Saamgestel deur Elna Rossouw.  

Die eilandbruid se sluier deur Elize Parker

Genre: Fiksie, Inspirasie

Prys R300

Die eilandbruid se sluier is die eerste boek in Elize Parker se nuwe Orka-reeks oor Chrisanne Alberts, ’n grootwithaai-navorser wat ná baie jare terugkeer na die afgeleë dorpie Albatroshoek.

Chrisanne het haar hele lewe gewerk om die bitterheid van die verlede en verwerping agter te laat. As navorser is sy gewoond aan die wêreld van die wetenskap, maar sy dra swaar aan die verlies van mense naby haar en die skuld wat daarmee saamgaan.

Terug op Albatroshoek raak sy betrokke by kleintydvriendinne, die dorp se geheime, ’n moordwalvis en ’n eilandkluisenaar. Sy moet al hoe meer gewigtige keuses maak.

• Uitgegee deur LUCA, ’n druknaam van LAPA Uitgewers

Helene de Kock Inspirasie Omnibus: Kruispad vir Kara & Engel op die drumpel

Genre: Fiksie, Inspirasie

Prys R340

Helene de Kock se eerste inspirasie-omnibus bevat twee verhale: Kruispad vir Kara en Engel op die drumpel.

In Kruispad vir Kara het Kara Geertse, Tukkies se skatryk joolprinses, die wêreld aan haar voete. Dan sterf haar pa en sy en haar ma word sonder ’n sent agtergelaat. In dié liefdesverhaal kom Kara by ’n kruispad en sy is sielsalleen. Wat, of wie, gaan haar help om staande te bly?

In Engel op die drumpel begin Marli Jooste haar nuwe lewe op kampus, maar sy word heen en weer geslinger tussen dit wat sy nog altyd geglo het en nuwe, opwindende dinge. Totdat sy haar op ’n dag voor ’n deur bevind waar ’n engel op die drumpel huiwer − ’n storie van liefde en die hoop wat nooit beskaam nie.

• Uitgegee deur LUX VERBI, ’n druknaam van Jonathan Ball Uitgewers

Innie skylte vannie Jirre: Griekwapsalms en ander gedigte deur Hans du Plessis

Genre: Christelik

Prys R260

Om Afrikaans se 100-jaar-viering as amptelike landstaal te gedenk, is Innie skylte vannie Jirre − die ontslape prof Hans du Plessis se verwerkings van bekende Psalms en ander Bybelverse in Griekwa-Afrikaans – einde verlede jaar heruitgegee.

Met dié bundel se eerste verskyning in 2001 is daar meer as 50 000 eksemplare verkoop en die boek is ook daardie jaar deur die Christelike Boekhandelvereniging as die beste Christelike boek aangewys. Oor jare het die verkope na 100 000 opgeskiet.

Prof Hans het die boek aan Christo van Rensburg wat hom “aan die Afrikaans van die Griekwas voorgestel het, en aan hulle wat Afrikaans onder die kameeldoringse (stet) kan optel”, opgedra. Die sanger Randall Wicomb het ook verskeie van die gedigte getoonset en opgevoer.

• LAPA Uitgewers

Wat lees Deon Meyer?

As jy nuuskierig is oor die boeke wat op Deon Meyer se bedkassie lê, lees ons boekerubriek in April se rooi rose wat nou te koop is. Dié meester-misdaadskrywer vertel ook wat hy glad nie lees … en verklap so iets van die saak wat Bennie Griessel en Vaughn Cupido in Skorpio moet oplos!

Lees ook: 10 redes waarom jy rooi rose se April-uitgawe móét lees!

The post Nuut op die boekrak appeared first on rooi rose.

Saamgestel deur Elna Rossouw.    

Vier seisoene kind deur Wilna Adriaanse

Wilna Adriaanse (Foto: Verskaf)

Genre: Liefdesverhaal

Prys R310

Die woord “weduwee” is ’n verdrietige woord, ’n toestand waarmee sy haarself met moeite vereenselwig. Maar hier waar Cato in die vliegtuig sit, is dit ongelukkig haar werklikheid. Haar man is dood, skaars drie jaar ná hul troue. Sy is op pad Stellenbosch toe waar haar ondersteuningstelsel wag. Sy moet ook die Big Pink-teaterrestaurant oorneem. Iewers tussen die tyding van die motorongeluk, die blyke van waardering, die roudiens en die werklikheid van ’n leë plek langs haar in die bed, het sy haarself verloor.

• Dié boek is ’n herdruk van Vier seisoene kind wat aanvanklik in 2010 verskyn het. Uitgegee deur Tafelberg.

Die avonture van Helga Roets deur Riaan Grobler

Riaan Grobler (Foto: Verskaf)

Genre: Roman

Prys R270

Helga Roets is aan die verkeerde kant van 80, maar jy kan haar deur ’n ring trek. Sy woon nou al vyf jaar by Silwerhare-aftreeoord in Pretoria en hoewel die aanpassing swaar was, voel sy nou tuis. Sy het darem nog haar motortjie waarmee sy ry. Dit kom dus as ’n skok wanneer die oogarts makulêre degenerasie in albei haar oë diagnoseer. En vandeesweek is hoeka so ’n bedrywige week: twee begrafnisse, en ’n troue in die Paarl. Ten spyte van haar kinders se teenkanting, glip sy suutjies by die aftreeoord uit om haar reisavontuur te begin. Maar wie wag onder die lamppaal? Niemand anders nie as Stefaans de Wet, so ewe van plan om haar op haar tog te vergesel – net omdat sy nie mooi kan sien nie!

