Jan Hendrik van der Westhuizen is die eerste Suid-Afrikaner wat in 2016 ’n Michelin-ster ontvang het vir sy restaurant JAN in Nice, Frankryk. Sedertdien het JAN daarin geslaag om elke jaar sy ster te behou. Hy was vandeesweek Rian van Heerden se gas op Laataand by Rian.

Die gesprek het begin toe Rian wou weet wat Jan in Suid-Afrika maak, aangesien hy grotendeels in Frankryk bly. Sy antwoord het Rian heeltemal verras: “Somer in Frankryk en somer in Suid-Afrika is opposites. Dit maak sin as ek ses maande hier is en ses maande daar. Maar ek wil terugkom na my mense toe, my familie, vriende en my restaurante hier.”

Jan het vertel hoe sy pa altyd wou hê hy moet die trekkers op hul plaas bestuur, maar hy het nie daarin belanggestel nie. Sy sussie het daardie gedeelte oorgeneem. Hy het eerder die mielies by die koöperasie in die parkeerarea gaan smous. “Dit het ge-move. Ek het R1 ’n sakkie gekry. My pa het natuurlik R14 gevat, en ek het R1 gekry,” het hy laggend gesê.

Sy inspirasie vir kook kom van sy Ouma Hessie af. Jan het haar vereer deur ’n restaurant genaamd Maria regoor JAN in Nice oop te maak toe sy 92 was. “Sy was nog nooit uit die land gewees nie, en toe vlieg ek haar Nice toe om haar restaurant oop te maak. En sy het net gesit en huil en kyk na haar portret teen die muur,” het Jan vertel en effe emosioneel geraak. 

 

View this post on Instagram

 

A post shared by Jan Hendrik van der Westhuizen (@janhendrikvanderwesthuizen)

Die gesprek het later gedraai na JAN se Michelin-ster, en Rian het opgemerk dat dit seker moeilik moet wees om dit elke jaar te behou.

“Net toe ons die ster gekry het, het ek slaappille begin vat, want ek kon nie slaap nie. Dit is asof iets agter jou staan – jy’s bang vir ’n skaduwee. Elke jaar op 23 Januarie wag jy, en as daardie announcement deurkom en jou naam is nie gelys nie – dit is soos om elke jaar ’n rapport te kry en iemand judge jou konstant, elke dag van jou lewe. En dis nie ligte judge nie, dis soos jou besigheid is klaar. Ek het nou al vrede gemaak daarmee. Ek dink ek het nou al soveel gewys en gedoen saam met my span dat – weet jy wat ? Ek wil dit nou nie curse nie. Ek slaap lekker in die aand sonder enige pille,” het hy geantwoord.

Rian en Jan het daarna entoesiasties gesels oor die verskillende geregte op sy spyskaarte wat deur Suid-Afrikaanse disse geïnspireer is.

Daarna het Rian Jan met sy tweede gas, Deona van Vuuren, verras – die eienaar van Cape to Cuba in Kalkbaai, Kaapstad. Deona het vertel hoe haar restaurant in 1999 die eerste mojito in Suid-Afrika gemaak het. Sy het Kuba besoek en die resep daar gekry. Hulle het gesels oor die laaste gereg wat hulle eendag sou wou eet en hul liefde vir die gasvryheidsbedryf.

Rian se volgende gas is die kos-entrepreneur Ina Paarman, wie se produkte wêreldwyd beskikbaar is.

Laataand by Rian word Dinsdagaande om 21:00 op kykNET (DStv-kanaal 144) uitgesaai en is ook op DStv Stream en Catch Up beskikbaar.

Lees ook: Aktrise Marise Loots wil nes haar Diepe Waters-karakter, Selena ’n verskil maak

The post Jan Hendrik van der Westhuizen op ‘Laataand by Rian’: ‘Ek wil terugkom Suid-Afrika toe’ appeared first on rooi rose.

Die bekende model en aktrise Christina Storm was vandeesweek Rian van Heerden se gas op Laataand by Rian, waar sy openhartig gepraat het oor haar lewe, haar verhouding met wyle James Small en die uitdagings wat sy ná sy dood moes trotseer. Christina was reeds ’n gesogte model toe sy die stout seun van Suid-Afrikaanse rugby in 1996 ontmoet het, maar haar pad daarna was allesbehalwe eenvoudig.

Christina woon deesdae in die Oos-Kaap in St. Francisbaai. Toe Rian haar vra wat sy daar doen, het sy speels geantwoord: “So min as moontlik. Ek het ’n gastehuis in St. Francisbaai op die kanale, en ek gebruik dit nie as ’n gastehuis nie, want ek is lui.”

Rian het haar uitgevra oor hoe alles vir haar begin het, en sy het meer vertel oor hoe sy op 18 die eerste keer in Frankryk op Vogue se voorblad beland het. Ná skool het sy haar pa in Nederland gaan besoek, waar ’n fotograaf haar raakgesien het. “Vir my was dit amazing because I managed to dodge so many bullets, and I made it to the top,” het sy gesê.

Op 22 was sy terug in Suid-Afrika, en dit is toe dat sy vir James in ’n nagklub ontmoet het. Rian het gevra wie James werklik was, en hoe dit verskil het van wat die media oor hom geskryf het. “Hy het met sy hart op sy mou geloop, and he’s just really the most misunderstood. Dit breek my hart dat hy as gevolg van joernaliste soveel suffering moes deurgaan.”

Rian het haar ook gevra oor James se bekentenis dat hy haar geslaan het. Sy het eerlik geantwoord: “Ons het mekaar geklap. We were young punks. Ek het hom seerder gemaak as wat hy my gemaak het. Hy was die enigste man wat na my kon omsien tot die einde toe.”

Toe Rian vra hoekom dit nie uitgewerk het nie, het sy gesê hulle was albei baie passievol en dat hy haar menigmale gevra het om weer te probeer, maar sy kon nie. “Ons het so mooi co-parent tot op die einde toe. He was just the best father.”

Die gesprek het ’n ernstiger toon aangeneem toe Rian verwys het na die sensasie ná James se dood en die berigte dat hy kaal gevind is. Christina het dit onmiddellik ontken: “James het ’n hartaanval gehad. Hy sou sy meisie daar ontmoet het. Call it a nightclub, call it a whatever. But he was sitting there working on his laptop, ordered a drink. He was waiting for his long-term girlfriend, Julie, who he had a child with. Hy het ’n hartaanval gehad, and as they tried to pick him up, het sy broek afgeslip. He was not naked. How dare you? ‘Small sterf kaal in ’n nagklub’ en my kind moet dit sien?!”

 Rian het opgemerk dat dit duidelik is dat sy ná alles steeds lief is vir James. “He will be the only love of my life, forever,” het sy geantwoord.

