Verleng jou trui se lewe deur Susra Matthee en Bea Lingenfelder 

1 . Verstaan die tekstiel

Voor jy ’n trui koop, bestudeer die weefwerk van die materiaal (veral op wol- en kasjmier-items). Die weeftegniek en tipe wol moet styf voel: Hoe losser die weefsel, hoe groter is die kans dat jou trui klein wolballetjies gaan vorm.

2. Werk saggies met jou trui

Dit is nie goed om jou trui te veel te hanteer nie – dit sluit in die manier hoe jy die trui was, ophang, droogmaak en wegpak. Anders as katoen en sintetiese materiale hoef wol nie gereeld gewas te word nie. Soms kan jy net die vlekke behandel en dit buite oor ’n tafel of droograk hang. Jy sal verbaas wees hoeveel langer jou trui sal hou as jy dit versigtiger hanteer.

Lees ook: Verleng die lewe van jou gunsteling-jeans

3. Weet hoe om jou trui te was …

Deesdae hoef truie nie meer nét met die hand gewas te word nie. Die beskermende waslagie op wolvesels maak wolprodukte bestand teen vlekke en hulle gaar ook minder stof op aangesien wol natuurlik anti-staties is. Dit beteken jy kan jou trui op ’n ligte siklus in die wasmasjien was sonder om die materiaal te beskadig.

4. … Maar wees tog versigtig

Met verloop van tyd sal natuurlike liggaamsolies, sweet en parfuum op die trui opbou. Dié opbou kan veroorsaak dat die beskermende vesels van die trui afbreek. Met betrekking tot die vorige wenk, moet jy steeds woltruie versigtig hanteer – jy kan dit liggies, met min seep en koue water met die hand was of op die wolsiklus in ’n wasmasjien. Dit verhoed dat die trui krimp. Verwyder dan oortollige water met ’n handdoek deur die trui in ’n handdoek toe te rol en saggies te druk.

5. Moet dit nie lank in water los nie

As jy jou trui was, moet dit nie te lank in water laat week nie. Wol hou nie van langdurige blootstelling aan water nie en kan jou trui vinnig laat uitrek of die kwaliteit beskadig.

6. Moenie jou trui ophang nie

Moet nooit ’n trui hang om dit droog te maak nie, dit kan die weefsel rek (veral wanneer die vesels swaar is met water) en vernietig jou kledingstuk se vorm. Laat jou trui plat lê oor ’n droograk.

Lees ook: Wen ’n R5 000-geskenkbewys van American Swiss om ’n geskenk vir Ma te kies!

7. Was al jou truie saam

Harde materiale soos denim kan wolballetjies veroorsaak op wol en ander delikate materiale. Net soos met jeans, is dit beter om jou trui eers om te dop voordat jy dit was. Vir ekstra beskerming, hou breistofitems apart in ’n onderklere-sakkie.

8. Los eerder die tuimeldroër uit

Al sê die versorgingsetiket dat jy jou kledingstuk in die droër mag gooi, raai ons jou aan om nie daardie risiko te loop nie – plaas dit plat op ’n handdoek en jy sal voorkom dat die trui krimp of wolballetjies vorm.

9. Maak sò met wolballetjies:

Tog sal alle wolmateriaal tot ’n sekere mate wolballetjies vorm. Dit gebeur meer algemeen by sagter vesels en kom dikwels voor in die areas waar dit met ander materiale in kontak kom, byvoorbeeld waar jou arm teen jou lyf skuur. Wanneer die balletjies vorm, kan die kledingstuk slordig lyk. Verwyder dit deur die breistof met ’n truikam te versorg of dit versigtig te skeer met ’n skeermes.

10. Ons beste wenk: Dra altyd ’n katoenhemp onder jou trui

Dit verhoed dat liggaamsolies en sweet na die tekstielvesels van die trui deurdring, wat beteken dat dit langer skoon bly voor jy dit weer moet was.

Lees ook: Vanjaar se Met Gala-tema bekendgemaak

The post Verleng jou trui se lewe appeared first on rooi rose.

Foto’s: Getty Images

Die Oscar-toekennings is die grootste aand op die Hollywood-kalender, en lewer altyd van die beste rooitapyt-modes van die seisoen. Hierdie jaar was geen uitsondering nie.

Van romantiese balletcore-rokke tot dramatiese vere en opvallende blom-borduurwerk, die sterre het vanjaar weg van veilige minimalistiese style beweeg en eerder tekstuur, beweging en sterk silhoeëtte gekies.

Hier is die ses grootste neigings wat die mode-kollig gesteel het:

Vere oral

Vere het vanjaar vir drama en beweging op die rooitapyt gesorg. Hierdie speelse tekstuur gee rokke onmiddellik ‘n dinamiese gevoel.

Balletcore

Die Ballet-geïnspireerde voorkoms was oral. Ligte lae van delikate materiale soos tule in sagte pastelle het ’n romantiese elegansie geskep.

Strukturele silhoeëtte

Baie sterre het weg van eenvoudige, reguit rokke beweeg en eerder sterk, argitektoniese silhoeëtte gekies. Korset-bolywe en dramatiese vorms het ’n moderne, modebewuste gevoel geskep.

Wolkwit-elegansie

Met Pantone se kleur van die jaar, Cloud Dancer, ’n sagte wit, wat duidelik steeds as inspirasie vir stiliste dien, het talle sterre in romerige skakerings van wit opgedaag.

Blom-borduurwerk

Delikate blom-borduurwerk het rokke soos klere-kunswerke laat lyk en ’n romantiese, couture-gevoel by baie voorkomste gevoeg, Dit was beslis een van die mooiste detailneigings van die aand.