• Uitgegee deur Human & Rousseau

Ter wille van deur Madelie Human

Madelie Human (Foto: Verskaf)

Genre: Fiksie (Inspirasie)

Prys R300

Die man met wie Danika dolgelukkig was, ontaard in ’n vreemdeling. Hy rand haar aan, sy verloor haar baba en jare later worstel sy steeds hiermee. Sy doen vrywillige werk by die neonatale afdeling van ’n hospitaal om die honger na ’n kind te stil. Malan verloor sy swanger vrou in ’n motorongeluk. Die medici kon net hul tweelingbabas red. Hy sien egter vir Danika raak en vra haar om hom met die versorging van sy babas te help. Sy verloor haar hart op hulle en toe Malan se skoonouers dreig om voogdyskap oor die kinders te verkry, stel Malan se prokureursvriend ’n gerieflikheidshuwelik ter wille van die kinders voor. Maar Danika sukkel om weer ’n man in haar hart toe te laat, en Malan voel dat hy ontrou aan sy oorlede vrou is. Kan Danika en Malan van hul verledes ontsnap?

• Uitgegee deur Luca

Wen ’n paar rillers!

Drie gelukkige lesers kan elk ’n geskenkpak van Marieta Carrick se twee boeke met die komplimente van Queillerie, ’n druknaam van Jonathan Ball Uitgewers wen. Met Bloed van ’n vlinder en die voorverhaal, Waar bloed kruip, wat nou weer heruitgegee is, gaan jy dalk min slaap kry.  

• Marieta neem ook einde April aan die Clarens Kunstefees deel. Op Saterdag 25 April gesels sy met Leon van Nierop (self ’n meester rillerskrywer, veral met sy jongste boek Die volmaakte moord) oor hoe sy vreemde, bloedstollende gebeure beplan. Dibi Breytenbach (Heks) sluit by dié krimi-skrywers aan. Kry jou kaartjies hier.

Om in te skryf, voltooi die onderstaande vorm:

*Slegs een inskrywing per persoon    

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Sluitingsdatum: 10 April 2026

Lees ook: Wanneer Ma wil skei en Ouma intrek: Skreeusnaakse chaos wag in Mevrou Fourie & Kie

The post Nuut op die boekrak + Drie gelukkige lesers kan elk ’n geskenkpak van Marieta Carrick se boeke WEN! appeared first on rooi rose.

Saamgestel deur Elna Rossouw.  

Sewe keer sondig saamgestel deur Stefaans Coetzee en Anschen Conradie

Volgens oorlewering bestaan daar sewe dodelike sondes waaruit alle ander onheilighede voortspruit: hoogmoed, gierigheid, wellus, afguns, vraatsug, toorn, en luiheid. In Sewe keer sondig (Naledi, R260) het 44 skrywers twee-twee saamgewerk en ’n kortverhaal geskryf wat minstens een van dié sondes met ’n speur- of spanningselement inkleur.

Stefaans Coetzee (hy en Anschen Conradie het die bundel saamgestel) skryf in die voorwoord “hy’t gewonder wat sal gebeur as ’n krimi- en Romanza-skrywer saam aan een verhaal skryf. Skryf die een die bloedtonele en die ander een die nat soene? Gaan die karakters soos Tom Cruise en Cindy Crawford lyk? Bedags ondersoek hulle moorde en saans … sit hulle voor die TV. Sonder ’n draad klere. Of nie?”

Goed wat gebeur het met mense op plekke deur Anna-Bet Stemmet

Anna-Bet Stemmet (Foto: Verskaf)

Anna-Bet Stemmet se debuut word op die agterplat as “klein stukkies doodgewone heiligdom tussen die hustle en swoeg” beskryf.  Die musikant Hunter Kennedy sê: “Met ’n oog vir detail en ’n tong in die kies vertel Anna-Bet van grootmensskap, braaibroodjies, familie-erfstukke, middernagtelike WhatsApps en hoenders wat beter ouers is as jy.”

Anna-Bet vertel: “Dit is ’n spul stories wat ek teëgekom het terwyl ek die kraaines van my twintigs probeer ontknoop en die daaropvolgende fees van my dertigs geniet het. Daar is baie gewigtige literatuur daarbuite. Ek skryf myne doelbewus as ’n alternatief daarvoor. Dis ’n skeppie sorbet vir die siel. Iets om jou gemoed af te koel wanneer alles te intens voel. Effens cheesy, en maklik om te verteer. ’n Guilty pleasure soos ’n koekie saam met jou tee, of ’n skelm sigaret.”

Die boek word deur Turksvy Publikasies uitgegee en kos R300.

Skimme en spoorsoekers deur Martin Steyn

Martin Steyn (Foto: Nardus Engelbrecht)

’n Man staan op ’n brug, reg om te spring. ’n Geheimsinnige vrou verskyn snags langs die Knysna-meer. Twee tieners volg ’n vreemde lig en maak ’n donker ontdekking. ’n Stiefpa hou aan terugkom.’n Meisie probeer haarself weer aanmekaarlas. ’n Ander een probeer haarself vermom. ’n Derde een worstel met die dood.

Skimme en spoorsoekers (LAPA/Penguin Random House, R320) is 21 kortverhale uit die pen van Martin Steyn, een van ons gewildste spanningsverhaalskrywers. Die bundel sluit sy eerste gepubliseerde storie “Kira” in, wat hy 27 jaar gelede geskryf het, en wat in Januarie 2004 in rooi rose verskyn het, asook “Boomgom” wat in April 2019 in rooi rose gepubliseer is, in. Die kortverhale is in die volgorde gerangskik waarin Martin dit geskryf het.

Dis stories oor hunkering, trauma en onmoontlike keuses. Stories met donker draaie en wrang kinkels. Stories oor skimme en spoorsoekers.

Boeke op Gerda Taljaard se bedkassie

In vandeesmaand se rooi rose − met Leandie du Randt op die voorblad − vertel Gerda Taljaard wat die vonk vir haar jongste roman, Die grafdigter (Penguin Random House, R330), was. Sy gee ook ’n lysie van boeke wat op haar bedkassie lê.

