Ilse Klink se talente is so wyd soos die horisonne van die Noord-Kaap. Sy was in musiekblyspele soos Chicago en Mamma Mia! en ernstige teaterstukke soos Kristalvlakte en Krismis van Map Jacobs. Op TV en in film kan sy enigiets van drama tot komedie doen en haar vertolking van Maggie in Nêrens, Noord-Kaap het haar in die harte van kykers ingespeel.

Maggie is ‘n baie geliefde karakter. Sy is ma vir almal, amper vir die kykers ook, en vroue soos sy is dikwels die fondasie van soveel families. Wat sal jy die meeste van haar onthou?

Ja, Maggie is dit alles. ’n Baie liefdevolle vrou wat eintlik die vroulike hoof van daardie familie is. Ek dink wat ek die meeste van haar gaan onthou, is dat sy sterk is en nie op haar mond geval is nie. Sy noem ’n ding op sy naam, praat die waarheid en sy sê dinge wat mense nie wil hoor nie, maar sy is ook baie beskermend oor haar seuns, ál haar seuns. Sy is regtig die toonbeeld van ma-wees. Ook ’n vrou wat in Deel II haarself en haar onafhanklikheid vind en meer word as net ’n ma vir hierdie volwasse mans. Maggie kry haar plekkie in die son.

Maggie en ou Lourens (Frank Opperman) het ’n baie spesiale verhouding, en van jou en Frank se tonele is ontsettend hartroerend. Hoe was dit om teenoor hom te speel?

Frank is een van die mees spesiale mense wat ek ken, regtig ’n wonderlike mens. Hy is ’n interessante mens en sy manier van goed doen, is wonderlik. Met die uitsending van die eerste seisoen, het ek en Frank om die draai van mekaar in Johannesburg gewoon en ons inkopies by dieselfde Spar gedoen. Ons het altyd gespot dat as ons mekaar daar raakloop, ons in karakter sal gaan en ’n toneel uitspeel. Ongelukkig het dit nooit gebeur nie en nou woon hy in die Kaap. Ons werk altyd baie lekker saam en hy laat my lag!

Dit was maklik om teenoor hom te speel, want hy het Lourens so spesiaal gemaak – hulle verhouding, vriendskap en omgee vir mekaar. Hy gee werklik om vir mense en ek dink dit is wat op kamera oorkom. Dit was ’n besondere spesiale tyd.

Jou CV en talente is te veel om te noem; TV, verhoog, musiekblyspele, films. Hoe handhaaf jy balans?

Dis moeilik om balans te hou, maar as ek sien dat ek nou te veel televisie gedoen, sal ek teater doen. Afrikaanse teater is my eerste liefde. Ek sal baie graag ernstiger Afrikaanse teater in 2025 wil doen, maar ons sal sien. Ek doen dit soos die werk kom en kies nie die een bo die ander nie.

Wat was jou hoogtepunte met die maak van Nêrens, Noord-Kaap?

Die mense agter die skerms. Nie net die akteurs nie, maar almal aan die produksiekant ook. Die mense wat op Nêrens gewerk het, is die spesiaalste mense wat ek al ooit mee gewerk het. Daar was ’n gevoel van vrede en kalmte. Almal het mekaar vasgehou. Dit was die ongelooflikste ondervinding want daar was nooit enige spanning op stel nie. Dis ’n voorreg om in die Noord-Kaap te skiet en dit was ook ’n hoogtepunt. Dit gee jou ’n sin van wat hierdie reeks moet wees. Ons kon daardie rustigheid oorbring op die skerm, want dit is werklik hoe dit was.

Lees ook: Daneel van der Walt gesels oor vasbyt en ‘Nêrens, Noord-Kaap’ se sterk Suzette

Die reeks is met tye hartseer en kykers erken dat die sakdoek altyd naby is, maar daar is tog ook ligte oomblikke. Was daar enige snaakse oomblikke wat agter die skerms gebeur het?

Albert Pretorius is ’n grapjas en as ons tonele saam gedoen het, het hy soms ná die toneel klaar was, aangegaan en snaakse goed kwytgeraak. So, die stel was baie rustig, maar met Albert daar, was daar altyd iets om oor te lag. Ek is baie lief vir hom.

