Loer hier na ’n paar van ons Kersfeesvoorblaaie van die 40’s tot nou

The post Vorige rooi rose-Kersfeesvoorblaaie appeared first on rooi rose.

Twee jaar gelede sou Hanna Grobler haar eerste voorbladartikel as nuwe ma met rooi rose gedoen het. Toe gebeur die ondenkbare: haar babaseuntjie word in die agtste maand van haar swangerskap dood gebore. Professioneel soos sy is, het Hanna steeds op ons voorblad verskyn, al was haar hart stukkend.

Lees ook: Hanna Grobler & Donnalee Roberts oor liefdadigheid

Die Hanna wat vandag oorkant my sit, straal van geluk en lewensvreugde. Sy kan nie uitgepraat raak oor haar baba nie …

‘’n Baba is ’n wonderwerk, die grootste geskenk wat ’n mens van God kan kry. Niks op aarde maak méér saak as dit nie.’

Lees ons volledige onderhoude met Hanna op bl. 18 van die November 2017-uitgawe van rooi rose.

Agter die skerms met Hanna Grobler

The post Agter die skerms met Hanna Grobler appeared first on rooi rose.

Karen Zoid het op Vrydag, 11 Augustus 2017 haar jongste album, Op Die Oomblik – Deel Een, op iTunes uitgereik. Sy het ook op 25 Augustus iets interessants uitgereik – dié album as visuele album. Dit sal vanaf 1 September 2017 ook in winkels beskikbaar wees. Karen is die eerste Suid-Afrikaanse kunstenaar wat so iets vervaardig. Ons het met haar gesels oor die nuwe album, wat die visuele album behels, en hoekom sy gereeld saam met haar vriende musiekmaak.

Waaroor gaan jou nuwe album en die liedjies wat dit bevat?

OP DIE OOMBLIK is die eerste deel van drie verskillende hoofstukke in my nuwe liedjieboek. Ek is tans baie geïnteresseerd daarin om oomblikke te probeer vasvang. Die lewe is so vinnig en ’n mens kan nie altyd byhou om alles te verwerk nie. Ek wil die oomblik vasvang al weet ek dit is onmoontlik. Ek wil dit beskryf en verken en ten volle ervaar. Dis nie net ons musiekwêreld wat in ’n ‘fast- track -enkelsnit-era’ is nie: die hele wêreld is eintlik ook. Iemand sê iets in Amerika en dit affekteer die hele Midde-Ooste. Oombliklik.

Jy is die eerste Suid-Afrikaanse kunstenaar wat ’n visuele album op iTunes vrystel. Vertel ons meer.

Die album bevat tematiese video’s vir elke liedjie en hierdie video-album kan dan van iTunes afgelaai word. Ek was verstom toe ek die eerste keer ’n visuele album van ’n internasionale kunstenaar op iTunes gesien het. ’n Mens het skielik toegang tot ’n hele ander wêreld op jou slimfoon waarin die songs hulle stories nou ook op ’n virtuele manier kan vertel.

Visuele albums dateer so ver terug as The Beatles in die sestigerjare met A Hard Day’s Night. Dit het vanaf 2016 ’n meer gewilde manier geword om albums op te neem, danksy die feit dat aanhangers dit nou vinnig kan bekom deur middel van hul slimfone. Internasionale kunstenaars wat onlangs visuele albums uitgereik het sluit Beyoncé, Drake en Brad Paisley in.

Wat het jou laat besluit om dit te doen?

Ek het dadelik hiervan gehou en wou graag vir my aanhangers iets anders bied. Ons het baie tyd daaraan spandeer om hierdie visuele vertelling te verfilm. Ek het nog nooit so iets aangepak nie; dit was vir my en die Brainwave Produksie-span ’n groot avontuur.

Waaroor is jy die meeste opgewonde vir hierdie album?

Dit is my eerste Afrikaanse solo-album in ses jaar. Dit was vir my lekker om weer iets op my eie te doen.

Jy noem dat die lied, Vir Jou, ’n liefdeslied vir grootmense is, en dat mens eintlik eers ware liefde ken as jy al ’n paar myle saam geloop het. Wat het jy die afgelope ruk geleer oor die liefde, en hoe beïnvloed dit jou?

Liefde is ’n klaskamer. Party dae is jy die onderwyser en ander dae die student.

Het jou persoonlike lewe ’n groot invloed op hoe jy musiek skryf?

Natuurlik!

Aan die ander kant is die tweede liedjie wat jy vrygestel het, Dames en Here, baie “harder”. Waaroor handel dit en wat was jou inspirasies in dié liedjie?

My speech vir die Afrikaner in Suid-Afrika. Haha!

Waaroor handel Vonkelvrou?

Dis die verhaal van daai vrou wat ons almal ken …

Jy het die afgelope paar jaar met verskeie Suid-Afrikaanse kunstenaars gewerk: Francois van Coke, Khan Morbee, Zolani Mahola …

Om saam met vriende te kan speel en skryf is een van die grootste plesiere in my lewe. Dis ’n baie persoonlike en intieme ervaring en het nog altyd gelei tot verdieping in my verhouding met die betrokke persoon. ’n Mens maak jouself baie kwesbaar as jy sing so dis lekker as mens twee of meer is [lag].

Is daar enigiemand anders met wie jy graag ’n liedjie sal wil doen?

Daar is die heeltyd nog iemand.

Karen was ons voorbladgesig in April 2017. Loer hier agter die skerms.

The post Karen Zoid oor haar jongste album appeared first on rooi rose.

Kyk net die Gewilde Lekkernye deur Daphne de Villiers uit die Maart 1951-uitgawe van rooi rose.

Hier volg die oorspronklike teks nes dit in die tydskrif verskyn het!

Gewilde Lekkernye

Resepte vir lekkernye is altyd welkom. Hoe meer u het, hoe makliker is dit om een vir elke geleentheid te kies.

Die eerste resep wat ons hierdie maand plaas is baie soet.

Skuimtert

Die bestanddele daarvoor is: die wit van vier eiers, ’n kwartteelepel sout, een teelepel asyn, en een koppie suiker.

