Ludik | rooi rose

Ludik-aktrise Inge Beckmann gesels oor haar karakter Rina Goosen

Gaynor Siljeur — Mon, 29 Aug 2022 10:05:53 +0000

rooi rose gesels met Ludik-aktrise Inge Beckmann

Vertel ons van jou karakter in Ludik

Ek vertolk die rol van Rina Goosen. Sy is Daan Ludik se sekretaresse, vennoot en vertroueling en hulle werk al 15 jaar lank saam. Rina sal soms besluite maak wat die kykers mag skok. Ten spyte van die verknorsings waarin sy haarself bevind, is sy beslis iemand wat jy in jou hoek wil hê as dinge begin verkeerd loop.

Wat beteken dit vir jou om deel van die eerste Afrikaanse Netflix-reeks te wees?

Ek voel baie trots om deel hiervan te wees en deels omdat ek die geleentheid gehad het om met wonderlike akteurs soos Arnold Vosloo te werk, maar ook omdat Ludik ŉ realistiese en menslike kant van Suid-Afrikanerwees verteenwoordig, wat in my opinie meer opreg oorkom. Ek voel egter dat Suid Afrikaanse akteurs weereens aan die kort end moet trek as dit kom by royalties waarop ons geregtig is, want die wette wat ons moet beskerm, is nie in plek nie. Dit laat ons in ’n ewigdurende “fame without fortune”-staat.

Lees nog: Netflix stel binnekort eerste Afrikaanse reeks internasionaal vry

Enige geheime wat jy mag deel?

Ons het hard gewerk én hard gekuier.

Vertel ons van jou tyd op stel. Hoe het jy dit ervaar?

Sjoe, soos op meeste jobs was dit vir my soms ŉ bietjie frustrerend, want ek is ŉ totale perfeksionis en wil hê alles moet perfek wees. Ons het ons bes gedoen met die begroting en hulpbronne wat ons tot ons beskikking gehad het. ’n Mens kan altyd doen met meer tyd en geld om ’n storie goed te vertel. Ludik gaan ’n treffer wees. Beslis een vir die filmiese en kulturele Groot Verseboek.

Is daar enige karaktereienskappe wat jy met jou karakter deel?

We are both very resourceful.

Op watter manier verskil jy van jou karakter?

Ek sal nie sommer betrokke raak met iets onwettig nie, veral nie as dit die mense om my in gevaar stel nie.

View this post on Instagram

A post shared by @ingebeckmann

Ons het onlangs Vrouedag gevier, wat beteken vir jou?

’n Vrou word elke ses uur deur ‘n lewensmaat in Suid-Afrika vermoor. Dit het nou ’n punt bereik wat dit vir my voel asof die moord van vroue (en kinders) ’n soort bloedsport in ons land geraak het en geweld en disrespek is amper normaal. Vrouedag is vir my net nog ’n herinnering dat ons magteloos teen vrouemoord is. Suid-Afrika is deur die patriargie saamgestel en tot daar diep hervorming plaasvind, sal dit nie verander nie. Vroue moet ook hul eie verouderde sienings oor vrouwees uitdaag en bevraagteken. Ons kan nie ’n verdedigingsmag sonder soldate saamstel nie.

Lees nog: rooi rose gesels met Ludik se Lea Vivier

The post Ludik-aktrise Inge Beckmann gesels oor haar karakter Rina Goosen appeared first on rooi rose.

rooi rose gesels met Ludik-aktrise Diaan Lawrenson

Gaynor Siljeur — Mon, 29 Aug 2022 08:00:01 +0000

rooi rose gesels met Ludik-aktrise Diaan Lawrenson

Ons gesels met die bekende aktrise Diaan Lawrenson, wat die rol van Daan Ludik se vrou, Anet Ludik, vertolk. Sy vertel meer oor haar karakter, mede-akteurs en die karaktereienskappe wat sy met Anet Ludik deel.

**Vertel ons van jou karakter in Ludik.**

Anet Ludik is Daan Ludik se tweede vrou. Daan en Anet het ’n seun, Danie, en Anet het ook ’n stiefdogter, Louise. Anet raak al hoe meer bewus van die gevaarlike geheime in haar huwelik en probeer met al haar mag agter die kap van die byl kom. Anet raak net meer desperaat en nog meer geïsoleer soos sy vir haar man en gesin probeer veg. Haar eensaamheid lei na verkeerde besluite wat haar huwelik verder in gevaar kan stel.

