Wat die oormaaksessie insluit:

• Konsultasie met Hannon, waar hy jou haarstyl, haarkleur, en beste grimering gaan beplan.
• Nuwe haarsnit met die haarstyl wat jou op jou mooiste gaan laat lyk en jou gesig komplementeer.
• Nuwe haarkleur wat die beste by jou gelaatskleur gaan pas.
• Nuwe grimeervoorkoms met die HANNON-grimeerprodukte.
• HANNON-produkte ter waarde van R5 000 wat HANNON- velsorg-, haar- en grimeerprodukte insluit.
• ‘n Ligte middagete met verversings deur die dag.
• ‘n Volledige voor- en na-fotosessie met die Glam Guru-fotograaf.
• Jou oormaaksessie sal in die Glam Guru Studio in Linbro Park, Sandton plaasvind op ‘n datum wat jou en Hannon die beste sal pas en is afhanklik van Covid19-regulasies.
• Vervoer en akkommodasie sal vir jou gereël word.
• Jou oormaaksessie is onafhanklik  van die Glam Guru-reeks en sal nie vir TV-uitsending verfilm word nie.
• Jou oormaaksessie se foto’s sal op die HANNON- Facebookblad en ander sosiale media gepubliseer word.

Wen

Stuur ’n kop-en-skouer- asook vollengtefoto van jouself tesame met jou naam, van, ouderdom, straatadres en selfoonnommer met HANNON ROOI ROSE in die onderwerpsreël voor 28 Januarie 2022 na rooirose@hannon.co.za

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie.

The post Wen ’n oormaaksessie by die Glam Guru! appeared first on rooi rose.

’n Nuwe voorkoms: Eksperimenteer met kleur en tekstuur deur Justine Kroes

Wie het ’n nuwe voorkoms gekry?

Naam: Alecia Conradie

Ouderdom: 36

Beroep: Bestuursrekenmeester

Meer oor Alecia

Alecia het ’n baie gemaklike styl gehad – sy verkies dieselfde styl en verander ook nie haar haarstyl gereeld nie.

Ons doelwit was om Alecia te leer hoe om met modeneigings te eksperimenteer en terselfdertyd dié tendense haar eie te maak.

Alecia het ’n slank, regaf figuur en ons het daarin geslaag om vir haar ’n sagte, vroulike maar steeds moderne voorkoms te gee.

‘Ek het nou uiteindelik ’n nuwe, korter haarstyl! Ek het soos ’n glanspersoon gevoel en is baie geëerd dat die span soveel moeite gedoen het’ – Alecia Conradie

Mode

Voor:

’n Nuwe voorkoms: Eksperimenteer met kleur en tekstuur

Naweek:

Neutrale skakerings is nou een van die groot tendense in die modewêreld. Alecia lyk vroulik in dié bloes wat sy by ’n wit oopknoopromp dra wat deur die styl van die jare negentig geïnspireer is.

Die romp wat hoër as haar middellyf sit, skep die illusie van vroulike kurwes en die oorbelle rond die voorkoms af.

Pas die voorkoms aan sodat jy dit ook as ’n werkuitrusting kan gebruik. Bykomstighede soos ’n serpie en ’n veelsydige handsak is die perfekte afronding vir die meer formele voorkoms.

Na:

’n Nuwe voorkoms: Eksperimenteer met kleur en tekstuur

Aand:

Kyk net daardie bene! Hierdie bate kan nie vir altyd in ’n denim weggesteek word nie! Die lengte van die rok beklemtoon Alecia se mooi bene, en roesbruin komplementeer boonop Alecia se olyfkleurige vel.

Na:

Werk:

’n Wit kraaghemp is ’n staatmaker in elke vrou se klerekas. Kombineer dit met ’n noupassende potloodromp en hoëhakskoene vir ’n klassieke maar steeds moderne voorkoms vir die kantoor.

