“Ek het die voorreg van ’n baie lang loopbaan van meer as 40 jaar gehad, maar tree nou al vir ’n geruime tyd nie meer op nie,” sê Laurika.  

“Ek kry egter daagliks nog versoeke vir vertonings. As dit enigsins moontlik sou wees, wou ek ’n ‘grootse gebaar’ maak teenoor die mense wat my en my werk steeds en oor soveel jare ondersteun.”  

Foto: Willem Botha

Laurika, wat byna agt jaar laas ’n nuwe liedjie opgeneem het, is saam met die Coleske-Groep aan die werk om ’n versameling nuwe liedjies op te neem. Die eerste snit, “Liewe lewe”, is pas uitgereik, met die volledige versameling wat teen einde November beskikbaar sal wees.  

“Ek en Carien Loubser (die bekende TV-vervaardiger vir onder meer Die Republiek van Zoid Afrika, JAN en Klanke van my hart) het ’n ontbytkuier gehad en sy het my bekendgestel aan die liedjie ‘Liewe Lewe’ van Christi van Niekerk, ’n jong en talentvolle komponis/sanger. Dis ’n pragtige, vars en vrolike liedjie met ’n ideale boodskap. Ek beplan om nog ’n paar liedjies van jong, maar ook gevestigde liedjieskrywers op te neem. Die versameling sal definitief ook spog met ’n paar vintage– Laurika-liedjies,” sê sy.  

Laurika erken dat sy nie doelbewus oor die jare ’n platform vir jonger kunstenaars probeer skep het met samewerkings nie, maar sy is dankbaar as dit wel hul loopbane gehelp het.  

“Dit was Arnold Coleske se idee om Christi ook as ‘medewerkende kunstenaar’ te betrek en die toevoeging van haar stem maak ’n pragtige bydrae tot ‘Liewe Lewe’.” 

Hoewel sy nog altyd die verhoog as haar eerste liefde beskou het, was die afgelope weke in die ateljee vir haar absoluut vreugdevol en opwindend.  

“Die hele proses is vir my regtig lekker,” voeg sy by.  

Laurika het ook nou tyd gekry om aandag te gee aan baie ander dinge en belangstellings waarvoor daar nooit tevore tyd was nie. Sy het haar spreekwoordelike “huis in orde” begin kry en haar toekennings, foto’s, memorabilia, musiekargief, artikels en resensies aan NALN (Die Nasionale Afrikaanse Letterkundige Museum en Navorsingsentrum) in Bloemfontein geskenk.  

Die omslag van ‘Liewe lewe’ bevat ’n vrolike skildery wat deur Laurika se dogter, Nina Torr, gemaak is, gegrond op ’n foto wat haar pa met ’n bokskamera geneem het tydens haar vyfde verjaardagpartytjie. Aanhangers kan uitsien na nóg unieke kunswerke van Nina wat as liedjie-omslae sal dien.  

Karlien Meiring het meer oor haar musikale terugkeer ná agt jaar gaan uitvind. 

Hoe het dit gevoel om ná soveel jare terug in die ateljee te wees?  

Dit was baie gemaklik en ek het relatief vinnig bygekom! Dit was baie aangenaam en lekker om weer saam met Arnold Coleske (die regisseur), Paulo Azevedo (die klankingenieur) en Floors Oosthuizen (die verwerker) te werk. Hulle is reuse in die bedryf en ek ag myself uiters gelukkig om saam met hulle te kan werk.  

Kan jy ons vertel van die proses om jou nuwe versameling liedjies te skep? Hoe het dit van jou vorige opname-ervarings verskil?  

Daar was nie ’n groot verskil van my vorige ervarings nie. Omdat ek nie self liedjies skryf nie, was ek maar nog altyd op goeie liedjieskrywers aangewese. Ek het met hierdie uitreiking dus begin deur liedjieskrywers wie se werk vir my mooi is, te kontak en vir ’n liedjie te vra. ‘Liewe lewe’, my eerste uitreiking, het as’t ware in my skoot geval, waarvoor ek baie dankbaar is. Met van die ander liedjies wat ek gaan opneem, het Arnold vir my toegang bewerkstellig tot daardie liedjieskrywers en hul werk. Dit is maar altyd ’n baie organiese proses om ’n ideale versameling te skep.  

