Zenobia Kloppers gesels oor Fiela se Kind  deur Zoë Salzwedel. Foto’s: Fathom Media

Zenobia Kloppers is ’n Namibies-gebore aktrise, sangeres, skrywer en besigheidseienaar. Sy het toneelspel aan die Universiteit van Kaapstad studeer en klassieke sang aan die Universiteit van
Stellenbosch.

Zenobia het in verskeie rolle in teater, radio, televisie en film deur die jare verskyn onder die ervare regie van onder meer Sandra Prinsloo, Janice Honeyman, Juanita Swanepoel, Brett Michael Innes en Maynard Kraak. Sy is benoem vir Naledi- en Fiësta-toekennings en het deel gevorm van die rolverdeling in die bekroonde produksies “Kô lat ons sing”, die “Riel van Hip Hop” en Kramer en Peterson se “Ghoema” (“Spice Drum Beat”). Sy het kritieke lof ontvang vir haar interpretasie van die titelrolle in die toneelproduksies van “Klarabelle gaan Kaaptoe”, “Fiela se Kind”, “Sarah” (die verhaal van Saartjie Baartman), asook in radio-dramas soos “Die Swerfjare van Poppie Nongena”.

In die film Fiela se Kind vertolk sy die hoofrol van Fiela Koemoetie. Ons het ’n bietjie met haar gesels om te hoor oor haar ervaring in dié rol.

1. In watter mate was die werk op die verhoog verskillend van filmwerk? En watter een (na jou mening) is moeiliker?

Die verhoog vereis ’n ander tipe energie as film. Mens “gooi” as’t ware jou energie uit in die teater sodat die mense in die verste of hoogste hoeke bereik kan word. In film is die kamera ’n “gehoor van een” en ’n meer intieme energie word dus vereis. Die kamera kom na jou toe en derhalwe kan mens meer intiem en subtiel speel, veral by die nabyskote. Albei dissiplines het hul uitdagings en hul vreugdes.

2. Hoe het jy voorberei vir jou rol as Fiela Komoetie?

Ek en die regisseur, Brett Michael Innes, het geweldig baie gesels oor die karakter van Fiela en watter aspekte van haar hy graag wou uitlig in die nuwe film. Ek het die rol van Fiela vir die verhoogproduksie gespeel in 2007 en weer in 2018 toe ek vir twee weke vir Shaleen Surtie–Richards ingestaan het. Die karakter het dus reeds in my lyf gesit. Vir die verhoog het ek haar gekarakteriseer en gespeel soos ons almal haar drie dekades lank reeds ken: groot emosies; uitspattig en parmantig – en haar aksent was vanuit die Noord-Kaap se streke.

Maar om vir die nuutste filmaanpassing van Fiela se Kind voor te berei, het ek van voor af die roman gelees en die karakter opnuut leer ken. Ek het baie gestap om fiks te bly vir al die stappery wat Fiela in die nuwe film moes doen. Ek en die ander akteurs het ook almal gewerk met twee begaafde stemafrigters vir outentieke aksente van hoe die mense waarskynlik destyds in die Langekloof- en Knysnabos-streke sou geklink het.

Brett het gevra dat ek ’n aalwyn in die hande kry en interaktief daarmee saamleef, as Fiela. My aalwyn se naam was Kwaaitjie, want sy steek! Sy staan nou nog op my balkon. Ek het ook gaan oplees oor volstruisboerdery en hoe om aalwyn te tap.

Lees ook ons onderhoud met Melissa Willering, Nina in Fiela se Kind

3. Wat was vir jou die moeilikste deel daarvan om aan dié spesiale karakter lewe te gee?

Die veroudering van haar in haar liggaam en haar gees was nogal uitputtend maar ook geweldig interessant en bevredigend om te speel.

4. Vertel vir ons van die vereistes van jou karakter? En vertel ons oor die stunts wat jy self gedoen het!

Hierdie karakter het geweldig baie fokus vereis. Ek was vir drie weke aaneen elke dag op stel. Dit beteken 5 uur in die oggend opstaan en eers 7 uur of 8 uur die aand by die gastehuis aankom.

Ek het my knie tydens die Fiela-repetisies beseer, maar gelukkig het ek ’n fantastiese fisioterapeut gehad wat my gehelp het en seker gemaak het ek kry die regte gord, ensovoorts. Soos alles met hierdie film, het die besering gehelp om ’n stappie te ontwikkel vir Fiela as ouer vrou.

Die stunt het soort van per ongeluk gebeur. Daar was ’n bekwame jong vrou wat ingekom het om my stunt te kom doen. Sy was aangetrek soos ek en als. Maar ek was so in die toneel met Fiela dat ek elke keer sommer self die val-werk gedoen het. Ek het eers na die tyd besef ek het toe eintlik (vir die eerste keer nogal!) my eie stunt gedoen!

Zenobia Kloppers gesels oor Fiela se Kind  Zenobia Kloppers as Fiela Koemoetie in Fiela se Kind

5. Wat was vir jou die opwindendste deel van verfilming, en hoekom?

 Dit was eintlik vir my alles opwindend. Dit was my eerste hoofrol in ’n film en ek het elke dag ten volle probeer leef en ervaar.

As ek een dag moes kies wat uitgestaan het, dan is dit waarskynlik die eerste dag op stel toe ek vir die eerste keer die crew en van die rolverdeling ontmoet het. Ek was so opgewonde dat ek “selfies” met almal geneem het. Dit was fantasties!

6. Wat was vir jou die moeilikste deel van verfilming, en hoekom?

Omrede ek dit so geniet het om in hierdie film te speel, het ek nie juis enige dele as “moeilik” ervaar nie. Eerder as “uitdagend”, “kompleks” of “intens”. Ek het immers een van ons land se mees begaafde regisseurs gehad om leiding te gee.

As ek egter ’n uitdagende toneel moes uitlig, sou dit seker die toneel tussen Fiela en Elias wees. Dit was fisies en emosioneel uitdagend. Mens kan egter net so ’n toneel doen wanneer jy die ander akteur heeltemal vertrou, en Drikus Volschenk (Elias) is ’n droom om mee te werk.

7. Wat het dit vir jou beteken op dié ikoniese rol te vertolk? En het die feit dat dit juis ikonies is, baie druk op jou geplaas?

Die belangrikste ding was vir my om reg te laat geskied aan die karakter wat Dalene Matthee geskep het. Ek het ook my regisseur vertrou om leiding te gee volgens sy visie vir die film. Wanneer jy besig is om die storie te “leef” tydens verfilming, is daar nie ruimte om te dink aan die ikoniese aard daarvan nie. Die enigste druk wat ek dus gevoel het, was die druk wat ek op myself geplaas het om die karakter met soveel eerlikheid en integriteit as moontlik te speel.

8. Watter boodskap wil jý graag hê moet kykers huis toe neem uit Fiela se Kind?

Identiteit en waar jy voel jy hoort, is baie meer kompleks as bloot uiterlike faktore soos velkleur of fisiese voorkoms.

Liefde (veral moederliefde) sien nie kleur nie.

9. Wat het Fiela vir jou “geleer”?

Haar deursettingsvermoë was vir my indrukwekkend.

10. Wat is jou droom vir dié film? Wat wil jy graag daarmee bereik?

Ek hoop dat die storie mense opnuut sal aangryp. Ek hoop dit sal sinvolle gesprekke of debat ontketen. Vir jongmense hoop ek dit gee ’n waardering vir stories uit ons verlede, want dis belangrik om te onthou waarvandaan ons kom sodat ons nie die foute van ons verlede herhaal nie. Op die minste hoop ek mense geniet en waardeer hierdie tydlose verhaal wat so mooi vertel word deur Brett Michael Innes en die ongelooflike kinematografie van Tom Marais. Ek hoop mense word meegevoer na die wêreld van Fiela se kind in die 1800’s, wat so liefdevol geskep is deur, onder andere, Chantal Carter (produksie-ontwerp) en Doret van Jaarsveld (kunsdepartement) en die hele span. Ek hoop die film inspireer mense om met hulle oumas en oupas te gaan gesels en hulle eie families se stories neer te skryf en te vertel.

