Deur Karlien Meiring. 

Meer as 100 000 follikels bestaan op die kopvel, saam met sweet en talgkliere wat daagliks olie en sebum afskei – en dit alles kan vasgevang word op die hare met daaglikse borsel, sê Penny James, gesertifiseerde tricholoog en stigter van die internasionale Penny James salon.

As jy soms droë sjampoe, jel of haarsproei gebruik, gaan jou borsels dit versamel. Daardie produkopbou, hare en dooie velselle van jou kopvel beland dan in wese terug in jou hare en op jou kopvel as jy nie jou kamme en borsels gereeld skoonmaak nie.

Lees ook: Haarstyle vir fyn hare

Om jou haarborsels behoorlik te week en te was, is belangrik om dit in stand the hou en hul lewensduur te verleng.

Hier is ‘n paar stappe om te volg om jou haarborsels behoorlik te was:

1. Verwyder enige hare in jou haarborsel deur ‘n wyetand-kam te gebruik. Dit sal dit makliker maak om die borselhare skoon te maak.
2. Spoel die haarborsel af onder warm water, maak seker dat enige oortollige hare of produk wat in die borselhare vassit, verwyder word.
3. Vul ‘n wasbak met warm water en ‘n klein hoeveelheid sjampoe of skottelgoedseep. Vir ekstra skoonmaakkrag kan jy 1 tot 2 teelepels koeksoda byvoeg. Roer die water goed.
4. Plaas die haarborsel in die wasbak en laat dit vir ten minste 20 minute week. Dit sal help om enige opgedroogde produk of vuil wat moeilik is om te verwyder, los te maak.
5. Nadat jy dit geweek het, gebruik jou vingers om die borselhare saggies te skrop, sorg dat jy dit nie buig of beskadig nie.
6. Spoel die haarborsel deeglik af onder warm water totdat alle seepskuim verwyder is.
7. Laat die haarborsel heeltemal droog word (die borsel se borselhare moet ondertoe wys) voordat jy dit weer gebruik.

Dit word aanbeveel om jou haarborsels ten minste een keer per maand goed te was, of meer gereeld as jy gereeld produkte op jou hare gebruik.

Lees meer: 10 gewoontes vir gesonde hare

The post Hoe om jou haarborsel behoorlik skoon te maak (en hoekom jy moet!) appeared first on rooi rose.

As jou kankerbehandeling haarverlies veroorsaak, sal jou hare (ook die op jou lyf), twee tot vier weke ná behandeling begin uitval. Dit kan vinnig of geleidelik gebeur en jou kopvel kan ook teer voel. Jy kan niks daaraan doen nie, maar jy kan jou daarop voorberei, en frustrasie en angs daaroor beperk.

Voor jy met terapie begin

Behandel jou hare sagkens

• Moenie jou hare permanent golf, kleur of bleik nie; dit beskadig jou hare. Laat jou hare self droog word en vermy stileertoestelle soos haarysters, krultange en warm rollers.
• Oorweeg dit om jou hare te sny. Kort hare lyk voller as lang hare, en haarverlies wys minder. Dit maak ook die oorgang na geen hare minder angswekkend. As jou hare begin uitval, sal dit minder sigbaar wees wanneer jou hare kort is.

Beplan hoe jy jou kop gaan bedek

• Dit is een aspek waaroor jy beheer het. Besluit of jy ’n pruik gaan dra, ’n serp om jou kop gaan bind, of niks gaan doen nie. Vra jou dokter om vir jou ’n voorskrif vir ’n pruik te gee, want sommige mediese fondse kan help om die koste te dek.

Lees ook: Kanker: Wat om te sê en nie te sê nie

Tydens terapie

• Werk saggies met jou oorblywende hare.
• Gebruik ’n sagte borsel.
• Was jou hare slegs wanneer nodig.
• Gebruik sagte sjampoe wat geen kleur, parfuum of sulfate bevat nie.
• Oorweeg dit om jou hare te skeer as jou kopvel geïrriteerd of seer is. Dit kan jou minder verleë laat voel oor haarverlies. 

