Net toe kykers gedink het Diepe Waters seisoen 3 sou eindig soos ’n sprokie met ’n dubbeltroue, het die kykNET-telenovela geskok met ’n onverwagse onthulling.

Die dubbeltroue van Sanet (Nadia Valvekens) en Fourie (David Louw), sowel as Sanet se dogter Karla (Danielle Swanepoel) en Arno (Jean Henry), het soos ’n ware sprokiesverhaal geklink – ’n ma en dogter wat liefde saam vier nadat hulle soveel pyn en hartseer oorwin het. Sanet het haar stryd teen alkoholafhanklikheid gewen, terwyl Karla en Arno ná talle uitdagings uiteindelik hul pad na mekaar teruggevind het.

Maar soos kykers weet, is dinge in Diepe Waters nooit lank rustig nie. Vroeër die week het Zelda ’n verdagte oproep gemaak aan ’n geheimsinnige vrou, wat kykers laat wonder het wat sy beplan. Tog was die opbou tot die troue vol vreugde, hoop en opwinding – totdat alles voor die kansel in duie gestort het.

Karla en Arno het hul geloftes sonder probleme afgelê, maar toe dit Sanet en Fourie se beurt was, het die groot skok gekom. Net toe Fourie “ja” wou sê, storm ’n onbekende vrou die kerk binne. Die vrou – vertolk deur Anel Alexander – het almal stomgeslaan toe sy verklaar dat Fourie nie met Sanet kan trou nie… omdat hy reeds getroud is – met haar.

Die episode het geëindig met ’n kerk vol geskokte mense, en kykers wat met vrae gelaat is – wie is die vrou wat aanvoer dat sy en Fourie nog getroud is, en is haar aantuigings waar?

Wie is Linda Blignaut?

Die geheimsinnige vrou is Linda, Fourie se vrou in Dubai. Sy is ’n suksesvolle kunsgalery-eienaar in Dubai, wat spesialiseer in Afrika-kuns onder haar nooiensvan, Blignaut.

Linda het Fourie jare gelede ontmoet toe sy nog daarvan gedroom het om haar eie galery te begin. By ’n handelsgeleentheid wat deur die Suid-Afrikaanse ambassade aangebied is, is sy aan Fourie voorgestel, wat destyds betrokke was by uitvoer na die VAE. Fourie, wat dadelik na haar warmte en deursettingsvermoë aangetrek is, het haar gehelp om finansiële steun te kry vir haar galery, wat sy Maji Art Gallery genoem het. Hulle vennootskap het gou romanties geword, en om hul lewe in Dubai makliker te maak, is hulle in die hof getroud.

Maar daar was ’n vangplek: hul huwelik, alhoewel geldig in Dubai, is nooit amptelik in Suid-Afrika verklaar nie. Terwyl Fourie dit as ’n geriefshuwelik beskou het, was Linda diep verbind tot die verhouding. Met verloop van tyd, soos Fourie al hoe meer in Johannesburg was, het die krake begin wys. Toe hy vir ’n egskeiding vra, het Linda al hoe meer besitlik geraak, en ná ’n wanhopige selfmoordpoging het hul verhouding in duie gestort.

Fourie het geglo die egskeiding in Dubai is gefinaliseer, maar die proses is nooit voltooi nie. Toe Zelda vir Linda kontak, is die bom laat bars wat nou sy troue met Sanet vernietig het.

Wat wag vorentoe?

Met die waarheid nou onthul, hang Fourie se toekoms aan ’n dun draadjie. Sal Sanet hom kan vergewe vir so ’n vernietigende geheim? Hoe gaan Karla en Arno se huwelik die skok oorleef? En hoe ver sal Linda gaan om haar plek in Fourie se lewe te behou? Een ding is seker: Diepe Waters se kykers kan nog baie meer skokkende onthullings en emosionele draaie verwag.

Seisoen 4 van Diepe Waters skop af op Maandag 29 September op kykNET (DStv-kanaal 144). Dit is ook op DStv Stream en Catch Up beskikbaar.

Lees ook: 6 Maniere om langer en lekkerder te lewe

The post ‘Diepe Waters’ se rampspoedige dubbeltroue: Wie is Linda Blignaut? appeared first on rooi rose.

Nadia Valvekens is ’n geliefde en gesoute aktrise met meer as 15 jaar se uiteenlopende rolle. Van Binnelanders se hospitaalsale tot die huidige telenovelle Diepe Waters, boei sy gehore as Sanet, ’n komplekse huisvrou wat die waters van liefde, geheime en wraak rondom die mededingende swemklub, Die Swartmarlyne, navigeer.