Ná ’n dag by die werk kan jy blitsvinnig dié uitrusting transformeer deur byvoorbeeld jou hoëhakskoene deur ’n paar tekkies te vervang en die knoophemp vir ’n moderne T-hemp te verruil – onthou om die hemp in te steek!

Met Alecia se nuwe haarstyl kan sy bloot haar hare losmaak en haar kop onderstebo gooi om die natuurlike volheid en krulle van haar hare te beklemtoon.

Na:

Skoonheid

Voor: 

Grimering

Sorbet het Alecia met ’n luukse naelbehandeling bederf. Alecia dra selde grimering en ons grimeerkunstenaar, Cheryl Parker, beveel ’n BB-room of getinte bevogtiger aan vir ’n ligte, natuurlike dekking.

“’n Roomblosser is ’n moet vir Alecia se handsak. vee dit sommer met jou vingerpunte oor jou wange en lippe vir ’n vinnige, vars gelaat. Gebruik ’n verbronsingspoeier en kontoerkunsies op jou haarlyn en slape om jou voorkop minder prominent te laat vertoon,” is Cheryl se raad.

“Tik ook die poeier op jou ooglede aan vir ’n bietjie kleur. Tik ’n verhelderaar bokant jou wangbene aan, asook ’n verbronsingspoeier onder jou wangbene om dit te beklemtoon. Definieer jou oë met ’n wenkbroupoeier en volg dit op met ’n wimperkruller vir oop, vars oë.”

Na:

’n Nuwe voorkoms: Eksperimenteer met kleur en tekstuur

Hare

Alecia het al jare lank dieselfde haarstyl en maak dit meestal vas. Sy het voorheen haar eie hare gesny en gekleur. Die bekroonde Gary Rom-span in Kaapstad het ’n volledige haarkonsultasie met Alecia gedoen.

Gary Rom-salonne is bekend daarvoor dat hulle die gesondheid en toestand van kliënte se hare eerste stel, en deur die konsultasieproses lig hulle kliënte oor die verskillende stappe van haarsorg in.

Die stilis het voorgestel dat Alecia haar bos krulhare heelwat korter sny omdat dit haar fyn liggaamsbou oorweldig. ’n Korter en moderner snit, soos ’n lang bob, sal meer in proporsie wees en sal boonop al die dooie punte laat verdwyn. Die styl is meer beheerbaar, makliker om te blaas of te krul, en op lui dae kan sy bloot haar hare met ’n knippie op haar kop vassteek.

Die stilis het Alecia aangeraai om saam met die tekstuur van haar hare te werk en nie daarteen nie. Hare met tekstuur is nou groot nuus.

Die Balayage-kleurtegniek is vir die stilering gebruik – ligter strepies is van mid-lengte tot die punte van haar hare aangeverf.

Die resultaat? Songesoende hare met ligter skakerings wat ’n pragtige raam om Alecia se gesig vorm. Haar hare is ook in die salon behandel sodat dit gesond en glansend lyk.

‘Ek geniet die nuwe lengte en dra vir ’n slag my hare los’ – Alecia

Cheryl se topwenk:

Vir ’n smeulende aandvoorkoms kies Cheryl die rokerige oogvoorkoms met skakerings van brons en koper wat Alecia se groen oë komplementeer. Cheryl se topwenk “as jy skrikkerig is om vloeibare oogskadu aan te wend, gebruik eers minder en bou eerder daarop, vee sommer netjies met jou vingers oor jou ooglede”. Definieer nou jou oë met ’n vloeibare oogomlyner en maskara.

Na:

’n Nuwe voorkoms: Eksperimenteer met kleur en tekstuur

The post ’n Nuwe voorkoms: Eksperimenteer met kleur en tekstuur appeared first on rooi rose.

’n Nuwe voorkoms: Petite en pragtig deur Justine Kroes

Wie het ’n nuwe voorkoms gekry?

