Lekker taai burgersous

genoeg vir 4

1 Verhit 30 ml (2 e) botter in ’n pan oor matige hitte. Braai 1 ui, in dik skywe gesny, vir 5 min. daarin, of tot sag. Voeg 15 ml (1 e) bruinsuiker by en braai vir nog 5-8 min. of tot gekaramelliseer. Voeg 2 gekapte knoffelhuisies by en braai vir nog 2 min. Gooi 125 ml (½ k) tamatiesous, 5 ml (1 t) sojasous, 5 ml (1 t) Worcestershire-sous, 5 ml (1 t) Tabasco-sous en 45 ml (3 e) bier by en kook vir nog 1 min. tot dit effens verdik.

Klik hier vir die beste frikkadelle en burgerbroodjies

Allerlekkerste hamburgersous

genoeg vir 6

1 Meng 125 ml (½ k) mayonnaise, 2,5 ml (½ t) Sriracha-sous (opsioneel (kry dit by Woolies), 15 ml (1 e) tamatiesous, 15 ml (1 e) soetrissiesous, 10 ml (2 t) Worcestershire-sous, ½ fyn gekapte baba-uitjie, 1 fyn gekapte groot agurkie en ’n hand vol fyn gekapte pietersielie in ’n bakkie.

Sampioensous

genoeg vir 4

Verhit 30 ml (2 e) botter in ’n pan oor matige hitte. Braai 250 g sampioene, 2 gekapte knoffelhuisies en 2 tiemietakkies vir 5-7 min. daarin, of tot goudkleurig. Voeg 30 ml (2 e) brandewyn by en laat prut vir 1 min. Voeg 250 ml (1 k) room en 5 ml (1 t) sojasous by. Verlaag die hitte en laat prut vir 2-3 min. of tot die sous verdik. Geur met sout en swartpeper.

Klik hier vir die lekkerste bolae en bykomstighede

Bruinbotter-hollandaise

genoeg vir 4

Verhit 125 g ongesoute botter in ’n pan oor lae hitte. Laat prut die botter tot ligbruin. Haal van die hitte af en gooi in ’n maatbeker. Sit 2 eiergele en 15 ml (1 e) suurlemoensap in ’n glasmengbak wat knus oor ’n kastrol halfvol kookwater pas. Klits tot baie lig in kleur. Haal die eiers van die kastrol af. Drup die botter in die eiermengsel en klits deurentyd tot die sous dik en romerig is. Geur met sout en swartpeper.

Sjerrie-en-bloukaas-sous

genoeg vir 4

Verhit 30 ml (2 e) botter in ’n pan oor matige hitte. Voeg 15 ml (1 e) koekmeel by en roer tot glad. Voeg 250 ml (1 k) room en 10 ml (2 t) sjerrie by. Verlaag die hitte en klits tot die sous verdik. Kook vir 1 min. Trek van die hitte af en voeg 50 g bloukaas by. Roer totdat die bloukaas gesmelt is.

The post Die beste burger-souse appeared first on rooi rose.

Bestanddele

• 1 vanieljeboontjie of 5 ml vanielje-ekstrak
• 1,5 kg vars aarbeie, stingels afgesny
• 1,125 kg (4½ k) suiker
• uitgedrukte sap van 2 suurlemoene

Metode

Verhit die oond tot 100 °C. Sit ’n piering in die vrieskas.

