Riaan Grobler, ’n geliefde radio-omroeper by Pretoria FM asook bekende skrywer en sanger, bewys weer waarom hy ’n meester van kreatiewe uitdrukking is. Met sy splinternuwe album Moskonfyt, in samewerking met die talentvolle Jomari, en sy tweede roman Hospitaal Weltevreden wat in Januarie 2025 rakke gaan tref, neem Riaan sy passie vir musiek en storievertelling na die volgende vlak.  

Sy jongste album Moskonfyt spruit uit sy en Jomari se vriendskap van 17 jaar, vanaf die tyd toe hulle ’n jaar lank dieselfde huis ná sy universiteitsjare gedeel het.  

“Sy het die meeste van die agtergrondsang op my vorige albums gedoen omdat ek die meeste van my albums by haar man, die meester-musiekvervaardiger Werner Beukes, opgeneem het,” vertel hy. 

En toe Riaan die eerste keer die liedjie “’n Dag Sonder Jou” hoor, het hy geweet dit moet ’n duet wees – en sy droom van ’n vollengte album saam met Jomari is gebore. Nou, ná ’n jaar se harde werk, is “Moskonfyt” gereed om gehore mee te voer. 

Riaan se skryftalent kry boonop binnekort ’n nuwe hoofstuk met sy tweede roman, Hospitaal Weltevreden.  

Ná die sukses van sy debuutroman keer Riaan terug met ’n boeiende storie wat in ’n hospitaal afspeel. Anders as sy topverkoper, Geheime op Philadelphia, wat hoofsaaklik oor musiek en liefde gegaan het, verken hierdie boek die lewens van drie merkwaardige vroue: dr Anna-Mart, wat in die noodeenheid werk, die streng onkoloog dr Louise Tredoux, en die hospitaal se sielkundige Rentia le Roux.  

Volgens Riaan bevat die verhaal temas van “liefde, geloof en hoop”. 

“Die lesers sal gou agterkom dat dié drie vroue se hegte vriendskap deur diep waters gaan. Die intriges en geheime in die hospitaalgange gaan jou op die punt van jou stoel laat sit.” 

Karlien Meiring het meer oor die veelsydige kunstenaar se kreatiewe reis gaan uitvind. 

Is daar ’n bepaalde boodskap of gevoel wat jy en Jomari met jul album, Moskonfyt, probeer oordra?  

Mense moet dit kan geniet, lekker daarop kan dans, maar ook nostalgies kan raak. Daar is regtig mooi snitte op wat jou hartsnare gaan roer, maar ook liedjies wat jou voete gaan laat roer. 

Hoe kry jy tyd om te skryf? Het jy ’n spesifieke roetine?  

Ek skryf net op Sondae. Ek kan ook nie in stilte skryf nie, so ek gaan skryf elke Sondag ná kerk by my gunsteling-koffiewinkel in Brooklyn Mall. Daar sit ek vier tot ses uur lank en probeer 4 000 woorde per slag skryf. 

Is daar iets wat jy met radio- en TV-aanbieding geleer wat jy in jou skryfwerk of musiek toepas?  

Ja, ek het met honderde verskillende mense te doen gekry wat elkeen ’n unieke storie het. Dit gee ’n mens baie materiaal vir storielyne. Mense interesseer my geweldig baie en ek is van nature ’n baie nuuskierige mens. As TV- en radio-aanbieder het dit my baie gehelp om die ongewone vrae te vra. 

Jy het oor die jare in soveel kreatiewe velde gewerk. Watter van hierdie rolle gee jou die meeste vervulling?  

Radio sal altyd in my bloed bly. Jy’t net jou stem om mense se aandag te hou. Jy moet elke onderhoud anders benader om ’n spesiale invalshoek te kry, want dan kry jy die mooiste antwoord en stories uit mense. 

 

View this post on Instagram

 

A post shared by GROOTfm 90.5 (@grootfm90.5)

Wat beteken sukses vir jou in hierdie stadium van jou lewe en loopbaan?  

Sukses is om elke keer ’n nuwe album uit te bring of ’n nuwe boek, of ’n loodglaslamp klaar te maak. Solank ek mense kan inspireer en iets kan doen, groot of klein, om ’n bydrae tot hul lewe te kan maak, is my loopbaan en doel op die aarde ’n sukses. 

Moskonfyt is nou op alle digitale stromingsplatforms beskikbaar. 

Lees ook: Ontmoet Herman Bosman – ‘Wie word ’n miljoenêr’ se heel eerste miljoenêr!

The post Vyf-vinnige-vrae-Vrydag met Riaan Grobler, ’n meester van musiek en stories appeared first on rooi rose.

Ná meer as twee dekades in die musiekbedryf is Chereé terug in die kollig met die uitreiking van ’n splinternuwe enkelsnit, “Another day”, die eerste vrystelling vanaf haar langverwagte album met dieselfde naam.   

Haar jongste album is ’n nuwe hoofstuk in die sangeres se loopbaan, sowel as ’n persoonlike reis terug na haar liefde vir countrymusiek, ’n genre wat sy nog altyd koester.   

 “Hierdie album is regtig another day vir my. Dit is die begin van my reis terug na my wortels, terug na my eerste liefde vir musiek. Ek het my stem weer gevind, en ek het ’n storie om te vertel,” vertel sy. 

Foto: Silver Dune Photography

As kind in ’n musikale gesin, is sy aan country-legendes, soos Dolly Parton en Patsy Cline, sowel as Faith Hill en Deana Carter, blootgestel. Dit is hierdie verbintenis met die emosionele diepte en eenvoud van country-musiek wat sy graag met haar aanhangers wil deel.  

Oor die jare, het Chereé verskeie Afrikaanse treffers gehad, waaronder “30 dae in die somer” en “Prins van die geweste”, en dit was veral met haar album, Wilde Waters, wat sy haar stempel in die musiekbedryf afgedruk het deur Afrikaanse en country-invloede te kombineer.
 Tog, ten spyte van haar sukses, het sy altyd die roepstem van countrymusiek gevoel, ’n genre wat ’n konstante in haar lewe was. “My aanhoudende begeerte om countrymusiek te sing, het my nooit verlaat nie,” erken sy. “Dit was ’n droom wat nie wou vervaag nie, en nou is dit ’n droom wat waar geword het.”  

Volgens Chereé is “Another day” vir haar meer as net ’n liedjie – dis ’n opsomming van haar as kunstenaar. Die lied weerspieël die temas van liefde, verlies, hoop, en geloof – iets waarmee sy persoonlik kan vereenselwig.  