Klits die eierwitte totdat hulle skuimerig is. Voeg dan die kwartteelepel asyn by en die een teelepel asyn by. Hou aan met klits totdat die eierwitte styf is. Voeg dan die een koppie suiker geleidelik by onderwyl aanhoudend geklits word. Die mengsel moet heeltemal styf en blink wees. Smeer ’n tertpan deeglik en sprinkel dit effens met meel en plaas die skuimmengsel daarin. Laat dit om die rand effens hoër staan as in die middel. Bak dit in ’n stadige oond vir ongeveer 1h15 lank. Dit moet droog en effens verkleur wees.

Op hierdie tert smeer u nou slagroom. Die hoeveelheid sal afhang van u smaak. Gebruik byvoorbeeld een koppie dik room wat styf geklits is met twee eetlepels suiker. Hiervan word die helfte eers op die tert gesmeer. Die volgende laag is ’n suurlemoenmengsel.

Dit maak u soos volg: Neem die vier eiergele en klits dit dik. Voeg geleidelik 2/3 koppie suiker daarby. Verder kom daar twee teelepels gerasperde lemoenskil en 1/3 koppie suurlemoensap by. Hierdie mengsel word gaargekook oor kookwater. Roer aanhoudend totdat dit dik is. Dit behoort omtrent vyf minute te neem. Sodra dit afgekoel is, skep u die vulsel op die roomlaag. Die res van die room kom dan daarop.

Geurige Roomys

• 3/4 koppie suiker
• Knippie sout
• 1 koppie water
• 1/2 koppie romerige melk
• 1/2 koppie suurlemoensap
• 1/4 koppie suiker
• 2 eierwitte

Meng die 1/4 koppie suiker, sout, en een koppie water. Laat dit 5 minute lank kook. Wanneer dit afgekoel is, voeg u die halwe koppie melk en 1/2 koppie suurlemoensap by. Giet die mengsel in die vriesbakkies en laat dit styf word. Intussen klits u die 2 eierwitte styf. Voeg die 1/4 koppie suiker by en klits geleidelik totdat die mengsel styf en blink is. Maak die gevrieste mengsel fyn en klits totdat dit skuimerig en glad is. Vou nou die eierwitmengsel daarby in. Skep dit terug in die vriesbakkies en laat dit toe om te vries.

Brosbeskuitjies

Die volgende resep vir beskuitjies om die koekblik mee vol te hou, sal u u gaste veel genot verskaf.

• 1/2 koppie botter
• 1/2 koppie suiker
• 1 eier
• 1 koppie meel
• 1 koppie gekapte dadels
• 1 koppie gekapte okkerneute
• 1 1/2 koppies mielievlokkies
• 1 eetlepel melk
• 1 teelepel bakpoeier
• knippie sout
• 1/2 teelepel vanillegeursel

Maak die halwe koppie botter sag en voeg die koppie suiker geleidelik by. Roer aanhoudend totdat die suiker goed opgelos het. Breek die eier daarin en meng deeglik. Daarna kom die dadels, neute, en vanillegeursel. Meng die koppie meel met die teelepel bakpoeier en die knippie sout. Voeg dit dan by die mengsel en roer goed. Heel laaste kom die 1 1/2koppie mielievlokkies en die eetlepel melk by. As die mengsel vir u baie styf lyk, kan u nog ’n bietjie melk byvoeg. Smeer die deeg omtrent 1/4 duim dik in ’n goedgesmeerde pan en bak dan ongeveer 15-20 minute lank in ’n warm oond van 400 grade F (200C). Sodra dit effens afgekoel het, sny u dit in strokies.

Bogenoemde resepte is almal in die kombuis van die Landboudepartement getoets.

Koekies van Koringvlokke

• 1/2 koppie vet
• 3/4 koppie suiker
• 2 eiers, goedgeklits
• 1/4 koppie melk
• 1/2 teelepel lemoenekstrak
• 1 1/2 koppie gesifte meelblom
• 1 1/2 teelepels bakpoeier
• 1/4 teelepel sout
• 6 koppies koringvlokke

Meng die vet en suiker. Roer melk, eiers en lemoenekstrak in en dan die droë bestanddele. Rol teelepels vol van die deeg in koringvlokkies wat effens fyngedruk is en plaas dit in vetgesmeerde koekpannetjies. Bak 25 minute lank in ’n oond van 375 grade Fahrenheit (190 °C). U behoort 4 1/2 dosyn klein koekies van omtrent 1 3/4 duim deursnee te kry.

Piesangkoekies

• 4 koppies koringvlokke
• 2 1/4 koppies gesifte meelblom
• 2 teelepels bakpoeier
• 1/4 teelepel baksoda
• 3/4 teelepel sout
• 2/3 koppie vet
• 1 koppie suiker
• 2 eiers
• 1 teelepel vanillegeursel
• 1 koppie fyngedrukte ryp piesangs (3 groot piesangs)

Druk die koringvlokke fyn. Sif die meelblom, bakpoeier, soda en sout in. Klop die vet totdat dit romerig is. Voeg suiker stadig by en hou aan klits totdat die mengsel lig is. Voeg die eiers by, een op ’n keer en klits weer.

Vanillegeursel kom nou by en roer die droë bestanddele in asook die piesangs. Klop baie goed. Rol teelepels van die deeg in koringvlokke en rangskik die koekies op vetgesmeerde bakpapier. Die oond moet voor die tyd warm gemaak word en die koekies moet 10 minute lank by 400 grade F (200 °C) gebak word. U sal 5 dosyn koekies van 2 duim deursnee kry.

Piesang-sjokolade-bakkies

Piesang-sjokolade-bakkies

• Geel van 2 eiers, wit apart
• 1/3 koppies suiker
• 1/8 teelepels sout
• 2 koppies melk
• 1/2 teelepel vanillegeursel
• 2 koppies koringvlokke
• 4 teelepels suiker
• 2 ryp piesangs
• 1/4 koppie half-soet sjokoladebrokkies

Klop die eiergeel liggies en meng die suiker, sout, melk en vanieljegeursel daarby in. Plaas die koringvlokke in vlabakkies en gooi die eiermengsel daaroor. Plaas die bakkies in ’n pan met warm water en bak stadig in ’n oond van 325 grade F (160 grade C). Dit sal omtrent 45 minute neem. Laat dit afkoel. Wanneer afgekoel, sny die piesangs oor elke bakkie en kook weer ’n keer met merigue wat van styf geklitste eierwit en suiker gemaak is. Sprinkel die sjokoladestukkies oor die meringue. Plaas die poeding weer omtrent 15 minute lank in die oon totdat daar ’n sagte bruin korsie oor is. Plaas in ’n pan kouwater om af te koel. U sal omtrent 6 vlakoppies van hierdie mengsel kry.