Foto: Verskaf

Wat beteken dit vir jou om deel van die eerste Afrikaanse Netflix-reeks te wees?

Dis ’n droom wat bewaarheid word. Ek is lief vir Afrikaans en werk al my hele loopbaan deur in Afrikaans. Ludik is vandag in 190 lande oor die wêreld heen beskikbaar en 220 miljoen mense kan dit in Afrikaans kyk. Ek is baie trots om deel van die oomblik te wees.

Lees nog: Netflix stel binnekort eerste Afrikaanse reeks internasionaal vry

Wat was jou gunsteling deel van hierdie projek?

Die teks is sterk en ek is mal oor die storie. Ja, dit is aksie-belaai, maar daar is ook komplekse karakters wat gehore gaan aangryp. Dan natuurlik die mense – die akteurs, regisseurs, vervaardigers, die hele agter-die-skerms-rolprentspan.

Is daar enige karaktereienskappe wat jy met jou karakter deel?

Daar is maar altyd iets van jouself in ’n karakter en omgekeerd. Anet is bitter lief vir haar man en gesin. Haar gesin is haar eerste en belangrikste prioriteit en dit is definitief iets waarmee ek myself kan vereenselwig. Daan Ludik is die hoof van die huis in die tradisionele sin en ’n sterk persoonlikheid; ek wou ’n vroulike karakter skep wat ewe sterk vir Daan in die oë kan kyk. Ek wou ’n vroulike karakter skep wat tegelyk sterk én sag kan wees.

Vertel ons van jou mede-akteurs.

Die rolverdeling in Ludik is indrukwekkend. Ek ken baie van die akteurs al vir jare en ons het al baie saam gespeel – Zane Meas, Elma Postma, Justin Strydom, Andre Odendaal, en die lys gaan aan! Dit was heerlik om weer saam te kan werk. Dan was daar ook eerstes – dit was wonderlik om saam met Arnold te werk en so ook Rob van Vuuren en Lea Vivier. Hoe gelukkig kan een meisie wees om teenoor al die legendes en sterre te speel!

Ons vier Vrouemaand. Watter lewenslesse hoop jy om aan jou dogter oor te dra?

Om nooit in haarself te twyfel nie – al bewe sy in haar stewels. Om altyd in haar eie towerkuns te glo. Om nooit terug te staan vir enigiemand nie. Om altyd haarself te koester, lief te hê en te beskerm.

Foto’s: Verskaf

Lees nog: rooi rose gesels met Ludik se Lea Vivier

The post rooi rose gesels met Ludik-aktrise Diaan Lawrenson appeared first on rooi rose.

rooi rose gesels met Ludik se Lea Vivier

Gaynor Siljeur — Mon, 22 Aug 2022 06:00:08 +0000

rooi rose gesels met Ludik se Lea Vivier

Vertel ons van jou karakter in Ludik

1. Louise is nie op haar bek geval nie en sy sal alles in haar vermoë doen om te kry wat sy wil hê – bietjie soos haar pa (vertolk deur Arnold Vosloo). Sy probeer konstant om haar werksvernuf aan haar pa te bewys, maar dring gelyktydig op haar totale onafhanklikheid aan. Die maatskappy, Ludik, is haar hele lewe en alles anders kom tweede, al probeer sy om haar eie plekkie in die son te vind (onafhanklik van haar pa se legacy).

Wat beteken dit vir jou om deel van die eerste Afrikaanse Netflix-reeks te wees?

2. Dis natuurlik ongelooflik opwindend! Ek maak ’n verskyning in die Amerikaanse reeks Resident Evil (ook op Netflix) as ’n Meksikaanse vrou en praat nét Spaans, so dis heerlik om te weet dat my moedertaal ook lugtyd gaan kry! Die reeks is eintlik 40% Afrikaans en 60% ander Suid-Afrikaanse tale, en dis belangrik dat ons meer soos dít begin stories vertel! Dis is tog ’n meer akkurate uitbeelding van hoe ons as Suid-Afrikaners leef en kommunikeer.

Op watter manier verskil jy van jou karakter?

3. Wel, ék sou sê ek het ’n gesonder verhouding met my pa en het my eie loopbaan onafhanklik van sy praktyk (hy’s ’n advokaat, so dit het van nature gebeur), uitgekerf. Maar ek’s net so loopbaangedrewe soos Louise, en nét so lief vir my sibbe (Louise het net ’n jonger broer, terwyl ek drie sibbe het). Louise is ook baie strenger oor haar voorkoms as ek, juis omdat sy nog steeds haarself aan haar pa en die res van die wêreld probeer bewys.