Sy het verder vertel hoe moeilik dit vir haar was ná sy dood: “Dit was aaklig. Dit was so ’n massive verlies vir my kind en om my kind te sien deur daai pyn gaan – haar pa was haar beste vriend. It changed me as a person. Ek het paniekaanvalle gekry en toe, ’n maand later, eindig ek op in ’n rehab for depression and anxiety.” Christina was vir ’n maand lank in rehabilitasie, maar erken dat dit nie gehelp het nie. Daarna was sy weer vir agt weke in ’n sentrum. Sy sien nou al die afgelope vier jaar ’n sielkundige.

Tot Rian se skok het Christina ook vertel dat sy al ’n nag in die tronk deurgebring het nadat sy in ’n polisiekar vasgery het. “Dis die eerste aand in my lewe wat ek die hele aand wakker was.”

Die gesprek het emosioneel geraak toe Rian vir haar sê hy kan sien sy is nie oukei nie. Sy was verras en het geantwoord: “I hate to hear that. Dis ’n baie onsekere tyd in my lewe. Ek kan niks doen aan môre nie, ek kan niks doen aan gister nie, ek kan net iets doen aan waar ek nou is,” het sy gesê terwyl die trane loop.

Rian het die onderhoud afgesluit deur haar aan te moedig om na die regte mense uit te reik. Sy het emosioneel geantwoord: “This is not the end of me.”

Rian se volgende gas is die legendariese komediant Barry Hilton, wat vir lank met depressie gesukkel het, al het hy ons vir dekades laat lag. Vandag gaan dit beter met Barry, en hy is gereeld op die verhoog as motiveringspreker. 

Laataand by Rian word elke Dinsdagaand om 21:00 op kykNET (DStv-kanaal 144) uitgesaai en is ook op DStv Stream en Catch Up beskikbaar. 

Lees ook: Ons Moedersdaggeskenkgids: Bederf vir Ma!

The post ‘Dis ’n baie onsekere tyd in my lewe’: Christina Storm raak emosioneel op ‘Laataand by Rian’ appeared first on rooi rose.

Die sanger en liedjieskrywer Rudi Claase is al 25 jaar in die musiekbedryf, maar is deesdae veral in die nuus weens sy gesondheidsprobleme. Daar was talle ander storms ook in sy lewe, maar tog lyk Rudi gelukkig. Hy was vandeesweek Rian van Heerden se gas op Laataand by Rian.

Rudi het eerlik gepraat oor hoe dit werklik met hom gaan en erken dat sy gesondheid ’n groot faktor in sy daaglikse lewensgehalte is. Ten spyte daarvan bly sy ingesteldheid positief en fokus hy daarop om vorentoe te beweeg.

Volgens Rudi was hy nooit werklik voorbereid op die werklikhede en uitdagings van roem nie. Mettertyd het hy egter besef dat openbare aandag onafwendbaar is as jy kies om in die kollig te leef. Hy glo ’n mens moet die goeie én die slegte van bekendheid aanvaar as deel van die pakket.

Die gesprek het ’n ongewone kant van sy persoonlikheid onthul toe hy vertel het van sy vroeë belangstelling in begraafplase – plekke wat hy as stil en sonder die geraas van die wêreld beskryf het.

Rian en Rudi het gesels oor sy suksesvolle sangloopbaan saam met Corlea Botha, en Rian wou weet hoekom hulle paaie geskei het. Rudi het geantwoord: “Ek het geen idee nie. Jy sal vir haar moet vra. Ek het 16 jaar laas met haar gepraat.” Hy het erken dat hy dinge probeer regmaak het, maar ook verklap dat hulle nie in die openbaar van mekaar mag praat nie, aangesien daar ’n ooreenkoms in plek is.

Die gesprek het daarna gedraai na Rudi se gesondheid. Rian het gevra hoekom hy soveel private goed met die publiek gedeel het. “Ek het nog nooit die mense gelos nie. Selfs toe ek in die verlede in my loopbaan op plekke gelos is, het ek nie die mense gelos nie. Jy raak ook baie geheg aan die band wat jy met die vermaaklikheidsindustrie het. En die oomblik as dit weggeraap word, is daar ’n stilte. En as jy nie jouself keer nie, maak jy daai stiltes vol snert. Ek dink oversharing is ’n ding, maar nou kan ek terugkyk en dink: ‘Weet jy wat, al was jy nog net semi-gereed, hier lê jy ten minste met ’n pyp in jou neus in die hospitaal en bid vir mense.’ ”

Rudi het gesê hy is al ongeveer die afgelope tien jaar siek. Vyf van daardie jare was hy in en uit by die hospitaal gewees, en die afgelope drie jaar is hy ernstig siek.

Rian wou weet wat werklik fout is, en Rudi het verduidelik: “Ek is gebore met ’n blindederm wat gebars het toe ek tien dae oud was. Ek was ’n baie sieklike kind. Tydens Covid het ek ’n breuk opgedoen. Ek is geopereer en ’n jaar later het dit geskeur. Iemand het weer ’n operasie gedoen en daarna het ek by ’n chirurg geëindig wat 14 operasies in 90 dae gedoen het.” 

Toe Rudi ná die laaste operasie wakker word, was hy verlam en net sy oë kon beweeg. Hy moes weer leer loop en praat en het eers onlangs weer begin oefen om te sing. Rudi is ook ’n maand gelede gediagnoseer met Cushing-sindroom – ’n gewas op die brein.

Rian het gevra oor die oomblik toe hy vir ongeveer 30 sekondes klinies dood was. Rudi het verduidelik dat sy hart gaan staan het nadat hy medikasie gekry het waarvoor hy allergies is. “Wat ek vir jou kan sê van daai ervaring, is dat ek nog nooit in my lewe vir iets so dankbaar was soos vir daai halwe minuut wat my hart gestop het nie. Want as dit nie gebeur het nie, sou ek nie die ewige lewe kon gehad het in die Here wat ek nou vandag het nie. Die Here moes my fisies doodmaak om my te laat lewe.”

Rian en Rudi het ook oor sy vrou, Suzette, gepraat en oor hoe sy hom deur alles ondersteun het. Hulle is al tien jaar getroud.

Een van die grootste treffers wat Rudi geskryf het, is “Sewe oseane”, wat Andriëtte Norman bekend gemaak het, en dit was toe Andriëtte wat as sy verrassingsgas ingestap het. Hulle het lekker oor die liedjie gesels, en sy het vertel hoe dankbaar sy is dat Rudi haar daarmee vertrou het.

Die volledige episode is op DStv Stream en Catch Up beskikbaar. Laataand by Rian word elke Dinsdagaand om 21:00 op kykNET (DStv-kanaal 144) uitgesaai.

