefermenteerde kos, soos kombucha, kefir en sauerkraut help jou dermflora.

4 Oefen gereeld maar matig. Dit klink dalk vreemd, maar oefening help, volgens navorsingsresultate van die Universiteit van Salerno, Italië, wat in Maart 2017 verskyn het. Maar moenie oorboord gaan nie, want dit verminder en verander ook jou dermflora.

As jy probiotika koop

Lees die etiket en maak seker jy koop nét goeie produkte.

• Die syfers
Vir trefkrag moet dit genoeg organismes bevat, bv. “een honderd miljoen”, “100 000 000”, “108” of “een miljard CFU’s”.

• Die spesies
Party bevat net een soort terwyl ander uit ’n kombinasie bestaan. Die CFU vir elke spesie moet soos hierbo wees.

• Die vervaldatum
Dit is nie meer doeltreffend daarna nie.

• Hoe moet jy dit bewaar?
Dis lewende organismes wat kan afsterf. Bêre en gebruik dit volgens die aanwysings op die etiket.

Lees ook: Belangrike dinge wat jy oor beroertes moet weet

The post Jou maag: jou tweede brein appeared first on rooi rose.

Nee jy is nie, sê dr. Lorna Geer, voorligtingsielkundige van Centurion. “Die beskouing dat dit ’n keuse is om ’n emosionele eter te wees en dat jy bewustelik beheer daaroor uitoefen, is foutief. Emosionele etery is ’n oorlewingstrategie en ’n manier om angs te verlig. Die sogenaamde kuur – uithongering of om minder te eet – het baiekeer die teenoorgestelde uitwerking. Dit kan die angs verhoog en die kompulsie om te eet, versterk.

“Gewigsbeheer behels ’n ingewikkelde interaksie van liggaamsiel-beheermeganismes. Die sleutel lê in die besef dat hierdie meganismes deur die onbewuste beheer word. Ons vergeet soms dat ons onbewuste – die gevoelens, gedagtes, begeertes en herinneringe wat ons sedert konsepsie opgebou het en waarvan ons nie bewus is nie – sowat 80% van ons optrede rig. Gewigsbeheer word nie bepaal deur hoe jy bewustelik wil wees en optree nie, maar deur hoe die onbewuste glo jy moet wees en optree.”

Vir die onbewuste draai alles om oorlewing. “Dit werk met persepsies, ongeag of ’n sekere persepsie waar of vals, en toepaslik of uitgedien is. As die onbewuste oortuig is dat om gewig op te tel of om vet te wees oorlewing verseker, skep pogings om gewig te verloor juis die situasie wat die onbewuste die meeste vrees: om dood te gaan. Aangesien die onbewuste oor die uitvoerende mag be-skik, sal daardie persoon tot op ’n punt gewig verloor, en nie verder nie.”

Watter situasies kan die onbewuste se oorlewingstrategie laat inskop en gewigsverlies saboteer?

Liefde

“Alle mense het ’n behoefte aan liefde. Hier gaan dit oor emosionele oorlewing. Baie babas begin reeds in die baarmoeder verwerping ervaar. Soms is die swangerskap ongewens; daar is finansiële druk, of die pa het pas bevordering gekry en is selde tuis. Dalk gebruik die ma die baba primêr om die pa aan haar te bind, byvoorbeeld as hy ’n affair gehad het. Soms verwens die ma die baba weens ’n moeilike swangerskap. Wat ook al die rede: babas wat verwerping ervaar, voel onwelkom, waardeloos en verward. Die geboorte word as die finale verwerping beleef en die baba voel alleen en baie bang, afgesny van sy oorlewingstelsel – die ma se liggaam. Direk ná geboorte word hy boonop weggeneem sodat hy geweeg en sekere toetse gedoen kan word. Dikwels word hy weggehou van die ma sodat sy kan rus. Die baba ervaar intense skeidingsangs.

