In vervaardiger Emma Kotze en skrywer-regisseur Johann Vermaak se wetenskapsfiksie-drama, ARK, word die grense van Afrikaanse rolprente verbreed en bekende temas innoverend vanuit ’n buiteruimtelike konteks belig. Hulle gebruik regte akteurs, marionette, spesiale effekte en spesiaal geboude stelle.

Die gevestigde filmmakers Johann en Emma het oor die fliek gesels:

Soos met jou vorige Silwerskermfees-kortfilm, Die groot twis, verskuif jy met ARK die grense van inhoud wat in Afrikaans gemaak word?

Johann: Ek is baie lief vir 70’s-wetenskapsfiksie. Ek is mal oor die visuele styl en amper naïewe optimisme oor ’n utopiese toekoms. Die Afrikaanse televisiereeks Interster was een van my inspirasies. Die idee was om daardie selfde gevoel en satiriese uitkyk te transponeer na Suid-Afrika en na Afrikaans. Daar is nuanses in die datums wat ons gebruik het wat kykers hopelik sal oplet.

Julle speel in ARK met verskillende temas, waaronder die liefde, die mite van Afrikaners as ’n uitverkore volk … Hoe sou jy die fliek se onderliggende temas in ’n neutedop beskryf?

Johann: Ek het doelbewus baie vlakke ingesluit, maar die hart van die storie is ’n liefdesverhouding. Ons het al baie hierdie verhaal sien uitspeel: twee mense wat hul verhouding begin met hoop vir die toekoms, en dan ontrafel dinge. Ons neem dit egter na ekstreme atmosfere … letterlik. In wese gaan ARK oor die mites wat ons vir onsself vertel.

Emma: Getrou aan die wetenskapsfiksie-genre, stel ARK die kyker bekend aan ’n verbeelde wêreld, terwyl dit eintlik met alledaagse of oertemas omgaan. Dit stel ondersoek in na die identiteit van die mens, hoe ons dit in intieme verhoudings vestig, asook in die groter kollektief van kulturele identiteit. Deur dít alles het ons deurlopend daarna gestreef om die karakters steeds herkenbaar te maak. Dit was vir ons belangrik dat die kyker vir hulle empatie kan hê, ten spyte van die skynbaar onbekende wêreld en omstandighede waarin dit afspeel.

ARK is visueel treffend. Hoe het julle op die voorkoms van die fliek besluit?

Johann: Waar Die groot twis in my kop soos ’n Pierneef-skildery was, was hierdie fliek meer soos ’n Mondrian. Dit klink dalk pretensieus, maar die idee was om met sterk blokke kleur ’n amper kliniese gevoel te skep om deur die fisieke wêreld ’n spieëlbeeld te skep van wat in die karakters se binnewêreld aangaan. In die ruimteskip dra die lineêre strakheid byvoorbeeld by tot die spanning in die verhouding.

Toe ek jonger was, het ek Krzysztof Kieślowski se Three Colours-trilogie gekyk en dit het ’n groot impak op my gehad. Ek wou ’n fliek maak waarin kleur ’n belangrike rol speel en die drie verskillende wêrelde was my wegspringpunt. Broodkrummels deur die loop van die film lei die kyker om die misterie te ontsyfer.

Die kinematograaf, Jorrie van der Walt, is geniaal. Hy is sekerlik een van die beste kinematograwe – nie net in Suid-Afrika nie, maar wêreldwyd het hy ongelooflike werk gedoen. Arlene Wentzel se produksie-ontwerp is fantasties.

Daar is heelwat spesiale effekte gebruik. Hoe is dit ontwikkel?

Johann: Ons het vooraf baie navorsing gedoen oor die visuele en konseptuele omgewing waarbinne die fliek sou afspeel. Die briljante Loubser Claassen van Filmscape, Mashalane Mothiba van Lyrical VFX, en Charmaine Greyling van Strangelove Studios het vir ons hierdie wêreld geskep. Jy koop letterlik ’n 3D-omgewing, amper soos ’n parallelogram, en dan voeg jy teksture en elemente by om jou wêreld te skep.

Emma, dit was jou eerste ervaring as vervaardiger. Wat was die uitdagings, leerkurwes en hoogtepunte?

Dit was een groot leerskool! Ek is gelukkig mal oor ’n spreadsheet, so daardie gedeelte van die rol het my nie afgeskrik nie. Dit is egter skrikwekkend om te besef hoe min jy werklik weet van ’n medium waaraan jy al redelik baie tyd spandeer het. Gelukkig was ons hele kreatiewe en produksiespan ongelooflik ondersteunend en hulle het my met soveel geduld om elke hoek en draai bygestaan. Ek kan sonder twyfel sê dat dit vir my die hoogtepunt was om opnuut deur mense se goedgunstigheid verras te word wanneer almal op ’n kreatiewe droom inkoop.