Lees ook: Groot name en groter geheime in kykNET se nuwe misdaaddramareeks

The post Rudi Claase op ‘Laataand by Rian’: ‘Die Here moes my fisies doodmaak om my te laat lewe’ appeared first on rooi rose.

Die vyfde seisoen van Laataand by Rian skop op Dinsdagaand 7 April om 21:00 af, en saam met Rian van Heerden gaan kykers weer die ander kant van ’n wye verskeidenheid bekendes leer ken. 

Wat maak van iemand die ideale gas? 

“ ’n Goeie gas het al die verskillende seisoene van die lewe beleef,” sê Rian. “Hulle staan uit binne hulle spesifieke veld omdat hulle vir goeie, of slegte, redes die nuus gehaal het.”

Hy sê hy lok nie gaste uit om omstrede dinge kwyt te raak of ooremosioneel te word nie. 

“ ’n Gas moet besluit waarheen hy of sy die gesprek wil neem. Die rol van die onderhoudvoerder is dan bloot om hulle met waardigheid na ander onderwerpe te bring waaroor hulle binne die beskikbare tyd gesels. Die doel van ons tweede gas is juis om die gesprek na ’n volgende vlak te neem, of ’n nuwe dinamiek daaraan te gee. Dit is natuurlik ook altyd ’n verrassing vir die hoofgas wie hierdie persoon gaan wees.” 

Van die ander gaste waarna kykers kan uitsien, is die sanger Rudi Claase, Tony Leon, wat die leier van die DA van 2000 tot 2007 was, en die legendariese komediant Barry Hilton. 

In die vyfde seisoen van Laataand by Rian gaan kykers weer die ander kant van ’n wye verskeidenheid bekendes leer ken. (Foto: Verskaf/kykNET)

As hy enige drie gaste op Laataand by Rian kon hê, wie sou dit wees? 

“Dit is altyd ’n moeilike vraag, maar op die oomblik is dit oudpresident Jacob Zuma, Donald Trump en koning Charles.” 

Laataand by Rian begin op 7 April om 21:00 op kykNET (DStv-kanaal 144) en sal ook op DStv Stream en Catch Up beskikbaar wees. 

Lees hier: Nataniël se nuwe vertoning by Suidoosterfees te sien: Verwag “skoonheid, vermaak en hopelik iets onverwags”

The post Rian van Heerden se laatnag-gesprekke gaan weer verras & en jy gaan wil luister appeared first on rooi rose.

Is Amerika werklik die land van hoop en drome – of bloot die volgende hoofstuk in Suid-Afrikaners se soeke na veiligheid en stabiliteit?

In Beloofde Land, ’n nuwe dokumentêre reeks van ses episodes wat op 7 Januarie om 20:00 op kykNET (DStv-kanaal 144) begin, reis Rian van Heerden deur Suid-Afrika en die VSA om hierdie omstrede onderwerp vanuit alle hoeke te ondersoek.

Die reeks delf in die lewens van Suid-Afrikaners wat die sprong na Amerika reeds gemaak het of oorweeg, en kyk indringend na hoe dié besluit hul identiteit, veiligheid, finansies en menswees beïnvloed het.

Rian en sy span het eksklusiewe toegang gekry tot mense en gemeenskappe wat selde bereid is om hul stories op kamera te deel. Deur middel van gesprekke, deeglike ondersoeke en vergelykings tussen die twee lande, word temas soos vrees, hoop, verlies, isolasie, oorlewing en nuwe beginne oor die loop van ses episodes verken.

“Die verfilming van hierdie reeks het my baie gehelp met my eie worstelinge oor Suid-Afrika en sy toekoms. Ek dink elke kyker sal, soos ek, ná hierdie reis werklik genoeg insig hê om eerlik oor hul eie toekoms te besluit,” sê Rian.

Emigrasie na die VSA is al dekades lank deel van die Suid-Afrikaanse verhaal, maar toe president Donald Trump ’n uitvoerende bevel onderteken het wat aan Afrikaners spesiale vlugtelingstatus gee, het die debat weer opgevlam.

Van die grootste redes waarom Suid-Afrikaners die land verlaat, kom onder die loep wanneer slagoffers van traumatiese plaasaanvalle en ander gewelddadige misdade hul stories deel. Ons vind ook uit of van Suid-Afrika se grootste boere beplan om te bly of te gly.

In Amerika gesels Rian met Suid-Afrikaners wat vrywillig daarheen verhuis het, hetsy om professionele redes of as deel van die H2A-program, waarmee ’n groot aantal jong Afrikaanse boere na Amerikaanse plase gelok word.

En dan is daar dié wat glo hulle het geen ander keuse gehad as om Trump se aanbod te aanvaar en as vlugtelinge te vertrek nie.

“Dit was vir my treffend hoe Suid-Afrikaners in Amerika, selfs ná jare daar, steeds iets mis – iets is nie daar nie, en selfs in die land, ooglopend van melk en heuning, kan baie van hulle dit nie vind nie. Dit was soms geweldig moeilik om met hulle te gesels, ook met diegene wat President Trump se destydse aanbod aanvaar het. Dit was asof heelwat van hulle se antwoorde op my vrae op ’n punt begin ooreenstem het,” sê Rian.

Deurgaans bly die sentrale vraag: Is Amerika werklik die beloofde land – of lê ons toekoms steeds hier, in Suid-Afrika?

Die reeks word deur Provoco vervaardig, Rian se produksiehuis, agter Schuster, Hougaard en Laataand by Rian.

Beloofde Land begin op 7 Januarie om 20:00 op kykNET (DStv-kanaal 144) en sal ook op DStv Stream en Catch Up beskikbaar wees.

Lees ook: Margaret uit Hollywood: Reba McEntire, die Koningin van Country, maak opslae op 70

The post Is Amerika regtig die beloofde land? Rian van Heerden se nuwe dokkiereeks stel ondersoek in appeared first on rooi rose.

Leon Schuster is al dekades volksbesit, en nou word sy lewensverhaal – die eerste keer, in ’n dokumentêre reeks van vyf episodes vertel. Schuster begin op Woensdag 1 Oktober om 20:00 op kykNET (DStv-kanaal 144). 

“Leon Schuster is ’n nasionale skat en seker naas Madiba, oor generasies heen, die bekendste mens in Suid-Afrika,” sê Rian van Heerden. Sy produksiemaatskappy, Provoco, is die vervaardigers van die reeks. “Dit was vir my egter vreemd dat sy storie nog nooit in diepte vertel is nie. Ek wou graag die uitdaging aanpak om sodoende hopelik sy nalatenskap te verewig.”