Vurige rooi

Waar pastelle gewoonlik oorheers, het vanjaar se rooitapyt ook ’n oplewing van vurige rooi gesien. Is rooi die nuwe swart?

Lees ook: kykNET kraai koning by die Saftas

The post Vere, blomme en wolkwit: Die grootste mode-neigings by vanjaar se Oscars appeared first on rooi rose.

Van sagte wit tot dramatiese ou-Hollywood-glans, was die 83ste Golden Globe-toekennings by die Beverly Hilton-hotel ‘n bewys dat rooitapyt-mode in 2026 tydloos én waagmoedig kan wees.

Met Pantone se kleur van die jaar, Cloud Dancer, ’n sagte wit, wat duidelik as inspirasie gedien het, het talle sterre in romerige skakerings van wit sowel as swart opgedaag, terwyl helder kleure en dromerige teksture vir ’n vars, moderne voorkoms vir ander bekendes gesorg het.

Hierdie bekendes se uitrustings het werklik uitgestaan:

Selena Gomez in Chanel

Emily Blunt in Louis Vuitton

Tessa Thompson in Balenciaga

Kate Hudson in Giorgio Armani Privé.

Chase Sui Wonders in Balenciaga

Miley Cyrus in Saint Laurent

Brittany Snow in Danielle Frankel

Lees ook: PAS BEKEND | Ontmoet die dames wat vir Ruan se hart meeding in Op my eish!

The post Golden Globes 2026: Ons 7 gunsteling-uitrustings! appeared first on rooi rose.

1. Kyk na hierdie neklyn as jy groter borste het

As jy groter borste het, is ’n mens geneig om ’n swembroek te kies wat “toemaak” omdat jy bang is iets glip dalk uit. Modekenners soos die ontwerper Monif Clark van New York stel voor dat jy juis ’n vleiende oop neklyn moet kies, maar met stewige bra-insetsels en breër bandjies. Monif glo “jou bates is iets wat jy moet vlei, nie wegsteek nie.”

’n Oop v-neklyn skep ’n verslankende vorm sonder om jou ongemaklik te laat voel. Die sweetheart neklyn is ook ’n gewilde styl onder voller figure, omdat dit ’n goeie struktuur en ondersteuning bied.

Lees ook: Jy kan ’n gelukkige selfbeeld kweek!

Vermy

Mense met groter borste word aangeraai om nie halternek-swembroeke te dra nie, omdat dit baie stremminig op jou nek kan veroorsaak.

’n Neklyn wat te hoog opkom druk jou borste plat en die groot stuk materiaal oor jou bors kan jou borste selfs groter laat lyk. Die oordadige materiaal kan ook jou bors bedompig laat voel op ’n warm dag.

Lees ook: Verleng so die lewe van jou swembroek

2. Moenie skrik vir detail nie

Die kenmerkende inrygwerk of ruche-tegniek word dikwels langs die kante of strategies voor op jou swembroek geplaas. Hierdie tegniek help om jou figuur kurwes te gee deur ’n uurglasvorm met behulp van die naat van die detail te help bewerk. Ruchewerk aan die voorkant help ook om tekstuur te gee wat ongewensde rolletjies of ’n onegalige vel help verbloem. Maak egter seker die tekstuur is nie te oordadig nie, omdat dit die doel van die tegniek sal saboteer.

Ander tegnieke is toerygtoutjies en ’n uitgesnyde middel wat alles dieselfde uurglasvorm help skep. Probeer verskeie tegnieke en kies een wat vir jou werk. Hier kan jy lekker rondspeel met ’n moderne kleur wat jou selfvertroue ’n hupstoot gee!

Lees ook: Hoekom is dit belangrik vir vroue om mooi te voel?

Vermy

Gladde materiale het dikwels dieselfde uitwerking as water se rimpeleffek wat foutjies baie duidelik en pertinent uitwys. Dit is ook geneig om vinnig verkleuring te wys. Kies ’n materiaal wat ’n effense tekstuur het wat net daardie genoegsame verbloeming en ondersteuning bied.

Lees ook: Wees swembroekslim

3. Sê ja vir kleure en patrone as jy ’n peerfiguur het

Vrouens met ’n peerfiguur (breër heupe as skouers en bors) moenie skaam wees vir kleure en patrone nie. ’n Swemrokkie of valletjie gaan nie jou heupe verbloem nie, hou eerder die onderdeel van jou swembroek eenvoudig, donker en eenkleur en laat die oog gelei word na bo met ’n helder kleur of patroon. Sodoende vlei jy jou figuur deur balans te skep tussen jou heupe en bors.

’n Halternek is hier ’n goeie snit om jou skouers breër en skerper te laat vertoon, wat ook die gewig van jou heupe help uitbalanseer.

Vermy

Swemrokkies of valle om jou heupe. Vrouens is dkwels geneig om te dink hierdie detail verbloem hul heupe, maar eintlik doen dit juis die teenoorgestelde.

Let op na die patroongrootte – die patroon moet in verhouding wees met jou struktuur en liggaamsbou. Patrone wat té groot is kan jou kleiner liggaamsdele “insluk” of jou voller bates nog meer beklemtoon.

Lees ook: 5 swembroeksnitte wat jou op jou beste laat lyk

4. Hierdie snitte is die beste vir jou bene

Die eerste gedagte wat by ’n mens opkom is dat hooguitgesnyde broekies jou bene slanker laat vertoon, en almal wil altyd slanker vertoon. Maar onthou, dit gaan oor die volle prentjie, en die geheim lê in balans.