“Met drinktyd gaan die baba terug na die ma, die enigste wese wat hy ken. Wanneer ’n ma haar baba die eerste keer vashou, of hy nou gewens was of nie, vloei daar gewoonlik liefde van haar na hom. Sy gevoelens van verwerping en angs word vervang deur gevoelens van welbehae omdat goedvoelhormone afgeskei word. Die velkontak met die ma, die gevoel van die tepel in die mond en die bevredigende proesensasie van soet, dekstrose gevulde melk word deur die onbewuste as oorlewing geïnterpreteer. As die baba tussen voedings weggeneem word, ervaar hy afwisselend tye van angs, verwerping en honger en tye van algehele liefde en bevrediging. Die suigrefleks skep ’n gevoel van behaaglikheid en verlaagde angsvlakke. Ons sien dit by ’n kind wat duim suig of ’n volwassene wat aan ’n sigaret suig. Die feit dat soveel eerstejaarstudente skielik gewig aansit, hou ook hiermee verband. Die blootstelling aan die onbekende grootmenswêreld sneller die traumatiese geboorte-ervaring.

“Indien hierdie patroon vassteek, kry jy volwassenes wie se grootste vrees emosionele verwerping is. Hulle beleef die eertydse hulpeloosheid en hopeloosheid as depressie. Hulle word emosionele eters en sien soetgoed as ’n troosmiddel, veral as hul ouers graag ’n lekkertjie gegee het om ’n eina beter te maak. Hulle is peuselaars wat eet as hulle eensaam, neerslagtig of verwerp voel. Kos, veral soetgoed, word ’n plaasvervanger vir liefde en aanraking. Dit word onbewustelik gebruik om ’n emosionele gat te vul. Die keerkant is dat ’n streng dieet die ervaring van ’n gebrek aan liefde sneller.”

Verhongering

“Die onbewuste se hoofdoelwit is oorlewing. As jy iewers die ervaring van verhongering gehad het, waak jou onbewuste teen ’n herhaling daarvan omdat dit met doodgaan geassosieer word. Soms loop daar voor geboorte iets skeef met die plasenta, wat veroorsaak dat die baba te min voedingstowwe kry. Omdat ma’s nie seker is hoeveel melk babas met borsvoeding inkry nie, kan dit ook tot verhongering lei. Die verhongeringservaring word in die onbewuste vasgelê en as so iemand as volwassene minder begin eet om gewig te verloor, word die oorlewingsdrang gesneller. Die onbewuste dwing hom om te eet – letterlik enigiets. Dit gaan om die eetaksie. Gewoonlik sit die persoon ná ’n dieet meer gewig aan as wat hy verloor het.”

Bewys van lewe

“Tydens geboorte, veral as die baba asemnood ervaar, raak hy uitgeput en is daar ’n verlies aan energie. Die baba word oorspoel deur hulpeloosheid en hopeloosheid, gee moed op en hou op beweeg. Die onbewuste interpreteer dit as leweloosheid en dood.

“’n Baba wat van sy ondersteuningstelsel – sy ma se liggaam – verwyder is en in ’n broeikas lê sonder haar aanraking, se onbewuste kan dit ook interpreteer as ’n onafwendbare dood, met die gepaardgaande angs. Dieselfde geld ’n jong kind wat ernstig siek is. Herstel word verbind met die vermoë om weer te kan eet. Kyk maar hoe dramaties keer ’n kind wat ernstig siek was, se eetlus terug.

“In hierdie omstandighede is die eetaksie vir die onbewuste ’n bewys van lewe. As volwassenes met hierdie patroon om een of ander rede energie verloor, lei dit tot angs en sal die onbewuste hulle dwing om te eet al is hulle nie honger nie. Sulke mense sal ná ’n moeilike dag by die werk tuis kom en alles eet wat voorkom as bewys dat hulle die dag oorleef het.”

