’n Klassieke liefdesverhaal 

Nico en Christi Panagio vier hierdie liefdesmaand 25 jaar van saamwees. Hoewel hy binnekort in Semi-soeter, die opvolg van Semi-soet, te sien is, is dit hulle eie mooi storie wat ’n vyfster-resensie verdien.   

Wen ’n matriekafskeidrok!

Wil jy op jou mooiste op jou matriekafskeid lyk? Skryf dan in om jou droomontwerp ’n werklikheid saam met ontwerper Diaan Daniels te maak.

Ons loer in by: Marciel Hopkins, Hykie en Gerridene Berg, en Eden Classens

Haar loopbaan het haar wildste verwagtinge oortref, en al het sy vele ysters in die vuur, hoop Marciel dat sy in die nabye toekoms ook die vreugde van ma-wees kan ervaar

Dié kool is die sous werd     

As dit jou doelwit is om vanjaar gesonder te eet en jou gewig beter te bestuur, is stylselvrye groente soos die koolfamilie jou beste metgesel.

Klop aan by die kenners

Drie kenners in die skoonheids- en stylbedryf, onder andere Hannon Bothma en ons skoonheidsredakteur, gee elke maand raad en wenke oor hoe om op jou mooiste te lyk.

Fyntjies en fraai

’n Maklike maar interessante steekpatroon vir ’n babakombers.

Pienk en pragtig!

Dis mooi, maar gelukkig nie te mooi om te eet nie. Probeer hierdie soet bederfies vir Valentynsdag!

Help! Angs maak ons siek

Ons almal is nou en dan angstig, maar meer en meer mense se angs raak vandag buite beheer en lei tot versteurings.  Wat kan jy aan jou angs doen?

Wat op aarde gaan aan met die weer? 

Daar was ’n tyd toe ons relatief seker was wat ons klimaatsgewys van seisoene in Suid-Afrika kon verwag. Nou het dinge verander, want klimaatsverandering se impak word ook in ons land gevoel. En dis nog net die begin.

Lekker lees

Ons loer na boeke oor verskillende soort verhoudings en gesels met die skrywer en akteur Susan Coetzer.   

Lees ook: Jaci en JP is terug! Netflix word Semi-Soeter met nog Afrikaanse kykstof

The post 10 redes waarom jy die Februarie-uitgawe van rooi rose móét lees! appeared first on rooi rose.

Die bekroonde akteur, entrepreneur en skrywer Hykie Berg se jongste boek, Geroep vir meer – Hoe om suksesvol te leef, is nou op die rakke. 

Die boek is geïnspireer deur alles wat Hykie, wat sy stormagtige geskiedenis met mense deel, die afgelope twee dekades oor die idee van sukses geleer het en hoe om dit te bereik.

“Die dag toe ek besluit het om persoonlike verantwoordelikheid vir my lewe te neem, was die dag wat my lewe verander het. Ek het besef ek is nie magteloos nie, maar dat ek die vermoë het om my eie toekoms te bou. Net só het elke mens daardie vermoë,” verduidelik hy. “Ons is nie slagoffers van ons omstandighede nie, ons is die argitekte daarvan.” 

“Ons moet net ons denkwyse en perspektief oor die lewe verander. Elkeen van ons is geroep vir meer as wat ons besef of dink. Almal sukkel met beperkende gedagtes, maar jy is waar jy is as gevolg van die storie wat jy jouself vertel. As jy die storie verander, sal jou lewe ook verander.” 

Volgens Hykie is Geroep vir meer – Hoe om suksesvol te leef geskryf vir dié “wat bereid is om uiteindelik ’n kans te waag, God met totale toewyding te vertrou en in geloof die rigting van hul lewenskoers te verander. Dit is geskryf vir elkeen wat weer hoop wil hê en werklik suksesvol wil lewe. Dis vir diegene wat bereid is om aksie te neem, uit hul gemaksone te tree en hul vrese in die gesig te staar.” 