Naam: Roxanne Martin

Ouderdom: 36

Beroep: Mediese verteenwoordiger

Meer oor Roxanne

Roxanne het gevoel sy het ’n voorkomsverandering nodig, onder meer omdat sy haar hare en grimering al jare lank op dieselfde manier dra. Sy het ook chroniese rugpyn en het besluit dat die pyn haar nie gaan onderkry nie en die kans op ’n nuwe voorkoms met ope arms verwelkom.

‘Ek het soos ’n prinses gevoel! Ek het so baie oor mode geleer dat ek met hope selfvertroue daar weg is’ – Roxanne Martin

Mode:

Voor

’n Nuwe voorkoms: Petite en pragtig

Naweek

Vir ontspanne naweekuitstappies kies ons ’n staatmaker wit T-hemp, ’n gemaklike baadjie en ’n denim.

As jy nes Roxanne heelwat korter as die gemiddelde vrou is, kies ’n noupypdenim wat die illusie van langer bene skep. Eksperimenteer met jou proporsies, kies broeke wat hoër om jou middellyf sit en steek jou hemde in – dit laat ook jou bene langer lyk.

Vir ’n vars werkvoorkoms: Kombineer jou denim met ’n tydlose wit kraaghemp, ’n leergordel en dra bypassende leerskoene daarby.

Na:

’n Nuwe voorkoms: Petite en pragtig

Werk:

Rooier en mooier! Roxanne lyk asemrowend in die noupassende rok.

As jy fyn en kort is, kies ’n  V-hals wat jou nek en halslyn verleng en jou langer laat lyk. Die hoëhakskoene gee haar ’n tikkie ekstra lengte en hope selfvertroue daarby.

#rrWenk vir fyn vroue: Kies ’n kleiner handsak. ’n Groot handsak sal jou nog kleiner laat lyk.

Na:

’n Nuwe voorkoms: Petite en pragtig

’n Aandjie uit:

#rrWenk Vermy oorgroot hemprokke as jy fyn gebou is en probeer liewer oorvou-rokke met ’n tikkie meer struktuur. Rokke wat net bo, of net onder jou knieë sit, laat jou bene ook langer lyk – kyk net hoe vlei daardie roklengte haar bene!

Swart enkelstewels met ’n leerbaadjie daarby, skep ’n weelderige, uitdagende voorkoms wat Roxanne nie voorheen sou gewaag het nie.

Vir werk: Vervang bloot die leerbaadjie deur ’n jas en die enkelstewels deur skerppuntskoene en siedaar! jy lyk netjies en professioneel.

Na:

’n Nuwe voorkoms: Petite en pragtig

Skoonheid

Voor:

’n Nuwe voorkoms: Petite en pragtig

Grimering

Roxanne se vel is effens gedehidreer en grimeerkunstenaar Cheryl Parker beveel ’n bevogtigende masker aan wat sy vinnig voor haar grimering kan aanwend. Dié masker sal ook fyn plooitjies minder sigbaar maak.

“Gebruik ’n ligreflekterende onderlaag indien jy pigmentasievlekke het – dié soort onderlaag laat pigmentasievlekke minder opsigtelik lyk,” sê Cheryl.

Vermy ’n blosser met pienk skakerings wat net jou pigmentasievlekke sal beklemtoon – gebruik liewer ’n warm koraal. Dra ’n lipvlek in dieselfde skakering daarby.

Kies ’n oogskadu wat ligte en bruin skakerings bevat. Vee die ligte skakering oor jou ooglede en werk die bruin in die vou van die ooglid in om kleiner oë groter te toor.

Vals wimpers met ’n paar lagies maskara aan die buitehoeke van jou oë kan ook jou oë groter laat lyk.

Cheryl kies vir Roxanne ’n koel rooi lipstiffie wat die beste by haar pienk velkleur pas.

Cheryl se topwenk

Hier is Cheryl se wenk vir rooi lippe wat sal hou en hou: “Wend eers ’n verbloemer op jou lippe aan sodat die lipstiffie iets het om aan vas te klou. Wend sommer ook die verbloemer om jou lippe aan om seker te maak dat die lipstiffie netjies aangewend is.”

