Jan Hendrik van der Westhuizen is die eerste Suid-Afrikaner wat in 2016 ’n Michelin-ster ontvang het vir sy restaurant JAN in Nice, Frankryk, waar hy gaste met egte Franse flair en ’n tikkie Suid-Afrikaanse nostalgie bekoor. Sedertdien het JAN daarin geslaag om elke jaar sy ster te behou.

Ouma Wes se pampoenkoekies

Genoeg vir 30

Bestanddele

• 700 g (3 k) gaar fyn gedrukte pampoen
• 275 g (2 k) bruismeel
• 2 eiers
• 5 ml (1 t) sout
• 15 ml (1 e) bakpoeier
• olie vir braai

Karamelsous

• 15 ml (1 e) botter
• 375 ml (1½ k) suiker
• 200 ml melk

Metode

1. Pampoenkoekies: Meng al die bestanddele. Die mengsel moenie te styf wees nie – voeg nog ’n bietjie melk by indien dit te styf is.
2. Verhit ’n bietjie olie in ’n pan en skep ’n eetlepel vol van die mengsel daarin. Braai vir 1 tot 2 min. aan elke kant, of tot goudkleurig.
3. Karamelsous: Smelt die botter en suiker in ’n middelslagkastrol oor lae hitte tot dit begin karamelliseer. Voeg die melk by, terwyl jy roer.
4. Kook tot alles gesmelt is. 5 Sit die pampoenkoekies met die karamelsous voor.

The post Die beste pampoenkoekies appeared first on rooi rose.

Jan Hendrik van der Westhuizen is die eerste Suid-Afrikaner wat in 2016 ’n Michelin-ster ontvang het vir sy restaurant JAN in Nice, Frankryk. Sedertdien het JAN daarin geslaag om elke jaar sy ster te behou. Hy was vandeesweek Rian van Heerden se gas op Laataand by Rian.

Die gesprek het begin toe Rian wou weet wat Jan in Suid-Afrika maak, aangesien hy grotendeels in Frankryk bly. Sy antwoord het Rian heeltemal verras: “Somer in Frankryk en somer in Suid-Afrika is opposites. Dit maak sin as ek ses maande hier is en ses maande daar. Maar ek wil terugkom na my mense toe, my familie, vriende en my restaurante hier.”

Jan het vertel hoe sy pa altyd wou hê hy moet die trekkers op hul plaas bestuur, maar hy het nie daarin belanggestel nie. Sy sussie het daardie gedeelte oorgeneem. Hy het eerder die mielies by die koöperasie in die parkeerarea gaan smous. “Dit het ge-move. Ek het R1 ’n sakkie gekry. My pa het natuurlik R14 gevat, en ek het R1 gekry,” het hy laggend gesê.

Sy inspirasie vir kook kom van sy Ouma Hessie af. Jan het haar vereer deur ’n restaurant genaamd Maria regoor JAN in Nice oop te maak toe sy 92 was. “Sy was nog nooit uit die land gewees nie, en toe vlieg ek haar Nice toe om haar restaurant oop te maak. En sy het net gesit en huil en kyk na haar portret teen die muur,” het Jan vertel en effe emosioneel geraak. 

 

View this post on Instagram

 

A post shared by Jan Hendrik van der Westhuizen (@janhendrikvanderwesthuizen)

Die gesprek het later gedraai na JAN se Michelin-ster, en Rian het opgemerk dat dit seker moeilik moet wees om dit elke jaar te behou.

“Net toe ons die ster gekry het, het ek slaappille begin vat, want ek kon nie slaap nie. Dit is asof iets agter jou staan – jy’s bang vir ’n skaduwee. Elke jaar op 23 Januarie wag jy, en as daardie announcement deurkom en jou naam is nie gelys nie – dit is soos om elke jaar ’n rapport te kry en iemand judge jou konstant, elke dag van jou lewe. En dis nie ligte judge nie, dis soos jou besigheid is klaar. Ek het nou al vrede gemaak daarmee. Ek dink ek het nou al soveel gewys en gedoen saam met my span dat – weet jy wat ? Ek wil dit nou nie curse nie. Ek slaap lekker in die aand sonder enige pille,” het hy geantwoord.