View this post on Instagram

A post shared by Lea Vivier (@leavivieractress)

Is daar enige lewenslesse wat jy by jou karakter kan leer?

4. Haar eerlikheid is vir my baie verfrissend, en iets waarna ek elke dag streef. Dis nie vir my altyd maklik om my sê te sê met absolute oortuiging in konfliksituasies nie.

**Julle is so ’n talentvolle groep mense wat deel vorm van Ludik. Hoe was dit om saam met die ander akteurs te werk?**

5. Die beste leerskool waarvoor enige akteur kan vra. ’n Mens kan ongelooflik baie leer by mede-akteurs deur hulle net waar te neem.

Wat beteken Vrouedag vir jou?

6. Ek’s trots om mens te wees en vrouwees is iets wat ek nog elke dag ontdek en vir myself herdefinieer.

View this post on Instagram

A post shared by Lea Vivier (@leavivieractress)

Ludik word op 26 Augustus gelyktydig in 190 lande vrygestel.

Hooffoto: @headshotscapetown/Lea Vivier Instagram

Lees nog: Netflix stel binnekort eerste Afrikaanse reeks internasionaal vry

The post rooi rose gesels met Ludik se Lea Vivier appeared first on rooi rose.

Fraksie: Skitter-rolverdeling vir nuwe kykNET-drama

Gaynor Siljeur — Thu, 18 Aug 2022 06:27:46 +0000

Fraksie is die werk van die skrywers en vervaardigers Louis Pretorius en Albert Snyman wat vir treffer-reekse soos Die Boekklub, Troukoors en Fynskrif verantwoordelik is. Die reeks spog met ’n skitter-rolverdeling met bekroonde spelers soos Edwin van der Walt, Marlo Minnaar, Trix Viviers, Crystal Donna Roberts, Melt Sieberhagen, Roeline Daneel en Lee-Ann van Rooi.

Schalk Smit, gespeel deur Edwin van der Walt, is ’n beleggingsbestuurder met drome om eendag ’n dollar-miljoenêr te word. Hy is getroud met Nina (Roeline Daneel), wie se ma, Deidré (Hélène Truter), uit ou geld kom. Nina se pa, Willem (André Jacobs), is ’n onkoloog en haar suster, Bianca (Daneel van der Walt), ’n narkotiseur. Schalk en Nina het twee tienerkinders, Zac (Alex van Dyk) en Mari (Jana Malan).

“Die hoofkarakter, Schalk Smit, is meer van ’n anti-held,” sê Louis. “Alhoewel dit met tye nie maklik is om van die karakters te hou nie, hoop en glo ek kykers gaan nie anders kan as om van hulle te hou nie. Die reeks speel af in Stellenbosch, wat met sy geskiedenis en ou geld deesdae die tegnologiese hoofstad van Suid-Afrika is.”

Tim (Marlo Minnaar) is ’n dosent in rekenaarwetenskap in Pretoria en is onlangs met Chantel (Crystal Donna Roberts) getroud. Hy het in sy vrye tyd die QPI (Quick Payment Interface) ontwikkel en is op soek na ’n belegger daarvoor.

Jana (Trix Viviers) is ’n kommersiële prokureur en was saam met Schalk en Tim op skool. Sy het ses maande tevore Stellenbosch toe getrek en haar man, Alwyn (Sean Marco Vorster), en dogter, Emmy (Rizane Rossouw), in Johannesburg agtergelaat. In Stellenbosch ontmoet Jana egter vir Jack (Duane Williams) wat probleme in haar en Alwyn se huwelik veroorsaak.

Ander spelers in die reeks is Melt Sieberhagen as Henk, ‘n IT-spealis met ’n moeilike verlede, en Brendon Daniels as Donovan, ’n geleentheidsbeplanner en Henk se huismaat. Ilse Klink is Judy, Chantal se ma, en Gerwen Simon is Anél, haar suster. Ook te sien is Natalia Da Rocha as Jack se ouma, Lee-Ann van Rooi,en Pierre van Pletzen as Schalk se baas by T&M Holdings en Hendrik Nieuwoudt as Henk se seun, JP.

“Elkeen van die karakters het hulle eie lewe gekry soos ons die reeks ontwikkel het,” sê Louis. “Behalwe vir die tema rondom die Schalk-karakter, is daar ander kwessies soos tweede kanse, kinders en hulle verhouding met hulle ouers en die uitdagings in huwelike.

