Verskaf deur Dstv Stream

In ’n sterbelaaide rolverdeling wat die bekroonde veterane Sandra Prinsloo en Frank Opperman insluit, met sterk, magnetiese vertolkings deur medespelers soos Cindy Swanepoel en Jacques Bessenger, kry Leandie du Randt dit steeds reg om die kalklig in Koek se tweede seisoen, wat tans op DStv Stream te sien is, te steel.  

Met die eerste oogopslag lyk Veronika dalk net soos ’n mooi poppie aan die arm van Bellville se gevaarlike Tjoppie Terreblanche (Opperman) – geldgierig en op eie gewin ingestel. Maar soos wat die storie ontvou, blyk daar veel meer aan Veronika te wees. Dis ’n rol met vleis, en Leandie het haar tande behoorlik in dié een gesink.  

Leandie du Randt vertel meer: 

Koek se tweede seisoen is nou al oor die halfpadmerk. Is jy iemand wat na jou eie werk kyk? En wat gaan deur jou kop as jy jouself op skerm sien? 

Ek wag gewoonlik totdat al die episodes klaar uit is, maar dit is ook so ’n liefde-haat-verhouding tussen of jy vir jouself kyk of nie. Ek wil baie graag hierdie een kyk, want dit is die eerste keer wat ek saam met Christiaan Olwagen gewerk het, en dít was vir ’n lang tyd een van my grootste drome.  

Ek kyk 100% my werk om daaruit te leer. Ek is ’n verskriklike eerlike mens, en ek is nie sensitief nie, so ek is gaande daaroor as ’n regisseur vir my sê: “Daai was k*k, jy kan beter doen.” Sê vir my hoe ek dit beter kan doen sodat ek kan trots wees ná die tyd, eerder as wat jy op die dag my gevoelens probeer spaar. Uiteindelik is dit my werk om na jou, die regisseur, te luister. Dit is hoekom ek ’n akteur en nie ’n regisseur is nie. Ek wil hê jou visie moet gerealiseer word, want dit gaan nie oor my nie. Dit gaan oor daai karakter en die storie en dat ons dit saam so goed as wat ons kan, vertel. 

Wat was uitdagend van Veronika? 

Christiaan het vir my eendag probeer verduidelik dat ek, Leandie, is ’n labrador, maar my karakter is ’n kat. So, ek moet eers heeltemal van dier-persoonlikheid verander voordat ek in Veronika klim, want Leandi het die hele tyd uitgekom. En dit is nogal iets wat ek baie doen met my rolle. Ja, dit is onafwendbaar dat jy ’n deel van jouself in jou rolle ploeg – jy moet dit eenvoudig doen. Maar die dele van jou wat met die karakter ooreenstem, moet jy aandraai en die dele wat nie dieselfde is nie, moet jy afdraai.  

Ek het toevallig nog altyd rolle gespeel wat min of meer baie soos ek is, maar hierdie een is nogal anders, en Veronika druk haarself ook heeltemal anders uit. Ons stem ooreen in dat ons albei sterk vroue is wat daarin glo om vir jouself op te staan, maar ons leef en druk dit op heeltemal ander maniere uit.  

Akteurs is maar baie onsekere wesens. Ons sal altyd en heeltyd wil hoor: “Welgedaan! Mooi! Hier is vir jou ’n handeklap, jy het dit reg gedoen.” Maar dis nie hoe TV werk nie. So, TV is eintlik ’n baie ondankbare werk, en dit is hoekom jy baie hard aan jou selfvertroue en jou motivering moet werk, want jy kry nie noodwendig daardie direkte terugvoer of goedkeuring van die regisseur op stel of selfs van die publiek nie. Dís eintlik ook hoekom ek eers die reeks gaan kyk as al die episodes uit is – sodat ek terugvoer kan kry van mense na wie ek opkyk en vertrou. Ek sal kyk na wat die kykers gesê het, maar uiteindelik moet ek self besluit hoe ek daaroor voel, eerder as dat hul reaksie my beïnvloed.  

Maar wat as jy die dag nie so selfversekerd voel op stel nie en die boelie in jou kop dalk nie wil saamwerk nie?  

Dan moet jy ’n draai gaan stap, of ’n sigaret rook of ’n Rescue Remedy-pilletjie drink. The show must go on, right? Daar was al dae wat ek nie kon huil in tonele nie. Dan vra ek vir die tear stick, want ek kort net ’n iets wat my help sodat my liggaam kan onthou hoe dit voel om te huil, want ek is dalk net in ’n stadium waar ek nie kan huil nie. Dan is daar weer ’n stadium wat jy deur ’n moeilike tyd gaan, maar jy is besig met ’n komedie en jy wil eintlik begin huil. Dan moet jy dit terughou. 

Maar daar’s een ding wat ek geleer het wat my lewe verander het – een van my eerste regisseurs saam met wie ek gewerk het, Cobus Rossouw jr., het vir my gesê, want ek was so senuweeagtig en kon nie van daardie angs ontslae raak nie: “Wees senuweeagtig. Die karakter kan ook angstig wees. Enige mens is angstig, maar kyk hoe jy dit kan gebruik in die toneel. Miskien hou sy van die outjie, en dis hoekom sy angstig is.”  

So, moenie dit probeer wegsteek nie. Gebruik dit, want jy speel ’n mens met gevoelens, en ek dink dit is wat jy baie keer vergeet as jy ’n akteur is. Maak nie saak wat jy voel nie, jy speel ’n karakter wat ook gevoelens het. En jy wil juis hê mense moet kan aanklank vind by ’n opregte gevoel.  

Jy het al voorheen gesê jy wou baie graag saam met Christiaan Olwagen werk, maar hoe het die rol oor jou pad gekom?  

Soos die Here altyd ongelooflik in my lewe is, gebruik hy ander goed om my te kry by ’n heel ander ding. Dis hoekom ek altyd vir mense sê, in elke oomblik waar jy is in jou lewe, al is jy nou by ’n werk waarvan jy nie hou nie – daag op as jou 100% beste self. Want dalk loop daar iemand in wat iets in jou sien, wat jou dan ’n volgende posisie kan gee of die werk wat jy wou gehad het. Maar as jy nie jou beste self is, of klaar kan dankbaar wees vir waar jy is nie, hoe kan die Here jou met meer toevertrou? En dit is wat gebeur het. Ek was besig met Gesels [Leandi se program op VIA], en Christiaan was een van my gaste in ’n episode. En ek het uitge-freak! Maar ek was net myself gewees en het vir hom gesê hoe senuweeagtig ek is om ’n onderhoud met hom te doen, want ek wou nog altyd saam met hom werk, en hy kon dit nie glo nie. En hy sou dit nie geweet het as ek dit nie vir hom gesê het nie.  

En hy sê daai dag, terwyl ek die onderhoud met hom gevoer het, het hy iets in my gesien wat hy in die karakter Veronika gesien het: ’n sterkte, ’n diepte wat die karakter het. En toe besluit hy hy gaan vir my die rol gee, maar dat hy my ook gaan uitdaag.  

Maar as ek nie daai dag myself was en vir hom gesê het hoe graag ek met hom wou werk nie …  

Wat is dit van Christiaan se stories wat hierdie wens om saam met hom te werk in jou aangewakker het?  

Dit was nog altyd op my visiebord gewees om deur hom geregisseer te word, so dit was rêrig ’n droom wat bewaarheid is. Daarom wil ek kyk of ek kan sien of ek anders speel, of hoe ek met sy leiding geresoneer het, want hy het my rêrig uitgedaag. Ek was ’n paar keer in trane op stel – nie omdat hy gemeen was nie, maar omdat hy rêrig iets uit my gekry het. Hy is vir my briljant.  

Ek dink hy is baie cooler as wat ek is. Ek is ’n dominee se kind. Ek is konserwatief grootgemaak. Ek het eers in my universiteitsjare meer liberaal geraak, en dit is hoe ek kan aanklank vind by mense. Ek connect beter met mense juis as ek wys ek is feilbaar, om juis te wys ek vloek soms, ek drink soms, ek wonder soms of die Here lief vir my is – om juis daai onperfekte mens te wees. So, ek is ook altyd aangetrokke tot mense wat, soos hy, net homself is.  

En om saam met iemand te werk wat stories skryf juis vir daardie mens wat so onperfek voel, wie se lewe nie perfek is nie – ek word aangegryp deur daardie mense, want hulle dink anders, hulle dink nie soos die hoofstroom nie. Hulle vat kanse, hulle vra vrae. Eintlik is baie stories skynheilig – dit probeer net die mooi van die lewe wys. Dit wys nie dat ons vloek nie; dat jy jou vrou verneuk nie; dat jy skei nie. Maar dít is juis die werklikheid en gebeur. En jy kan baie meer mense bereik en inspireer deur daardie stories te vertel, eerder as om ’n perfekte weergawe van die mens te probeer uitbeeld.  

Vertel vir my oor die evolusie van jou verhouding met Veronika – hoe het dit verander tussen die tyd wat jy haar op papier ontmoet het, en die dag toe jy jou laaste toneel as Veronika verfilm het, en selfs nou? 

Ek wens altyd mens kan ’n reeks ’n tweede keer skiet. Nadat die karakter en die storie bietjie by jou gesit het. Want rêrig, soos jy haar leer ken – dis soos die maatjie op skool wat jy eers gedink het, is rof, maar dan leer jy haar ken, en jy besef hoeveel deernis jy vir haar het en hoe oulik sy is en dat sy ook net liefde wil hê en net ’n normale mens is. Maar jy het haar so veroordeel aan die begin … Dis presies hoe dit vir my was met Veronika. En dit vat my ’n ruk wanneer ek ’n karakter speel wat so anders as ek is, om net te gaan: “Dis oukei, dis oukei. Jy kan haar nie veroordeel nie.” 