11. As jy weer die keuse gegee is, sou jy weer instem om Fiela te speel?

Ek weet van geen aktrise wat so ’n ikoniese rol van die hand sou wys nie. Dis was vir my ’n eer en ’n voorreg om die kans gegun te word om Fiela op die verhoog sowel as vir die silwerdoek te kon speel. Ek sou dit weer doen, sonder twyfel.

12. En laastens, wat sou jy graag vir Dalene Matthee wou sê (juis oorFiela se Kind) as sy vandag nog geleef het?

Dankie dat sy die moeite gedoen het om destyds met mense te gaan gesels en hierdie wonderlike stories die lig te laat sien.

Fiela se Kind draai nou in fliekteaters. Loer hier na die lokprent:

The post Zenobia Kloppers gesels oor Fiela se Kind appeared first on rooi rose.

The Voice SA se jong Tasché Burger deur Zoë Salzwedel. Hooffoto Verskaf.

Tasché Burger is in Belville in die Kaap gebore, maar woon en werk tans in Vredekloof in Brackenfell. In 2018 het sy besluit om vir die derde seisoen van die allergewilde MNet-program, The Voice SA, in te skryf en só haar droom vir ʼn
loopbaan in die musiekbedryf af te skop.

Op slegs 18 is dié jong, talentvolle blondekop een van Suid-Afrika se gunsteling The Voice SA-deelnemers. Haar unieke, heserige stem, laid back-persoonlikheid en liefde vir musiek het vir haar ʼn plek in die top 7 van dié seisoen verseker.

Tasché was in Stellenberg Hoërskool, maar moes weens ’n ernstige enkelbesering haar skoolloopbaan tuis voortsit. Sy was vir 8 maande op krukke met haar voet in ’n “Taylor Spatial Frame”. Weens haar besering was die skool se baie trappe en klaswisseling nét te veel gewees en was tuisonderrig die beter opsie.

Vra ’n mens vir Tasché wat haar gelukkig maak, is die antwoord eenvoudig: musiek, vriende en familie! Tasché vertel dat sy graag liedjies skryf, kitaar speel en tyd saam met haar vriende en familie in haar vrye tyd deurbring.

Wat maak haar kwaad? Boelies, onregverdigheid en negatiewe mense.

Kyk gerus hier na Tasché Burger se The Voice SA-oudisie:

Jy het ‘n lekker rock-klank, maar wat is alles op jou speellys?

Ek luister eintlik maar na enige liedjies met ’n cool storie – ek hou van “edgy” liedjies. Dit moet ’n impak maak en ’n lekker ritme hê. Ek moet met die liedjie kan “connect”. Ek is mal oor modern country en P!nk se musiek. Ek luister ook graag na Karin Zoid, Francois van Coke en Riana Nel, maar alles hang af van hoe ek die dag voel.

Vertel ons van jou The Voice-reis. Wat het dit jou alles geleer?

Vandat die The Voice-program oorsee begin wys het, het ek vir my ma gesê dat ek ook graag eendag daarvoor wil inskryf, maar ek moes natuurlik wag totdat ek 18 jaar oud was. Ek het toe verlede jaar (2018) besluit om die kans te vat en ’n oudisie af te lê. Ons het van die begin af besluit dat ons net gaan kyk hoe dit gaan – ek moet my alles insit,
maar “whatever happens, happens!”.

Wat het ek geleer? Geduld. Geduld. Geduld. En BAIE harde werk! Gelukkig was ek nog nooit bang gewees vir hard werk nie, want dié is my passie. Ek het natuurlik ook geleer hoe belangrik ‘n goedbeplande skedule is, en die waarde van sosiale media besef.

Mens besef ook nou vir die eerste keer werklik hoe baie werk in só ’n program ingaan – soveel mense werk uiters hard agter die skerms om te sorg dat elke episode foutloos en perfek afloop.

 

View this post on Instagram

 

A post shared by t a s c h é b u r g e
r (@tascheburger) on Apr 19, 2019 at 2:12am
PDT

 

View this post on Instagram

 

A post shared by t a s c h é b u r g e
r (@tascheburger) on May 6, 2019 at 2:48pm
PDT

Jy is een van die jongste deelnemers daar, maar ‘n mens sou dit nooit sê nie. Waar kom jou volwassenheid vandaan?

Beslis van my ma af. Sy het ons nie babatjieagtig behandel nie of toegelaat dat ons soos babas praat/optree toe ons klein was nie. Van kleins af is ons grootgemaak om op ons eie voete te staan, ons eie breins te gebruik en ons eie opinies te vorm. Sy sê altyd as jy nie jou opinie lug en haar sê hoe jy voel of wat jy van ‘n situasie dink nie, kan sy nie haar “job” reg doen en ons ordentlik opvoed nie. Sy leer vir ons van nagevolge, dat ons altyd na ander se menings moet luister en dat dit OK is om nie altyd met almal saam te stem nie, maar dat elkeen die reg het tot sy eie opinie.

Ons het ‘n baie hegte verhouding en ons deel alles met mekaar.

Wat is vir jou die heel moeilikste deel van die The Voice SA en hoekom?

Om totsiens te sê aan ons mede-deelnemers bly maar die moeilikste. Jy maak werklik goeie vriende en almal word maar soos familie. Sodra iemand uitgestem is, los daardie persoon beslis ʼn leemte. Ons behou kontak, maar dis nie dieselfde nie.

 

View this post on Instagram

 

A post shared by t a s c h é b u r g e
r (@tascheburger) on May 27, 2019 at 4:45am
PDT

 

View this post on Instagram

 

A post shared by t a s c h é b u r g e
r (@tascheburger) on Apr 30, 2019 at 3:43am
PDT

Watter waardevolle lesse het jou “coach” vir jou tot dusver geleer?

Francois het vir my geleer om die “gevoel” uit die liedjie te trek en om die gehoor daardeur te probeer vasvang. Hy het ook vir my geleer om nie bang te wees om iets buitengewoons te probeer nie en “to go for it”.

 

View this post on Instagram

 

A post shared by Francois van Coke
(@francoisvancoke) on Jun 16, 2019 at 11:06pm
PDT

As jy saam met een sangsensasie ‘n middag kon deurbring, wie sou dit wees en hoekom? En waaroor sal jy wil gesels?

Plaaslik sal ek graag met Karen Zoid wil praat oor haar liedjieskryfproses – die stappe wat sy volg en geheime wat my kan help om beter te skryf.

Internasionaal sal ek beslis vir P!nk wil ontmoet en met haar gesels oor haar sangtegniek. Natuurlik sal ek ook graag wil weet van háár skryfproses, maar ek stel belang om by haar te leer oor “groot gaan” met optredes (die dekor en temas) en hoe sy daarop besluit.

 

View this post on Instagram

 

A post shared by t a
s c h é b u r g e r (@tascheburger) on Jun 18, 2019 at
9:36am PDT

Ek sal nooit genoeg dankie kan sê vir die geleentheid wat ek met The Voice SA kry nie. Ek waardeer almal se ondersteuning opreg en is ewig dankbaar vir elkeen wat vir my stem. (Ek voel sommer ook dankbaar vir almal wat vir die ander deelnemers ook stem!) Dit is “anybody’s game” op dié punt, so moet asseblief nie nou ophou stem nie!

As jy van ons onderhoud met Tasché Burger gehou het, loer hier vir nog lekker onderhoude, loer hier

The post The Voice SA se jong Tasché Burger appeared first on rooi rose.