Lees ook: 13 flieks om na uit te sien in 2026!

The post Nuut op die boekrak: Kies ’n slag ’n kortverhaal appeared first on rooi rose.

Saamgestel deur Elna Rossouw.  

Gertruida Gans leer ’n les deur Halrika Breytenbach

Halrika Breytenbach (Foto: Verskaf)

In dié storie van Halrika Breytenbach (Naledi, R240) woon Gertruida Gans saam met haar ouers by Vygieboomdam. Sy verontagsaam Pappa en Mamma Gans se reël, verdwaal en beland amper in groot moeilikheid. Gelukkig kom Hanna Hadida tot haar redding. Gertruida leer ’n belangrike les: reëls is daar om ons te beskerm en ongehoorsaamheid het gevolge.

Dié verhaal gaan oor die Bybelse beginsel dat kinders aan ouers gehoorsaam moet wees. Daar is ook ’n feitegids met vrae agterin om die beginsel vas te lê.

Geskik vir 4 tot 8-jariges

Sprokies wat leef! deur Pieter de Villiers

Pieter de Villiers (Foto: Verskaf)

Sprokies wat leef! deur Pieter de Villiers (Naledi, R275) bied vir ouers en hul kinders die geleentheid om oor lewensvrae te gesels en saam in hul gedagtes te speel. Dit leer kinders om te luister en hul verbeelding in te span om die wêreld van die sprokie in ’n gedagtevlug te sien.

Sprokies soos “Waterdruppelmaats”, “Willie wil nie werk nie” en “Om saam te lewe” help skep ’n grondslag vir sterk waardes en sosiale vaardighede. Die skryfspan onderstreep Albert Einstein se woorde: “As jy wil hê jou kinders moet intelligent wees, lees vir hulle sprokies. As jy wil hê jou kinders moet nog meer intelligent wees, lees vir hulle nog méér sprokies.”
Geskik vir 4 tot 12-jariges.

Alten Akkedis se sewe sterte deur Riana Scheepers

Riana Scheepers (Foto: Verskaf)

Hierdie boek van Riana Scheepers (LAPA, R190) is ’n storie van vriendskap en avontuur.

Alten, ’n akkedis met die merkwaardige vermoë om sy stert te verloor en weer te laat groei, vind homself in ’n tuin vol gevare. Wanneer sy vriendin, Frida, die verkleurmannetjie, in die moeilikheid beland, moet hy al sy moed bymekaar skraap om haar te red. Saam droom hulle van ’n plek waar hulle veilig kan wees, weg van die bedreigings van die menslike wêreld.

Lees hoe Alten se unieke talent help om sy maat te red en leer só meer oor die verdedigingsmeganismes van akkedisse.

Geskik vir 5 tot 7-jariges.

Lees ook: Lekker kosblik-idees

The post Nuut op die boekrak: Keuses vir kleuters en kinders appeared first on rooi rose.

Saamgestel deur Elna Rossouw.  

Patmos deur Willem Anker

Willem Anker (Foto: Jaco Marais)

Ná ’n meteoriet op ’n plattelandse dorp neerstort, kom soek ’n komponis inspirasie vir die klankbaan van ’n wetenskapsfiksiefliek. Hy loseer by ’n astronoom wat navorsing oor gravitasiekolke doen. Haar agtjarige seun praat nie.

Die astronoom wil van haar verlede ontsnap. Die komponis het ’n toekoms wat hy nie wil trotseer nie.

In Patmos deur Willem Anker (Queillerie, R320) ontstaan ’n aarselende verhouding tussen dié twee mense en wentel hulle om mekaar met kragte wat tot vernietiging óf vernuwing kan lei.

Roulette deur Sidney Gilroy

Sidney Gilroy (Foto: Gareth van Nelson)

In September 1998 vertrek die vier Ludick-sibbe en drie maats na Ballito. Net die drieling en hul vriende keer ’n week later terug na hul Vrystaatse tuisdorp. Van die 13-jarige Lara Ludick se lewe het net haar dagboek oorgebly.

Sewe-en-twintig jaar later worstel die Ludick-drieling steeds met skuldgevoelens. ’n Mediese student verdwyn nie ver van waar hulle grootgeword het nie. Dae later word die vermiste student se pa se liggaam ontdek. Kort voor lank duik nog liggame op en sersant Sollie Mthembu se ondersoek lei hom terug na die onopgeloste Ludick-dossier.

In dié vyfde krimi van Sidney Gilroy (Human & Rousseau, R320) word familiegeheime en gevaarlike speletjies onder die vergrootglas geplaas.

Al die swendelaars deur Chris Karsten

Chris Karsten (Foto: Verskaf)

In Chris Karsten se Al die swendelaars (Human & Rousseau, R350) tel speurder Arrie Dogh die dae af tot hy en vroulief hul oudag saam kan geniet. Maar op die vooraand van sy aftrede beland ’n oënskynlik doodgewone inbraaksaak op sy lessenaar. En wanneer hy begin ondersoek instel na die inbrekers op Louis Jooste se perdeplaas besef hy daar is ’n slang in die gras … Jooste is nêrens te vind nie, en nog minder die blonde polospeler wat immer aan sy sy is.

In dié hoogs vermaaklike dog ongewone speurroman is daar kinkels en kullery en volop skelmstreke, maar soms vang slim weliswaar sy baas.

In die eerste rooi rose van 2026 − met die glanspaar Donnalee Roberts en Ivan Botha op die voorblad − som Ingrid Winterbach haar bekroonde boek, Onrus op Steynshoop in Lekker lees op. Sy vertel ook watter boeke op haar bedkassie lê en verklap watter soort boeke sy glad nie lees nie.