Na:

’n Nuwe voorkoms: Petite en pragtig

Hare

Roxanne was baie opgewonde en sonder enige voorbehoud toe Eloise Steyn van Gary Rom Hairdressing sê sy gaan Roxanne se hare laat waai.

Ná ’n deeglike konsultasie het Eloise voorgestel dat Roxanne van haar droë, poreuse haarpunte ontslae raak. Eloise glo dat ’n haarstyl “ontwerp” moet word: “Hare word nie net gesny nie – ’n ontwerp eie aan elke kliënt se behoeftes is wat ons aanbied.”

’n Heelwat korter bob is vir Roxanne ontwerp, een wat haar fyn lyfie pas, vinniger drooggeblaas kan word en steeds vasgemaak kan word wanneer sy oefen. Dis boonop ’n styl wat Roxanne se dunner hare voller en gesonder sal laat lyk.

Heelwat donkerder skakerings wat meer diepte en volheid skep, is tussen Roxanne se blonde hare “ingeverf”. Haar haarwortels is ook donkerder gekleur wat haar sommer meer modern laat lyk.

Danksy die donkerder wortels kan Roxanne haar hare minder gereeld laat sny, asook minder kleur, wat gesonder hare sal verseker.

Die haarpunte is met ’n tonikum behandel wat die verskillende blonde skakerings in Roxanne se hare meer eweredig gemaak het. “So beskerm ons die toestand van die hare sonder om onnodig te kleur.”

Eloise stel voor dat Roxanne ’n tuissorg-behandeling, soos Gary Rom Silk Force gebruik. Dis ’n intensiewe ses weke lange behandeling wat haar hare sal herstel, versterk en bevogtig.

‘Ek was baie opgewonde toe Eloise sê sy gaan my hare sny’ – Roxanne

’n Nuwe voorkoms: Petite en pragtig

Vir nog mooi idees, loer hier.

The post ’n Nuwe voorkoms: Petite en pragtig appeared first on rooi rose.

Bernice du Plessis is die vierde deelnemer aan kykNET se nuwe voorkomsprogram Mooimaak met Clare Wiese-Wentzel. In hierdie program kry deelnemers die geleentheid om hul voorkoms te verander met behulp van ’n span kundiges. Ons het meer gaan uitvind oor wie Bernice is en waarom sy besluit het om deel te neem aan die program.

Lees ook ons onderhoud met Clare Wiese-Wentzel oor Mooimaak

“Ek is gebore in Polokwane en het daar skoolgegaan,” vertel Bernice oor haarself. “Daar het ek ’n boetiek gehad, totdat ek in ’n motorongeluk beland het,” sê sy. “Toe ek heeltemal herstel het, het ek by ’n eiendomsagentskap gaan werk en dit baie geniet.”

“Ek het drie jaar gelede Stellenbosch toe getrek om nader aan my drie kleinkinders te wees. Alhoewel ek my vriende in Polokwane mis, was die trek die moeite werd sodat ek hier by my familie kan wees. Ek het twee seuns gehad, maar my jonger een, Llewellyn, is oorlede tydens ’n motorfietsongeluk in 2000.” Llewellyn was 17 jaar oud toe hy oorlede is.

Bernice se pa is ook in 2005 oorlede en haar man kort daarna. Haar oudste seun, Christian, het teen daardie tyd alreeds in Stellenbosch gewoon en dit was dus net Bernice en haar ma wat in Polokwane agtergebly het. “Polokwane was baie goed vir my, maar my hart se punt was my kleinkinders,” vertel sy oor haar besluit om uiteindelik Stellenbosch toe te trek.

“Stian, my oudste, is sewe jaar oud. Cara word hierdie maand (Oktober) ses jaar oud, en my ondeundste jongste, Joshua, is vier jaar oud, ” vertel sy oor haar kleinkinders. ’n Mens kan veral sien hierdie ouma van drie het ’n spesiale band met haar kleinkinders. “Kleinkinders  is so ’n geskenk. Hulle is altyd bly om jou te sien. Hulle wil graag langer bly of sommer oorslaap by Ouma. En hulle geniet altyd Ouma se gebak.”