Dit was Cannes en hierdie is Bali deur Margaret Gardiner

Laat ons die ure aanteken.

’n Uur per motor van Cannes na Nice. Twee uur per vliegtuig van Nice na Duitsland. Elf uur na LA. Een uur huis toe. Volgende dag. Een uur om te ontspan, twee uur na San Francisco. Sestien uur na Singapoer. Twee uur na Bali. Tydsveranderinge: agt uur verskil tussen LA en Cannes. Vyftien uur verskil tussen Bali en Los Angeles.

Die vraag is, waar is ek?

Wat is my spertye?

En, die belangrikste, waar is my skedule?

Ek wag vir die onderhoud met Chris Hemsworth vir my YouTube-kanaal vir Sony se Men In Black-heropname

 Dit klink oorweldigend.

Die brein sukkel met die klein detail. Ek mis belangrike goed. Ek probeer prioritiseer. Maar ek leef! Ek kan slaap. Ek weet ek moet slaap, maar die lug is soel en die oseaan warm en die swembad lyk of dit tot by die horison strek. Daarby is die talent sjarmant, daar is ’n nuwe kultuur en dinge om te sien en plekke om te besoek. En ek glimlag. En ek slaap op vreemde plekke, waar en wanneer ek kan. En ek sal hierdie werk bo enigiets anders kies.

Geen grimering nie en my hare in ‘n bolla. Sloffies aan my voete en ‘n gholfkarretjie (met die komplimente van die Ritz Carlton Bali) om my rond te ry sodat ek nie verdwaal weens my vlugvoosbrein nie.

Kort, intense aktiwiteite tussen lieflike gesinstyd rondom die braai en stories om uit te ruil. Kook, praat, lag en slaap op snaakse tye omdat jou lyf nie seker is waar hy nou is nie. Maar jy beplan en berei voor.

Ek reis gemiddeld elke twee weke vandat ek 16 was en die fotograaf Bernard Jordaan my aan die hoof van L’Agence-modelagentskap voorgestel het. Ek is na Parys genooi om modelwerk te doen. Om op ’n vliegtuig te klim is nie vir my snaaks nie. Daar is altyd mense en glimlagte en avonture om te beleef. Dit laat die lewe glad verloop.

Ek kan dié hotel aanbeveel. Die Ritz Carlton in Bali het ’n hyser wat jou op ’n soort Disney-rit van ontvangs af na die kamers neem. Die skoonheid is asemrowend. Elke hoek is groen en die lug maak my hare wild en krullerig.

Ek spring uit die bed tot in die swembad, en van daar gaan ek af na die strand. Sonsopkoms, ontbyt en ’n gholfkarretjie wat gereed staan. Daarna terug kamer toe om te stort, navorsing te doen en om grimering aan te sit. Die hare in ’n bolla. Weer uit by die deur in ‘n gholfkarretjie en op met die hyser terwyl ek na die eindelose see kyk.

Uitsig uit die hyser

Spring op ’n bus na ’n ander hotel waar daar nog meer asemrowende swembaddens, waterfonteine, blomme, rangskikkings en rolprentsterre is. Ek sit en wag om met Chris Hemsworth te praat. Hy speel in die heropname van Men in Black. Hy is die toonbeeld van ’n rolprentster, ses voet drie, blond, blou oë, pragtige glimlag. Én hy is gaaf.

Die agtergrond van ons onderhoud

Toe ek vra vir ’n wye skoot weens my neus, onderbreek hy my: “Jy lyk goed, moet jou nie bekommer nie.”

Dit is gaaf, maar die kere wanneer ek vergeet om die kameraman te vra om ’n wye hoek te neem, kan jy die skewe neus, die knop aan die kant en die L-vormige letsel sien. En dit is al wat ek sien, daarom vra ek.

Die onderhoud is pret en toe ek weer daarna kyk, sien ek my hare staan wild omdat ek dit in ’n bolla vasgemaak het en daarvan vergeet het voor ek op kamera verskyn het. Ek sien Chris gebruik sy hande meer as ek as hy praat en dit laat my lag. Ons maak klaar toe die son sak en die lug met skoonheid gevul word. Ek bestel ’n drankie en fokus. Daarna gaan ek terug na my kamer om die video vir my YouTube-kanaal te redigeer voor ek dit oplaai en slaap.

Ek word vieruur die oggend wakker en spring uit die bed om in stilte die sonsopkoms oor die strand te geniet.

Ek spring in die helende atmosfeer van die sonsopkoms.

Ek asem die sagte gedruis van die oseaan in. Ek ly aan vlugvoosheid, maar my omgewing oorweldig my met skoonheid. Dit heel my van binne. Ek voel, soos so dikwels, energie oor my spoel. Ek voel lus om in die rondte te tol en in die lug te spring van vreugde.

Volg gerus Margaret se blog vir rooi rose waar sy ons vertel oor haar interessante en besige lewe. Jy kan haar ook volg op Instagram, facebook, twitter en haar YouTube-kanaal waar sy met bekendes gesels – dis als gratis.

The post Margaret se Wêreld: Dit was Cannes en hierdie is Bali appeared first on rooi rose.

Verwerk deur Catherine Schenck. Foto: Johan Wilke

Kfm het die gewilde TV-persoonlikheid Tracey Lange teruggelok radio toe en sy sal haar nuwe program, Mid-Mornings with Tracey, elke weeksdag tussen 9:00 en 12:00 aanbied.

Lees ook: Tracey Lange se stylgeheime

“Ek is mal oor Kfm se wêreldklasbenadering tot die uitsaaiwese, so toe die geleentheid opduik om my stem op ’n oggendprogram by hierdie stasie te laat hoor kon ek dit nie weerstaan nie. Ek sien uit daarna om ’n vars benadering te volg op hierdie program vir werkplekluisteraars,” sê Tracey.

Kfm-staatmaker Ryan O’Connor sal Tracey Lange volg met sy program tussen 12:00 en 15:00 en hy sal die ontbytprogram op Saterdae tussen 07:00 en 10:00 aanbied. Verder sal die Flash Drive met Carl Wastie met een uur verleng word vanaf 15:00 tot 19:00 op weeksdae en laataandaanbieder Andy Maqondwana sal nou ook Sondagoggende saamgesels tussen 07:00 en 10:00.

Vir meer nuus en inligting oor Kfm 95.4, besoek gerus www.kfm.co.za

Het jy geweet? Tracey Lange was ons voorbladgesig in ons Julie 2017-uitgawe. Loer hier agter die skerms met Tracey.

The post Tracey Lange skuif agter die mikrofoon in by Kfm appeared first on rooi rose.

Deur Ansu Visser. Foto’s: Edwin van der Walt. 

Ek sukkel om besluite te neem. En ek wens ek kon sê dat dit net beperk is tot belangrike lewenskeuses, maar soms raak dit die eenvoudige goed – soos watter pizza ek vir aandete wil bestel.

Hoe moeilik dit is om ’n besluit te neem, hang af van die belangrikheid van die situasie. Ek wonder dus gereeld hoe ek my trourok gaan kies!

Maar om ’n rok te koop vir die heel eerste filmpremière waar ek ’n karakter met ’n naam gespeel het, Wonderlus, het ek vrede gehad.