Lees ook: Karlien gaan saam met dogter terug in tyd in nuwe enkelsnit & musiekvideo

Jou roemryke loopbaan strek oor meer as 40 jaar. As jy terugkyk, wat is van die onvergeetlikste oomblikke of mylpale vir jou? 

Dis so moeilik om enige oomblik uit te sonder! Net sodra ek dink aan een ding, kom iets anders op. Ek dink om ’n sterk liedjie te ontdek, soos “Kinders van die Wind”, “Aai-aai”, “Vergeet om my te vergeet/Onthou om te onthou”, “Jy is te dierbaar”, “Op Blouberg se strand”, “Stuur groete aan Mannetjies Roux”, “Blou”, “Hot Gates”, “Lord of the Dance” – en nog baie meer, was altyd vir my top-gebeurtenisse. Ek kon nooit wag om die nuwe liedjies vir ’n gehoor te sing en dan die reaksie te beleef nie. En as ’n gehoor nie dadelik aanklank by ’n nuwe liedjie gevind het nie, het ek net weer probeer om dit beter oor te dra. Dít was die werksproses wat my die gelukkigste gemaak het.  

 Jy het genoem dat jy meer aandag aan ander belangstellings begin gee het. Kan jy meer oor hierdie belangstellings deel?   

Ek het meer tyd gehad om te lees, na mooi musiek te luister en ek kon meer aandag aan ons huis gee. Daar is nou baie meer tyd om met Chris, ons kinders, kleinkinders en vriende te kuier. Hierdie is ’n kosbare tyd vir my.   

Lees ook: Vyf-vinnige-vrae-Vrydag met Jana Kruger oor ‘Een keer om die son’ se komplekse Lani 

Jou dogter, Nina Torr, het tot die voorbladkuns vir “Liewe lewe” bygedra en was al voorheen by jou werk betrokke. Hoe spesiaal is dit vir jou om saam met haar aan jou projekte te werk?  

Nina is een van my gunstelingmense in die lewe, so, afgesien van haar pragtige kuns – wat my altyd sal verras – is dit net lekker en betekenisvol om iets saam met haar te doen.  

 Die enkelsnit is nou op alle digitale stromingsplatforms beskikbaar. Laai dit hier af.  

Lees ook: Ontmoet Almero, die man agter ‘Een keer om die son’ se treffende klankbaan

The post Vyf-vinnige-vrae-Vrydag met die legendariese Laurika Rauch – oor haar nuwe musiek  appeared first on rooi rose.

‘n Nuwe begin, vars hoop vir die toekoms. Dit is die tema van die gesoute gesoute sangeres, TV persoonlikheid, radio-omroeper en voormalige Mev. Verenigde Nasies (2006) se splinternuwe enkelsnit getiteld ‘Nuwe liefde’. 

Met die splinternuwe liedjie vier die rooikop-sangeres 20 jaar in die musiekbedryf. Sedert sy twee dekades op die musiektoneel verskyn het, het sy deurlopend nasionaal steeds opgetree by talle vroueoggende, kerke en skole en het selfs drie jaar gelede ‘n snit getiteld “Lig breek deur” uitgereik. 

Nuwe Liefde is saam met Nadine geskryf deur die musikante Janie Bay en Hunter Kennedy van Fokofpolisiekar- en Die Heuwels Fantasties-faam. Nadine het self handjie bygesit met die lirieke van die liedjie en die konsep.  

“Om gelukkig te wees is ‘n keuse wat begin by dankbaarheid vir wat ‘n mens het.  Hoop is nie iets wat in die verlede gevind kan word nie, maar in die hede en in die toekoms. Daarom is dit waar jou fokus moet wees,” verduidelik Nadine, wat besluit het dit is tyd om vir haar getroue ondersteuners dankie te sê met ‘n splinternuwe vrystelling wat hoop bring. 

Nadine beskryf die genre van die liedjie as “sparkle pop”. “Ek dink ons het nou net ‘n nuwe genre ryker geword wat die Afrikaanse musiekbedryf betref!”  

Nuwe Liefde se lirieke spoor mens aan om gesonde besluite te neem vir jouself, goeie keuses te maak, die mooi in jou te leer raaksien en van jou sparkle te deel met ‘n wereld wat dit baie nodig het, sê die rooikop-sangeres. 