Vrees vir die liggaam

“’n Vierde situasie waar die onbewuste gewigsverlies teenstaan, het te doen met die vrees dat ’n aantreklike liggaam sal lei tot seksuele interaksie wat ‘sonde’ is en ‘straf’ tot gevolg gaan hê, naamlik geestelike dood. Hierdie oortuiging kan baie sterk op die onbewuste vlak werk. Een voorbeeld is dié van getroude mense wat bang is vir buite-egtelike verhoudings en hulself ‘beskerm’ deur gewig aan te sit.

“As gewigstoename eers tydens puberteit begin, het dit dikwels ten doel om die tiener teen die normale drange en drifte van daardie lewenstydperk te verskans. ’n Meisie se vroulike liggaam word byvoorbeeld ’n lewensbedreiging; dit kan haar in die hel laat beland. Wanneer sy onaantreklik voel, verdwyn die moontlikheid dat sy betrokke sal raak by ’n seksuele verhouding en neem die angsvlakke af. Solank sy ‘lelik‘ is, is sy veilig.

“Masturbasie of dokter-dokterspeletjies waaroor iemand kleintyd berispe, geslaan of verkleineer is, kan daartoe lei dat hy besluit naakte liggame, kontak tussen mans- en vroueliggame en erotiese gevoelens of stimulasie is uit die bose. Oorgewig word ’n beskermingsmeganisme en as hy ’n kilogram verloor, sal sy onbewuste sorg dat hy dit met rente terugkry.

“Dis bekend dat ekstra gewig, veral om die heupe, baiekeer voorkom by mense wat seksueel gemolesteer is. Hulle beskerm hulself letterlik met lagies vet. Soms verloor die persoon gewig en beloon haarself deur ’n uitrusting aan te skaf wat stywer sit. Opmerkings dat sy sexy lyk, bevestig dat sy gevaar loop om weer deur ’n molesteerder raakgesien te word en sy sit weer gewig aan.

“’n Vrou kan haarself met ekstra gewig beskerm as haar man haar as ‘koud’ etiketteer, dalk omdat sy seksueel onervare was toe hulle getroud is en hy voorheen seksueel aktief. As sy nie aan sy verwagtings voldoen nie, kan sy gewig aansit om aan die situasie te ontvlug. Dieselfde geld mans wat met impotensie worstel. As hy hom ‘onaantreklik’ maak, kan hy aan ongemaklike konfrontasies ontkom.

“Party mense glo onbewustelik dat lae vet sal verhinder dat ander hul gewaande tekortkominge sien.”

Terapie

Lorna gebruik hipnoterapie om onbewuste dryfvere na die bewuste te bring. “Die kernvraag is: Waarteen probeer jou onbewuste jou beskerm? Ons soek na die plek waar die persoon ‘amper dood‘ is, die situasie wat gewigsverlies verby ’n bepaalde punt keer. Ek het byvoorbeeld ’n kliënt gehad wat een was van ’n drieling. Net sy het bly leef. Enersyds het sy onbewustelik vir drie geleef en geëet, en andersyds was sy oortuig dat om groot te word in elke sin van die woord bewys dat sy nie dieselfde pad as hulle volg nie. As jy weet wat jou onderliggende motivering is en dit deurgewerk het, kan jy nuwe betekenis aan die gebeure gee en voordeliger besluite neem. Dikwels verloor kliënte spontaan oor ’n lang tydperk gewig – sonder enige inspanning.”

The post Gewig: kry jou onbewuste aan jou kant appeared first on rooi rose.

Hoe om emosioneel te eet en daarmee weg te kom!

Die eerste stukkie geniale raad kom van Cia Meiring. “Begin met ’n groot glas water en dan maak jy vir jou ’n lekker koppie kruietee. In wonderlike Afrika is die verskeidenheid bekostigbaar en oneindig: rooibos, heuningbos, groen rooibos, gegeurde rooibos, Engelse tee, tee met suurlemoen, gemmer, kaneel, rooswater … wat ook al vir jou geurig is.”

Ons tweede konsultant, Ilsabé Spoelstra, voeg by dat jy gerus kan kyk na wat jou kondisioneer om te eet, veral as jy gereeld net móét eet.