Hykie spreek gereeld gehore toe en is elke keer verstom hoe min mense werklik doelgerig lewe. “So baie mense het geen visie vir hul lewe nie en sal dus nooit hul volle potensiaal bereik nie. Hulle weet nie wat hulle uit die lewe wil hê nie. Hulle weet nie waarheen hulle op pad is nie. Hulle het ophou droom en het geen doel, plan of eindbestemming nie. Maar daar is ’n beloofde land vir elkeen van ons, die droom wat God oor ons lewe het. Hy het vir elkeen van ons gawes, talente en verhoudinge gegee wat wag om ontgin te word. Elke mens het dus die vermoë om ’n veelvlakkige droom vir hul lewe te skep én dit ’n werklikheid te maak,” vertel hy. 

Sy nuwe boek vorm deel van Hykie en sy vrou, Gerridene, se visie om in die volgende vyf jaar 100 nuwe miljoenêrs te skep en 100 gesinne weer saam te bring deur pa’s en ma’s toe te laat om die rotresies te ontsnap. 

Hykie en sy vrou, Gerridene (Foto: Verskaf)

“Om ’n buitengewone impak te maak en ’n lewe van ware betekenis te lei vat meer as net passie en verbeelding om tot vervulling te kom. Ek hoop dat my boek mense sal inspireer om weer te begin droom en opgewonde te raak oor die eindelose moontlikhede wat die lewe bied, om verantwoordelikheid te vat vir hul besluite, en om die krag te ontdek wat binne elkeen van ons lê om ’n impakvolle lewe te leef.” 

Hykie was ook in 2010 die wenner van Survivor Maldives. Sedertdien het hy verskeie suksesvolle projekte aangepak en is vandag nie net ’n bekroonde akteur en TV-aanbieder nie, maar ook ’n internasionale spreker, ’n suksesvolle entrepreneur en ’n topverkoperskrywer. 

Sy eerste boek, My storie van hoop (Ultimate Survivor is die Engelse vertaling hiervan) is gebore toe hy aan Survivor deelgeneem het en tot die besef gekom het dat die Here hom nie in die vermaaklikheidsbedryf geplaas het om ’n Oscar te wen nie, maar om vir hom ’n platform te gee om mense te bedien. Hierdie topverkoper is met die Andrew Murray Desmond Tutu-prys bekroon.    

“My vorige twee boeke het albei oor my uitdagings met my verslawing sowel as my geestesongesteldheid gegaan. Hierdie boek is ’n tipe selfhelpboek met baie van die temas wat ek die laaste 20 jaar geleer het rakende prestasie en die wil om weer op te staan en nie te gaan lê nie. Die boek is opbouend, vol liefde en inspirasie!” 

Karlien Meiring het meer oor Geroep vir meer – Hoe om suksesvol te leef gaan uitvind. 

Wat is die kernboodskap wat jy graag wil hê lesers van hierdie boek moet wegneem? 

Die besef dat ek en jy nie stuck is nie. Ons kan ons lewe op alle vlakke verbeter as ons graag sou wou. En dat dit van kardinale belang is om ’n droom en visie vir jou lewe te hê. Daar’s ’n roeping en ’n plan met jou lewe, jy moet dit net ontdek. 

Hoe het die proses om dit te skryf jou uitgedaag? 

Ek wy twee hoofstukke aan die beginsels van selfdissipline en konsekwentheid wat uiters belangrik in die proses van uiteindelike prestasie is, want selfdissipline is die brug tussen jou begeertes en resultate. Sonder die selfdissipline om konsekwent te wees, kan niemand werklik enigiets noemenswaardig bereik nie. Die skryf van hierdie boek het my selfdissipline en konsekwentheid tot die uiterste beproef, want daar was baie dae wat ek nie wou skryf nie, maar ek moes. Mike Tyson het altyd gesê: “Discipline is doing what you hate to do, but nonetheless doing it like you love it.” 