Rian en Jan het daarna entoesiasties gesels oor die verskillende geregte op sy spyskaarte wat deur Suid-Afrikaanse disse geïnspireer is.

Daarna het Rian Jan met sy tweede gas, Deona van Vuuren, verras – die eienaar van Cape to Cuba in Kalkbaai, Kaapstad. Deona het vertel hoe haar restaurant in 1999 die eerste mojito in Suid-Afrika gemaak het. Sy het Kuba besoek en die resep daar gekry. Hulle het gesels oor die laaste gereg wat hulle eendag sou wou eet en hul liefde vir die gasvryheidsbedryf.

Rian se volgende gas is die kos-entrepreneur Ina Paarman, wie se produkte wêreldwyd beskikbaar is.

Laataand by Rian word Dinsdagaande om 21:00 op kykNET (DStv-kanaal 144) uitgesaai en is ook op DStv Stream en Catch Up beskikbaar.

Lees ook: Aktrise Marise Loots wil nes haar Diepe Waters-karakter, Selena ’n verskil maak

The post Jan Hendrik van der Westhuizen op ‘Laataand by Rian’: ‘Ek wil terugkom Suid-Afrika toe’ appeared first on rooi rose.

Lewer: 30 broodstokkies
Moeitevlak: Maklik
Bereidingstyd: 15 min. + 30 min. verkilling
Baktyd: 5 min.

Bestanddele

• 250 g swart olywe, ontpit
• 4 takkies vars roosmaryn, gewas en blaartjies afgestroop
• swartpeper na smaak
• seesout na smaak
• 280 g skilferkorsdeeg

Geklopte miso-botter

• 150 g tuisgemaakte botter (sien bl. 142 van JAN – My Franse Kosverhaal) teen kamertemperatuur
• 10 ml miso-pasta
• swartpeper na smaak
• seesout na smaak

Hierdie heerlike, indrukwekkende broodstokkies is so vinnig om aanmekaar te slaan dat ’n mens dit nie eens werklik ’n resep kan noem nie. Olywe is een van Nice se mees algemene plaaslike produkte; daar is dus ’n groot verskeidenheid beskikbaar. Ons bedien dit graag as versnapering saam met ons broodbord en ’n glas Champagne of Suid-Afrikaanse Méthode Cap Classique. Klein, ontpitte olywe het gewoonlik die mees pikante smaak en is baie lekker saam met die broodstokkies.

Metode

1. Vir die broodstokkies, meng die olywe, roosmaryn, swartpeper en sout in ’n voedselverwerker tot ’n gladde pasta. Plaas hierdie tapenade in ’n spuitsak met ’n medium-grootte spuitkop.
2. Rol die skilferkorsdeeg in ’n vierkant uit, vou dit in die helfte en maak dit weer oop (so maak jy ’n merk in die middel).
3. Spuit tapenade in vertikale lyne op een helfte van die deeg, vanaf die middelmerk na die rand met 3–5 cm tussen elke lyn.
4. Verf die ander helfte van die deeg met water met behulp van ’n deegkwassie, vou bo-oor die gedeelte met die tapenade en druk liggies op die gedeeltes tussen die tapenade-stroke sodat die deeg vasplak. Gebruik jou vingers om die gedeeltes met die tapenade lekker rond te maak.
5. Plaas op ’n skinkbord en vries. Berei intussen die miso-botter.
6. Vir die geklopte miso-botter, plaas die botter en miso-pasta in ’n staanmenger en klop op medium vir 10–15 minute. Skraap die kante van tyd tot tyd tot die botter lig en romerig is. Geur met sout en peper.