’n Swembroek moet jou terselfdertyd goed laat lyk én voel. Hooggesnyde snitte werk goed vir vroue wat hul heupe wil verslank (kenmerkend aan die peervorm en vroue met kort bene). Hierdie snit beweeg die fokus opwaarts vir daardie “verslankende” effek, maar vir die vroue wat groter borste het, beteken dit die aandag beweeg op na jou bors, waar daar reeds baie gewig is.

Balanseer dan eerder jou figuur uit met ’n normale of retro-snit (soos Marlyn Monroe) wat ooreenstem met die bo-deel van jou swembroek. Die sweetheart neklyn stem goed ooreen met die retro-snit been, waar ’n skerper V-neklyn weer beter werk saam met ’n algemener beensnit wat net onder jou heupbene uitsny.

5. Die binnekant van jou swembroek moet só lyk

Let goed op na die binnestruktuur van jou swembroek, watter tegnieke gebruik word en of dit vir jou figuur sal werk of nie. Die belangrikste element wat elke eenstuk moet hê is bra-insetsels, omdat dit daardie nodige ondersteuning en vormgewing aan jou figuur bied.

Kyk ook na die voering van die swembroek. Die regte voering vir voller figure is spesiaal stewiger om jou ligaamsvorm ’n ondersteunende raamwerk te gee, sonder dat dit soos ’n korset voel.

Vermy

Sommige eenstukke het ’n fyn reknaat om die middellyf sodat dit jou middel intrek, vermy egter hierdie snit as dit jou middel in twee deel. Onthou daar is baie ander tegnieke om jou middel slanker te laat lyk.

Lees ook: 10 redes waarom jy rooi rose se Desember-uitgawe móét lees!

The post Vlei jou beste bates in ’n eenstuk-swembroek met hierdie 5 wenke appeared first on rooi rose.

Kies die regte halslyn

Vind uit watter vorm(s) jou figuur en bates die beste sal pas.

V-hals

As die onsekerheid jou beetpak oor watter halslyn om te kies, is die V-hals jou beste opsie. Dit lyk goed by die meeste figure en gesigvorms en kan verslankend lyk. Hierdie halslyn lyk veral mooi by diegene met ’n korter nek en breë skouers, aangesien dit die nekgedeelte verleng en die fokus van die skouers wegneem.

Vierkantige hals

Nes die V-hals, lyk die vierkantige halslyn ook vleiend op verskeie silhoeëtte. Dit is die ideale halsvorm as jy jou kurwes wil benadruk, hetsy jy groot of klein borste het. Dit verleng ook die nekgedeelte, wat fantasties lyk by vroue met ’n korterige nek en breë skouers.

Halterhals

Lang vroue met breë skouers sal lieflik lyk in uitrustings met ’n halterhals. Dit lei die oë na die bolyf en is geneig om die illusie van nouer skouers te skep. As jy ’n uurglasfiguur het, is hierdie ook die perfekte opsie vir jou.

Hartjiehals

Hierdie halslyn word dikwels op bruide gesien, aangesien dit alle figure vlei. Die hartvormige hals trek die aandag na die borste op ’n subtiele manier. Dit dis daarom ook geskik vir vroue met ’n kleiner borsmaat. Hierdie halsvorm is ook geneig om jou kurwes pragtig te beklemtoon. Nóg ’n voordeel van die hartjiehals is dat dit die nekgedeelte bietjie verleng.

Lees nog: Kies die regte handsak vir elke geleentheid

Boothals

Hierdie halslyn skep ’n horisontale lyn oor die skouers, en laat dus skouers groter lyk. Dis dus ideaal vir vroue met peer- en uurglasvormige figure. As jou skouers egter breër is as jou heupe kan hierdie halslyn jou figuur uit proporsie laat voorkom deur dit nog groter te laat lyk.

Uitgeholde hals

Die uitgeholde hals is geskik vir meeste silhoeëtte. As die halslyn nie te laag is nie kan dié halslyn sorg vir ‘n vleiende en vroulike voorkoms vir vroue met groterige borste. Dit laat die nek langer lyk, wat fantasties is vir vroue met ’n korter nek.

Ronde hals

T-hemde het gereeld hierdie hoë sirkelvormige halslyn. Aangesien die hals nie die nek verleng nie word dit nie aanbeveel vir vroue met ’n kort nek nie. Vroue met groter borste wat dit nie verder wil beklemtoon nie moet ook liefs nie uitrustings met ’n ronde hals dra nie. Dis is egter ’n goeie opsie vir diegene met kleiner borste. Vroue met ronde gesigvorms moet ook in ag neem dat hierdie halslyn jou gesig ronder kan laat voorkom.

Rolhals

Hierdie hoë halslyn is geneig om jou nek te verkort, en is daarom beter geskik vir vroue met ’n langer nek. Verder lyk die rolhals ook mooi op diegene met langvormige gesigte, kleiner borste en skouers wat nie verskriklik breed is nie.

Lees nog: 8 wenke vir daardie perfekte denimpaar

The post Kies die regte halslyn appeared first on rooi rose.

By Wimbledon is die mode net so tradisievas soos die toeskouers se aarbeie en room. Van klassieke pakke wat spreek van Engelse elegansie tot moderne, sportiewe silhoeëtte – hierdie bekendes het gewys hoe jy vir Wimbledon móét aantrek.