Wat dink jy is die grootste struikelblok wat mense verhoed om hul droomlewe te leef? 

Meeste mense wil nie deur die ongemak en pyn gaan wat gepaardgaan met die opofferings wat gemaak moet word om hul drome te bereik nie. Daar is ’n prys om te betaal, en daai prys moet eers betaal word voordat die droom ’n werklikheid kan word, en vir meeste mense is dit ’n te groot prys. 

Jy en jou vrou het ’n doelwit gestel om 100 nuwe miljoenêrs in vyf jaar te skep. Hoekom is hierdie missie vir julle so belangrik? 

Een van die groot redes hoekom gesinne uitmekaar val, is as gevolg van ma’s en pa’s wat nie teenwoordige ouers is nie. In baie gevalle is dit omdat die druk en werk van vandag so baie vereis dat hulle nie by die belangrike dinge in die lewe uitkom nie. Wat is dus die antwoord? Die antwoord is die gig-ekonomie en ’n deeltydse onderneming wat passiewe inkomste genereer sodat jy die rotresies kan ontsnap. Dis in hierdie omgewing wat ons mense bemagtig om vir hulle ’n tweede vorm van inkomste te genereer sodat hulle wel weer kan droom en ’n lewe van vryheid kan geniet. 

Watter raad sal jy vir iemand gee wat in die lewe vasgevang voel en nie weet waar om te begin op hul reis na sukses nie? 

Eerstens, ken jou Bybel en bid. Tweedens, figure uit wat jy uit die lewe wil hê. Meeste mense weet nie wat hulle wil hê nie, dus is hulle soos ’n skip sonder seile wat nooit by ’n beplande bestemming gaan uitkom nie. Sodra jy weet wat jy wil hê, gaan kry mense wat het wat jy wil hê, en vra hulle om jou te mentor. Moet nooit raad vra van iemand wat nie het wat jy wil hê nie. En dan laastens, lees soveel as moontlik boeke oor mense wat het wat jy wil hê. Alle leiers en mense wat ongelooflike dinge vermag, is lesers.  

Die boek is landwyd by uitgesoekte boekwinkels beskikbaar en kan ook hier bestel word.

Lees ook: Vyf-vinnige-vrae-Vrydag met ‘Diepe waters’ se twee nuwe gesigte

The post Vyf-vinnige-vrae-Vrydag met Hykie Berg oor sy nuwe boek    appeared first on rooi rose.

Die bekroonde akteur, entrepreneur en skrywer Hykie Berg se nuutste boek, Geroep vir meer – Hoe om suksesvol te  leef, is eersdaags beskikbaar.

Die boek is geïnspireer deur alles wat Hykie – wat sonder skaamte sy stormagtige geskiedenis met mense deel – die afgelope twee dekades oor die konsep van sukses geleer het en hoe om dit te bereik. 

“Die dag toe ek besluit het om persoonlike verantwoordelikheid vir my hele lewe te neem was die dag wat my lewe verander het. Ek het besef ek is nie meer ’n slagoffer en magteloos nie, maar dat ek die vermoë het om my lewe te kies en my eie toekoms te bou. Net só het elke mens daardie vermoë,” verduidelik hy. “Ons is nie slagoffers van ons omstandighede nie, ons is die argiktekte daarvan.”

“Ons is nie vasgevang nie, ons moet net ons mentaliteit en perspektief oor die lewe verander. Elkeen van ons is geroep vir meer as wat ons besef of dink. Almal sukkel met beperkende gedagtes, maar jy is waar jy is as gevolg van die storie wat jy jouself vertel. As jy die storie verander, sal jou lewe ook verander. Jy is nie “stuck” nie.”