Gemmerkoek

• 8 onse (230g) meelblom
• 4 onse (115g) kunsbotter
• 4 onse (115g) bruinsuiker
• 1 eetlepel gouestroop
• tikkie sout
• groot teelepel gemaalde gemmer
• 6 eetlepels melk
• 2 teelepels eierpoeier

Meng die suiker en kunsbotter en voeg stroop by. Die meelblom, eierpoeier en gemmer is saamgevoeg en die mengsel kom by die eerste. Maak ’n deeg met die melk en plaas dit in ’n vetgesmeerde pan. Bak ’n uur lank in ’n middelmatige warm oond (400 grade F; 200C).

Vrugteskulpies

Vrugteskulpies

• 4 koppies koringvlokke
• 1/4 koppie suiker
• 1/2 koppie ligte koringstroop
• 1/2 teelepel sout
• 1 eetlepel botter of kunsbotter
• 1/2 teelepel vanillegeursel

Gooi die koringvlokke in ’n vetgesmeerde mengbak. Kook die suiker, stroop, sout en botter oor ’n plaat van 236 grade F (113 °C). Haal af en voeg vanillegeursel by. Gooi die warm mengsel oor die koringvlokkies en roer sodat al die vlokkies ’n laag van die mengsel om kry. Druk die deeg rondom die kante van klein vetgesmeerde koekpannetjies. Bedien vrugte, roomys of enige ander nagereg in die vormpies. U sal 7 van die vormpies uit hierdie bestanddele kry.

Krummelkors vir koeke

Krummelkors vir koeke

• 2 eetlepels heuning
• 2 koppies koringvlokke
• 1 koppie gekerfde “nutmeats”
• 2 eetlepels bruinsuiker
• 1 eetlepel botter.

Vee die warm koek met heuning. Druk die koringvlokke fyn en meng met “nutmeats,” bruinsuiker en botter. Sprinkel krummels oor die heuning. As u dit verkies, kan die koek in die oond teruggesit word om liggies bruin te bak.

Vanille-karamel

• 2 koppies suiker
• 2 eetlepels stroop
• ’n bietjie sout
• 1 1/2 koppies room
• 1 teelepel vanille

Gooi die suiker, stroop en die halwe koppie room in ‘n kastrol. Roer stadig oor die vuur totdat die suiker opgelos is en die mengsel ’n sagte bal in koue water vorm (238 grade F/ 165C). Moenie klop nie want dit sal die mengsel laat versandsuiker. Voeg nog ’n halwe koppie room by. Kook weer totdat dit ’n sagte bal in koue water vorm (238 grade F/ 114C). Roer baie effens om te voorkom dat die mengsel skroei. Voeg nou die res van die room by. Kook die mengsel totdat dit ’n taamlike stywe bal in koue water vorm. Gooi die karamel in ’n gesmeerde pan, 9 by 4 duim, en sny in blokkies as dit koud is en draai dit in waspapier toe.

“Turkish Delight”

• 1 lb. (450g) suiker
• 2 ons (60g) mieliemeelblom
• 1 ons (30g) glukose
• 2 koppies water
• kleursel
• smaakmiddel
• 1 ons (30g) gelatien

Kook die suiker en 1 koppie water, nadat die suiker 5 minute lank opgelos is. Meng mieliemeelblom met ’n halwe koppie water en voeg dit by die stroop. Kook 10 minute lank. Voeg dan gelatien geweek in ’n halwe koppie water by. Klop totdat dit opgelos is. Gooi dit in ’n gesmeerde pan uit en laat dit afkoel. Keer uit op botterpapier, laat dit 24 uur lank staan en sny dan in blokkies. Rol in ’n mengsel van 2 ons (60g) mieliemeelblom en 2 ons (60g) versiersuiker.

The post Resepte uit 1951 appeared first on rooi rose.

4 stemme, 2 musikante, 18 gedigte

Landskap vertel stories ég aan ons land en sy mense en speel met unieke temas van die Suid-Afrikaanse kultuur. Die sielvolle produksie het weggestap met die WoordTrofee-toekenning vir “Beste Woordkunsproduksie” tydens die 2017 Woordfees in Stellenbosch. Vier stemme skep ’n landskap van musiek met toonsettings van onder meer Antjie Krog, Koos du Plessis, Eugene Marais en Breyten Breytenbach, Sheila Cussons, NP van Wyk Louw, Boerneef en Fanie Olivier.

Die bekende gedigte word opnuut gehóór en omsoom met ’n melodie wat musiek so deel maak van die teks. Alle kulture van die Suid-Afrikaanse landskap word besing; van Mabalel, “Last Grave at Dimbaza”, tot die Khoi-gedig “Nuwe maan”, asook ’n Griekwa-Psalm en ’n Boerneef-gedig wat die Kaapse landskap besing. Só bring die musikale ritmes en akkoorde nuwe vlerke aan van die mees bekende tekste uit ons land se poësie-skatkis.

Daarmee saam die beeldskone, visuele interpretasies van die gedigte deur die talentvolle grafiese-ontwerpkunstenaar, Rudi Silbermann, en jy skep ’n atmosfeer wat nóg meer dinamiek en diepte gee aan die gedigte. Kom vier saam die beeldskone tekste van ons mees gevierde Afrikaanse digters en luister na klassieke Afrikaans soos “Huisie by die see”, dié keer met ’n nuwe Afrika-ritme.

Bespreek jou kaartjies NOU by Computicket

Belangrike inligting

Waar: kykNET Konservatorium @ Aardklop Kunstefees

Wanneer: 3 Oktober 17:30 | 4 Oktober 15:00 | 6 Oktober 09:30 | 7 Oktober 12:30

Kaartjies: R130

Duur: 75 min

The post Groot nuus! rooi rose is vanjaar by Aardklop! appeared first on rooi rose.

Hoe beskryf jy jou modestyl?

My eie modestyl is klassiek, maar met helder kleure en ’n goeie skeut Carrie Bradshaw (van Sex in the City) veral in terme van tekstuur.

Wat is jou staatmakers vir elke dag?