Ek het baie vir Christiaan gevra: “Hoekom de f*k slaap sy met hierdie ou as sy net kan weghardloop? Dit maak nie vir my sin nie, is sy dom? Hoekom klim sy nie net in haar kar en sy f****f nie?” En dan sê hy: “Dis goed dat jy sulke vrae vra, want jy gaan haar nie kan speel as jy haar aanhou oordeel nie. Jy gaan moet besluit hoekom, as sy dan so sterk is, sy só optree. Jy gaan ’n rede moet vind. Jy gaan vir die ou wat dit kyk, moet oortuig oor wat daai rede is.”  

Ek onthou, Brümilda van Rensburg het jare terug vir my gesê: “As jy ooit ’n antagonis speel, moet jy haar speel op ’n manier wat mense van haar kan hou. Hulle moet kan verstaan hoekom sy daar is. Al is sy so ’n k*k mens soos wat sy is – daar is tog iemand wat lief is vir haar. Of daar is tog ’n rede. Sodat hulle haar eerder begin jammer kry en verstaan as wat hulle haar haat.” En daai’s ’n fyn lyn as jy so iemand speel, want ek dink dit is een van die grootste uitdagings in toneelspel. En wat ek gevind het in my werk is om dan eers te gaan: “Oukei, ek gaan haar nie oordeel nie. Ek gaan probeer lief wees vir haar en empatie hê met haar en kyk hoe ek haar aan die kykers kan verkoop.” 

Hoe pas dit by jou groei as mens in? Want jy is nogal afhanklik van jou eie menswees en vermoëns tot empatie om daardie kopskuif te kan maak, of hoe? 

Amen. Presies. Vir lank het ek in my lewe vir myself gesê ek gaan nooit so ’n goeie akteur wees soos die akteurs wat dit geswot het nie, maar Jacques Bessenger het vir my gesê: “Leandi, hou nou op. Jy is besig om my te irriteer deur dit te sê. Net omdat jy dit nie geswot het nie, beteken dit nie jy is nie ’n goeie akteur of jy is nie waardig nie. As jy ’n mens is wat leer en groei en jy verstaan mense se psiges en persoonlikhede, dan gaan jy ’n karakter kan vertolk.”  

Jy het dit in jou of jy het dit nie. Mens kan nie eintlik leer om ’n akteur te wees nie. Jy kan vaardighede aanleer, natuurlik. Jy kan leer hoe om vinniger te huil, byvoorbeeld. Maar om die essensie van ’n emosie te verstaan … En dit is weereens hoe die Here my ondersteun het – deur my eers bedryfsielkunde te laat swot het; deur my pa ’n dominee te maak wat my geleer het om vir almal lief te wees, maak nie saak watter tipe mens hulle is nie. Om te verstaan hoekom hierdie meisie op 16 swanger is en hoekom daai een nie is nie. Hoekom daai tannie dwelms doen en daai een nie. Nie om hulle te veroordeel nie, maar om te verstaan hoekom en om te verstaan watter omstandighede en keuses jou daar kan bring.  

En oor my pa my met so ’n oopkop-ingesteldheid grootgemaak het, het dit my so laat belangstel in mense dat dit juis ook is hoekom ek dit so geniet om ’n geselsprogram aan te bied en met mense te gesels, want ek glo ons kan by elke liewe mens iets leer. Nie een mens is beter as ’n ander nie. Iemand is dalk meer bevoorreg grootgemaak en steek sy foute beter weg of kruip makliker agter geld of die kerk weg, maar dit beteken nie hy is nie net so feilbaar soos jy nie.  

Ek dink as jy met iemand praat en ’n veilige ruimte kan gee om om vir hulle te kan sê: “Net soos ons hier sit, is ek en jy dieselfde en ons is ewe waardig,” en jy verstaan dit, kan jy as akteur enige rol speel.  

Vertel vir my waar jy dink jou werk as aanbieder, aktrise en skrywer, motiveringspreker, al die goed wat jy doen waarvoor jy ’n passie het, die meeste oorvleuel en hoe en waar die een passie jou dalk help of verhef tot ’n volgende vlak in die ander?  

Dis soos ’n liggaam. Jou hart het jou bloed nodig, het suurstof nodig, het dit of dat nodig. En soms breek ons ons enkel en dan leer ons loop sonder dit… Wanneer die een deeltjie bietjie stil is, gebruik jy die ander. Soos met die motiveringspraatjies leer ek hoe belangrik dit is om dankbaar te wees vir die mense wat opdaag by my praatjies en dat ek besef hulle is die mense wat my program kyk en sorg dat ek op die TV kan bly.  

Wanneer ek weer op stel is en ek doen TV-werk dan besef ek weer hoe dankbaar ek is om net myself te kan wees, want jy is so in iemand anders se lewe die hele dag dat wanneer jy by die huis is en jy was die grimering af, besef jy die lekkerste is om jouself te wees.  

As ek met mense op Gesels praat, dan leer ek weer baie oor ander mense. So, ek sien iets by iemand wat ek kan onthou om by ’n karakter te gebruik.  

My sosiale media help my om al hierdie goed te bemark. En ek sou weer nie my sosialemedia-platform gehad het sonder my TV-werk nie. 

Dis soos die liggaam van Christus – dis hoe my werke alles bymekaar aansluit. Ek dink die Here het geweet ek gaan te verveeld raak met een ding. Met my lewe is ek baie geseënd, want die een hand was werklik die ander hand. 

Waaraan werk jy tans of volgende wat ons met mense kan deel? 

Ek is in die proses om ’n boek saam met my pa te skryf. Hy het my al so baie geleer, en ek vra nou al lankal vir hom wanneer hy ’n boek gaan skryf.  

Lees meer: Dit is amper tyd vir die 18de seisoen van ‘Boer soek ’n Vrou’

The post Die rol wat Leandie du Randt se grense as aktrise verskuif het  appeared first on rooi rose.

Verskaf deur kykNET

Die tweede seisoen van DStv Stream se Koek-misdaadkomedie is in volle swang met ’n snelle pas en etlike kinkels wat die spanningsdrade al stywer vir kykers span.  

Deel van dié resep is die nuwe karakters wat die draaiboekskrywer en mederegisseur Christiaan Olwagen (Die Oord, Poppie Nongena) tot die tweede aflewering van dié bekroonde misdaadkomedie gevoeg het.  

Daaronder tel drie karakters wat tot dusver al vir ’n hele paar skokkende oomblikke gesorg het: die veteraanakteur Frank Opperman as moreel-korrupte bendebaas Tjoppie Terreblanche, sy storieseun in die kykNET-reeks Nêrens, Noord-Kaap, De Klerk Oelofse, as Tjoppie se niksnut-seun Tiny, en Donkerbos-aktrise Leandie du Randt as Tjoppie se sesde vrou, Veronika.   

Hoewel Frank en De Klerk ook in Koek pa en seun vertolk, is die verhoudingsdinamika dramaties anders as in Nêrens, Noord-Kaap. Juis daarom was De Klerk nie juis bekommerd oor of kykers nie verby hul vorige storie-verhouding sou kon sien nie.  

“Ek dink die twee reekse verskil so in styl en aanslag, dat ’n mens eintlik glad nie die karakters in dieselfde lig kan sien nie,” meen De Klerk.  

En hoe onbeholpe sy karakter dalk is, dink hy tog kykers kan vir hulself by Tiny skaar.  

“Ag, ek is ook self nogal ’n people pleaser, so wat my vir my interessant van Tiny is, is hoe sy hele bestaan wentel rondom sy pa se aanvaarding. Sy begeerte om sy pa se liefde te wen, dompel hom telkens dieper in die moeilikheid. Sy strewe na iemand wat hom liefhet, en die feit dat hy enigiets sal doen om daardie liefde te kry, is iets waarmee meeste mense kan vereenselwig.”  

Tiny, voeg De Klerk by, pas nie regtig iewers in nie – juis daarom word hy genoop om vir homself ’n persoonlikheid te skep om “op te maak vir waar hy tekortskiet”. 

Maar so hard soos wat Tiny probeer, kan hy nie sy pa se guns wen nie. Nie eens ’n klein bietjie nie. Inteendeel – soos Tjoppie daar in sy rolstoel sit, is hy ryp met minagting vir sy seun.

Tjoppie is ’n slymerige, geslepe skelm – presies die tipe karakter wat Frank so terdeë geniet om in te klim. 

“Ek het maar net ingespring en die Tjoppie Terreblanche in myself gaan soek,” vertel Frank oor sy aanslag tot dié rol. 

“Daar is altyd iets aan ’n slegte ou wat ek geniet. ’n Sluwe karakter is net soveel meer interessant as ’n vervelige, gewone ou,” meen hy. “En, as jy hom só kan speel dat mense so effe simpatie met hom het, dan dink ek jy het hom reg. Ek hoop dat mense ook darem van hom hou; dat hulle nie net niks vir hom voel nie.” 

Dit was nie net ’n reünie vir Frank en De Klerk op stel nie. Frank en Leandie het ook jare terug saam in Paul C. Venter se Vlug na Egipte gespeel.

Leandie vertel laggend hoe Frank destyds vir haar geleer het hoe om dronk te speel.  