1. Sny die vanieljeboontjie in die lengte deur en sny in 4 dele.
2. Sit die aarbeie in ’n groot dikboomkastrol en voeg die vanielje by.
3. Gooi die suiker in ’n oondpan en verhit vir 10 min. in die oond.
4. Voeg die warm suiker en suurlemoensap by die aarbeie in die kastrol en verhit oor matige hitte. Roer nou en dan tot die suiker gesmelt is. Moenie te veel roer nie, anders sal die vrugte te pap word.
5. Verlaag die temperatuur en laat die konfyt stadig kook. Toets ná 25 min. of dit setpunt bereik het deur ’n klein bietjie konfyt op die yskoue piering (wat jy in die vrieskas gesit het) te gooi. As jy jou vinger daardeur trek en dit maak plooitjies en vorm ’n velletjie, is dit gereed. Anders moet jy dit vir nog 10 min. kook en weer toets.
6. Steriliseer 4 glasbotteltjies deur ’n bietjie water daarin te gooi en vir 2 min. in die mikrogolfoond te kook. Vul die botteltjies met die konfyt en maak dig toe.

The post Aarbei-en-vanielje-konfyt appeared first on rooi rose.

Ons wys jou hoe om in 3 maklike stappe rabarber, een van die lekkertes van die seisoen, vir later in te lê.

STAP 1: Weeg

Spoel die bestanddele noukeurig af en geur soos nodig met speserye of sitrusskil en sap. Die meeste resepte werk as jy gelyke hoeveelhede suiker tot vrugte gebruik, afhangende van die vrug se natuurlike suikergehalte. Konfyt het die regte verhouding suiker, pektien en suur nodig om te set.

STAP 2: Laat staan

Bedek die vrugte vir sowat 3-4 uur met die suiker. Die suiker los in die vrugtesappe op wat die kooktyd verkort. Indien die tyd te min is, kan die suiker in ’n glasbak in die mikrogolf of op ’n bakplaat in die oond verhit word – die warm suiker smelt vinniger.

STAP 3: Kook tot setpunt

Setpunt is ’n algemene term in konfyt kook, maar hoe toets ek daarvoor? Setpunt is die fase waarin die konfyt die regte konsistensie bereik het, nie te loperig en te taai nie.

Toets so:

• Sit vooraf ’n kleinbordjie in die vrieskas.
• Drup ’n bietjie van die konfyt op die koue bord en laat vir ’n paar minute afkoel. Trek ’n skoon vinger deur die konfyt, wanneer die oppervlak verrimpel en die konfyt nie afdrup nie, is dit gereed.
• Indien setpunt ná die eerste kookslag van 5-10 min. nie bereik is nie, kan dit vir nog 5 min. op ’n slag gekook word. Toets deurgaans. Bottel die konfyt en bêre vir later.

The post JY KAN konfyt kook appeared first on rooi rose.

Genoeg vir 8

Bestanddele

• 625 ml (2½ k) koekmeel
• 125 ml (½ k) suiker
• knypie sout
• 8 ml (½ e) fyn kaneel
• 8 ml (½ e) kremetart
• 20 ml (1 e + 1 t) botter
• 45 ml (3 e) melk
• 45 ml (3 e) water
• 5 ml (1 t) koeksoda
• 2 eiers, geklits
• olie

Kaneelsuiker

• 80 ml (1⁄3 k) fyn kaneel
• 80 ml (1⁄3 k) strooisuiker

Metode

1. Sif die koekmeel, suiker, sout, kaneel en kremetart saam.
2. Vryf die botter met die vingerpunte by die meelmengsel in.
3. Meng die melk, water en koeksoda. Gooi eers net die helfte van die melkmengsel by die eiers en meng. Gooi die eiermengsel by die meel en meng. Die deeg moet sag maar nie slap wees nie. Voeg die res van die vloeistof indien nodig bietjie vir bietjie by tot die meel nat en die deeg kniebaar is.
4. Knie die deeg op ’n meelbestrooide werkvlak tot glad en elasties.
5. Trek ’n stuk van die deeg af en rol tot dit soos ’n dik boerewors lyk. Druk eweredig plat met die palm van die hand totdat dit 1½ tot 2 cm dik is.
6. Sny in skuins stroke van sowat 5 cm breed.
7. Bak in warm, diep olie oor matige tot lae hitte. Toets eers die hitte met ’n stukkie deeg – die olie moenie te warm wees nie sodat die koekies kan rys en nie te donker braai nie.
8. Skep met ’n gaatjieslepel uit en dreineer op kombuispapier.
9. Kaneelsuiker: Meng die kaneel en suiker. Rol die warm skuinskoekies in die kaneelsuiker en sit voor met dubbeldikroom en moskonfyt.