 

View this post on Instagram

 

A post shared by Nadia Valvekens (@nadiavalvekens)

Die tonge klap omtrent oor Sanet se nuwe pad wat haar na vreemde plekke lei, maar hoe maak ’n mens as een tipe verslawing dan nou tot die volgende lei en sal die nuwe dominee haar op die regte pad kan hou?

“Wat ek die meeste daarvan geniet om Sanet te speel, is dat ek vir ’n gehoor kan wys dat mense foute het, en dit is oukei. Ons almal maak foute, dit beteken nie jy is ’n slegte mens nie. Iets wat die skrywers wonderlik uitbeeld, is hoe sy uit haar foute leer en groei. Sy probeer nog verstaan waar sy in die wêreld inpas en ek dink dis ’n verskriklike menslike vraag – wie is ek, wat wil ek hê, waar pas ek in?” deel Nadia.

Sy glo Diepe Waters vertel regte stories en hou ’n spieël op wat mense laat dink. “Ek dink iemand soos Sanet laat mense besef ‘don’t judge a book by its cover’, want al is iemand nie van jou dam se eende nie, verdien almal ’n plekkie onder die son. Ons almal kan mekaar respekteer vir wie ons gekies het om te wees,” voeg sy by.

Karlien Meiring het meer by Nadia oor Sanet se baie lae gaan uitvind.

Is daar ’n verband tussen jou en Sanet se karakter, en watter aspekte van haar persoonlikheid is die uitdagendste om uit te beeld?

Ons albei het al uitdagings ervaar. Ek het ook al my eie uitdagings gehad en aan die ander kant uitgekom en het dus begrip vir haar pyn en menslikheid. Sy maak baie foute en is dikwels te trots om dit te erken – dis menslik. Dit waardeur sy gaan, is nie ongewoon nie. Ek hoop kykers sien dat sy nie die uitsondering op die reël is nie. Haar hartseer, pyn en swaarkry is nie anders as ander mense s’n nie. Om haar persoonlikheid te kan vasvang, is die grootste uitdaging omdat ons so ver van mekaar verwyder is. As akteur, moet jy begrip vir jou karakter hê, hul waarheid vind en dit so eerlik en opreg as wat jy kan vertolk.

 

View this post on Instagram

 

A post shared by Diepe Waters (@diepewaters)

Wat was die uitdagendste toneel wat jy vir Diepe Waters verfilm het?

Om as ’n akteur dronk te speel, is ’n hit or miss. Ek was verskriklik bang en op my senuwees vir al haar dronktonele gewees. Dit kan maklik verkeerd gaan en over the top voorkom, maar as jy goeie regisseurs het en almal as ’n ensemble saamwerk, maak dit dinge makliker. Ander tonele wat vir my uitstaan, is: Toe Sanet op haar huweliksherdenking moet uitvind dat Anja en Rossouw in ’n verhouding is. Ek dink ek was vir twee dae daarna heeltemal uitgeput! En toe Sanet dronk by Wim se huis opgedaag het – die son het gesak en ons het min tyd gehad om die toneel vas te vang. Dit het ook gereën en my skoen het in die modder vasgesit – ek moes dit toe in die toneel inwerk!

As jy vir Sanet moet raad gee, wat sou jy vir haar sê oor haar lewenskeuses in die reeks?

Stories is ’n kunsvorm wat ’n spieël ophou en wys watter gevolge jou besluite kan inhou. As Sanet iemand was wat ek regtig geken het, sou ek definitief vir haar gesê het om ’n sielkundige te gaan sien. Ek is dankbaar dat die skrywers nou vir haar ’n dominee gegee het wat haar dalk in die regte rigting kan lei.

 

View this post on Instagram

 

A post shared by Tristan W (@tristwin)

As jy vir ’n dag met enige karakter in Diepe Waters plekke kon ruil, wie sou dit wees en hoekom?

Definitief Gys! Dit sal wonderlik wees om met Gys plekke te ruil, want hy is vir seker ’n antagonis. Ek sal in iemand soos hy se brein wil klim om te kan verstaan hoe hy dink, hoe hy voel en hoe hy so oukei daarmee kan wees om mense seer te maak. Sekerlik is dit ook hoekom hy so welaf is!