Volgens Berg is Geroep vir meer – Hoe om suksesvol te  leef geskryf vir dié “wat bereid is om uiteindelik ’n kans te waag, God met totale toewyding te vertrou en in geloof die rigting van hul lewenskoers te verander. Dit is geskryf vir elkeen wat weer hoop wil hê en werklik suksesvol wil lewe. Dis vir diegene wat bereid is om aksie te neem, uit hul gemaksone te tree en hul vrese in die gesig te staar.”

Hy brei uit: “Hierdie boek handel oor die beginsels van ’n suksesvolle en betekenisvolle lewe, die droom wat God oor jou lewe het en die persoonlike verantwoordelikheid wat elkeen van ons aan die dag moet lê om deel te kan hê in die wonderwerk proses van die lewe. Die boek het die potensiaal om jou lewe te verander, indien jy bereid is om die beginsels wat ek bespreek toe te pas. God is lief vir jou en wil hê jy moet floreer, vrug dra, en bo alles sy vrede en liefde ervaar. Die boek handel oor hoe om jou beloofde land in te neem.

“Ongeag jou omstandighede, jou verlede, of die uitdagings wat jy in die gesig staar, wil God jou uitnooi om saam met Hom ’n pad te stap, sodat Hy Homself aan jou kan openbaar en Sy geheime oor jou lewe aan die lig kan bring. Sy droom vir jou lewe is meer boeiend, belangwekkend en opwindend as enige droom wat jy self kan bedink, verbeel of voorstel. Jou wildste drome kom nie naby aan dit wat God vir jou beplan het nie,” vertel hierdie veelsydige man, wat sy Skepper in 2010 tydens die realiteitsprogram Survivor Maldives ontmoet het.

Hykie spreek gereeld gehore toe en is elke keer verstom hoe min mense werklik doelgerig lewe. “So baie mense het geen visie vir hul lewens nie en sal dus nooit hulle volle potensiaal bereik nie. Hulle weet nie wat hulle uit die lewe wil hê nie. Hulle weet nie waarheen hulle op pad is nie. Hulle het ophou droom en het geen doel, plan of eindbestemming nie. Maar daar is ’n beloofde land vir elkeen van ons, die droom wat God oor ons lewens het. Hy het vir elkeen van ons gawes, talente en verhoudinge gegee wat wag om ontgin te word. Elke mens het dus die vermoë om ’n veelvlakkige droom vir hul lewe te skep én dit ’n realiteit te maak.”

Hy voeg by: “God wil vir elkeen van ons Sy beste gee. Hy wil nie hê Sy kinders moet vergaan in skuld, armoede en ellende nie. Ek sê nie God wil hê almal moet miljoenêrs wees nie, maar Sy hart is dat dit goed gaan met elkeen van ons. God sal vir jou meer as genoeg gee om Sy droom oor jou lewe te laat realiseer, sodat jy jou opdrag hier op aarde kan uitvoer en ander ook kan help om hulle opdragte te voltooi.” 

Sy nuwe boek vorm deel van Hykie en sy vrou, Gerridene, se visie om in die volgende vyf jaar 100 nuwe miljoenêrs te skep en 100 gesinne weer saam te bring deur pa’s en ma’s toe te laat om die rotresies te ontsnap.

“Om ’n buitengewone impak te maak en ’n lewe van ware betekenis te lei, vat meer as net passie en verbeelding om tot vervulling te kom. Ek hoop dat my boek mense sal inspireer om weer te begin droom en opgewonde te raak oor die eindelose moontlikhede wat die lewe bied, om verantwoordelikheid te vat vir hul besluite, en om die krag te ontdek wat binne elkeen van ons lê om ’n impakvolle lewe te leef.”

Hykie was ook in 2010 die wenner Survivor Maldives. Sedertien het hy verskeie suksesvolle projekte aangepak en is vandag nie net ’n bekroonde akteur en TV-aanbieder nie, maar ook ’n internasionale spreker, ’n suksesvolle entrepreneur en ’n topverkoper-skrywer.

