8 wenke vir daardie perfekte denimpaar. Deur Susra Matthee. 

Eerstens is dit belangrik om te onthou dat baie denims gemeet en gepas is op ’n model of mannekyn wat moontlik nie dieselfde liggaamstipe as jy het nie. Moet dus nie moed verloor as jy ewe skielik ’n nommer groter moet oorweeg nie … Op die ou einde gaan dit oor wat vir jóú die gemaklikste sit en die meeste selfvertroue bied.

1. Stel jou grootte vas

Aangesien die middellyf die moeilikste deel van ’n jean is om te verander, moet jy nooit vir daardie gedeelte ’n tussenoplossing vind nie. Baie handelsmerke maak hul nommers volgens die afmetings van ’n middellyf en daarom is dit die beste om jouself vooraf te meet en volgens daardie mates te soek. Sodoende kan jy ’n meer akkurate idee kry van watter jean jou sal pas. Met behulp van ’n buigsame maatband, meet die omvang van jou natuurlike middellyf. Dit is die kleinste deel van jou middel; gewoonlik tussen jou heupbene en onderste ribbes. Rond daardie getal af.

#rrwenk: Onthou, die meeste denims se mates word in duim gemeet en dus is dit makliker as jy jou getal ook na duime toe verwerk.

2. Moenie vaskyk in groottes nie

Om ’n nommer groter of kleiner te gaan beteken nie noodwendig dat jou liggaam verander het nie. Elke handelsmerk het nie presies dieselfde afmetings nie en produksie-afdelings bepaal ook of ’n denim groter of kleiner gaan wees – van die stikwerk tot die hoeveelheid wat dit na die eerste was sal krimp. Materiaal speel ook ’n belangrike rol: party “dikker” materiale, soos vintage-geïnspireerde denim, mag stywer wees en vereis dat jy ’n nommer groter moet kies, waar dit aan die ander kant weer makliker is om jou in ’n rekbare denim in te wikkel.

Lees ook: Sorg so vir jou denims.

3. Toetslopie

Voordat jy op ’n denim besluit, doen ’n toetslopie: staan voor ’n spieël om te sien hoe die jeans van agter lyk. Sit dan op die kleedkamerbank en buig af na jou skoene om te verseker dat daar geen ongemak is nie. Die dele om jou middel en agter jou kniee is veral geneig om ongemaklik te wees in sekere posisies.

4. Kies die silhoeët en kleur wat vir jou die beste werk

Donker jeans wat uitklok skep die illusie van langer bene en kleiner heupe. Indien jou bene jou beste bate is, kan jy ligte jeans oorweeg of jeans met detail op die pype. Probeer altyd ’n verskeidenheid style, waskleure en selfs groottes wanneer jy nuwe jeans aanpas. Jy weet nooit, ’n paar wat nie so mooi aan die hanger lyk nie, kan dalk net die paar vir jou wees.

5. Moenie koop indien jy nie 100% seker is nie

Iets wat jou pla gaan nie weggaan met tyd nie, so moet dus nie skik vir ’n paar waaroor jy nie 100% seker is nie. Een van die ergste mode-sondes is om iets te koop wat ongeraak in jou kas bly hang!

6. Wees oop om iets nuuts te probeer

Speel ’n bietjie rond en eksperimenteer. Dit kan pret wees om iets buite jou gemaksone te probeer. Daar is ook deesdae so baie snitte om van te kies en te keur; jy kan dalk net verras word met hoe goed dit lyk!

Lees ook: Verleng jou swart denim se leeftyd so.

7. As jy twyfel, gaan vir die middel-hoogte opsie

Rolletjies wat bo-oor die heupsoom hang gebeur selfs met die beste van ons, maar dit kan maklik vermy word met ’n hoër middelsnit. Moenie noodwendig ’n groter snit kies as die heupsoom laag is en jou druk nie, dit sal net tot ongemak lei. In plaas daarvan, kyk eerder vir ’n ander styl wat aan jóú vereistes voldoen. Alhoewel ’n snit wat bo jou naeltjie sit jou bene langer laat lyk, is die ekstra materiaal nie altyd gemaklik nie. Dit kan ook ’n borrel in die materiaal maak as jy sit. ’n Middel-hoogte (mid-rise) is die beste opsie vir ’n veilige, vleiende snit.