My inkopieroetine vir geleenthede is as volg:

1. Ek besoek YDE en YDE alleenlik. Dit lyk my ek vind gewoonlik dit waarna ek soek, selfs wanneer ek nie eers weet ek soek daarna nie!
2. Ek begin in die eerste ry en dan hou ek aan soek tot ek vyf rokke kry. (Jy mag net vyf items op ’n slag aanpas). Ek trek elke liewe rok aan wat my aandag vir meer as 5 sekondes kan hou. So weet ek uiteindelik dat ek elke liewe ding in die winkel aangepas het en dat ek dus die rok met vrede in my hart kan koop.
3. Ons gesin se WhatsApp-groepie word gebombardeer tot op die punt waar ek dink dat iemand die groep sal “mute” (niemand “mute” mos hul familiegroepe nie, né?)
4. Dan begin die eliminasieproses. Sekere rokke keer terug na hul punte van oorsprong en ander rus veilig oor my arm.
5. Ek stap terug na waar ek laas opgehou het, en dan begin ek weer rokke kies totdat ek weer vyf items het. Dan keer ek terug na die aantrekhokkie. (Ek moet erken ek het een keer 15 rokke aanprobeer).
6. Gewoonlik is daar twee rokke waaroor ek mal is en waartussen ek nie kan kies nie. Dan ek vra die winkelassistente om hulle vir my uit te hou sodat ek ’n dag kan neem om daaroor te dink. Die een waaroor ek aanhou dink, is die een wat ek veronderstel is om te koop.
7. Ek keer die volgende dag terug en koop die een waaraan ek gedink het.

My logika agter hierdie hele proses is as volg: Hoe meer rokke ek aanpas, hoe meer sal die een waaraan my hart behoort na vore kom deur in my gedagtes te bly – selfs al pas ek hoeveel ander rokke aan.

(Amper soos om “Die Een” te vind).

Terwyl ek hierdie blog skryf, en as gevolg van ’n paar vroegoggendgesprekke met my vriende, besef ek daar is dalk ’n probleem met my onvermoë om besluite te neem, my inkopieroetine en my idee oor hoe om “die een” te vind.

Jy sien, ek kon myself ’n hele dag se oorweging en nadenke gespaar het. Ek kon myself gered het van die nodigheid om vyf ekstra rokke aan te probeer, en ek kon eerder gaan koffie drink het as om doodseker te maak dat dit wat ek wil hê regtig is wat ek dink ek wil hê.

Hierdie rok was een van die eerste 5 kledingstukke wat ek aangepas het. Die oomblik toe ek dit aantrek, het ek al die feels gevoel. Die vlindertjies het gefladder en ek het breed geglimlag. So ek het geweet ek wou hierdie een hê. Maar ek moes eers seker maak dat hierdie een dié een was.

Om myself te vertrou, is iets wat ek nog besig is om te leer. Want ek het die volgende uur daaraan bestee om doodseker te maak: Ek het die winkelassistente gevra om dit vir my eenkant te bêre. Ek het die volgende dag na ’n ander winkelsentrum toe gery om ’n rok aan te probeer wat ek daar gesien het, net om terug te ry om hierdie ene te koop.

Dit het my laat besef waarna ek moet luister wanneer ek besluite neem, en myself dan met vrymoedigheid en dapperheid te vertrou.

Hierdie rok lyk dalk asof dit ’n eenvoudige besluit was om te neem – een van daai wat hulleself kies. Maar ek het dit moeilik gemaak.

En daarmee gaan ek ophou.

The post Ansu Visser se blog: Wat ek na my filmpremière gedra het appeared first on rooi rose.

Karlien van Jaarsveld is ons pragtige voorbladmodel vir rooi rose se Mei 2018-uitgawe. Ons deel ’n paar foto’s van Karlien agter die skerms.

Kyk hier na ons agter-die-skerms video met Karlien van Jaarsveld:

Foto’s: Leana Clunies-Ross

Produksie: Hannelie Diedericks

Hare & grimering: Adelle Jung

Stilering: Riaan Hulley

Die Mei 2018-uitgawe van rooi rose met Karlien van Jaarsveld is vanaf Maandag 16 April 2018 beskikbaar op die winkelrakke.

The post Agter die skerms met Karlien van Jaarsveld appeared first on rooi rose.

Deur Margaret Gardiner. Vertaal en verwerk deur Hannelie Diedericks. 

Wie is Demi-Leigh regtig?

Ek is ’n gewone meisie wat op ’n klein dorpie grootgeword het en lief is vir die buitelewe. Ek het van kleins af groot drome gehad oor die lewe in die stad met sy blink ligte. Ek is baie gesteld op fiksheid, maar is ook mal oor lekker kos en is baie lief vir my honde.

Skoonheid is ’n genetiese toeval. Hoekom is Mej. Heelal ’n titel met ’n verskil?

Mej. Heelal bied ’n reuse-platform wat my in staat sal stel om ’n verskil in vroue wêreldwyd se lewe te maak. Dis presies hoekom ek hierdie titel wou wen.

Wat maak jou mooi?

Ek dink dis my persoonlikheid. Wanneer ’n mens iemand leer ken, word haar skoonheid deur haar persoonlikheid gekomplementeer.

Vertel ons van jou gesin?

My ouers is geskei. Ek is my ma se enigste kind, en my pa en stiefma het twee dogters – ek en my halfsussie.

Wat het jy geswot?

B.Com. Besigheidsbestuur en Entrepreneurskap aan die Noordwes-Universiteit in Potchefstroom. Ek dink besigheid is in my bloed. Albei my ouers is entrepreneurs. Dit is ’n baie interessante veld omdat dit heeltyd verander en ’n mens daarby moet aanpas. Ek onthou ek was vyf jaar oud toe ek my ma geld gevra het om ’n pastei vir middagete te koop. Pleks van een pastei het ek tien gekoop en dit die volgende dag aan die ander kinders teen dubbel die prys verkoop (lag).

Jy het meer as een keer aan die Mej. Suid-Afrika-kompetisie deelgeneem?

Nee, ek het in 2017 vir die eerste keer vir die Mej. Suid-Afrika-kompetisie ingeskryf. Ek dink ek het gewen omdat ek goed voorbereid was. Ek was nog besig met my studie toe ek besluit dat ek eers sou inskryf nadat ek my graad gekry het. Ek wou seker maak dat ek alles gedoen het wat ek wou voor ek inskryf.

Hoe het jy gevoel toe jy as Mej. SA gekroon is? En hoe verskil die proses van die Mej. Heelal-kompetisie?

Die formaat verskil heelwat. Die Mej. SA-veldtog is agt maande lank. Maar ek dink die lang proses het my met my voorbereiding gehelp. My goeie vriende en familie het van die begin af in my geglo – hulle was ekstaties toe ek wen.

Met die Mej. Heelal-beoordeling het jy sommer van die begin af ’n goeie indruk op die beoordelaars gemaak – jy was glo een van hul gunstelinge. Was jy bewus daarvan?

Nee, ek het nie geweet ek is ’n gunsteling nie. Ek het net elke dag daarop gefokus om die beste weergawe van myself te wees, en om elke dag ’n beter mens as die vorige dag te wees.

Wat was die uitdagings en hoogtepunte van die kompetisie?

Dit mededinging was baie straf, maar my grootste uitdaging was om seker te maak dat ek gesond bly en om my energie konstant op ’n hoë vlak te hou. Jy werk lang ure en is 24 uur per dag besig om met die res van die deelnemers mee te ding. Die lang vlug na Las Vegas en die tien uur-tydsverskil het dinge ook nie makliker gemaak nie – aan die ander kant het ek 91 nuwe vriende van oral in die wêreld gemaak. Die kompetisie maak regtig die wêreld vir jou oop en gee jou ’n nuwe perspektief.

Jy is in November gekroon. Wat het daarna gebeur?

Ek het New York toe getrek, die Filippyne besoek en die Golden Globes saam met jou bygewoon! Ek het dele van New York verken. Ek het ook die tyd gebruik om te beplan vir die jaar wat voorlê. Ek het ook ’n paar geleenthede gehad om oor my Unbreakable-veldtog te praat – ek wil die veldtog gebruik om vroue wêreldwyd te ondersteun.

Lees hier oor Demi-Leigh se Unbreakable-veldtog.

Jy bly nou permanent in New York. Hoe lyk jou woonstel?