“Is jy soos Pavlov se hond wat skielik honger is omdat jy die teetrollie hoor aankom, of omdat dit reën sommer ses pannekoeke moet eet? Het jy ’n gewoonte – koop jy elke keer by die kassiere in die supermark ’n sjokolade, al het jy en ’n vriendin pas koffie en koek gehad?” En as vandag ’n hondjie-dag is? “Elke hond kry mos sy dag! Ek werk op die bakkiebeginsel: koop sewe klein pastiekbakkies, een vir elke dag. So leer jy dat daar elke dag vir jou iets lekker is wat jou emosioneel bevredig. Dis ook prakties: gestel jy is lus vir skyfies. Niks anders as ’n groot pak gaan dit vir jou doen nie. Koop dan die pak en deel dit tussen die sewe bakkies. So kry jy jou chippies sonder om die skaal te breek.” En op ’n krisisdag? “Kies sulke dae goedjies wat lig in kilojoules is.”

Jou kwota? Drie snoephappies per dag

Soetigheid 

1. Enige vrug. Vir ’n warm winterhappie, mikrogolf ’n appel, peer of piesang 1- 2 minute lank. Geur met kaneel of    kaneelstokkie
2. Gommetjies of jellielekkers – soveel as wat jy in jou vuis kan toevou
3. Een Turkse lekker
4. Ses appelringe
5. Twee droëperskes, -appelkosies of –pere. Kap hulle op in blokkies, dan kom jy verder
6. ’n Klein bakkie laevetjogurt
7. Gladdejantjie. Sit Bulgaarse jogurt of water in die vrieskas. Net voor dit begin vries, kap of verpulp ’n vrug daarin. Vries verder vir ’n heerlike roomys
8. Soveel rosyntjies, bosbessies (cranberries), dadels of pruimedante as wat jy in jou vuis kan toevou
9. Twee blokkies sjokolade of ’n minisjokolade soos ’n mini-Bar-One
10. 200 ml-sjokolademelkie
11. Jou eie melkskommel. Maak dit van ’n kwartkoppie gegeurde jogurt, ’n koppie melk en ’n verpulpte vrug
12. Warm sjokolade. Maak dit van die helfte kookwater, helfte melk, ’n teelepel regte kakao en ’n bietjie suiker
13. Klein soetworteltjies of mini-tamaties. Maak hulle nat en gooi tiemie of pietersielie oor vir ekstra geur

Stysels wat die heupe omseil

1. As jy slaaigoed bysit, lyk dit meer, eet jy langer en bly jy versadig
2. Minibeskuitjies. Bak gewone, growwe beskuit, maar sny elke beskuit in drie voor jy dit uitdroog. Eet een per keer. Ná drie het jy steeds net een beskuit gehad
3. Rooster ’n sny bruinbrood bedek met ’n piesang, vertikaal in drie skywe gesny
4. ’n Sny rogbrood met ’n teelepel grondboontjiebotter
5. Drie Pro-Vitas met ’n paar skywe avokado
6. ’n Kwartsny brood met ’n dun lagie grondboontjiebotter, vetvrye maaskaas en appelkooskonfyt
7. Twee tot drie Ryvitas, Pro-Vitas of ’n sny rogbrood

Sout van die aarde

1. Marmite, vissmeer of Bovril op ’n Pro-Vita, Ryvita of ’n sny brood
2. Woollies se blatjangryskoekies l Deel ’n klein pakkie aartappelskyfies met iemand
3. ’n Koppie of klein pakkie tuisgemaakte of gewone springmielies (nie die gegeurde soorte nie)
4. biltongstokkies. (nie droëwors nie)
5. Ham (nie salami of polonies nie)
6. Tuna in water

Iets olierigs 

1. Avokadopeer – ’n hele kleintjie of ’n halwe grote
2. Neute … nie meer as 8 – 10 nie
3. ’n Lepel grondboontjiebotter
4. ’n Laevet-kaaswiggie
5. ’n Blokkie harde kaas (2 cm x 2 cm x 2cm) of een vakuumverpakte kaasskyf l ’n paar olywe

The post Eet jy met jou hart? appeared first on rooi rose.