Sy eerste boek, My Storie van Hoop, Ultimate Survivor (die Engelse vertaling van My Storie van Hoop) is gebore toe hy aan Survivor deelgeneem het en tot die besef gekom het dat die Here hom nie in die vermaaklikheidsbedryf geplaas het om ’n Oscar te wen nie, maar om vir hom ’n platvorm te gee om mense te bedien. Hierdie topverkoper is met die Andrew Murray Desmond Tutu-prys bekroon.   

Hy is ook die ambassadeur van Creative Kidz, ’n skool wat remediërende onderwys en ondersteuning bied aan kinders met leeruitdagings.

Hykie en Gerridene is die trotse ouers van Leméh, asook hulle drie Schnauzers, Rupert, Cupcake en Rori. Hulle woon in Johannesburg. Die paartjie deel ’n passie vir God se Koninkryk, vermaak, entrepreneurskap en mense. Hulle glo ook daar is min dinge in die lewe wat so kragtig is as om genoeg passiewe inkomste te verdien wat jou in staat stel om voltyds te doen wat jy graag sou wou en het saam ’n enorme passie om mense te leer hoe om uiteindelik ook voltyds in hul roeping te kan leef en by hul drome en doelwitte uit te kom. Hulle visie is om in die volgende vyf jaar 100 nuwe miljoenêrs te skep en 100 gesinne weer saam te bring deur pa’s en/of ma’s toe te laat om die rotresies te ontsnap.  

Hykie het in Pretoria grootgeword en het aan Hoërskool Die Wilgers gematrikuleer. Ná skool het hy sy graad in dramatiese kunste, vermaak en media bestuur aan Stellenbosch Universiteit voltooi. 

Hy is reeds meer as twee dekades lank in die vermaaklikheidsbedryf betrokke en is tans te sien in Binnelanders waar hy die gewilde Dokter Conrad Bester vertolk. Vandag is dit vir hom ’n voorreg om deel te kan wees van die preek-span van Centre Church in Johannesburg, waar hy geestelik verryk word om landswyd te kan bedien.  

Berg is ’n voorstander in die stryd om die stigma teen geestesiekte te verbreek – sy geskiedenis met middelmisbruik is welbekend – en is ’n geakkrediteerde geestelike gesondheidsafrigter.  

As gewilde motiveringspreker spreek hy kwessies soos prestasie, beperkende gedagtes, leierskap, en die beginsels van ’n suksesvolle lewe aan. Dit is vir hom ’n voorreg en ’n seën om ander te kan help en hy bedien ook graag by rehabilitasiesentrums. 

Wanneer hy nie besig is met werk nie, spandeer hy tyd saam met sy gesin en drie honde. Hy is ook gefokus op fiksheid en gesondheid, en vind sy ontspanning in lees en verrykende werkswinkels.  

Lees ook: 10 redes waarom jy die Augustus-uitgawe van rooi rose móét lees!

The post Hykie Berg se inspirerende nuwe boek is binnekort op die rak appeared first on rooi rose.

Die onverskrokke reis- en leefstylinhoudskepper Iana Strydom (wat onlangs aan kykNET se werklikheidsreeks Die Brug deelgeneem het) daag in tien episodes, tien van Suid-Afrika se mees geliefde bekendes uit om tien adrenalienbelaaide buitelugaktiwiteite aan te durf. Schalk Bezuidenhout gaan ’n reksprong doen, Leah moet oor die klowe van die Grabouw-berge zipline, Hykie Berg spring uit ’n vliegtuig uit, Refentse jaag om ’n renbaan, en meer.

Hierdie is Iana se tweede keer as TV-aanbieder. Sy het in 2022 Spoor Stories, ’n reisprogram wat op die Kaapstadse spoornetwerk afgespeel het, op SABC2 aangebied.