Olivia Rodrigo in Ralph Lauren

Priyanka Chopra in Ralph Lauren

Lilly Collins in Stella Jean

(Foto: Hoda Davaine/Getty Images for Emirates)

Monica Barbaro in Ralph Lauren

(Foto: Karwai Tang/Getty Images for Ralph Lauren)

Olivia Dean in AYM Studio

(Foto: Jordan Peck/Getty Images for AELTC)

Cate Blanchett in Giorgio Armani

(Foto: Hannah Peters/Getty Images)

Maude Apatow in Ralph Lauren

Olivia Cooke in Ralph Lauren

(Foto: Karwai Tang/Getty Images for Ralph Lauren)

Lees ook: JP Smith is sy tweelingbroer, Ruan, se wingman in die nuwe seisoen van Op my eish!

The post FOTO’S | Ons gunsteling-uitrustings by vanjaar se Wimbledon appeared first on rooi rose.

Foto’s: Getty Images

Die Oscar-toekennings is die grootste aand op die Hollywood-kalender, en lewer altyd van die beste rooitapyt-modes van die seisoen. Hierdie jaar was geen uitsondering nie.

Baie bekendes se gunstelingtrend by vanjaar se seremonie, wat by die ikoniese Dolby-teater gehou is, was Sparkling nudes.

Hierdie bekendes het dié trend die beste uitgebeeld met hul glinsterende rokke wat vol detail, maar steeds stylvol, is.

Demi Moore in Armani Privé

Selena Gomez in Ralph Lauren

Emma Stone in Louis Vuitton

Ariana Grande in Schiaparelli

Felicity Jones in Armani Privé

Mindy Kaling in Oscar de la Renta

Nog ‘n paar van ons gunsteling-uitrustings:

Lees ook: Vyf-vinnige-vrae- met Laura-Lee Mostert oor haar droomrol in Binnelanders

The post Oscars-trend: Skitterende neutrale appeared first on rooi rose.

1. Demi Moore in Armani Privè

2. Zoe Kravits in Saint Laurent

3. Zendaya in Louis Vuitton

4. Zoe Saldana in Saint Laurent

5. Kate Winslet in Erdem

6. Dakota Fanning in Dolce & Gabbana

7. Mindy Kaling in Ashi Studio

8. Anya Taylor-Joy in vintage Dior

Lees ook: Maak die meeste van jou vakansiedae in 2025!

The post Golden Globes 2025: Ons 8 gunsteling uitrustings appeared first on rooi rose.

Verleng die lewe van jou swembroek deur Susra Matthee en Bea Lingenfelder. Hooffoto: Pixabay

Moet

Was jou swembroek na elke dra, selfs al het jy nie in die water gegaan nie. Sonskerms bevat bestanddele wat skadelik is vir jou swembroek en kan die materiaal verweer. Room met minerale en olieformules in kan met die verloop van tyd vlekke veroorsaak. Chloor is nog swaarder op swemdragstowwe en kan helder kleure laat verbleik.

Spoel jou swembroek in koel kraanwater af sodra jy dit uittrek.

Om dit vir 30 minute in koel water te laat lê is nog beter. Dit sal die meeste van die chemikalieë, sout en sand verwyder wat die materiaal kan beskadig.

So gerieflik soos wat dit kan voorkom, moenie jou swembroek by die ander wasgoed ingooi nie. Gebruik koue water en ’n sagte seep of skoonmaakmiddel, en maak seker dat jy jou swembroek deeglik spoel om oortollige seep eerste te verwyder. Seep-oorblyfsel kan net so skadelik wees vir die materiaal soos sout en chemikalieë. Warm water maak die vesels van die materiaal oop – hoe koeler die water, hoe beter.

Om jou swembroek droog te maak, rol dit saggies in ’n skoon, droë handdoek en druk liggies om die oortollige water te verwyder. Moet nooit jou swembroek uitdraai nie, aangesien dit die rekbare vesels kan beskadig. Die hitte van ’n droër is ook amper net so skadelik vir ’n swembroek soos die son, sy unieke materiaal is veral geneig om sy vorm te verloor in hoë hitte.

Indien jy braaf genoeg is, gebruik ’n buitestort of maak jou swembroek nat voordat jy in die water ingaan. ’n Droë swembroek is uiters absorberend en sal soos ’n spons al die chemikalieë en sout in die water absorbeer.

Die meeste swembroeke is van rekbare materiaal (spandex) gemaak. Spandex is ’n memoriseringsmateriaal. Dit beteken dat wanneer dit uitgerek word, dit kan terugkeer na sy oorspronklike vorm. Maak tog seker jy gee jou swembroek ’n ruskans. Dit neem gewoonlik ongeveer ’n dag vir ’n swembroek om terug te keer na sy normale toestand.

Lees ook: Wees swembroekslim

Moenie

Moenie sterk wasmiddels gebruik nie. Dit kan skadelik vir die rekbare materiaal wees en kan die kleur laat vervaag. Gebruik liewer sagte handseep.

Moet NOOIT jou swembroek oornag week nie, dit maak die vesels los van mekaar.

Moenie jou droograk in direkte son plaas nie. Son is baie kragtig en verniel jou swemklere. Vind ’n skaduryke plekkie waar jy jou swembroek op ’n handdoek kan neerlê. Draai die swembroek om sodra die bokant droog voel.

Moenie op growwe oppervlaktes sit terwyl jy ’n swembroek aan het nie. Die sement langs die swembad of die hout van die dekstoele kan jou swembroek haak. Gooi ’n handdoek neer voor jy sit.

