Deur Christa Swanepoel

Dis ’n diep hartseer wat menige vrou ervaar. Elke maand, vir twee en ’n half jaar, was Martie* van Polokwane emosioneel uitgeput nadat sy met hoop in haar hart ’n swangerskapstoets gedoen het. Telkens was die uitslag dat sy nie swanger was nie. Die smart was te veel om te hanteer.

“Toe ons ten einde laas na ’n vrugbaarheidskliniek in Sandton verwys is,” vertel sy, “het die hoop opnuut weer opgevlam. Ons het gebid dat ons antwoorde sou ontvang oor hoe om ons swangerskapsreis te begin. Ons het geglo dat ons hier antwoorde sou kry en was ongelooflik opgewonde.”

Die resultaat was egter nie wat hulle verwag het nie. Hulle het daar die nuus gekry dat hulle slegs ’n 9% kans het om swanger te raak. Dis minder as 10%. Hulle was verslae.

Dit was vir hulle hartverskeurend om te weet dat daar byna geen kans was om hul eie kinders te hê nie. “Ek en my man het op pad huis toe skaars met mekaar gepraat. Ek het byna die hele pad terug in die motor net gesit en huil,” sê Martie.
Gelukkig kon hulle hul hartseer met mekaar deel. Terug by die huis het hulle mekaar belowe dat hulle saam hierin sou wees en nie sou toelaat dat dit hul huwelik vernietig nie.

“Later daardie aand,” gaan Martie voort, “nadat my man aan die slaap geraak het, het ek myself in die badkamer toegesluit, op die vloer gaan sit en so saggies as moontlik gehuil, in die hoop dat hy my nie sal hoor nie. Ek het met God gepraat en vir Hom gesê ek kan nie bid nie. Ek is gewond. Ek is kwaad. Waarom ons?
“Om te sê dat ek emosioneel ly en gebroke is, is om dit ligtelik te stel. Niemand kan verstaan hoe jy voel of wat jy deurmaak as hulle dit nie self deurgemaak het nie.”

Hulle bly steeds glo en hoop dat ’n wonderwerk sal gebeur.

Wat is onvrugbaarheid?

Die begrip “onvrugbaarheid” word gebruik wanneer die vermoë om swanger te raak afneem of afwesig is. Dit beteken nog nie dat jy glad nie kinders sal kan hê nie, maar dat jy behandeling of ondersteuning nodig het om swanger te raak.
Onvrugbaarheid kom ter sprake wanneer ’n paartjie ná 12 maande se gereelde onbeskermde seks, of ses maande vir ’n vrou ouer as 35 jaar, nie swanger kan raak nie.

Daar is twee soorte onvrugbaarheid. Primêre onvrugbaarheid is wanneer ’n vrou nog nie vantevore swanger was nie. Sekondêre onvrugbaarheid is wanneer ’n vrou reeds ’n kind gehad het en nie weer swanger kan raak nie.
Baie paartjies wat sukkel om swanger te raak, kan dit aan ’n moontlike mediese toestand toeskryf. In ’n derde van die gevalle lê die probleem by die vrou, in ’n derde by die man en by nog ’n derde by die man en die vrou. Maar die hartseer is dat een uit elke ses paartjies sukkel om swanger te raak.

Tekens, simptome en algemene oorsake van onvrugbaarheid by die vrou

• Melk wat deur die bors afgeskei word.
• Chroniese pyn in jou pelvis.
• Seks is moeilik..
• Oormatige aknee of hare op die gesig.
• ’n Geskiedenis van pelvisinfeksie.
• ’n Geskiedenis van seksueel oordraagbare siekte (SOI).
• As jy ’n inwendige geboortebeperkingstoestel gebruik het.
• Ongereelde menstruasie of geen menstruasie nie.
• Ná ’n sterilisasie of as dit onsuksesvol omgekeer is.
• Twee of meer miskrame.
• Van die algemeenste mediese oorsake sluit in ’n abnormale skildklier, die gebrek of afwesigheid van ovulasie, endometriose, polisistiese ovariumsindroom, hiperprolaktinemie (’n afwyking waarin jou pituïtêre klier oormatige hoeveelhede van die hormoon prolaktien afskei).

Watter rol speel ouderdom?