Dis baie knus en gemaklik met ongelooflike uitsigte oor die stad. Dis vir my ’n veilige hawe – my rusplek weg van bedrywige Manhattan.

Wat was die grootste uitdaging in New York?

Vir seker die koue. Ek het geleer om in lae aan te trek. Solank my voete, hande en kop warm is, is ek oukei.

Wat het jy gedoen toe jy die eerste keer sneeu sien?

Ek het soos ’n tipiese toeris buitetoe gehardloop en heeltemal te veel foto’s en video’s van die sneeu geneem.

Volg jy ’n skoonheidsroetine?

Ek drink baie water – drie liter per dag. Ek gebruik goeie velsorgprodukte – vogroom en oogroom is veral belangrik, en ek probeer soveel moontlik slaap en oefen minstens vier keer per week.

“Drome word net waar wanneer jy daaraan werk”

Watter rol speel die vorige titelhouers in die wedstryd?

Jy het 39 jaar gelede gewen. Almal in Suid-Afrika was baie trots daarop dat ons ’n vorige Mej. Heelal gehad het. Ek dink jy was ’n groot inspirasie vir elke meisie wat deelgeneem het.

Wat het jy as Mej. Heelal geleer?

Ek het geleer dat dit oukei is om nie perfek te wees nie. Dis makliker om met mense te kommunikeer wat eg is. Benut dít wat jou anders maak ten volle. ’n Mens kan jou skoonheid met selfvertroue vier, dit hang nie van ’n titel af nie.

Wat is die grootste verandering wat die titel in jou lewe gemaak het?

Beslis die reis. Ek het nog nooit so baie gereis nie! Asook die verantwoordelikheid om ’n verskil te maak. Ek probeer nie eens meer om by die tydsverskille aan te pas nie. Ek slaap maar net wanneer ek kan. Oefening help baie om vlugvoosheid teë te werk en dis goed vir jou lyf as jy soveel uur moet stilsit. Ek probeer ook om baie water te drink en gesond te eet.

Wat doen jy gedurende ’n lang vlug?

Ek slaap, of ek skryf in my dagboek en dink na oor wat ek gaan doen. ’n Goeie fliek en musiek laat ook die ure verbyvlieg.

Watter pryse het jy met Mej. Heelal gewen?

Die feit dat ek vir ’n jaar in New York kan bly, die wêreld kan platreis, mense ontmoet en plekke besoek wat ek nooit andersins sou kon doen nie. En natuurlik die geleentheid om hierdie platform te kan gebruik vir die dinge wat vir my belangrik is. Dis die grootste prys!

Wat het jy altyd in jou handsak?

Gesigpoeier, lipglans, my beursie, naelvyl, handeroom, oogdruppels en vitamien C-tablette.

Wie is jou gunsteling- Suid-Afrikaanse ontwerpers?

Gert-Johan Coetzee en Anél Botha. Anél het ook my finale uitrusting vir die Mej. Heelal-kompetisie gemaak.

Kan jy die klere hou wat mense vir jou ontwerp het?

Ek kon nie die rok hou wat ek by die Globes gedra het nie, maar ek kry soms geborgde klere. Ek is oukei daarmee om ’n rok net een keer vir ’n spesiale geleentheid aan te trek.

Margaret Gardiner en Demi-Leigh Nel-Peters by die Golden Globes

Hoe het jy die Golden Globes ervaar?

Die Globes was nou een geleentheid waarvan ek gedroom het. Ek het baie geëerd gevoel om langs jou by die rooi tapyt af te loop. Dit was ’n báie spesiale oomblik. Dit was ook vreemd om van my gunsteling-aktrises te sien – mense soos Meryl Streep, Angelina Jolie en Oprah. Maar gelukkig het ek gemaklik gevoel omdat jy by my was. My vriende en familie by die huis het tot in die vroeë oggendure wakker gebly om dit te sien.

Wat was vir jou die hoogtepunt van die aand?

Ek was trots daarop om deel te wees van die Times Up-beweging deur ’n swart rok te dra en saam met vroue wêreldwyd ons afkeer van seksuele molestering en mishandeling duidelik te maak. Dit was baie emosioneel.

Wat was die beste raad wat jy gekry het?

Moenie meegesleur word deur die daaglikse chaos nie. Staan terug, haal diep asem en beleef die oomblik ten volle.

Watter raad sal jy vir jong meisies gee wat groot drome het?

Drome word net waar as jy daaraan werk. Met harde werk en toewyding kan jy enigiets vermag.

Wat is die belangrikste boodskap wat jy vanjaar wil uitdra?

Ek het agt maande gelede, ná ek ’n motorkaping oorleef het, ’n veldtog genaamd Unbreakable in Suid-Afrika van stapel gestuur. Ek wil ek ander vroue help om hulself te kan beskerm sou iets met hulle gebeur. Ek was gelukkig genoeg om die regte opleiding en kennis te hê om so ’n situasie te hanteer. Ek het landwyd werkwinkels aangebied waar ek die opleiding en kennis wat ek het met ander vroue gedeel het. Ek hoop dat ek die Mej. Heelal-platform kan gebruik om meer hieroor te praat omdat geweld teen vroue ’n wêreldwye verskynsel is.

Oor Demi-Leigh se kuier in Suid-Afrika

“My hart is vol vreugde en dankbaarheid. Die week in Suid-Afrika was die beste week van my lewe. Ek het dit glad nie verwag nie en ek is so dankbaar teenoor almal wat my week so spesiaal en onvergeetlik gemaak het. My huis is waar my hart is, en Suid-Afrika sal altyd my hart hê. Ek is so geëerd om ons pragtige reënboognasie te verteenwoordig en om die wêreld te wys wat dit is wat Suid-Afrikaners spesiaal maak.”

Margaret uit Hollywood

Ek staan op die punt van die rooi tapyt by die Golden Globes toe my telefoon lui. Dis Demi-Leigh se assistent wat sê dat hulle by sekuriteit verby is. Hoe het ek hulle gemis? Ek trek my stilettos uit en hardloop terug na die onthaalsaal. My telefoon lui weer: “Ons is hier!” “Waar is hier?” “By die begin van die tapyt.”
Die Golden Globes is ’n reuse-geleentheid in Los Angeles en groot dele van Beverly Hills word heeltemal afgebaken. Bomspesialiste met honde patrolleer die gebied en die gaste moet deur verskeie sekuriteitshekke gaan voordat die limousines die sterre by die punt van die rooi tapyt aflaai.
Ná 39 jaar het ’n Suid-Afrikaner weer die Mej. Heelal-titel verower, en my geskenk aan Demi-Leigh was die uitnodiging na die Golden Globes – een van Hollywood se glansrykste aande van die jaar. Sy is my persoonlike gas en word op die hande gedra nes die A-lys-sterre wat die plek vol staan. Ek het elke moontlike voorsorg getref om seker te maak dat ek hier is wanneer sy opdaag, en nou is daar ’n misverstand! Ek tel die soom van my lang Oliver Tolentino-rok op, my skoene in die ander hand en hardloop terug terwyl die mense vir my lag en sê ek hardloop in die verkeerde rigting. Net voor sekuriteit gaan staan ek, trek my skoene aan en trek my rok reg. En daar reg voor my staan sy. Doodstil tussen die chaos wat haar omring. Ons bars gelyk uit van die lag en gee mekaar ’n drukkie. Ons giggel en lag soos ou vriende. Daar is soveel wat ons vir mekaar wil sê. Ná ’n paar rooi tapyt-
onderhoude is dit duidelik hoekom Demi gewen het. Mense is vinnig om grappies te maak oor skoonheidskoninginne, maar Mej. Heelal verg baie meer as net skoonheid. Jy moet vinnig en uit die vuis kan dink en ’n goeie kop op jou skouers hê. Sy is welsprekend en weet hoe belangrik die platform is wat saam met die titel gaan. Tussen die aand se verrigtinge deur gesels ons land en sand. Ek vra haar uit oor haar aspirasies, haar nuwe lewe en haar familie. En ek vertel haar dat vanjaar haar jaar is. Dit word gou duidelik dat Demi alles met ’n plan aanpak. Sy bly kalm te midde van die storm en is baie gemaklik in die kollig. Haar jaar sal tel. Haar visie en vasberadenheid sal haar goed te pas kom, nog lank nadat sy haar Mej. Heelal-kroon afgehaal het. Sy is óns meisie. Ons Mej. Suid-Afrika. Ons Mej. Heelal.