Was vir jou die mooiste van die Noord-Kaap?

Die rustigheid. Elke deel van Suid-Afrika het sy mooi, maar ek dink die Noord-Kaap se stilte is wat dit so spesiaal maak. Vroegoggend is daar ’n stilte wat so mooi is.

Sonder om iets weg te gee, wat kan kykers van die res van die reeks verwag?

Hou die sneesdoekies byderhand. Ek dink harte gaan nog breek. Dis al wat ek gaan sê.

Lees ook: Vyf-vinnige-vrae met Melissa Willering oor ‘Nêrens, Noord-Kaap’

Wat is jou drome vir 2025?

Hierdie jaar het ek ’n plek bereik waar ek meer tyd saam met my familie wil deurbring. Ek is van Augustus af al rustiger en ek besef ek is bevoorreg om dit te kan doen. Ek mis my mense, my ouers en my kinders. My droom vir 2025 is dus om meer teater en dalk feeste te doen sodat ek meer tyd saam met hulle kan spandeer.

Nêrens, Noord-Kaap Deel II wys Dinsdagaande om 20:00 op kykNET (DStv-kanaal 144). Episodes is ook op Catch Up op DStv Stream beskikbaar.

Lees ook: Van Tannie Ans tot Marion Monroe: Marion Holm is ’n aktrise vol verrassings

The post Sterk, liefdevol en eerlik: Ilse Klink oor haar rol as Maggie in ‘Nêrens, Noord-Kaap’ appeared first on rooi rose.

Johannesburg. Vroegoggend.

’n Blonde vrou word in haar motor wakker. Daar is bloedvlekke op haar moulose top. Sy kyk in die truspieëljie.

’n Vrou met ’n serp wat haar kop bedek wag langs die pad. ’n Mini met ’n persoonlike nommerplaat stop langs haar en sy klim in. Sy haal haar serp af en glimlag vir haar vriendin.

’n Gespierde man doen verbete oefening in sy woonstel met ’n panoramiese uitsig op Johannesburg.

’n Vrou drink koffie terwyl sy na die reuse-diamant in haar trouring staar.

’n Jong man met ’n rugsak kom aangestap en sien hoe die blonde vrou vir haarself steke in haar mond sit.

Só skop die eerste paar minute van kykNET se nuwe dramareeks, Hartklop, af. Die reeks is vanaf Dinsdag 18 Julie 20:00 op kykNET (DStv-kanaal 144) en sal ook op Catch Up beskikbaar wees. Ses karakters, elkeen met sy eie storie, maar een ding in gemeen: Beyers Naudé Akademiese Hospitaal, ’n staatshospitaal in Johannesburg en die top-opleidingshospitaal in die land.

Van die ses hoofkarakters is drie dokters wat in die eerste episode vir hulle eerstejaarinternskap aanmeld. Simoné Pretorius (Binnelanders, Hotel) is Dr. Elani Breytenbach wat uit ’n bevoorregte huis kom en ’n regsgeleerde ma het wat alles vir haar dogter sal doen. Haar kliniese assistent en direkte hoof is Dr. Veronica Pietersen (Renate Stuurman) en die konsultant, oftewel die hoof van die afdeling, is Dr. Suzanne de Jongh (Marlee van der Merwe).

Carla Classen (Stroomop, Lioness) is Dr. Karima Salie wat haar konserwatiewe agtergrond wil agterlaat. Sy en Elani was kamermaats op Tukkies. Karima werk in ongevalle onder die kliniese assistant Dr. Louw van Onselen (David Louw) en die hoof van hulle afdeling is Dr. Daniel Strydom (Jacques Bessenger).

Dr. Fezile Nodada, vertolk deur Oros Mampofu (Skeem Saam, Savage Beauty), is ’n jong man uit die Oos-Kaap wat tussen westerse medisyne en Afrika tradisies staan – hy wil as chirurg kwalifiseer. Die kliniese assistent saam met wie hy werk, is Dr. Jolene Joubert (Leandie du Randt). Die konsultant van chirurgie is Prof. Gustav Coetzee (Dawid Minnaar). Christel van den Bergh is te sien as Anke Dempsey, ’n hoogse bekwaamde verpleegster in die noodafdeling.