“Ek het die afgelope paar jaar my sangloopbaan op die agtergrond geskuif om op ander dinge te fokus en baie tyd saam met my kinders, Tally en Bella, deurgebring, maar ek het altyd gehoop en bid dat ek weer die geleentheid sou kry om goeie musiek te maak.” 

Nadat haar pad onlangs toevallig met dié van Sunette Bridges, ’n country-liefhebber met soortgelyke lewenservaring – gekruis het, het hulle besluit om hierdie projek saam aan te pak.
 

“Dit was ’n droom wat waar geword het om saam met Sunette te werk en om die eerste kunstenaar te wees wat by haar platemaatskappy, Rivers & Bridges Music, geteken te word,” deel sy. “Ek is ongelooflik trots dat dit die eerste album is wat deur ’n vrou in ons bedryf vervaardig is.”
  

Die eindresultaat is ’n versameling liedjies wat nie net die tradisionele klanke van countrymusiek vier nie, maar ook ’n moderne kinkel aan die genre bied. 

“Ek is verlief op die suiwerheid van countrymusiek,” sê sy. “Dit praat van familie, liefde, vreugde, hartseer, en genesing, en dit is die stories wat ek wil vertel.”  

Foto: Silver Dune Photography

Karlien Meiring het meer oor haar musikale terugkeer gaan uitvind. 

Wat hoop jy sal luisteraars ervaar wanneer hulle na jou nuwe album luister? 

Ek hoop dat elkeen wat na die liedjies luister iets daaruit kan neem en dat die woorde hulle sal raak en inspireer. Ons is storievertellers. Ons sing oor liefde, geluk, hartseer en hoop.  

Al die liedjies spreek dinge aan waarmee miljoene mense elke dag worstel en as musikant (ek) en liedjieskrywer (Sunette) het ons die voorreg om met mense se harte te praat. Dit is kragtig! Ek is bevoorreg dat ek my stemopnames in my eie ateljee kon doen sonder die druk van tyd en begrotings, so ek kon my hart uitsing om seker te maak dat ek net my beste gee. Ek en Sunette het ons hart en siel in hierdie projek gesit en ons hoop die luisteraars ervaar dit. 

Wat is dit van countrymusiek wat jou nog altyd so diep aangetrek het? 

Die eerste liedjie waarop ek verlief geraak het, is Patsy Cline se “Crazy”. Ek dink dit was haar diep, fluweelstem wat my aangegryp het, maar ook die rou emosie van die liedjie. Die stories wat countryliedjies vertel, is vir my so mooi. Dis nie net woorde of lirieke wat rym nie, dis regte mense se lewensverhale. Countrymusiek praat met my hart. Dis soos Koos du Plessis se lirieke, maar in Engels. 

Is jou dogters ook musikaal? Dink jy hulle het dalk jou en jou man se liefde vir musiek geërf? 

Albei ons dogters is musikaal en hulle het beslis hul talente by ons geërf! Musiek is in jou are en ek en Wynand het ’n ryk familiegeskiedenis vol musikante. Aan Wynand se kant is sy ma familie van Cupido, Alan Ladd en Koos van der Merwe, en my pa was ’n baskitaarspeler.  

Musiek is al deel van my en my gesinslewe vandat ek gebore is. Ons kinders het dieselfde lewe – daar is musiek oral in ons huis en lewe. Ons huis sing en dans en tot slaaptyd is daar nie ’n oomblik van stilte nie. Musiek is ’n baie spesiale gawe en soos my ma my altyd aangemoedig het om hierdie Godgegewe talent te gebruik, doen ek en Wynand dieselfde met ons kinders. Ek weet nie wat die toekoms vir hulle inhou en of dit ’n loopbaan in musiek sal wees nie, maar as dit is, sal ek hulle volkome ondersteun. 

Wat is vir jou die waardevolste lewenslesse wat jy graag aan jou dogters wil oordra? 

Die belangrikste les wat ek my kinders wil leer, is dat hulle nooit deur ander se opinies ontspoor moet word nie en om hul eie waarde te ken. En om ná aan God te leef sodat Hy hul paaie kan rig. As ouers het ons die grondslag gebou van hoe om ’n goeie mens te wees en altyd in die lig te wandel en ander mense met liefde en respek te hanteer, maar ons het hulle ook geleer dat daar miljoene mense in hierdie wêreld is en hulle nie almal kan gelukkig maak nie. Hulle moet voluit leef en altyd uniek bly! 

 

View this post on Instagram

 

A post shared by Chereé (@cheree.country)

Wanneer julle as gesin tyd saam deurbring, watter aktiwiteite geniet julle die meeste? 

Dit is vir ons gesin die lekkerste om net saam by die huis te wees. Op Sondae braai Wynand en ek en die meisiekinders hou ons besig met allerhande dinge terwyl die musiek lekker hard op die agtergrond speel. Ons kyk graag saam flieks met ons kinders knus op ons skoot, almal toe onder een kombers. Ek koester hierdie tye, want hulle word nou vinnig groot – hulle is al 11 en 13! Dis ook lekker dat hulle nou oud genoeg is om saam met ons na feeste en vertonings toe te gaan. Hulle kry die geleentheid om ons lewe op die pad te ervaar. Daardie tyd saam is kosbaar vir ons. 

“Another day” is nou beskikbaar op alle digitale stromingsplatforms. Kry dit hier. 

Lees ook: KYK: Mia le Roux se mooiste uitrustings by Mej. Heelal +hoe om vir haar te stem!

The post Vyf-vinnige-vrae-Vrydag met Chereé oor haar terugkeer na countrymusiek appeared first on rooi rose.

Die legendariese en geliefde sanger, musiekregisseur en “liedjieboer”, Anton Goosen, is terug in die kollig met ’n splinternuwe enkelsnit.

Bly by my, (my lief) – ’n gedig van Antjie Krog wat hy op sy besonderse manier vir die Woordfees getoonset het – is ’n liefdesliedjie in ’n, soos hy sê, “Afrikaanse sagte blues genre”.

“Ons moes vir die Woordfees se huldigingsprogram, Al om Antjie, twee van Antjie Krog se gedigte kies. Bly by my is een van haar bekendstes. Daar is ander deuntjies met dieselfde titel en dus het ek dit verander na Bly by my, (my lief), maar omdat dit egter nie ’n liriek is nie, het ek die koorgedeelte bygeskryf,” verduidelik Anton.

Die enkelsnit vorm deel van Anton se nuwe album, Sirkels, wat eersdaags uitgereik word. Die album, wat nege nuwe liedjies bevat – insluitend drie toonsettings en twee duette – is ’n luister-album wat ballades, stories, dans-, protes-, en rock-musiek insluit.