Vir sy lewensbydrae tot die vermaaklikheidsbedryf is Leon ook vanjaar by die Silwerskermtoekennings vereer. Hierdie dokumentêre reeks is net nog ’n veertjie in die hoed van ’n absolute ikoon. In die vyf episodes sal daar gekyk word na Leon se jeugjare in Bloemfontein, sy jare as radio-omroeper en die latere sukses wat hy met rolprente soos You Must Be Joking en Mama Jack behaal het.  

“Daar is verskeie hoogtepunte, maar my heel eerste candid movies (You Must Be Joking en Oh Shucks… It’s Schuster) staan uit, want dis waar my rolprentloopbaan begin het,” het Leon gesê oor sy verering. “Oh Schucks… It’s Schuster het my op die map gesit. So, ek sal altyd dankbaar wees dat mense so mal was daaroor. Maar Mama Jack was die grootste leerskool. Om daai karakter te ontwikkel was ’n ongelooflike uitdaging, maar ek het dit so geniet. Nie almal was mal daaroor nie, maar my hart was in die karakter en ek het ongelooflik baie uit haar geleer.” 

“Ek hoop kykers kry die waarheid. Die rou waarheid. Nie die Schucks-waarheid, Mr Bones-waarheid of Mama Jack-waarheid nie – die Leon-waarheid. Komediante is mense wat gewoonlik vereenselwig word met grapjasse en grapgatte, maar inherent is hulle eintlik baie diep mense. En ek dink bietjie van daai diepte skemer deur.”

Leon sê die grootste uitdaging met die maak van die reeks was Rian se indringende vrae.

“Rian is baie, baie slim en vra gewoonlik vir jou die vraag wat jy die minste verwag het. Dan moet jy op jou voete dink anders gaan jy sink. Dink of sink. Ek belowe dit was moeiliker as Wie word ’n miljoenêr?. Rian het ’n sekere aanslag en is nie jou gewone onderhoudvoerder nie. Dis dieper, dis anders.”

In dié dokkie word daar ook onderhoude gevoer met mense wat saam met Leon gewerk het en met van diegene deur hom uitgevang is. Eddie Eksteen, Carike Keuzenkamp, Jack Parow, Helen Zille, Alfred Ntombela (ook bekend as Shorty), Rob van Vuuren en Desmond Dube is van die bekendes wat hulle stories deel. 

Dit is egter nie net pret en plesier nie. Leon het die afgelope paar jaar probleme met sy gesondheid, en dit is veral sy rug wat hom kortwiek. Hy het amper konstante pyn en praat openlik oor die foute wat hy in sy professionele en persoonlike lewe gemaak het. 

Schuster beloof om ’n kant van Leon te wys wat Suid-Afrikaners nie ken nie. Daar sal beslis genoeg humor en vermaaklike staaltjies wees, maar ook emosie en die trane van ’n geliefde hanswors. 

Hoe wil Leon hê mense moet hom onthou?

“As iemand wat vreugde gebring het vir Suid-Afrikaners – iemand wat mense bymekaargebring het. Daar is niks beter as om iemand te laat lag nie,” sê hy.

KYK | Schuster se voorskou

Schuster begin op 1 Oktober om 20:00 op kykNET (DStv-kanaal 144), en die reeks sal ook op DStv Stream en Catch Up beskikbaar wees. 

Lees ook: Susan Coetzer verjaar: ’Ek leef in groot dankbaarheid’

The post Dokumentêre reeks oor Leon Schuster eersdaags op kykNET appeared first on rooi rose.

Garry Paterson van Pretoria het in gisteraand se episode van Wie word ’n miljoenêr, die grootste vasvraprogram ter wêreld in Afrikaans, sy opmars na die R1 miljoen voortgesit nadat hy die vorige week die R125 000-kerf gehaal het sonder om enige van sy drie hulplyne in te span.

Die programaanbieder en storieverteller van formaat, Rian van Heerden, moes natuurlik weer ’n storie oor die Skotte vertel. Garry is immers ’n Skot.

“Die Skotte is ’n nasie wat al ’n groot klomp hiper-slim mense opgelewer het. Alexander Graham Bell, uitvinder van die telefoon; John Logie Baird wat die televisie uitgedink het, en Alexander Flemming wat penisillien ontdek het.

“Maar as jy nou ’n bietjie lekker braai-spice oor ’n Skot gooi en hom so 40 jaar in Afrikaans, en die Suid-Afrikaanse son, marineer . . . dan kry jy nou vir Garry Paterson.”

Terug in die vuurwarm stoel

Garry het sommer met die gaan-sit gewys hy was reg vir die vrae wat mag kom. En vriend Piet was weer daar in die gehoor om hom te ondersteun. Rian het skertsend vertel dat daar al reeds bespiegel is of daar ballonne of konfetti vrygelaat gaan word sou Garry die oorblywende drie vrae korrek antwoord.

“Net nie gholfballe nie,” was Garry se komiese reaksie.

Lyndon B Johnson is in 1963 vir die eerste keer op Air Force One as Amerikaanse president ingehuldig en Garry het sonder huiwering die korrekte antwoord verskaf. Sy prysgeld het opgeskuif na R250 000!

Met R500 000 wat wink, was Garry onseker oor die korrekte antwoord. Wie was die laaste man wat in 1972 op die Maan geloop het? Hy het sy eerste hulplyn, die 50/50-opsie, gekies. Maar selfs die twee name wat oorgebly het, het hom nog oortuig van wie die regte antwoord is nie. Die gehoor se hulp is ingeroep, en 89% van hulle het gedink dis John W. Young.

Garry het besef nie een van sy vriende gaan die antwoord ken nie, en sy laaste hulplyn was Rian, wat dit duidelik gemaak het dat hy ook onseker is oor John W. Young. Dis net daar waar Garry besluit om eerder die geld te vat as om ’n kans te waag. Hy het darem ’n welkome R250 000 huis toe gevat nadat hy “ ’n noodlanding uitgevoer het,” aldus Rian.

Die regte antwoord was Eugene Cernan, die bevelvoerder van Apollo 17. Young was deel van die bemanning van Gemini 3, Gemini 10, Apollo 10, Apollo 16 en die eerste pendeltuigvlug (STS-1) en die bevelvoerder van STS-9.

Sy wengeld van R250 000 maak van Garry die voorloper wat wengeld aanbetref in die huidige seisoen van Wie word ’n miljoenêr.

Wie word ’n miljoenêr? word Woensdagaande om 20:00 op kykNET (DStv-kanaal 144) uitgesaai.

Lees ook: Drie legendes vanjaar by die Silwerskermtoekennings vereer

The post ‘Wie word ’n miljoenêr’: Skotse slimkop is hierdie seisoen se grootste wenner sover appeared first on rooi rose.

In die tweede episode van die vyfde seisoen van Wie word ’n miljoenêr het Nick Grobler, ’n chemiese ingenieur van Johannesburg, die meeste geld tot dusver in sy sak gesteek toe hy met R50 000 huis toe gegaan het.  