“Ek het ’n baie sagte plekkie vir Frank. Ons het baie tyd saam spandeer destyds, so ek ken vir Frank al goed. Maar hierdie keer . . . Hierdie keer moes ek met my tong aan die kant van sy gesig lek én ek moes hom soen – en hy is letterlik so oud soos my pa! Ons het so gegiggel elke keer as ons cut, net ná ek my tong in sy oor moes druk of hom moes soen.” 

Dit is egter juis omdat hulle mekaar so goed ken, dat hulle dié tonele so goed kon vertolk, deel Leandie.  

“Ons kon eerlik vir mekaar vra, ‘Is jy gemaklik daarmee as ek dit doen? Is jy gemaklik as ek dat doen?’ As akteurs is ons opgelei om baie professioneel daaroor te wees. En boonop is daar iets wat gebeur as hulle sê, ‘Aksie!’. Jy gaan so heeltemal in ’n ander wêreld in dat jy vergeet wie Leandie en wie Frank is, en jy fokus net op die toneel.” 

Sy voeg by: “Frank is fantasties. Dieselfde met De Klerk – dit was ook ongelooflik om teenoor hom te speel. Hy is so talentvol.” 

Oor haar karakter, Veronika, sê Leandie: “Veronika is sterk. Sy is ’n vegter, en soms in die lewe moet ’n mens besluite maak wat nie alle vroue die dapperheid sou hê om te maak nie. Maar Veronika het daardie dapperheid,” vertel sy.  

“Sy is ’n besonderse karakter. Jis, ek is so dankbaar vir hierdie geleentheid, ek wou nog altyd, altyd saam met Christiaan Olwagen werk. Wat my opgewonde gemaak het, is om te sien hoe haar karakter ontwikkel. Vir my was dit belangrik om die storie te vertel van maak nie saak waar jy begin of watse kaarte jy gekry het of wie jou oorgeskroef het nie – jy kan uit dit kom en jy kan jou situasie omdraai. Dit is vir my ongelooflik om te sien hoe sterk sy is. Ek dink Christiaan het dit so mooi reggekry in hoe hy dít geskryf het.” 

Volgens Leandie is Veronika ’n spieël vir vroue wat vir hulself moet veg. “Wat al goed moes doen wat nie noodwendig lekker is om te doen, of noodwendig moreel korrek is om te doen nie. Maar dit is wat sy móés doen om te oorleef.”  

En ja, sommige kykers sal vir Veronika oordeel. Maar, sê Leandie, dís iets wat akteurs nooit met hul karakters mag doen nie.  

“Ek dink dit is verskriklik belangrik dat jy voordat jy ’n rol speel, uitpluis wat die karakter se sterkpunte is, wat is die uitdagings wat sy deurgaan? En om dan vir haar op te staan. Ek as Leandie moes eers vir Veronika in my kop opstaan en verstaan hoekom sy doen wat sy doen.  

“En ek kon haar geensins oordeel nie. Want as ek haar speel en ek oordeel haar, en ek dink, ‘Jissie, hoekom doen sy dit? Ek sou dit nooit gedoen het nie!’, dan gaan die kykers ook so voel. Maar as ek haar aanvaar en ek gee vir haar ’n veilige ruimte binne-in my om daar te leef, hoop en glo en vertrou ek dat kykers daarmee kan vereenselwig.”  

Nuwe episodes van Koek S2 word weekliks op DStv Stream se Premium-, Compact Plus- en Compact-pakkette vrygestel. Alle DStv-intekenare met ’n aktiewe dekodeerder-intekening het gratis toegang tot DStv Stream, maar dis ook as ’n losstaande stroomdiens beskikbaar. 

Lees ook: ‘Lamb Champs’ se Vrystaat-wenner boer groot met min en weet van oor begin

The post Koek S2: Frank Opperman, De Klerk Oelofse en Leandie du Randt vertel meer oor hul karakters wat monde laat oophang appeared first on rooi rose.

Dankbaar vir die liefde

Leandie du Randt en Stephan Neethling is ʼn moderne glanspaar. Sexy en suksesvol. ʼn Regte power couple. Hulle het mekaar op die grondpad ontmoet, maar nou vier hulle die liefde op die snelweg van die lewe.

Hoe hanteer jy jou geliefde se chroniese siekte? 

‘n Chroniese siekte beïnvloed nie net die daaglikse funksionering en lewensgehalte van die individu met die diagnose nie, maar ook dié van hul lewensmaat. Hoe gemaak met die ekstra druk op die verhouding? Lees hoe om jou maat te ondersteun én na jouself om te sien sodat jul verhouding versterk word pleks van skade ly.  

Ons loer in by Nianell, Bianca Flanders en haar man, Dean Balie

Die gewilde sangeres Nianell wat dolverlief op haar man is, meen die lewe gaan oor die liefde, om vreugde te ervaar en dit met ander te deel.

In ’n kits     

Bekostigbaar hoef nie vervelig te wees nie. Met beplanning en sakpasbestanddele kan jy maklik smaaklike etes voorsit.  

Tieners se dieetdilemmas

Tieners en pre-tieners se veranderende eetgewoontes en -behoeftes kan ’ n ma onkant betrap. Hoekom eet jou kinders skielik so baie? Hoekom tel hulle gewig op? Hoekom is hulle gedurig honger? Hoe moet hul dieet lyk? Regina Malan het gaan antwoorde soek.

Dié DAG

Maak nie saak wat jou styl of persoonlikheid is nie, daar is ‘n rok net vir jou. 

Met liefde

Heerlike soet gebak vir die maand van liefde – van ’n hartjiekoek tot hartjiehappies.

‘Ek sien my ouers in my huwelik!’

Jou ouers se huwelik of verhouding het ’n invloed op jou en jou verhoudings. Hoe werk dit, en kan jy ongesonde patrone verbreek?

Van tennis in Durban tot dans in Spanje

Die Suid-Afrikaner Rámon Fernández dans die afgelope vyf jaar as professionele flamencodanser in Spanje en het gehore aan sy voete. Hy gesels oor die uitdagings van dié professie.

‘Werkloos, maar ek maak geld!’

 Jeugwerkloosheid is ’n groot probleem in Suid-Afrika, maar daar is nie net slegte nuus nie. Dit wil voorkom asof Generasie Z ’n generasie van planmakers is wat allerlei slim maniere uitdink om geld te maak.    

Lees ook: WEN ’n Willem Botha Beauty-geskenkpak ter waarde van R3 050!

The post 10 redes waarom jy rooi rose se Februarie-uitgawe móét lees! appeared first on rooi rose.

“Elegansie is nie moontlik sonder parfuum nie. Dit is die onsigbare, onvergeetlike, ideale bykomstigheid,” het Coco Chanel gesê. En ons stem saam! ’n Parfuum is soveel meer as net ’n geur – dit is ’n weerspieëling van jou styl, jou gemoed en jou geheime selfvertroue.

Ons het by van ons voorbladsterre gaan aanklop om uit te vind watter geur hul gunsteling is – en hoekom juis dié een hul hart gesteel het.

Die antwoorde is net so uniek soos die vroue self:

Rolene Strauss

“Ek het twee gunstelinge. Nomad van Who Is Elijah (ongelukkig is dit nie in Suid-Afrika beskikbaar nie) en Eau des Jardins van Clarins. Beide is lig, skoon en vars!”

Natasha Vermaak

“Jo Malone se Scarlet Poppy! Dit was my trouparfuum.  Jo Malone het ‘n paar jaar gelede vir my die parfuum gestuur en ek was dadelik mal oor die unieke reuk. Selfs na ek na hul winkel was om al hulle geure te ruik, was hierdie een steeds my gunsteling.  Dis fun, vibrant, diep en net ‘n joyful reuk!”

Cindy Swanepoel

“Ek is lief vir Bvlgari Omnia Crystalline! Dis skoon, sag en nie overbearing nie. Ek vra altyd vir Craig om vir Kersfees en my verjaarsdag net parfuum te koop. Hy dink dis vervelig, maar ek dink nie ‘n mens kan ooit genoeg hê nie!”

Leah

“The One van Dolce & Gabbana! Dit was ‘n geskenk van Hennie en ek het dit op ons troudag gedra. Dis vars, skoon, elegant en nie soet nie.”

Kate Roothman

“My gunsteling is Tom Ford se Bitter Peach! Dit is só ’n lieflike geur omdat dit ‘n perfekte balans tussen soet en sensueel tref. Dit het ’n speelse, aanloklike karakter, maar ook ‘n warmte en diepte wat elegansie bring. Dis nie net ’n parfuum nie, dis ’n hele mood! Elke keer wanneer ek dit dra, voel ek selfversekerd, gewaagd, en ’n bietjie misterieus. Dis daardie tipe geur wat in die vertrek agterbly na jy weg is. Ek is mal daaroor!”

Marlee van der Merwe

“Ek is gek oor CHANEL se Coco Mademoiselle. Dit is ‘n tydlose parfum en ruik effens anders in elke seisoen. Ek is ook mal oor Michael Kors se Signature, maar ‘n mens kry hom nie sommer meer in die hande nie. Dit was my troudag-parfuum en het ‘n sterk geur van jasmyn.

Rolanda Marais

“Ek is mal oor Comme des Garçons se parfuums, veral Comme des Garçons 2. Dit is unisex en ongewoon. Dan hou ek ook baie van die plaaslike handelsmerk Apartment se parfuums. Die naam van elke parfuum is so uniek! Dit is ook geskik vir mans én vroue.”