“Nuwe Liefde se lirieke en boodskap is ‘n tipe van ‘n credo vir my. Dit som in ‘n neutedop op waardeur ek is, maar ook waar ek nou staan in my lewe en wat ek wil hê vir my toekoms.” 

Die sangeres, wat vanjaar haar 20ste jaar in die Afrikaanse musiekbedryf vier, glo luisteraars gaan Nuwe Liefde goed ontvang. 

“Ek het baie lank gewag voor ek iets nuut uitreik, want ek wou seker maak ek bring kwaliteit na die tafel toe. My storie is een wat gevul is met lig en sprankel, en ek glo dat daardie lig deur my musiek na ander mense toe oorspoel.” 

Die musiekvideo vir Nuwe Liefde speel af in Mustang Sally’s Diner in Pretoria. Die stel van die video verleen ‘n unieke visuele element tot die produksie. ‘n Sexy Cobra-voertuig is ook geborg vir die verfilming van die video. 

“Die storielyn handel oor ‘n meisie wat in haar kop leef, sy is alles vir almal om haar maar sy sukkel om die balans te behou en haarself die tyd en liefde te gee wat sy verdien. Tydens ‘n kuiersessie saam met haar vriendinne, gaan daar ‘n liggie aan vir haar oor wat sy eintlik moet doen om weer te begin “lewe”. Haar vriendinne ruk haar groot bril af van haar neus af, maak haar bolla los, en help haar om die magic in haar weer na vore bring.” 

Nadine is ‘n bekroonde kunstenaar, wat spog met twee SAMA-toekennings, ‘n Bokkie-toekenning, ‘n Afri Indie-toekenning en ‘n Ghoema-toekenning agter haar naam. 

Meer oor Nadine

Nadine Blom het op vierjarige ouderdom begin klavier speel en is nou sowat 20 jaar in die musiekbedryf en 10 maande in die radiobedryf doenig. 

Die SAMA-bekroonde sangeres se debuutuitreiking, “Veer”, het 13 oorspronklike en liriekgedrewe snitte uit haar eie pen bevat. Sy word geïnspireer deur werklike ervarings en verwerk pyn, hartseer en trauma met die skryf van musiek en lirieke. 

Nadine het self ‘n veelsydige musieksmaak en luister van Sting tot Bach, Bob Dylan en Diana Krall, John Mayer en Chris Isaak, Nina Simone en Norah Jones.  

Sy is ook elke weeksoggend as omroeper op die Kaapse radiostasie Bok Radio te hoor. Nadine hou ook haarself besig met vrouewerkswinkels in verskillende provinsies, wat sy per geleentheid saam met Yolande Britnell Steyn van Sit aan die Ketel aanbied. 

Nadine lewer ook nasionaal akoestiese vertonings saam met die Rooiwynprofeet en skuif agter die klavier in vir hierdie vertonings. Die sangeres is mal oor dié vertonings aangesien dit haar ‘n “volsirkel-oomblik”-gevoel gee, want dit is hoe sy haar loopbaan afgeskop het, maar ook waar sy op haar gelukkigste is – agter die klavier. 

Nadine is ook ‘n toegelate prokureur en het ‘n meestersgraad in mensehandel en kuberveiligheid voltooi. Sy gebruik die kennis wat ek opgedoen het in haar skooloptredes en spreek aanlynveiligheid van kinders aan deur haar musiek. In Augustus en September vanjaar het sy altesaam 7 000 kinders toegespreek en opgelei om hulself te beskerm in hul aanlynwerelde.   

KYK: Nadine Blom – Nuwe Liefde Amptelike Musiekvideo

Lees ook: Robbie Wessels se nuwe lied ‘n ode aan Eben Etzebeth

The post Nuwe enkelsnit “’n credo van die lewe” vir Nadine Blom appeared first on rooi rose.

“Dis exciting, dis scary, dis my woorde, my hart, my verlede- en toekomspad. Dis gedigte, dis stories, dis feite, dis fiksie, dis lag, dis huil, dis te min en te veel. Ek het soveel om te gee, soveel om te deel,” sê die sangeres en liedjieskrywer Deidré Barnard oor haar eerste kortspeelalbum, Genoeg gewees, wat nou aanlyn beskikbaar is.