Margaret Gardiner en Demi-Leigh Nel-Peters by die Golden Globes

The post Die mooiste in die heelal appeared first on rooi rose.

Saamgestel deur Anélle Tewson. Foto’s deur Eunice Driver, Eunice Driver Photography. 

Mode-ontwerpers van regoor die land werk al maande lank om reg te maak vir die onthulling van hul nuutste skeppings by die Suid-Afrikaanse modeweek 2018.

Hierdie maand was die SA-modeweek by die Protea Court Rooftop, Sandton City.

Hier is ons gunstelinge:

The post SA-modeweek Lente/Somer 2018 appeared first on rooi rose.

Deur Catherine Schenck. Foto: Willem Botha. 

Jy, jou ma Juanita en jou broer Ruan Josh het onlangs ’n CD genaamd Kaalvoetkinners vrygestel. Wat was jul motivering en hoe was dit om saam met hulle te werk?

Baie mense het al gevra wanneer ons ’n album  gaan uitreik. Ons het altyd geweet ons wil dit doen en die tyd het net reg gevoel. Dit is baie lekker om saam met hulle te werk. Ek glo elkeen bring iets unieks in die ander uit en elkeen se mening maak die eindproduk beter.

Lees ons onderhoud met Franja en haar broer Ruan Josh.

Jy het laas jaar heelwat pryse vir jou debuutalbum gewen. Wat het hierdie ervaring jou geleer?

Dat alles net een groot blessing is en dat harde werk tog beloon word. Jy moet aanhou droom en glo dat jy jou doelwitte sal bereik.

Waarmee is jy tans besig?

Ek werk op die oomblik in die ateljee aan my tweede album. Ek is baie opgewonde daaroor! Verder toer ek sodat mense my musiek kan hoor.

Wie en wat inspireer jou musiek?

Dit wat met my of die mense rondom my gebeur. Ek dink die Here en mense na aan my inspireer my die meeste. Partykeer sit ek my in iemand anders se skoene en skryf daaroor. Ek dink ook dit hang af na watter soort musiek ek luister.

Hoe skryf jy jou liedjies?

Ek sit meestal met my kitaar of voor ’n klavier, en ek kry ek gewoonlik eerste die melodie. Dan sal ek aan ’n titel of ’n versreël dink wat goed daarby sal pas. Ek het selfs al liedjies gedroom. Dan neem ek dit met my foon op sodat ek dit nie  teen die volgende oggend vergeet nie.

Saam met wie sal jy nog graag ’n liedjie wil sing?

Dis vir my moeilik om te kies. Ek dink Elandré het vir my een van die mooiste en mees unieke stemme. Ek sal graag wil hoor hoe klink ons stemme saam. En verder enigiemand saam met wie ek lekker sal werk.

Wat het jou laat besluit om ’n musikant te word?

Ek het met musiek in ons huis grootgeword. Ek  was altyd lief daarvoor en ons het graag vir my ma-hulle shows gehou. Maar ek dink in die hoërskool het die gogga my behoorlik gebyt. Ek het self begin skryf en ek dink dit maak dit net soveel meer spesiaal en lekkerder as jy self kan skryf. ’n Mens groei elke dag. Ná skool het ek in As Jy Sing gespeel en ek het daar al klaar geweet dít is wat ek wil doen. As dit nie is om te sing nie, dan net om in die ateljee te kan werk of te skryf.

Jy het ’n kwalifikasie in musiekproduksie en werk by jou ouers se platemaatskappy. Wat geniet jy die meeste van die vervaardigingsproses?

Om te hoor hoe die liedjie groei en nog beter word. Ook om nuwe goed te probeer: ek leer elke dag meer of iets nuuts.

Wat is vir jou belangrik?

Vir my is my verhouding met die Here belangrik en om die pad te stap wat Hy vir my uitgelê het. Die mense na aan my vir wie ek lief is, is ook belangrik.

Wat laat jou lag?

Ek lag gewoonlik vir die simpelste goed; die GIF’s op WhatsApp kan snaaks wees. En mense laat my ook lag. En ek lag baie vir myself ook.

Wonder jy wat ’n GIF is? Lees hier.

Wat laat jou huil?

Ek huil maklik, en dikwels weet ek nie eens hoekom ek huil nie! As ek baie kwaad is, huil ek, en sommer oor enige iets wat my na aan die hart lê. Ek gee om vir ander mense, en ek sal partykeer sommer huil as iemand anders huil.

Wat is die lekkerste ding wat jy al op die verhoog moes doen?

Dis vir my lekker om die verhoog met my ma en Ruan te deel. Die danse wat ons een jaar vir As Jy Sing by Afrikaans Is Groot moes doen, was ook lekker. Ek sal eintlik goed wil leer dans!

Luister hier na Franja en Ruan Josh se duet Ek Wil Lewe.

Jy is ’n trotse Namibiër wat al ’n ruk lank in Suid-Afrika woon en jy het al baie gereis. Wat is jou gunsteling-plek?

Hentiesbaai in Namibië sal altyd een van my gunstelinge bly. En dan ook ons plaas. As dit ’n ander land moet wees, sal ek sê Nashville of Texas in Amerika.

Lees ook: Juanita du Plessis: Suidwes is in die Bloed

Waarna sien jy vanjaar uit?

Ek sien uit om my nuwe musiek met die mense te deel. Ek sien uit na die Innibos-fees en Krone en om te toer en nuwe mense te ontmoet. En om die beste van die lewe te maak!

The post Ons gesels met Franja du Plessis appeared first on rooi rose.

Deur Catherine Schenck. Foto: pixabay. 

Akani Simbine en Henricho Bruintjies het op Maandag 9 April 2018 onderskeidelik goud en silwer in die 100  m-naelloop gewen. Die gunsteling, die Jamaikaanse Yohan Blake, moes met ’n bronsmedalje tevrede wees. Simbine het die naelloop in 10.03 voltooi, Bruintjies 10.17 en Blake was kort op sy hakke in 10.19.

Twee ander naellopers het medaljes verower. Dyan Buis het silwer gewen en Charl du Toit brons in die T38 100 m-naelloop.

Ons swemmers het vanjaar goed gevaar. Chad le Clos het drie goue en een silwer medalje verower. Hy het goud gewen in die 100 m-, 200 m- en die 50 m- vlinderslag. Hy het silwer gekry in die 100 m-vryslag. Cameron van der Burgh het ‘n goue (50 m- borsslag) en ‘n bronsmedalje (100 m-borsslag) verower. Christian Sadie het silwer gewen vir die S7 50 m-vryslag en Ryan Coetzee het ’n brons losgeswem in die 50 m-vlinderslag. Tatjana Schoenmaker het twee goue medaljes gewen in die 100 m- en 200 m-borsslag.

Die driekampatleet Henri Schoeman het Suid-Afrika se eerste goue medalje gewen. Mona Pretorius het ’n bronsmedalje gekry in gewigoptel en die vroue-rolbalspan van Elma Davis, Esme Kruger, Nicolene Neal en Johanna Snyman het ’n silwer medalje gewen en Colleen Piketh ’n brons.

Lees ons artikel oor Schoeman se oorwinning hier.

Die Statebondspele duur tot 15 April 2018.