Die musiek vir ARK is deur Charl-Johann Lingenfelder gekomponeer. Dit moet baie bevredigend wees wanneer ’n storie uit jou pen só ’n besonderse klankbaan kry?

Johann: Die musiek in ARK is soos ’n vierde, alomteenwoordige karakter wat die emosie dryf. Ek en Charl-Johann het dadelik gekliek toe ons oor die fliek begin praat het. Ons verstaan die taal van musiek op ’n soortgelyke manier. Soos in die Three Colours-trilogie, wat soos die kreet van ’n land is, is daar in die klankbaan sprake van melodrama, maar ook van satire. Onthou, dis ernstig, maar ook bietjie nié-ernstig.

Hoe het julle op Ben Albertyn en Kristen Raath vir die hoofrolle besluit?

Johann: Dit was nogal ’n storie om die regte akteurs te vind. Ek ken Ben goed, maar ek het aanvanklik ’n akteur met ’n ander tipe voorkoms gesoek. Die akteur wat ons gekies het, se skedule het nie uitgewerk nie, so Ben het drie dae voor ons begin skiet het soos ’n wonderwerk ingevlieg. Hy is ’n baie intelligente akteur en het ’n dieper nuanse aan die karakter verleen as wat ek as skrywer my kon verbeel.

Ek het Kristen nie voorheen geken nie, maar ek was bekend met haar werk, soos in Wyfie. Ons het ’n baie spesifieke vrou vir die rol gesoek. Eintlik ’n “meisie”. En nee, dis nie ’n Freudiaanse glips nie. Ons het vir hierdie rol iemand nodig gehad wat jonk is, met onskuldige oë, maar ook met krag. Sy het ons weggeblaas.

KYK | Ark se amptelike lokprent 

Lees ook: JP Smith is sy tweelingbroer, Ruan, se wingman in die nuwe seisoen van Op my eish!

The post Silwerskermfees-kortfilm verken ruimte, liefde en Afrikaanse identiteit appeared first on rooi rose.

Koue Voete

Moenie ’n misdadiger aan sy skoene takseer nie.

Regisseur en skrywer: Lara Lourens.

Sy het aan die Performing Arts Lifestyle Institute in Pretoria studeer waar sy praktiese ervaring opgedoen  het in skryf, regie en toneelspel. Hoewel sy reeds haar teaterdebuut as regisseur gemaak het, is Koue Voete haar eerste professionele kortfilm as skrywer, regisseur en vervaardiger.

Die Bok

’n Verbitterde swanger vrou veg om haar roostuin te beskerm teen ’n bok terwyl haar huwelik verbrokkel.

Regisseur en skrywer: Philip van Zyl

Hy is ’n filmmaker van Pretoria wat ’n voorliefde het vir eg Suid-Afrikaanse stories met sterk menslike temas. Paul Thomas Anderson, Denis Villeneuve en Martin Scorsese tel onder sy gunsteling-filmmakers.

Onthou

Wanneer ’n jong, sorgelose hippie aansoek doen as verpleër by ’n streng, vol nonsens bejaarde dame, is daar reeds spanning vanaf die eerste woordewisseling. Tog ontwikkel hulle ’n dieper vriendskapsverhouding en leer mekaar hoe om die ander onvoorwaardelik te aanvaar. Ouderdom is net ’n getal, maar hartsvriende bly deel van jou bestaan.

Regisseur: Susan Coetzer

Sy is ’n bekroonde aktrise wat bekend is vir haar teaterdebuut in Diepe Grond, asook TV-reekse soos Daisy de Melker en Meester.

Skrywer: Elanie Rupping

Sy het haar deurbraak as skrywer met die tweede seisoen van die kykNET-jeugdrama Sterlopers gemaak. Sy is tans skrywer en teksredigeerder op die sepie Getroud met Rugby.

Vlees van my Vlees

Vyftien jaar ná ’n gruwelike motorongeluk vier ’n joviale man en sy kwadruplegiese vrou hul twintigste huweliksherdenking. Ten spyte van die romanse en selflose liefde noop die frustrasies van haar gebrek hulle om die waarheid van hul gebroke verhouding, verwyt, pyn en eie magteloosheid te trotseer.

Regisseur en skrywer: Matthys Boshoff

Hy het ervaring as skrywer vir televisie-drama en as regisseur op plaaslike sowel as internasionale advertensies. Hy ontwikkel tans ’n paar films.

Arts

André red beseerde diere, maar sy verhouding met die plaaslike veearts neem ’n donker draai wanneer sy ma begin inmeng …

Regisseur en skrywer: PG de Jonge

Hy het halfpad deur ’n joernalistiekgraad besef hy hou meer van fiksie. Nou maak hy flieks en laat die nuus oor aan ander.

Merk. Sny. Stoor.