Desire Gardner

“My gunsteling-parfuum is nog al die jare DKNY Orginal Women. Ek is ‘n gewoonte-dier, so as ek eers van iets hou, bly dit ‘n gunsteling. Ek dink ek het dit die eerste keer op skool geruik en was dadelik mal daaroor.  Mense wat my goed ken, assosieer my met hierdie heerlike vars reuk.  Die parfuum is vir my nostalgies en herinner my aan my jonger self en dis altyd lekker om aan jou jonger self herinner te word!”

Nadia Beukes

“Ek is nog altyd mal oor die die geur van Dior se J’adore en die storie agter die ontwikkeling en komposisie daarvan. J’adore wat “I love” beteken was ook die eerste geskenk wat my man, David vir my gegee het toe ons nog uitgegaan het. Hy was oorsee en het al die pad van Parys vir my ‘n bottel van hierdie Franse parfuum saamgebring. Dit was toe natuurlik ook die parfuum wat ek op my troudag gedra het.”

Leandie du Randt

“Bvlgari Allegra Biaciami. Mense se altyd vir my ek ruik ryk as ek dit aanhet! Dit laat my bold en selversekerd voel!”

Lees ook: 10 redes waarom jy rooi rose se Julie-uitgawe móét lees!

The post Ons voorbladsterre verklap hul gunsteling-parfuum! appeared first on rooi rose.

Die aktrise en TV-aanbieder Leandie du Randt is die aanbieder van die reünie-episodes van The Mommy Club: Van die Hoofstad wat eersdaags in twee dele – op Vrydag, 27 Junie 2025, en die daaropvolgende Vrydag, 4 Julie 2025 – op Showmax première.

“Ons het Leandie gekies omdat sy ’n uitsonderlike aanbieder met jare se ondervinding in die vermaaklikheidsbedryf is,” sê Lea Knoesen, uitvoerende vervaardiger by POP24. “Sy is die perfekte keuse om só ’n groep sterk, dinamiese vroue (in gesprek) te lei. Leandie verleen die hart, krag en teenwoordigheid wat nodig is om dié belangrike gesprekke met die nodige sorg en sensitiwiteit te lei.”

The Mommy Club: Van die Hoofstad is, sedert Showmax se herbekendstelling, die Afrikaanse reeks wat nog die meeste op dié platform gekyk is. Die reeks volg vyf onstuitbare ma’s – Ansu Viljoen, Crystal van der Burgh, Johandri Johnson, Louise Volschenk en Tessa Tullues – soos hulle die grense van moderne moederskap opnuut definieer.

Leandie het ook Love Island South Africa aangebied en is as sulks bekend met die drama wat met realiteitstelevisie gepaardgaan. Ná ’n seisoen van hartverwarmende oomblike, persoonlike openbarings en drama wat opslae gemaak het, staan Leandie gereed om kykers se brandende vrae aan te pak.

Sy deel in ’n eksklusiewe gesprek meer oor wat mense kan verwag, hoe sy die reünie benader het, en nog. 

Hierdie is nie jou eerste uittog as die aanbieder van ’n realiteitsreeks nie – hoe voel jy oor die geleentheid om dié reünie aan te bied?

Dit is altyd ’n eer om as aanbieder gekies te word. Ek voel werklik bevoorreg om met hierdie vroue se harte en kwesbaarheid vertrou te word. Dit verg baie om jouself op TV te plaas, en ek hoop om hul sterkpunte uit te lig, nie net die negatiewe goed waarop die publiek dalk nou fokus nie.

Watter weergawe van The Mommy Club het jy gekyk om inspirasie vir jou aanbiederstaak te kry?

Ek het nie daardie roete gevolg nie. Ek glo daaraan om getrou te bly aan wie ek is en hoe ek dinge benader. My fokus was om die program en die inhoud daarvan van binne en buite te ken, en nou saam met die produksiespan en regisseur te werk. Die belangrikste is egter om met ’n oop hart in te gaan en werklik te luister. Wanneer jy luister om te verstaan, eerder as om te oordeel, kom jou reaksie uit die hart, nie die kop nie – en dís waar die towerkrag lê.

Hoe beplan jy om alles by die reünie aan te spreek?

Soos Switserland! Ek is iewers tussen Dr. Phil en Judge Judy. My doel is om hulle te help om dinge vanuit mekaar se perspektiewe te sien, terwyl hulle steeds vasstaan ​​in dit wat hulle glo die waarheid is. Ek is ook daar om die gesprek te lei. Dit gaan nie oor my nie; dit gaan daaroor om vir hulle die ruimte te skep om hul waarheid te deel. Ek hoop om terselfdertyd ook as ’n stem vir die publiek te dien.

Wat is van die grootste punte wat jy wil aanspreek?

Hierdie seisoen was so dramaties; daar is baie om aan te spreek. Van die dringende onderwerpe is die Johandri- en Ansu-sage, die mom-shaming-kwessie, ál die drama, en natuurlik die hele bosveld-situasie.

Wat kan kykers van die reünie verwag?

Kykers kan baie eerlike gesprekke verwag oor wat werklik op kamera, en selfs agter die skerms, gebeur het. Daar het intussen tyd verloop, maar noudat hulle vir hulself op die skerm gesien het, sal emosies rou wees. Daar sal trane, gelag, skokke en beslis ’n hele paar argumente wees.

Dit was ’n taamlike intense seisoen. Hoe beplan jy om al die drama aan te pak wat hierdie seisoen uitgespeel het?

Stap vir stap, bietjie vir bietjie. Gelukkig het ek ’n sterk span wat my elke tree van die pad lei.

Hoe het al die drama jou voorbereiding beïnvloed?

Dit het my oor my eie lewe laat besin. Dít het vir my ruimte gegee, maar ook daaraan herinner om geanker te bly. Soms besef ons nie hoe ons vir ander oorkom totdat ons onsself objektief sien nie. Ek dink baie van hierdie vroue se bedoelings was anders as hoe dinge uiteindelik uitgespeel het. Dit sal ’n spieël vir hulle wees, en hopelik ook vir die kykers, om te stop en te besin oor wie hulle hulself mee omring, hoe hulle hulself uitdruk, en of die ontvangs daarvan dan strook met hul bedoelings.

Was daar enige gesprekke of situasies waaroor jy bekommerd was?

Beslis die gesprekke oor die ma-skuldgevoel. Ek is self nie ’n ma nie, so ek kan nie persoonlik met daardie ervaring vereenselwig nie.

Voel jy dat dié reeks van die dinge weerspieël wat in Afrikaanse gemeenskappe gebeur?

Ongelukkig, ja, tot ’n mate. Maar ook, hierdie dinge gebeur in alle gemeenskappe. Vir my gaan dit meer oor wat kan gebeur as jy omring word deur die verkeerde mense, of net mense wat nie jóú soort mense is nie. In Afrikaans sê ons: “Mense wat nie jou dam se gans is nie.” Dit was nog altyd vir my belangrik om myself te omring met mense met wie ek nie omgee om lewens te ruil nie. Jy word soos die vyf mense met wie jy die meeste van jou tyd bestee, so kies jou binnekring baie versigtig.

Wat hoop jy om by die reünie te bereik?

Ek wil hê die vroue moet voel dat hulle die geleentheid gehad het om hul waarheid te deel en hul kant van die storie te stel. Ek hoop hulle voel gehoor, nie geoordeel nie. Meer as enigiets anders wil ek hê hulle moet wegstap met die wete dat daar skoonheid in elkeen van hulle is. Dit gaan daaroor om die regte mense rondom jou te kies sodat jou ware toorkrag kan skyn. Of hulle wel mekaar se mense is, weet ons nog nie. En as hulle nie is nie, is dit ook oraait. Ek dink ’n groot teken van volwassenheid is om te kan verskil van mekaar, terwyl jy steeds respek en vriendelikheid toon.

Lees ook: 10 redes waarom jy rooi rose se Junie-uitgawe móét lees!

The post “Ek’s iewers tussen Dr. Phil en Judge Judy!” – Leandie du Randt oor haar rol in ‘The Mommy Club’ se reünie appeared first on rooi rose.

Kykers kan uitsien na ‘n nuwe aanbieder, nuwe beoordelaars en ‘n nuwe groep deelnemers wat as die volgende Mej Suid-Afrika gekroon wil word.

Klik hier om Mej. SA se top-30-finaliste te leer ken.

Crown Chasers is ‘n werklikheidsreeks wat Mej. Suid-Afrika hoopvolles met ‘n reeks uitdagings toets om te bepaal hoe hulle die druk wat met die kroon gepaard gaan, sal hanteer. Die beoordelaars stuur aan die einde van elke opwindende episode een van die deelnemers huis toe. Dié wat oorbly sal in Augustus aan die regstreekse groot finale by die SunBet Arena by Time Square in Pretoria deelneem.

Lees ook: 10 redes waarom jy die Julie-uitgawe van rooi rose móét lees!

Die vorige seisoen is deur die 2019-wenner, Zozibini Tunzi aangebied, maar ‘n nuwe aanbieder neem vanjaar die leisels oor, en dit is niemand anders as die huidige Mej. SA, Natasha Joubert nie.

In ‘n onderhoud met Sunday World het Natasha uitgelig wat die geleentheid vir haar beteken.

“Ek wou nog altyd in die aanbiedingsruimte wees; eendag sal ek graag ’n sportaanbieder wil wees, so my doelwit was nog altyd om ondervinding in die televisiebedryf op te doen,” het Natasha gesê.

Die beoordelaarspaneel bestaan ​​uit twee prominente figure naamlik Leandie du Rant en Lerato Kganyago.