Dit is moeilik om nie na ’n lekker swem in die warm son te bak nie, maar ongelukkig beskadig dit jou swembroek. Lê eerder eers ’n bietjie voor jy gaan swem. ’n Nat swembroek het die chloor of sout geabsorbeer en wanneer dit aan direkte sonlig blootgestel word, word die skade aan jou swembroek vermenigvuldig.

Lees ook: Sorg vir jou gunsteling someritems

The post Verleng die lewe van jou swembroek appeared first on rooi rose.

Hoe om die kleredragreëls op uitnodigings te verstaan deur Susra Matthee en Bea Lingenfelder. Hooffoto: Pexels

Sodra jy dink jy het al die voorskrifte onder die knie, hoor jy daar is nou weer nuwe fênsie Franse name vir funksies en geleenthede waarvan jy nog nooit gehoor nie. Ons help jou die gewildstee en soms totaal unieke terme vir kleredag verstaan om in die kol wees vir elke geleentheid.

Ons wys jou hoe om die dragkodes op uitnodigings te verstaan – hier is 10 kleredragreëls wat jy moet ken.

Gemaklik

Gemaksdrag oftewel informele drag is ’n ope uitnodiging om enige iets aan te trek waarin jy gemaklik voel – of dit nou jeans, ’n t-hemp en sneakers is, ’n romp of ’n rok; die keuse is joune. Solank jy net nie in oefenklere of pajamas opdaag nie; of dit heeltemal oordoen met bykomstighede nie, kan jy nie juis verkeerd gaan met hierdie styl nie.

Lees ook: Ja, jy kan goed lyk in ’n swembroek!

Deftig informeel

Met hierdie styl moet jy so ’n bietjie meer moeite doen. In die verlede was jeans nie aanvaarbaar vir hierdie styl nie en jou kenmerkende werksdrag sal eerder as verwysing gebruik word om ’n uitrusting te kies, maar deesdae is jeans met ’n netjiese bloes en hakke meer as aanvaarbaar en eintlik ’n kenmerk van hierdie drag. ’n Rok met ’n somerbaadjie en interessante bykomstighede is ook ’n wenner. Die doel is netjies, maar nie oordoen het.

Lees ook: Hoe om dié baadjie van die somer te dra

Semi-formeel

Semi-formeel, ook bekend as skemerkelkie-drag (cocktail wear), is ’n gewilde voorskrif vir partytjies en troues. Kies ’n prettige, maar tog netjiese partytjierok, so midi-lengte (by die knie) saam met hakke. As jy nie ’n groot aanhanger van rokke is nie, sal ’n netjiese broekpak of oorpak ook kan werk.

Lees ook: Trou-uitrustings onder R500

Formeel (black tie)

Hierdie styl staan ook bekend as die ou Hollywood-glansstyl. Dink aan lang aandrokke in elegante kleure vir vroue en pakke met die tradisionele swart (strik)das as ’n vereiste vir ’n swart formele geleentheid. Met minder as dit gaan jy nie wegkom nie. Hou die res van jou bykomstighede volgens die less is more-reël.

Lees ook: Detoks jou klerekas in ’n japtrap

White Tie

Die formeelste van almal. Dit behels balrokke vir vrouens en ’n swaelstertjas of ’n dubbelborspak (deesdae is enkelknope ook aanvaarbaar). Rond dit af met ’n onderbaadjie en ’n wit strikdas of das vir mans. Tradisioneel het vroue lang handskoene gedra saam met hierdie voorskrif, maar vandag is dit meer opsioneel as noodsaaklik.

Lees ook: Dra jou winteritems in die somer – ons wys jou hoe

Soirée

Soirée, wat “swah-RAY” uitgespreek word, is ‘n Franse woord. Soir beteken “aand” in Frans. Dit is ’n elegante aandgeleentheid met ’n regstreekse orkes/groepmusiek, gewoonlik by iemand se huis. Jeans en t-hemp gaan egter nie deug nie, jy benodig iets meer formeel, soortgelyk aan die semi-formele drag. Jou gasheer sal moontlik vir jou ’n spesifieke klerevoorskrif aanbeveel per uitnodiging.

Lees ook: Hierdie 8 modefoute laat jou slordig lyk

Somer Soirée

’n Somer Soirée vind plaas in die dag, gewoonlik buite met musiek. Die klere is hoofsaaklik deftig informeel en semi-formeel. ’n Somer maksirok en sandale of bonkige hakke is perfek vir hierdie geleentheid.

Lees ook: 10 wenke vir ’n sweetvrye somer

Whimsical

Whimsical drag is tussen ’n kostuumpartytjie en formeel. Daar word van gaste verwag om met eienaardige uitrustings vorendag te kom. Vroue kan tutu-styl-rompe en -rokke dra of selfs uitrustings van bekende karakters. Mans dra gekleurde dasse, bedrukte hemde of patroonpakke. Die uitdaging hier is om nie goedkoop te lyk nie.

Lees ook: 7 maniere om luuks te lyk met min geld

Fabulous

Oor die algemeen verwag hierdie voorskrif van jou om hoofsaaklik formeel en gewaagd te wees met jou kleur- en stylkeuses. Uitspattige uitrustings soos rokke met blinkers of helder kleure speel hier baas en word in elke uitrusting verwag.

Lees ook: Vyf vinnige modetruuks wat jou uitrusting afrond

Gatsby-sjiek

Hierdie styl is nie noodwendig ’n volledige Gatsby-kostuumpartytjie nie, maar behels wel elemente van die bekende Gatsby-era. Dit verwys na formele rokke met ‘n lae middellyf, t-bandskoene en fraiings. Hierdie klerevoorskrif bevat ook baie vintage elemente en is ook bekend as vintage glamour.