Oor haarself sê Bernice sy “is ’n positiewe persoon.” Haar belangstellings strek ook wyd. “Ek hou van kosmaak, onthaal, die natuur en om te reis. Ek hou ook daarvan om aktief te wees: ek gym, maak tuin en ek hou daarvan om kreatiewe dinge te doen.”

“Ek pas ook op hede my moeder op. Sy word volgende maand 90,” antwoord Bernice op die vraag oor wat sy deesdae doen. Haar moeder ly aan demensie en Bernice versorg haar. “Nadat my pa oorlede is, het ek en my familie agtergekom dat my ma begin vergeet. Sy wou eenkeer vir my kom kuier en het ’n uur rondgery om my huis te kry. Dit is toe dat ons besluit sy het persoonlike versorging nodig.”

“Haar demensie is nou in ’n gevordere stadium, en sy het baie hulp nodig. Dit is vir my ’n absolute plesier om haar te versorg, want ek weet al doen ek soveel as wat ek moontlik kan, sal dit nooit kan vergelyk met wat sy alles vir my gedoen het nie.”

Alhoewel dit vir Bernice spesiaal is om haar ma te kan versorg, is dit nie noodwendig altyd maklik nie. “Dit is so hartseer om te sien hoe Ma maandeliks agteruitgaan. Ons is maar meestal net by die huis, aangesien sy nie meer vaste kosse kan eet nie en sy sukkel om te hoor en te loop.”

Vir Bernice is dit noodsaaklik om te onthou wat belangrik is. “Eerlikheid, vriendelikheid en bedagsaamheid is vir my baie belangrik in die lewe. Dis vir my ook baie belangrik om al ons geskenke van die Here te waardeer.”

Bernice sê haar kleinkinders was ’n bepalende faktor agter haar besluit om in te skryf vir Mooimaak. “Ek het op Mooimaak besluit omdat my kleindogter, Cara, al van driejarige ouderdom af sê ek en sy moet eendag Parys, Frankryk toe gaan om saam klere te ontwerp.” Later, op die ouderdom van vyf, het sy gesê dat ek iets aan my plooie en tande sal moet doen as ek saam met haar wil gaan! Dit was my eerste motivering.”

“Die tweede motiveringspunt was dat ek nounet 60 jaar oud geword het en ek wou sommer jare jonger lyk by my partytjie.”

’n Groot verandering in Bernice se lewe was ook haar onlangse gewigsverlies. “Ek het vandat ek Stellenbosch toe getrek het al 20 kg verloor.” Sy sê die Banting-dieet was die rede waarom sy al dié gewig binne een jaar afgeskud het.

Lees ook: 10 beginsels agter die Noakes-dieet

“Ek het nie in die Banting-dieet geglo nie en ek wou aan my seun, Christian, bewys dat dit nie werk nie. Ek was so verkeerd! Sonder om ooit honger te wees, en terwyl ek nog elke aand ’n wyntjie kon drink, het die sentimeters en kilogramme afgeval.” Bernice is gelukkig oor diè gewigsverlies. “Ek was baie bly oor die slanker voorkoms, maar ek het baie plooie bygekry – veral in my gesig.”

Nog iets wat haar oor haar voorkoms gepla het, was haar tande. “Ek het nog goud in my tande gehad, wat my kleinkinders baie gepla het.” By Mooimaak is daar kosmetiese veranderinge aangebring aan haar tande; iets waaroor sy baie bly is. “Ek kan nou glimlag vir ’n foto en my tande wys.” Sy noem verder dat Mooimaak haar jare jonger laat lyk het. “My vel is baie gladder. My grys hare was ook ’n kwessie vir party mense. Ek het nog nooit in my lewe lang hare gehad nie, en nou het ek; ek is sommer ’n brunette!”