Lees ook: Borskanker: 5 dinge wat jy móét weet

As jy geen hare oorhet nie

• Beskerm jou kopvel. Uitermatige hitte of koue kan ’n sensitiewe kopvel irriteer, en met min of geen hare sal jy gouer koud kry. Daarby kan jou kopvel selfs in die winter deur die son gebrand word. Gebruik elke dag sonroom.
• As jy ’n pruik dra, haal dit snags en self deur die dag af sodat jou kopvel kan asemhaal.
• ’n Sy-kussingsloop is sag en gemaklik as jou kopvel teer is.
• As jy jou haarwasroetine mis, probeer Charmain van Schalkwyk, nasionale werkswinkelkoördineerder van Look Good Feel Better (LGFB) se raad: Maseer jou kop met natuurlike olies; dit sal nie net jou kopvel laat beter voel nie, maar kan ook help om ’n gesonde omgewing vir die groei van nuwe hare te skep.
• Was jou kopvel met ’n sagte gesigwas. Vermy produkte vir aknee, dit is te skerp vir ‘n teer  kopvel.

Na terapie

• Wees geduldig, jou nuwe hare sal waarskynlik stadig teruggroei. Dit kan anders as voorheen lyk; dalk krullerig of grys, maar namate ou haarselle herstel, kan dit weer verander.
• Jou eerste nuwe hare sal baie makliker breek. Vermy voorlopig stileerprodukte, hittetoestelle en kleur- en bleikmiddel, tot jou hare behoorlik en sterk uitgegroei het.

Lees ook: Trauma na borskanker: vang dit jou?

The post Hare en kanker-behandeling: Wat jy moet weet appeared first on rooi rose.

Wat is jou top haarwenk, die een belangrike “reël” waarsonder jy nie leef nie?

Dit is uiters belangrik om ’n produk te gebruik wat beskerming bied teen hitte-stilering, veral as dit deel vorm van jou daaglikse roetine. Om in sulke gevalle nie ’n hitte-beskermer vir jou hare te gebruik nie, kan vergelyk word met die effek op jou vel wanneer jy vir drie ure in mid-Desember op die strand baljaar sonder sonblok.

Wat lyk vir jou mooi by ’n vrou met lang hare?

Persoonlik is ek ’n groot aanhanger van die deurmekaar bolla hoog op die kroon – sag en romanties met ’n moeitelose en natuurlike voorkoms.

Wat is die grootste haarfout wat ’n vrou kan maak?

Die meeste vroue verval in die gewoonte om hul hare dadelik met ’n borsel droog te blaas terwyl die hare nog sopnat is. Dit het egter ’n negatiewe effek op die haarskag omdat dit die hare uit hul natuurlike vorm rek, wat veroorsaak dat die hare hul elastisiteit, glans en volume verloor. Die beste stappe om te volg, is om die hare met die vingers tot so 80% droog te blaas en dan eers die borsel nader te trek vir finale stilering.

Wat is jou raad vir vroue met blonde hare?

Met blonde hare is een aspek uiters belangrik – behandeling! Blonde hare is ’n styl wat baie toewyding verg. Dit moet gereeld behandeling word om die hare aan te vul en dan natuurlik is dit bealngrik om ’n produk te gebruik wat sal help dat die kleur nie na ’n geel skakering vervaag nie.

Is daar tuisprodukte wat vroue kan gebruik vir sagter, gesonder hare? 

Vir tuis-gebruik stel ek voor dat jy een keer per week opknapper vervang vir die gebruik van ’n masker. Maskers verhoog die hare se elastisiteit wat die hare sagter, blinker en met meer volume agterlaat.

Wat is die geheim vir ’n tydlose haarstyl?