Anton, wat algemeen as die vader van Afrikaanse rock beskou word, is in 1946 in die Karoo gebore en het in Kroonstad grootgeword.

Oor die jare, het hy meer treffers op sy kerfstok as enige ander Suid-Afrikaner versamel en het al meer as 20 albums uitgereik; die musiek vir verskeie rolprente soos Die Laaste Tango, ’n Pawpaw vir my Darling en Siembamba geskryf; asook liedjies vir onder andere Laurika Rauch, Carike Keuzenkamp en Koos Kombuis neergepen.

Hy is tydens sy dekades-lange loopbaan as liedjieskrywer en sanger met verskeie toekennings vereer, o.a. Sari’s, Ghoemas, Geraas, Vonk, en dan SAMA-, Innibos-, die FAK-en Die Suid-Afrikaanse Akademie vir Kuns en Kultuur-toekennings vir sy lewenslange bydrae tot musiek. In 2023 is hy een van vyf kunstenaars wat in die South African Gallery of Legends ingehuldig is.

Anton Goosen: Liedjieboer, sy lewensverhaal wat deur die bekende joernalis Hanlie Retief neergepen is, is in 2020 deur NB-uitgewers uitgereik. Die filmvervaardiger Niel van Deventer werk tans aan ’n vier-episode dokumentêr oor Anton se loopbaan.

Wanneer hy nie besig is met sy musiek nie, geniet hy dit om tyd – en ’n glasie Kaapse rooiwyn – saam met sy vrou, Estie, en hul vier honde deur te bring; stappies op die strand, gesprekke met vriende; lees en om reekse op Netflix of Britbox te kyk.

Karlien Meiring het meer oor sy nuutste musikale meesterstuk gaan uitvind

Hoe hoop jy sal jou aanhangers op jou nuwe musiek reageer?

Ek hoop uiters positief! ’n Mens weet nie vooraf wat die reaksie op jou album gaan wees nie; dis maar in die hande van die “musiekgode”. Afrikaanse musiek het oor die afgelope vier dekades baie verander. Nuwe genres, formate en platforms waar musiek gestroom en afgelaai kan word, het bygekom.

Hoe benader jy die skep van nuwe musiek na so ’n lang en suksesvolle loopbaan? Vind jy dat jou proses oor die jare verander het?

In die begin was dit vir my baie makliker, want ek het my hele lewe voor my gehad waarin ek kon skep. Later het ek meestal my kreatiewe idees deur waarneming of navorsing gekry. Ek vind dat soos die jare aanrol, ek meer nasorg doen en stadiger (en hopenlik deegliker), werk.

Daar word dikwels na jou as die vader van Afrikaanse rock verwys. Hoe sien jy die evolusie van Afrikaanse musiek en waarheen dink jy is dit op pad?

Ja, ek het dit al raakgelees, dis als bloot toevallig en grootliks omdat Blommetjie gedenk aan my in rockformaat was. Ek onthou dat my eerste regisseur, Chris Kritzinger, aan die orkeslede in die ateljee die dag gesê het: “Think: Baby come back.” Dit is ’n liedjie van die Equals. En die res is nou geskiedenis. Ek was toe nog ’n musiekresensent by Beeld en het baie wyd na alle musiekgenres geluister. Dit het baie gehelp.

Afrikaanse musiek het sedert die Musiek en Liriek-revolusie in 1979 geweldig gegroei en vlamgevat. En dis ’n tuiste met vele kamers. En dis goed. Daar is ’n hele klomp nuwe, jong kunstenaars (en gevestigdes) wat die vlam van goeie nuwe Afrikaanse musiek hoog hou. Dis lekker om te sien; veral nou dat ons aanstaande jaar 100 jaar vier sedert Afrikaans ’n amptelike taal geword het.

Wat is die mees ongewone of onverwagte plek waar jy inspirasie vir ’n liedjie gekry het?

Dit gebeur gewoonlik op die ontydigste tye soos net voor ek êrens heen moet gaan of besig is om te bestuur, dit was veral moeilik in die dae voor klein bandopnemertjies en selfone. Die een wat ek die beste onthou en die moeilikste was, was toe ek een keer op die N1 van Johannesburg na Pretoria bestuur het en daar ’n wysie in my kop opgedaag het. Ek het niks by my gehad om dit mee vas te pen nie. Ek het dit die hele pad soontoe en terug in my kop herhaal tot ek by my studeerkamer was om daaraan te werk. Dit was eers twee dae later voltooi. Hierdie wysie is nou byeboerwa.

Wat motiveer jou om, selfs na al die jare, gehore met jou musiek en talent te betower?

Sjoe, dis ’n moeilike vraag. Ek lewe vir musiek – ek dink dis die motivering. Dis die vuur wat van binne brand: Soms is dit net ’n gloed, maar met inspirasie vlam dit op – soms selfs onbeheers, want soos Nietzsche gesê het “without music, life would be a mistake.”

KYK: Anton Goosen: Bly by my (my lief) – Amptelike musiekvideo

Die enkelsnit is nou op alle digitale stromingsplatforms beskikbaar. Laai dit hier af.

Lees ook: De Klerk Oelofse gesels met ons oor ‘Juffrou X’ en die impak van onderwysers

The post Vyf-vinnige-vrae-Vrydag met liedjieboer, Anton Goosen – oor sy nuwe musiek appeared first on rooi rose.

Posduif, die gewilde Afrikaanse musiekgroep, het weer ons land se radiogolwe laat vlam vat met die vrystelling van hul jongste enkelsnit en album, Brandstigter.

Die titelsnit is deur James Boland en Nick Jordaan geskryf, en bied ’n hedendaagse Bonnie en Clyde-vertelling wat die intensiteit van jong liefde en die opwinding van rebellie oproep.

“Dit is ’n Bonnie en Clyde-storie oor passie, jong liefde en om jouself in die oomblik van verlief wees te verloor,” verduidelik James. “Dit is daardie gevoel wanneer jy iemand ontmoet wat jou hele wêreld verander, daardie een mens wat die vuur in jou aansteek, jou brandstigter.”

Die enkelsnit is aanduidend van die aard van die res van die album – lewendig, energiek, passievol – en dit vang die groep se gevoel oor die album vas.

“Elkeen van ons leef met passie en gee alles. Ons het Brandstigter as die titelsnit en eerste enkelsnit gekies, want dit is ’n liedjie wat daardie gees vasvang: Een wat ons kliphard wil speel, en met ’n liefdesverhaal wat ons wil hê almal moet ervaar,” verduidelik James.

Hierdie splinternuwe album is deur Brendan Campbell vervaardig en spog met die groep se kenmerkende, aansteeklike melodieë en boeiende verhale van liefde en avontuur.