Voorverhit die oond tot 200 °C. Haal die deeg uit die yskas en laat staan vir ’n paar minute om effe sag te word. Sny die randjies af en sny die deel dan vertikaal in dun repies tussen die tapenade-stroke. Plaas op ’n bakplaatjie met bakpapier en plaas in die voorverhitte oond vir 5 minute of tot goudbruin. Sit dadelik voor met die geklopte miso-botter.

Hierdie resep kom uit JAN – My Franse Kosverhaal deur Jan Hendrik van der Westhuizen (Struik Lifestyle). Foto’s © Jan Hendrik van der Westhuizen 2016.

The post Olyf-en-roosmaryn-broodstokkies met geklopte miso-botter appeared first on rooi rose.

Lewer: 4–6 porsies
Moeitevlak: Maklik
Bereidingstyd: 1 uur 45 min.
Kooktyd: 45 min.

Bestanddele

Kors
75 g gesoute botter, teen kamertemperatuur
100 g koekmeelblom
50 g amandelmeel
1 eiergeel
fyn seesout

Vulsel
500 g botterskorsie, geskil, ontpit en in blokkies gesny
olyfolie vir besprinkeling
fyn seesout en varsgemaalde swartpeper
3 eiers
20 ml ongesoute botter, gesmelt
100 g amandelmeel
100 g comté-kaas of sterk cheddar, gerasper
’n knippie fyn neutmuskaat
’n knippie fyn wonderpeper
’n knippie fyn komyn
50 g gevlokte amandels

By JAN is Vrydagmiddagete gewoonlik iets geurigs en seisoenaal wat in ’n japtrap berei kan word. Hierdie quiche het nie net ’n wonderlike tekstuur nie, dit het ook ’n heerlike neuterige smaak wat die botterskorsie perfek komplementeer. Ons sit dit graag voor met ’n bietjie crème fraîche en fyngekapte grasuie as ’n bykos saam met ons hoofgeregte gedurende die herfs- en wintermaande.
Metode

Voorverhit die oond tot 180 °C.

Vir die kors, gebruik jou vingers om die botter en meel in ’n groot mengbak te meng. Voeg die eiergeel en sout by en meng tot ’n deeg. Voeg ’n bietjie yswater by as die deeg nie sag genoeg is nie. Bedek met kleefplastiek en plaas in die yskas vir 1 uur.

Vir die vulsel, plaas die botterskorsie-blokkies op ’n bakplaatjie, bedruip met olyfolie en geur met sout en peper. Rooster in die voorverhitte oond vir 15 minute of tot die botterskorsie sag is. Plaas die gaar botterskorsie in ’n voedselverwerker en meng tot ’n gladde puree. Plaas die puree in ’n mengbak en voeg die eiers, gesmelte botter, amandelmeel, kaas en speserye by. Meng goed met ’n houtlepel en geur met sout en peper.

Spuit ’n quiche- of koekpan met kleefwerende kossproei. Rol die deeg uit op ’n werkoppervlak wat liggies met meel bestrooi is, lig die deeg op en plaas dit in die quiche-pan. Druk liggies met jou vingers tot die deeg eweredig versprei is. Knip ’n stuk waspapier en plaas dit in die pan. Vul met rou rys of bone en bak blind in die voorverhitte oond vir 10–15 minute tot die kors goudbruin is. Haal die rys uit en laat afkoel. Vul die kors met die botterskorsie-en-eiermengsel en bak teen 180 °C vir sowat 45 minute. Sprinkel die gevlokte amandels oor die quiche net voor jy dit uit die oond haal. Sit warm voor.

Wenk: Pampoenspesery maak ’n heerlike geskenk wanneer jy dit vooraf meng en in ’n oulike flessie verpak. Meng 80 ml fyn kaneel, 15 ml fyn gemmer, 15 ml fyn neutmuskaat, 7,5 ml fyn naeltjies, 7,5 ml fyn wonderpeper en verpak.