Lees ook: Kokkedoor: Son & see: Volstoom vorentoe na die wenstreep vir die laaste twee spanne!

The post Nuut op die boekrak appeared first on rooi rose.

Saamgestel deur Elna Rossouw.  

Eleksie op Erdvark deur Rudie van Rensburg

Rudie van Rensburg (Foto: Brenda Veldtman)

In Rudie van Rensburg se nuwe komiese roman, Eleksie op Erdvark (Queillerie, R290), moet Soois Swart se sukkelende koerantjie op Erdvark in die Knersvlakte sonder moderne tegnologie oor die naderende munisipale verkiesing verslag doen. Vir die eerste keer in ’n dekade word die BA Minus deur twee ander partye teengestaan. Die regerende party beywer hulle vir die behoud van kleinhuisies en die opposisie vra vir vernuwing in die vorm van spoeltoilette. Wanneer ’n horingadder in ’n kleinhuisie ’n inwoner op ’n kwesbare plek pik, klap die eerste verkiesingskoot amptelik.

Die drie weduwees deur Irma Venter

Irma Venter (Foto: Brenda Veldtman)

Die drie weduwees (Tafelberg, R360) is die vierde boek in Irma Venter se krimireeks met die joernalis Ami Prinsloo as hoofkarakter. Ami het geweet sy gaan eendag moet afskeid neem van Paul de Jager, die afgetrede polisiegeneraal. Maar wat sy nie verwag het nie, is sy laaste opdrag aan haar: Sy moet ’n onopgeloste saak uit die 1990’s ondersoek. Wanneer ’n 15-jarige seun van Pretoria op pad kafee toe met net R20 in sy sak spoorloos verdwyn, behoort daar tog iewers ’n leidraad te wees – iets meer as die wit paneelwa wat daardie dag in die straat opgemerk is. Teen haar sin word sy al hoe dieper in die raaisel ingetrek. En toe verdwyn nog ’n kind …

Stories vir die siel

Kortverhale kan soms jou hart breek en weer aanmekaar sit, jou laat skaterlag, dieper oor die lewe laat besin, en jou wegvoer na ander tye en plekke. Stories vir die siel: Inspirerende kortverhale (saamgestel deur LAPA en uitgegee deur LUCA, R300), is ’n versameling kortverhale wat uit bydraes van bekende skrywers, asook verskeie debuutskrywers saamgestel is. Aspirantskrywers soos Tertia Gouws (Verbreekte stilte), Jacqueline Schmahl (Die Kersparty) en Madelein Venter (’n Gewone engel) skuur skouers met gevestigde name soos dié van Maretha Maartens, Jeanette Ferreira, Elsa Winckler, Louise Viljoen, Elize Parker, Jeanette Stals en Malene Breytenbach.

Lees in ons Desember-uitgawe met Melinda Bam en haar ma, Wanda, op die voorblad watter boeke die skrywers Jozine Botha (Die jare tussen ons), Rina Cilliers (Die dogters van Casalina), Maretha Maartens (Bybelvroue Omnibus: Sara & Hanna) en Reggie Peace (Vredemaker) as Kersgeskenk wil lees en watter boeke hulle as geskenke wil gee. Ilse Roux vertel ook hoe haar boek, Die Bybelse vas, ontstaan het.

Lees ook: Drie gelukkige lesers kan Susan Coetzer se nuwe boek WEN!

The post Nuut op die boekrak appeared first on rooi rose.

Saamgestel deur Elna Rossouw.    

Uit die beek 2026 deur Stephan Joubert

Stephan Joubert (Foto: Verskaf)

Uit die beek 2026 is ‘n Bybelse dagboek wat al langer as tien dekades verskyn. “Dit was deur die jare heen die doelwit van verskillende skrywers om lesers die hele Bybel te laat lees, nie net geliefde gedeeltes nie, God het immers sy hele Woord aan ons gegee om ons op sy pad te lei,” vertel die teoloog en skrywer Stephan Joubert. In dié 2026-uitgawe van Uit die beek (Lux Verbi, R270; wat vanjaar deur Stephan geskryf is) begin die reis by Genesis. “Ons lees in die Ou Testament ook uit Eksodus, Rut, die twee boeke van Samuel, Ester, Psalms, Spreuke, Prediker en Jesaja. In die Nuwe Testament lees ons uit Markus, 1 Korintiërs, Filippense, 1 Tessalonisense, 2 Tessalonisense en die boeke van Timoteus. Soos gewoonlik word die belangrikste seisoene van die kerkjaar in ag geneem met ’n spesiale boodskap vir Lydenstyd, Paasfees, Pinkster, Koninkrykstyd, Advent en Kersfees.”  

Sielkos, ‘n gebedsjoernaal deur Irene M Nel

Irene M Nel (Foto: Verskaf)

Irene M Nel, ’n Namibiër wat lank in Suid-Afrika gewoon het voor sy in 2001 na haar geboorteland teruggetrek het, skryf al tien jaar elke dag ’n geestelike boodskap op Facebook wat sy “Sielskos” noem. Dit bestaan uit ’n Bybelvers, gedagte en gebed om mede-Christene te voed en te bou “omdat so baie van ons meer gereeld net daardie ietsie nodig het om ons gemoed te lig”, sê sy. Nou het sy van hierdie dagstukkies uitgesoek en in boekvorm as Sielkos, ‘n gebedsjoernaal (Turksvy Publikasies, R350) en werkboek saamgestel. Irene sê sy bou haar lewe rondom haar gunsteling-Bybelvers, Jeremia 29:11. “Ek weet wat Ek vir julle beplan, sê die Here, voorspoed en nie teenspoed nie. Ek wil vir julle ’n toekoms gee, ’n verwagting.”  