“Die album is ’n kombinasie van lewendige, energieke musiek wat stories vertel oor groot kuier, wilde liefde, passievol verlief wees en ’n voetfout. Dit is oor laatkuier, heelnag dans, vure, vriende en groot gaan. Dan is daar omgee, familie, jou hart se diepste geheime en liefde vir jou kinders. Dit is nege liedjies wat jou op ’n rit vat en elkeen is ’n storie – jy moet na almal luister om die volle verhaal te ervaar,” sluit James af.

Sedert hul debuut in 2018 met die treffer “Brandy Special”, het Posduif verskeie ander treffers vrygestel en is hulle deur Bok Radio as Groep van die Jaar en vir Liedjie van die Jaar benoem. Hul vorige album, Niks Vergelyk, het in 2022 die SAMA vir beste pop-album gewen.

Die groep bestaan uit James Boland (hoofsanger en kitaarspeler), Nick Jordaan (ritmekitaarspeler en sanger), Amiel Gopal (baskitaarspeler), Brendan Campbell (vervaardiger en hoofkitaarspeler) en Nick McCreadie op die dromme.

Karlien Meiring het meer oor die groep se jongste album by James gaan uitvind.

Jul vorige album het die SAMA vir Beste popalbum gewen. Hoe het jul klank en identiteit sedertdien ontwikkel?

Ons het ná die eerste album drie enkelsnitte uitgebring met ’n meer lewendige popklank. Ons het van ons styl gehou, maar wou meer bied – hierdie album is nader aan alternatiewe pop. Beide die lirieke en melodieë van ons liedjies is vir ons baie belangrik en ons is baie tevrede met die klank wat ons met Brandstigter geskep het.

Hoe hoop julle sal jul aanhangers op die nuwe album reageer?

Om musiek te skryf en ’n album uit te bring, is om ’n stukkie van jou siel te deel. Ons hoop natuurlik altyd dat mense van ons musiek sal hou, maar niks kom by die gevoel van mense wat saam dans en sing nie. Ek raak so opgewonde as ons liedjies se lirieke iets vir iemand beteken en hulle dit hul eie maak.

As Posduif se musiek ’n klankbaan vir enige fliek of TV-reeks kan wees, wat sou dit wees en hoekom?

Ons sê altyd as jy wil weet wie Posduif is, moet jy na minstens twee van ons liedjies luister. Van ons musiek is ideaal vir groot, laataandkuiers, maar ons het ook diep liedjies wat oor hartsake en familie gaan. Van ons musiek is sommer net lekker mal en pas by die fliek The Hangover, en dan pas die res van ons liedjies by iets soos Ted Lasso!

Is daar ’n spesifieke liedjie op die nuwe album wat spesiale betekenis vir julle inhou en wat is die storie daaragter?

Daar is drie liedjies wat baie spesiaal vir ons is. “Kaalvoet Kinders” vat my terug na my kinderdae toe ek groot drome gedroom het en die mooiste sonsaktonele op die plaas geniet het; “Geniet die dans” is baie na aan my hart, want dis vir my kinders geskryf en is my raad aan hulle vir hul lewe vorentoe en “Houer van jou geheim” praat met enigiemand wat al ooit alleen gevoel het – en verseker die luisteraar dat hulle geliefd is.

Behalwe musiek, wat is sommige van jul belangstellings of stokperdjies waaroor aanhangers dalk verbaas sal wees om te leer?

Ek is ook in sake en verruil elke nou en dan my geskeurde jeans en oorbelle vir ’n pak en das (en van die band-lede dink ek braai by verre die beste!).

Nick McCready speel vir ons tromme, maar is ook ’n gesoute saksofoonspeler en platejoggie. Hy vlieg een keer per jaar na Richard Branson se eiland om daar vir gaste te gaan DJ.

Nick Jordaan skryf liedjies vir ’n klomp ander kunstenaars in die bedryf en is mal oor padel speel.

BRANDSTIGTER is nou beskikbaar op alle digitale stromingsplatforms.

Kry dit hier: https://linktr.ee/brandstigter

Lees ook: Vyf-vinnige-vrae met Amalia Uys oor die aksiebelaaide Plan B-reeks

The post Vyf-vinnige-vrae-Vrydag met die musiekgroep Posduif oor hul nuwe album appeared first on rooi rose.

’n Dekade ná die vrystelling van sy deurbraaktreffer “Lig op die horison”, het hy pas sy vierde ateljee-album, “Die Vallei”, bekendgestel.

Joshua na die Reën oftewel Jacques de Villiers se jongste album beloof om luisteraars op ’n emosionele reis van selfontdekking en vernuwing te lei.

En in tipiese Joshua na die Reën-styl, is daar ’n baie spesiale boodskap agter sy jongste projek, wat hy as volg beskryf: “Die album is soos ’n staproete deur ’n pragtige vallei. Aan die begin, soos wat jy afstap na onder, laat jy die gejaagdheid van jou besige lewe agter. Wanneer jy onder kom, is jou gedagtes skoon en oop en is jy in ’n meditatiewe fase, waarin jy kan selfondersoek doen en die mooi rondom jou raaksien en waardeer. Dan pak jy die terugtog na bo aan met nuwe moed en energie vir dit wat voorlê.”

“Die Vallei” bestaan uit 18 oorspronklike snitte uit sy eie pen en is ’n uiteenlopende kombinasie van lekkerluister-popklanke, rustiger meditatiewe snitte en selfs elemente van R&B en alternatiewe musiek. Gideon Botes het die verwerking gedoen wat samewerkings met verskeie ander kunstenaars, soos Karlien van Jaarsveld en die Tuks Camarata-koor, insluit.

Omdat elke lied uit ’n baie persoonlike plek kom, is dit vir hom onmoontlik om ’n gunsteling te kies. Hy verklap wel dat “Stroom en rivier” en “Die Groot Gees van hemel en aarde” hom na aan die hart lê omdat dit in sy eie tuisateljee opgeneem is en klanke van sy kinders en voëltjies in die tuin vaagweg in die agtergrond gehoor kan word.

Buiten musiek, het Jacques ook verskeie opwindende projekte en samewerkings wat op sy horison wink. Dit sluit ’n hoofrol in die rolprent Reisigers in, wat volgende jaar verfilm word, ’n bewusmakingsveldtog oor die mens se verantwoordelikheid om die aarde op te pas en ’n klerereeks en toebehore saam met die handelsmerk NAVA in.

Foto: Hendri Skoll

Karlien Meiring het meer oor sy jongste musikale meesterstuk en die afgelope dekade in die musiekbedryf gaan uitvind.