Lerato sê dit is vir haar ’n volsirkel-oomblik, nadat sy van kleins af aktief by soortgelyke kompetisies betrokke was. Sy het bygevoeg dat dit ‘n eer is om deel van ‘n organisasie te wees wat vrouens bemagtig en vier.

“Ek hoop om positief tot die program by te dra met my ervaring as iemand wat in hul skoene was. Ek verstaan ​​die druk en die drome wat hierdie vroue het. Ek sal ondersteuning en eerlike terugvoer bied. My doel is om die deelnemers te help om hul ware potensiaal te vind en as hul outentieke self te skyn,” het Lerato gesê.

Leandie het bygevoeg dat hierdie reeks deelnemers ‘n gevoel sal gee van hoe dit sal wees om Mej SA te wees en dat sy opgewonde is om te sien hoe die deelnemers op uitdagings sal reageer.

Die eerste episode word vanaand, 29 Junie om 20:30 op S3 uitgesaai. Die regstreekse uitsending van Mej. Suid-Afrika 2024 sal 10 Augustus om 20:00 ook op S3 uitgesaai word.

Lees ook: Bryoni Govender deel Mej. Supranasionaal-verhoog met ons eie Nico Panagio

The post Die Mej. SA-werklikheidsprogram, ‘Crown Chasers’ keer vanaand terug appeared first on rooi rose.

Straat, kykNET se nuwe dramareeks wat Dinsdag 17 Oktober om 20:00 sy debuut op kykNET (DStv-kanaal 144) maak, is geskryf deur die legendariese draaiboekskrywer Paul C. Venter en spog met ’n ster-rolverdeling. Hier is wat jy moet weet voor die eerste episode begin …

• Die aartskelm Anton Videns (Frank Opperman), grootbaas van ’n finansieringsmaatskappy, en sy vennote is diep in die moeilikheid. ’n Fluitjieblaser gaan in die hof teen hulle getuig en hulle sal enigiets doen om dit te keer.

• Die fluitjieblaser, wat ’n IT-boffin is, woon onder die skuilnaam Robert Muller (Nico Panagio) in Aarbeistraat, ’n voorstedelike cul-de-sac waar hy ook onder getuienisbeskerming is.

Foto: Carl Kindo

• Zelda Postma (Amalia Uys) is ’n vlymskerp prokureur wat die taak het om Robert veilig te hou met die hulp van Potifar Vorster (Morné Visser), of Pote soos almal hom noem. Pote is ’n afgetrede polisieman en hy en sy vrou, die verpleegster Lorrie (Marisa Drummond), is benewens Zelda die enigste mense in Aarbeistraat wat weet Robert is onder getuienisbeskerming.

Foto: Carl Kindo

• Trix Louw (Hélène Truter) is ’n hartseer weduwee en eiendomsagent. Haar seun woon in Kanada en dis net haar honde wat haar enige vreugde verskaf.

Foto: Carl Kindo

• Hannes Brümmer is Maxwell Smit, die plaaslike apteker wat meer as net pille smous, en hy en sy floskoppie-vrou Retha (Cintaine Schutte) woon naby Jakkie van Tonder (Leandie du Randt) en Hendrikkie Fourie (Arno Meyer). Jakkie, ’n weeskind, het haar eie besigheid wat mense met rekenaarstelsels by die huis help.

• Nicole Holm is Vinkie Beerwinkel, ’n vrou met ’n oordonderende persoonlikheid wat alles sal doen om ’n sekuriteitsmuur om die hele Aarbeistraat te bou. Deon Coetzee is haar man, die rugbymal Basie, op wie se kop sy vierkantig sit.
• Wiseman Sithole en Edith Plaatjies is die Makeba’s, Xolani en Nyakallo, en Wilhelm van der Walt is Billy Vogel, ’n glibberige fotograaf wat enigiets sal doen vir geld.

• Al hierdie karakters, behalwe Anton Videns se vennote (gespeel deur Kate Normington, Josias Moleele en Kiroshan Naidoo), woon in Aarbeistraat.

• Daar is ’n huurmoordenaar in die reeks wat onder die skuilnaam Siener werk, maar kykers sal self moet uitpluis wie die persoon is. Siener is gebasseer op Siener van Rensburg.

• Die reeks spreek op humoristiese manier die toestande in Suid-Afrika aan – van voorstedelike paranoia tot mense se vrees vir die onbekende. Hoe goed ken jy werklik jou bure?

Foto: Carl Kindo

• Die reeks is in en om Kaapstad verfilm en Kevin Smith, Melt Sieberhagen, Mandri Sutherland en Celeste Loots is te sien in van die gasrolle.

• Die regisseur is Morné du Toit wat onder meer die regisseur was van die speelfilms Vuil wasgoed, Hoofmeisie en Nul is nie niks nie.

KYK: Amptelike voorskou – Straat

Straat begin op 17 Oktober om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.

Lees ook: kykNET stel lokprent van Derick Hougaard se eerste dokkie bekend

The post kykNET se nuwe reeks ‘Straat’: Wat jy moet weet appeared first on rooi rose.

Kykers het die boeiende en pittige karakter dr. Jolene Joubert reeds in die eerste episode van kykNET se hospitaaldrama Hartklop leer ken as ’n vrou wat nie skroom om vir haarself steke in te sit nie. Die kliniese assistent het duidelik al die rugkant van die lewe gesien en ons sien later in die reeks hoe Jolene in duie stort by haar stiefpa se begrafnis, dronk by die werk opdaag en haar duiwels konfronteer wanneer sy na ’n rehabilitasiefasiliteit gestuur word.

“Haar verlede is rof. Anders as in die regte lewe waar mens nie weet wat in jou toekoms is nie, kon ek nadat ek die teks gelees het mooi verstaan waarheen Jolene op pad is. Ek het van haar toekoms, in my kop en my hart, teruggewerk om die plek te kry waar sy begin. My skietskedule het so uitgewerk dat baie van Jolene se laaste tonele eerste verfilm is, en dit het my gehelp om te verstaan van waar af die karakter moet begin ontwikkel, ” vertel Leandie oor hoe sy Jolene as ’n karakter gevorm en ingekleur het.

Leandie het ook vanjaar in die Kaap aan die dramedie Straat, uit die pen van Paul C. Venter gewerk wat binnekort op kykNET te sien sal wees en was deel van die storiefilm Die Groot Dag, waarin sy ‘n rugbybehepte karakater (Francois Jacobs) se vrou speel. Leandie was ook ‘n beoordelaar vir die Mej Suid-Afrika-kompetisie, wat in Julie as ’n werklikheids-TV-program, Crown Chasers, uitgesaai is.

En inderdaad word haar reis met ’n reeks opwindende hoogtepunte op haar kalender vir die res van die jaar voortgesit: Sy skiet seisoen agt van Slank en To Be Gift Boxes, die aanlyn onderneming wat sy saam met haar skoonsuster, Michelle du Randt bedryf, se eerste fisieke winkel maak in November in Hazelwood, Pretoria, oop.

Sy en Stephan Neethling (haar geliefde) is sedert die einde van September oorsee vir die Rugbywêreldbeker en ‘n bietjie rondreis; “Ons wil meer reis, want ons is in die fleur van ons lewe. Elke keer wat ek oorsee gaan, leer ek so ‘n bietjie meer van myself.”

View this post on Instagram

 

A post shared by Leandie du Randt (@leandiedurandt)

Leandie du Randt vertel meer oor hierdie sonderlinge karakter wat sy met soveel oortuiging speel.

Dit is ’n groot en sterk rolverdeling. Watter lesse het jy by jou medespelers geleer?

Wow, ja, die spelers is fenomenaal. Dis altyd interessant om te sien hoe akteurs hulle woorde leer en voorberei en hoe elkeen doen wat vir hom of haar werk. Die grootste wenk wat ek op die stel gekry het, was van Christo Davids, wat ook die regisseur van episode 8 was. Hy het vir my geleer dat jy nooit hoef te wonder hoe jy ’n toneel of emosie gaan speel  wanneer jy dáár is in die oomblik, luister en dit persoonlik maak nie. Jy vra jouself watter mens of herinnering uit jou eie lewe kan jy met elke toneel vergelyk sodat jy ’n aanknopingspunt het en ’n plek waar jy die emosie kan gaan haal. Dit maak dit eg en die interpretasie meer geloofwaardig omdat dit uit ’n persoonlike plek kom.

Foto: Lisa Skinner

Jolene se pad loop nog ’n draai of twee voor die einde van die reeks. Sonder om te veel weg te gee, wat kan kykers nog verwag?

Bitter baie seer en geraamtes waarmee sy nog gekonfronteer word – trauma waardeur sy moet werk voor sy kan begin genees. Ek dink soos baie mense het Jolene van haar verlede en omstandighede probeer weghardloop en gehoop dit sal die seer laat weggaan, maar só leer sy dat weghardloop en ontkenning net al hoe minder plek in jou hart vir genesing en liefde los.

Wat sal Leandie se raad aan Jolene wees?

Vergewe die mense wat jou kwaad aangedoen het sodat jy kan begin genees. Net omdat sommige mense in jou verlede sleg was, beteken dit nie almal is sleg nie. Mens moet net beter mense leer kies met wie jy jouself omring. Praat bring genesing sodat jy kan ophou om die slagoffer te wees, verantwoordelikheid kan begin neem en as ’n wenner kan uitstap. ’n Mens kan kies of wat met jou gebeur het jou gaan sterk maak en vorm, of vir ewig jou siel en menswees gaan omkrap. Mens kan nie altyd kies wat met jou gebeur het nie, maar jy kan ALTYD kies wat jy daarmee gaan doen en hoe jy dit VIR JOU gaan gebruik.