Super C: van swaarmoedige Sannie tot supervrou deur Susan Coetzer

Susan Coetzer (Foto: Verskaf)

Susan Coetzer vertel sy was baie lank ’n swaarmoedige Sannie. Sy het gesukkel met onder meer swak selfbeeld en donker gedagtes. Sy het alte dikwels gevoel sy leef nie soos sy wou nie. Maar vandag is alles anders. In Super C: van swaarmoedige Sannie tot supervrou (Lux Verbi, R280) nooi Susan jou saam op haar reis. Sy deel haar terugslae en oorwinnings deur te vertel van die ou gewoontes wat sy moes afleer en die bemagtigende nuwe gewoontes wat sy aangeleer het. Sy hoop die boek sal jou aanspoor om nooit moed te verloor nie, maar aan te hou stap totdat jy ook jou swaarmoedige Sannie kan agterlaat en jou eie weergawe van ’n sonnige Super C word.  

Drie gelukkige lesers kan Super C: van swaarmoedige Sannie tot supervrou WEN!

Met die komplimente van Lux Verbi kan drie rooi rose-lesers elk ‘n kopie van Susan Coetzer se Super C: van swaarmoedige Sannie tot supervrou wen.

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

*Slegs een inskrywing per persoon  

Sluitingsdatum: 27 Desember 2025

The post Nuut op die boekrak + Drie gelukkige lesers kan Susan Coetzer se nuwe boek WEN! appeared first on rooi rose.

Saamgestel deur Elna Rossouw.    

Jan Braai Junior in die kombuis deur Jan Braai

Jan Braai (Foto: Verskaf)

Jan Braai Junior in die kombuis (Penguin Books, R250) is in die gemaklike geselstrant van die TV-kok Jan Braai geskryf. En die hele gesin sal hul lippe aflek as die jongspan met dié resepteboek voor die stoof inskuif. Die boek is vol sakpasresepte, goeie wenke en raad vir jong kokke. Met maklike resepte vir maaltye soos hoender-taco’s of botterhoender kan kinders selfvertroue in die kombuis bou, terwyl hulle met malvapoeding en piesangbrood harte kan steel. Dié boek word nie verniet as ’n kombuisgids vir die volgende geslag beskryf nie.    

Kombuistaal deur Vickie de Beer

Vickie de Beer (Foto: Verskaf)

Vickie de Beer se Kombuistaal (Lapa, R260) gee kinders die woordeskat en vaardighede om seker te maak dat hulle van jongs af weet hoe om kos wat gesond en heilsaam is te kies. In dié boek vol gesonde resepte, kan jou kind leer om reg te eet met maklike resepte wat sy self kan maak. Vickie deel nie net gesonde eetgewoontes vir kinders nie, sy gee ook resepte om “jou brein slim te hou”, “meer woema te kry” en deel tien goue reëls vir ’n veilige kombuis. Dit is boonop ’n lekkerleesboek propvol nuwe gedigte deur Antjie Krog. Die resepte en rympies is deur Roelien Immelman geïllustreer.    

Marinda se kinderkombuis met Sjef Sout & Prof Pretzel deur Marinda Engelbrecht

Marinda Engelbrecht (Foto: Verskaf)

Marinda se kinderkombuis met Sjef Sout & Prof Pretzel (Human & Rousseau, R320) het wel ’n paar jaar gelede verskyn, maar is steeds gewild. Dit is ’n kleurryke kookboek met ’n kinkel. Benewes die liplekker-resepte is daar ’n skatkis van wenke hoe kinders by kosmaak kan baat, en hoe bak en brou die jongspan op ’n prettige manier met wiskunde, wetenskap, lees en skryf kan help. In Marinda (Engelbrecht) se kinderkombuis kan kinders leer om saam met Sjef Sout ’n omelet te maak of ’n brood te bak. En saam met prof Pretzel op ’n kosreis en wetenskapsavontuur verdwyn!    

• Lees op die boekeblad in rooi rose se November-uitgawe wie die glanssjef Elmarie Berry graag vir ete sou wou nooi. Kyk ook wat op haar Kersspyskaart is.

Vyf gelukkige lesers kan Skepselkos WEN!

Vyf gelukkige lesers kan ook Skepselkos, die pragboek van Isabella Niehaus & Louis Jansen van Vuuren met die komplimente van Naledi-uitgewers wen. Lees meer oor die plantgegronde resepteboek in “Lekker lees” (bladsy 107) van November se rooi rose.  

Bepalings en voorwaardes: Alle pryse in rooi rose is onderhewig aan beskikbaarheid en is nie oordraagbaar, herverkoopbaar of terugbetaalbaar vir kontant nie. Vir nog bepalings en voorwaardes, besoek www.rooirose.co.za

Om in te skryf, voltooi die onderstaande vorm:

  *Slegs een inskrywing per persoon    

Sluitingsdatum: 27 November 2025    

The post Nuut op die boekrak + Vyf gelukkige lesers kan ‘Skepselkos’ WEN! appeared first on rooi rose.

Saamgestel deur Elna Rossouw.

Die moord op Liezel de Jager deur Anena Burger

Anena Burger (Foto: Verskaf)

Die dood van ds Liezel de Jager, wat in die oprit van ’n pastorie vermoor is, het geskok. In Die moord op Liezel de Jager (Lapa, R300) vertel die joernalis, Anena Burger, die verhaal van Liezel se dood en die nog vreemder gebeure in die dae en jare ná haar moord. Haar man, Werner, het verdwyn en is later in ’n bedenklike toestand in ’n suikerrietplantasie gevind. Hy was ook in ’n ongeluk betrokke waar nog twee vroue dood is. Om alles te kroon, het die polisie twee jaar lank gesloer voordat hulle met die moordondersoek begin het. Liezel se ouers het egter vir geregtigheid vir hul dogter geveg en Werner is vir die moord op sy vrou in hegtenis geneem. Die moord het egter onopgelos gebly toe Werner onder raaiselagtige omstandighede in die hospitaal gesterf het.