8. Maak dadelik verstellings

Indien daar klein verstellings gemaak moet word, byvoorbeeld aan die lengte, laat dit sommer dadelik korter maak. By sommige winkels kan jy binne die winkel dit deur ’n kleremaker laat verstel net nadat jy betaal het! Onthou egter om jou verstellings te meet met die skoene waarby jy dit gaan dra. Wye pype wat goed werk saam met hakke moet ongeveer ’n duim van die vloer af val, terwyl noupassende jeans net by of bo die enkelbeen moet sit. Indien jy dit nie wil korter maak nie, is daar verskeie maniere hoe jy dit kan omrol.

Lees ook: Detoks jou klerekas in ’n japtrap

The post 8 wenke vir daardie perfekte denimpaar appeared first on rooi rose.

Deur: Susra Matthee.

Weet jy watter styl romp die beste by jou pas? Terwyl die rompe almal mooi lyk, raai ons jou aan om ’n snit te dra wat jou beste eienskappe vlei en beklemtoon. Byvoorbeeld, skep kurwes met A-lyn-rompe of ’n uurglasfiguur met ’n noupassende snit.

As jy lank is

’n Lang lyf laat jou toe om ’n midiromp saam met sandale of ander plat skoene te dra. Voeg ’n T-hemp en skouersak by vir die perfekte naweekstyl. As jy kort is kan jy ’n verslankende silhoeët skep deur hoë hakke te dra.

As jy fyn gebou is

Indien jy klein en fyn gebou is, kan jy wegkom met ’n miniromp. Gebruik die rompie om jou klein raamwek volume te gee. Dra ’n vintage-geïnspireerde denimromp met ’n kleeftoppie om jou hele lyf af te wys. Maak seker jou romp sit nie reg in die middel van jou bene nie; laat die onderste gedeelte van jou knieë uitsteek om jou bene langer te laat vertoon.

Kurwes

’n Noupassende romp wat net onder jou knieë sit is meer vleiend om kurwes te beklemtoon as ’n korter snit. Dit pas perfek en omvou jou lyf sodat dit jou natuurlike kurwes vlei. Spog met jou uurglasfiguur deur ’n rekbare, noupassende denimromp saam met ’n ingesteekte knopieshemp te dra. Jy kan enige kleur hemp saam met denim dra, maar denim-op-denim is nou hoogmode. Boonop is dit ’n maklike voorkoms vir die kantoor of ’n ete-aspraak.

As jy atleties of reghoekig gebou is

Skep die illusie van kurwes deur ’n A-lyn knopiesromp wat ook jou bene langer laat lyk. Dra dit in die somer met inglipskoene en ’n ingesteekte T-hemp en in die winter met kouse en enkelstewels. Vir ’n minimalistiese styl hou by die klassieke denim-mini met ’n wit knopieshemp.

Lees ook: ’n Lenteregruk vir jou lewe

The post Die vleiendste denimromp vir jou figuur appeared first on rooi rose.

Verleng die lewe van jou gunsteling-jeans deur Susra Matthee en Bea Lingenfelder. Hooffoto: Jota Kena

Ons beantwoord sewe vrae oor die versorging van hierdie ikoniese kledingstuk

Hoe gereeld moet jy jou jeans was?

Denim is ‘n sterk materiaal wat nie elke dag ’n was nodig het nie. Trouens, die enigste manier om regtig die kleur van jou denims te behou, is om dit juis nié gereeld te was nie.

Hoe gereeld moet jou jeans gewas word? Dit hang van die rekbaarheid en die soort denim af. ‘n Goeie rek-denim (met lycra) hou sy vorm vir drie tot vyf dae. Ander jeans (100% katoen en geen lycra) kan nog langer gaan sonder om gewas te word.

Handwas of masjienwas?

Denim-entoesiaste glo die enigste manier om jou jeans te was, is met die hand, maar dit verg baie moeite en harde werk. Nat jeans is baie swaar en dit is moeilik om uit te droog. Nog ’n versigtige, maar meer praktiese manier, is die denim om te dop en die broek dan met koue water en op ‘n stadige siklus in jou wasmasjien te was.

Watter skoonmaakmiddel is die beste?

Sterk skoonmaakmiddels kan jou jeans van kleur laat verander, gebruik liefs ‘n sagter seep om die indigo-blou te bewaar. ‘n Meer natuurlike wasproses is om jou jeans in ‘n koue waterbad te week met ‘n koppie gedistilleerde asyn, of voeg ‘n koppie asyn by jou kouewatersiklus. Dit help om die kleur te behou.

Lees ook: Verleng jou swart denim se leeftyd so

Wat van die droër?