Foto: Willem Botha

Wat het jy by Jolene geleer?

Dat ek nóóít ’n dokter sou kon wees nie! Maar ek dink die grootste geskenk wat sy my gegee het, is meer insig in mense wat swaar grootgeword het en slagoffers van mishandeling en die lewe se seer. Dit het my baie meer empatie vir sulke slagoffers gegee en my weer laat besef watter daaglikse battles hulle veg om vrede en ’n kans in die lewe te kry. Ek het baie meer deernis vir mense en herinner myself altyd dat mens moet sag en liefdevol wees met almal, want jy weet nie watter battles hulle veg nie.

Hierdie was die laaste reeks waaraan Franci Swanepoel gewerk het voor haar ontydige dood. As jy aan haar dink, wat is die eerste gedagte wat by jou opkom?

Lag! Ek het dit so geniet saam met haar. En eerlikheid – altyd! Ek en sy het altyd ’n ding gesê nes dit was en het baie waardering vir mekaar se grappies en eerlikheid gehad, want nie een van ons was oorsensitief nie. Ons kon altyd net lekker onsself wees by mekaar. Sy was darem maar net een spesiale mens en ’n ongelooflike aktrise. Ek is dankbaar vir die geleentheid om teenoor haar te kon speel.

• Hartklop wys Dinsdae 20:00 op kykNET (DStv-kanaal 144) en is ook op Catch Up en DStv Stream beskikbaar.

Lees ook: Vyf-vinnige-vrae-Vrydag met musieklegende Jannie du Toit

The post Vyf-vinnige-vrae-Vrydag met Leandie du Randt oor Hartklop appeared first on rooi rose.

Leandie: Obsessief oor haar lewe

Daar is nie ’n geleentheid wat oor die dinamiese Leandie du Randt se pad kom wat sy nie met suiwer entoesiasme en selfvertroue aandurf nie.

Chanette skryf om sin van die lewe te maak

Chanette Paul is ’n bekroonde skrywer wat tans met haar 50ste boek besig is. Vir haar lê die lekkerte van skryf daarin dat jy jou lewe kan regskryf en dat jy oor die omgewing kan baasspeel.

’n Droom word ’n boek

Marida Fitzpatrick het lank gelede ’n droom gehad. ’n Nagmerrie eintlik wat haar sou bybly en die geraamte van Mara, wat haar sielkundige riller geword het. Elna Rossouw het gaan kuier by die joernalis en skrywer op die vooraand van haar grootste scoop ooit: André de Ruyter se Truth to Power.

Watter sekstaal praat jy?

Ten spyte van ons verligte eeu, is daar baie mense wat nog huiwerig is om oor hul sekslewe te gesels, maar dit is ’n belangrike deel van ’n liefdesverhouding. Dit kan jul verhouding verryk as julle openlik gesels oor wat julle soek en nodig het 

Vinnige fyngebak

Hierdie soetgoed is vinnig en maklik vir wanneer daar onverwagse besoekers vir teetyd opdaag.

Blom waar jy is 

Dis ‘n nuwe seisoen! Meng en pas om soos ‘n nuwe jy te voel.

Jou kind & wiskunde

Wiskunde is deel van elke skool se kurrikulum, maar hoe gemaak as jou kind dink dis Grieks? ’n Paar kenners vertel waarom wiskunde belangrik is en gee raad hoe jy jou kind met die leer van hierdie belangrik vaardigheid kan bystaan.

Sak vir markdag

Hekel so ’n sak in ’n kits en so groot as wat jy dit wil hê.

Wen ’n ring van roosgoud 

Een gelukkig leser kan ’n baie spesiale trou- of verloofring ter waarde van R25 000 van die juwelier Murdocks wen

Bring die blomtuin binnetoe

Plante kikker nie net ’n vertrek op nie, dit het ook ’n invloed op jou gemoed!

Lees ook: WEN Hi-Tec se nuwe reeks oefenklere!

The post 10 redes waarom jy die September-uitgawe van rooi rose móét lees! appeared first on rooi rose.

Jou bloed is groen. Rugby is jou lewe. Amabokoboko!

En op 11 Augustus kan jy regstaan vir ’n splinternuwe rugby-komedie wanneer die speelfilm Die groot dag sy debuut op BoxOffice maak. In die tuiste van jou huis voor die skerm. Kleredrag: Jou Springboktrui en pantoffels. Eetgoed: Biltong en braaivleis.

Die Wêreldbekertoernooi skop op 8 September vanjaar af en op 28 Oktober kom die laaste twee spanne in die Stade de France buite Parys in Frankryk teen mekaar te staan om te sien wie hierdie keer die Webb Ellis-trofeë omhoog gaan hou.

Maar wat gemaak as jou skoonsuster op dieselfde dag trou? Dit is die pekel waarin die rugbymal-swaers Jimmy en Riaan in die speelfilm Die groot dag sit toe hulle uitvind hulle vroue se jonger suster op dieselfde dag as die eindstryd trou.

“Ek is ’n baie groot sportliefhebber en my grootste vrees is om ’n belangrike wedstryd te mis,” sê die vervaardiger van die fliek, Danie Bester. “Ek bestudeer lank vooraf die sportkalender om seker te maak niks bots nie. Vriende het al kwaad geraak as ek sport bo hulle kies.”

Die idee vir Die groot dag het ontstaan toe hy gewonder het wat sou gebeur as daar werklik iemand is met ’n rugby-kyk-probleem, iemand vir wie dit so belangrik is dat hulle dit vir hulle familie wegsteek. “Mens hoor stories van mense wat troues reël sonder om aan die rugby te dink en dan moet die gaste skelm iewers sit en kyk. Die vraag is: Hoe ver sal ’n rugbymal-persoon gaan om ’n groot wedstryd soos die finaal te kyk? Kom familie eerste? En wat as dit skoonfamilie is? Is die besluit dan makliker?”

In die rol van die twee swaers is Francois Jacobs en Johan Joubert en die drie susters word gespeel deur Leandie du Randt, Carmen Pretorius en Izel Bezuidenhout. Ook te sien is Christopher van der Westhuizen, Jurgen Hellberg en Willie Esterhuizen.

“Van die begin wou ons twee manne as die swaers kry wat alledaags is; tipiese Suid-Afrikaners wat lyk of jy hulle op ’n Saterdag in die slaghuis sal raakloop waar hulle wors koop. Francois en Johan is groot rugbyondersteuners en dit was vir hulle maklik om die karakters te verstaan. Altwee het ook ’n lekker stout kant wat mens nodig het vir rolle soos hierdie,” sê Danie.

Die draaiboek vir Die groot dag is deur Corné Koegelenberg geskryf wat ook die regisseur is. Die groot dag is in en om Johannesburg verfilm en word op Vrydag 11 Augustus op Box Office vrygestel.

KYK: Die groot dag se amptelike lokprent

Lees ook:Springbok-slot Eben Etzebeth kuier by Binnelanders

The post Splinternuwe rugby-komedie: Wanneer ’n bruilof in die pad van rugby staan appeared first on rooi rose.

Johannesburg. Vroegoggend.

’n Blonde vrou word in haar motor wakker. Daar is bloedvlekke op haar moulose top. Sy kyk in die truspieëljie.

’n Vrou met ’n serp wat haar kop bedek wag langs die pad. ’n Mini met ’n persoonlike nommerplaat stop langs haar en sy klim in. Sy haal haar serp af en glimlag vir haar vriendin.

’n Gespierde man doen verbete oefening in sy woonstel met ’n panoramiese uitsig op Johannesburg.

’n Vrou drink koffie terwyl sy na die reuse-diamant in haar trouring staar.

’n Jong man met ’n rugsak kom aangestap en sien hoe die blonde vrou vir haarself steke in haar mond sit.

Só skop die eerste paar minute van kykNET se nuwe dramareeks, Hartklop, af. Die reeks is vanaf Dinsdag 18 Julie 20:00 op kykNET (DStv-kanaal 144) en sal ook op Catch Up beskikbaar wees. Ses karakters, elkeen met sy eie storie, maar een ding in gemeen: Beyers Naudé Akademiese Hospitaal, ’n staatshospitaal in Johannesburg en die top-opleidingshospitaal in die land.

Van die ses hoofkarakters is drie dokters wat in die eerste episode vir hulle eerstejaarinternskap aanmeld. Simoné Pretorius (Binnelanders, Hotel) is Dr. Elani Breytenbach wat uit ’n bevoorregte huis kom en ’n regsgeleerde ma het wat alles vir haar dogter sal doen. Haar kliniese assistent en direkte hoof is Dr. Veronica Pietersen (Renate Stuurman) en die konsultant, oftewel die hoof van die afdeling, is Dr. Suzanne de Jongh (Marlee van der Merwe).

Carla Classen (Stroomop, Lioness) is Dr. Karima Salie wat haar konserwatiewe agtergrond wil agterlaat. Sy en Elani was kamermaats op Tukkies. Karima werk in ongevalle onder die kliniese assistant Dr. Louw van Onselen (David Louw) en die hoof van hulle afdeling is Dr. Daniel Strydom (Jacques Bessenger).

Dr. Fezile Nodada, vertolk deur Oros Mampofu (Skeem Saam, Savage Beauty), is ’n jong man uit die Oos-Kaap wat tussen westerse medisyne en Afrika tradisies staan – hy wil as chirurg kwalifiseer. Die kliniese assistent saam met wie hy werk, is Dr. Jolene Joubert (Leandie du Randt). Die konsultant van chirurgie is Prof. Gustav Coetzee (Dawid Minnaar). Christel van den Bergh is te sien as Anke Dempsey, ’n hoogse bekwaamde verpleegster in die noodafdeling.