Die dood van Rachel April deur PP Fourie

PP Fourie (Foto: Verskaf)

In PP Fourie se Die dood van Rachel April (Queillerie, R350) word Rachel se lyk met ’n steekwond in haar hart gevind. Lesea du Plessis, ’n mede-student stel ondersoek in. Sy het Rachel se dogtertjie belowe sy sal uitvind wat met haar ma gebeur het. Dit blyk dat Rachel tydens ’n internskap by die Anglo-Boereoorlogmuseum iets ontdek het. Maar wat kan dit wees? En het die ontdekking dalk tot haar dood gelei? Terwyl Lesea die vrae rondom Rachel se dood probeer beantwoord, word haar eie familiegeheime losgetorring en moet sy haar hele identiteit in heroënskou neem. Maar voordat sy en haar aanneembroer van die onthullings probeer sin maak, trek hulle die aandag van ’n gevaarlike karakter – iemand wat Rachel se geheim vir hulself wil hou.

Weg is nie ’n plek nie deur Santie van der Merwe

Santie van der Merwe (Foto: Verskaf)

In Weg is nie ’n plek nie (Human & Rousseau, R290) herinner Santie van der Merwe ons hoe die liefde ons almal raak, en dat verlies soos ’n kooltjie bly smeul en onverwags weer kan vlamvat.

Natasja se hart is in stukke. Johnny het haar weer in die steek gelaat. Ná ’n lang nag bevind sy haar in die verre noorde, met al haar aardse besittings in haar motor. Eers nadat sy op die N18 afgedraai het en die bordjie opmerk, onthou sy: George, haar pa se boesemvriend, woon nog hier op Lelievlei. Miskien moet sy gaan aanklop? As sy ’n rukkie rus, sal sy dalk helderheid oor haar pad vorentoe kry. Maar wat op haar anderkant die voordeur van die vervalle huis wag, sou sy nooit kon raai nie. Nog minder hoe hierdie afdraai na Lelievlei haar én George se lewe onherroeplik sou verander.

The post Nuut op die boekrak! appeared first on rooi rose.

Saamgestel deur Elna Rossouw.

Die rooi angelier deur Eleanor Baker

Eleanor Baker (Foto: Verskaf)

DIE ROOI ANGELIER (Human & Rousseau, R270) is ’n heruitgawe van die tweede titel in ’n speurreeks wat ELEANOR BAKER in die laat jare negentig onder die skuilnaam Alex Muller geskryf het. In dié boek is speurder Adriaan Kruger op die spoor van ’n reeksmoordenaar wat só pynlik netjies te werk gaan dat hy oënskynlik geen leidrade agterlaat nie. Wanneer sy geliefde in die moordenaar se kloue beland, voel dit vir Adriaan asof hy hom in ’n nagmerrie bevind waarin die tyd stilstaan. Sal hy haar kan opspoor voordat dit te laat is?

• Eleanor Baker het ook liefdesverhale en jeugboeke onder die skuilnaam Christine le Roux geskryf. Sy is in 2002 op die ouderdom van 57 oorlede.

Op pad na ‘n klooster in die sneeu deur Johannes de Villiers

Johannes de Villiers (Foto: Verskaf)

JOHANNES DE VILLIERS se OP PAD NA ’N KLOOSTER IN DIE SNEEU (Human & Rousseau, R350) is ’n roman oor die soeke na identiteit, na vrede en betekenis, maar bowenal oor ’n pelgrimstog na aanvaarding van die self.

’n Jong apteker is ontnugter met sy lot – is hierdie sinlose bestaan ál wat vir hom vir die volgende 60 jaar voorlê? Wanneer hy toevallig op die geskrifte van die 15de eeuse mistikus Thomas à Kempis afkom, begin hy oor ’n asketiese lewe as monnik te droom.

Op die vooraand van sy reis na ’n Franse klooster, hoor hy van ’n verlangse oom wat ’n Katolieke priester geword het, en nou as afgetredene in Parys woon. Só begin ’n kosbare vriendskap tussen ’n bejaarde pater en ’n ietwat verlore siel uit die Vrystaat.

Sekelmaan deur Jaco Wolmarans

Jaco Wolmarans (Foto: Verskaf)

In SEKELMAAN (Tafelberg, R360) van JACO WOLMARANS is dit een jaar ná Gasa. Israel is geïsoleer deur wêreldopinie, terwyl Hamas vir ’n volgende aanslag oorgehaal is. In Johannesburg sit ’n verbitterde imam aan die spits van pogings om Hamas se jihad te befonds. ’n Groep Suid-Afrikaanse Jode is die teiken van ’n terreuraanval in Kaïro. In die middel hiervan is die Reuters-joernalis Ruby Heyns met verdoemende inligting wat die skaal in dié konflik kan swaai. Staatsekuriteit se Reuben Kruger probeer die geheime ontrafel. Die skadu-verlede van Ruby se ma, ’n voormalige Mossad-spioen, en haar eertydse hanteerder, gooi egter ’n sluier oor die gebeure. Wanneer Ruby oornag verdwyn, moet Reuben al sy kennis inspan om haar op te spoor … voordat die sekelmaan kom.

Lees ook: Tienerfiksie vir die skoolvakansie!

The post Nuut op die boekrak! appeared first on rooi rose.

Saamgestel deur Elna Rossouw.