Probeer om die droër te vermy. ’n Droër kan die lycra, kleur en vesel van die jeans ruïneer. Die broek voel dalk harder wanneer jy dit nie in ‘n droër drooggemaak het nie, maar dit is beslis beter vir die lewensduur van jou denim om dit op te hang. Daardie harde gevoel sal wel ná ‘n rukkie se dra weggaan

 Bokknieë, wat nou?

Jeans met pap knieë lyk nie van die beste nie. Hierdie uitgerekte stukkies materiaal word meestal deur beweging veroorsaak. Jeans met lycra is geneig om hul vorm beter te behou. Probeer om nie vir lang tydperke op jou knieë te sit, of te hurk nie – dit is in elk geval sleg vir jou bloedsomloop ook.

Hoe gemaak met blink denims?

Jeans met borduurwerk, stene en selfs pêrels is baie gewild, maar hierdie versierde items het meer sorg nodig. Ons stel voor dat dit met ’n sagte wasmiddel met die hand gewas móét word.

Kan ek die vorm van die broek herstel?

In hierdie geval mag jy maar skelmpies die reëls breek. As jou jeans ‘n bietjie noodhulp nodig het, dop die broek om en sit dit vir sowat tien minute op ’n lae hitte in die droër. Hang dit dan op om verder droog te raak. Nog ‘n truuk: Dop die denim om en hang dit in die badkamer terwyl jy stort. Stoom help om van die kreukels ontslae te raak en die vorm van die broek te herstel.

Hooffoto: Godisable Jacob vir Pexels

Lees ook: 9 modefoute wat jy onbewustelik maak

The post Verleng die lewe van jou gunsteling-jeans appeared first on rooi rose.

Wit is altyd ’n wenner in die warmer maande van die jaar. Daar is iets vars en stylvol omtrent die kleur wat jou van dag tot aand laat voel dit is SOMER. Boonop werk dit goed saam met alles. Deur Susra Matthee. Hooffoto: Twitter Follow @DragonflyAppare

Die wit denim-neiging is egter nie vir sissies nie. Dit is nie ’n praktiese kleur as jy na klein kindertjies moet omsien nie en word dikwels afgekeur as dit kom by ’n verslankende voorkoms. Maar jy kan jy tog soos ’n droom lyk, mits jy dit reg stileer. Indien jy groot heupe of bobene het, dra dit saam met ’n lang, lospassende wit hemp, wat tussen jou heupe en knieë eindig.

Die nuutste is om jou wit denim saam met ’n strooimandjiesak te dra en neem jou só op reis na die Franse Riviera. Vir koeler aande kan jy ’n sy-serpie om jou nek bind of ’n liggebreide trui oor jou skouers gooi.

Lees ook meer oor strooimandjies: jou nuwe somer-gunsteling

Sorg só vir jou wit denim

1. Behandel vlekke dadelik

Smeer ’n vlek saggies met warm water en skoonmaakmiddel. Moenie vryf of te hard druk nie – dit sal die vlek net vererger. Gebruik ’n wit lap sodat jy nie per ongeluk kleur op jou denim oordra nie. Die vlek moet in grootte krimp en onmiddellik in kleur verlig. Dit sal later baie makliker wees om in die was heeltemal te verwyder.

2. Binne na buite

Tussen die spoel- en spinsiklus kan jou wasmasjien ’n swaar tol op jou denim plaas. Om die buitekant te beskerm, asook om te veel wrywing te voorkom, draai jou denims na binne voordat jy dit was.

3. Gebruik warm water vir hardnekkige vlekke

Gebruik koue water as die vlek nie so erg is nie, maar warm water vir wanneer die vlek aansienlik groter is. Dit sal die vlek makliker verwyder. Wees egter versigtig dat die water nie té warm is nie, aangesien hoë temperature denim-materiaal laat krimp.

4. Vermy versag- en bleikmiddels 

Moet nooit ander middels as die oorspronklike wasmiddel en water op wit denims gebruik nie – versag- en bleikmiddels kan jou denim geel maak.

5. Hang op

Die hoë temperatuur van jou droër kan jou denims laat krimp. Hang jou denim eerder op om sy vorm te behou.

The post Dra jou wit denim só appeared first on rooi rose.

Die swart leerbaadjie

Dié sexy item hoort in jou versameling. Jy sal nooit spyt wees as jy in ’n duursame leerbaadjie belê nie. Dra dit in die winter saam met ’n swart denim en in die somer oor ’n rokkie vir daardie kenmerkende stadstyl-voorkoms.