Klik hier vir Jan-Hendrik se Olyf-en-roosmaryn-broodstokkies met geklopte miso-botter PLUS lees ons onderhoud met dié gesogte Michelin-ster wenner.

The post Botterskorsie-en-amandel-quiche appeared first on rooi rose.

Deur Maryke Roberts. Foto’s: Clifford Roberts

Die inspirasie vir JAN Franschhoek kom uit die TV-program, JAN RSVP, wat op VIA gekyk kon word en wat op Showmax stroom. Die kulinêre ervaring word in ’n historiese kothuis, Veepos, reg in die middel van die Franschhoekvallei se skilderagtige laventellande aangebied. Die aand is ’n perfekte pasmaat van ’n nostalgiese storie met kos en voortreflike wyn, en gaste ervaar die verhaal deur Jan Hendrik se interpretasie van onthoukos uit ons jongdae.

Jan Hendrik vertel dat hy in sy jonger jare altyd by die pragtige huisie in die laventellande by La Motte – wat van die pad sigbaar is – verbygery het. “Ek onthou ek het altyd gewonder hoekom dit nie ’n super eksklusiewe eetplek is nie. En hier is ons deur nou oop vir die kulinêre nuuskieriges.”

Hy beskou hierdie nuutste avontuur as ’n huldeblyk aan sy vroeë jare in die wynlande, toe hy besig was om sy vaardighede te slyp en die skoonheid van die omgewing te ontdek.

“My jare in die wynlande het so ‘n groot deel van my kulinêre en ontwerpopleiding gevorm dat ek nog altyd wou terugkom vir meer. Ek dink dit is soos om ‘n goeie wyn te drink. As jy eers ’n proe gehad het, wil jy aanhou om dit te geniet.”

Gaste arriveer by die historiese La Motte herehuis vir ’n glas vonkelwyn en word dan na die klein Veepos oorkant die pad vervoer. Die geboutjie is horingoud en met gedroogte kruie wat uit die dak hang, moerkoffie wat op die oop vuurherd prut en ou sepiafoto’s, kan jy jou verbeel dis op oupa en ouma se plaas donkiejare gelede.

Daar word hande in ’n waskom en beker gewas, voor die spys en drank bedien word. Daar is net een langtafel wat 16 gaste kan huisves en almal kuier oor en weer, soos in die ou dae, vertel Jan Hendrik.

JAN Franschhoek neem gaste op ’n sensoriese reis wat bestaan uit bestanddele wat deur die berg en rivier geïnspireer is. Voor elke gang verduidelik een van die sjefspan wat die beduidenis van die dis is en met watter wyn dit geniet gaan word. Wanneer Jan Hendrik nie self in die land kuier nie, word die nostalgiereis voortgesit onder leiding van JAN Groep se uitvoerende sjef, Antro Davel en hoofsjef Anzette Klynhans.

Die maaltyd wat ten tyde van ons besoek bedien is, het onder meer biltong Lamingtons, ’n braaibroodjie makrolletjie en bobotie jaffel choux as verwelkomingshappie met ’n glas Vin de Joie Rosé 2018; daarna forel-en-komkommer somerslaai met Pierneef Sauvignon blanc 2022; koolstoof roosterbrood consommé met koue botter en baba mosbolletjies met La Motte Chardonnay 2020; gevriesde appel, tête de moine, Bergrivier tilapia met skelvis-melk velouté met die JAN White Blend; kookkos met die Pierneef Syrah Viognier 2019; en pap brandsel, kaas en konfyt met die JAN Red Blend ingesluit.

Die tameletjie meringue is met Boekenhoutskloof Noble Late Harvest Semillon bedien. Diegene wat nog plek gehad het, kon moerkoffie en mignardises geniet.