Tien jaar in die bedryf is ’n groot mylpaal. Hoe sou jy jou reis en groei as kunstenaar gedurende hierdie tyd beskryf?

Daar was die afgelope tien jaar oomblikke van ware vreugde sowel as ware seer, en dis vreemd hoe daar ook mooi in dit wat moeilik was verweef is. Ek het pa van drie kinders geword, wat jou baie oor die lewe leer, onder meer hoe om jouself en dit wat jy dink vir jou belangrik is soms te laat gaan, net om iets mooiers aan die ander kant te vind. Ek het geleer dat seer twee keuses vir jou laat, en dis om die lewe minder mooi te sien óf om die mooi te gaan soek juis waar jou oë dit nie vind nie. Ek het geleer dat ’n mens se wêreld, maar is waar jou naaste mense is, waar hulle jou kan vashou en jý hulle en dat tyd dáár juis die meeste tel, mits dit gehaltetyd is. Ek het geleer dat almal nie soos ek hoef te dink nie, inteendeel, ek wil dit glad nie meer hê nie. Ek het geleer dat God dieselfde is deur al die eeue, maar dat ek Hom ontdek as ek laat gaan van wat kerke en godsdiens my leer van Hom. Ek het geleer dat my kinders my leer. Ek het die vrede van die lewe gevind in tye waar ek net kon sit en asemhaal, en mediteer. Ek het gesien hoe ons boksies ons inperk, en ek het ook gesien dat ons as mense soms net oorleef omdat ons dit kies. Ek het geleer dat my essensie iewers in eenvoud bestaan en dat ek my lewe so wil inrig om dit te beleef.

Hoe dink jy het jou musiek die afgelope dekade ontwikkel?

Ek dink ’n mens groei in die lewe as skrywer en musikant en belangrikste, as mens … en dit alles dra by tot ’n verdieping in dit wat jy kan skep. Ek is dankbaar vir alles wat ek in die afgelope paar jaar kon ervaar.

Foto: Hendri Skoll

As jy een liedjie van jou nuwe album moes kies wat jy glo jou artistieke reis oor die afgelope tien jaar verteenwoordig, watter een sou dit wees, en hoekom?

“Stroom en Rivier.” Die afgelope paar jaar het baie gehandel oor die meegee van my eie gedagtes en gewoontes wat jou in ’n groef laat verval. Die lirieke van die lied begin met: “Raak ’n mens net eendag wakker en weet, wat jy jou al jare lank aan meet, is jy bereid om nou op te gee. En te vloei in riviere.” ’n Rivier vloei, anders as ’n kanaal, deur klowe en valleie waar mensehande nie betrokke was by die skep daarvan nie. Hy kronkel, hy gee lewe aan dit wat om hom is, en hy is vry, maar al is hy vry, heg hy ook waarde aan die dinge om en in hom. Dis my begeerte.

Hoe hoop jy sal jou aanhangers op die nuwe album reageer?

Ek hoop hulle sal my tevredenheid met die lewe kan hoor, en dat dit ook ’n rustigheid in hul harte sal kan los om weer asem te haal. Mense het tydens Covid-19 baie mure rondom hulle gebou en kan nie meer onthou waaroor die lewe regtig gaan nie en ek wil hulle herinner aan wat belangrik is. ’n Groot deel van my skryfwerk op hierdie album is ook geïnspireer deur ons besef dat ons dít wat ons in hierdie lewe het, moet oppas en meer bewustelik moet lewe om die aarde te bewaar. God het dit immers vir ons gegee om na ons te kyk, en ons kan van ons kant af ook dieselfde doen.

As jou musiek ’n klankbaan vir enige fliek of TV-reeks kan wees, wat sou dit wees?

Enige National Geographic-program wat oor die mooi in ons wêreld handel.

By My, die eerste enkelsnitvrystelling en musiekvideo vanaf sy nuwe album, is nou beskikbaar. “Die Vallei” sal vanaf 6 Oktober 2023 op alle digitale stromingsplatforms beskikbaar wees.

KYK: Joshua na die Reën – By My

Lees ook: Vyf-vinnige-vrae-Vrydag met Vanes-Marié du Toit oor die nuwe rugbyreis-reeks, In Frans, ja!

The post Vyf-vinnige-vrae-Vrydag met Joshua na die Reën – oor sy nuwe album appeared first on rooi rose.

Die musikante en lewensmaats Esté en Lourens Rabe, wat vroeër as die Bottomless Coffee Band bekend gestaan het, het as studente op Stellenbosch ontmoet. Lourens was op pad om ’n finansiële ontleder te word en Esté ’n aktrise. “Ons het gou geleer dat al twee van ons van jongs af eintlik droom om musiek te maak, dit was dié een ding waarmee ons al twee sonder twyfel kon saamstem dat dit ons lewenspassie is. Die ding wat jy sal doen en aanhou doen, selfs al gaan dit nêrens nie en jy maak geen geld nie,” sê Esté.

Die paar het in 2013 getrou en al twee het begin werk aan hul onderskeie loopbane terwyl hulle saam musiek in hul vrye tyd gemaak het. Kort voor lank het die navrae vir optredes egter meer geraak as wat hul verlofdae toegelaat het en hulle het toe besluit om die kantoor vir die verhoog te verruil.

Hulle is vanjaar al tien jaar getroud, sewe jaar voltyds in die musiekbedryf en hulle het onlangs ’n splinternuwe album Prediker uitgebring.

“Jare gelede het musikante hul tyd gevat om hul musiek in meesterstukke te omskep en dit met sorg aan hul gehoor te oorhandig – ons wou weer voel hoe dit gevoel het,” sê Lourens. “Dis al omtrent vyf jaar wat ons aan hierdie album werk en skryf, en ons voel dit is ’n samesnoering van alles wat ons was, is en wat ons geword het. Ons opwinding om dit aan die wêreld te gee sodat elkeen dit hul eie kan maak, is oorweldigend,” voeg Esté by.

Die album Prediker bestaan uit 16 oorspronklike Afrikaanse liedjies.

Oor een van dié nuwe enkelsnitte “Oos Wes Tuis Bes”, bring RAAF juis hulde aan die aanhangers wie vir hulle, te midde van lang toere en baie ure op die pad, hul ware tuiste geword het. RAAF speel byna 150 konserte jaarliks, met byna 80 000 km per jaar op die pad tussen toere. Vir hulle is dit juis die lewe op die pad wat hul loopbaan die moeite werd maak.