Ander groot name in die rolverdeling (sommige deurlopend en ander gasrolle) sluit in Arno Marais, Rika Sennett, Thulani Mtsweni, Susan Coetzer, Vusi Thanda, Esmeralda Bihl, Elma Postma, Francois Jacobs en Bouwer Bosch.

Die hospitaaltonele is in sale en teaters by die Solomon Stix Morewa-gedenkhospitaal en by die Universiteit van die Witwatersrand in Johannesburg verfilm. Die mediese gevalle wat deel van die verskeie storielyne is, is alles gegrond op werklike gevalle en ’n span dokters en mediese kenners het as konsultante gedien. Opgeleide verpleegsusters het met die verfilming van die operasietonele gehelp om dit so realisties moontlik te maak.

Die reeks is deur Zoë Laband (The Girl from St. Agnes) geskryf en die regisseurs is Harold Hölscher en Christo Davids. Christo is ook te sien as Sollie, Dr. Veronica Pietersen se man.

Omdat die reeks grotendeels in die ongevalle/trauma-eenheid afspeel, was die grimeerspan van kardinale belang. “Ons het ’n klein span gehad, maar met baie talent. Die eer moet aan Ronwyn Jarret gaan. Sy was vir al die prosteses – soos borskaste, skedels en harte – en bloed verantwoordelik. Dit was niks vreemd om te sien hoe sy een of ander orgaan tussen tonele verf nie,” sê JP Potgieter, vervaardiger by Quizzical Pictures. Ander reekse op hulle kerfstok sluit Reyka, Desert Rose en iNumber Number in.

Wat maak hospitaalreekse so kykbaar?

“Ek dink dis omdat ons almal kan identifiseer met die karakters; die dokters én die pasiënte,” sê JP. “Die feit dat die dokters se eie stories afspeel teen die agtergrond van die pasiënte se krisisse, maak die stories baie dinamies en bring dit ’n natuurlike spanningslyn. Met Hartklop is dit nie anders nie. Elke episode het sy eie drama vir elkeen van die karakters – van die karakters wat in elke of bykans elke episode is tot die karakters wat net in een of twee episodes is.”

KYK: Die Hartklop-akteurs het ons meer vertel oor wat kykers kan verwag van dié splinternuwe drama!

· Hartklop begin op Dinsdag, 18 Julie om 20:00 op kykNET (DStv-kanaal 144) en sal ook op Catch Up beskikbaar wees.

Lees ook: Hartklop: kykNET se eerste hospitaaldrama-reeks gaan kykers boei  

The post Hartklop: leer ken die karakters in kykNET se eerste hospitaaldrama appeared first on rooi rose.

Akteur Neels van Jaarsveld sit vir die eerste keer die hoed van vervaardiger op met die nuwe kykNET leefstylprogram Op reis met my beste vriend.

Saam met sy miniatuur spikkel-worshond, Lulu, wat amper net so bekend soos hy is en selfs haar eie Instagramblad, @honnelulu het, kuier hy by vriende in die vermaaklikheidsbedryf – én hul troeteldiere. Daar word onder meer gekyk na dierevriendelike-restaurante, -akkomodasie en -aktiwiteite, liefdadigheidsorganisasies wat op diere fokus en selfs ’n kunstenaar wat troeteldiere skets en roomys wat spesiaal vir honde ontwerp is.

Dit is die eerste keer wat Neels as vervaardiger by ’n reeks betrokke is met sy produksiemaatskappy, Met Eish, wat aan die stuur van sake is. Die konsep van die program is deur Hildewald Groenewald bedink. Neels is ook die reeks se regisseur, en die hoofborg is Regal Pet Health.

Van die bekendes wat in Op reis met my beste vriend te sien is, is die sangeres Leah en haar twee jack russells, Miggie en Lila, wat ’n paar nuwe toertjies leer, die akteur Theodore Jantjies en sy boerboel Duke wat na ’n dierevriendelik-restaurant gaan, die aktrise Reandi Grey en haar goue apporteerhonde, Benji en Nina, wat onder meer ’n gidshond beter leer ken en Francois Jacobs en Nykie Pretorius en hul Staffordshire-terriërs wat besoek aflê by ’n pandjieswinkel wat dierevriendelik is.