Die wit hemp

Die wit kraaghemp is ’n pasmaat by alles – of dit nou by denims, ’n snyersbroek of patroonromp is. Dit is ook die perfekte item om laag op laag te dra. Knoop dit toe tot bo en verf jou lippe rooi vir ’n sjiek voorkoms. Wees egter versigtig om te veel op hierdie hemp te spandeer, omdat die kleur se leeftyd beperk is. Koop eerder slim en skaf elke tweede seisoen ’n nuwe een aan.

Leerstewels

Die lengte van leerstewels wissel elke jaar, maar die stewel wat altyd op die rakke sal bly, is die perdrystyl. Hierdie item waarborg jou ’n stylvolle voorkoms sonder om ure aan jou uitrusting te beplan. Gaan vir die kenmerkende denim van kop tot tone of wissel dit af met ’n maksirok en baadjie. Onthou om jou leerstewels af en toe te politoer om ’n lang leeftyd te verseker.

Die soldaatjas

Jy kan maar op hierdie snit spandeer, want dit sal nog lank in jou kas hang. Kies een van duursame materiaal – soortgelyk aan die Burberry-jasse. Maak seker die lengte van die jas pas by die lengte van jou lyf. Indien jy kort is, moet jou jas tussen jou heupe en knieë hang, maar ’n langer persoon kan dit met ’n ekstra lang jas ook waag.

Parka

Die parka is perfek vir naweekdrag en jy sal dit elke naweek wíl dra. Kies dus ’n kleur wat by baie van jou ander klere pas, sodat jy dit elke keer ’n ander voorkoms kan gee. Die gewildste is om dit saam met donker denims en wit tekkies te dra.

Kasjmier-trui

’n Kasjmier-trui is een van jou beter beleggings, mits jy mooi daarna kyk. Dit lyk nie net duursaam nie, maar dit voel ook sag teen jou vel en sal jou beslis warm hou. Grys is die perfekte kleur vir ’n crew-nek kasjmiertrui.

Wit tekkies

Wie het ooit gedink wit tekkies sal só gewild wees? Wit is normaalweg ’n gewaagde kleur vir skoene, maar dit skep die perfekte voorkoms vir moeitelose gemakdrag. Dit sal jou donker denim goed uitbalanseer of by jou ligter kleure inskakeer. Daar is ook deesdae baie produkte wat jy kan koop om wit tekkies skoon te hou, asook verskeie wastegnieke wat hulle splinternuut laat lyk.

Donker denims

Die eerste ding waarna jy gryp op ’n koue wintersoggend. Daar is net iets omtrent donker denims wat dit ’n gunsteling vir wintersdrag maak. Die donker kleur skep daardie effense netjieser voorkoms wat jou stylvol laat lyk. Belê in meer as een van hierdie items vir die tye wanneer een in die was is. Hierdie een van Woolworths is gemaklik, baie vleiend en sal jou nie ’n plaas se prys kos nie.

Swart enkelstewels

Jy kan nooit verkeerd gaan met swart nie. Jy vertoon op jou beste as jy swart van kop tot tone dra. Hierdie enkelstewels is jou beste maat in die winter, omdat dit ’n praktiese lengte vir enige geleentheid is en jy lyk altyd netjies.

The post Winter-items waarin elke vrou moet belê appeared first on rooi rose.

Denim is baie neutraal, daarom is dit ’n gewilde materiaal om as ondertoon vir versierings te gebruik. Dit laat enige kleur en tekstuur uitstaan. Ontwerpers soos Gucci hou daarvan om die skouers, krae en vertikale lyne van ’n broekspyp te versier met blom-, blaar en dierpatrone. Bly by klassiek en hou by een fokusitem, of dra dit in oormaat met ’n ontwerp op elke kledingstuk.

Foto’s: Instagram @gucci

Baadjies

Beweeg van vintage na pop-kultuur in een naaldwerksessie. Oorgroot denimbaadjies saam met ’n wit kraaghemp en eenvoudige broek is een van die standaardstyle as dit by vintage-volgelinge kom. Kikker hierdie voorkoms op met modieuse patrone en spotprentmotiewe.

Denims

’n Denim moet aan baie standaarde voldoen as dit by ’n uitrusting kom – styl, gemak, kleur en mode. ’n Mens is geneig om gunstlingbroeke herhaaldelik te dra, maar met die regte versierings kan jy jou gunstelingdenim opvrolik. Die blinker- en denimkombinasie is hierdie jaar steeds groot nuus op die loopplanke. Dekor op die naat van die broekspyp help vir ’n verslankende voorkoms terwyl versierde agtersakke jou bates beklemtoon.