Rian van Heerden is weer slaggereed om die deelnemers met moeilike vrae te bestook in die wêreld se grootste vasvraprogram op kykNET. Dis beslis makliker om in die gerief van jou eie huis die antwoorde uit te basuin, maar met die kameras en kollig op jou gefokus, kan die senuwees soms lol . . .  

Die grootste vraag natuurlik is of iemand vanaand daardie R1-miljoen gaan wen.  

Die eerste vinnigste vingers 

Om die deelnemers se kennis én vingerspoed op die proef te stel, moet hulle sportbyeenkomste in chronologiese orde binne ’n kalenderjaar rangskik. Die korrekte orde is: Kaapstad-fietstoer, Twee Oseane-ultramarathon, Comrades-marathon en dan die Durban July-perderen. 

Renée Swanepoel (Foto: Verskaf/kykNET)

Net een deelnemer is in die kol, en dis Renée Swanepoel (64), ’n pensioenaris van Murraysburg, wat met 9.422 sekondes agter haar naam na die warm stoel koers inslaan. Manlief John is in die gehoor om haar te ondersteun. 

Sy draf die eerste vyf vrae in ’n ommesientjie kaf en kan R10 000 in die sak steek. Haar volgende vangnet stel sy op vraag 9 vir R30 000. 

Maar voor hulle verder gaan, wil Rian weet waar op deeske aarde Murraysburg geleë is. Renée sê dis in die Wes-Kaap, sowat 42 km van die N1 af, presies halfpad tussen Graaff-Reinet en Victoria-Wes en “dis die dorp met die heel beste mense in die wêreld”. 

Met haar volgende vraag oor watter bestanddeel nie deel maak van die tradisionele Engelse nagereg Eton Mess nie, besluit sy om die gehoor se hulp in te roep. 84% van die gehoor is oortuig dat skuimpies nie deel is van die nagereg nie. Tog is Renée nie oortuig nie. 

Vir die eerste keer in die reeks word Rian as hulplyn ingespan. 

“So, ek het ’n restaurant . . . maar ons poedings is beperk,” terg Rian. Hy stem saam met die gehoor en Renée besluit om dit as haar finale antwoord aan te bied.  

Maar genugtig – hulle is almal verkeerd! Dis toe al die tyd sponskoek. En daarmee moet Renée die warm stoel ontruim met ’n heerlike R10 000-meevallertjie. 

Die tweede vinnigste vingers 

Sou jy die Afrika-lande van noord na suid kon rangskik? Al vyf deelnemers is korrek, maar dis Janus Bezuidenhout, ’n boorling van Bethlehem, wat die orde binne 5.248 sekondes korrek rangskik het: Tunisië, Rwanda, Mosambiek en dan Lesotho. Andrea was vuurwarm op sy hakke met 5.372 sekondes . . . 

Janus Bezuidenhout (Foto: Verskaf/kykNET)

Janus (37) is ’n meganiese ingenieur en Rian wil baie gou by hom weet of hy enige vrae oor poedings aan hom gaan stel.  

“Nee, nee, nee,” kom dit vinnig van Janus. Sy vrou, Leandi, ondersteun hom vanaand vanuit die gehoor. 

Kort voor lank kan Janus ook R10 000 in sy sak steek, ’n mylpaal wat hy vooraf voor gewens het.   

Net soos Renée besluit hy ook om konserwatief te speel en sy vangnet op vraag 9 vir R30 000 te stel. 

Om vas te stel watter Suid-Afrikaanse eiland ’n Unesco-wêrelderfenisgebied is, besluit Janus om die gehoor as hulplyn in te span. Hy kan nie tussen Marion-eiland en Robbeneiland besluit nie. 82% van die gehoor stem vir Robbeneiland. Gelukkig is hulle hierdie keer in die kol en Janus skuif op na R15 000. 

By die agste vraag haak hy egter vas. Watter kossoort se bynaam is “Russiese penisillien” omdat dit as antiseptiese middel op die slagveld tydens die Wêreldoorloë gebruik is? Hy versoek die 50/50-hulplyn en laventel en knoffel bly oor. 

Janus besluit om sy “Bel ’n pêl”-hulplyn in te span. Dis sy derde en laaste hulplyn en hy gaan vir sy tannie Christa vra om uit te help. Sonder huiwering kom die antwoord: Knoffel.  

Rian vertel die Russe het knoffel glo net so direk op wonde gebruik as ontsmettingsmiddel  en ook vir verkoues en om koors te breek. Dan merk hy skalks op dat dit ook bekend staan as “groente-viagra” maar hy weet nie waar hulle dit aangewend het nie . . . 

Maar die “P” in die woord ChatGPT knikker hom uit en sonder enige verdere hulplyne besluit Janus om die aftog te blaas met R25 000 in die sak. Terloops, die korrekte antwoord was “Pre-trained” (Chat Generative Pre-trained Transformer). 

Die derde vinnigste vingers 

Sjoe, wat ’n vraag. Deelnemers moet vlugrampe in die korrekte orde rangskik. Wie onthou die Hindenburg-blimp? Dan is dit die Suid-Afrikaanse Lugdiens se rampvlug, die Helderberg, gevolg deur die 11 September-terreuraanvalle op New York se Twin Towers en meer onlangs die Maleisiese vlug MH370 wat van die radar af verdwyn het. 

Renier Benson (Foto: Verskaf/kykNET)

Drie van die oorblywende vier spelers is in die kol, maar dis Renier Benson wat binne 6.102 sekondes die voortou geneem het. Renier (30) is ’n onderwyser van Germiston en sy kêrel van die afgelope twee jaar, Marko, ondersteun hom vanaand. Hy antwoord een na die ander vraag sonder enige twyfel korrek en hy haal kort voor lank die R10 000-vangnet. 

“Ek gaan die res van die skape volg en ook die net op R30 000 (vraag 9) stel,” besluit Renier. 

So tussen die vrae deur noem Rian aan die gehoor dat Renier en Marko tydens die vorige seisoen in die gehoor was. 

“En toe dink julle ‘hoe wonderlik, hierdie aanbieder . . . ons moet hom face to face ontmoet’,” vertel Rian tot groot vermaak van almal. 

Renier sê hy kyk beide die Engelse en Afrikaanse reekse van Wie word ’n miljoenêr en hy was vasberade om ’n deelnemer te word nadat hulle in die gehoor was. Dis vir hom soos ’n droom wat waar geword het. 

Sy vangnet-vraag betrap hom onkant. Wie van Bob Dylan, Elton John, Bruce Springsteen en Rod Stewart het nog nooit in Suid-Afrika opgetree nie? 

“As ’n man met radio-ervaring . . .” mik hy na Rian as sy eerste hulplyn.  