Die wyne van La Motte sluit die Vin de Joie Rosé 2018 en die La Motte Chardonnay 2020 in. Die Boekenhoutskloof Noble Late Harvest Semillon word saam met die nagereg bedien.

Jan Hendrik se restaurante sluit ook twee kulinêre afsetpunte in, die JAN Innovation Studio in Kaapstad en Klein JAN by Tswalu en Restaurant JAN in Nice, Frankryk.

Lees ook: Nuwe enkelmout whisky voltooi sirkel vir Nels

The post JAN se nostalgiereis in die Franschhoek laventellande appeared first on rooi rose.

Dis nie aldag dat ’n Suid-Afrikaner daarin slaag om die Franse kos-snobs te wys waar Dawid die wortels gegrawe het nie, maar dis presies wat ’n boerklong van Mpumalanga, Jan-Hendrik van Westhuizen (33), pas gedoen het.

Sy restaurant, JAN, in Nice, Frankryk, is onlangs met ’n gesogte Michelin-ster bekroon. Dis die eerste keer dat dié groot eer ’n Suid-Afrikaanse sjef in die hele Europa en Asië te beurt val.

Jan-Hendrik, ’n kunstenaar en opgeleide fotograaf, se tweede kosboek, JAN, A Breath of French Air, het onlangs verskyn. Die restaurant was ook in Januarie vanjaar (2016) op die gesogte Condé Nast-lys van die 18 beste restaurante ter wêreld.

‘Ons gesin is maar ’n bietjie vreemd – my sussie boer steeds saam met my pa, en ek het by my ma leer troukoeke versier’

Vertel ons van jou kinderjare
Ons het op my ouma en oupa se plaas naby Middelburg, Mpumalanga, gewoon. Op laerskool was ek in ’n plaasskooltjie, en daar het ek die onderwysers omgekoop met koek wat ek gebak het. (Lag.) Toe ek hoërskool toe is, is hotel- en spyseniering pas as vak by skole ingestel, en ek was só opgewonde om die vak te kon neem. Maar ek en my ma, Hessie, het dit vir my pa, Boet, geheim gehou tot ek in graad tien was – hy het gedink ek neem wetenskap en aardrykskunde! Ons gesin is maar ’n bietjie vreemd – my sussie boer steeds saam met my pa, en ek het by my ma leer troukoeke versier. Ons het ook ’n laatlam-boetie. My ouers het ’n pragtige wildsplaas naby Loskopdam met die naam Meloti Valley. My ma doen daar spyseniering vir troues en gesellighede. My ouma en oupa bly ook daar.

Hoe het jou pad met kos geloop?
Ná skool het ek by Zevenwacht buite Stellenbosch se sjefskool ingeskryf. Daar het ek begin belang stel in fotografie, en naweke troues afgeneem. Daarna het ek in Zevenwacht se wynkelder en bemarkingsdepartement gewerk. Ek het dus ook ’n goeie kennis van wyn. Toe het ’n graad in toegepaste ontwerp aan die Stellenbosch Academy of Design and Photography behaal, waar ek in fotografie gespesialiseer het. Ek het later vryskutwerk vir die Suid-Afrikaanse Elle gedoen, en danksy Jackie Burger, die destydse redakteur, die kans gekry om Parys toe te gaan. Jackie is my fairy godmother! In Parys was die kostydskrif Elle à Table my basis van waar ek vir internasionale tydskrifte kosartikels gedoen het. Parys het my hart gesteel, maar toe ek een naweek na die suide van Frankryk is, het ek dadelik op die atmosfeer verlief geraak. Daar was ek twee jaar lank die persoonlike sjef vir ’n Sweedse paartjie. Die idee vir ’n eetplekkie waar ek my liefdeskos kan bedien, het daar ontstaan. JAN het in Augustus 2013 in die ou hawe van Nice sy deure oopgemaak.