Sink jou dieet elke naweek? Jy’s nie al een nie.

Die probleem met diëte is ons lewenstyl.Niemand van ons het net een lewenspatroon nie. Daarvoor verskil ons naweke te veel van ons weke. So begin elke week met ons goed beplande Maandag-tot-Donderdag roetine en ons dieet maklik. Maar hoe later in die week hoe meer druk. Ons skakel oor na ons druktydrat en kort voor lank gryp ons uit nood na kitskos. Dan kom die naweek. Ons hou wynproe. Ons gaan eet uit. Ons gaan 4×4 ry of rugby kyk. Ons het gesinsdag op Sondae. Ons gaan winkelsentrum toe. Alles dinge en plekke waar dieet sosiaal ongemaklik is – en daarom gee ons op. Wat is die les om hieruit te leer? Beslis nie dat jy naweke eerder moet dieet nie. Maar wat van die konsep van twee diëte? Of selfs drie? Soos ’n naweekdieet met ruimte vir jou sosiale lewe en ’n dieet vir strestye, en ’n dieet vir alles-onder-beheer dae?

Dis wat ons hierdie keer doen: ’n dieetfokus met diëte vir elke soort dag. Jy kies watter een vandag vir jou gaan werk: ’n Verstandige dieet vir goeie dae; die kitskosdieet vir drafstapdae; en ’n ruil-lys-dieet vir die naweek sodat jy kan sosialiseer sonder om die skaal te breek.

Die basiese dieet

Werk vir normale dae. Onthou: Oefen langer op die dae wanneer jy meer tyd het. Mik vir 60 minute per dag (300 minute per week), en jaag jou hartklop vir 20 minute op. Los alkohol, koeldrank, sportdrankies, vrugtesap, lekkergoed, vrugtelekkers, koek, beskuit, gebak, pap, rys, pasta, waatlemoen, geblikte vrugte, droëvrugte.

Porsies: 1 koppie, tensy anders gespesifiseer. Drink soveel water, tee en koffie as wat jy wil maar sonder suiker en met nie meer as ’n eetlepel melk nie.Wenk: As suikerpilletjies en kilojoulevry koeldranke jou hongerig maak, geur jou koffie en tee met kaneel, mentblare of gemmer.

Kitskosdieet

Werk vir besige dae. Onthou: Hou jou metabolisme so vinnig moontlik. Al is jy nou te besig vir ’n uur se oefening, kan jy op selfs jou besigste dae onopsigtelik oefen, soos om trappe te klim waar jy kan; vinnig te stap al stap jy net ’n draaitjie; en tou te spring vyf minute voor en ná werk, wat verbasend goeie aërobiese en kardio-oefening is ontbyt met proteïen eet wat jou lank brandstof sal gee en elke drie uur eet om jou honger in bedwang te hou.

Hou uit jou winkelwaentjie: Aartappelskyfies, alles in ’n degie, gebraaide kos, koeldrank,koelers, sportdrankies, vrugtesap, alle soorte lekkergoed en gebak, sjokolade, vrugtelekkers, versuikerde pap. Porsies: 1 koppie, tensy anders gespesifiseer. Ekstra: Neem ’n algemene vitamienpil.