Rian neig na Bruce Springsteen, maar is hy reg? Renier besluit om liefs ook sy 50/50-hulplyn in te span. Bob Dylan en Elton John bly oor. Gaan hy sy finale hulplyn inspan? Beslis – en dit gaan die gehoor wees. 

77% van die gehoor stem vir Bob Dylan. Renier besluit om na hulle te luister – en met sy laaste hulplyn beland hy op sy vangnet van R30 000. Die volgende vraag oor die 10de hoogste piek in die wêreld stuit hom egter net daar. Annapurna is in Nepal en nie Indië soos wat hy geraai het nie. 

Benewens die R30 000, is daar darem ook die kans op ’n foto saam met Rian wat vir Renier baie gelukkig stem. 

Wie word ’n miljoenêr? word Woensdagaande om 20:00 op kykNET (DStv-kanaal 144) uitgesaai. 

Lees ook: De Klerk Oelofse maak sy sepie-debuut in Suidooster

The post ‘Wie word ’n miljoenêr’: ‘Russiese penisillien’ & konserwatiewe vangnette sorg vir benoude oomblikke appeared first on rooi rose.

In die eerste episode van die vyfde seisoen van Wie word ’n miljoenêr kon niemand dit regkry om die R1 miljoen-prysgeld los te slaan nie.

Natuurlik is dit die man wat nou al sinomien is met die wêreld se grootste vasvraprogram op kykNET, Rian van Heerden, wat weer die aanbieder is. Hy haal vir Benjamin Franklin, die stigtersvader van Amerika, aan wat gesê het: “An investment in knowledge pays the best interest” en sê dis net so toepaslik op Wie word ’n miljoenêr. 

Die eerste vinnigste vingers 

Wie van die ses deelnemers gaan vier van Suid-Afrika se hoofstede die vinnigste van wes na oos rangskik? Dis Kaapstad, dan Kimberley, gevolg deur Bloemfontein en Mbombela die verste oos. 

Vier van die deelnemers is in die kol, maar dis Nick Grobler wat binne 6.352 sekondes net-net vir Pierre du Plessis klop wat dit binne 6.440 sekondes korrek rangskik het. 

Nick (37) is ’n chemiese ingenieur van Johannesburg. Sy lewensmaat van die afgelope 12 jaar, Thea, is in die gehoor om hom te ondersteun. Hy haal die eerste vangnet van R10 000 sonder sukkel en stel sy volgende vangnetvraag op vraag 10 vir R50 000. 

So tussendeur vis Rian uit oor Nick se spesiale partytjie-truuk en vra dat hy dit met die gehoor moet deel.  

Ja, erken Nick, toe hy vir Wie word ’n miljoenêr ingeskryf het, kon hy die punt van sy neus met sy tong geraak het. Maar daar’s sedertdien ’n bietjie werk aan sy voortand gedoen en hy kry dit nie nou so maklik reg nie.  

Met ’n wuiwende “Hallo, Ma, ek’s op TV” druk hy deur en slaag daarin dat sy tong aan sy neuspunt raak, tot groot vermaak van Rian en die gehoor.  

Wees eerlik, het jy dit ook so pas probeer? 

Die laaste vraag voordat hy sy R50 000-vangnet haal, laat hom sy eerste hulplyn inroep. Hy kies “Bel ’n pêl” met die hoop dat sy pa, Martin Grobler, gaan weet watter stad die gasheerstad vir die Olimpiese Somerspele in 2032 sal wees. Martin raai dat dit Doha moet wees. Maar Nick is onseker en hy vra vir die 50/50-hulplyn. Die korrekte antwoord is Brisbane!  

Dis ’n baie verligte man wat weet hy het nou R50 000 in die sak. Daarom waag hy ’n raaiskoot rondom dit wat Napoleon Bonaparte in 1803 aan die VSA verkoop het. Kan jy glo? Dit was Louisiana – en daarmee skuif hy op na R70 000.  

Hy span sy laaste hulplyn, die gehoor, in vir hulp met die vraag oor watter akteur die rol van John McClane aangebied moes word in Die Hard omdat hy in die voorvolg-rolprent The Detective gespeel het. 48% stem vir Mel Gibson en 26% stem vir Roger Moore. 

Nick besluit om die gehoor se antwoord te aanvaar – dit vir R125 000. Maar dis ’n fout. Genugtig, wie sou kon glo dat dit eintlik Frank Sinatra was! Hy het natuurlik die rol van die hand gewys . . . 

Die tweede vinnigste vingers 

Getalle moet van hoog na laag rangskik word. Die korrekte orde is 10 000, 200, 42 en 12 – maar die antwoord word bemoeilik omdat dit in woorde en nie syfers verskyn nie. Weer eens is net vier van die deelnemers in die kol, maar die warm stoel gaan deur Pierre du Plessis ingeneem word nadat hy die antwoord binne 6.732 sekondes reg gehad het. 

Pierre (65) is ’n batebestuurder van Pretoria en sy broer Willis ondersteun hom vanuit die gehoor. Hy haal die eerste vangnet gemaklik en besluit op vraag 13 vir R250 000. Hy’s hier om te waag, erken hy. 

Terwyl Pierre vinnig deur die vrae draf, wil Rian by hom weet hoekom hy so haastig is. “Net so vinnig soos dit. Het jy ’n afspraak na die tyd?” wil hy weet. “Ek moet daai geld gaan belê voor die rand verswak,” kom dit laggend van Pierre. 

’n Interessante brokkie nuus duik op. Pierre en ’n vennoot het ’n besigheidsreddingplan opgestel en so vir LM Radio uit ’n benarde posisie gered. “Ons het nou die baba gevang en ons moet hom nou laat werk,” sê hy en bevestig dat hulle twee nou LM Radio besit.  

Pierre besluit om sy eerste hulplyn te gebruik. Hy gaan die gehoor vra watter Suid-Afrikaanse seiljagvaarder in 2023 die eerste vrou was wat die Golden Globe-alleenvaart om die wêreld gewen het. Ongelukkig is die meerderheid van die gehoor verkeerd – en dis tyd vir Pierre om die warm sitplek te verlaat. Hy het darem R10 000 om te belê . . . 

Die derde vinnigste vingers 

Hoe gou kan jy die sterretekens in alfabetiese volgorde rangskik? Skerpioen, Steenbok, Tweeling en dan Waterdraer is die korrekte orde.

Drie deelnemers is in die kol, maar dis Helené Nel wat dit binne 5.462 sekondes reg rangskik. Helené (27) is ’n geoktrooieerde rekenmeester van Kimberley. Manlief Gerrit is daar om haar te ondersteun.

Sy haak vas toe sy gevra word waar die Skedelkus is en besluit om een van haar hulplyne in te span. Sy wil vir die gehoor om hulp vra. 81% van die gehoor kies Namibië en Helené aanvaar hulle antwoord. Dis korrek. 