Lees ook: 5 moderne maniere om pêrels te dra

The post Hoe om die kleredragreëls op uitnodigings te verstaan appeared first on rooi rose.

Wees swembroekslim deur Bea Lingenfelder en Susra Matthee. Hooffoto: Pixabay

Valle

Valle is ’n bekende tegniek om ongewenste rolletjies te verbloem, maar jy kan dit ook tot jou voordeel gebruik om ’n spesifieke bate te beklemtoon of te “vergroot”.

Moenie skrik nie!

Ons bedoel: Mense met ’n peerliggaamsvorm (swaarder heupe) kan ’n swembroek aantrek met valle om die skouers wat die illusie van ’n uurglasfiguur skep. Moenie dit te dramaties maak nie, hou by een val wat eenvoudig en vleiend is.

Wanneer moet jy valle vermy? As jy ruim bates of kurwes, soos borste of heupe het. Hoewel valle kan verbloem, skep dit ook volheid wat kurwes groter kan laat lyk.

Voue

Hierdie tegniek is ’n subtieler manier om te verbloem, maar die hoofdoel is om eerder vorm te gee. Dit manipuleer die vorm van jou liggaam en skep kurwes. Hierdie tegniek is gewild vir vroue wat nie baie kurwes het nie. Die voue is meestal diagonaal om ’n verslankende voorkoms te skep, of word uit een hoek oor jou lyf versprei. Die tekstuur van voue is wat die wegsteekwerk doen – ’n gladder tekstuur wys dikwels baie meer ongelykhede, waar voue die buitelyne van jou silhoeët wel “gladder” laat voorkom.

Halslyne

Halslyne is seker een van die belangrikste kenmerke van ’n swembroek. Dit skep jou liggaam se raamwerk. Die gewilde V-nek bly ’n wenner, maar hierdie snit kom ook nie meer net in sy standaardvorm voor nie. ’n Mens kry nou baie lae lyne, ’n breër V-lyn of dié wat selfs met hekelwerk gelas word.

Nog ’n voordeel van hierdie halslyn is dat die bandjies nie om jou nek vasbind nie. Bandjies om jou nek kan ongemaklik raak, veral as jy ’n swaarder bolyf het. Identifiseer eers die doel van jou swembroek – is gemak boaan jou lysie, of wil jy ’n eenvoudige snit hê wat jou nie snaakse patrone laat brand nie? As jy groter borste het, kan ’n dieper halslyn jou slanker laat lyk. Indien jy hierdie snit kies, maak seker jy kan jou halslyn toeryg vir ’n gemakliker en selfversekerde voorkoms.

Patrone

Wie hou nie van vrolike patrone in die somer nie? Hoewel die klassieke swart en effekleurige swembroeke altyd die veilige keuse sal bly, is dit nou tyd om ’n bietjie uit jou gemaksone te klim – jy sal verbaas wees hoe kleure en patrone jou voorkoms, gemoed én selfvertroue ’n hupstoot kan gee!

Kyk watter kleure kom die meeste in jou klerekas voor, dit gee ’n goeie aanduiding waarvan jy hou en wat vir jou werk. Blom- en tropiese patrone bly gewild, maar slim lyne kan net so vleiend en vroulik lyk. Nes voue is patrone ’n minder opvallende manier om te verbloem. Maar maak seker die motiewe of patrone is nie baie groot nie. Groot blomme, blare of figure kan nog groter op jou liggaam lyk en kan jou ongebalanseerd laat lyk.

Die rokkie

Ons almal ken hierdie snit – ’n gewaarborgde verbloemer, maar dit is ook een van die moeilikste snitte om baas te raak. Jou lengte en nie jou liggaamsvorm nie, is die bepalende faktor. Die doel van die uitklokromp is om die selluliet op jou heupe, agterstewe en bobene te toe te maak, nie om die grootte van jou bates te verbloem nie. Vroue maak dikwels die fout en kies die rokkie wanneer hulle groot bates wil wegsteek. Soos reeds gesê: valle skep volume. Maak seker jy kies ’n swembroek met ’n rompie wat vir jóú lengte gepas is. Die beste is wanneer die A-lyn bo jou heupbene begin, en net onder jou agterstewe eindig.

Algemene wenke

• Omhels jou liggaamsvorm – moenie dit probeer verander nie.
• Fokus eerder op die bates wat jy wil beklemtoon, eerder as om te verbloem.
• Jý moet goed en gemaklik daarin voel.
• Die “veilige” swart swembroek is nie altyd beter nie.
• Dink aan die doel – ’n snit waarin jy kan lê en lees, of een waarin jy die branders kan aandurf.
• Dra dit met tonne selfvertroue!

Lees ook: WEN Franschhoek Cellar-wyn en ’n drasak vir twee bottels ter waarde van R2 600!

The post Wees swembroekslim en kies die regte snit vir jou figuur appeared first on rooi rose.

Stoor jou klere reg deur Susra Matthee en Bea Lingenfelder. Foto: Sarah Brown vir Unsplash

1. Sorteer en organiseer

Pak al jou wintersklere uit (insluitende jasse en dik truie) en sorteer dit in drie hope: “om te was”, “vir die droogskoonmakers” en “skoon”. Moenie jou hoede, serpe en handskoene vergeet nie! Terwyl jy besig is, raak sommer ontslae van alles wat verouderd of beskadig is.

Kitswenk: Stof terselfdertyd jou rakke af en vee dit skoon.