The post Skuinskoek appeared first on rooi rose.

Basiese vrugteblatjang

600 gram

’n Basiese en geurige blatjangresep wat jy kan gebruik -goed vir dadels en droëvrugte. Gebruik 450 g vars vrugte in die plek van die 300 g droeë vrugte.

• 5 ml (1 t) piment
• 5 ml (1 t) mosterdsaadjies
• 5 ml (1 t) gemaalde koljander
• 1 klein kaneelstokkie
• 300 g droëvrugte of 450 g vars vrugte, geskil
• 450 g Granny Smith-appels, geskil, ontpit en in blokkies gesny
• 1 ui, geskil en fyn gekap
• 750 ml (3 k) witwynasyn
• 225 g sultanas
• 4 knoffelhuisies, gekneus
• gerasperde skil en sap van 1 suurlemoen
• 5 ml (1 t) sout
• 4 cm gemmer, geskil en fyn gerasper
• 450 g warm suiker

1 Vou die speserye in ’n moeselienlappie toe en bind met tou vas.
2 Sit die droëvrugte, appels, ui, asyn en speserye in ’n middelslagkastrol en verhit tot kookpunt. Roer deurentyd. Prut vir 10 min.
3 Voeg die res van die bestanddele by en roer oor matige hitte totdat die suiker opgelos is. Bring tot kookpunt en prut vir sowat 1 uur tot dik maar steeds sappig. Roer deurentyd.
4 Verwyder die speseryelappie en gooi die blatjang in ’n warm, gesteriliseerde bottel. Seël dig.

Blatjangbroodjies

Genoeg vir 4

• 8 dik snye plaasbrood, gerooster
• 8 skywe goeie ham
• 2 pere, in dik skywe gesny en in ’n pan in ’n bietjie botter gebraai
• 1 middelslag-camembertwiel, in dik skywe gesny
• tuisgemaakte blatjang
• ’n hand vol roketblare

1 Sit eers die ham op ’n sny brood, gevolg deur die pere en camembert en eindig met lepels vol van die blatjang en vars roketblare. Sit ’n sny brood bo-op en smul.

Basiese ingelegde vrugte in stroop

Genoeg vir 6

Hier is ’n goeie, basiese stroopresep waarin jy enige vrugte kan inlê.

• 6-8 perskes
• 1½ liter water
• 1 kg (4 k) strooisuiker
• 1 vanieljepeul, in die lengte middeldeur gesny

1 Sny ’n 2 cm-kruisie aan die onderkant van elke perske.
2 Sit die water, suiker en vanieljepeul in ’n groot kastrol. Roer oor lae hitte tot die suiker heeltemal opgelos is en bring tot kookpunt. Kook vir 20 min.
3 Sny ’n sirkel so groot soos die kastrol uit bakpapier. Sit die perskes in die stroop en bedek met die bakpapier. Kook vir sowat 10 min. of tot die perskes sag is, maar nog hul vorm behou.
4 Laat effens afkoel en trek dan die skille af. Skep die perskes en stroop in gesteriliseerde bottels.

Basiese sagte vrugtekonfyt

Dié verhouding van suiker en vrugte werk goed vir sagtevrugte soos appelkose, perskes en pere en bessies soos aarbeie en frambose.