 Maar kort voor lank beland sy op die R10 000-vangnet en sy stel haar volgende vangnet op vraag 9 vir R30 000. “Nie baie waaghalsig vanaand nie,” kom dit skertsend van Rian.  

 Sy span haar “Bel ’n pêl”-hulplyn in toe sy onseker is oor watter deel van die liggaam deur karpale tonnelsindroom aangetas word. Brian Beyers is die pêl – en hy’s ’n dokter. Nadat hy haar vir ’n rukkie in spanning laat wag, stel hy die pols voor. Dis wel die polsgewrig en sy skuif aan na die volgende vraag vir R25 000. 

Helené span haar laaste hulplyn, die 50/50-opsie, in vir die antwoord op wat tydens Usain Bolt se wêreldrekord tydens die 2008 Olimpiese Spele gebeur het. Sy moet kies tussen ’n los skoenveter of ’n pet wat afgewaai het. Sy kies die los skoenveter – en dis die regte antwoord. 

 Sy kon nie die vraag rondom Michael Jackson beantwoord nie, en kies om eerder die R25 000 te vat en uit die spel te tree. Die vraag het gehandel oor Michael wat tydens die skiet van ’n Pepsi-advertensie ernstige brandwonde aan sy kopvel opgedoen het. 

Wie word ’n miljoenêr? word Woensdagaande om 20:00 op kykNET (DStv-kanaal 144) uitgesaai. 

Lees ook: Belangrike dinge wat jy oor beroertes moet weet

The post ‘Wie word ’n miljoenêr’: ’n Vreemde partytjie-truuk – en iemand waag groot! appeared first on rooi rose.

Die sanger en liedjieskrywer Christoph Kotzé, beter bekend as Appel, en Rian van Heerden se gesprek het wye draaie geloop in die laaste episode van die huidige seisoen van Laataand by Rian.

Die twee ken mekaar al byna twintig jaar. Appel was eens ’n student in Rian se klas toe hy ’n kursus oor radio en TV aangebied het.

“Ek het baie meer by jou geleer oor menswees agter die skerms as oor die media self,” het Appel gesê. “Jy was ’n goeie mentor, en ek het by jou geleer wat ek in daardie stadium van my lewe moes leer.”

Appel het met groot lof van sy ma, Elize, gepraat. “Ek is geseënd met ’n ongelooflike ma-figuur.” Hy het vertel toe sy swanger met hom was, het sy haarself op kitaar begelei en liedjies van Koos du Plessis en Laurika Rauch gesing. Wanneer sy aërobiese klasse by die gevangenes waar sy werksaam was, aangebied het, het sy graag Paul Simon se musiek gespeel. Dit alles glo Appel het ’n blywende invloed op hom gehad.

Appel het reusetreffers vir ander kunstenaars geskryf soos “Hande” vir Karlien van Jaarsveld, “Skepe” vir Jo Black en “Wals, wals, Willemien” vir Laurika Rauch.

Dit was Theuns Jordaan se weergawe van Appel se liedjie “Sal jy bly” wat die bal aan die rol gesit het. Theuns was een aand by Presley’s, ’n gewilde kuierplek in Pretoria, maar Appel kon nie ingaan nie, want hy het ’n kortbroek aangehad. ’n Vriend van hom het egter vir Theuns gaan roep, en Appel het “Sal jy bly” vir hom in sy kar gaan speel. Theuns het dit later opgeneem, en dit was ’n enorme treffer. “Ek sal hom ewig dankbaar wees vir dit,” sê Appel.

Die musiekvervaardiger Johan Vorster het Appel aangeraai om sy eie sangloopbaan te begin. “Hulle wou van my ’n crooner maak, maar ek het gesê: Ouens, gee my net ’n kans om myself te wees,” sê Appel. Sy eerste groot treffer was “Boer loop deur my are”, en sedertdien het hy nog nie teruggekyk nie.

Een van die hoogtepunte in sy loopbaan was sy samewerking met die Australiese sanger James Johnston op die liedjie “Country Is for Me”, wat al meer as vier miljoen keer op YouTube gekyk is. Appel is verheug dat sy musiek deur ’n wye verskeidenheid mense geniet word en het vertel van ’n konsert onlangs in Kimberley waar ’n derde van die gehoor bruin was.

“Ek het nie ’n demografie nie. My demografie is musiek,” sê hy en vertel dat kunstenaars soos Johnny Clegg en Paul Simon nog altyd vir hom ’n inspirasie was.

Die tweede gas was Katlego Moagi wat op sosiale media as Citizen Concerned haar stem laat hoor oor die toestand in die land. Volgens haar moet Suid-Afrikaners nie terugsit nie, maar meer begin betrokke raak.

Vir Appel is daar net een plek, en dit is Suid-Afrika. Hy sê dit is soos om vir ’n boer ná ’n jaar van droogte te vra hoe hy oor sy plaas voel. Die boer sal hartseer wees oor die toestand van die plaas, maar hy sal steeds lief wees vir die plaas.

“Saam kan ons die probleme oplos,” sê sy. Vir haar is daar twee belangrike elemente: die opvoeding van almal – oud en jonk – wat stemgeregtig is, en die terugkeer na familiewaardes. “As die familie reg is, sal die gemeenskap reg wees, en as die gemeenskap reg is, sal die land regkom,” sê sy.

Appel se woorde aan Katlego was: “Dit was so lekker om jou opinie oor die land te hoor. En kyk, dis nie net ’n opinie nie, jy begin ’n beweging. En as jy ooit wil praat, ek sal altyd daar wees.”

Rian van Heerden het die seisoen afgesluit met ’n eerlike en inspirerende gesprek wat aanhangers lank sal bybly.

Die volledige episode is op DStv Stream en Catch Up beskikbaar.

Lees ook: Hannes van Wyk oor Magda Louw & Erhard-karakter: ‘Dis lekker dat mense my nie in die rol herken nie’

The post ‘Laataand by Rian’: Appel vertel hoe ‘n Theuns Jordaan-treffer die bal aan die rol gesit het appeared first on rooi rose.

Steven het ook gedeel wat sy pa vir hom gesê het toe hy die nuus breek dat sy loopbaan verby is: “It happens. Die Here het ’n ander plan vir jou.”

Rian se volgende gas is die sanger Appel. 

Die volledige episode is op DStv Stream en Catch Up beskikbaar. Laataand by Rian is op Dinsdae om 21:00 op kykNET (DStv-kanaal 144) en is ook op DStv Stream en Catch Up beskikbaar.

Lees ook: Skemergrond keer terug vir nog ’n seisoen! Hier’s waarna jy kan uitsien

The post Steven Kitshoff maak hart oop oor sy skok-uittrede op ‘Laataand by Rian’ appeared first on rooi rose.

