PAS BEKEND | Nuwe kykNET-reeks verken dramas en intriges van nuuskantoor

Karlien Meiring — Fri, 25 Apr 2025 07:08:59 +0000

Adri Joubert was vir twee dekades die koel, kalm, gerusstellende gesig en stem van die aandnuus. Maar dan gebeur daar iets met haar man, en haar lewe word nuus terwyl ’n nasionale krisis die land skud. Sy word gedwing om haar persoonlike trauma opsy te skuif om die kykers deur die noodtoestand te loods van agter ’n vuurwarm nuuslessenaar.

kykNET se nuwe dramareeks, Die nuusmakers, met Rolanda Marais (as die gesoute nuusleser Adri Joubert), Brendon Daniels, Roeline Daneel, Lea Vivier, Arno Greeff, Lesley Maasdorp, Hannah Borthwick, Chris van Rensburg, Chris van Niekerk, Heinrich Wentzel, Susanne Beyers, Dorette Potgieter en Melissa de Vries, ondersoek die persoonlike opofferinge wat dit verg om nuus aan die nasie te bring.

Die reeks begin op Dinsdag 27 Mei om 20:00 op kykNET (DStv-kanaal 144).

Dit verg ’n span talentvolle, onverskrokke mense om nuuskykers elke aand ingelig te hou. Die nuusmakers verken sowel die kuns van nuusjoernalistiek as die persoonlike stryd, ambisies, oorwinnings en uitdagings wat die mense agter die skerms in die gesig staar terwyl hulle die waarheid najaag en tegelyk hul eie komplekse lewens moet hanteer. Die verhaal speel af in Johannesburg.

“Waar ’n program soos Niggies ’n tragiese gebeurtenis met tyd en afstand kon dokumenteer, bied Die nuusmakers ’n blik op die ongelooflike spoed waarteen nuus breek en verpak moet word – en die tol wat dit eis van diegene wat vooraan staan in elke vreugde, frustrasie en hartseer wat die land ervaar, terwyl hulle self ook hierdie gebeure moet verwerk,” sê Waldimar Pelser, M-Net-direkteur van Premium-kanale.

Die nuusmakers word vervaardig deur Both Worlds (die span agter M-Net se Recipes for Love & Murder), onder leiding van Karen Jeynes en Thierry Cassuto, saam met Annemarie Du Plessis (Koek). Jeynes skryf en regisseer ook en is saam met Marvin Lee Beukes agter die kamera. Jozua Malherbe, Ludwig Binge, Kabous Meiring en Hélène Truter dra met hul skryfwerk by tot hierdie kragtige drama.

“In ’n era van fopnuus en diepvervalsings, vra Die nuusmakers wie ons vertrou – en waarom. Adri Joubert verteenwoordig ’n generasie nuuslesers wat soos familielede in Suid-Afrikaanse huise geword het, en haar reis weerspieël ons gesamentlike stryd om by veranderende realiteite aan te pas,” verduidelik Karen Jeynes.

“Die nuuskamer is die ideale omgewing vir ’n drama – hoë druk, onmoontlike sperdatums en kleurryke karakters wat almal dieselfde doel nastreef, maar dikwels met botsende metodes werk. Voeg daarby Adri se persoonlike tragedie, en jy het ’n emosionele kruitvat waarbinne die storie afspeel,” sê Cassuto.

Die res van die rolverdeling sluit in Neels van Jaarsveld, Laudo Liebenberg, Loren Loubser, Nahum Hughes, Martelize Kolver, Ira Blackenberg en Kristen Raath.

KYK | Amptelike lusmaker – Die nuusmakers

Moenie Die nuusmakers misloop nie. Die reeks begin Dinsdag 27 Mei om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.

The post PAS BEKEND | Nuwe kykNET-reeks verken dramas en intriges van nuuskantoor appeared first on rooi rose.

Melissa de Vries oor hoe ‘Arendsvlei’ en ‘Mince Jou Hare’ alles verander het

Karlien Meiring — Wed, 07 Aug 2024 13:55:18 +0000

In Mince Jou Hare vertolk Melissa de Vries (Sasha Daniels in Arendsvlei, Bronwyn in Taktiek) die rol van ene Frieda, wat haar werk by ’n fabriek bedank om ’n haarsalon in haar huis op te rig – ’n besluit wat die lewens van haar familie, bure en kliënte ontwrig.

Dié Showmax Original-sitkom is geïnspireer deur die ware verhaal van Frieda, die ma van die bekroonde komediant Shimmy Isaacs, die reeks se draaiboekskrywer en medevervaardiger.