• 1 kg sagtevrugte soos frambose, aarbeie of pere
• uitgedrukte sap van 1 suurlemoen
• 800 g warm gemaakte suiker

1 Sit die vrugte en suurlemoensap in ’n groot kastrol en verhit stadig om al die sappe te onttrek. Voeg 200 ml water by indien jy vrugte soos pere, appelkose of perskes kook.
2 Druk die vrugte met ’n vurk fyn en kook tot hulle sag is en daar baie sap is.
3 Voeg die warm suiker by die vrugte en kook stadig tot die suiker gesmelt is.
4 Verhoog die temperatuur en laat vinnig kook tot die konfyt begin verdik (afhangende van hoeveel vog die vrugte bevat het). Toets dan of dit by setpunt is (kyk onder).
5 Skep die konfyt in warm, gesteriliseerde bottels.

The post Lê dit in! appeared first on rooi rose.

Bestanddele

• 200 g (1 ¹⁄³ k) koekmeel
• 50 g koue botter
• 10 g (1 sakkie) kitsgis
• 60 ml (4 e) strooisuiker
• 1 groot eier, liggies geklop
• 100 ml (1⁄3 k + 2 t) louwarm melk
• 500 ml (2 k) sonneblomolie vir diepbraai
• 125 ml (½ k) tuisgemaakte aarbeikonfyt
• 125 ml (½ k) strooisuiker in ’n bakkie gegooi

Metode

1. Sif die meel en sout saam in ’n groot mengbak. Vryf die koue botter in die meel in tot dit soos growwe broodkrummels lyk.
2. Roer die gis en suiker deur en maak ’n holte in die middel van die mengsel. Gooi die louwarm melk by die mengsel terwyl jy dit van die kante af bywerk en deurmeng. Meng tot dit ’n sagte, werkbare deeg vorm.
3. Knie die deeg vir 10 min. tot blink en glad. Laat rys vir 30 min. (of tot dit verdubbel) in ’n bak wat liggies met olie gesmeer en met kleefplastiek bedek is.
4. Verdeel die deeg in 12 balletjies. Knyp die onderkant van die balletjies bymekaar en rol glad uit op ’n skoon werkvlak. Sit op ’n bakplaat wat met bak-papier uitgevoer is, gooi ’n skoon kombuisdoek oor en laat rys weer tot dubbel die grootte.
5. Verhit intussen die olie in ’n middelslagkastrol. Toets of die olie reg is deur ’n stukkie brood in die olie te sit – die broodjie behoort binne 30 sek. goudbruin te braai. Diepbraai die oliebolle 4 op ’n slag in die warm olie tot goudbruin. Hulle sal bo begin dobber wanneer hulle gaar is.
6. Lig die gaar bolletjies met ’n gaatjieslepel uit en dreineer op kombuispapier.
7. Maak met jou vinger ’n holte in elke bolletjie (moenie brand nie!) Skep die konfyt in ’n toebroodjiesakkie en knoop styf toe. Sny die punt van die een hoek af en druk die konfyt so in die holte in die oliebol. Probeer soveel moontlik inkry! Rol elke bolletjie in die strooisuiker.

The post Oliebolletjies met aarbeikonfyt appeared first on rooi rose.

Tradisioneel is herfs die seisoen van konfytmaak en bottelering, sodat somerprodukte bewaar kan word om die wintermaande op te kikker.

Van ons gunstelingkonfyte word met steenvrugte gemaak – wie kan perske- of pruimkonfyt, in terte gebak of ‘n warm skons op ‘n koue wintermiddag weerstaan? Steenvrugte is egter van die veelsydigste vrugte; en konfyte en jellies is net een goeie manier om dit te bewaar. Perskes is byvoorbeeld ook die heldebestanddeel in ‘geurbom’-speserye soos blatjang en achar; en pruime is die  sterre van taai braai- of Asiatiese-styl doopsouse, marinades en glasure.

Jy hoef egter nie ’n vasbyter vir tradisie te wees om die vreugde van steenvrugte tot die volgende somer te laat hou nie. Daar is baie kontemporêre metodes en gebruike wat jou familie en vriende sal betower.