Hierdie vrystelling, wat bestaan uit vier liedjies uit haar eie pen, is na haar gunsteling-snit op die album vernoem en beklemtoon die boodskap dat elkeen van ons van die begin af goed genoeg gemaak is en mense het wat ons liefhet en waardeer vir wie ons is.

“Die titel vat die kortspeelalbum se tema goed saam en som eintlik maar die afgelope paar jaar van my lewe op, wat werklik waar ‘n rollercoaster was! Goed en sleg. Op en af. Dit gesê, was wie ek is en wat ek gedoen het, ‘genoeg gewees.’ Al wil jou gedagtes en die wêreld soms vir jou anders vertel, is jy genoeg,” sê Deidré.

Deidré het in 2018 bekendheid vir haar deelname aan die realiteitsreeks, Die Kontrak, verwerf. Sy is in die Strand gebore en getoë en sing al vandat sy kan onthou. Volgens dié Kapenaar het sy reeds in 2020 begin droom en bou aan die inhoud van die kortspeelalbum en gaan dit by ’n wye gehoor aanklank vind, maar veral by die jongklomp.

“Hoewel die oorhoofse genre pop is, is dit nie pop soos jy dit ken nie,” verduidelik sy. “Omdat ek elkeen van die liedjies self geskryf het, dink ek luisteraars kan ’n persoonliker ervaring verwag.”

In die kort tyd sedert sy die musiekmark in 2018 betree het, het sy al – buiten vir die vrystelling van haar oorspronklike musiek – talle hoogtepunte beleef, wat insluit ’n platekontrak met Inhoud Huis Musiek en rolle in die gewilde musiekblyspele: Die Gelofte en Die Kaplyn.

Sy erken dat haar betrokkenheid by laasgenoemde haar baie na aan haar eie pa laat voel het.

“Ek kon tydens en na die produksie so lekker met hom gesels oor sy ervaring op die grens. Ek voel ook op ’n manier baie nader aan my pa en dat ek hom beter ken, want hy was omtrent so oud soos wat ek was terwyl ons die produksie aangepak het, toe hy op die grens was.”

Sy is ook ’n musiekonderwyser, wat vir laerskoolkinders en volwassenes leer sing en kitaar, ukelele en klavier speel.

 

View this post on Instagram

 

A post shared by d e i d r é (@deidrebarnarddd)

Die musiekbedryf het haar die afgelope paar jaar geleer om geduldig te wees, omdat alles op die regte tyd gebeur en sy is baie dankbaar vir elke geleentheid wat sy het om haar musiekdroom uit te leef, “Ek hoop my luisteraars, meer as enigiets anders, vind aanklank by my musiek en vind ietwat van ‘n tuiste daarin. Iets waarna hulle kan luister en veilig, gesien en gehoor voel, maak nie saak in watter omstandighede hulle hulself bevind nie,” sluit sy af.

Karlien Meiring het meer oor haar gaan uitvind.

Jou kortspeelalbum bestaan uit vier liedjies uit jou pen. Watter temas en boodskappe verken jy in hierdie snitte?

Die liedjies is baie reflekterend. Dit vertel stories van mense, gebeure in my lewe, my drome, lesse wat ek geleer het – en oor en oor doen. As geheel dink ek die kortspeelplaat beklemtoon hoe die lewe ‘n draai met ’n mens loop sodra jy die grootmenswêreld betree. Dis scary, maar onvermydelik en almal wat nou in jou lewe is, gaan nie noodwendig vir ewig daar wees nie. Dis oukei en deel van die lewe. Jy moet net jouself toelaat om deur die groeipyne die mooi raak te sien en besef dis deel van die groter prentjie en die Here se plan met jou.

Foto: Chené Smit (Petal and Leaf Photography)

Jy het geduld en geloof in jou musikale reis genoem. Wat is jou raad aan aspirant-musikante wat na hul drome in die musiekbedryf werk?

My advies aan enige musikant wat dit in die bedryf probeer maak, is: “Moenie jou tyd Sy tyd probeer maak nie. Plaas die Here in beheer van alles. Hy sal jou optel waar jy weggeneem moet word, neersit waar jy moet gaan en jou elke tree van die pad bystaan.”

As musiekonderwyser, wat geniet jy die meeste daarvan om ander te leer sing en instrumente speel?