Wat kan kykers nog van Sanet in die tweede seisoen van Diepe Waters verwag? Is daar enige opwindende storielyne wat jy mag deel?

Daar kom bietjie groei vir Sanet en daar mag dalk liefde op die horison vir haar wees.

 

View this post on Instagram

 

A post shared by Diepe Waters (@diepewaters)

Lees ook: Vyf-vinnige-vrae-Vrydag met Chris Steyn van ‘Die Kontrak‘

The post Vyf-vinnige-vrae met Nadia Valvekens oor ‘Diepe Waters’ appeared first on rooi rose.

Die gewilde reeks, Alles Malan se tweede seisoen is tans op kykNET te sien en Nadia Valvekens speel die rol van Tessa, die Malans se oudste seun, Frik, se vrou. Nadia het al verskeie rolle vertolk en is veral bekend vir haar rol as Pippa Venter in Binnelanders. In Alles Malan is Nadia ma van twee kinders en haar gesin het in die eerste seisoen ná agt jaar in Engeland teruggekeer Paarl toe om die familie-onderneming, Malan Vervoer, by sy pa oor te neem.

Frik wat deur Ivan Zimmerman gespeel word, is die oudste van Derik en Brenda se twee seuns. Hy en Tessa se kinders is Elani, gespeel deur Greteli Fincham en hul aangenome seun, Freek, gespeel deur Matheo Olivier.

Tessa het haar baie suksesvolle loopbaan as prokureur agtergelaat en het haar nuwe rol as voltydse ma ontgin. Aanvanklik het sy verlore gevoel, maar sy het weldra die wonder van mawees en daar wees vir haar gesin, ontdek.

Nadia vertel dit was vir haar maklik om met die selfopofferende rol te identifiseer en om sterk te probeer bly in ‘n gesin waar als uitmekaar val. “My ma was ’n enkelma en ’n goeie voorbeeld van ’n  vrou wat baie vir haar twee kinders opgeoffer het om ons groot te maak en deur universiteit te kry. As oudste van twee susters en my ma wat soveel balle in die lug moes hou, moes ek soms intree en help. Ek kon dus inspirasie daaruit put.” 

Nadia sê daar is heelwat ooreenkomste tussen haar eie lewe en Tessa se karakter, want sy is ook ’n sterk vrou en baie loopbaangeoriënteerd. “Ek is ook baie familievas en daar is min goed wat my sal stuit om dit te bereik waarop ek my visier gestel het.”

Tessa word die primêre broodwinner en sy verloor haarself in die proses. Baie vroue bevind hulle in dieselfde bootjie.

Nadia sê ’n rol soos Tessa is nodig omdat ons in moderne tye baie meer beroepsvroue in hoë poste sien, wat gesinsvrou én suksesvolle loopbane uitleef. “Dis  oukei om te besef ons is net mens, ons maak foute, soms maak ons verkeerde besluite en dis deel van die lewe.”

Nadia bring graag tyd met familie op Heroldsbaai deur, maar sy vertel dat vanjaar se chaos haar teen vroeg Desember nog besluiteloos gelaat het oor hoe die feestyd gaan lyk.

Nadia se aanlyn dramakursusse gaan in die nuwe jaar voort en belangstellendes kan deur haar sosiale media blaaie by Interact bespreek.

Sy glo nie regtig aan Nuwejaarsvoornemens nie, want sy glo ‘n mens moet in die oomblik leef. “Elke dag moet ’n Nuwejaarsvoorneme wees. Be the best version of yourself every day.”

Deur Maryke Roberts

Lees ook: Liefde op die kassie én af die kassie

The post Nadia terug op kykNET appeared first on rooi rose.

Die een is ’n smeulende donkerkop, die ander ’n sensuele blouoogblondine. Jin en Jang as dit by voorkoms kom, maar boesemvriendinne wat mekaar se harte verstaan. Dis Rolanda Marais en Nadia Valvekens.

Rolanda en Nadia het oor die jare elkeen haar eie kwota oppe en affe beleef, maar die vriendskap tussen die twee baie gewilde aktrises blom steeds.

Vriendskap is ’n baie duur, kosbare ding. En dit hoort ook so – Nadia Valvekens

Nadia het my gewys hoe wonderlik ’n ware vriendin se opregte vriendskap en onvoorwaardelike aanvaarding kan wees – Rolanda Marais

*Lees ons onderhoud met Rolanda en Nadia in die Desember 2016-uitgawe van rooi rose (bl. 20).

The post Agter die skerms met Rolanda & Nadia appeared first on rooi rose.