Wanneer ’n psigologiese versteurde man se traumatiese verlede sy hede beïnvloed word ’n vreemdeling die slagoffer van sy eie trauma.

Regisseur en skrywer: Ricardo Liut

Hy is ’n multimedia- en grafiese ontwerp-dosent by die Noordwes-Universiteit. Hy het ’n BA in grafiese ontwerp en spesialiseer in fotografie, film en multimedia-ontwerp. Hy is tans besig met sy nagraadse studies. In 2015 was hy die regisseur van die kortfilm Die Monoloog saam met Zoo Productions.

En die wiele van die bus gaan om en om

Slapgat-busbestuurder Freddie Venter vervoer tien pasiënte van een geestesgestremde inrigting na ’n ander… en dan verloor hy sy vrag.

Regisseur: Pieter Grobbelaar

Hy smokkel al vir jare met ons harte en koppe danksy sy verhoogstukke, operas, televisiereekse en flieks.

Skrywer: Marina Bekker

Kolskoot

Fanus Niemand is toe iemand …

Regisseur en skrywer: Wimpie van der Merwe

Hy het in 2006 sy B-Tech-graad aan die Filmskool van TUT behaal het. Bekend vir sy rol as skrywer en regisseur van Karate Kallie werk hy sedertdien as skrywer, regisseur en kameraman in die filmbedryf.

Spoor(loos)

As ons maar net kon verdwyn.

Regisseur: Marisa Drummond

Sy het haar debuut as regisseur in die nuwe kykNET-sepie Getroud met Rugby gemaak.

Skrywer: Jannes Erasmus

Jannes is grootliks bekend vir sy grensverskuiwende teaterproduksies.

Oom

Ná oom Johan Booysens ’n jong man langs die pad optel, besef hy hoe gevaarlik die pad kan wees as mens nie jou geselskap ken nie.

Regisseur en skrywer: PJ Kotze

Hy is ’n filmmaker gebaseer in Johannesburg met ’n passie vir platteland-stories, regte klein-dorpie-karakters en avontuur. Ná vyf jaar van klasgee in film, is hy tans voltyds toegewy om sy ondervindings as ’n Suid-Afrikaner te probeer interpreteer en uit te leef deur film as medium.

Hum

Thomas hoor die verlammende hum-klank al vir so lank dat hy skaars kan onthou wanneer dinge vir hom begin skeef loop het. Met die hulp van sy psigiater, dr. Swart, begin hy om sy verlede te ontleed sodat hy vir Jana, die liefde van sy lewe, terug kan wen ten spyte van die onafwendbare gedreun asook die gevoel dat hy konstant dopgehou word …

Regisseur en skrywer: Willem Grobler

Sy bekroonde kortilm, The Great Gatsby: Redemption, is binnekort by die 2016 Durban Internasionale Filmfees te sien.

Die Muse

’n Naïewe jong verpleegster word as oppasser aangestel om na ’n briljante, maar moeilike skrywer met Aspergersindroom om te sien. Maar, as ’n skrywer sukkel om leuens te vertel, hoe is hy veronderstel om stories op te maak?

Regisseur en skrywer: Frannie van der Walt

Plankekoors

Daar’s ’n fyn lyn tussen opwinding en vrees. Dis net woorde. Jy’t ’n keuse. Veg of vlug?

Regisseur: Nini Conradie

Plankekoors is haar debuut as regisseur.

Skrywer: Ludwig Binge

Hy is ’n vryskut-akteur en het deelgeneem aan verhoogproduksies soos Balbesit, Cabaret en Samsa-masjien, sowel as die speelfilm Johnny is nie dood nie.

Die Biker

’n Motorfietsryer kies die oop pad as ontvlugting. Het hy die regte afdraaipad gekies?

Regisseurs: Geoffrey Butler en Lisba Vosloo

Geoffrey is ’n vryskut-regisseur en -redigeerder van verskeie televisieprogramme en advertensies. Hy het onlangs die mede-regie van ’n dokumentêre film oor Pieter-Dirk Uys behartig.

Lisba is ’n bekroonde dokumentêre filmmaker, regisseur en redigeerder wat al op verskeie programme gewerk het wat strek van opera tot oorlog.

Redigering: Henry Cloete

Beloofde Land

Lodewyk Mouton is die naïewe heerser van die diktatorskap Anskroepolis. Wanneer ’n groep sosialistiese rebelle by sy herehuis opdaag en dreig om hom te onttroon, word Lood gekonfronteer met die realiteit van sy borrel-bestaan en die ellende van sy volk.

Regisseur en skrywer: Mia Cilliers

Sy is ’n skrywer en regisseur van Kaapstad met ’n agtergrond in dokumentêre films, webreekse en werklikheidstelevisie.

The post kykNET Silwerskermfees: Die kortfilms appeared first on rooi rose.