Ander groot name in die rolverdeling (sommige deurlopend en ander gasrolle) sluit in Arno Marais, Rika Sennett, Thulani Mtsweni, Susan Coetzer, Vusi Thanda, Esmeralda Bihl, Elma Postma, Francois Jacobs en Bouwer Bosch.

Die hospitaaltonele is in sale en teaters by die Solomon Stix Morewa-gedenkhospitaal en by die Universiteit van die Witwatersrand in Johannesburg verfilm. Die mediese gevalle wat deel van die verskeie storielyne is, is alles gegrond op werklike gevalle en ’n span dokters en mediese kenners het as konsultante gedien. Opgeleide verpleegsusters het met die verfilming van die operasietonele gehelp om dit so realisties moontlik te maak.

Die reeks is deur Zoë Laband (The Girl from St. Agnes) geskryf en die regisseurs is Harold Hölscher en Christo Davids. Christo is ook te sien as Sollie, Dr. Veronica Pietersen se man.

Omdat die reeks grotendeels in die ongevalle/trauma-eenheid afspeel, was die grimeerspan van kardinale belang. “Ons het ’n klein span gehad, maar met baie talent. Die eer moet aan Ronwyn Jarret gaan. Sy was vir al die prosteses – soos borskaste, skedels en harte – en bloed verantwoordelik. Dit was niks vreemd om te sien hoe sy een of ander orgaan tussen tonele verf nie,” sê JP Potgieter, vervaardiger by Quizzical Pictures. Ander reekse op hulle kerfstok sluit Reyka, Desert Rose en iNumber Number in.

Wat maak hospitaalreekse so kykbaar?

“Ek dink dis omdat ons almal kan identifiseer met die karakters; die dokters én die pasiënte,” sê JP. “Die feit dat die dokters se eie stories afspeel teen die agtergrond van die pasiënte se krisisse, maak die stories baie dinamies en bring dit ’n natuurlike spanningslyn. Met Hartklop is dit nie anders nie. Elke episode het sy eie drama vir elkeen van die karakters – van die karakters wat in elke of bykans elke episode is tot die karakters wat net in een of twee episodes is.”

KYK: Die Hartklop-akteurs het ons meer vertel oor wat kykers kan verwag van dié splinternuwe drama!

· Hartklop begin op Dinsdag, 18 Julie om 20:00 op kykNET (DStv-kanaal 144) en sal ook op Catch Up beskikbaar wees.

Lees ook: Hartklop: kykNET se eerste hospitaaldrama-reeks gaan kykers boei  

The post Hartklop: leer ken die karakters in kykNET se eerste hospitaaldrama appeared first on rooi rose.

Ons gesels op ’n lieflike sonskyndag (Lentedag, om presies te wees), met die pragtige, borrelende Leandie du Randt-Bosch by haar en manlief Bouwer Bosch se woonstel in Johannesburg. Leandie lyk funky in blou denims en ’n kort swart hempie. Haar lang blonde lokke hang oor haar skouers en haar vriendelike gesig laat mens onmiddellik welkom voel.

Leandie, wat bekendheid verwerf het in onder meer die kykNET-programme Getroud met Rugby en Binnelanders, en in verskeie flieks soos Die Windpomp, Strikdas, Mooirivier en Hollywood in my Huis te sien was, se borrelende persoonlikheid en geloof is die rede vir haar sukses. Sy geniet haar loopbaan so baie dat sy sê dit voel of sy nog nie een dag in haar lewe gewerk het nie. “Ek moet myself elke keer nog knyp. Ek is so lief vir wat ek doen dat ek half skuldig voel. Ek is baie bevoorreg om te kan doen wat ek doen.”

Leandie, wat vanjaar agt jaar in die bedryf is, glo dat elke fase in haar loopbaan uniek was en het elke keer op die regte tyd gebeur dat sy nie ’n enkele rol kan uitlig wat as hoogtepunt uitstaan nie.

Lees ook: Leandie du Randt en die mans in haar lewe

Min mense weet dat Leandie Bedryfsielkunde gestudeer het voordat sy in die filmbedryf betrokke geraak het. Sy glo dat sy dit moes studeer om onder meer haar boek (Gemaklik In Jou Eie Lyf), te kon skryf en om beter vir rolle voor te berei.

“Ek kan nie dink dat ek ooit drama sou kon doen sonder my sielkunde nie”

#NoOneCanBeatYouAtBeingYou

In Leandie se vertoning, #NoOneCanBeatYouAtBeingYou, sing die gewilde Irene-Louise van Wyk vir 45 minute, waarna Leandie op die verhoog kom en vir ongeveer een uur met die gehoor gesels. Die praatjie handel nie oor Leandie se boek nie, dit is meer ’n tipe van ’n “lokprent”. Terwyl die boek ’n werkboek van 21 dae is wat jou help om jouself te leer ken, handel die praatjie oor hoekom jy dit wil doen. Leandie wil deur haar praatjie mense bewus maak van die feit dat elke persoon uniek is en dat niemand soos jý is nie. “Jy moet ophou om jouself te vergelyk, want no one can beat you at being you.” Op die ou einde wil sy mense help om op te daag vir hul lewens en om te laat gaan van vergelykings met ander mense.

“Jy moet self-aware wees om te kan groei”

Die laaste been van die vertoning word op 30 September 2016 by Emperors Palace aangebied. Leandie is uiters opgewonde, veral omdat die kaartjies uitverkoop is. “Ek het nooit in my lewe gedink dat ek ’n teater by Emperors sou kon doen nie.”

Jagveld

Leandie is ook volgende jaar in ’n nuwe aksiefliek, Jagveld, deur die bekende skrywer Deon Meyer te sien. Leandie speel saam met mede-akteurs Neels van Jaarsveld, Tim Theron en Bouwer Bosch. “Die ding wat ek die meeste geleer het en wat vir my die grootste uitdaging was, was om my eie ek opsy te skuif en ’n nuwe persoon te skep met wie ek glad nie kan relate nie.”

Leandie as Emma in Jagveld:

Emma. #Jagveld

A photo posted by Leandie du Randt Bosch ? (@leandiedurandt) on Apr 14, 2016 at 11:54pm PDT

Wat wag volgende op Leandie

Leandie gaan in 2017 as vervaardiger optree waar sy saam met Bouwer aan ’n nuwe fliek gaan werk. Sy kan nog nie veel daaroor uitbrei nie, maar sy is baie opgewonde om agter die kameras te werk. Verder werk sy ook aan ’n konsep vir ’n tweede boek wat waarskynlik in 2018 bekendgestel sal word.

Besoek Leandie se Facebookblad vir meer besonderhede oor #NoOneCanBeatYouAtBeingYou.

The post Leandie du Randt-Bosch: #NoOneCanBeatYouAtBeingYou appeared first on rooi rose.

Leandie du Randt sal vanaf Oktober vanjaar te sien wees as aanbieder van die nuwe gewigsverliesprogram Slank op kykNET.

Volgens kykNET bied Slank “’n revolusionêre benadering tot gewigsverlies en leefstyl-verandering. Dit kyk na 13 alledaagse mense van verskillende ouderdomme, agtergronde en uiteenlopende loopbane wat een ding in gemeen het.”

“Dis ’n groot voorreg om al die deelnemers se journeys met hulle te deel! Ek geniet die program, proses en span saam met wie ek dit skiet verskriklik baie.” Leandie du Randt

Leandie is in 2015 met Bouwer Bosch getroud. Lees ons onderhoud met haar hier.

Vir meer oor Slank, besoek kykNET se webblad hier.

The post Leandie du Randt op nuwe kykNET-program appeared first on rooi rose.

* Hierdie artikel het in die Desember 2015-uitgawe van rooi rose verskyn.

Leandie se talent ken skynbaar geen perke nie. Op 27 kan sy veel meer as net fliek- en sepierolle agter haar naam skryf. Sy was in 2014 naaswenner van die werklikheidsreeks Strictly Come Dancing, en het in dieselfde jaar ’n topverkoper-selfhelp-boek vir tienermeisies gepubliseer. Haar B.Com.-graad en honneursgraad in bedryfsielkunde aan die Universiteit van Johannesburg het sy cum laude geslaag, en in haar eerste jaar is sy as die beste eerstejaarstudent aangewys. En wanneer hierdie uitgawe op die rakke verskyn (middel-November 2015), sal sy die pas getroude mevrou Bouwer Bosch wees.

En as jy dalk gewonder het: sy is nog gaaf ook, en diep gelowig, en baie bewus van al haar seëninge. Nie dat sy terugsit en wag vir die lewe om te gebeur nie. Inteendeel.

Ons ontmoet mekaar op die stel van Binnelanders, die kykNET- sepie waarin sy deesdae die rol van Ivanka vertolk. Maar sy is geen TV-groentjie nie. Haar eerste rol was dié van Mieke in Getroud met Rugby, en vir haar vertolking van Lea in Vlug na Egipte is sy met ’n Huisgenoot Tempo-toekenning vereer.

“Ek was al in ’n paar reekse sedert 2005, maar danksy Ivanka sien mense my nou raak.”

Op die silwerdoek was sy onlangs te sien in Hollywood in my Huis en vorige flieks op haar kerfstok sluit Klein Karoo, Die Windpomp, Strikdas en Mooirivier in. Glad nie sleg vir iemand wat eers op universiteit half per ongeluk in die dramawêreld beland het nie. En dit alles danksy ’n skoonheidskompetisie. Haar prys as die Skoonveld-koshuis se Mej. Persoonlikheid was ’n dramakursus by die bekende aktrise Brümilda van Rensburg.

