Vadersdag is vanjaar 16 Junie. Kom ons wees eerlik, om iets uitsonderlik vir pa te kry is nie altyd maklik nie. Sokkies, gereedskap, ’n boek wat hy dalk nie gaan lees nie -ons was almal al daar. Sy geskenke eindig dikwels op ’n rak net om stilweg later te verdwyn.

Hierdie jaar kan jy steeds sy spesiale dag besonders maak met iets wat reguit na sy hart (en maag) gaan. ’n Egte Suid-Afrikaanse nagereg!

Hoekom bederf jy nie jou pa met iets smullekker wat jy self gemaak het nie? Malvapoeding. Vergeet van die winkelweergawes. Dié een is tuisgebak. Radisson Red Waterfront se Uitvoerende Sjef, Andre Hill, het dit vir jou maklik gemaak.

Hy deel sy beproefde Malvapoeding-resep sodat jy self kan inspring. “Pa’s word soms afgeskeep as dit by sentimentele geskenke kom,” sê Hill. “Kos is universeel. Om iets vir jou pa te bak wys moeite en waardering.”

Maak hierdie Vadersdag ekstra spesiaal met Sjef Andre Hill se Malvapoeding-resep:

Bestanddele

Poeding:

• 1 kg swartstroopsuiker (Treacle Sugar)
• 120 g botter
• 120 g appelkooskonfyt
• 6 eiers
• 1 kg meel
• 40 g koeksoda
• 30 g bakpoeier
• 1 L Melk
• 40 ml wit asyn
• 125 ml olie
• 2 knippies maldonsout

Metode

1. Klits die suiker, eiers en appelkooskonfyt saam totdat dit lig en donsig is.
2. Smelt die botter en voeg die asyn by die eiermengsel.
3. Meng die droë bestanddele saam in ’n aparte bak.
4. Voeg die olie by die eiermengsel en meng.
5. Voeg die melk en droë bestanddele bietjie vir bietjie by die eiermengsel om klonte te voorkom.
6. Gooi die beslag in ’n oondbak en bak teen 170°C vir 30-40 minute of totdat ’n toetspen skoon uitkom.
7. Prik gate in die gebakte poeding en gooi die warm stroop oor. Laat dit goed intrek.

Stroop

• 250 ml melk
• 100 g botter
• 150 g suiker
• 2 teelepels vanieljepasta of 2 eetlepels vanieljegeursel

Verhit al die bestanddele in ’n pot totdat die suiker opgelos is.

Om voor te sit:

Sit warm voor. Voeg ’n skeppie roomys by, krummel jou pa se gunstelingbeskuitjie oor vir tekstuur, en gooi ’n handvol bessies by vir kleur en varsheid.

The post Malvapoeding: ’n Vadersdag-bederf wat hom sal laat smul! appeared first on rooi rose.