Ons lees al meer van vroue wat in hul veertigerjare hul eerste baba(s) kry.
As jy besluit om kinders te hê, is dit egter raadsaam om nie tot dan te wag nie.
’n Vrou is op haar vrugbaarste in haar vroeë twintigerjare en vanaf 35 jaar begin haar vrugbaarheid afneem in die sin dat die gehalte en hoeveelheid van haar eierselle afneem. Mans bly baie langer vrugbaar hoewel die semengehalte en -hoeveelheid ook ná 45 begin agteruitgaan.

Wanneer om hulp te soek

Die spesialiste by Medfem-vrugbaarheidskliniek beveel aan dat jy hulp soek as julle wil swanger raak, en jy op enige van die volgende stellings “ja” kan antwoord. Dit beteken nie enigiets is fout nie, maar as daar probleme is, kan dit hanteer word en jou hope bekommernis spaar.

• Is jy en jou maat al bekommerd omdat jy nog nie swanger geraak het nie?
• Is jy jonger as 35 jaar en het julle al meer as ’n jaar probeer om swanger te raak?
• Is jy ouer as 35 jaar en het julle al meer as ses maande probeer om swanger te raak?
• Is jou maandstondes pynlik?
• Was jy of jou maat tevore in ’n verhouding waar julle probeer swanger raak het en dit nie suksesvol was nie?
• Het jou maat vantevore ’n besering aan sy testikels opgedoen?
• Het jy ’n groot operasie aan jou buik gehad?
• Is jy ouer as 35?
• Het jou maat ’n operasie aan sy testikels gehad?
• Het jy al ’n ektopiese swangerskap (buite die baarmoeder) gehad, gewoonlik in een van die fallopiese buise?
• Het jy al melkafskeiding uit jou borste gehad?
• Het jy diabetes, Cushing se sindroom of ’n skildklierprobleem?
• Is jy oor- of ondergewig?
• Kan julle om een of ander rede nie gereeld seks hê nie?
• Het jy chlamydia of pelviese inflammatoriese siekte (PID) gehad?
• Het jou maat pampoentjies gehad?
• Sukkel jou maat om seks te hê?
• Het jou maat ejakulasieprobleme?
• Het jy ’n familiegeskiedenis van diabetes of skildklierafwykings?

’n Paar opsies in ekstreme gevalle

• Kunsmatige inseminasie
• In vitro-bevrugting (IVB)
• Skenker-sperms of -ova
• Surrogasie

Dit kan help

Navorsing toon dat vroue wat onvrugbaarheid ervaar, dieselfde angs- en depressievlakke het as vroue met kanker, hartsiektes en MIV.

Hoewel stres opsigself nie onvrugbaarheid kan veroorsaak nie, kan stres wel inmeng met ’n vrou se vermoë om swanger te raak. Volgens navorsing is vroue met ’n geskiedenis van depressie se kans om onvrugbaar te wees dubbeld so groot. Angs kan ook die tyd wat nodig is om swanger te raak, verleng. Selfs met in vitro-bevrugting kan stres die sukses daarvan beïnvloed.

Die spesialiste by die Medfem-kliniek verstaan waardeur ’n vrou (en haar maat) gaan wat sukkel om swanger te raak.

Dit raak elke aspek van ’n vrou se lewe. Hoe sy oor haarself voel, haar verhouding met haar maat en ander mense naby aan haar. Hulle beklemtoon dat die komplekse emosionele reaksie op onvrugbaarheid normaal is en kan gevoelens van verlies, jaloesie, ontkenning, skaamte, isolasie, woede en frustrasie insluit. Jy en jou maat kan ook verskillend reageer, maar dit sal julle baat om hanteringsmeganismes aan te leer om dit te bestuur.

Hulle gee kortliks die volgende raad:

• Erken hoe jy voel en verstaan dat dit normaal is.
• Gee uiting aan jou gevoelens. Hoe meer jy daaroor praat, hoe makliker word dit.
• Kry ondersteuning en berading. Dit help as jy mense het wat kan luister en hoor hoe jy voel.
• Gun dit vir jouself om oor jou droom te rou. Jy moet deur die rouproses gaan om weer heel te word.
• Kommunikeer met jou maat. Die stryd met onvrugbaarheid en die behandeling plaas groot druk op ’n huwelik. Kry saam hulp.
• Kry al die inligting wat jy kan. Lees, praat met jou dokter of berader of ondersteuningsgroep asook met ander wat dieselfde as jy deurmaak. Kennis verminder dikwels die vrees van onsekerheid.
• Vra vir hulp, hetsy of dit net iemand is wat na jou sal luister. Dit help om te weet jy is nie alleen nie.
• Wees goed vir jouself. Pas jou gesondheid op en bederf jouself van tyd tot tyd.
• Lig die mense na aan jou in oor die situasie sodat hulle nie uit onkunde dinge sê of doen nie.
• Hou seks pret en nie net iets wat jy moet doen wanneer jy moet nie.
• Jy mag maar nee sê vir geleenthede waar babas die middelpunt is as dit vir jou te moeilik is.
• Kry maniere om stres te verminder deur stokperdjies of ander aktiwiteite wat jy voorheen geniet het.