2. Was dit voordat jy dit wegpak

Voordat jy jou wintersklere wegpak, was eers die klere wat jy onlangs gedra het en nog nie gewas het nie. As klere vir ’n lang tydperk gestoor word, kan vuil klere plae lok, ongewenste reuke veroorsaak en skimmel produseer. Klere wat parfuum, room, olies of sweet daarop het, kan geel vlekke veroorsaak. Deur hierdie prosedure te volg verseker jy ook dat jou klere skoon is wanneer jy dit weer wil dra.

Kitswenk: Doen sommer dieselfde met jou dik komberse.

3. Maak jou skoene skoon

Winterskoene kom dikwels in aanraking met modder. Maak elke paar deeglik skoon voordat jy dit wegpak – verwyder opgeboude vuilheid met ’n katoenlappie of skoenborsel. Dis dalk ook ’n goeie idee om die binnekante van skoene en stewels met ’n lappie wat in spiritus of mediese alkohol gedoop is, uit te vee. Dit sal klaarspeel met enige reuke. Moet ook nie vergeet om politoer of voedende leerroom op jou leerstewels te smeer en jou veters te was voordat jy dit wegpak nie.

4. Plastiekhouers 

Plastiekhouers is ideaal om klere wat nie delikaat is nie, te stoor. Vou netjies op en plaas die swaarste items, soos sweetpaktoppe, op die bodem van die houer. Sit hemde (netjies gevou) en rompe bo-op. Vakuumsakke help jou om ruimte te spaar, maar dit laat geen lug deur nie. Plastiekhouers werk tot ’n mate dieselfde, daarom is hulle ideaal om op die kort termyn jou klere te stoor. As jy klere vir meer as ’n seisoen of twee moet stoor, pak dit eerder in ’n katoensak of kartonboks.

5. Delikate items

Om jou delikate items te stoor verg ’n bietjie meer finesse: Wanneer jou delikate items van die droogskoonmakers terugkom, haal dit heel eerste uit die plastieksak – plastiek laat nie toe dat natuurlike vesel goed asemhaal nie. Vou elke item versigtig op in suurvrye papier voordat jy dit in ’n katoenhouer of ’n sloop wegpak.

6. Stoor jou truie só

In plaas daarvan om die truie op te hang, vou dit eerder netjies op. Dit is nooit ’n goeie plan om ’n trui op te hang nie, omdat dit maklik vorm verloor en uitrek. Plaas jou swaarste truie aan die onderkant van die houer. Moet ook nie jou houers te vol pak nie sodat jou trui steeds asem kan haal en sy gepofte wolstyl behou.

7. Insekte verpes kruie

Gebruik natuurlike kruie in plaas daarvan om skadelike motbolletjies wat met chemikalieë behandel is te gebruik. Motte verpes kruie soos laventel, roosmaryn, tiemie, gedroogde lemoenskil of sederhoutskyfies. Bind enige van hierdie kruie in ’n lugsakkie of sakdoek en plaas dit naby, maar nie direk op die kledingstuk nie.

8. Hang duur items

Hoewel delikate items versigtig gevou kan word, is dit veiliger om jou kosbaarste items eerder op te hang – soos deftige rokke, jasse, sy- en leeritems. Om seker te maak dat stof nie opgaar nie, gooi ’n kleresak met goeie ventilasie of ’n katoenlaken oor die klere.

9. Kies ’n goeie stoorplek

Hou jou stoorhouers en -sakke in ’n koel, donker en droë area waar daar goeie ventilasie is, byvoorbeeld onder ’n bed of in ’n gastekamer. Indien ’n kelder jou enigste opsie is, installeer ’n toestel wat die humiditeit en vogtigheid uit die lug kan absorbeer. Probeer egter die solder vermy, omdat dié vertrek geneig is om vinnig warm te word en hoë temperature kan veroorsaak dat jou klerevesels vinnig beskadig.

Lees nog: Detoks jou klerekas in ’n japtrap

The post Hoe om jou wintersklere reg weg te stoor appeared first on rooi rose.

Detoks jou klerekas in ’n japtrap deur Bea Lingenfelder en Susra Matthee. 

Volg ons maklike vyf-punt-plan om jou klerekas reg te ruk!

Lees ook: 10 dinge wat jy voor 40 moet hê en weet

1. Voorbereiding

• Wees eerlik met jouself. Elkeen ervaar ’n detoks anders – emosioneel, opwindend, wat ook al … Moenie jouself probeer kul nie, besluit vooraf hoe jy die proses gaan aanpak en hou daarby.
• Gooi alles uit jou kas(te) sodat jy ’n goeie oorsig kan kry oor wat jy het. As jy in afdelings sorteer, vergeet jy wat in die vorige afdeling gebeur het, en jou detoks is nie suksesvol nie.
• As jy ’n vriendin het wie se oordeel jy vertrou, vra haar raad en laat sy jou met die proses help. Die sessie kan selfs in ’n prettige ervaring ontaard!