Party mense is soos ’n vars bries, maar Nadia Valvekens is nie iemand wat jy graag met ’n cliché wil beskryf nie. Sy is eerder soos daardie klam mistigheid wat grênd restaurante op snikhete dae op hul stoepe sproei om mense te laaf.

Sy het in 2014 saam met haar sussie Natasha deur Parys en Engeland getoer en dit was vir haar ’n genesingsreis.

“Ons het een aand in ’n restaurant in Parys drie Parysenaars ontmoet en lekker gekuier. Toe hoor ons dit is die restaurant waarin tonele van die fliek Amélie verfilm is. Dit is een van my gunstelingflieks. Watter lekker toeval!”

Sy en haar sus het alles voluit geniet, en Nadia het alles om haar ingedrink en ’n nuwe mens teruggekom.

“Ek is ’n reisiger. Nou wil ek net weer gaan. Dit verbreed jou horisonne en uitkyk op die lewe.

“Ek is op so ’n goeie tyd en plek in my lewe. Ek is gelukkig en gesond. Ek werk lang ure by Binnelanders, maar ek maak tyd om gimnasium toe te gaan en te gaan draf. Ek is nou nie die Comrades-tipe nie, maar ek hou daarvan om fiks te wees en 10 km kaf te draf.”

Deel van haar geluk is dat sy elke dag doen waarvan sy hou.

“Ek sal wel eendag wil teruggaan na my wortels en groot liefde: die verhoog. Ek het ook groot drome om in rolprente te speel. Ek sal nie omgee om oorsee te gaan werk nie, maar sal nie graag ons land wil verlaat nie. As ek kyk na die lewe van iemand soos Charlize Theron kan ek sê ek beny haar haar rolle en werk, maar nie die eise wat ek glo roem aan haar private lewe stel nie. Die oppervlakkigheid van daardie soort roem is nie iets wat ek sal wil hê nie.”

Nadia stel nie vir haarself groot doelwitte wat buite bereik is nie.

“Ek geniet die uitdagings van elke dag en elke week. Soms werk ek in die week hard, want ek het ’n doelwit om die naweek lekker ver te gaan draf. En as ek lekker gehardloop het, sal ek weer ’n doelwit stel om te kyk of ek die volgende week verder kan hardloop of om my tyd te verbeter.”

Ek geniet die uitdagings van elke dag en elke week

Sy hou nie daarvan om in die verlede rond te delf nie. Daar was ’n hartseertyd, maar dis nou verby.

Sy is deur ’n helingsfase en is nou baie gelukkig.

“Ek is so ongelooflik tevrede met die lewe. Ek is mal oor my onafhanklikheid en wil nie nou iemand in my lewe hê nie. Ek voel so ’n bietjie selfsugtig oor my geluk en wil dit nie nou al met iemand anders deel nie.”

Daar is regtig nie dinge waaroor sy spyt is nie. Soms is dit nodig om deur pyn te werk om te kan groei, glo sy.

“Anders sou die lewe darem baie eentonig gewees het. Daar is mos die spreekwoord wat sê dis beter om lief te gehad het en dit te verloor het as om nooit lief te gehad het nie.”

Sy is deeglik bewus daarvan dat daar in elke situasie twee partye is en dat elkeen ’n rol speel.

“Ek het ook my foute en dit maak my mens. As dinge skeefloop, moet jy ook na jou eie aandeel kyk. Ek kon dit regkry om myself in my groeiproses te vergewe vir foute wat ek gemaak het. Dit is belangrik om verantwoordelikheid te aanvaar vir dinge wat jy verkeerd gedoen het. Jy moet dit doen om aan te beweeg. Jy moet ook ander vergewe, anders kan jy nie vorentoe beweeg nie. Ek verpes mense wat in slagoffermodus stagneer.”

Op ’n dag het die “pennie vir my ge-drop” en sy het besef sy sal haarself aanvaar soos sy is.

“Ek het goeie en slegte eienskappe net soos enige ander mens en ek moet dit aanvaar en leer om daarmee saam te leef. Ek is nie altyd so tevrede met my vinnige humeur nie, maar ek is gelukkig met my morele waardes. Dit gaan oor balans. Natuurlik is daar tye waarin jy dink jy sal nie weer gelukkig kan wees nie, maar dit gaan verby. Op ’n dag besef jy net jy is weer oukei.”

The post Nadia Valvekens se reis na geluk appeared first on rooi rose.