Dis vir my lekker om te weet die musiekklas is die klas waar kinders kan veilig voel. Ek geniet die kinders se unieke en vreugdevolle uitkyk op die lewe baie. Dis asof (ironies genoeg) hulle baie maal die lewe vir my in perspektief sit. Dit voel vir my asof ek meer by hulle leer as wat hulle by my doen!

Hoe het jou ervaring op Die Kontrak in 2018 jou musiekloopbaan en groei as kunstenaar gevorm?

Die Kontrak het my gewys dat ek nog baie grootwordwerk het om te doen voordat ek in die bedryf kon staan. Dit het my die geleentheid gegee om op ‘n baie jong ouderdom te sien hoe die bedryf werk. Dit was ‘n ongelooflike voorreg om deel daarvan te kon wees- ek kon daarna werklik aan myself skaaf, skuur en werk om nader te kom aan die musikant en kunstenaar wat ek beoog om te wees.

 

View this post on Instagram

 

A post shared by d e i d r é (@deidrebarnarddd)

As jy met enige kunstenaar aan ‘n liedjie kon saamwerk, wie sou dit wees en hoekom?

Ek sou graag saam met Taylor Swift wou werk. Ek dink sy is ‘n uitstekende liedjieskrywer en haar stories verander lewens. En dis wat ek wil doen; lewens met woorde verander!

Foto: Chené Smit (Petal and Leaf Photography)

Kry ‘Genoeg gewees’ nou op alle digitale stromingsplatforms.

Lees ook: Vyf-vinnige-vrae-Vrydag met Bennie Fourie oor die splinternuwe komediereeks, Taktiek

The post Vyf-vinnige-vrae-Vrydag met Deidré Barnard oor haar eerste kortspeelalbum appeared first on rooi rose.

Deur: Savanna Douglas. Hooffoto: Facebook / Sinead O’Connor 

Die Ierse sangeres Sinéad O’Connor is in die ouderdom van 56 oorlede.

’n Verklaring wat deur die Ierse sangeres se familie op RTE vrygestel is, het haar heengaan op Woensdag 26 Julie bevestig.

Die verklaring lui:

“Dit is met groot hartseer dat ons die afsterwe van ons geliefde Sinéad aankondig. Haar familie en vriende is verpletter en het in hierdie baie moeilike tyd privaatheid versoek.”

O’Connor is in 1966 in Glenageary, Dublin gebore. Haar ouers het geskei toe sy jonk was en sy het traumatiese kinderjare gehad.

Musiek het Sinéad se redding geword.

In 1987 het O’Connor haar debuutalbum, The Lion and the Cobra, vrygestel. Net twee jaar later het die kunstenaar wêreldbekendheid verwerf toe die treffersnit, Nothing Compares 2 U van haar 1990-album I Do Not Want What I Haven’t Got miljoene kopieë wêreldwyd verkoop het.

Die musiekvideo vir Nothing Compares 2 U is meer as 400 miljoen op YouTube gekyk, en het die werke van popsterre soos Miley Cyrus geïnspireer in haar 2013-treffer, Wrecking Ball.

O’Connor, het altesaam 10 albums vrygestel en met verskeie genres en style deur haar loopbaan geëksperimenteer.

Sinéad het kontroversiële sienings oor godsdiens, feminisme, oorlog, geestesgesondheid en seks gehad. Die ikoon was nog altyd uitgesproke deur haar musiek en aktivisme, en het deursigtig met aanhangers oor haar stryd met geestelike en fisiese gesondheid gebly.

Sinead O’Connor is vier keer getroud en het vier kinders gehad – drie seuns en ‘n dogter.

Sy sal onthou word as ‘n ikoon wat altyd haar man gestaan het en die massas ontroer het met haar kragtige stem en emosionele musiek.

Lees ook: Ons laaste onderhoud met Bradley Olivier

The post Sinéad O’Connor is in die ouderdom van 56 oorlede appeared first on rooi rose.

Deur Savanna Douglas. Foto: Getty Images

In ‘n persverklaring wat onlangs op haar sosiale media-platforms gedeel is, het Celine aangekonding dat sy haar Courage-wêreldtoer vir alle datums wat in 2023 en 2024 te koop is, sal kanselleer weens die seldsame toestand.