Hier is ‘n paar idees:

• Gee jou steenvrugkonfyte en jellies ‘n kosbare kinkel deur komplementêre speserye, kruie of ‘n skeut van jou gunstelingalkohol by te voeg. Vanielje voeg byvoorbeeld soetheid en diepte by pruimkonfyt, terwyl kaneel, neutmuskaat of kardemom pittige warmte sal byvoeg. Kruie soos basiliekruid, roosmaryn en tiemie sal ‘n moderne, helder en hartige noot byvoeg.
• Probeer jou hand aan steenvrugtestroop en koring vir iets anders. Perskes, nektariene en pruime is almal uitstekende opsies. Die byvoeging van geurmiddels soos speserye of sitrus balanseer die soetheid terwyl dit óf helderheid óf warmte byvoeg. Steenvrugtestroop kan gebruik word om nageregte te bo-op of as die heldbestanddeel in nageregresepte of smoothies. Hulle is heerlik as ‘n coulis vir soet of sout geregte. Kinders kan dit geniet as ‘n vars, hidrerende koors wat in stil of sprankelende water verdun word, en grootmense kan dit by skemerkelkies voeg.
• Gebruik gebottelde of ingemaakte perskes op moderne maniere – Gekonserveerde perskes sal altyd ‘n plesier wees in klassieke pasteie en skoenlappers of bloot met roomys bo-op. Jy kan dit egter ook rooster om by slaaie en graanbakkies te voeg, dit by jou oggendsmoothie in te sluit of dit op te kap vir ‘n pittige salsa.
• Maak ‘n paar sappige vrugtepotjies vir jou prettige winterbyeenkomste. Dink aan pruime in jenewer, brandewynperskes en nektariene wat in vodka of rooiwyn geweek is. Dit is so ‘n maklike volwasse bederf aangesien jy eenvoudig gewas vrugtestukke wat in jou gunsteling drank geweek is in gesteriliseerde, verseëlbare flesse plaas en op ‘n koel, donker plek bêre. Die alkohol dien as ‘n preserveermiddel en drankflesse kan vir ‘n paar maande in lugdigte flesse hou.
• Leer hoe om jou flesse en bottels te steriliseer – Volgens La Parfait, die Franse glasvervaardigingsmaatskappy wat sedert die 1930’s flesse, bottels en terrines vervaardig om kos te preserveer, is dit maklik om tuis te doen. Maak seker dat jou deksels en seëls in goeie toestand is en kyk na die rand van die bottels en flesse vir enige skyfies of krake in die glas. Jy wil ‘n lugdigte pas hê, so die toestand en kwaliteit van jou flesse en bottels maak saak – gelukkig is La Parfait-produkte plaaslik beskikbaar! Net voor gebruik, was die glasbottels sowel as hul deksels in warm, seepwater. Spoel hulle af in warm water en laat hulle dan lugdroog op ‘n skoon skottelgoedrak, maak seker dat die deksels en bottels nie opgestapel is of aan mekaar raak nie.

Om jou op ‘n geïnspireerde weg te kry, is hier twee steenvrugresepte wat deur Juicy Delicious aangebied word en geskep is deur Saadiyah Hendricks, resepontwikkelaar en kosinhoudskepper by Sadie’s Bubble of Yum.

PRUIM EN VANIELJE TERT

GEBLIKTE PERSKES

Volg @juicydelicioussa op Instagram of besoek www.juicydelicious.co.za

Lees ook: Geroosterde perske gazpacho

The post Bewaar die somer se heerlike steenvrugte vir die wintermaande appeared first on rooi rose.