Ek verkies die natuurlike, moeitelose voorkoms – vir beide mans en vroue. Stilleer-metodes waar meer natuurlike, sagte teksture gebruik word.cDie belangrikste effek van enige haarstyl is dat dit die persoon as geheel moet komplimenteer waar die haarstyl opsigself nie die hoof-aantrekking is nie maar eerder die kroon van ’n alreeds merkwaardige persoon.

Terence Jansen van Vuuren (Foto: Verskaf)

Lees ook: Ons voorbladsterre verklap hul gunsteling-parfuum!

The post Kennerswenke vir gesonde hare appeared first on rooi rose.

Volg die volgende wenke vir wanneer jy besluit om jou hare tuis te kleur:

1. Moet jou hare vir minstens twee dae voor jy dit kleur, nie was nie. Vermy ook enige produkte wat sal keer dat die kleur jou hare binnedring, veral produkte soos haarpoeier en haarwaks.
2. As jou hare langer as skouerlengte is, sal jy twee bokse kleur benodig.
3. Jy kan jou hare of wortels elke 4 tot 6 weke weer kleur.
4. Wend ’n klein bietjie Vaseline om jou haarlyn om te keer dat die kleur jou vel vlek (dit sal ook maklik afvee).
5. Gebruik ’n donker handdoek oor jou skouers om jou klere te beskerm.
6. As jy jou hare gereeld kleur en net jou wortels wil kleur, wend eerste die kleur aan jou wortels en los vir 15 minute – hierdie stap verseker dat jou wortels die kleur eerste absorbeer. Maak oor seker jy werk tot op die wortel-area.
7. Wend hierna die kleur van die mid-lengtes tot die punte van jou hare vir tien minute om te verseker die kleur op die wortels en die kleur op die punte is dieselfde skakering.
8. Nadat jy jou hare gekleur het, kam sagkens met ’n kam deur om seker te maak al die hare is gekleur.
9. Onthou een van die goue reëls van tuiskleur is om nie meer as twee skakerings donkerder of twee skakerings ligter as jou huidige kleur te kies nie.
10. Hou altyd ’n rekord van die kleurskakering wat jy gebruik – knip die kleur se nommer uit of neem sommer ’n foto met jou selfoon sodat jy die skakering vir volgende keer sal onthou.

Nasorg

Onthou: dit is belangrik om ekstra aandag aan jou hare te gee, nadat jy dit gekleur het. Gebruik ’n weeklikse hidrerende haarmasker.

Lees ook: Jy kan jou eie haarmasker maak

The post Tuiskleur-haarwenke appeared first on rooi rose.

Vraag
My hare is taamlik gesond; ek probeer dit goed versorg en gebruik daagliks sjampoe en opknapper. Ek blaas my hare altyd droog en gebruik ’n haaryster. Is dit nodig om ook ’n masker te gebruik, en waarom? En sal julle ’n olie aanbeveel? – Leana Le Roux

Lees ook: 13 haarwasfoute wat jy maak

Antwoord
Die verskil tussen ’n haarmasker en ’n opknapper is dat ’n masker meer voedingswaarde het en swaarder is as ’n alledaagse opknapper. Jy hoef dit slegs een tot twee keer per week te gebruik (of elke vier tot vyf wasse). Wees versigtig vir olie-behandelings, tensy jy dit by ’n salon laat doen of koop. As jou hare in ’n baie goeie toestand is, kan jy eers die masker los, maar produkte wat jou hare teen hitte beskerm is baie belangrik vir jou. Die daaglikse gebruik van ’n haaryster kan baie skade aanrig, indien jy nie jou hare teen die hitte beskerm nie.

*Steven Phillips is ’n haarstilis en eienaar van Absolut Hair, Claremont, Kaapstad.

Lees ook: 10 gewoontes vir gesonde hare

Lees ook: Jy kan jou eie haarmasker maak

The post Wanneer om ’n haarmasker te gebruik appeared first on rooi rose.