Meer oor RAAF:

RAAF is die Afrikaanse betekenis van hul familienaam, Rabe. Vandat hulle in 2013 getrou het, het hulle reeds daaraan begin dink dat dit slim sal wees om die naam van die band meer tuis te bring. Hul studentedae was verby en hul musiekloopbaan het ernstig vlerke begin kry, maar die lewe is besig en tyd vlieg, en voor hulle weet was dit 2020. Die inperkingstyd was vir dié twee ’n goeie tyd vir refleksie en skryf. Dis ook toe hulle navorsing oor die betekenis van hulle van, Rabe, begin doen het. Hulle lees toe dat ’n raaf ’n boodskappervoël is, die grootste in die songbird-familie; dat hulle een maat vir ’n leeftyd kies; en dat hulle territoriaal is, kan speel, kan leer en kan pret hê.

Hierdie beskrywing het hulle laat besef dat hul familienaam eintlik nog altyd beskryf wat hulle as ’n loopbaan doen en die perfekte naam is om hierdie reis tuis te bring. Só het die Bottomless Coffee Band RAAF geword.

Karlien Meiring het meer oor die musiekduo se reis tot nou gaan uitvind.

Hoe het julle musiek ontwikkel sedert jul vroeë dae as ’n band?

As ’n Stellenbosch studente-band, was ons in die hart van wynfeeste en wynland-partytjies. Aanvanklik was ons klank redelik akoesties en folky. As jy egter eg aan jouself as kunstenaar is, sal jy aanhou ontwikkel. Ons en ons musiek het oor die jare meer volwasse geraak. Daar kom ’n punt wat jy besef “hierdie is nou my werk en ek het ’n verantwoordelikheid teenoor myself en die mense vir wie ek skryf.” Dit laat jou vinnig alles baie ernstig opneem en ons is nog altyd getrou daaraan om die ruimte te skep waarin die heel beste weergawe van onsself en ons werk kan wortel skiet en groei.

Ons het reeds van die eerste dae geweet waarvoor ons staan en hoekom ons musiek maak, maar dit vat lank om jou eie klank en stem te vind. Dis ’n kombinasie van alles waaraan ons blootgestel is en is uiteraard ook ’n samevoeging van dit waarin ’n mens sterk is; my teateragtergrond met ’n fokus op lirieke en woorde, en Lourens se rock ’n roll-agtergrond met ’n fokus op musikaliteit en melodieë.

Jy moet ook eers ’n paar jaar se lewensondervinding hê om oor onderwerpe te skryf waarby diverse gehore werklik kan aanklank vind.

Ons het ook stelselmatig meer in Afrikaans begin werk. Dit is ons moedertaal, so ons wou baie verantwoordelik daarmee omgaan – daar is genoeg oppervlakkige Afrikaans daar buite – ons wou iets met diepte en kreatiwiteit skep. Ons voel Afrikaans verdien dit.

Buiten dit, het ons vermaak begin verstaan en wil ons met elke vertoning iets vir mense gee wat hulle vir altyd in hulle harte kan bêre – ’n ervaring. By ons konserte beleef jy dus elke emosie en so bietjie magic.

 

View this post on Instagram

 

A post shared by RAAF (@raaf_musiek)

Kan julle ons deur jul liedjieskryf en kreatiewe proses lei? Hoe werk julle saam om musiek te skep?

Kreatiwiteit is mos maar ’n muse. Jy kan dit najaag, maar jy kan dit nooit werklik vang nie. Dit is soms lukraak en ander kere baie gestruktureerd. Soms sal ons half-klaar idees na mekaar toe bring en dit saam klaar skryf, ander kere sal ons saam aan idees begin werk en dit apart gaan klaar maak. Ons werk baie lank daaraan om ons lirieke en melodieë so goed as moontlik te kry vir wat die betrokke liedjie nodig het. Ons herskryf die lirieke soms drie of vier keer om seker te maak dit sê wat dit moet.

In die studio vat Lourens voor – hy is ’n baie natuurlike vervaardiger met ’n uitstekende oor. Boonop kan hy amper enige instrument speel, so amper elke instrument wat ’n mens hoor is deur hom gespeel. Ek speel gewoonlik die klavier-dele; en dan sing ons saam.

Ons en ons RAAF-span werk dan saam aan foto’s, kunswerke en musiekvideo-konsepte vir elke liedjie. Elke produksiedag eindig gewoonlik met ’n wyn-drink sessie. Ons is maar feestelike wesens, ons twee. Altyd daarop uit om alles te vier.

Wie is van jul grootste musikale invloede?

Ons luister baie breed en ons wil graag ’n waardering vir elke era en genre hê. Ons word baie deur rock ‘n roll asook teatrale, melodiese musiek beïnvloed. Ons vind dus baie aanklank by Queen, Dave Matthews Band, Jimi Hendrix, Bob Dylan, Johnny Cash, Elton John, Sting, Johnny Clegg, Paul Simon, die lys kan lank raak – nie net noodwendig vir hul musiek nie, maar ook vir dit waarvoor hulle as musikante gestaan het of steeds doen.

Hoe handhaaf julle ’n gesonde balans tussen jul musiekloopbaan en persoonlike verhouding?

Ek dink dit is belangrik om gesonde grense te stel wanneer ’n mens as ’n paartjie saamwerk. Ons praat nie ná vyf uur die aand oor werk nie. Ons probeer gereeld date nights te hou om by mekaar uit te kom. In ons privaat lewe is ons redelik happy go lucky en ons probeer om nie die lewe te ernstig op te neem nie.

Daarenteen is ons as kunstenaars baie gedrewe en hiper-gefokus. Ons benader dit soos enige ander korporatiewe werk. Ons staan vroeg in die oggende op en begin werk. Wat ons doen as RAAF is nie net vir onsself is nie, maar ook vir die luisteraars. Ons voel verantwoordelikheid teenoor die mense wat bereid is om geld te betaal om ons musiek te luister en vertonings by te woon.

Ons het wel geleer dat die avontuur meer belangrik as die eindbestemming is. Ons moet leer om soms te stop en die uitsig te geniet. Hou op jou mure hoër bou en maak jou tafel langer; die lewe is mooier met meer mense daarin. Dit is maar eintlik ook die boodskap van ons musiek.

As jul musiek ’n klankbaan vir enige rolprent of TV-program kan wees, wat sou dit wees en hoekom?

Genade … RAAF dek nogal diverse genres, so miskien ’n aksie-avontuurfliek soos Top Gun. Ek wil in my binneste baie graag ’n vegvlieënier geword het – só as ek nie dit kan doen nie, kan ek seker die klankbaan verskaf!

Lees ook: Vyf-vinnige-vrae-Vrydag met Wynand Strydom oor sy jongste enkelsnitte

The post Vyf-vinnige-vrae-Vrydag met die musiekgroep RAAF appeared first on rooi rose.