Dis egter nie net bekendes en hul honde wat deel van die reeks is nie. Eloïse Cupido en haar katte, Phantom en Coco Belle, besoek ’n dieresiener en kuier by ’n aannemingsentrum vir katte. Die akteur Wilhelm van der Walt en sy katte, Seymour en Freddie, word deur ’n dierekundige besoek.

Karlien Meiring het meer oor hierdie nuwe leefstylprogram by Neels gaan uitvind.

Wat het jou geïnspireer om betrokke te raak by ’n geselsprogram wat op troeteldiere gefokus is?

Ek is mal oor diere en troeteldiere. Ek vind hulle inspirerend en fassinerend. Hildewald Groenewald het die idee aan my voorgelê en dit het dadelik my aandag getrek.

Watter impak hoop jy sal die program op die troeteldierbedryf en troeteldiereienaars maak?

Die reeks gaan beslis die kyker op ’n opvoedkundige, emosionele, humoristiese en onvergeetlike reis neem. Ek hoop die program sal mense inspireer en inlig oor die fantastiese instansies, wonderlike mense en diere en liefdadigheidsheidorganisasies in ons land. Ook dat troeteldiere ongelooflik spesiaal is.

Elke dag wat ons die program geskiet het, was ’n belewenis – die mense, die diere, die plekke. Die passie, opwinding en toewyding van almal betrokke was baie inspirerend.

Hoe balanseer jy jou besige skedule met die versorging van jou miniatuur spikkel-worshond, Lulu?

Ek is gelukkig dat Ma Lydia na haar kan kyk as ek moet werk. Hulle is beslis beste vriende!

 

View this post on Instagram

 

A post shared by honne.lulu (@honne.lulu)

Watter raad sal jy aan iemand gee wat dit oorweeg om vir die eerste keer ’n troeteldier te kry?

Ek glo troeteldiere help mense ongelooflik baie. Om onvoorwaardelike liefde, lojaliteit, opgewondenheid en positiewe energie daagliks te ervaar, help beslis met jou geestelike en fisieke gesondheid.

Dis ongelooflik opwindend en wonderlik om ’n troeteldier te kry. ’n Mens moet maar net in ag neem dat spasie, kinders, en begroting moontlik ’n rol speel in die besluit, maar ek sal dit sterk aanbeveel.

 

View this post on Instagram

 

A post shared by honne.lulu (@honne.lulu)

Is daar kwessies wat verband hou met troeteldiere of dierewelsyn waaroor jy veral passievol is?

Ek ondersteun enige instansie wat hulp en ondersteuning aan diere bied. Ek is ook ’n ambassadeur vir die Cape Leopard Trust.

Op reis met my beste vriend wys Saterdae om 18:00 op kykNET, DStv-kanaal 144.

Lees ook: Vyf-vinnige-vrae-Vrydag met ChatGPT, die kunsmatige intelligensie-taalmodel

The post Vyf-vinnige-vrae-Vrydag met Neels van Jaarsveld – oor sy nuwe leefstylprogram, Op reis met my beste vriend appeared first on rooi rose.

Vanaf 20 April om 20:00 op kykNET (DStv-kanaal 144) maak Amy Kleinhans-Curd, Mariska Thorpe, Karen Schwendtke, Candice Bester, Michelle van Zyl en Anita Lloyd hul droomhuise se deure, hulle harte en hulle lewens vir kykers oop.

Skuif nader om te sien hoe hierdie ses unieke, interessante en dinamiese huisvroue ondernemings begin, aantrek vir sukses, stylvol rondrits, skoonheidsroetines gedissiplineerd navolg en dít alles met hul veeleisende persoonlike lewens balanseer. Hulle deel ook die struikelblokke, nederlae en oorwinnings so tussen die prettige en humoristiese oomblikke deur.

Die Real Housewives van die Wynlande is in en om Franschhoek, Paarl, Stellenbosch en Somerset-Wes verfilm en deur Red Pepper Productions vervaardig.