Lees nog: Netflix stel binnekort eerste Afrikaanse reeks internasionaal vry

Die reeks bestaan uit sewentien episodes. “Die episodes word aaneen uitgesaai, maar is as’t ware twee mini-reekse,” verduidelik Louis. “Die eerste agt episodes wys hoe QPI opgebou word en die laaste nege wys hoe dit, én die mense betrokke, verder ontwikkel.”

Hy en Albert is in hulle skik met die rolverdeling. “Daar is heelwat produksies wat die afgelope tyd verfilm is en dit was ’n uitdaging om almal vas te maak vir die onderskeie rolle, maar ons glo ons het ’n fantastiese rolverdeling bymekaar gekry. Ek hoop en glo dat kykers die reeks soveel gaan geniet soos wat ons dit geniet het om dit te maak.”

*Fraksie word vanaf Dinsdag 13 September 20:00 op kykNET (DStv-kanaal) uitgesaai.

Foto: Verskaf

Lees nog: Vrouemaand: rooi rose-voorbladsterre vertel wat dié maand vir hulle beteken

The post Fraksie: Skitter-rolverdeling vir nuwe kykNET-drama appeared first on rooi rose.

Netflix stel binnekort eerste Afrikaanse reeks internasionaal vry

Gaynor Siljeur — Wed, 17 Aug 2022 14:52:11 +0000

Dit word op 26 Augustus gelyktydig in 190 lande vrygestel. Ludik is in verskeie tale oorgeklank, waaronder Frans, Portugees, Pools en Spaans. Die voertaal is grotendeels Afrikaans, met Engels en Shona tussendeur, maar alles het onderskrifte.

Van links is Sbu Mpungose, Netflix skakelbeampte vir Sub-Sahara Afrika, Frankie du Toit (uitvoerende vervaardiger), Anele Mdoda (uitvoerende vervaardiger) en Paul Buys, wat die rol van Aldo in Ludik vertolk, maar ook die mede-vervaardiger, mede-skepper en uitvoerende vervaardiger van Ludik is, saam met Annemarie van Basten, wat ook die draaiboekskrywer is.

Die hotel se sitkamergedeelte is vir ’n hele oggend in ’n mini Netflix-ateljee met strooikussings oral omskep.

Arnold speel Daan Ludik, ’n baie ryk Pretoriase sakeman, wat ’n meubelwinkel wat meubels en matte verkoop, besit. Sy gesig is op TV, groot advertensieborde langs snelweë en hy is op die oppervlak die beeld van ’n goeie Afrikaanse sake- en gesinsman, maar hy het diep wortels in die onderwêreld.

Van links is vier van die manlike hoofspelers in Ludik: Jandre le Roux wat die rol van die skurk, Burian Zelinski (Bells), speel, Sean Cameron Michael wat die Ierse wapensmokkelaar, Arend Percival Brown, vertolk, Rob van Vuuren as Swys de Villiers, Daan se swaer, en Arnold Vosloo as Daan Ludik.

Sy trofee-vrou, Anet, gespeel deur Diaan Lawrenson, en die kind wat hulle saam het, die elfjarige Danie, sorg vir genoeg familiedrama om kykers vasgenael te hou.

Lees nog: Kanonkop se jongste Paul Sauer nou beskikbaar en Cab kom

Diaan Lawrenson as Anet Ludik en Inge Beckmann wat die rol van Rina Goosen, Daan se sekretaresse by die meubelwinkel, speel.

Daan se swaer word ontvoer, sy vertroueling in Zimbabwe gekaap en Daan moet met misdadigers onderhandel wat wapens smokkel. Dinge dreig om handuit te ruk toe hy tronkstraf in die gesig staar en sy gesin kan verloor.

Tina Redman as Lil, Arnold Vosloo as Daan Ludik, die veteran-akteur Tshamano Sebe as Charles Dzike, Daan Ludik se regterhand, en Jandre le Roux wat die rol van die skurk, Burian Zelinski (Bells), speel.

Daan en sy swaer se swaarkry-kinderjare bring lekker konteks aan die storie se diepte.

Diaan sê dit was ’n groot voorreg om aan die reeks te werk, veral omdat dit so baie vir Afrikaans wêreldwyd sal beteken.

Woorde en foto’s: Maryke Roberts

Lees nog: Kanonkop se jongste Paul Sauer nou beskikbaar en Cab kom

The post Netflix stel binnekort eerste Afrikaanse reeks internasionaal vry appeared first on rooi rose.