“Mooimaak was ’n fees,” vertel Bernice oor haar ervaring tydens die program se opname. Waarom was dit vir haar so lekker? “Die wonderlike filmspan. Die ander deelnemers wat ek ontmoet het. Die sorg en vertroeteling van die dokters en hul assistente. Dr. JJ Serfontein, die tandaarts, met sy vriendelikheid, en dan nog Clare wat die ervaring wonderlik gemaak het.”

Bernice sê “die lekkerste deel van Mooimaak was dat ’n mens sommer nuwe lus vir die lewe kry – en hope selfvertroue.”

Tog is Bernice steeds gefokus op haar geliefdes en dit wat belangrik is vir haar. Op die vraag oor wat die toekoms vir haar inhou na afloop van die program, antwoord sy: “Ek het nog niks vir die toekoms beplan nie, aangesien my Ma nou my verantwoordelikheid is.”

The post ‘Mooimaak’ se Bernice deel haar storie appeared first on rooi rose.

Zelna het ’n rooi ondertoon en het dit altyd vermy om grimering aan te wend omdat sy voel dit het haar bleek of onnatuurlik laat voorkom. Grimeerkunstenaar Cheryl Parker van Supernova het vir Zelna ’n paar truuks gewys om te verhoed dat sy bleek of uitgewas lyk.

Stap 1

Begin altyd met ’n goeie voorbereidingslagie wat enige fyn lyntjies verbloem, dit sal ook sorg dat jou onderlaag makliker aanwend en so ook langer aanbly.

Revlon Fill & Blur Primer for Face & Neck (R199)

Stap 2

Omdat Zelna ’n duidelike rooi ondertoon het, moet sy eerder ’n onderlaag met ’n roombasis kies wat maksimum dekking bied.

Revlon Fill + Blur Foundation (R349)

Stap 3

Gebruik ’n gesigpoeier tot in jou décolletage en nek-area wat die rooiheid in jou gesig en nek sal verminder en die verskil van kleur tussen jou gesig en nek meer egalig sal laat voorkom.

 Revlon ColorStay Pressed Powder (R230)

Stap 4

Baie belangrik: gebruik ’n blosser op die appels van jou wange en rondom jou gesig se kontoere om kleur en naturlike glans terug te gee aan jou vel.

Revlon Powder Blush in Tickled Pink (R239)

Stap 5

Wenkbroue: borsel altyd eers jou wenkbroue opwaarts om die vorm netjies te kry (boonop laat dit jou wenkbroue voller lyk). Begin dan om dit met ’n wenkbrou-potlood of -poeier met kort opwaartse hale in te vul – volg die naturlike vorm van jou wenkbroue.

Revlon ColorStay Brow Pencil (R179)

Stap 6

Gebruik ’n ligte skakering oogskadu om jou oë te verhelder.

Revlon ColorStay Crème Eyeshadow in Crème Brulee (R99,99)

Stap 7

Gebruik ’n verbloemer om enige ongewenste donker kringe onder die oë te versag en enige ander ongewenste merkies weg te toor.

Revlon Fill + Blur Concealer (R199)

Stap 8

’n Bruin oogomlyner op die buitehoeke van jou oë beklemtoon die oë. Nog ’n wenk – wit oogomlyner aan die binnekant van jou oog (op jou waterlyn), versag rooiheid in jou oë.

Revlon ColorStay Eyeliner in Brown (R179)

Stap 9

Maskara is ’n moet om die voorkoms af te rond. Wend eerste maskara aan jou boonste wimpers en wag dan ’n paar sekondes tussen elke lagie om seker te maak die maskara vorm nie klonte op nie.

Revlon Ultimate All in One Mascara (R169)

Stap 10

Lipstiffie: Zelna het pragtige blou oë en Cheryl stel ’n koraal lipstiffie voor wat die kleur in haar oë beklemtoon.

Revlon Ultra HD Gel Lipcolor in Coral (R185)

The post ’n Nuwe voorkoms stap vir stap appeared first on rooi rose.