Hier is ’n paar interessante feite oor die ses vroue van Die Real Housewives van die Wynlande om jou behoorlik nuuskierig te maak:

Die voormalige Mej. Suid-Afrika Amy Kleinhans-Curd is met die Nieu-Seelandse sakeman Leighton Curd getroud. Amy is ’n ma van vier, woon in Franschhoek en is die direkteur van verskeie maatskappye, waaronder die huiswerkhulplyn vir onderwysers, Dial-A-Teacher, wat in 2000 saam met die Nelson Mandela Fonds gestig is. Hul plase in Franschhoek, Swellendam en in die Wieg van die Mensdom is net ’n paar van die dinge wat Amy besonder besig hou. Sy stel binnekort haar eie Cap Classique-vonkelwyn sowel as haar eie velsorgreeks onder die naam Amelia (haar geboortenaam) bekend. Sy is ’n betrokke ma en reël, onder meer, ’n jaarlikse swemfees vir die skool wat haar kinders bywoon.

Mariska Thorpe, wat geruime tyd ’n welvaartbestuurder was, woon saam met haar man, Quintus, en hulle dogter, Ocean, in dieselfde kompleks in Franschhoek as Amy en haar gesin. Mariska hou nie van stilsit nie. Sy en Quintus verhandel aandele, maar sy bestuur ook ’n onderneming wat tweedehandse klere nuwe lewe gee. Mariska en haar man is kranige landlopers, oftewel trail runners, en sy is ’n perfeksionis in alles wat sy aanpak.

Karen Schwendtke woon in Val de Vie tussen die Paarl en Franschhoek. Sy is ’n suksesvolle sakevrou met ’n BCom Rek-graad van UP en ’n MBL van Unisa agter haar naam en ook ’n graad in Visual Basic-programmering van Harvard in Amerika. Ten spyte van lang werksure maak sy ook tyd vir groot liefdadigheidsprojekte. In tye van nasionale nood het sy met die voorsiening van water en veevoer gehelp. Kinders lê haar na aan die hart en sy is betrokke by fondsinsameling vir CHOC (Childhood Cancer Foundation SA). Sy is die trotse ma van twee dogters, Saskia en Arabella.

Candice Bester bly in die Aan de Weber-landgoed in Stellenbosch. Sy is die ma van Emma en is getroud met Werner. Sy was lank as sangeres in die uitvoerende kunste betrokke, maar het die verhoog vir die korporatiewe wêreld verruil. Daar het sy, onder meer, haar merk gemaak as die bemarkingsbestuurder vir Quench, wat deur die TFG-groep gekoop is. Candice droom egter steeds daarvan om in die toekoms weer agter die mikrofoon te staan. Sy speel graag gholf, het ’n groot versameling whiskies en fasiliteer ’n maandelikse vasvrae-aand. Candice en Werner is in die proses om ’n restaurant oop te maak.

Michelle van Zyl is ’n mediese dokter wat in trauma gespesialiseer het en daarna ’n suksesvolle algemene mediese praktyk gehad het. Deesdae is sy ’n estetika-dokter wat haar op behandelings soos Botox toespits. Sy en haar man, dr. André Olivier, woon in die Boskloof Eco Estate in Somerset-Wes. Hulle is die ouers van Hanno en Heidi. André het ook twee seuns uit sy vorige huwelik, wat in Namibië woon. Michelle onthaal graag en droom daarvan om haar eie geselsprogram op TV te hê.

Anita Lloyd woon buitekant die Paarl in ’n pragtige vallei. Sy en haar man, Boyce, is skoolliefdes en sy het haar loopbaan as onderwyseres opgegee om hom in sy beroep te ondersteun. Hulle het vir tien jaar dwarsoor die wêreld vir Boyce se werk gewoon voor uiteindelik na Suid-Afrika teruggekeer het. Boyce is sedert 2016 die uitvoerende hoof van KWV. Anita het ’n meestersgraad in linguistiek en het ’n voorliefde vir die studie van tale. Buiten haar man en haar katjies is Anita se grootste prioriteite haar huis, kuns en reis.

Die Real Housewives-franchise het in Maart 2006 sy debuut in Amerika met The Real Housewives of Orange County gemaak. Intussen is daar elf verskillende reekse in Amerika vervaardig en 21 internasionale weergawes waaronder reekse tel wat in Durban, Johannesburg en Kaapstad geskiet is. Die Real Housewives van Pretoria, wat in Oktober 2022 op kykNET begin het, was die eerste Afrikaanse reeks.