Beplan vir elke week

* Koop ook vars vrugte, groente en sappe saam met die bestanddele vir die week se middagetes en kosblikhappies
* Maak van die geregte wat gevries kan word. ’n Mens het naweke meer tyd vir bak, laat die kinders help en bak sommer al Sondagaand die muffins of neutkoekies
* Koop genoeg koeldrankbotteltjies en vries vyf sappies vir die komende week
* Koop liefs volgraanbrood vir die toebroodjies

Maandag (middagete-idee)

Herderspastei met basiese maalvleissous
– Genoeg vir 4

Gebruik die basiese maalvleissous vir pastas, gebakte aartappelvulsels en toebroodjies. Maak dit dubbel aan oor ’n naweek, of wanneer jy tyd het, en verdeel dit dan in twee dele: Een is vir die herderspasteitjies en een vir die aartappels en toebroodjies. Vries porsiegroottes in vriessakkies. Ek verdriedubbel die resep en maak dit in een groot bak vir aandete en skep dan vier bakkies uit vir die volgende dag se middagete.

• 15 ml (1 e) sonneblomolie
• 1 klein ui, fyn gekap
• 600 g maalvleis
• 1 wortel, gerasper
• 375 ml (1½ k) tamaties, gekap
• 30 ml (2 e) tamatiepuree
• 15 ml (1 e) Worcestershire-sous
• 125 ml (½ k) hoenderaftreksel
• 250 ml (1 k) bevrore ertjies
• ’n hand vol gekapte pietersielie

Kapokaartappelbolaag
• 3 aartappels, geskil en in blokkies gesny
• 80 ml melk
• 30 g (3 e) botter
• 250 ml (1 k) gerasperde cheddarkaas
• gerasperde neutmuskaat

1 Verhit die olie in ’n middelslagkastrol oor hoë hitte.
2 Voeg die ui by en soteer vir 1-2 min. of tot sag.
3 Voeg die maalvleis by en soteer vir 5 min. of tot die vleis bruin is en breek moontlike klonte met ’n houtlepel.
4 Voeg die wortel, tamaties, puree, Worcestershire-sous en hoenderaftreksel by. Bring tot kookpunt en verlaag die hitte. Laat prut vir 10 min. of tot die mengsel effens begin verdik.
5 Kook intussen die aartappels sag en geur met sout. Roer die ertjies en pietersielie by. Haal van die hitte af en hou eenkant.

Kapokaartappelbolaag
1 Dreineer die aartappels en sit terug in die kastrol.
2 Voeg die melk, botter en 2/3 van die kaas by en druk fyn.
3 Geur met neutmuskaat. Verhit die oondrooster.
4 Sit die maalvleis in 4 oondvaste bakkies met ’n inhoudsmaat van ±250 ml (1 k), skep die kapokaartappels bo-oor en strooi die oorblywende kaas oor.
5 Sit die bakkies op ’n bakplaat en sit vir 4-5 min. in die oond of tot die kaas gesmelt en goudkleurig is.

Dinsdag (snoephappie-idee)

Mout-en-jogurt-doopsous met vrugte
– Genoeg vir 6

’n Heerlike en heilsame snoephappie vir kinders. Dit hou hulle ook sommer op ’n prettige, “morsige” manier lekker besig.

• 250 ml (1 k) volroom- Griekse jogurt
• 5 ml (1 t) vanieljegeursel
• 15 ml (1 e) heuning
• 30 ml (2 e) moutmelkpoeier (Horlicks)
• 125 ml (½ k) gekapte neute
• 125 ml (½ k) klapper
• verskeidenheid vrugte om te doop, soos aarbeie, dik skywe piesang en appelkwarte.
• stokkies of vurkies om in die vrugte te druk om die doopslag te vergemaklik

1 Meng al die bestanddele tot voor die neute in ’n bakkie.
2 Sit die neute en klapper in twee afsonderlike bakkies.
3 Pak die gesnyde vrugte uit op bordjies. Die kinders doop eers die vrugte in die jogurtsous en rol dit dan in die neute en/of klapper.

Nog idees
* Maak ’n vinnige doopsous vir allerlei groente soos selderystokkies en worteltjies: Meng gelyke hoeveelhede gladde maaskaas met volroom- Griekse jogurt, geur met sout en peper en gekapte kruie soos pietersielie of vinkel.