Was dit nie aanvanklik intimiderend om vir die Franse te kook nie?
Hoewel hulle die wêreld se grootste kosnasie is, het ek gevoel ek hoef nie regtig terug te staan nie. Ek het nog altyd miskien ’n bietjie te veel selfvertroue gehad. Maar daar was nie tyd om te dink of dit intimiderend is of nie. Daar moes soveel goed tegelykertyd gebeur dat ek in survival mode gegaan het. Ek het soms daaraan gedink om tou op te gooi. Ons moes ’n paar resepte verander om die Franse palet te pas. Hulle hou byvoorbeeld nie van kaneel of enigiets met te veel byt nie. Maar deesdae draai ons hulle om ons pinkie! Mense kom spesiaal JAN toe om iets nuuts te probeer.

Slaphakskeentjies, beestong met my ouma se mosterdsous, beskuit en malvapoeding is ons wenners! En natuurlik Japie se gunsteling en bobotie!

Vertel ons meer van JAN
Toe ek en my vennoot, Pascal Szafanski, destyds die perseel in die ou hawe gehuur het, was dit baie goedkoop en daar was seker net twee ander restaurante in die straat. Vandag is daar minstens tien restaurante en kroeë en almal noem die gebied die Marais van Nice. JAN het plek vir 28 gaste. Ons bedien vyf aandetes en twee middagetes per week. My span bestaan uit agt passievolle medespelers! Ek het onlangs drie Suid-Afrikaanse sjefs, Kevin Grobler, Rutger Eysvogel en Scott Armstrong, aangestel. Hulle is my linkerhande en ons deel ’n liefde vir kos. Ons spyskaart verander gereeld en ons speel met nuwe tendense, seisoenale produkte en inspirasie uit die omgewing. Mosbolletjies en biltongbotter is ’n vaste gang, en daar is ander eg Afrikaanse dinge ook, soos rooibospêrels, piesang- en melktertjies en selfs boegoe!

Hoe kry ’n mens ’n Michelin-ster?
Michelin word gesien as die Oscars van kos in Europa, Amerika en Asië. Die restaurante word uitgesoek deur ’n paneel beoordelaars en anonieme gaste wat op die kosradar optel dat iets interessants by ’n restaurant aangaan. Niemand weet regtig wat die kriteria is nie, maar dit word as ’n besonderse erkenning beskou. In Nice het net drie van die 1 500 restaurante al ’n ster gekry. Verlede Junie staan ek een aand met ’n mond vol malvapoeding toe ’n Michelin-inspekteur daar instap en sy kaart in my gesig swaai en sê “C’est tout impeccable!” wat beteken “It was all impeccable.” Ek het daardie aand nie ’n oog toegemaak nie, en heeltyd gewonder: wat as … Ná ’n eerste besoek word inspekteurs gestuur, maar jy weet nooit wie hulle is, of wanneer hulle kom nie. Dit kan twee tot selfs ses mense op ’n slag wees.

Die uitdaging is om altyd, heeltyd, alles perfek te doen – van die blomme en die mooi gevoude servette, tot die eetgerei, die diens en selfs die toiletpapier wat mooi gevou is. En natuurlik die kos.

Vertel ons van jou kosboeke?
My eerste boek, The French Affair, Tables of Love, is ’n memoir van my lewe, van my kinderdae op die plaas tot by die Franse Riviera. Daar was soveel mooi en lekker om my dat ek dit net moes deel. Net soos vir my tweede boek, JAN – A Breath of French Air het ek al die foto’s self geneem en gestileer. My tweede boek gaan oor JAN: die kos wat ons inspireer, die geregte wat ons tuis eet, die etes wat ons as personeel voor en ná ’n besige aand eet … Dis ook ’n visuele fees van my daaglikse lewe in Frankryk.

Het jy ’n kosfilosofie?
Kos moet lekker wees, en mooi. En genoeg!

Watter sjefs/kosskrywers bewonder jy?
Anthony Bourdain wat sy kombuisgeheime deel en jou uitdaag om nuwe geregte te probeer is boeiender as ’n Stephen King-boek.