1. Sjampoe jou hare twee keer

Die eerste was verwyder natuurlike olie of die opbou van produkte op jou kopvel. Die tweede was reinig jou kopvel en verbeter die gesondheid daarvan.
– Stacy Shea, hoofopleidingsbeampte, Easihair Pro

2. Druk ná ’n was die oortollige water uit jou hare en vat jou hare agter bymekaar asof jy ’n bokstert maak
Smeer opknapper slegs aan die bokstertgedeelte om te verseker dat die produk net op die mid-lengte en punte van jou hare is en nie op jou kopvel waar dit jou hare olierig kan maak nie.
– Stacy Shea, Easihair Pro

3. Knip ’n kuif
’n Kuif laat almal jou lyk, of dit nou oor jou voorkop of kant toe gekam word. Dit trek dadelik die aandag van jou nek af en plaas die fokus op jou oë.
– Shelene Shaer, Tanaz Hair, JHb

4. Net genoeg hitte
Alle stileerprodukte wat volheid gee, benodig hitte om die produk te aktiveer. Dit gaan nie help om die produk aan te wend en die hare natuurlik te laat droog word nie. As jy nie jou hele kop wil droogblaas nie, fokus die warm lug dan net op die haarwortels waar jy volheid nodig het en laat die res natuurlik droog word. Kérastase se Ferme Fatale Blowdry Gel (R315, by uitgesoekte salonne) is wonderlik vir volheid wanneer jy jou hare droogblaas.
– Ria Gyapersad, Glampalm Hair 

5. Droog jou hare af
Druk altyd ná ’n was oortollige water uit jou hare voor jy dit droogblaas. Dit sal baie vinniger gaan en jou hare sal baie minder hitte-skade oorhou.
– Die span by Stylebar, Kaapstad

6. Skep volheid
Jy skep meer volheid wanneer jy jou kop onderstebo hou terwyl jy jou hare droogblaas. Draai die hare bo-op jou kop in met ’n paar Velcro-krullers terwyl jou hare koud word.
– Die span by Stylebar, Kaapstad

7. Gebruik jou haardroër reg
Moet nooit die haardroër se punt (nozzle) direk teen jou hare en borsel hou nie. Hou dit minstens 10 cm weg, anders kan jou hare en die borsel beskadig word.
– Sean Cox, Swept Salon, Morningside, Johannesburg

8. Beweeg ondertoe
Hou die punt van jou haardroër in ’n afwaartse rigting – dit sal jou haarvliesies seël en gladder laat lyk.
– Sean Cox, Swept Salon, Morningside, Johannesburg

9. Beskerm jou kopvel
Wanneer jou kopvel gesond is, sal jou hare baie beter groei. Pas die beginsels vir die versorging van jou gesig ook op jou kopvel toe. Vestig ’n kopvel-roetine: reinig, skilfer af en bevog.
– Steven Turpin, Opleidingsbeampte -kreatiewe ontwerp, Moroccanoil

10. Gebruik ’n aanvulling
Wanneer jy ’n swak haarsnit vinniger wil laat uitgroei of net jou hare se toestand wil verbeter, drink ’n Biotin-aanvulling. Dit verskaf die nodige vitamiene om jou hare (en naels) sterk te maak en vinnig te laat groei. Dit is ook wonderlik vir vroue wat ná geboorte baie hare verloor het, en dit is veilig om tydens borsvoeding te gebruik.
– Ria Gyapersad, Glampalm

The post Ons 10 beste haarwenke appeared first on rooi rose.

By die onlangse 2016 MuchMusic Video Awards in Toronto, Kanada het supermodel en aanbieder van die toekenningsgeleentheid, Gigi Hadid, nie met een nie, maar 4 verskillende haastyle op een aand gespog! Sy het ook ses verskillende uitrustings aangehad, maar wie kan dit nou bekostig! Dis baie goedkoper om verskillende haarstyle sommer self in die badkamer te doen.

