Die internet het omtrent gegons oor Chanel se jongste Lente/Somer 2016 Haute Couture-vertoning in Parys. Daar word verwys na Chanel se “doll house”-vertoning omdat die modelle popmooi gelyk het en ook uit ’n lewensgrote pophuis geklim het! Dramatiese oogomlyner bo en ander die oë is gebruik. Hierdie voorkoms is vreeslik mooi, maar dalk ’n bietjie gewaagd vir die meeste van ons.

Fotograaf: Kristina Stojiljkovic; grimering: Cheryl Parker, model: Emma van Outlaws.

Oogomlyner en sagte pienk lippe

Hierdie voorkoms is dalk meer drabaar vir die van ons wat nie in pophuise bly en op loopplanke loop nie.

Op hierdie foto het ons ’n moderne kat-oog voorkoms geskep deur oogomlyner bo en onder die oog te gebruik. As jy ’n stabiele hand het en goed is met vloeibare oogomlyner, kan jy dit gebruik. Anders is ’n oogpotlood ’n veiliger opsie. Begin by die binnehoek van jou boonste ooglid en trek die lyn uitwaarts en doen dieselfde met die onderste lid. Laat die twee lyne by die buitehoeke ontmoet.

Wenke vir oogomlyner

• Kyk altyd af wanneer jy jou boonste omlyner aanwend.
• Rus jou hand op ’n stabiele oppervlak.
• As jou vel nie baie ferm rondom jou oogarea is nie, lig jou wenkbrou effens met jou ander hand se vingers om die lyn stywer te trek.
• As jy ’n fout gemaak het, wag tot dit droog is, doop ’n oorstokkie in grimeerverwyderaar en begin weer.
• Moet nooit vloeibare omlyner gebruik as jy haastig is nie!
• As jy ’n kat-oog voorkoms wil skep en haastig is, kies eerder ’n potlood en smeer (smudge) dit ’n bietjie sodat dit lyk asof jy dit met opset gedoen het.

Vloeibare oogomlyners

Potlode

Sagte pienk lippe

’n Mooi en natuurlike pasmaat vir die voorkoms. Vir ’n meer dramaties voorkoms kan jy effens helderder gaan, maar ons verkies natuurlike pienk skakerings.

The post Vroulike sagte pienk grimering appeared first on rooi rose.

Vraag

Hoe trek ek met oogomlyner die perfekte lyn teen my wimpers? Ek sukkel om ’n netjiese, reguit streep te trek. Kan julle ’n goeie oogomlyner aanbeveel?

Antwoord

Maak eerstens seker dat jy die regte borseltjie het – ek werk makliker met ’n skuins borseltjie. Enigiets wat te dun en te lank is, sal nie stabiel genoeg wees nie en jy sal onvermydelik met daardie ongewenste, oneweredige lyn opgeskeep sit. Hou die borseltjie in jou een hand en trek met ’n vinger van die ander hand die buitehoek van jou oog liggies na jou slaap toe – die vel op jou ooglid moet styfgetrek wees wanneer jy die oogomlyner aanwend, anders sal jy nie daardie lyn perfek regkry nie. Moenie die lyn in een beweging probeer trek nie – doen dit eerder stukkie vir stukkie en wees geduldig.

*Marlinette Newman is ’n vryskuthaar- en grimeerkunstenaar in Kaapstad

Ons sê Probeer gerus ’n potjie jel-oogomlyner en een van hierdie skuins borseltjies.

MAC Angled Brush in 208, MAC Paint Pot in Blackground

Inglot AMC Gel Eyeliner, Inglot Make Up Brush 31T

The post Hoe om oogomlyner aan te wend appeared first on rooi rose.