Breinlabirint deur François Bloemhof

François Bloemhof (Foto: Verskaf)

Aan die begin van BREINLABIRINT (LAPA, R200) gee FRANÇOIS BLOEMHOF ‘n paar reëls vir die lees van die boek: Wanneer jy by ‘n swart bladsy kom; stop!; probeer raai wat volgende gebeur; jy mag eers ‘n dag verder lees – net een episode op ‘n slag; jy moet sewe dae vat om klaar te maak … Dié verhaal draai om Louw Erasmus wat een oggend deurmekaar wakker word. Hoewel alles normaal lyk in hul huis in Bangmanskloof, voel hy dat iets verkeerd is. Daar is gapings in sy geheue, en sy lewe voel soos ’n vervolgverhaal met ontbrekende hoofstukke. Hy voel amper soos ’n gevangene in die huis, hy’t ’n merk om sy nek, en hoe hy dit gekry het, is net die eerste van vele skokke …

Ouderdom: 15+ jaar

Web van leuens deur Marion Erskine

Marion Erskine (Foto: Migal van As)

MARION ERSKINE se WEB VAN LEUENS (Human & Rousseau, R255) speel af in Goudfontein, ‘n klein myndorpie. Almal weet iets van mekaar … maar niemand ken die volle waarheid nie. Wanneer drie matrikulante – die ambisieuse hoofmeisie Lerato, die skool se rugbykaptein Marno, en die loskop rebel Clayton – gelyktydig anonieme dreigboodskappe ontvang, begin ʼn gevaarlike speletjie van manipulasie en leuens. Maar hulle is nie die enigstes met iets om weg te steek nie. Lohann, die dorp se goue seun, het ʼn houvas op almal. Hy ken hulle donkerste geheime. Maar hoe het hy uitgevind? En wie is so desperaat om hul geheim te beskerm dat moord die enigste opsie word?

Ouderdom: 14+ jaar

Sny hulle in die sterre uit deur Fanie Viljoen

Fanie Viljoen (Foto: Anneska van der Spoel)

Dit is ‘n gewone skooldag. Ankia en Gustav is malverlief. Lebo moet ‘n toets skryf waarvoor hy nie gereed is nie …dan gaan daar ‘n rilling deur die aarde. In FANIE VILJOEN se SNY HULLE IN DIE STERRE UIT (Tafelberg, R240) skud´n aardbewing ´n Vrystaatse myndorp, die skoolgebou stort ineen, en leerders en onderwysers word onder die puin vasgekeer. Terwyl hulle suurstof en hulle hoop al minder word, beleef die leser die angswekkende situasie saam met hulle. Die vasgekeerdes ervaar engtevrees, angs vir die naderende dood, opflikkerings van verbete hoop en selfs humor, in die wag op ‘n reddingspan.

Ouderdom: 14+ jaar

Lees ook: 95-jarige word bekroon vir haar eerste hoofrol in Thelma

The post Tienerfiksie vir die skoolvakansie! appeared first on rooi rose.

Saamgestel deur Elna Rossouw

Laastegoed deur Annelie Botes

Annelie Botes (Foto: Salvelio Meyer)

Vir meer as twee dekades het Annelie Botes gedagtes, opinies en insigte oor die lewe opgeteken. Laastegoed (Penguin Random House, R350) is ’n versameling van haar rubrieke wat van 2020 tot 2024 in verskeie gedrukte (ook rooi rose) en aanlyn publikasies, verskyn het. Annelie het gepraat van “bunkertyd” toe die Covid-19-pandemie die wêreld getref het. In haar wêreld was die tyd van korona ook ’n voorspel tot haar eie eindstryd met siekte, amputasie en uiteindelik, die onvermydelike seisoen van “die engele met raspervlerke”. Dié rubrieke is volgens verskillende temas, onder meer “oor kinders en kindwees”, “padkos vir die siel” en “die noute in …” gegroepeer.

Kronkelpad deur Irma Joubert

Irma Joubert (Foto: Verskaf)

Kronkelpad (Tafelberg, R370) van Irma Joubert is ’n heruitgawe van die laaste roman in die Pontenilo-trilogie wat oorspronklik in 2011 verskyn het. Twee bykarakters uit Anderkant Pontenilo en Pérsomi is die hoofkarakters in die roman.

Die jong mediese student, Lettie Louw, keer in 1947 terug na die Bosvelddorpie waar sy grootgeword het om haar pa se praktyk oor te neem. Marco Romanelli oorleef ’n konsentrasiekamp, maar kom siek by sy ouerhuis in Noord-Italië aan. Ter wille van sy gesondheid reis hy na Suid-Afrika. Só beland Marco op dieselfde dorpie waar Letttie ’n dokter is. Die liefde blom … maar dan breek die polio-epidemie van die jare vyftig uit.

Drie moorde in die baai deur Madelein Rust

Madelein Rust (Foto: Annemarie Wichman)

Drie moorde in die baai (Human & Rousseau, R350) is die laaste roman uit Madelein Rust se pen. Bianca Fabricious, hygromanskrywer en nuwe eienaar van ‘n gastehuis op St Helenabaai, het skaars haar voete gevind of die uitsig voor haar kamervenster verander in ’n misdaadtoneel. Om alles te kroon, is die slagoffer ’n blondine met wie Bianca haaks was oor dié se kaalbassonbaaiery voor gaste. Dis duidelik dat die gawe speuradjudant Meintjies haar glo wanneer Bianca verduidelik sy het bloot die liggaam ontdek, maar kaptein De Wee is ’n perd van ’n ander kleur. Bianca probeer haarself as verdagte uitskakel en die regte boosdoener aan die kaak stel, maar dit veroorsaak ’n hele reeks onvoorsiene gebeure …

Madelein (58) is op 6 Augustus kort ná dié boek verskyn het aan kanker oorlede. Sy het in 2014 krimi’s begin skryf en daarna het daar elke jaar ’n nuwe roman verskyn waarvan drie titels vir ATKV-Woordveertjies benoem is. Sy het ook twee niefiksieboeke, Kanker Schmanker! en Van vrees na vrede geskryf.

Lees ook: Meesterlike Hen spook Oktober in teaters

The post Nuut op die boekrak! appeared first on rooi rose.