*skuilnaam
Besoek www.medfem.co.za vir meer inligting
Bykomende bron: Mayo-kliniek

Lees ook: 11 gesondheidsondersoeke wat vroue moet doen

The post Die groot gemis: Hier’s wat jy moet weet as jy sukkel om swanger te raak appeared first on rooi rose.

Bywoners sal na hoog aangeskrewe sprekers oor verskillende onvrugbaarheidskwessies luister, insluitend praatjies oor ouderdom, vrugbaarheid, PCOS, en vele meer.

Ons het 10 van die sprekers wat die Fertility Show Africa 2022 sal bywoon, uitgelig:

1. Mandy Rodrigues

Onderwerp: Voorbereiding vir IVF-behandeling

Mandy Rodrigues is ‘n bekende kliniese sielkundige wat die afgelope 25 jaar in die veld van onvrugbaarheid werk. Sy werk met individue, paartjies en groepe, om hulle te help om die vrugbaarheidsreis te hanteer en om lewensveranderende besluite te neem. ‘n Groot deel van haar praktyk behels streshantering en die behoefte aan ‘n multi-dissiplinêre benadering tot onvrugbaarheid. Mandy het al verskeie boeke en artikels oor die onderwerp aangebied en gepubliseer.

2. Dr Wanjiru Ndigwa

Onderwerp: Ouderdom en vrugbaarheid

Dr Ndigwa is tans die hoof-vrugbaarheidspesialis by die Footsteps to Fertility Centre in Nairobi. Sy is in reproduktiewe endokrinologie en vrugbaarheid gesertifiseer en is ’n direksielid van African Federation of Fertility Societies, Kenya Society of Endoscopic Surgery en Fertility and Andrology Society of Kenya. Dr Ndigwa is passievol daaroor om paartjies te help om hul gesinne te bou.

3. Kelly Loggenberg

Onderwerp: Pre-implantasie Genetiese Toetsing (PGT): Die verskillende opsies word verduidelik

Kelly Loggenberg het ‘n meestersgraad in genetiese berading aan die Universiteit van Kaapstad voltooi. Sy het is by die Gesondheidsberoeperaad van SA geregistreer en en vir die NHLS gewerk voordat sy in 2008 na Londen verhuis het waar sy tien jaar as ‘n genetiese berader in navorsing en kliniese omgewings binne die NHS gewerk het. Sy voel sterk daaroor om ‘n holistiese siening van pasiëntsorg te neem en glo daar is beduidende waarde aan ‘n multidissiplinêre benadering wat pasiënte bemagtig om besluite te neem in ooreenstemming met hul oortuigings.

4. Dr Razina Patel

Onderwerp: Sosiale eier-vries – Die proses

Dr Razina Patel het haar roeping gevolg om in verloskunde en ginekologie te spesialiseer. Sy het in 1998 gekwalifiseer en het vir meer as 20 jaar in ‘n akademiese hoedanigheid by die Johannesburg General Hospital en by die Bedfordview Hospitaal en Park Lane Hospitaal as ‘n verloskundige ginekoloog gewerk. Sy het ‘n passie vir voortplantingsgeneeskunde en het dit in die bestek van haar praktyk geïnkorporeer.

5. Dr Victor Hulme

Onderwerp: Voortydige en lae ovariese reserwe: Wat is dit?

Dr Victor Hulme is ‘n mededirekteur en vrugbaarheidspesialis by Aevitas Fertility Clinic, met ‘n spesiale belangstelling in eiervries. Nadat hy as ‘n verloskundige en ginekoloog gekwalifiseer het, het hy sy twee jaar-lange genootskap as ‘n vrugbaarheidspesialis deur die departement verloskunde en ginekologie, Vrugbaarheidskliniek, Tygerberg-hospitaal voltooi.