• Vir elke dag in die winter: Gemaklike jeggings of skinny jeans, stewels (ek het meer as 100 pare), ’n trui of warm baadjie met ’n helder serp. Ek is ook gaande oor gemaklike sneakers.

• In die somer is ek gaande oor rokke in alle kleure en lengtes – lank, kort of midi. Almal werk vir my. Solank daar helder kleure is, is ek okay.

Foto: Corné Greeff

Wat is jou gunstelingvoorkoms vir die aand?

In die aand hou ek van ’n blink bostuk of hemp saam met ’n mooi broek.

Vir ’n rooitapytgeleentheid verkies ek enige aandrok, solank dit nie eenvoudige swart is nie. Ek gee nie om vir swart nie, maar dan moet dit patrone of iets hê.

Wat is jou gunstelingkleur?

Alle kleure, maar ek sal begin by groen, geel, oranje, turkoois en pers.

Waar koop jy graag klere vir elke dag?

Oral waar ek ’n winskopie sien! Dit help dat ek mal is oor helder kleure, so ek sien maklik iets nuuts en anders raak, iets wat ander nie noodwendig sou raaksien nie. Ek spandeer ’n bietjie meer geld op die basiese items en sal by enige plek van Woolworths tot Etselec Designs klere koop.

Van watter deel van jou voorkoms of lyf hou jy die meeste?

Deesdae my bene. As kind en tiener het ek jare lank met ekseem gesukkel en verskriklike letsels gehad. Die letsels is nie meer prominent nie en ek het ook net besluit om my nie meer daaraan te steur nie. So nou is ek tevrede met wat ek het.

Lees ook: Voorkom ’n vel-irritasie

Wat is jou gunsteling-grimeervoorkoms?

Sterk ooggrimering en die res, natuurlik.

Hoe gereeld laat doen jy jou hare?

Ek was elke tweede dag my hare, maar blaas dit eintlik nooit self nie. As gevolg van al die stilering vir Bravo! se shoots, verkies ek om op die dae wat ek nie nodig het om my hare te doen nie, dit natuurlik te laat droog word. Dit help dat dit nie oorstilleer word nie en help met die glans. Een keer elke tweede maand laat ek dit kleur – ja, ek is maar net 32 en alreeds lekker grys. Dit pla my nie, maar ek voel dis nog nie heeltemal die tyd om daardie kleur té prominent te dra nie, ek weet my tyd sal kom.

Wat is jou beste stylwenk?

Dra klere waarin jy gemaklik voel. As dit te styf, te los, of enigiets ‘te’ is, sal jy ongemaklik voel en dit sal wys.

Kleur is koning vir Tracey. Hierdie mooi rooi rok is van Jacques LeGrange Couture.

The post Tracey Lange se stylgeheime appeared first on rooi rose.

1942 rooi rose

1942 Die eerste chemoterapie – mosterdgas vir limfoom

1943 Streptomisien, steeds ’n staatmaker-antibiotikum

1945 Eerste griepvaksien

1949 Eerste kontaklense

1952 Eerste pasaangeër

1953 Watson en Crick beskryf DNS

1954 Eerste nieroorplanting

1955 Poliovaksien

1957 Die Pil

1967 Eerste hartoorplanting – in óns land

1977 Eerste kogleêre inplanting vir dowes

1978 Eerste proefbuisbaba, Louise Brown

1979 Acyclovir, die eerste antivirusmiddel

1980 MRI word algemeen bekend gestel

1983 Vigs en MI formeel geïdentifiseer

±1985 Eerste mediese fondse in SA

1996 Die eerste gekloonde soogdier, Dolly

1998 Herceptien vir borskanker

1998 Lasik-oogchirurgie

2000 Robotchirurgie word algemene gebruik

2003 Kartering van die menslike genoom

2006 Eerste lewer geskep met stamsel-tegnologie

2010 Eerste biosintetiese korneas

2010 20 miljoen mense kry per jaar sintetiese ooglense

2014 Die eerste kunsnier gebou en ingeplant

2015 Dr. Watson bekend gestel

2017 Genetiese redigering om foute uit jou DNS te haal gaan vanjaar prakties uitvoerbaar raak

The post #rooirose75 gesondheidtydlyn appeared first on rooi rose.

genoeg vir 12

• 500 ml (2 k) water
• 160 g botter
• 300 g koekmeel
• 6 eiers

Vulsel
• 125 ml heuning
• 250 ml mascarpone
• 125 ml room
• 2,5 ml sout

Versiersel
• 2 eierwitte, liggies geklits
• 10 ml (2 t) suurlemoensap
• 250 g versiersuiker

Karamelgom
• 250 g suiker
• 125 ml (½ k) water

1 Maak ’n 30 cm-kegel deur twee A3-kartonne om mekaar te draai. Plak met kleefband vas en sny die onderkant gelyk.
2 Voorverhit die oond tot 200 °C. Voer 2 bakplate met bakpapier uit.
3 Meng die water en botter in ’n groot kastrol oor matige hitte. Bring tot kookpunt.
4 Trek van die hitte af en voeg die koekmeel op een slag by. Roer met ’n houtlepel tot dit goed gemeng is.
5 Sit terug op die stoof en roer totdat die beslag bymekaarkom en ’n bal vorm – dit sal van die kante af wegtrek.
6 Laat afkoel. Voeg die eiers een-een by en roer deurentyd met ’n houtlepel tot die deeg dik en glansend is.
7 Skep die deeg in ’n spuitsak en spuit klein balletjies op die bakplaat. Sprinkel ’n bietjie water oor die bakplaat om stoom te skep terwyl dit bak.
8 Bak vir 20-25 min. of tot goudkleurig en opgepof.
9 Haal uit en skakel die oond af. Maak ’n gaatjie in elke poffertjie en sit terug op die bakplaat. Sit vir nog 20 min. in die oond totdat die poffertjies uitgedroog is.

Vulsel
10 Verhit die heuning vir 2-4 min. in ’n pan of tot dit liggies gekaramelliseer is. Trek van die hitte af en laat afkoel.
11 Klits die heuning, mascarpone, room en sout vir 2-4 min. tot lig en romerig. Skep die mengsel in ’n spuitsak.
12 Maak ’n gaatjie aan die onderkant van elke poffertjie. Spuit ’n bietjie van die mascarpone-mengsel in elkeen.