Die legendariese akteur, radioman en stemkunstenaar Nic de Jager was gisteraand die gas op Laataand by Rian. Ná dekades se ervaring op die verhoog en met televisie en radio, is Nic steeds aktief besig met sy geliefde program Nic se goed op RSG, en sy gesprek met Rian van Heerden was ’n diep persoonlike terugblik op ’n vol lewe.

In die onderhoud het Nic eerlik gepraat oor sy dae by die SAUK, die struwelinge met sy selfbeeld en oor hoe hy op 85 steeds die lewe voluit leef. 

“Toe ek jonk was, het ek geskop teen die versende en geraas, maar noudat ek 85 is, voel dit vir my ek is in stil water,” het hy vertel. “Ek is gemaklik met my opinies, die meeste van hulle.”

Nic het ook meer vertel oor Nic se goed, wat elke Sondag op RSG uitgesaai word. Met al meer as 555 episodes agter die rug, is dit ’n arbeidsintensiewe maar lonende proses. “Die stukkie wat jy hoor, is aanmekaargesit in 25 probeerslae,” het hy skertsend gesê.

Die gesprek het verder verdiep toe Rian hom vra oor sy selfbeeld, en Nic vertel het hoe ’n ervaring op universiteit hom jare lank beïnvloed het: “Ek dink dit was die verskriklikste ding wat my ooit getref het, en dit het al my selfvertroue weggevat.”

Ook oor sy besluit om nooit ’n gesin te hê nie, het Nic openlik gesels: “Daar is mense wat kinders moet hê en dan is daar mense wat kinders moet raadgee. Ek het nooit kans gesien vir ’n gesin en oupa wees nie. Maar ek kon vir jongmense wat gesukkel het met probleme wat hulle nie kon hanteer nie, ewewigtige leiding gee sonder dat ek skuldig gevoel het oor dit my kind is. Ek kon vir hulle objektiewe raad gee.”

Nic se verrassingsgas was die legendariese stemkunstenaar Malcolm Gooding, en dié twee het mekaar 20 jaar laas gesien. Albei het teruggekyk op hul loopbane, met Malcolm wat sy dankbaarheid uitgespreek het vir ’n vol lewe saam met sy familie.

Nic het afgesluit met die volgende woorde: “Ek kan nie sê daar is iets wat ek werklik nog wil doen nie. Op hierdie oomblik voel ek, ek is oukei. Ek kan met vrede na die gate toe vaar.”

Die volledige episode is op DStv Stream en Catch Up beskikbaar.

Laataand by Rian is op Dinsdae om 21:00 op kykNET (DStv-kanaal 144) en is ook op DStv Stream en Catch Up beskikbaar.

Lees ook: Voormalige satanis vertel haar verhaal in Vreemder as fiksie: ‘Toe kies ek om my hart vir die Here te gee.’

The post Nic de Jager op ‘Laataand by Rian’: ‘Ek kan met vrede na die gate toe vaar’ appeared first on rooi rose.

Lees ook: Vat vyf! Dis weer tyd vir Wie word ’n miljoenêr?

The post Neil de Beer op ‘Laataand by Rian’: ‘Dis tyd om van die hiënas ontslae te raak’ appeared first on rooi rose.

Die afgelope vier seisoene van kykNET se gewilde speletjiesprogram Wie word ’n miljoenêr? het meegevoerde kykers tuis die antwoorde laat uitskree wanneer deelnemers hul kanse in die opmars na die R1 miljoen-vraag verbrou het. So naby, en tog so ver.  

Wie word ’n miljoenêr? gaan weer vir vuurwarm vermaak sorg met Rian van Heerden se uitknikkervrae wanneer dit op 2 Julie na kykNET terugkeer.  

 En die groot vraag natuurlik: Gaan iemand weer soos in die vorige seisoen met die volle R1 miljoen huiswaarts keer? 

In hierdie seisoen is daar ook weer ’n episode met bekendes, vanuit uiteenlopende velde, wat hul algemene kennis gaan inspan om fondse vir liefdadigheid te wen. Hulle is Karlien van Jaarsveld, Dean Smith, Jannie du Plessis, Pietie Beyers, Nicole Holm en Tracey-Lee Oliver.  

Het jy geweet? 

• Sedert Wie word ’n miljoenêr vir die eerste keer in 2021 op kykNET begin het, was daar nog net een speler wat die volle R1 miljoen in sy sak kon steek. Dit was Herman Bosman, die blommeboer van George, wat in die twaalfde episode van die vierde seisoen sy laaste hulplyn ingespan het: sy ma. Die vraag vir Herman se R1 miljoen-prysgeld het gehandel oor watter reliek wat in Parys se Notre Dame-katedraal bewaar word, ongeskonde was ná die verwoestende 2019-brand. Ma Vida het gesê dat dit die doringkroon was. Sy was korrek. 

• In die tweede seisoen het die akteur, komediant en selferkende “trivia geek” Melt Sieberhagen R250 000 aan die Gift of the Givers gegee.  

• Die sakejoernalis en skrywer Theunis Strydom was in 2022 die eerste groot wenner van Wie word ’n miljoenêr? toe hy R500 000 in sy sak gesteek het. In 2023 het die joernalis Susan Booyens presies dieselfde bedrag losgeslaan nadat sy een korrekte antwoord weg van die R1 miljoen was.  

• Joshuan du Toit, ’n mediese student van Pretoria, was die reeks se jongste wenner nog toe hy op 19-jarige ouderdom in Oktober 2024 tydens die vierde seisoen met R125 000 sakgeld weggeloop het. Hy het destyds gesê hy sou baie gelukkig gewees het as hy net R10 000 kon wen. 

• In seisoen vier het Hein Viljoen se raaiskoot op vraag 14 van hom die grootste verloorder tot op datum gemaak. Hy het op R250 000 gestaan, en hy het sy eerste veiligheidsnet op R500 000 gestel nadat hy die standaardvangnet op R10 000 gehaal het. “Ek gaan nou ’n R240 000-fout maak hier,” het hy aangekondig en gesê die letter P van die kleinhandelwinkelgroep SPAR staan vir Producten, terwyl die P staan vir Profitering. 

• Ná afloop van die vyfde seisoen sal daar 201 spelers wees wat weet hoe dit voel om in daai warm stoel voor Rian van Heerden te sit.  

Wie word ’n miljoenêr? word van 2 Julie om 20:00 op kykNET (DStv-kanaal 144) uitgesaai. 

Lees ook: ‘Net mens’ se nuwe seisoen verken moederskap, verlies en hoop

The post Vat vyf! Dis weer tyd vir ‘Wie word ’n miljoenêr?’ appeared first on rooi rose.