6. Dr Kelly Owen

Onderwerp: Die onsigbare verlies van ’n negatiewe swangerskaptoets

Dr. Kelly Owen is ‘n kliniese sielkundige. Deur haar eie reis met vrugbaarheidsprobleme het dr Owen 15 jaar gelede in hierdie veld begin werk. Haar spesifieke belangstelling is die ernstige impak wat onvrugbaarheid op die geestesgesondheid van paartjies en individue het.

7. Erica Hoke

Onderwerp: Onvrugbaarheidsukses ten spyte van lae kanse

Erica Hoke is die ma van vier seuns. Nadat sy jare lank gesukkel het met ongediagnoseerde endometriose, uteriene fibroïede, PCOS, skildkliersiekte, faktor 5 Leiden en MTHFR, wat nie aan tradisionele IUI of IVF-metodes kon deelneem nie, het sy haar onvrugbaarheidskwessies geïdentifiseer deur voortdurende veranderinge aan haar dieet en lewenstyl te maak. Ontevrede met die manier waarop reproduktiewe endokrinologie (REI) medisyne algemene onvrugbaarheidskwessies hanteer, was Erika vasbeslote om die reproduktiewe mediese stelsel te ontwrig. Om onvrugbaarheidspasiënte te bemagtig deur ‘n standaard van sorg te skep waardeur hulle met hul dokters kan saamwerk en koördineer, het haar missie geword.

8. Dr Rizwana Roomaney

Onderwerp: PCOS en vroulikheid

Dr. Rizwana Roomaney is ‘n navorsingsielkundige, geregistreerde berader en dosent in die sielkundedepartement aan die Universiteit Stellenbosch. Haar werk is gefokus op vrouegesondheid en geleë in die veld van gesondheidsielkunde. Sy is die nasionale afgevaardigde vir Suid-Afrika by die European Health Psychology Society en lei die plaaslike gesondheidsielkunde spesiale belangegroep by die Psychological Society of South Africa. Sy het tans ‘n navorsingstoekenning om welstand te ondersoek onder mense wat vrugbaarheidsbehandeling in Suid-Afrika soek.

9. Prof Zozo Nene

Onderwerp: Endometriose en PCOS – Vroulike vrugbaarheid

Professor Zozo Nene is ‘n spesialis in voortplantingsgeneeskunde en ‘n verloskundige en ginekoloog. Sy is hoof van die Reproduktiewe en Endokriene Eenheid by Steve Biko Akademiese Hospitaal en die Universiteit van Pretoria. Sy is voorsitter van die subspesialiskomitee vir voortplantingsgeneeskunde by die Kollege vir Geneeskunde van Suid-Afrika. Professor Nene is ‘n Suid-Afrikaanse verteenwoordiger van WGO-FIGO-samewerking oor voorbehoeding en het in daardie hoedanigheid aanbiedings vir die WGO gelewer. Dr. Nene is hoofskrywer van die SA nasionale riglyne vir veilige bevrugting en onvrugbaarheid. Hierdie praatjie word geborg deur 3Sixty Biomedicine en SALOMETM

10. Dr Qinisile Diale

Onderwerp: Voor jy “Ek doen” sê (IVF). Self-voorbereiding om swangerskapsukses te bevorder

Dr Qinisile Diale – ook bekend as Dr Q – is ‘n vrugbaarheidspesialis en stigter en hoof- uitvoerende beampte van Family Matters Fertility Centre by Netcare Unitas Hospitaal in Centurion. Sy het deur die Universiteit van Pretoria gekwalifiseer waar sy later as senior lektor gewerk het. Sy is passievol oor die opvoeding en bystand van paartjies wat met onvrugbaarheid sukkel.

Fertility Show Africa bied aan diegene wat sukkel om swanger te raak, en diegene wat op ‘n reis na ouerskap is, ‘n unieke geleentheid om met ‘n wye verskeidenheid kundiges te skakel, op een slag en in ‘n ruimte waar hulle vrae kan vra, antwoorde kan vind en inligting van sommige van die wêreld se beste vrugbaarheidspesialiste, embrioloë, verpleegkundiges, sielkundiges, voedings- en leefstyladviseurs en toonaangewende professionele persone in die veld wat met hul eie vrugbaarheidskwessies gesukkel het.

Kry jou kaartjie hier!

Leer meer by www.fertilityshowafrica.com. Volg Fertility Show Africa op Facebook, Twitter en Instagram.

The post Ons het 10 van die sprekers wat die Fertility Show Africa 2022 sal bywoon, uitgelig appeared first on rooi rose.