“Ek wou drama doen vir myself, en het dit nooit eens as loopbaan oorweeg nie,” vertel sy in haar kenmerkende heserige stem.

Maar Brümilda het duidelik gedink sy het meer talent, en haar vertel van en help voorberei vir die oudisie vir Getroud met Rugby. Dit was so hittete of haar dramabootjie het sommer in die hawe gesink.

“Ek daag toe by die oudisie op ‘in karakter’, met die grimering en klere wat ek dink die karakter sou dra,” onthou sy laggend. (Sy het ’n oudisie gedoen vir die rol van Kiki.) Die regisseur Cobus Rossouw jnr. was nie beïndruk nie.

“Hy het my dadelik gestuur om my grimering te gaan afwas, en ek was so geïntimideer dat ek in trane uitgebars het. Ek het eers later geleer jy gaan verkieslik oudisies toe sonder grimering en dinge sodat die regisseur ’n beter kans het om jou potensiaal vir verskillende rolle te kan beoordeel.”

Sy het daardie eerste oudisie afgelê met rooi oë en ’n skoongeskropte gesiggie, en het glad nie verwag om weer ’n woord daarvan te hoor nie.

“Ek was stomverbaas toe ek teruggeroep is vir ’n opvolg-oudisie.” Vier oudisies later – “drie van hulle het in trane geëindig” – het sy die rol van Mieke gehad, ’n karakter wat spesiaal vir haar geskep is.

Vandag beskou sy Cobus as een van die mans wat ’n vormende invloed op haar lewe gehad het. “Hy het my met daardie oudisie gedruk sodat ek kon wys hoe graag ek ’n aktrise wil word, en hy het my alles geleer wat ek nou van toneelspeel weet. Ek was maar negentien toe ons die eerste reeks van Getroud met Rugby verfilm het, en was meer as een keer in trane op stel. By Cobus het ek ook geleer om nooit kritiek op my werk persoonlik op te neem nie.”

Johan Scholtz, wat haar pa in Getroud met Rugby gespeel het, is ook op die lysie van spesiale mans in haar lewe.

“Hy het my baie gehelp op stel en van dinge soos stel-etiket geleer. Hy is ’n toegewyde Christen en vir baie jonger akteurs ook ’n rolmodel as dit kom by die uitlewing van geloof in die werksplek. Johan het my geleer dat jy nie soos die bedryf hoef te word net omdat jy daarin werk nie, en om nooit te oordeel net omdat iemand anders as jy is, of anders as jy glo nie. ‘Raak almal met liefde aan,’ sê hy altyd. Johan se persoonlikheid is baie soos my pa s’n. Is dit nie wonderlik nie? Hier beland ek die eerste keer op stel, en ’n man soos my pa speel my pa.”

Leandie glo jy kan leer by elke mens wat jou pad kruis.

“Almal laat ’n stukkie van hulself by jou agter. Daarom glo ek ook jy moet elke mens behandel asof hy of sy belangrik is. Jy kan iets uit elke situasie gebruik om jou te laat groei.”

Voordat sy met Bouwer begin uitgaan het, was sy twee jaar lank in ’n verhouding met iemand wat nie haar geloofsoortuigings gedeel het nie.

Lees ook ons onderhoud met Bouwer Bosch hier.

“Ek het wonderlike dinge by hom geleer. Soos om met sagter oë na ander mense te kyk en hulle te aanvaar vir wie hulle is.” Hy het haar ook een van haar kosbaarste lesse oor geloof geleer.

“Dit was ’n moeilike tyd in my lewe, en ek het baie gewroeg oor werk, oor geld, oor my boek se verkope … Op ’n dag sê hy toe vir my: ‘Julle Christene glo in ’n almagtige God, maar ek het nog nooit mense so baie sien stres soos julle nie.’ Dit het my tot stilstand geruk en my vasbeslote gemaak om hom verkeerd te bewys. En op ’n manier het hy ook my oë oopgemaak sodat ek Bouwer kon raaksien.”

‘Jy weet net dis die een vir jou’

Haar oë skitter wanneer sy oor die sanger Bouwer Bosch praat.

“My ma het altyd gesê ek sal weet as ek my man ontmoet het, en dit was ook so. Met vorige verhoudings het ek altyd vir my pa gevra of hy dink ek sal met hulle kan trou. Met Bouw het ek vir my pa gesê: ‘Pa, ek gaan met hom trou.’”

Hulle het mekaar op die stel van Klein Karoo ontmoet, en was byna vier jaar lank beste vriende voordat hulle in April 2014 begin uitgaan het. Hoewel hulle baie ernstig is oor hul privaatheid, ’n les wat sy by haar vriendin Hanna Grobler geleer het, is sy tog bereid om ietsie oor haar aanstaande te deel.

Lees ook ons onderhoud met Hanna Grobler hier.

“My pa en Bouwer het baie dieselfde temperament – albei is sulke kalm, rustige mense. Hulle is my go-to-guys, die eerste mense met wie ek groot nuus deel. Hulle anker my. Anna-Mart van der Merwe het onlangs in ’n onderhoud gesê ’n mens vlieg net so hoog as wat jou nes sterk is. Liewe Jesus is my nes, en my pa en Bouw ook. My pa het gesorg vir ’n sterk fondament, en Bouw sorg dat die kante sterk is.”

Sy vertel dat Bouw, soos sy hom noem, die perfekte teenwig vir haar halsoorkop-geaardheid is.

“Hy is baie realisties en analities. Hy het my geleer om eers terug te staan en die positiewe en negatiewe van ’n saak deeglik te bekyk.

“Hy is ’n sagte, gentle mens, en hy laat my veilig voel. Saam met hom sien ek kans vir enigiets, want hy ken my hart én gee my vlerke. Ek sweer Jesus het vir hom ’n handleiding vir my gegee,” sê sy laggend. “He gets me. En hy laat my lag – elke dag saam met hom is ’n komedie.”

Humor het ’n belangrike plek in hul gesin, vertel sy. “Humor, saam met geloof, het ons gesin dikwels deur die donker tye van my ma se siekte en dood laat regop bly. My broer, Corné, het dieselfde droë sin vir humor as my pa en hy laat my al van kleintyd af lag.”

Corné (32), ’n geoktrooieerde rekenmeester, is ook op die lysie van spesiale mans in haar lewe.

“Hy is logies en sien dinge in swart en wit wanneer ek alles met emosies wil begin inkleur. Hy het my al baie gedwing om die drama en tierlantyntjies te laat staan.”

Die jongste man in haar lewe is Corné en sy vrou, Michelle, se seuntjie Caleb (20 maande). Toe sy van hom vertel, wys sy ook ’n paar foto’s op haar selfoon.

“Hy het my laat uitsien na my en Bouwer se kinders, eendag.” Wanneer presies dit sal gebeur, het hulle nog nie besluit nie.

‘Ek bewonder my pa oor soveel redes’

Die gesprek draai kort-kort na haar pa, Neels, ’n predikant.

Dis duidelik dat hy ’n baie spesiale plek in haar hart beklee.

“My ma, Elmarie, is verlede jaar op die ouderdom van 58 aan Alzheimer se siekte dood. Sy het siek geword toe ek ’n eerstejaar was, en dit bly vir my verskriklik dat so ’n briljante, dinamiese vrou juis Alzheimer se siekte moes kry. Ironies genoeg het sy altyd ’n briljante geheue gehad. Met haar siekte het ek ’n ongelooflike kant van my pa gesien. Hy het haar met soveel liefde versorg, tot op ’n punt waar dit onmoontlik geraak het en sy professionele versorging nodig gehad het. Hy het haar roudiens gelei, want sy het hom laat belowe hy sal. Kan jy dink hoe moeilik dit vir hom moes wees?”

Sy het ook baie oor die lewe by haar pa geleer.

“Hy het my geleer om oop te wees vir ander mense se perspektiewe. Dit beteken nie jy stem met hulle saam nie, maar ander perspektiewe kan jou eie wêreld vergroot. Toe ek in graad nege erg geboelie is, het my pa my geleer dis eintlik net die meisies se eie onsekerheid en afguns wat hulle so laat optree. Hy het gesê ek moet dit aanvaar en daarmee deal, want dit gaan nie verander nie.”

Leandie dink dit kon nie vir hom maklik gewees het om twee sulke uiteenlopende kinders soos sy en Corné groot te maak nie.

“Ek is ’n algehele ekstrovert en my broer ’n introvert. My pa het ons albei die Myers-Briggs-persoonlikheidstoets laat aflê toe ons in graad agt was, en ons volgens ons persoonlikhede grootgemaak. Hy het ons nooit dinge verbied nie, net altyd gewys op die negatiewe gevolge van slegte besluite. Ek het ook baie oor ouerskap by hom geleer.”

Al is hy ’n dominee, vertel sy, was hy nooit ’n predikant by die huis nie.

“Dan was hy net ons pa en my ma se man. Alles wat ek is, is dinge wat hy my geleer het. Ek kry my hardwerkende geaardheid ook by hom. Daar is so baie dinge van hom wat ek bewonder.”

Leandie is beskikbaar as geleentheidspreker. Bespreek deur haar webwerf www.leandiedurandt.co.za. Haar selfhelpboek Gemaklik in jou eie lyf, is ook in Engels beskikbaar en word deur Struik uitgegee.

The post Leandie du Randt en die mans in haar lewe appeared first on rooi rose.