Lees ook: 8 modefoute wat jou slordig laat lyk

Organiseer jou klerekas so

2. Sorteer jou klerekas

• Besluit in watter hopies jy jou klere gaan sorteer:  hou / skenk / dalk / pas nie.
• Vra jouself af: “Hoe lank terug het ek hierdie kledingstuk gedra?” of “Het ek dit die seisoen meer as een keer gedra?” Ons koop soms baie impulsief net sodat die rok/bloes die res van die tyd in jou kas hang. Wanneer jy op só ’n slagoffer afkom, vra jou af of jy dit nog een kans gaan gee en hang hom voor in jou kas. As jy steeds twyfel, skenk hom liefs.
• Pas die item by jou huidige leefstyl? Baie kan verander in ’n seisoen – jy kan ’n nuwe mamma word, of ’n nuwe werk begin wat sekere klerevereistes het. As die kledingstuk van geen nut is in jou nuwe leefstyl nie, raak ontslae daarvan.
• Wanneer ’n item beter op die hanger lyk as op jou lyf, is dit tyd om dit uit te gooi. Baie van ons klou vas aan iets wat ’n mooi patroon of kleur het, maar sodra jy dit probeer aantrek, sak jou hart in jou skoene.
• Deftiger klere vereis ’n ander denkwyse wanneer jy jou klerekas detoks. Jy dra dit nie so gereeld nie, maar wanneer jou uitrusting eentonig begin voel, kikker dit met nuwe bykomstighede of moderne skoene op.

Lees ook: Marie Kondo se ses slim pakwenke

3. Siedaar-klaar, wat nou?

• As jy ’n hopie vir “dalk” het, herevalueer jou keuses en sorteer dit volgens “skenk” of “hou.”
• Skenk of verkoop die klere wat jy uitgegooi het. Sodoende kry jy ook ’n gevoel dat jy beloon word vir jou detoks.

Lees ook: 5 vinnige modetruuks wat jou uitrusting sal afrond

4. Klere wat nie pas nie maar waarvoor jy lief is

Pak al die klere wat nie pas nie (maar wat jy nog nie oor jou hart kan kry om weg te gee nie) in ’n houer en stoor dit iewers tot volgende keer. Sorteer hulle dan finaal met jou volgende detoks.

Lees ook: Verleng die lewe van jou gunsteling-jeans

5. Hou ook in gedagte

• Maak jou klerekas gebruikersvriendelik. Baie van ons vergeet van sekere klere omdat die kas so deurmekaar is. Sit vir jou ekstra rakkies in of skep hangplek om jou klere mooi te vertoon en maklik weg te pak.
• Sorteer slim: Pak jou skoene in ’n posbus-rakkie wat min plek in beslag neem. Dun hangers neem minder plek op en jou klere verdruk nie so maklik nie. Kry ook spesiale hangers of stoorplek om jou serpies en gordels te stoor.
• Hang jou klere volgens afdelings, soos baadjies bymekaar, rokke saam, ens. Dis makliker om te sien wat jy het en om hulle dan te stileer.
• Maak gereeld jou kas met ’n klam lappie en stoffer skoon.
• Moenie net links en regs uitgooi nie, wees seker van jou besluit.

Lees ook: Stoor jou klere reg met hierdie raad

Lees hier vir nog goeie raad:

Lyk jare jonger met hierdie slim wenke

7 maniere om luuks te lyk sonder om te veel geld te bestee

Verleng jou trui se lewe

10 wenke om tyd te spaar

The post Detoks jou klerekas in ’n japtrap appeared first on rooi rose.

Wenke vir ’n stylvolle wintervoorkoms deur Bea Lingenfelder. 

Volg dié slim wenke:

1. Hou dit ooreenstemmend

Hoe meer lae jy opstapel, hoe makliker kan jou uitrusting deurmekaar begin lyk. Hou jou kleurpalet ooreenstemmend.

Dit hoef nie noodwendig alles neutrale kleure te wees nie, maar as jy van helder kleure hou, kan jy rondspeel met skakerings van daardie kleur.

#rrWenk: Jy kan een of twee kleure met mekaar kontrasteer, maar balanseer dit dan uit met ’n klassieke swart, wit of roomkleurige item.

2. Wees patroonslim

Hoewel modekenners die afgelope jare jou gereeld aangemoedig het om patrone links en regs te kombineer, kan ’n stylvolle voorkoms so vinnig by die agterdeur uithardloop.

’n Kombinasie van twee klassieke patrone is ’n goeie manier om stylvol, maar steeds modieus te lyk.

#rrWenk: As jou een patroon baie bont en besig is, maak dit die fokusitem van jou uitrusting.

3. Speel met teksture

Hoewel jy jou kleurpalet en patrone aan die veiliger kant moet hou, het jy vrye teuels met tekstuur.

Dit skep diepte en is winterwelig op ’n stylvolle manier, byvoorbeeld denim jeans, ’n katoenhemp met ’n leerbaadjie en woljas.

#rrWenk: Moet egter nie te veel dik materiale opmekaar stapel nie, anders kan jou liggaam vorm verloor.

Lees ook: Detoks jou klerekas in ’n japtrap

4. Hou jou vorm

Om klere opmekaar te dra kan jou vinnig bonkig en vormloos laat lyk.

Hoewel ’n gordel om jou jas of trui die kits-reddingstegniek is, is nie almal aanhangers daarvan nie.

In hierdie geval, maak seker jou eerste paar lae sit styfpassend aan jou figuur voor jy jou groot jas of baadjie oorgooi.

#rrWenk: Steek jou trui in aan die kant in vir ’n diagonale soom wat jou bene verleng.

Lees ook: Hierdie 8 modefoute kan jou slordig laat lyk

5. Tussen die jas en skoen

Wanneer jy stewels saam met ’n lang jas dra, maak seker daar steek ten minste drie sentimeter van jou broek of kouse uit tussen die jas en stewels.

Wanneer jou jas oor jou stewels hang, verbreek dit jou bene se vorm.

#rrWenk: Dra korter jasse of baadjies saam met lang stewels.

Lees ook: Vyf vinnige modetruuks wat jou uitrusting afrond

The post 5 klassieke wenke vir ’n stylvolle wintervoorkoms appeared first on rooi rose.