Versiering
13 Klits die eierwitte, suurlemoensap en versiersuiker in ’n klein mengbak tot goed gemeng. Doop die bokant van elke poffertjie in die versiersel en laat set.

Karamel
14 Vul ’n groot bak met yswater en hou eenkant. Meng die suiker en water in ’n kastrolletjie oor matige hitte.
15 Roer totdat die suiker gesmelt is. Bring tot kookpunt en kook tot die karamel goudkleurig is.
16 Doop die onderkant van die kastrol in die yswater om die kookproses te stop en te voorkom dat die karamel brand.
17 Smeer ’n bietjie karamel op die onderkant van die poffertjies en plak styf teenmekaar op die voorbereide kegel.

The post Croquembouche appeared first on rooi rose.

genoeg vir 12 lollies

Basiese koek
• 100 g botter
• 4 eiers
• 260 g strooisuiker
• 280 g koekmeel
• 15 ml (1 e) bakpoeier
• 2,5 ml (½ t) sout
• 250 ml (1 k) melk
• gerasperde skil van een suurlemoen
• 10 ml (2 t) vanieljegeursel
• 250 g volroomroomkaas
• 200 g witsjokolade, gekap

1 Voorverhit die oond tot 180 °C.
2 Voer 2 x 20 cm-koekpanne met bakpapier uit. Smeer met botter of spuit met kleefwerende kossproei.
3 Room die eiers en suiker in ’n groot mengbak tot lig en donsig.
4 Sif die koekmeel, bakpoeier en sout saam en vou dit versigtig by die mengsel in tot alles deeglik gemeng is.
5 Verhit die melk in ’n klein kastrol tot kookpunt. Trek van die hitte af en voeg die botter, suurlemoenskil en vanieljegeursel by.
6 Voeg die melkmengsel by die meel en meng deeglik. Verdeel die beslag tussen die panne en bak vir 35-40 min. of tot goudkleurig en ’n toetspen wat in die middel ingedruk is, skoon uitkom. Keer die koek op ’n draadrakkie uit en laat heeltemal afkoel.
7 Meng 500 g van die koek, gekrummel, en die roomkaas deeglik in die mengbak van ’n voedselverwerker.
8 Vorm in happiegrootte balletjies. Druk ’n kort sosatiestokkie in elke balletjie.
9 Smelt die witsjokolade oor ’n dubbelkoker (’n glasbak wat knus pas op ’n kastrol met pruttende water – die glasboom moenie aan die water raak nie).
9 Doop die balletjies in die sjokolade tot dit heeltemal bedek is.
10 Laat die oortollige sjokolade afdrup en laat staan op ’n bakplaat wat met bakpapier uitgevoer is.
11 Sit eenkant totdat die witsjokolade geset is (nie in die yskas nie).

The post Koeklollies appeared first on rooi rose.

genoeg vir 10-12

Donkersjokoladekoek
• 500 ml (2 k) water
• 250 ml (1 k) kookolie
• 450 g sagte bruinsuiker
• 200 g donkersjokolade, fyngekap
• 115 g kakao
• 4 groot eiers, liggies gekluts
• 325 g koekmeel
• 5 ml (1 t) bakpoeier
• 2.5 ml (½ t) sout
• 10 ml (2 t) baksoda

Framboos-roomys
• 600 ml dubbeldikroom
• 1 x 397 g blikkie kondensmelk
• 500 g vars of bevrore frambose

Malvalekkerversiersel
• 4 eierwitte
• 250 ml (1 k) strooisuiker
• 15 ml (1 e) rooswater

1 Voorverhit die oond tot 180°C. Voer drie 24 cm-koekpanne met bakpapier uit.
2 Bring die water tot kookpunt in ’n middelslag kastrol. Verwyder van die hitte en voeg die suiker en olie by. Roer totdat die suiker opgelos is.
3 Voeg die sjokolade by en roer tot glad. Klits die eiers by.
4 Voeg die koekmeel, bakpoeier, sout en baksoda by en klits tot net gemeng. Bedek die mengsel met kleefplastiek en hou eenkant vir 1 uur.
5 Verdeel die mengsel gelykop tussen die koekpanne. Bak vir 30-35 min. of tot ’n toetspen skoon uitkom. Koel deeglik af.
6 Voer een 24 cm- koekpan met bakpapier uit sodat jy ’n 10 cm hoë kraag het.
7 Vir die framboosroomys: klits die room en kondensmelk tot dik en romerig. Verwerk helfte van die frambose met ’n voedselverwerker tot glad. Druk die mengsel deur ’n sif.
8 Vou die framboospuree deur die roommengsel tot goed gemeng.
9 Smeer ’n laag framboosroomys op elke koek. Bedek elke koek met die oorblywende frambose. Sit die koeklagies in die voorbereide koekpan. Sit in die vrieskas tot heeltemaal gevries (oornag).
10 Vir die versiersel: klits die eierwitte in ’n hittebestande mengbak tot sagte punte vorm. Voeg die strooisuiker stadig by en klits tot dik en glansig. Sit die mengbak oor ’n kastrol met water oor matige hitte. Klits die meringue tot dit warm voel as jy jou vinger daarin druk. Verwyder van die kastrol. Klits dit weer tot heeltemal afgekoel. Voeg die rooswater by en roer deur.
11 Keer die koek uit die koekpan. Bedek die koek met versiersel. Skroei die malvalekker met ’n blaasvlam tot goudkleurig. Sit dadelik voor.

Verjaarsdagkoek 1: Tina Bester se witsjokoladekoek

Verjaarsdagkoek 2: Wessels van Vuuren se rooiwyn-sjokoladekoek

Verjaarsdagkoek 4: Kanya Hunt se haselneutkoek met rooifluweel-roosversiering

Verjaarsdagkoek 5: Martjie Malan se framboo-en-suurlemoenkoek

Verjaarsdagkoek 6: Corli Botha se maklike verjaarsdagkoek met bessie-coulis en outydse melkversiersel

The post #75verjaarsdagkoek 3: Katelin Williams se gebakte Alaska-koek appeared first on rooi rose.