The post Simbine, Schoenmaker, Schoeman en kie verseker medaljes by die 2018 Statebondspele appeared first on rooi rose.

Deur Corné Greeff & Bea Lingenfelder. Hooffoto: JJ Harmse. 

’n Blitzbok moet harde klippe kou om tot die span se naam gestand te doen: om span te kry en sy posisie te behou sit nie in enigiemand se broek nie. Die tegnieke, soos vlugvoetigheid, is baie spesifiek en die fiksheidprogram vereis uiterse deursettingsvermoë.

Die ondersteuning en verhouding tussen die spelers is duidelik spesiaal as ’n mens kyk na hulle sosiale media, luister na hulle gesprekke en selfs kyk hoe hulle saamwerk tydens ’n wedstryd. Die Hong Kong-span, byvoorbeeld, het vir kaptein Philip Snyman die onderstaande foto op Maandag, 2 April, gestuur om simpatie teenoor hom en familie te toon vir die verlies van Philip se pa, Flip Snyman.

The post #rrkitskuier: ’n Blitzbok staan twee pare tokse vol appeared first on rooi rose.

Deur Catherine Schenck. Foto: pixabay.com

Henri Schoeman is die eerste Suid-Afrikaner wat vanjaar ’n goue medalje op die Statebondspele verower het. Hy het die driekamp in ‘n tyd van 52:31 gewen. Die Australiër Jacob Birtwhistle was tweede (52:38) en Marc Austin van Skotland derde. Schoeman het by die 2016 Olimpiese Spele ’n brons medalje gewen.

The post Suid-Afrikaner wen driekamp by Statebondspele 2018 appeared first on rooi rose.

Deur Catherine Schenck. Foto’s: Jay Loots en Wihan Ellmann

In Meerkat Maantuig vertolk jy die rol van ’n jong seuntjie genaamd Bhubesi.

Hierdie karakter is ’n jong swart seuntjie wat saam met sy ma, oupa en ouma op ’n plaas woon. Hy is vol lewe en het baie energie ten spyte van die wolk wat oor sy kop hang: die wete dat hy binnekort sal sterf. Hy laat egter nie toe dat hierdie wete sy persoonlikheid of sy hoop beïnvloed nie. Ook nie sy droom om eendag ruimte toe te gaan nie – wat ook die rede is waarom oupa (gespeel deur Pierre van Pletzen) ’n maantuig bou. Bhubesi is doof en effe stom, maar hy laat nie toe dat dit hom onderkry nie. Hy is die een kind wat vol vertroue en vreugde is.

Lees ons twee onderhoude met Pierre van Pletzen: klik hier en hier

Hoe was dit om so jong karakter te speel, en dan nog een wat nie juis praat nie?

Om eerlik te wees, was dit nie regtig ’n maklike rol om aan te pak nie, aangesien ek wel kan hoor. Een van die maniere waarop ek die rol kon aanpak was om oorpluisies in my ore te druk om die hoeveelheid klank wat ek om my hoor te verminder. Toe moes ek ook leer hoe om klank uit my kop te hou deur van die spanlede te ignoreer as hulle met my praat – ek het bloot gemaak asof ek hulle nie hoor nie. Laastens moes ek ’n manier vind om met Gideonette (Anchen du Plessis) te kommunikeer en ’n ander manier vind om alles oor te dra wat ek wou hê sy vir my moes doen. Ek moes hier en daar gedempte klanke en steungeluide insit en ek moes fisies artikuleer wat ek wou hê, wat nogal uitdagend was.

Wat dink jy is die grootste boodskap in die film?

Om nooit op te gee nie. Om nooit toe te laat dat vrees jou vreugde steel nie. Dit gaan daaroor om werklik jou vrese te oorkom – van die onbekende tot die dood. Die boodskap is verder dat jy jou lewe ten volle moet leef. Doen alles wat jou gelukkig maak en vind vreugde in die klein dingetjies. Want, in alle eerlikheid, ons gaan almal op een of ander punt sterf, maar dis wat ons met die tyd doen wat aan ons toegelaat is wat alles die moeite werd maak. Dit gaan daaroor om verhoudings te bou en om dinge te vind wat jy en die mense om jou in gemee het.

Het jy lekker saam met die ander akteurs gewerk?

Hulle is wyse akteurs: hulle is op dieselfde tyd professionele akteurs en mense wat lief is vir dit wat hulle doen. Dit is soveel makliker om met sulke mense te werk – mense wat met liefde gevul is en wat weet hoe om hul Godgegewe talente te gebruik. Dit was so ’n ongelooflike stel propvol liefde en geluk, ten spyte van al die uitdagings wat ons gehad het – soos om in die modder en reën te verfilm.

Die film is baie gewild oorsee – julle het al verskeie toekennings en benoemings gekry. Hoe voel dit om te weet jy is deel van ’n fliek wat internasionaal bekend is?

Dit beteken so baie vir ons omdat elke lid van die span soveel moeite en tyd in hierdie film geploeg het. Almal het hul alles gegee en ek glo dit het ons almal baie trots gemaak omdat ons as ’n span saamgewerk het om dit te kan bereik. Ons is almal baie opgewonde oor die film en oor die projek as ’n geheel.

Lees hier oor Meerkat Maantuig se gewildheid oorsee

Wat is die snaaksste ding wat op stel gebeur het?

Omdat ons tydens die reënseisoen in Magoebaskloof geskiet het, het baie van die bemanning aanhou gly en val – wat elke keer baie snaaks was. Ek het een keer amper geval … maar gelukkig op die ou einde darem toe nie.

Foto: Jay Loots en Wihan Ellmann

Jy het jou loopbaan by Rhythm City begin toe jy nog op hoërskool was en het mense vinnig beïndruk met jou spel. Wat het jy by die sepie geleer en hoe het dit die res van jou loopbaan beïnvloed?

Ja, my grootste deurbraak was by Rhythm City waar Rolie Nikiwe, regisseur, die persoon was wat my die geleentheid gegun het. My toneelspel was nog altyd ’n Godgegewe talent. Dis wat God in my geplaas het. So, toe ek my loopbaan begin het, het ek geglo in my talent en ek het daarin geglo om te doen wat ek moet doen. Om in ’n sepie te kon speel, het my geleer hoe om in ’n span te werk saam met mede-akteurs. Dit het my verder geleer om my werk te respekteer en om meer en meer professioneel te word.

Jy het film studeer en gefokus op draaiboekskryf en regie en jy werk ook as draaiboekskrywer. Waarmee is jy tans besig?

Ja, ek het by die AFDA-filmskool studeer waar ek ’n BA-graad ontvang het met hoofvakke in draaiboekskryf en regie. Dit het na my studies nogal ’n tydjie geneem om my skryfvaardighede te ontwikkel oor ander goed wat in my lewe gebeur het waarheen God my geroep het op daardie punt. Maar ek het darem al ’n paar skryfgeleenthede gehad, soos om vir Snake Park, Ntunjambili en OM Films te skryf. Ek het onlangs ook aan my eie oorspronklike werk begin skryf, soos ’n sitkom en ’n geselsprogram wat ek steeds probeer ontwikkel. Ek glo daar is nog opwindende goed wat voorlê.

Wat het jou geïnspireer om ’n akteur te word?

As kind het ek baie flieks gekyk. Dit was gedurende die era van Sjinese Kung Fu-flieks en verskeie ander films. Ek het veral van Denzel Washington se werk gehou, asook Will Smith, Robert De Niro, Danny DeVito, Leonardo DiCaprio en baie ander.

Wat wil jy nog vermag?

Ek werk op die oomblik aan projekte vir my stigting, die ThembaTalksMIND – my handelsmerk as akteur, spreker, jeug-lewensafrigter en toneelspelonderwyser vir jong kinders. Ek wil regkry wat Tyler Perry met sy films, werk, en loopbaan vermag het. Alhoewel baie mense hom stereotipeer, glo ek hy het iets ongelooflik met swart Amerikaanse films gedoen en hy het al saam met ’n klomp wonderlike mense in sy leeftyd gewerk. Ek sal ook eendag graag VSA toe wil gaan en daar as filmmaker groei.

