Die geure van heerlike koffie en vars gebakte kolwyntjies oorweldig jou as jy by die deure van State5 in Greenside, Johannesburg instap en die atmosfeer, saam met die lekker musiek, laat mens dadelik welkom voel.

Ons het ’n verskeidenheid koffie geproe wat op die oomblik baie gewild is in Amerika en ook besig is om opslae in Suid-Afrika te maak. Tog, na my mening, staan die ‘Cold Brew coffee on tab’ kop bo water uit.

Dit is egter ’n unieke smaak wat sommige koffiedrinkers dalk nie mag aanstaan nie. ’n Ander drankie op my lys van gunstelinge is die ‘Pancake Late’ wat State5 self brou met kaneel, suiker en vanielje. Dit is definitief ’n moet-proe!

Die kos is ook uit die boonste rake. Dit is besonders lekker ,vars en geurig en op versoek word ’n brandsousie saam met jou dis bedien.

Sate5 laat my aan ’n tipiese, gesellige, New Orleans-eetplekkie dink. Die personeel is vriendelik, baie hulpvaardig en deel graag hul kennis oor koffie. Dit was baie interessant om te hoor hoe hulle die koffie rooster, maal en dan ook perkoleer om verskillende smake te kry.

Dit was ’n heerlike ervaring. State5 is definitief ’n plek wat my gou weer sal sien.

Loer gerus op hul webblad wat ook een van die dae ’n aanlyn-winkel gaan wees.

Op soek na nog koffie-inspirasie?

Loer na ons resensie oor die Whippet in Linden óf lees meer oor ons ervaring by die beste koffiewinkel in die wêreld.

Nie regtig ’n koffiedrinker nie?

Lees ons resensie oor Life Grand Café vir iets meer Mediterreens óf lees oor ons besoek aan die Koi-restaurant vir ’n Sjinese-ervaring.

The post Heerlike koffie in ’n gesellige atmosfeer appeared first on rooi rose.

Naam
Michelle Nortje

Waar ons was
LIFE Grand Café

Ligging
Hyde Park Corner, Johannesburg

Tipe kos
Mediterreens, Tapas, Pizza, Sushi en Vegetaries

Koste en spyskaart
Gaan na lifegrandcafe.com/

Atmosfeer
Gemaklik. Die ideale restaurant vir ’n middel-van-die-week ete saam met jou geliefde, of ’n rustige kuier saam met vriende oor die naweek.

Wat het dit onvergeetlik gemaak
MCC op die perfekte temperatuur, goeie diens, die rustige atmosfeer en natuurlik sjokolade-pizza vir nagereg.

Wat het ons fassinerend gevind
Die dekor! ’n Vloer wat gemaak is uit gebruikte koeëldoppies, interessante ligte en ’n “soetkroeg” met die heerlikste gebak.

LIFE Grand Café in Hyde Park Corner is beslis ’n besoek werd. Die styl, atmosfeer, kos en diens is van top gehalte en die dekor laat jou voel of jy iewers in ’n Franse restaurant uiteet. Ons gunstelingdeel op die spyskaart was die Tapas – gebraaide chorizo met geroosterde soetrissies, geroosterde beet met dennepitte en balsamiekasyn en bees-kofta met brandrissies. Die hoofgereg van T-been met uieringe en ’n hemelse sous, asook die seekosdis was onvergeetlik.

Die eienaars Maira, John en Mixali Koutsoudakis het ’n wenresep beet met hierdie restaurant (daar is ook restaurante in Midrand en Waterkloof). Aandetes, skemerkelkies en ’n High Tea is populêr terwyl die aanbieding van disse jou asem wegslaan.

As jy lief is vir yskoue vonkelwyn, goeie wyn, heerlike kos en ’n rustige atmosfeer in ’n rustieke omgewing is LIFE Grand Café ’n restaurant wat jy moet besoek.

Oop vanaf 7vm tot 10nm, Dinsdag-Saterdag, en 7vm tot 4nm, Maandag en Sondag
Winkel MM24, Hyde Park Corner-winkelsentrum, Hyde Park
Tel: (011) 325-4350

The post Restaurantresensie: LIFE Grand Café appeared first on rooi rose.