Caryn Welby-Solomon het met Mel gesels om meer uit te vind:

**Hoe sou jy Mince Jou Hare beskryf?**

Dis ’n sitkom wat om Frieda en haar salon draai. Mince Jou Hare gaan oor ’n vrou wat haar drome najaag. Dis ook oor verhoudings. Almal wil in daardie huis wees. Die kliënte kom vir meer as ’n haarafspraak, want dit is ’n veilige ruimte waar hulle hul mure kan laat sak en kan ontsnap van die realiteite wat hulle in die gesig staar.

Vertel ons meer oor jou karakter.

Frieda, Frieda, Frieda… Dis maklik om by haar aanklank te vind. Sy werk hard, sy is eerlik en lojaal en ’n vrou wat haar bes probeer om haar eie besigheid te begin terwyl sy ook ’n huishouding bestuur.

Shimmy het altyd gesê dat haar ma statisties nie veronderstel was om dit te maak nie. Sy was veronderstel om in die fabriek te bly. Maar sy het die statistieke verkeerd bewys. Sy wys dat dit moontlik is om enigiets te doen. Dit gaan nie oor waar jy vandaan kom nie, maar waarheen jy op pad is.

Lees ook: Vyf-vinnige-vrae met komediant Shimmy Isaacs oor haar Showmax-sitkom, Mince jou hare

Wat het jou na dié rol aangetrek?

Eerstens, dit was goed geskryf. Dit was so maklik om die lyne te leer. Die manier hoe die karakters gepraat het, het vir my dié wêreld laat verstaan – hul interaksies het bekend gevoel. Een van my susters, Sharon “Sussie” Maarman, het haar eie haarsalon gehad. Sy is nie meer met ons nie, maar dit het my herinner aan daardie wêreld waarin ek grootgeword het en hoe ’n haarstilis met haar kliënte omgaan.

By die oudisie het ek baie pret gehad omdat ons kon speel, en of ek nou die rol gekry het of nie, dít was ’n ervaring wat my soveel hoop gegee het.

**Hoekom moet mense Mince Jou Hare kyk?**

Dit is snaaks, dit gaan oor familie en hulle sal hulself – of hul tannie of neef of pa – op die skerm sien. Dis ’n storie wat hoop gee en ’n glimlag op jou gesig en in jou hart sal sit. Ons het meer van hierdie tipe stories nodig.

In jou YouTube-onderhoudreeks, ***A Walk With Mel*, het jy met ander akteurs oor hul ervarings in die bedryf gepraat. Wat het jy opgemerk oor hoe die bedryf verander het?**

Toe ek grootgeword het, het ek nie gedink dit sou vir my moontlik wees om hierdie werk te doen nie. Natuurlik het ek TV gekyk, maar ek het nie regtig mense gesien wat soos ek gelyk het nie. Toe, uiteindelik, het Arendsvlei gebeur. Ek voel dat Arendsvlei regtig alles vir my verander het, want dit was ’n rolverdeling bestaande uit bruin mense.

Jy kan die verskil sien sedert ek destyds met bruin akteurs begin onderhoude voer het. Ons is baie talentvolle mense en het nie altyd toegang of hulpbronne gehad om voltyds in hierdie bedryf in te gaan nie, maar ek sien al meer bruin mense wat hul eie (geleenthede) skep. Die jonger mense is meer braaf omdat hulle ’n sosiale media-platform het. Hulle sien mense wat soos hulle lyk en klink op TV.

Ek is dankbaar vir almal wat die weg vir ons gebaan het. Hulle het vir ons gewys dis moontlik. Mince Jou Hare het ook gehelp om te wys dat dít moontlik is. Hierdie reeks vier die mense van dorpe soos Worcester. Hier is ’n middelklas-gesin wat hul bes probeer om ’n beter lewe vir hulself te skep.

Jou drome is dus haalbaar; jy moet net aanhou werk aan jou craft. Dit is ’n marathon, nie ’n naelloop nie.

KYK: Mince Jou Hare se lokprent

Kyk nuwe episodes van Mince Jou Hare elke Maandag op Showmax, met die volle reeks wat vanaf 12 Augustus 2024 vir fuifkyk beskikbaar sal wees.

Lees ook: Vyf-vinnige-vrae met Hildegardt Whites oor haar langverwagte karakter in ‘Skemergrond’

The post Melissa de Vries oor hoe ‘Arendsvlei’ en ‘Mince Jou Hare’ alles verander het appeared first on rooi rose.

Melissa de Vries | rooi rose