Die Real Housewives van die Wynlande begin op 20 April 2023 om 20:00 op kykNET (DStv-kanaal 144).

Lees ook: Teatersterre skitter by toekennings

The post Ontmoet die ses vroue van Die Real Housewives van die Wynlande appeared first on rooi rose.

DeWet koester al 12 jaar lank net een groot droom: Hy wil die volgende Tarzan op die grootdoek speel. Die meeste mense sou dink dis ’n hekkie te hoog, maar hierdie boorling van George in die Suid-Kaap het die afgelope jare aanhou bou aan sy droom en nooit ophou glo dat dit wel eendag waar sal word nie. Die video’s van Tarzan-kortfilms wat hy vir sy YouTube-kanaal met 207 000 intekenare maak, het al ’n verstommende 50 miljoen kykslae gehad. En dit doen DeWet alles met een doel voor oë: dat Hollywood hom raaksien en hom die volgende Tarzan maak.

Rian van Heerden, bekende radioman en TV-aanbieder en ook vervaardiger van reekse soos Bolhuis, Die siener en Liefde sonder grense, het reeds in 2010 van DeWet gehoor en hom toe as gas op sy program Rian gehad.

“Drie jaar gelede het ek in George ’n artikel in ’n plaaslike koerant oor hom gelees en ek het toe weer kontak gemaak in die hoop dat hy sal instem dat ons ’n dokumentêre reeks oor hom maak,” sê Rian. “Dit was harde werk om hom te oortuig. Hy is so gefokus daarop om Tarzan te word dat hy bang was dit sal sy aandag aftrek.”

Dit was nie net DeWet wat oorreed moes word nie. Ook die Edgar Rice Burroughs-stigting, wat na die belange en kopiereg van die skrywer van, onder meer, Tarzan omsien, moes toestemming gee vir ’n span uit Suid-Afrika om hierdie merkwaardige storie te vertel.

Wat kan kykers verwag?

“Dit is ’n storie van aanhou probeer – al weet jy jy mik vir die sterre,” sê Rian. “DeWet gee net nie op nie. Ek het in my lewe nog nie iemand ontmoet wat so lank toegewyd is aan een droom nie. Dis byna bomenslik wat hy reggekry het.”

DeWet se tweelingbroer, Roelof, is sy grootste ondersteuner en stap die pad saam met hom. “DeWet se droom is hulle al twee se droom,” sê Rian. Die Tarzan-handelsmerk en alles wat daarmee saamgaan, is nog enorm gewild in die wêreld. Vir die ware aanhangers gaan dit oor veel meer as net ’n held wat in die oerwoud woon. “Vir hierdie aanhangers is DeWet ’n verteenwoordiger van dit waaroor hulle liefde vir die Tarzan-karakter gaan.”

In die vyf episodes word daar gekyk na die geskiedenis van Tarzan oor die jare. Kykers ontmoet DeWet se familie en daar is onderhoude met, onder andere, Neil Sandilands wat saam met die Du Toit-broers ’n fliek gemaak het. Ons reis ook saam met DeWet – al die pad van George tot in Los Angeles waar hy in sy Tarzan-kostuum die bekende Hollywood Boulevard besoek.

“DeWet is werklikwaar ’n sprekende voorbeeld van iemand wat so toegewyd is dat die heelal op die ou end na hom sal omsien,” sê Rian.

Tarzan van George begin op Sondag 26 Februarie 20:00 op kykNET (DStv-kanaal 144).

Lees ook: Vyf-vinnige-vrae-Vrydag met die nuwe kykNET-reeks, Mooiweer en warm-aktrise Carla Smith

The post Wanneer jy niemand behalwe Tarzan wil wees nie… appeared first on rooi rose.

Louis en Albert was vir reekse soos Fynskrif, Troukoors en Die boekklub verantwoordelik en hulle het met Fraksie beslis weer ’n groep merkwaardige karakters geskep.