Martie Pansegrouw, Redakteur

Martie se grimering het klassiek, elegant en stylvol gelyk. Voordat Martie se grimering gedoen is, is die Bobbi Brown Hydrating Face Cream (R795) aangewend om haar vel te bevogtig. Die onderlaag wat die beste op Martie se vel werk is die Bobbi Brown Intensive Skin Serum Foundation SPF40 in sand-kleur (R765). Dit bied nie net dekking vir jou vel nie, maar die serum is ook goed vir jou vel en laat dit sommer sagter en gesonder voel. Om haar wange mooi te laat blink is die Bobbi Brown Nude Finish Illuminating Powder (R755) saam met die Bobbi Brown Bronzing Powder (R550) gebruik om die wange ’n bietjie kleur te gee. Die grimering op Martie se oë is die Bobbi Brown Cement Sparkle Eyeshadow (R475), saam met die Bobbi Brown Sultry Nude Eye & Cheek Palette (R955) om ’n brons en goue skakering te vorm. Goud is altyd lekker om te gebruik op die oë, veral as jy na ’n partytjie gaan. Haar lippe het mooi natuurlik gelyk met die Bobbi Brown Art Stick in Rose Brown (R430) lipstiffie.

Bobbi Brown se wenke  aan Martie:

• Bou die maskara op vanaf die basis van jou wimpers
• Rond jou gesig af met ’n glans-blosser op die appels van jou wange en skakeer dit opwaarts

Hier is van die produkte wat gebruik is

Suzanne Kotzé, Skoonheidsredakteur

Suzanne se grimering lyk altyd perfek, maar dit het ekstra mooi gelyk met haar donker rokerige oë en die ekstra definisie wat geskep is deur ’n katoog-voorkoms met die Bobbi Brown Longwear Black Gel Eyeliner in Black (R350). Voordat die grimeerkunstenaar met Suzanne se grimering begin het, het hulle haar gesig gereinig met die Bobbi Brown Soothing Cleansing Oil (R795). Daarna is haar ooglede bevogtig deur die Extra Eye Repair Cream (R910). Die Bobbi Brown Vitamin Enriched Face Base (R795) is gebruik as basislaag wat die vel bevogtig en dit makliker maak om ’n gladde voorkoms te skep wanneer jy die onderlaag aanwend. Suzanne het ’n ligte vel en die Bobbi Brown Skin Foundation Stick in 35 Warm beige (R555) is gebruik om dekking te gee op haar vel. Die blosser wat hulle gebruik het om die wange ’n bietjie kleur te gee, is die Bobbi Brown Bobbi Brown Bronzing Powder in Golden Light (R550) en die Bobbi Brown Highlighting Powder in Bronze Glow (R700). Om die rokerige oë-effek te skep is die Bobbi Brown Long-Wear Cream Eyeshadow in Shore (R405) gebruik as basis en die dokerder klere is die Bobbi Brown Shimmer Wash Eyeshadow in Gunmetal (R360) en die Bobbi Brown Long-Wear Cream shadow stick in Goldstone (R460). Haar voorkoms is afgerond met die Art Stick Liquid Lip in Naked Pink (R430) wat die lippe ’n sagte, natuurlike pienk glans gee.

Bobbi Brown se wenk aan Suzanne:

Die oogomlyner moet dik genoeg wees aan die bokant van jou wimpers, sodat dit duidelik sigbaar is wanneer jou oë oop is.

Hier is van die produkte wat gebruik is:

Susra Matthee, Moderedakteur

Susra se grimering het haar mooi oë beslis laat uitstaan en haar wenkbroue het perfek gelyk. Haar grimering is elegant en stylvol gedoen. Die Bobbi Brown Extra Repair Nourishing Milk (R1 265) is gebruik as serum om Susra se vel te voed en te bevogtig, sodat die vel ekstra gesond lyk. Op haar lippe is die Bobbi Brown Lip Balm (R275) gebruik om die lippe sagter te laat voel, te bevogtig en te beskerm. Die onderlaag wat die beste saam met Susra se vel-ondertoon gewerk het is die Bobbi Brown Intensive Skin Serum Foundation in Natural (R765). ’n Goeie poeier laat jou grimering altyd langer aanbly en die Bobbi Brown Sheer Finish Pressed Powder (R550) is op Susra se vel gebruik. Om haar wange te laat blink en kleur te gee, is die Bronzing Powder in Golden Light (R550) en die Bobbi Brown Highlighting Powder in Bronze Glow (R700) gebruik asook die Bobbi Brown Cheek Glow Palette (R815). Jou wenkbroue rond jou voorkoms mooi af en die Bobbi Brown Natural Brow Shaper & Hair Touch Up (R345) het perfek gewerk vir Susra se wenkbroue. Die verskillende oogskadu’s wat gebruik is om Susra se oë so mooi te laat uitstaan, is die Bobbi Brown Eyeshadow in Mahogany en Heather  (R360 elk) en die Bobbi Brown Sparkle Eye Shadow in Pebble (R475). Dit is afgerond en beklemotoon met ’n oogomlyner, die Bobbi Brown Long wear pencil in Mahogany (R350).

Hier is van die produkte wat gebruik is vir Susra se grimering:

Vickie De Beer, Kosredakteur

Rooi lippe was perfek vir Vickie se voorkoms en het haar ekstra stylvol laat lyk. Die Bobbi Brown Extra Repair Moisture Cream (R1 245) is gebruik as bevogtiger om Vicky se vel lekker sag te laat voel. Dit is baie lig en is perfek om onder jou grimering aan te wend. Bobbi Brown Skin Smoothing Pore Perfector (R445) is ook gebruik om die vel mooi glad te laat lyk. ’n Goeie verbloemer is altyd lekker om van sonvlekkies ontslae te raak en die Bobbi Brown Corrector in Peach Creamy (R375) is gebruik. Om dekking te gee aan die vel is die Bobbi Brown Long-Wear Even Finish Foundation SPF 15 in Beige (R595) gebruik, dit laat die vel mooi blink lyk en bevat ook ’n bevogtiger. Op Vickie se wange is die Bobbi Brown Higlighter Powder in Pink Glow (R700) gebruik. Om Vickie se wenkbroue te vorm en mooi te laat lyk, is die Bobbi Brown Perfectly Defined Long-Wear Brow Pencil in Blonde (R525) gebruik saam met die Bobbi Brown Natural Brow Shaper & Hair Touch Up (R345). Die lipstiffie wat gebruik is, is die Bobbi Brown Art Stick Liquid Lip in Uber Red (R430).

Bobbi Brown se wenk aan Vickie:

Die regte blosser helder ’n vrou se gesig dadelik op.