“Ek het onmiddellik besef dat dit iets is wat ek meer wil doen. Soos ek meer aan die TV-wêreld blootgestel was, het Die Uitdaging se konsep in my kop rondgemaal, maar ek het dit ’n jaar lank nie met iemand gedeel nie. Toe ek aan die begin van 2023 die idee met my vriendin Charlize Herman (mede-eienaar van Ten Seconds-produksiehuis) gedeel het, het hulle ingestem om die program te vervaardig. Die projek was absoluut ’n spanpoging!”

Lees ook: Vyf-vinnige-vrae-Vrydag met avonturier en inhoudskepper Iana Strydom

Volgens Iana was die inspirasie agter die maak van die program om Suid-Afrikaners se lus vir avontuur aan te wakker en met behulp van ’n paar brawe bekendes, kykers te inspireer om hul eie uitdagings aan te pak, grense te verskuif en vrese te oorkom.

“Ons almal het drome en ’n lysie van alles wat ons graag eendag wil voltooi. Die Uitdaging steek weer daardie vlam van inspirasie aan en motiveer kykers om buite hul gemaksone te tree en nie toe te laat dat vrees jou terughou nie,” sê sy.

Iana vertel dat die valskermspring en die reksprong vir haar die grootste uitdagings was. Sy beskou veral die Bloukransbrug-reksprong saam met Schalk Bezuidenhoudt as onvergeetlik – vir verskeie redes.

“Ek wil nie te veel verklap en die episode spoil nie, maar maak seker julle skakel in. Ek het so gelag dat ek amper my broek nat gemaak het!”

“Op ’n dieper vlak was die grootste uitdaging wat ek al in die gesig gestaar het om myself te aanvaar vir wie ek is,” vertel sy.

“Ek dink ’n klomp vroue het al so gevoel. Ek was op ’n tyd baie krities op my voorkoms en hiperbewus van my gewig – tot op ’n punt wat dit ongesond was. Met die genade van Bo en my ma se ondersteuning het ek drastiese veranderinge gemaak om ’n gesonder leefstyl te handhaaf.”

Bekendes vertel

Die program is nie net ’n bron van vermaak nie, maar ook ’n verkenning van veerkragtigheid, vasberadenheid en die pad wat bekendes al gestap het. Elke bekende vertel ook meer oor die persoonlike uitdagings wat hulle al moes oorwin.

“Ek hoop hierdie inhoud leef vir altyd voort sodat ek my dogter kan wys dat ek dit gedoen het. Ek wil hê sy moet ’n dapper lewe lei, ek wil hê sy moet risiko’s neem. Die lewe het my geleer jy moet jou vrese in die gesig staar,” vertel die akteur Hykie Berg in die eerste episode van die reeks wanneer hy openhartig oor verslawing en sy broer se onlangse heengaan praat.

“Ja, ek is bang vir dinge, maar ek doen dit in elk geval. Jy maak nie herinneringe terwyl jy op die rusbank sit en TV kyk nie,” sê Francois van Coke, oomblikke voordat hy ’n massiewe haai in die Gansbaai-waters in die gesig staar.

“Ek kan ’n groter impak met my musiek maak as wat ek ooit as die president van Suid-Afrika kon maak,” sê sanger Refentse met ’n groot glimlag terwyl hy kykers vertel van sy kindertyddroom om president te word. “Musiek bring mense bymekaar, dit verenig. Ek was nog altyd op die grens van tale en kulture, en dit was my uiteindelike uitdaging en eer,” sê hy terwyl hy oor sy ervaring as ’n swart, Afrikaanse sanger van Vereeniging gesels.

“Ons is opgewonde om die program aan ons gehoor bekend te stel,” sê Azelia Morkel, VIA TV se kanaalhoof. “Hierdie program is ’n unieke samesmelting van avontuur, reis en vermaak. Dit toets alles wat ek bang is om te doen, maar graag na wil kyk!”