Edwin van der Walt, bekend vir sy werk in teater, in TV-reekse soos Fynskrif, Troukoors en Waterfront en in flieks soos Wonderlus en Die pro, vertolk die rol van Schalk Smit. Schalk is ’n beleggingsportefeuljebestuurder by T&M Holdings, wat aan die miljardêr Tiaan du Toit, behoort. Schalk se groot droom is om ’n dollarmiljoenêr te word en niks sal in sy pad staan om dit te bereik nie. Op die oog af is hy warm en vriendelik, maar onder alles skuil ’n sakeman wat nie bang is om kanse te vat nie. Hy is trots op sy rugbyspelende seun, verdra sy rebelse dogter en het ’n komplekse verhouding met sy vrou. Schalk is oorspronklik van Kimberley en smag daarna om tot die binnekring van Stellenbosch se elite toegelaat te word.

Karlien Meiring het by Edwin van der Walt gaan uitvind wat dit verg om so ’n komplekse karakter te vertolk en of dit sy lewensuitkyk as jonggetroude verander het.

Jy speel ’n komplekse karakter in Fraksie. Hoe het jy daarop voorberei om die pa, man en ambisieuse sakeman te vertolk?

Louis en Albert se tekste gee klaar vir ’n akteur al die “bestanddele” met die volronde akteurs wat hulle skep. Jy moet dan net die resep volg en jou eie speserye byvoeg om jou karakter in te kleur. Ek is nie ’n pa nie en dit was dus uitdagend. Dit was wel vir my makliker omdat ek teenoor Roeline Daneel, wat ’n ma is, gespeel het. Sy het baie gehelp om daardie omgewing natuurlik te skep. Ek het ook tyd saam met Alex van Dyk en Jana Malan, wat my kinders speel, deurgebring sodat ons ’n band kon vorm en só vertroue kon ontwikkel. My ervaring as kind het my ook gehelp.

Ek is onlangs getroud wat my gehelp het om Schalk as man te vertolk. Ek en Roeline het so lekker teenoor mekaar gespeel – sy is ʼn warm, talentvolle en lieflike mens en was bereid om saam met my “tennis” voor die kamera te speel. Ons het die meeste van die tyd op stel saamgelag hoewel ons in die tonele meeste van die tyd op mekaar gil.

Ek kon baie van myself in Schalk se gedrewe kant sien. Ons het onlangs ’n onderneming begin en ek het daar geleer dat die bestuur daarvan jou vereis om altyd die beste keuses te maak, al maak dit jou ongewild. Schalk word maklik gesien as iemand wat oor ander mense loop, maar hy het wonde uit sy grootworddae en verlede. Ek wou wys dat daar ’n rede vir sy komplekse morele kompas is. Dit was seker my grootste uitdaging, om impulse te ontwikkel wat heeltemal anders as my eie is en nie op empatie gegrond is nie. Ek kon regtig kanse met my spel vat.

As jy enige ander karakter in Fraksie kon vertolk, wie sou dit wees en hoekom?

Ek is mal oor die karakter Bibi, Nina se suster. Ek dink die karakter is ‘n enorme uitdaging om te vertolk. Mense maak haar dalk af as ’n interessante karakter wat vir bietjie humor sorg, maar daar’s groot weerloosheid agter haar dryfkrag. Dit moes as ’n akteur ’n lieflike karakter gewees het om in te delf. Om daardie humor met soveel weerloosheid te kon uitbring, sou vir my ‘n groot uitdaging gewees het en dus ook vir my die lekkerste gewees het.

Hoe was jou en Izel se wittebrood? Waar het julle dit gevier en wat is jou hoogtepunte?

Ons wou oorspronklik Thailand toe gegaan het, maar het toe besluit Turkye was ‘n beter keuse omdat ons al soveel goeie dinge daarvan gehoor het. Ons het nie verwag dat dit só ongelooflik lekker sou wees nie! Kappadosië, die streek waar die lugballonne in die oggend opstyg, was ’n groot hoogtepunt. Die atmosfeer in daardie klein woestyndorpie was amper magies. Ons het in ‘n grot-hotel gebly en kon sien hoe die lugballonne saam met die son opkom, dit was ’n ongelooflike ervaring. Daar is regtig nie woorde of eers foto’s wat daardie tipe mooi kan vasvang nie. Die immergroen kusdorpie Kaş, was net so lekker met sy nou stegies en restaurante met lewendige musiek. Ons het ook op ’n antieke teater afgekom wat my net weereens laat besef het dat as dié teater ná al die jare nog bestaan en saak maak, moet daar tog ’n doel met teater wees. Ek is mal oor kosmaak en het aan Turkye se frikkaddelkoftas gesmul, ek het dit seker sewe keer bestel!