Nuwe insig kom deur waarneming en nie met redenasies nie. Valiant Swart het deur die jare juis só tot ’n nuwe verstaan van die lewe gekom. Met ’n loopbaan wat strek vanaf 1988 en talle kilometers op die pad, het Valiant Swart al die kante van die lewe gesien. Sy nuwe album, Rondry, Fliek en die Buitelewe, is ’n versameling karaktersketse wat met die strewe na vryheid deurspek is.

Die inspirasie vir die album is jare se waarneming van mense en plekke. Hy verduidelik dat dié versameling die lewe van alle kante benader. Party temas raak aan die strewe na vryheid, geluk en vervulling, terwyl ander die moeiliker tye in die lewe ondersoek.

Met Rondry, Fliek en die Buitelewe bly Valiant (wat bekend is vir sy rock-, country- en bluesmusiek) getrou aan sy musiekstyl en voeg hy nuwe liedere tot sy repertoire wat tuis sal wees op die langpad, sowel as om ’n kampvuur.

Valiant, wat deur die jare groot bekendheid verwerf het met liedjies soos “Eyeshadow”, “Kleinmond koebaai”, “Jakarandastrate” en “Liefde by die dam” verduidelik dat sy grootste inspirasie vir musiek van sy pa kom. Sy liefde vir lirieke is te danke aan sy ma wat by hom ’n liefde vir die geskrewe woord gekweek het. Dis egter sy vrou, Lanelle, wat hom daagliks aanspoor om na meer as 30 jaar steeds doen waarvoor hy lief is.

Vroeër in sy lewe, terwyl hy in Sunnyside, Pretoria, gewoon het, het Valiant se paaie met dié van Koos Kombuis gekruis. Hy vertel dat hy in daardie stadium reeds ’n groot aanhanger van Koos se musiek en gedigte was.

Koos het as Valiant se mentor opgetree, hom onder sy vlerk geneem en as sy kitaarspeler aangestel.

Met die verloop van tyd het Valiant sy eie stem begin vind en na afloop van sy diensplig het hy met ’n hele arsenaal nuwe liedjies terug Stellenbosch toe gegaan. Saam met ’n skoolmaat en ’n paar musiekvriende het hulle die Valiant Swart Band gestig. Dit was die begin van ’n loopbaan wat vir Valiant om Suid-Afrika heen sou neem.

Foto: Andree Frates Photography

Karlien Meiring het meer oor sy jongste album gaan uitvind.

Hoe het jou klank sedert jou laaste album ontwikkel?

Die laaste album, Nagrit, is sewe jaar gelede uitgereik. Ek het nie juis veel verander aan die klank nie. Met die voorafgaande 17 albums is daar ’n spesifieke klank gevestig wat vir my styl werk; so ’n blues-country-rock-gevoel.

Die musiek kan vanuit ’n musikale oogpunt as bittersoet beskryf word, maar steeds opgeruimd. Die musiek is vrolik, maar met tye melankolies – eg aan goeie rock-en-roll- musiek.

Wat is die storie agter die album se titel?

Toe ek ’n laitie was, het ons gereeld tydens skoolvakansies by my ouma en oupa op Beaufort-Wes gaan kuier. My tannies (destyds tieners en jong vroue) het altyd daardie fotoverhaalboekies gekoop wat ’n mens in die vroeë jare sewentig gekry het – dit was nog voor televisie – en wanneer ek verveeld was, het ek dan maar die boekies deurgelees. Die laaste klompie bladsye was die opwindendste: die Hoekie vir Eensames (basies die Tinder van destyds). Daar was altyd ’n beehive-aster van iewers op ’n saai plattelandse dorp, uitgehonger vir geselskap, met ’n lysie van kenmerke waaroor ’n geskikte manlike kandidaat sou moes beskik. Dit het my destyds altyd opgeval hoe baie van die vroue hul gunsteling-tydverdryf as “rondry, fliek, en die buitelewe” aangedui het. Die frase het op die een of ander manier in my kop vasgesteek.

Ek wonder of een van my tannies ooit die pen opgeneem het …

Wat is jou gunstelingsnit op die nuwe album?

Sjoe, dis soos om tussen ’n mens se kinders te moet kies. Ek is mal oor elkeen van die liedjies – elkeen het sy plek en funksie op die album. Die afsonderlike musikale elemente en narratiewe vul mekaar aan om ’n geheelbeeld te vorm.

Kan jy ons deur die kreatiewe proses vir hierdie album lei?

Dit begin altyd by ’n idee vir ’n liriek en ’n melodie – en dan begin die foltering! Dit neem soms maande, selfs jare, om onverwags op ’n frase of melodie af te kom wat ’n liedjie laat ontsluit. Wanneer jy die melodie en die “storie” en die “prentjie” het, begin die uitbou van die instrumentasie – die eintlike musikale komponent – totdat jy ’n sintese tussen al die elemente bereik – en voila!

Klink maklik, nè? Wel, dis soms louter hel.

Wie is jou droomkunstenaar om ’n duet mee te sing?

Hmm … wie weet? Miskien wag daar ’n verrassing net om die draai …

Rondry, fliek en die buitelewe is op alle digitale platforms beskikbaar.

Lees ook: Mzansi-jeugkoor maak geskiedenis op America’s Got Talent

The post Vyf-vinnige-vrae-Vrydag met Valiant Swart – oor sy nuwe album appeared first on rooi rose.

Dis sy tweede vollengte album binne twee jaar en beloof om net so introspektief soos sy eerste aanbod, Sangoma Sandilands & Jou Pa se Posse – Maanskyn te wees.

Volgens Sandilands was musiek ’n liefde lank voor hy begin toneelspeel het. “Dit was moontlik die eerste vreugde in abstraksie wat ek as mens kon beleef. Dis miskien vanweë hierdie ‘liefde’ dat dit my omtrent ’n halwe leeftyd gevat het om by die beoefening en aanbieding daarvan uit te kom.”

Die album word 1 Mei bekend gestel en bevat temas van protes, odes, hartstog, twyfel, metafisika, geskiedenis, gatvolheid, behoud, verganklikheid, vriendskap en menswees. “Dis die inklusiefste, mees universele album wat ek moontlik kon maak terwyl dit terselfdertyd ’n onmiskenbare aanvaarding is van hoe my bakkies oor tyd vervorm het. Dit is vir man, vrou, kind en brak en dit sêvra bloot: “Hier is ons nou. Wat nou?”” sê hy.

Allegaarkie vir ’n Askeet gee krediet aan invloede soos CJ Langenhoven, NP Van Wyk Louw, Ingrid Jonker, Koos Kombuis, Anton Goosen, Bob Dylan, Gert Vlok Nel, Jan Blohm, Johnnie Cope en Tennessee Whiskey.