Hier is ’n paar van die produkte wat gebruik is:

Cornél Dunn, Leefstylredakteur

Cornél se grimering was meer klassiek en het haar baie stylvol laat lyk. Die Bobbi Brown Soothing cleansing milk (R795) is gebruik om haar vel te skoon en vars te laat voel voor die grimeerkunstenaar begin het met haar grimering. Dit detoks en bevogtig die vel en verwyder grimering maklik. Hulle het ook die Bobbi Brown Extra repair eye cream (R910) gebruik om haar ooglede te bevogtig. Die onderlaag wat gebruik is, is die Bobbi Brown Intensive Skin Serum Foundation SPF 40 in Natural 4 (R765). ’n Bietjie blosser op die wange laat elke vrou mooi vars en jonk lyk en die Bobbi Brown Cheek Glow Palette (R815) is gebruik. Cornél het pragtige blou/grys oë en die oogskadu wat gebruik is om haar oë te beklemtoon, was die Bobbi Brown eye shadow in Taupe en Blonde (R360 elk). ’n Basislagie is eers op die ooglede gebruik, die Bobbi Brown Long-Wear Eye Base (R415). Onthou: jy hoef nie altyd ’n swart oogomlyner te gebruik bo die wimpers nie, soms lyk ’n ligte kleur soos die Bobbi Brown Long-Wear Gel Eyeliner in Bronze shimmer ink (R320) ook mooi, veral as jy ’n meer eenvoudige styl soos Cornél kies. Die Bobbi Brown Smokey Eye Mascara (R400) het pragtige definisie gegee aan haar wimpers en die grimering mooi afgerond.

Hier is van die produkte wat gebruik is:

Salomé Delport, Gesondheidsredakteur

Die donker, rokerige oë en donker lippe het Salome perfek gepas, dit is beslis ’n baie goeie grimeerstyl vir ’n aandfunksie of partytjie. Die Bobbi Brown Extra Repair Moisturizing Balm SPF 25 (R1 245) is gebruik as bevogtiger voor hulle begin het met haar grimering. Dit is verseker Bobbi Brown se “wonder”-room. Dit bevogtig die vel dadelik, maar bevat ook ’n herstel-formule wat die vel in die langtermyn bevogtig en herstel, en ook help met die vel se natuurlike kollageen-produsering. Dit laat die vel sag, ferm en gesond voel. Om seker te maak die vel lyk mooi egalig, is die Bobbi Brown Intensive Skin Serum Corrector in Bisque (R530) gebruik om die vlekkies te verbloem. ’n Onderlaag met ’n serum werk baie goed vir diegene wat ’n bietjie ouer is, so die Bobbi Brown Intensive Skin Serum Foundation SPF 40 in Natural 4 (R765) het perfek gewerk. Die Bobbi Brown Highlighting Powder – Bronze Glow (R700) is op die wange gebruik om dit mooi te laat blink en kleur te gee. As basislagie, voor die oogskadu aangewend is, is die Bobbi Brown Long-Wear Eye Base in Bone (R415) gebruik. Dit help ook dat die oogskadu langer aanbly. Die Bobbi Brown Metallic Eye Shadow in Champagne Quartz (R360) saam met die Bobbi Brown Shimmer Wash Eye Shadow in Eggplant, Lilac (R360 elk) en die Bobbi Brown Sparkle Eye Shadow in Silver Lilac (R475) om die mooi pers-rokerige oë effek te kry. Die Bobbi Brown Art Stick Liquid Lip in Heather Pink (R430) is gebruik om die lippe mooi kleur te gee. Dit is ’n bessiekleur en werk goed saam met die oë se grimering.

Bobbi Brown se wenke aan Salomé:

• Gebruik ’n lipomlyner om die lippe meer definisie te gee
• Onthou: jy kan jou lipstiffie ook gebruik as ’n blosser op die wange

Hier is van die produkte wat gebruik is:

Wil jy ook leer hoe om jou grimering perfek te laat lyk?

Foto: Corné Greeff

As jy meer raad wil hê oor hoe om jou grimering te doen, kan jy by jou naaste Bobbi Brown-winkel inloer. Hulle bied “How to”-lesse aan waar hulle enige vrae wat jy oor jou grimering het, kan beantwoord, al is dit net watter verbloemer jy moet gerbuik, of hoe om die perfekte katoog te maak. Die “How to”-lessies gaan jou niks kos nie.

As jy egter in meer detail wil weet hoe om jou grimering te doen, of ’n spesiale geleentheid het waarheen jy moet gaan, kan enige van die Bobbi Brown-grimeerkunstenaars jou help. Hulle bied verskillende dienste aan soos die:

• Get your best Day-look (R400)
• Get your best Evening-look (R400)

Hulle gee ook vir jou ’n illustrasie sodat jy presies kan sien watter produkte waar gebebruik is.

So lyk ons redakteurs se illustrasies:

Besoek gerus hul webblad vir meer inligting of besoek enige van die Bobbi Brown-winkels, hulle het ook ’n toonbank by uitgesoekte Red Square-winkels.

The post #rooirose75: ons redakteurs se Bobbi Brown-voorkoms appeared first on rooi rose.

Op 15 Maart 2017 het die lieflike The Venue met sy asemrowende uitsig oor Sandton, Johannesburg ons gehuisves vir ’n aand vol vermaak, lekker kos en wyn én natuurlik ’n terugblik op 75 jaar van vrouwees.

Toe en nou: ons heel eerste voorblad, en 75 jaar later!

Kyk hier na foto’s van wie almal saam gekuier het:

Hierdie nostalgiese video vat ons op ’n reis na die verlede. Kyk hoe het rooi rose ontstaan:

22 Maart 2017 was dit Kaapstad se beurt. Kyk net hoe mooi het almal gelyk!

rooi rose sê dankie aan die volgende persone en borge

Johannesburg

Jenna Clifford (juwele & geskenke)
Malfy Gin (geskenke)
MatsiMela (geskenke)
Catrice (geskenke)
Corli Botha (verjaarsdagkoek & makrolletjies)
The Venue (venue)
Montpellier (wyn)
Flowerscapes (dekor)
Sorbet (naels & hare)
Bobbi Brown (grimering)
Southern Sun SS Katherine St (verblyf)

Kaapstad

Jenna Clifford (juwele & geskenke)
Malfy Gin (geskenke)
MatsiMela (geskenke)
Catrice (geskenke)
Food LAB (spyseniering)
Martjie Malan (verjaarsdagkoek)
Youngblood Arts and Culture Development (venue)
Montpellier (wyn)
De Wetshof Estate (vonkelwyn)
Goeters (dekor)
Las Paletas (roomys)
Bobbi Brown (grimering)
Stylebar (hare)
Southern Sun Cape Sun (verblyf)

The post rooi rose vier fees! appeared first on rooi rose.