 

View this post on Instagram

 

A post shared by Marguerite van Eeden (@margueritevaneeden)

Bron: @margueritevaneeden Foto: @robynnephotographyby

Het jou karakter, Schalk, jou iets geleer oor hoe om ’n goeie huweliksmaat te wees?

Hy het my beslis baie geleer oor watter tipe huweliksmaat ek nié wil wees nie! Ek het raakgesien hoe selfsug en narsisme iets is waarvan ’n mens baie bewus moet wees omdat dit maklik is om onbewustelik in gewoontes te verval waar een mens altyd die besluite maak. ’n Mens moet doelbewus jou maat in ag neem sodat julle nooit ophou om mekaar te ken nie. Schalk vra nooit in Fraksie vir Nina wat haar drome is en of hy haar kan help met haar eiendomsagentskap nie. Dis ‘n les wat ek en my vrou by ons ouers ook geleer het; dit wat vir jou huweliksmaat belangrik is, moet jy ook belangrik ag en voortdurend in belangstel.

Met watter karakter wat jy al vertolk het, identifiseer jy die meeste en hoekom?

Daar is iets in elke karakter wat ek altyd moet vind waarmee ek kan vereenselwig. Die aspekte van die karakter waarmee ek dalk nie kan vereenselwig nie, vereis dat ek soortgelyke oomblikke in my eie lewe gaan soek wat ek met die karakter s’n kan vergelyk. In elke karakter wat ek al vertolk het, is daar iets van my. Ek hou byvoorbeeld altyd dagboek vir ‘n karakter waarin ek hul gedagtes en idees neerskryf. Dis nie altyd maklik as akteur om hierdie ongemaklike deure oop te maak wat ’n mens weerloos maak nie. Ek voel egter dis my verantwoordelikheid om eg te wees sodat kykers hulself of iemand wat hulle ken, in ’n karakter kan raaksien. Ek het al gevind sulke eerlike toneelspel is waarby kykers ook die meeste aanklank vind.

Moenie Fraksie op Dinsdae om 20:00 op kykNET (DStv-kanaal 144) misloop nie. Dit is ook op Catch Up beskikbaar.

Volg Edwin op Instagram!

Lees meer: Vyf-vinnige-vrae-Vrydag met die Suid-Afrikaanse avonturier Chris Bertish

The post Vyf-vinnige-vrae-Vrydag met Fraksie-akteur Edwin van der Walt appeared first on rooi rose.

Bekende kykNET-persoonlikheid en troubeplanner Aleit Swanepoel sterf

 

View this post on Instagram

 

A post shared by Aleit Swanepoel (@aleitswanepoel)

The Aleit Group het met ’n verklaring op sosiale media die hartseer nuus bevestig:

“Dit is met groot hartseer dat ons julle van die afsterwe van ons stigter, Aleit Swanepoel, verwittig. Aleit is in sy slaap oorlede, en hoewel daar geen verdere inligting op hierdie oomblik is nie, vra ons dat almal sy familie in jul gedagtes sal hou, terwyl hulle deur hierdie moeilike tyd gaan. Aleit was ‘n innoveerder, perfeksionis en kreatiewe genie wie se flambojante persoonlikheid en toewyding baie gemis sal word. Ons sal voortgaan om sy groot nalatenskap deur die Aleit-ondernemings en -entiteite te handhaaf en te koester.”

 

View this post on Instagram

 

A post shared by Aleit Swanepoel (@aleitswanepoel)

Hy word deur sy aangenome dogter, Kateline, oorleef en sal veral vir die kykNET-reeks Tyd Met Aleit onthou word.

Hooffoto: Instagram/@aleitswanepoel

Lees ook: rooi rose gesels met Melissa Myburgh van Dinge van ’n kind

The post Bekende kykNET-persoonlikheid en troubeplanner Aleit Swanepoel sterf appeared first on rooi rose.