Skoene

Skoene kan ook deesdae as fokusitems gedra word. En hoe beter as om dit met kleurryke patrone en motiewe op te tower! Skoene word veral met borduurwerk versier wat ’n luukse voorkoms skep. Dit kan saam met ’n klassieke kraaghemp en broek gedra word of selfs saam met ander patrone. Kies egter ’n patroon/kleurpalet wat saam met baie van jou klere in jou kas pas, sodat dit steeds stylvol lyk.

Ken die verskil

’n Mens is geneig om appliekwerk met borduurwek te verwar, omdat dit amper dieselfde voorkoms het. Appliekwerk is egter wanneer ’n kleiner stukkie materiaal (gewoonlik ’n pronkpleistertjie, lint of ander aanwerklappies) op ’n groter stuk materiaal aangewerk word. Met borduurwerk word patrone en motiewe direk op die materiaal gewerk met ’n spesifieke naaldwerkvernuf en -tegniek.

The post Versier jou denims! appeared first on rooi rose.

Hier is ses redes waarom denims die beste is:

1. Daar is ’n groot verskeidenheid om van te kies! Die opsies is eindeloos.
2. Denims hou nege uit die 10 kere langer as enige ander broek.
3. Denims is veelsydig: dit kan vir informele asook meer deftige geleenthede gedra word.
4. Jou agterstewe lyk goed in die regte paar jeans.
5. Denims is maklik om te stileer want jy kan dit saam met baie ander items en bykomstigehede dra.
6. Denims voel duursaam en is dus ’n goeie belegging.

The post Ses van die beste denims appeared first on rooi rose.

Denim fassineer my. Wat ís dit wat soveel mense al so lank sover kry om hul bene, arms en ander liggaamsdele in denim te drapeer?

Toegegee, denim het tradisie. Die matrose van Genua het dit glo al in die sestiende eeu gedra. Die woord jeans, lees ek, kom van die Franse frase bleu de Genes, oftewel “die blou van Genua”. Denim is oorspronklik in die Franse stad Nîmes vervaardig – de Nîmes ken ons vandag as denim. Die materiaal uit Nîmes was van ’n beter kwaliteit as dié uit Genua.

Dis hier rondom 1870, toe al wat leef agter goud aan was, dat die duursame materiaal tot sy reg gekom het. In die VSA het Levi Strauss die briljante ingewing gehad om ’n werkersbroek met klinknaels te ontwerp wat gou ’n gunsteling onder Kaliforniese steenkoolmynwerkers geword het, veral toe Strauss dit van die keperstof uit Nîmes begin maak.

Nadat James Dean jeans gedra het in “Rebel without a cause” was dit ’n simbool van jeugdige rebellie. Denimdraers is dikwels toegang tot teaters, restaurante en skole geweier. In die jare sestig het dit aanvaarbaarder geword en teen die 1970’s was dit ’n modegier. Tien jaar later het ontwerpersjeans die wêreld getref.

Ek wonder of dit die teenstellings is wat denim daardie ietsie ekstra gee. Dit skep ’n robuuste werkersgevoel, maar is ook gewild onder mense in gesofistikeerde kringe. Mans wat dit dra lyk manliker, maar vroue lyk steeds vroulik. Denim simboliseer protes teen konformiteit, maar word deur soveel mense gedra dat dit nie anders kan as om ’n samebindende faktor te wees nie.

Denim skep die verwagting van eenvormigheid maar fnuik dié verwagting keer op keer. Ek vermoed die neurologiese bedrading wat ons van ons oergrootjies geëerf het – dat ons deel van die groep móét bly om te kan oorleef – word op ’n unieke wyse deur denim aangespreek. As denimdraers lyk ons eenders, maar anders. Presies wat ons wil hê.

Denim is vir my mooi. En ’n man in ’n blokkieshemp en denimbroek nog mooier. Veral as sy oë die kleur van bleu de Genes is en hy die gemaklikheid en krag van denim uitstraal.

The post Die ding met denim appeared first on rooi rose.

Daar word beraam dat 700 miljoen meter denim in Indië geproduseer word. Die maatskappy LNJ Denim, wat in Indië gevestig is, en denim aan bekende handelsname soos Levi’s, Gap, Ralph Lauren, Diesel en Tommy Hilfiger verskaf, het in 2004 hul produksie verdriedubbel om die groeiende aanvraag na denim aan te vul.

The post Denims: van Cowboys tot die loopplank appeared first on rooi rose.