Woensdag (kosblik-idee)

Geroosterde maalvleis-en-kaas-broodjie
– Genoeg vir 4

Maak die broodjies in ’n japtrap met die maalvleis wat jy vroeër ekstra gemaak het vir die herderspastei.

• 8 snye witbrood
• margarien om die brood te smeer
• 250 ml (1 k) basiese maalvleis soos vir Maandag se herderspasteitjies berei
• 125 ml (½ k) gerasperde cheddarkaas

1 Verhit ’n Snackwich.
2 Smeer die brood deeglik met margarien. Sit 2 snye met die margarienkant na onder in die voorverhitte Snackwich.
3 Verdeel die maalvleis tussen die 2 snye brood, strooi die kaas oor en sit die ander sny brood bo-op met die margarienkant na bo.
4 Bak vir 3 min. of totdat die kaas gesmelt is en die brood goudbruin en lekker warm is.

Nog idees met roosterbroodjies
* Kaas-mielie-en-ham-broodjie: Vervang die maalvleis deur sowat 60 ml (¼ k) geroomde mielies en twee skywe toebroodjie- of piekniekham. Strooi laastens kaas oor.

Donderdag (kosblik-idee)

Grondboontjiebottermuffins
– Genoeg vir 12

Ons het dié resep uit die Savvy Kids-kookboek gekry.
Sit die muffins net so voor, of saam met lekker dik mascarpone en gesnyde piesang vir ’n nagereggie. Ek laat my kinders gewoonlik op Sondagaande self die muffins bak (as dit nie te rof gaan nie).

• 250 g (½ k) meel
• 100 g bruinsuiker
• 5 ml (1 t) bakpoeier
• 200 g grondboontjiebotter
• 225 ml (1 k + 2½ t) melk
• 30 ml (2 e) olyfolie
• 2 eiers, geklits
• 45 ml (2 e) grondboontjies, gekap

1 Voorverhit die oond tot 200 ºC. Spuit ’n muffinpan met kleefwerende kossproei.
2 Meng die meel, bruinsuiker en bakpoeier in ’n mengbak.
3 Voeg die grondboontjiebotter by en meng die bestanddele tot dit soos broodkrummels lyk.
4 Voeg die melk, olie en eiers by en roer tot ’n gladde deeg.
5 Maak elke holte twee derde vol met die deeg en strooi die gekapte grondbone oor. Bak vir 20-25 min. of tot ’n toetspen skoon uitkom. Laat effens afkoel.

Nog idees met muffins
* Pak bakkies met neute, sade en droëvrugte soos pitlose rosyntjies uit sodat die kinders daarvan kan byvoeg volgens hul smaak.
* ’n Gerasperde appel, of twee gerasperde wortels, is ’n lekker toevoeging.
* Druk twee piesangs fyn en meng deur die basiese beslag.

Vrydag (snoephappie-idee)

Piesangroomys
– Genoeg vir 4

• 4 piesangs
• 4 balletjies goeie vanieljeroomys
• klaarbereide karamelsous
• 60 ml (¼ k) gekapte neute

1 Sny die piesangs in die lengte middeldeur.
2 Plaas albei helftes in 4 afsonderlike bakkies.
3 Skep ’n balletjie roomys op die piesangs en gooi lekker baie karamelstroop bo-oor.
4 Strooi die neute oor en smul.

’n Heilsame variasie
* Vervang die roomys deur volroom-Griekse jogurt en die karamelstroop deur heuning.

Goeie snoephappie-idee

* Vars vrugte soos aarbeie (eintlik alle bessies), druiwe, geskilde nartjies of lemoene is ideaal omdat dit nie soos appels verkleur nie en klein handjies dit maklik kan vat.

The post Kosblik-idees week 1 appeared first on rooi rose.

The post Konfyttertjies appeared first on rooi rose.