Is daar ’n rol wat jy nog baie graag wil speel? Of ’n spesifieke storie wat jy wil skryf?

Ek wil nog baie rolle vertolk en veral karakters speel wat ek vir myself geskep en geskryf het. Ek sal ook graag betrokke wil raak by animasies. Verder sal ek graag die regie wil behartig van ’n storie oor Jesus in vandag se tyd en hoe anders dinge sou gewees het met die stand van ons wêreld soos dit nou is.

Wat is die lekkerste ding wat jy al ooit vir ’n produksie moes doen?

Om Joss Weadon te kon ontmoet. Hy is een van die regisseurs vir die Marvel-flieks en ek kon ’n derde assistent-regisseur wees in die Avengers-fliek wat in Suid-Afrika geskiet is. Ek het ook die geleentheid gehad om te speel en derde assistent-regisseur te wees in Sean Penn en Charlize Theron se fliek The Last Face, asook in Resident Evil: The Last Chapter.

Wat is jou stokperdjies en belangstellings?

Om flieks te kyk, teater toe te gaan, te lees en die woord van God asook ander tekste te bestudeer. Dan is korfbal ’n nuutgevonde belangstelling en daarmee saam geniet ek bordspeletjies en PlayStation.

Vertel ons iets wat niemand van jou weet nie.

Ek glo dit wat mense tans van my weet, is dat wat hulle nou nodig het om te weet. Die res sal onthul word wanneer die tyd reg is.

Wat is jou gunstelingkos?

Hamburgers en ribbetjies.

Wat is jou lewensleuse?

Ek leef volgens ’n Bybelversie wat my nog altyd aangemoedig het wanneer ek iets wil doen of ’n sekere keuse moet maak. Dit kom uit Spreuke 3:5-6: “Vertrou volkome op die Here en moet nie op jou eie insigte staatmaak nie. Ken Hom in alles wat jy doen en Hy sal jou die regte pad laat loop.” Hierdie is my lewensleuse en dit is wat my dryf. Dis my vertroue in Jesus Christus en om volgens sy woord te lewe.

The post Ons gesels met Themba Ntuli appeared first on rooi rose.

Is jy ’n aanhanger van BBC se Strictly Come Dancing? Het jy geweet dat ’n Suid-Afrikaner een van die professionele dansers op die Britse program is? Haar naam is Oti Mabuse en ons het haar beter leer ken.

Jy is een van die professionele dansers op BBC se Strictly Come Dancing. Vertel ons meer.

Dit is ’n wonderlike program en ek kan net hoop dat ek vreugde en vermaak in mense se huise bring op ’n Saterdagaand. Dis propvol weelde, ons lag lekker en ek dink mense verdien dit om elke nou en dan te kan ontsnap.

Hoe is dit om saam met bekendes te dans wat nie opgeleide dansers is nie? Trap hulle baie op jou tone?

Ja, jy kry alle soorte beserings. Jou knieë word potblou gestamp, arms en bene waai orals … maar dit is als deel van die werk. Hulle weet mos nie wat hulle doen nie, en die plesier kom daaruit om te sien hoe ver hulle al gevorder het van die begin van die reeks af.

Jou dansmaat in seisoen 15 was die Paralimpiese atleet Jonnie Peacock. Hoe was dit om saam met hom te  werk?

Dit was eenvoudig ’n onbeskryfbare gevoel want ek het soveel van hom as persoon geleer. Hy verpersoonlik die doel van die program en was ’n wonderlike inspirasie.

Wat was vir jou die lekkerste oomblik saam met hom?

Die American Smooth wat ons gedans het was definitief een van my gunstelinge wat ek al ooit op Strictly Come Dancing gedoen het. Daardie slag was ons werklik ’n danspaartjie en nie net ’n bekende persoon en ’n danser nie.

Wat is die snaaksste ding wat al ooit met jou gebeur het op die program?

My rok het in die helfte geskeur … tydens ’n regstreekse uitsending. Ek kon nie beweeg nie en ek was heeltemal blootgestel!

In een van die episodes het mense gedink Beyoncé het op Strictly Come Dancing verskyn, maar toe was dit al die tyd jy. Hoe was dit om jou innerlike Queen Bey uit te druk?

Ek was nie besig om haar spesifiek na te maak nie. (Sy lag). Ek was veronderstel om ’n model te wees en ek het net soos sy gelyk as gevolg van die kostuum en hare. Ek was besig om ’n paar vroue uit te beeld: Tyra Banks, Naomi Campbell en Beyoncé – almal tesaam omdat ek so senuagtig was. Ek het nog nooit ’n openingsnommer op my eie begin nie, so die idee van al die aandag wat op my geskoei was, het my senuagtig gemaak. Maar toe dit eers oor was en ek dit gekyk het, kon ek nie glo hoe ongelooflik dié item gelyk het nie. Ek waardeer hoe almal daardie nommer geniet het en die positiewe reaksie wat ek ontvang het as gevolg daarvan.

Kyk hier na die video:

Hoe het jy begin dans en wanneer het jy besef jy wil dit professioneel doen?

My ma het my en my susters vir dansklasse ingeskryf toe ons almal klein was. Ek was vier jaar oud en was van die begin af lief daarvoor. Ek het professioneel begin dans so gou as wat ek kon en toe ek braaf genoeg was het ek Duitsland toe getrek om my dansloopbaan te bevorder.

Wat is jou gunsteling-dansstyl?

Ek is mal oor American Smooth. Ek hou ook van die Weense Wals – dis pragtig en jy kan so vry wees in hierdie styl.

Hoe lyk die lewe van ’n professionele danser?

Dis voltyds: jy spandeer tyd in die gimnasium, jy gee klas, jy neem klas en jy reis baie – meestal vir kompetisies. En dan neem jy nog deel ook! Dis ’n loopbaan en ons moet ons alles gee om suksesvol te wees want dis nie iets wat jy vir ewig kan doen nie. So, wanneer jy die geleentheid het om te dans, wil jy soveel moontlik daarvan ontgin.

Wat doen jy wanneer jy nie op TV is nie?

Ek dans voltyds, en ek gaan ook saam met die danser Ian White ’n groot toer meemaak in 2018. Ons gaan vir 60 dae lank reis en dans regoor die Verenigde Koninkryk. Tans is ek ook besig om ’n dansskool op die been te bring in Londen.

Beskryf ’n dag in die lewe van Oti Mabuse.

Ek word wakker. Ek eet ontbyt. Ek maak gereed om klas te gee en dan gaan gee ek danslesse wat die meeste van my dag opneem. Wanneer ek tuiskom, doen ek wasgoed en dan spandeer ek en my man ’n private aandjie tuis.

Jy’s ’n Pretorianer. Gaan jy nog gereeld huis toe?

Ek het grootgeword in Mabopane en ek is steeds vriende met my maats uit my kinderdae. Ek gaan kuier gereeld daar, ja. My ma het ’n kleuterskool, Helen May Pre-School, en wanneer ek vir haar kuier dan help ek met die kindertjies.

Wat maak jou gelukkig?

My man en my gesin – ek het twee susterskinders (’n seuntjie en ’n dogtertjie) wat vir my soveel vreugde verskaf. Ek kyk na video’s van hulle twee vir die pret!

Wat maak jou hartseer?

Om nie genoeg tyd met my gesin te spandeer nie. Ons almal bly in verskillende lande en ons sien mekaar slegs tydens Desembermaande wat vir my verskriklik hartseer is.

The post Ontmoet Oti Mabuse van Strictly Come Dancing appeared first on rooi rose.