korean beauty | rooi rose

K-skoonheid het my vel verander

Corné Greeff — Sun, 19 May 2019 04:00:54 +0000

K-skoonheid het my vel verander deur Hannelie Diedericks, Suzanne Kotzé en Corné Greeff. Hooffoto:iStock/Paulynn

rooi rose se adjunk-redakteur, Hannelie Diedericks, is gaande oor die K-skoonheid velsorgroetine. Hier is wat sy sê:

Ek dink baie mense sien veranderinge in hul vel met die K-Beauty roetine as gevolg van die ekstra sorg en tyd wat dit verg om ’n 10-stap roetine te volg.

Dis natuurlik nie noodsaaklik om 10 stappe te volg nie. Meng-en-pas die stappe eerder om by jou eie behoeftes en skedule te pas.

Sommige K-Beauty produkte is net so goed as die meer bekende skoonheidsprodukte wat mens in apteke of kettingwinkels kan koop en is ook soms selfs goedkoper.

As jy jou huiswerk doen is dit moontlik om ’n goeie, effektiewe velsorgroetine vir jouself te skep wat goedkoper mag wees as met byvoorbeeld luukse Europese ingevoerde produkte.

Die grootste struikelblok is dat die kopie wat op die verpakking verskyn soms net in Koreaans of Japannees is, en dat dit moeilik is om produkte te identifiseer of te kan sien hoe om dit te gebruik of wat die bestanddele is. Gelukkig is daar nou ’n paar plaaslike aanlynwinkels, soos Glow Theory, K Beauty Africa en Butterkup Beauty wat in K-Beauty-produkte spesialiseer en inligting verskaf wat dit meer verbruikersvriendelik maak. YouTubers soos Gothamista gee ook goeie, betroubare inligting oor produkte en bestanddele wat gereeld in K-Beauty produkte gebruik word.

Wonder jy wat K-Skoonheid is? Loer hier om meer uit te vind.

Só het Hannelie se velsorgroetine verander danksy K-skoonheid

K-skoonheid het my geïnspireer om meer stappe in my daaglikse velsorgroetine in te bring en meer aandag te gee aan aktiewe bestanddele en watter voordele dit inhou. Ek gebruik steeds heelwat “Westerse” produkte, en gebruik hier en daar ’n K-skoonheid produk, en verander my roetine afhangende van hoe my vel op ’n spesifieke dag voel

Ek was my gesig nou twee keer

Die bekendste en dalk die belangrikste K-skoonheid-stap is sekerlik die dubbelreiniging, of twee-stap-reinigingsroetine, wat mens in die aande doen. Jy verwyder eers jou grimering met ’n cleansing balm of reinigingsolie, en reinig jou vel daarna met ’n jel- of skuimreiniger.

Ek beskou toner as die eerste stap in die voedings/hidreringproses

Nog ’n verandering wat ek gemaak het, is om die “toner” of opknapper-stap nie te sien as die einde van die reinigingsproses nie, maar eerder die eerste stap in die voedings-/hidreringsproses. K-Beauty Toners en Essences bevat hidrerende bestanddele soos hialuroonsuur en gliserien wat die vel bevog en voorberei op die opeenvolgende stappe. Mens tik dit liggies met jou vingerpunte in die vel in, eerder as om dit met watte oor die vel te vee. Ek dink nie ek sal ooit terugkeer na die “ou” opknappers wat vol alkohol is en gewoonlik net mens se vel uitdroog en styf laat voel nie. Hierdie hidrerende opknappers kan afgewissel word met suur-opknappers wat gebruik word om jou vel af te skilfer.

Ek gebruik ’n serum twee keer per dag.

In die verlede het ek my serums vir die aand gebêre, maar nadat ek bewus geraak het van die verskil wat ’n goeie vitamien C-produk aan mens se veltoon kan maak, het ek ’n vitamien C-serum by my oggendroetine ingewerk.