Sandilands sê die album is ’n samewerkingsproduk. Aanhangers sal Tarryn Lamb, Gian Groen, Qadasi & Maqhinga, Hanna de Wet, Lelethu Zulu en Sibongiseni Wani se stemme hoor. Daar is snare, strykinstrumente, blaasinstrumente, klawers, dromme en tromme, ’n trompie, elektronika en selfs ’n saag wat tot die klankverskeidenheid bydra.

Karlien Meiring het meer oor sy jongste musikale meesterstuk gaan uitvind.

Hoe het jou klank sedert jou laaste album ontwikkel?

Dis ’n enorme vraag. Daar is net soveel nuanses waarop ek kan uitbrei, maar ek sou sê dat hierdie album “doelbewus” was, waar die vorige een amper “terloops” was. Die aanbod op Allegaarkie vir ’n Askeet is ryk in die sin dat dit al die elemente van vorige werke wat ek op Sangoma Sandilands & Jou Pa se Posse, Die Groot 5 en Die Groot Niks, wat goed gewerk het, weer ingespan het. Soos die musikante, die veelvuldige gebruik van inheemse tale en so meer. Die nuwe album se lirieke is baie getrou aan my eie lewenservaring, dis persoonliker. Theo Crous het die stem droër en rouer gemeng. Die lirieke is so uiteenlopend soos die instrumente wat gebruik is (waar ’n mens van ’n saag en trompie kan hoor!) Ek glo ek sal dié tipe album net een keer só kon maak. Ons het onsself so ver gedruk as wat menslik moontlik was binne die beskikbare tyd was.

Wat is jou gunstelingsnit op die nuwe album en hoekom?

Dis ’n onregverdige vraag, maar ek sal probeer. Uhm, nope. Kan nie. Ek kan bloot nie. Hulle is almal my kinders. Die een waarvoor ek miskien effens minder voel, is die enkel-dekweergawe van Bob Dylan se “The Times They Are A’Changin’”. Die ander 13 snitte kom almal uit my pen. Daar is natuurlik altyd die vraag of ’n mens werklik elke lied tot sy reg laat kom het? Ek dink elke kunstenaar voel in ’n stadium só. Dis baie makliker om uit te wys waarvan jy nie hou nie, of wat jy moontlik sou heroorweeg. Ek is trots op elke snit op die album. Hulle staan elkeen op hul eie bene, skewe neuse en al.

Kan jy ons deur die kreatiewe proses van hierdie album lei?

Eerstens het ek weer saam met Theo Crous gewerk, net soos met die vorige werke. Ons het probeer om alle selfopgelegde of sistemiese inhibisies sommer van meet af aan in die asblik te gooi. Meeste van die werke is in die buiteland geskryf terwyl ek met projekte in Meksiko, Nieu-Seeland, Australië en Amerika besig was. So daar’s natuurlik daardie “andersheid”…’n tipe universele weerspieëling.

Ek vat die opnames wat ek sommer op my foontjie gemaak het ateljee toe, en ons neem dan “guide tracks” op. Dis net ek en my stem met ’n kitaar of my ukelele. Dan stuur ons dit vir die musikante wat ons graag wil gebruik. Van hulle het ateljee toe gekom, ander het verspreid in ander ateljees gewerk en vir ons hul aanbod deurgestuur. Qadasi en Maqhinga vanuit KwaZulu-Natal, Shannon Mowday vanuit Noorweë, Mauritz Lotz vanuit Johannesburg. Moenie van loadshedding vergeet nie.

Dis ’n lekker komplekse legkaart om te bou. As al die instrumente in plek is, voeg ons die vokale by. My stem, sowel as die ander stemme wat ’n mens op die album hoor. Ek noem graag ’n paar name: Tarryn Lamb, Hanna de Wet, Gian Groen, Qadasi & Maqhinga, Lelethu Zulu en Sibongiseni Wani.

Dan pleeg Theo sy toorkuns met die klankvermenging en ander geheime speserye. Laastens stuur ons die gemengde snitte na Rogan Kelsey om “meestersnitte” van te maak. Dis min of meer om te sorg dat die totale album samehangend in dieselfde klanklandskap woon.

Dis nie eers die einde nie. Die kreatiewe proses? Ek werk al 48 jaar daaraan.

Hoe het jou ervarings as akteur jou werk as musikant beïnvloed, en omgekeerd?

Ritme kom eerste. Elke mens begin mos met ’n hartklop. Ek dink akteurswerk help omdat ek die liedjies “vertolk” eerder as om dit bloot te sing. Ek vertel myself maar dis hoekom die mense daarvan hou, omdat ek hulle ietsie laat voel. My stem het beperkings, maar ek het geleer om dit min of meer aan te wend om die luisteraar se aandag te kry.

Ek dink my ervarings as akteur en die roetes waarna dit my gelei het, kom deur in die lirieke en die emosionele reikwydte wat in die album vervat is. Elke karakter wat ek al gespeel het, en daar was baie, het mos sy unieke persoonlikheid en emosionele begrip. Dit help om die menslike kondisie beter te verstaan. Seg ek.

Hoe die musiek my akteurswese beïnvloed het, was nog altyd ’n implisiete gegewe. Ek dink enige vertolker wat sy sout werd is,  behoort musikale aanvoeling te hê. Veral om te weet waar jy in die ensemble pas. As jou werk bloot is om die piccolo (klein dwarsfluit) te speel, sorg dat jy op tyd is en speel dit met oorgawe. ’n Cow bell kan miskien te veel wees.

Hoe hoop jy sal jou aanhangers op die nuwe album reageer?

Ek hoop my totale oeuvre raak stapelvoedsel. Dit kan moontlik die wêreld red. Whahahaha! Daar’s mos nou net een antwoord vir dié tipe vraag. Ek hoop mense luister daarna en voel ná die luister daarvan ietwat beter. Iets soos dit.

Ek wil egter noem dat die aanbod die album is, nie die onderskeie snitte nie. Daar’s ’n rede hoekom ek snit een plaas as snit een en snit 14 as snit 14. Die album is ’n reis. Sit die ligte af, gooi ’n knerts, sit gemaklik. Kom saam.

Kry die album op 1 Mei hier:  https://linktr.ee/neilsandilands

Lees ook:Vyf-vinnige-vrae-Vrydag met Neels van Jaarsveld – oor sy nuwe leefstylprogram, Op reis met my beste vriend

The post Vyf-vinnige-vrae-Vrydag met Neil Sandilands – oor sy nuwe album appeared first on rooi rose.