Saamgestel deur Elna Rossouw.

Die Kubermoorde deur Dewet Bisschoff

Dewet Bisschoff (Foto: Verskaf)

DIE KUBERMOORDE (Turksvy Publikasies, R300) deur DEWET BISSCHOFF, begin in die Oos-Kaap met ’n plaasaanval. Terselfdertyd lei ’n kuberinbraak by ’n regeringsdepartement en sabotasie by ’n kragstasie tot ’n vlaag moorde in die noorde van die land. Mac, ’n rekenaarspesialis wat die kuberaanval ondersoek, ontbloot ’n internasionale komplot. Polisie-intimidasie dreig om Mac se ondersoek te ontspoor, terwyl inmenging van die Russiese Geheimediens sy veiligheid bedreig. Hy span saam met Jerome, sy werkgewer en politieke beskermengel, en Sonja, sy verlore liefde by Staatsveiligheid, om die komplot te ontrafel … maar Mac se kleurvolle verlede en sy effens donker karakter kompliseer sy speurwerk.

Nagdier deur Marie Lotz

Marie Lotz (Foto: Verskaf)

In MARIE LOTZ se nuwe spanningsroman, NAGDIER (Penguin Random House, R320), word ’n bekende sakeman laatnag in sy studeerkamer doodgeskiet. ’n Paar dae later word ’n egpaar in hul naweekhuis in die bos vermoor – die vroulike slagoffer word gruwelik vermink. Die modus operandi van die moorde toon duidelike ooreenkomste. Toe ’n bejaarde man kort daarna ontvoer word, bevind majoor Alek Strauss hom in die middel van ’n klein oorlog waarin die raaisels van die hede slegs deur die verlede opgelos kan word.

Leeumens deur Rudie van Rensburg

Rudie van Rensburg (Foto: Verskaf/ Brenda Veldtman)

In LEEUMENS deur RUDIE VAN RENSBURG (Queillerie, R365) word skatryk tweelingbroers se geraamtes in ’n veld opgediep. Op aandrang van die Wes-Kaapse polisiehoof moet Kassie en Rooi die saak ondersoek, maar dit moet in geheimhouding gebeur. Anders loop hulle ook die gevaar om soos die speurders wat by die destydse verdwyningsaak betrokke was, vermoor te word. Om die saak onder die radar te probeer oplos, blyk gou onprakties te wees. Wanneer die twee tot ’n openlike ondersoek oorgaan, beland hulle in ’n maalstroom van ongekende gevaar: ’n stikdonker onderwêreld waar antieke voorwerpe miljoen rande op swartmarkveilings behaal.

In September se rooi rose met Karlien van Jaarsveld op die voorblad, vertel Erla Diedericks in “Lekker lees” meer van haar jongste spanningsroman, Bonsai-meisies. Sy vertel ook watter boeke op haar bedkassie lê, en verklap watter soort boeke sy glad nie lees nie.

Lees ook: 10 redes waarom jy rooi rose se September-uitgawe móét lees!

The post Nuut op die boekrak! appeared first on rooi rose.

Saamgestel deur Elna Rossouw.  

Die moord op Deveney Nel deur Julian Jansen

Julian Jansen (Foto: Verskaf)

In DIE MOORD OP DEVENEY NEL (Tafelberg, R280) vertel Julian Jansen, ondersoekende joernalis en misdaadskrywer, van die gebeure wat tot die dood van die 16-jarige Deveney gelei het. Haar liggaam is ‘n jaar gelede in ‘n pakkamer op ‘n plattelandse skoolterrein ontdek. Julian volg die spoor van 17-jarige beskuldigde wat vantevore deur die krake van die Suid-Afrikaanse regstelsel geglip het. Hy dra die boek op aan alle slagoffers van geslagsgeweld, asook rolspelers en instellings wat daagliks stoei om ‘n veiliger omgewing vir kinders te skep.

Hoe haal ek nou asem? deur Cliffordene Norton

Cliffordene Norton (Foto: Verskaf)

Cliffordene Norton se HOE HAAL EK NOU ASEM? (LAPA, R200) kan beskryf word as ‘n grootwordverhaal waarin ie skrywer temas soos die dood van ‘n ouer, verhoudings met sibbe, en LGBTQ+ romanse aanraak. Die agterplat lees: “Pa is weg, en skielik moet ek ‘n grootmens wees … Ek wil nie die man van die huis wees nie … Ek wil teruggaan na twee jaar gelede – toe ek net Ethan was. Ethan met die koel broer en ôsim ouers. Ethan wie se ouers Sondagmiddae in die agterplaas gedans het.” Die boek is op tieners dertien jaar en ouer gemik.

Donker vuur deur Pieter Stoffberg

Pieter Stoffberg (Foto: Verskaf)

DONKER VUUR (Penguin, R320), Pieter Stoffberg, se vierde roman speel in die Oekraïene af. In dié boek, verweef hy elemente van godsdiens en geloof, aksie en spanning met die sentrale tema van liefde in ’n verhaal oor ’n klein groepie mense wat teen skadumagte te staan kom. Die hoofkarakter is Jacques Lombard, ‘n oudrecce wat na ‘n Protestantse kerk in Kiëf vlug om weer heel te word. Die boek is ‘n tuimeltreinrit na ’n tyd van misdadigers en heiliges, antieke boekrolle en vreesaanjaende, moderne wapens.

In vandeesmaand se rooi rose, met die sprankelende Reandi Grey op die voorblad, kan jy ons onderhoud met Leon van Nierop lees en hoor wat hy oor Het van Verlangekraal én sy nuwe boek, Die volmaakte moord, vertel. Leon sê ook watter boeke op sy bedkassie lê.

Lees ook: WEN Karlien van Jaarsveld se nuutste boek!

The post Nuut op die boekrak! appeared first on rooi rose.