Wat is die lekkerste kos op aarde?
As jy honger is, is enigiets lekker! My gunsteling is ’n eenpot-iets met vleis en ’n lang sous! En ’n hap malvapoeding as dinge dol gaan!

Jou onvergeetlikste koservaring?
’n Hoender-en-ansjovis-toebroodjie op die lekkerste brood wat ek in my lewe geëet het by die Polaine-bakkery se restaurantjie in Parys. Die goeie geselskap en wyn het seker ook ’n rol gespeel.

Bier, wyn, eiers, botter, room, kaas en gepiekelde argurkies is altyd in my yskas

Wat eet ’n beroemde sjef ná ’n besige dag in die restaurant?
Gaan koop my nuwe boek. My tjip-en-biltong-broodjie se resep is daarin.

As jy vyf mense vir ete kan nooi, wie sal dit wees en wat sal jy kook?
My vyf beste vriende. Ons sal snoek braai op die strand en baie rosé drink.

Die man agter die Michelin-ster

• Jan-Hendrik reis baie, maar sê hy sal nie omgee om meer te reis nie. Arniston in die Wes-Kaap is een van sy gunstelingplekke. “Om rooiwyn te drink en truffels te soek in die Piemonte- wyndistrik in Italië is ook onvergeetlik.” Hy het ook al in Monaco gewoon, en woon die afgelope ses jaar in Frankryk.

• Hy leef tussen Parys, Nice en Suid-Afrika. “Al my familie en my ander helfte woon hier. Dis nie maklik nie, maar Suid-Afrika is darem net ’n oornagvlug ver. En ja, ek sal beslis terugkom. Die kosbedryf hier is vir my baie opwindend.”

• Jan-Hendrik bieg dat hy dit vir hom moeilik is om te ontspan. “Maar goeie geselskap en ’n lekker kosstorie is my gunstelingmanier om te ontspan. Ek skilder ook as ek tyd kry.”

• Sy ma en twee oumas, Hessie en Wessie, het albei ’n groot invloed op sy liefde vir kos gehad. “Daar was altyd tafels vol oorvloed vir etes. Vetkoek, pannekoek, koolfrikkadelle, pampoenkoekies, potbrode, plaasbotter … My oumas het my geleer hoe belangrik dit is waar ons kos vandaan kom, om nie te mors nie en om vleis en groente self te verwerk.” Sy ma was ook ’n belangrike kosinvloed. “Haar sjokoladekoek kraai koning, en sy maak die ongelooflikste suurlemoenpoeding.” Sy het hom ook geleer om altyd kos gereed te hê vir onverwagse gaste.

*Ons deel twee van Jan-Hendrik se gesogte resepte uit JAN – My Franse Kosverhaal – Botterskorsie-en-amandel-quiche PLUS Olyf-en-roosmaryn-broodstokkies met geklopte Miso-botter.

The post Jan-Hendrik van der Westhuizen: van plaasseun tot sjef appeared first on rooi rose.

Serves 30

• 700 g (3 c) cooked pumpkin, mashed
• 275 g (2 c) self-raising flour
• 2 eggs
• 5 ml (1 t) salt
• 15 ml (1 tbsp.) baking powder
• oil for frying

1 Mix all the ingredients. The mixture should not be too stiff – add a little milk if it is too stiff.
2 Heat a little oil in a pan and spoon a tablespoon full of the mixture into the oil. Cook for 1 to 2 minutes on each side or until golden.

Caramel sauce

• 15 ml (1 tbsp.) butter
• 375 ml (1½ c) sugar
• 200 ml milk

1 Melt the butter and sugar in a medium-sized pan over low heat until it begins to caramelize. Add the milk, stirring.
2 Cook until everything is melted.
3 Serve the fritters with caramel sauce.

The post Best pumpkin fritters appeared first on rooi rose.