Ek gebruik twee keer per week ’n masker

Ek gebruik twee keer per week ’n masker wat ek afwissel afhangende van hoe my vel op daardie stadium voel. Lappiesmaskers is prettig en maklik om te gebruik en die effek daarvan is gewoonlik onmiddellik sigbaar, maar ek het nog nie ’n lappiesmasker opgespoor waarvan ek die volgende oggend steeds die verskil in my vel kon raaksien nie. Ek verkies slaapmaskers wat gedurende die nag op mens se vel bly – dit voel net of dit ’n groter verskil maak.

K-Beauty produkte wat ek al gebruik het

Eerste reiniger:

Banilla Co Clean It Zero Balm Cleanser R340 (Butterkup Beauty) – Dit laat die grimering van jou vel af smelt!

Tweede reiniger:

PYUNKANK YUL Cleansing Foam R 175 (Glow Theory) – Reinig jou vel deeglik nadat jy die grimering verwyder het. Ek gebruik dit saam met my Foreo Luna Mini vir ’n ekstra diep reiniging.

Toner/Essence:

PYUNKANG YUL Essence Toner R220 (Glow Theory) – Verfris en versag jou vel.

Suur-opknapper:

CPSRX AHA 7 Whitehead Power Liquid R295 (Glow Theory) – ek gebruik dit twee keer ’n week vir ’n ligte afskilfering.

Vitamien C Serum:

TIA’M My Signature C Source Vitamin C Serum (bêre in jou yskas om dit teen oksidasie te beskerm) R295 (Glow Theory). Ek het ’n merkbare verskil in die helderheid van my vel bespeur. My pigmentasievlekke lyk ook ligter.

Lappiesmaskers

HELLOSKIN Jumiso Sheet Masks (R40 elk beskikbaar by Glow Theory). ’nVinnige hidrerende inspuiting vir ’n droë, moeë vel.

#rrWenk: Hierdie lappiesmaskers maak baie oulike geskenke …

Op my wenslysie vir die toekoms

KLAIRS Midnight Blue Calming Sheet Mask (R 50 beskikbaar by Glow Theory)

ISNTREE Real Rose Calming Mask (R 295 beskikbaar by Glow Theory)

Dr. Jart CERAMIDIN CREAM (R710 beskikbaar by Butterkup Beauty)

KLAIRS Supple Preparation Facial Toner (R420 beskikbaar by K-Beauty)

Nie-Koreaanse produkte

Jy hoef nie noodwendig Koreaanse produkte te gebruik nie, jy kan die tien-stap-regime ook met ander handelsmerke volg.

The post K-skoonheid het my vel verander appeared first on rooi rose.

Alles wat jy moet weet oor K-skoonheid (K-Beauty)

Corné Greeff — Fri, 17 May 2019 04:00:42 +0000

Alles wat jy moet weet oor K-skoonheid (K-Beauty) deur Suzanne Kotzé en Corné Greeff. Hooffoto: iStock/maia3000

Wat is K-skoonheid (K-beauty)?

Die eerste ding wat genoem word as mens van K-skoonheid praat is die 10 stappe. Ja, jy het reg gelees 10 stappe. Die Koreane het ’n obsessie met ’n gesonde vel, en gee duidelik nie om om ekstra tyd hieraan af te staan nie.

Dit gaan egter nie daaroor om net meer produkte te hê nie, maar om die regte produkte te hê, met die regte aktiewe bestanddele en dit in die regte volgorde te gebruik.

Die klem is op dubbel-reiniging (ja, dit beteken jy moet jou gesig twee keer was), aktiewe bestanddele en ’n gesonde, goed bevogtigde vel en goeie sonskerm. Lappiemaskers en maskers waarmee jy slaap en produkte met rubber- en jelteksture is só gewild dat selfs nie-Koreaanse handelsmerke soortgelyke produkte begin vervaardig het. Gewilde Koreaanse bestanddele sluit ginseng, sampioen, heuning, eierwit, propolis (byegom), slakslym en groeifaktore in. Die verpakking is dikwels oulik en byna kinderlik.