KYK: Die Uitdaging se lokprent

Die reeks wys vanaf Donderdag, 11 Januarie om 20:30 op VIA TV (Dstv-kanaal 147)

Deur Karlien Meiring

Lees ook: Blink, bont en besonders by die 81ste Golden Globes

The post Brawe bekendes oorwin vrese in VIA TV se ‘Die Uitdaging’ appeared first on rooi rose.

Verskeie bekendes vertolk hoofrolle in dié reeks en kykers kan ook uitsien om ander gunstelinge, soos Zetske van Pletzen en Amalia Uys, op ’n nuwe stel te sien.

Ons het met twee van die hoofakteurs, Hykie Berg en Gustav Gerdener gesels om meer oor hul Bloedbroers-ervaring uit te vind.

1. Vertel ons meer van jou karakter

Hykie
Bennie is ’n dominee se seun wat ook kweekskool toe gegaan het. Hy het ’n goeie hart en wil graag sy mense help maar hy het ’n swak plek vir mag. Die politiek neem later sy lewe oor en hy word ingesluk deur die houvas van die politiek se beheer oor die land en sy mense. Hy sukkel om verantwoordelikheid vir sy dade te neem en eindig op, wel…

Gustav
Ek speel die karakter PG Retief. Ek kom nes die meeste van my ‘Bloedbroers’ uit armoede uit, maar vind geluk in die woord en taal. PG het ’n skrywershart met ’n vurige humeur as dit kom by wat reg en regverdig is.

2. Jou karakter word onderskeidelik in beide sy vroeë twintigs en sestigs uitgebeeld. Hoe was die ervaring om tussen dié twee ouderdomsgroepe dieselfde rol te vertolk?

Hykie
Dit was ’n absolute seën om so ’n karakter te speel. Dit is baie min dat akteurs in ons land ’n rol op TV gaan kry waar hy homself totaal fisies kan transformeer. Natuurlik is daar die ouderdom wat gedurende spel in ag geneem moet word, maar omdat ’n mens só lang reis met die karakter stap, begin jy sy psigiese dimensie baie goed verstaan. Alles is natuurlik uitdagend en daar is baie moeite in die keuse van jou besluite. Dit was tot dusvêr een van my meer gunstelingrolle wat ek vertolk het.

Gustav
Ek dink ons almal het dit beide moeilik en uitdagend gevind. ’n Aspek wat daarmee gehelp het, was beslis die grimering. Die grimering-departement het werklik ongelooflike werk gedoen. Dit was slegs nodig om in die spieël te kyk en jy het stok-oud gevoel. Ons het ook ’n wonderlike klankbord in ons regisseur, Jozua Malherbe, gehad. Hy het ons laat veilig voel met sy spelleiding.

3. Hoe het ’n normale dag op stel gelyk?

Hykie
Word wakker, eet, rus, drink koffie… skree, slapies, aaaargh, leer lyne, bid, gee drukkies, luister, speel pop, sê hallo, sê baai, lag, huil, bid, juig en sê dankie. Dol soos jy kan sien, maar vol kleure en wonderlike geure. ’n Magiese spel van kreatiewe wesens. ’n Jol!

Gustav
Lank… deksels lank! Twaalf uurlange dae vir drie maande is geen grap. Maar dit was in dieselfde asem ongelooflik. Mens raak op stel soos ’n familie. Jy spandeer so baie tyd saam dat jy eenvoudig net oor die weg moet kom.

4. Hoe was dit om saam met ander bekendes te werk?

Hykie
Dit is altyd lekker om nuwe mense te ontmoet en die oues weer te herontdek. Ek ken vir Neels en Altus al ’n geruime tyd en dit was wonderlik om hierdie reis saam met hulle te loop. Maar dit gaan tog nie regtig oor om saam met ander bekendes te werk nie, liewer om saam met mense te werk wat jou iets kan leer en almal op stel kon iets van mekaar geleer het.

