Deur Maryke Roberts. Foto’s: Maryke Roberts 

James Reid, Accolade SA bestuurder, het gaste van regoor die wêreld, tot sover as Japan, Uganda, Indië, Korea, by die geleentheid verwelkom. Hy het gesê Kaapstad is nie gereed om haar arms op te gooi vir internasionale toeriste na die toerisme-stilte van die pandemie nie, maar die wynwêreld verwelkom gaste van oraloor om die woord oor die bekroonde Suid-Afrikaanse wynbedryf te gaan versprei. 

Gaste kon tydens sononder buite op die stoep na Tafelberg staar, terwyl hulle aan Bitterballen en Fillet bearnaise met Da Luca Prosecco; Fish Hoek Sauvignon Blanc 2022 of die Flagstone Dynamite Factory Shiraz 2021 kon teug.

Soos met vanjaar se CapeWine2022 wynskou in Kaapstad, was die aand se tema ook volhoubaarheid – iets waarop Accolade Wines baie gesteld is. Accolade Wines het meer as 1 400 werknemers in Australië, die Verenigde Koninkryk, Europa, Asië, Suid-Afrika, Nieu-Seeland en Noord- en Suid-Amerika en voer jaarliks drie miljoen ses bottel kiste van sy Suid-Afrikaanse portefeulje, wat die handelsmerke Flagstone, Kumala en Fish Hoek insluit, uit. Van die bekende Australiese en Nieu-Seelandse handelsmerke onder hul vaandel, sluit onder meer Hardys, Banrock Station, Mud House, Petaluma en House of Arras, in. 

Die onderneming se Europese vertakking is sedert 2020 koolstofneutraal en is ook koolstofneutraal in die Verenigde Koninkryk met SA wyne en poog om vroeg 2023 heeltemal koolstofneutraal in Suid-Afrika ook te wees. James het vertel hulle het 30% elektrisiteit en 25 persent water met produksie gespaar en ondersoek ’n 75 kW sonkragstelsel en om meer reënwater te oes. Herwonne glas, wyne wat in bulk verskeep word en hul koolstof voetspoor halveer en ook laer alkoholwyne, is alles deel van hul volhoubaarheidsprogram. 

“Ons is ook deel van soveel sosiale opheffingsprojekte, waaronder beter werksomstandighede vir plaaswerkers. SA het ’n geskiedenis – ons ontken dit nie – maar daar is soveel positiewe dinge wat hier gebeur.” 

Die spyskaart vir die aand deur Den Anker se sjef, Doekle Vlietman, was ’n vertoonvenster van die Kaap en alles van volhoubare bronne afkomstig. Nie net die vleisdisse nie, maar ook vegandisse is voorgesit. Hy het vertel dat volhoubaarheid en naspeurbaarheid baie belangrik is vir Den Anker.  

Gaste kon tydens sononder buite op die stoep na Tafelberg staar, terwyl hulle aan Bitterballen en Fillet bearnaise met Da Luca Prosecco; Fish Hoek Sauvignon Blanc 2022 of die Flagstone Dynamite Factory Shiraz 2021 kon teug. 

Carla Stokes het die lewendige musiek verskaf. 

Aandete van Den Anker se bekende mossels in ’n roomsous; bees carpaccio of geroosterde blomkool met hummus en kekerertjies is met die Flagstone Tributary Chenin Blanc 2021 of Flagstone Fiona Pinot Noir 2021 geniet. Hoofgereg van vars gekweekte kabeljou met borrie ber blanc geroosterde groente; die Springbok potjie of geroosterde groente en lensie lasagne, is met Flagstone Treaty Tree Sauvignon Blanc/Semillon 2019 en Flagstone Dark Horse Shiraz 2018 bedien. 

Nagereg was kaasborde en fugde bruintjies met Flagstone Ice Vine Dried Sauvignon Blanc 2016 en die Flagstone Writer’s Block Pinotage 2020. 

Gerhard Swart, hoof wynmaker by Accolade SA en ook Flagstone se wynmaker, het vertel al hul wyne is 100% veganisties. “Ons wynkelder en proelokaal is naby die see in die Strand in Paardevlei geleë in ’n historiese 1901 dinamietfabriek, wat deur die bekende argitek Sir Herbert Baker ontwerp is. Flagstone het in 1998 in die Waterfront sy deure geopen, voor dit na Paardevlei geskuif het. Die proelokaal is onlangs opgeknap.” 

Hy het met die bekendstelling van die Dynamite Factory Shiraz 2021 gesê: “Daar is stories agter elkeen van ons wyne.” 

Lees ook: Stellenbosch weer gasheer vir fisiese Woordfees

The post Volhoubaarheid die wagwoord met dié wyn appeared first on rooi rose.

Erdwurms kan nie kosafval als verwerk nie. Dit is te ingewikkeld om alewig in die kombuis te sorteer. Om die lewe vir jouself makliker te maak, is dit beter om die proses vir ’n bokasji-kombuisdrom te volg en dan erdwurms te gebruik om die kompos tot humus te verwerk. Humus is nie kompos nie. Dit is kompos wat só fyn afgebreek is dat dit uiteindelik net ’n gronddeeltjie is. Dit is wat erdwurms maak. Om te verwys na erdwurmmis as kompos is eintlik ’n sonde, want dit is die nauur se manier om grond te voed. Jy kan dit op jou eie werf naboots deur erdwurms in jou eie wurmplaas aan te hou.

Dit is egter ’n tydsame proses en jy gaan nie oornag berge erdwurmafskeidings hê nie. Dit is wel die moeite werd aangesien die humus wat hulle maak lekker fyn en gerieflik is om in die plantgaatjies te gooi waanneer jy saailinge plant.

Al wat jy nodig het om jou eie wurmboerdery te begin, is houers met dreinering sodat jy die vloeistof wat in die proses afloop, kan opvang. ’n Ou bad werk uitstekend. Twee emmers of plastiekkratte wat binne-in mekaar pas werk ook goed. Maak gaatjies in die boonste krat se vloer sodat die vloeistof in die onderste krat kan afloop.

Plaas dreineringsklippies op die vloer van die bad of boonste houer en bedek dit met skadunet of landskaplap wat water deurlaat. Plaas baie growwe tuinafval (soos takke) bo-op. Gooi dan geskeurde karton, papier en droë tuinafval soos droë blare bo-op. Daarna volg ’n laag groen tuinafval soos vars snoeisels en onkruid sonder sade en bolletjies. Kombuisafval soos groenteskille, koffiemoer en teesakkies werk goed, maar nie iets met skerp geure soos sitrus, uie en rissies nie. *Dit is hoekom ek die bokasjidrom gebruik en dan bloot die kompos saam met die tuinafval vir die erdwurms voer sodat hulle humus kan maak.

Plaas nou die erdwurms in die wurmplaas – jy kan dit by kwekerye koop. Dit is spesiale erdwurms wat spesifiek kompostering doen. Hulle staan bekend as ‘Red Wiglers’. Bedek dan met nog droë tuinafval of kompos en maak effens klam. Bedek met ’n paar lae karton of skadunet om dit klam te hou. Hou dit altyd op ’n koelerige, maar nie te koue plek.

The post Kostuin, deel 3 appeared first on rooi rose.