Voorkoms 1: Die lae vlegsel vir jou aankoms

’n Middelpaadjie en lae vlegsel is nie net vreeslik trendy nie, maar ook ’n goeie voorkoms om die aand mee te begin. Dit is klassiek en lyk nie asof jy te hard probeer het nie. Van hier kan jy jou volgende style skep (dis nou te sê as jy verskillende style wil hê).

Foto: Stacey Newman/Greatstock/Shutterstock

Voorkoms 2: Die hoë bolla, elegant vir foto’s

Die lae vlegsel het verander in ’n hoë gevlegde bolla. Haal jou vlegsel uit, maak ’n hoë poniestert, vleg jou hare, bind ’n rekkie aan die eindpunt, draai om die rekkie op jou kop, steek vas en … voila! voorkoms nommer 2. Jy kan ook ’n bietjie jel aanwend om wegvlieghaartjies te tem.

Foto: Brian Patterson/Greatstock/Shutterstock

Voorkoms 3: Die hoë vlegsel, vir nuwe energie as die dansery lekker lewe kry

Die knippies is uitgehaal en die partytjie is reg om te begin.

Foto: Brian Patterson/Greatstock/Shutterstock

Voorkoms 4: Die lae poniestert

Ideaal vir die “afterparty” waar jy minder gedoen wil lyk. Maak alles los en bind jou hare in ’n lae ponie, reg vir ’n meer informele voorkoms.

Foto: Gallo Images/Getty Images

Hierdie haarstyle is almal so mooi dat jy ook net een kan kies; elkeen van hulle sal mooi lyk as jou enigste haarstyl.

Pak dit in jou handsakkie as jy jou style wil verander

#rooirosewenk

’n Vlegsel werk nie so goed op silwerskoon hare nie, want skoon hare is baie glad en glip as jy dit vleg. Was jou hare die aand voor die tyd en spuit ’n bietjie droë sjampoe die volgende dag op, nie net om jou hare te verfris nie, maar ook om dit ’n bietjie taai te maak sodat jy makliker kan vlieg.

Ons sê probeer Girlz Only se droë sjampoe,  R45 Dis-chem

The post Matriekafskeid: Inspirasie vir jou hare appeared first on rooi rose.

Babyliss Twist Secret

Die nuwe Babyliss Twist Secret is wonderlik as jy van die nuwe vlegselvoorkoms hou. Die toestel maak “twists” deur eers twee stukkies hare boontoe te draai en dan die twee stukkies om mekaar te draai.

Babyliss Twist Secret (R399 Clicks)

Stap 1

Verdeel eerstens jou hare in twee gedeeltes wat jy wil vleg of twist. Bo-aan die Twist Secret is twee tweezer locks. Druk eenvoudig elke kant boontoe en plaas ’n klein gedeelte van jou haarpunte in aan elke kant.

Stap 2

Daar is twee stellings op die Twist Secret, die eerste knoppie draai elke gedeelte van die twee gedeeltes eers in een rigting.

Stap 3

Die volgende knoppie draai nou hierdie twee gedeeltes saam in die ander rigting en vorm dan jou vlegsel of twist.

Ons het die tegniek onlangs tydens ’n fotosessie op ons model getoets.

Video deur Corné Greeff

Verskillende haarstyle met die Babyliss Twist Secret

Ons het dit ook getoets …

Toni & Guy Extreme Volume Salon Hot Rollers

Toni & Guy Extreme Volume Salon Hot Rollers (R499, Clicks)

Warm krullers is wonderlik vir volume en hierdie krullers het dit beslis gegee. Die stel bevat 10 rollers, wat waarskynlik te min sal wees om dit vir al jou hare te gebruik, veral as jy baie hare het.

Voor en Na

Voor jy begin: maak seker jou hare is kurkdroog, skakel die krullers aan en wag so 2 minute.

Kyk ook die Toni & Guy-video:

The post Ons toets: nuwe “gadgets” vir jou hare appeared first on rooi rose.