Gustav
Dit was wonderlik! Hoe meer jy met talentvolle mense werk, hoe beter raak jy. Rolanda speel my vrou en dis ongelooflik om die vloer met haar te deel. Ons het die beste uit mekaar gebring.

5. Wat maak Bloedbroers anders as ander reekse?

Hykie
Daar word baie meer tyd aan alle fasette van die produksie gegee, juis omdat die verhaal in slegs 13 episodes vertel moet word. Daar is ’n definitiewe begin, middel en einde.

Gustav
Ons kry die geleentheid om meer ernstige en relevante kwessies aan te spreek. Ek dink ook nie daar is al iets van sulke grootsheid op ons skerms gesien nie. Ek het ’n idee dit mag mense verras.

6. Die reeks speel tussen 1914 en 1948 af. Hoe het die milieu jou as akteur uitgedaag?

Hykie
Dit is ’n periode-stuk dus moes ons as akteurs die milieu rondom en binne ons met die waarheid vul. Taalgebruik was anders, gebruike was anders, kultuur was anders, maar met ’n bietjie huiswerk en hulp van ander vloei jy deur dit. Jozua en die span het dit vir ons baie maklik gemaak om ons gedurig in die oomblik te hou sodat mens die werklikheid van die oomblikke kan begryp, verstaan en so oordra.

Gustav
Om dit akkuraat uit te beeld, was sekerlik die belangrikste. Daar was ’n ander manier van praat, maar jy kan ook nie te puristies raak nie anders verloor jy jou gehoor. Ons kuns-departement was ook ongelooflik. As jy op stel gestap het, het jy geglo dat jy in tyd teruggegaan het.

7. Hoe het jy vir jou rol voorberei?

Hykie
Dit is altyd so ’n moeilike vraag om te beantwoord, want ek berei met elke rol anders voor. Ek bid, luister, en dan doen ek dit.

Gustav
Opgelees oor die tydperk en my teks vrot gelees. Omdat dit só ’n geskiedkundige projek is kon mens ’n direkte lyn tussen gebeure in daardie tyd en jou karakter trek.

8. Beskryf die reeks in 3 woorde.

Hykie
BERG Versus BERG.

Gustav
Grensverskywend, Groots, Beeldskoon.

9. Verskeie tonele is by plaaslike besienswaardighede soos die Markhams Toring en die Nasionale Kinder Teater geskied. Watter bestemming was jou gunsteling?

Hykie
Die tronk, waar Jopie Fourie tereggestel is. Ek het so twee jaar terug ’n program aangebied “Wie lê Waar” wat gehandel het oor ou bekendes wat oorlede is en waar hulle begrawe is. Jopie Fourie was een van hulle, hy is in die Helde Akker in Pretoria te ruste gelaat. Daardie stukkie geskiedenis lê baie na aan my hart. Die tronk was ’n merkwaardige ervaring. Dit is ook natuurlik daar waar alles begin het.

Gustav
My en Rolanda se huis was die Yukon Mansion in Bezuidenhoudts Vallei. Dit was beslis ’n hoogtepunt. Die huis is perfek in standgehou. Daar het deur die jare mynbase, bendes en ’n magdom ander vreemde mense gewoon. Ons het die voorreg gehad om ’n hele week daar te skiet.

10. Sommige akteurs verkies om nie die projekte waarvan hulle deel was te kyk nie. Sal jy dié reeks volg wanneer dit uitgesaai word?

Hykie
Absoluut! Ek wil kyk hoe die verhaal as geheel vertel word. Ek wil kyk wat ek reg doen en wat ek verkeerd doen. Ek wil aanhou leer, ek wil krediet gee aan wie dit toekom. Ek geniet dit om my vriende in aksie te sien, dit verheug my, dit maak my trots.

Gustav
Ek moet erken ek is nogal so, dit is vreemd om vir jouself te kyk, maar ek sal verseker nie die eerste episode kan misloop nie.

The post Hykie en Gustav gesels oor Bloedbroers appeared first on rooi rose.