Raine Tauber, grimeerkunstenaar vir MAC, gee raad:

• Hou jou onderlaag natuurlik, met ligte dekking.
• Vermy dit om goud te gebruik waar jy baie plooie het. Fokus eerder op die binneste deel van jou oë, as buite waar dit dalk in jou plooitjies kan beland.
• As jy reeds natuurlike grimering aanhet, tik ’n bietjie goue oogskadu in die binneste V van jou oë, of gebruik ’n goue oogomlyner.

Suzanne se goue voorkoms vir elke dag:

Ek druk my ringvinger in my potjie MAC Pro-Longwear Paint Pot in Indianwood (R270) en vee dit net oor my ooglede. Met hierdie tipe goue voorkoms wat nou in die mode is, hoef dit nie te netjies te wees nie, so dit is ideaal vir my wat altyd iewers heen jaag. Ek is gaande oor die produk, want dit mors geen goue stukkies wat die res van jou gesig laat blink nie. Een smeersel is baie natuurlik, en jy moet mooi kyk om te sien dat dit goud is. Dit lyk werklik natuurlik. As ek dit meer sigbaar wil hê, smeer ek net nog ’n lagie bo-oor. As ek effens meer tyd het (soos ’n halwe minuut), tik ek ook Bobbi Brown Long wear Cream Shadow in Golden Pink (R405) met my vingers net aan die binnehoeke van my oë. Saam met dit dra ek maskara (Dior Diorshow Mascara, R570, is op die oomblik ’n gunsteling) en ’n natuurlike lipkleur. Givenchy Le Rouge Perfect (R605) is ’n heerlike lipbalsem, wat ook jou lippe se natuurlike kleur effens pienker/donkerde laat vertoon (danksy ’n aktiewe bestanddeel wat met jou vel se pH reageer).

Probeer hierdie produkte:

Kyk ook hier na die agter die skerms-video van ons April 2017-skooheidstorie, “Gemaklik in Goud”

The post Goue grimering appeared first on rooi rose.

genoeg vir 10

Sponskoek
• 170 g koekmeel
• 15 ml (1 e) mielieblom
• 6 eiers
• 200 g suiker
• knippie sout
• 70 g botter, gesmelt en afgekoel

Suurlemoenstroop
• 125 ml (½ k) vars suurlemoensap
• 125 ml (½ k) suiker

Framboos-en-suurlemoenversiersel
• 400 g botter, kamertemperatuur
• 600 g versiersuiker
• sap van een suurlemoen
• 200 g frambose

1 Voorverhit die oond tot 180˚C. Voer een 20 cm koekpan (dit moet ’n redelike diep pan wees) met bakpapier uit.
2 Smelt die botter en hou dit eenkant. Sif die meel en die mielieblom in ’n mengbak en hou dit byderhand.
3 Berei ’n dubbelkoker voor met 2 koppies water. Verhit oor matige hitte.
4 Plaas die suiker, sout en eiers in die mengbak van ’n elektriese menger en klits totdat dit goed gemeng is. Plaas die mengbak oor die pruttende water en klits aanhoudend. Die eiermengsel moet warm word en die suiker moet oplos. Toets gereeld of die mengsel warm is.
5 Plaas die mengbak in die elektriese menger sodra die mengsel baie warm is, klits teen hoë spoed. Die mengsel moet nou lig van kleur word en verdubbel in volume. Klits totdat die mengsel afgekoel het. Sowat 5-7 min.
6 Vou nou die meelmengsel versigtig met ’n breë spaan in. Roer twee eetlepels van die eier-en meelmengsel by die botter in.
7 Gooi dit nou weer by die ander bestanddele in die mengbak en vou goed deur sonder om te veel volume te verloor. Die mengsel moet lig, amper skuimerig en lig van kleur wees.
8 Gooi die mengsel in die koekpan en bak vir 25-30 min. of tot ’n toetspen skoon uitkom
9 Vir die suurlemoenstroop: kook die bestanddele in ’n klein potjie totdat die suiker opgelos is en dit stroperig word. Verwyder van die hitte en laat afkoel.
10 Vir die framboos-en-suurlemoenversiersel: plaas die botter in die mengbak van ’n elektriese klitser en klits tot sag en glad.
11 Voeg die versiersuiker by en klits teen medium spoed totdat die versiersel wit en romerig is. Sowat 5 min.
12 Voeg die suurlemoensap by en klits goed deur. Die frambose kan ook nou bygevoeg word en teen ’n stadige spoed deurgemeng word. Voeg so eetlepel of 2 kookwater by om dit maklik smeerbaar te maak.
13 Sny die koek in dun lae wat ewe dik is. Plaas die eerste laag op die koekbord en drup die suurlemoenstroop oor. Moenie die koek te nat maak nie. Smeer nou ’n lagie van die versiersel oor. Plaas nou die volgende koeklaag op en herhaal die proses tot al die lae voltooi is. Versier nou die hele koek met ’n dun laag van die versiersel, maak seker dit is mooi glad en egalig rondom en bo-op die koek.
14 Versier die bokant van die koek met roompoffertjies wat gedoop is in witsjokolade-ganache, goue roosblare en goud geverfde frambose.

Verjaarsdagkoek 1: Tina Bester se witsjokoladekoek

Verjaarsdagkoek 2: Wessels van Vuuren se rooiwyn-sjokoladekoek

Verjaarsdagkoek 3: Katelin Williams se gebakte Alaska-koek

Verjaarsdagkoek 4: Kanya Hunt se haselneutkoek met rooifluweel-roosversiering

Verjaarsdagkoek 6: Corli Botha se maklike verjaarsdagkoek met bessie-coulis en outydse melkversiersel

The post #75verjaarsdagkoek 5: Martjie Malan se framboos-en-suurlemoenkoek appeared first on rooi rose.