Die 10 Stappe

Lees ook: Die 8 grootste foute wat jy kan maak as jou vel sensitief is

Produkte om te probeer

Koreaans

Jy kan Koreaanse velsorgprodukte by die volgende aanlynwinkels in Suid-Afrika koop:

glowtheory.co.za

kbeauty.co.za

butterkupbeauty.co.za

Daar is voorsorg getref dat die aktiewe bestanddele in Lindsey Rubber Pearl, Vitamin and Collagen Modelling Mask (R80 elk, kbeauty.co.za) nie verdamp nie. Meng die produk met water en wend dit dan aan.

J-one Jelly Pack Luminous Mask (R70, kbeauty.co.za). Jy gebruik die masker in twee stappe: in die eerste stap gebruik jy ’n bamboes-en-steenkool-lappiemasker wat help om vuiligheid uit te trek en die vel bevogtig. Druk die masker op ’n skoon gesig en hou dit vir 10-20 minute aan.

Wend daarna die ampule aan en tik die room in jou vel in, dit help om vog binne te hou. Slaap hiermee.

Leegeehaam Vita Propolis Ampoule (R450, Kbeauty.co.za) vernuwe ’n dowwe vel, verbeter tekstuur en streel ’n geïrriteerde vel.

Nie-Koreaans

Sensai is al dekades lank ’n baie gewilde Japannese reeks in Suid-Afrika. Hulle Extra Intensive Eye Pads (R1 960 Vir 10) verhelder en bevog die vel om jou oë. Die lappies is onder meer in kashimanu-sy geweek. Laat dit vir 10 minute aanbly.

Dior Hydra Life Glow Better Fresh Jelly Mask (R995). Die masker wat jy ná net drie minute afhaal, skilfer jou vel liggies met vrugtesure en fyngemaalde appelkoospitte af. Jou vel sal varser en helderder lyk.

Lees ook: Hennepsaad-velsorgprodukte waarvan jy nou moet weet

Clarins Super Restorative Instant Lift Serum Mask (R300). Die lappiemasker is in ’n jel-serum geweek wat die vel lig en plomper maak. Die lappie is van natuurlike vesel gemaak en kan ook om jou nek gevou word.

Glamglow Bubblesheet (R125) is ’n oksiderende masker wat een keer per week gebruik kan word.

Lush Fomo Jelly Face Mask (R145) streel en verhelder die vel.

Lees ook: Bikini-wasgids: 20 goed wat almal moet weet voordat hulle salon toe gaan

Skin Republic Hyaluronic Acid + Collagen Face Mask Sheet (R42 beskikbaar by Dis-Chem, Clicks en Takelot.com) bevogtig en help om fyn lyntjies minder sigbaar te laat lyk.

The Body Shop Drops Of Youth Sheet Mask (R95) laat jou vel gladder en varser voel en gesonder lyk. Ons hou veral daarvan dat die lappie bio-afbreekbaar is.

Dermactin-TS Bubble Vitamin C Sheet Mask (R55) is ‘n borrelend Vitamiene C masker wat jou vel laat tintel en help om jou vel helderder en varser te laat voorkom.

Die PONDS instituut in Korea het hard gewerk aan hierdie lappiemasker wat ook voldoen aan die behoeftes van Suid-Afrikaanse vroue se velsorgbehoeftes. Daar is drie verskillende lappiemaskers in hul reeks bekendgestel

POND’S Skin Brightening Serum Mask (R49,99) wat onder andere niasinamied, vitamiene E en see-affodil bevat om glans te gee.

POND’S Firming Serum Mask (R49,99) bevat kollageen, hialuriensuur en bruin alg- ekstrak om jou vel op te plomp.

POND’S Wrinkle Correcting Mask (R49,99) bevat retinol, hialuriensuur en avokado- ekstrak om jou vel af te skilfer en te hidreer

The post Alles wat jy moet weet oor K-skoonheid (K-Beauty) appeared first on rooi rose.