Die sjerrie-soesji-en-sjokolade-dieet

Werk vir naweke. Maksimum twee dae per week. Onthou: Mik vir ’n uur se oefening, of darem ’n halfuur. Hoe aktiewer jy is, hoe makliker hou die kilogramme jou heupe verby! Dink vooruit en ruil uit: Die konsep is dat jy met jou 3 proteïene, 6 stysels, 3 vrugte en groente en 2 melk rondspeel soos jou dag dit vra. Jy het dus nie ’n eetplan nie maar ’n eetlys waaruit jy kies. Beperk jou tot twee drankies. Maar jy kan onbeperk kry van Woollies se suikervrye gemmerbier en Evian of Valpré. Vet: Bederfkos is hoër in vet. Daarom lys ons nie vet afsonderlik nie. Feit: Muffins, bagels en wafels word met botter gemaak. Botter bo-op is onnodig

1. Jy kan eet wat jy wil, solank jy baie oefen Dit help gewis om te oefen, maar as jy steeds meer kiljoules inneem as wat jou liggaam verbrand, sal jy nie gewig verloor nie – jy sal gelukkig wees as jy net jou gewig kan behou. Raadpleeg ’n dieetkundige sodat sy vir jou kan uitwerk hoeveel kJ jou liggaam per dag verbrand (jou basale metaboliese spoed of BMS), hoeveel jy met oefening verbrand en dan uitwerk hoeveel kJ jy daagliks inneem. Sy kan dan vir jou ’n gebalanseerde dieet uitwerk waarop jy gewig kan verloor en steeds ’n paar plesiertjies gegun word. Wanneer jy minder eet en meer oefen, sal jou negatiewe kJ-balans veroorsaak dat jygewig verloor. Die meeste fratsdiëte is so streng en beperk jou kJ so erg dat jy geen energie het om te oefen nie. Dis kontraproduktief, aangesien jy dan nie net vet verloor nie, maar ook maer liggaamsmassa, wat beteken dat jou BMS afneem. Dit leer jou ook nie om jou lewenstyl, wat die eintlike “bron van die kwaad” is, te verander nie.
2. Ooreet maar soms, want daarna kan jy mos altyd dieet Die gevolg van dié mite is dat mense deur die jare geleidelik gewig aansit, pleks van hul gewig behou wat die regte ding is om te doen. Volgens navorsingsbevindings is een van die groot gesondheidsrisiko’s dat mense vanaf 25 geleidelik gewig aansit. Dis omdat hulle, nadat hulle oor vakansietye so 1-2 kg gewig aangesit het, nie dadelik daarna minder eet totdat hulle hul voor-vakansie gewig bereik het nie. Op dié manier sit hulle jaarliks minstens 4 kg aan, dus 1 kg vir elk van die vier vakansies. Ná drie jaar is hulle al klaar 12 kg swaarder, en dit is op die ou end hoe mense binne tien jaar 40 kg kan aansit – en dan wil hulle dit binne drie maande met ’n fratsdieet afskud. Die geheim om met die jare jou gewig te behou is om (volgens navorsing wat in die VSA gedoen is) elke dag ’n uur lank aktief te wees. Jy mag jouself so nou en dan bederf, maar ek sal voorstel dat jy eerder moet probeer om vakansies jou gewig te behou, of anders hoogstens 1 kg aan te sit en dan minder te eet sodra jy tuiskom totdat jy jou voor-vakansie gewig herwin het. Eers dan kan jy weer “normaal” begin eet. Dit kom maar weer eens op ’n lewenstylverandering neer.
3. Vermy vet, want dit maak vet Dit is so dat vet vetmaak, (slegte vette maak vetter as goeie vette), maar ons het tog goeie vette in ons dieet nodig, vette soos avokado’s, grondboonbotter, neute en olywe. ’n Bietjie hiervan in jou dieet is goed, terwyl bronne van versadigde vette en transvette liefs vermy moet word. Slegte vette is voedsel wat hoog is in versadigde vette en transvette soos die vet aan vleis en vetterige vleis soos ribbetjies,boerewors, droëwors, schnitzel, vleispasteitjies en worsrolle, ook volroom-suiwelprodukte soos volroomkaas, -melk en -jogurt, room,wegneemetes, pakkies skyfies en slap tjips.

Die inligting vir dié dieetmites is verskaf deur Liesbet Delport, geregistreerde dieetkundige en medeskrywer (saam met Gabi Steenkamp) van Eet slim en bly slank.

The post Dieet: die mites en die feite appeared first on rooi rose.