Celine skryf:

“Ek is so jammer om julle almal weereens teleur te stel. Ek werk baie hard om my krag terug te bou, maar om te toer kan baie moeilik wees selfs as jy 100% is. Dit is nie regverdig teenoor jou om aan te hou om die vertonings uit te stel nie, en al breek dit my hart, is dit vir die beste dat ons alles nou kanselleer totdat ek regtig gereed is om weer terug op die verhoog te wees. Ek wil hê julle moet weet, ek gee nie op nie… en ek kan nie wag om julle weer te sien nie!” – Celine xx…”

 

View this post on Instagram

 

A post shared by Céline Dion (@celinedion)

Wat is stywe persoon sindroom?

Volgens die Amerikaanse Nasionale Instituut vir Neurologiese Afwykings en Beroerte word SPS geklassifiseer as:

“‘n Seldsame, progressiewe neurologiese afwyking.”

“Simptome kan stywe spiere in die romp (bolyf), arms en bene insluit; en groter sensitiwiteit vir geraas, aanraking en emosionele nood, wat spierspasmas kan veroorsaak.”

“…Mense met SPS kan met verloop van tyd abnormaal ontwikkel, dikwels gebukkende posture. Sommige mense is dalk te gestremd om te loop of te beweeg. Baie val gereeld omdat hulle nie die normale reflekse het om hulself te vang nie.”

“Wetenskaplikes verstaan nog nie wat SPS veroorsaak nie, maar navorsing dui daarop dat dit die gevolg is van ‘n outo-immuunreaksie wat in die brein en rugmurg skeefgeloop het.”

Die pad na herstel…

In ‘n boodskap aan aanhangers wat haar diagnose in Desember verlede jaar bekend gemaak het, het Celine ‘n span dokters genoem wat haar help om beter te word, en bedank haar ondersteunende kinders wat haar hoop gee op haar pad na herstel.

Alhoewel daar nog baie is om oor die toestand te leer, noem Dion dat sy hard besig is om haar krag terug te bou, met behulp van ‘n Sportgeneeskundige Terapeut.

Lees ook: Luke Dale Roberts open Europese styl salon in Kaapstad

The post Celine Dion kanselleer wêreldtoer in stryd met neurologiese toestand appeared first on rooi rose.

Ná haar reis op The Voice (tweede seisoen) in 2017 waartydens sy ’n derde plek in die kompetisie behaal het, het Samantha Leonard gedink sy sou uiteindelik haar sangloopbaan-droom kon uitleef. Die werklikheid het egter verskeie toe deure, leë beloftes en baie seer vir haar ingehou.

“Ek het daarna my trane gesluk, my ken opgetel en in Januarie 2018 aan my album, ’n Duisend keuses, begin werk. Ek en my pa het ons laaste sente bymekaar gesit om 27 jaar se harde werk te red. Dit was my laaste probeerslag,” sê sy.

Haar album is ná baie harde werk aan die einde van 2018 vrygestel, maar weereens was haar geluk van korte duur omdat die Covid-19-pandemie haar loopbaan erg skade berokken het. “Ons het alles verloor. Ek was moedeloos en gebroke, ek kon nie eers meer sing nie, want ek was bang om weer seer te kry.”

Dit het haar met geen ander keuse gelaat as om haar mikrofoon finaal neer te sit en haarself as eiedomsagent te begin bekwaam nie.

Gelukkig ontmoet Samantha toe vir Francois Taljaard, haar “boerseun van Krugersdorp” wat haar vir die tweede seisoen van Die Kontrak ingeskryf het.

Nou is Samantha al deel van die top-vier op die program wat sy as haar reddingsboei beskryf: “Die Kontrak is waar ek myself nie net vir die eerste keer leer ken het nie, maar ook waar ek geleer het hoe om myself en my letsels weer lief te hê. Dis waar ek weer verlief geraak het op musiek, op die lewe, op mense, en op Afrikaans.”

Karlien Meiring het meer oor die vrou met die goue stem (en hart) gaan uitvind.

Wanneer het die sanggogga jou die eerste keer gebyt?

Ek het op die ouderdom van drie begin sing en het altyd geweet dit is wat ek vir die res van my lewe wil doen. Ek het op die verhoog grootgeword en in kore, musiekteaterproduksies, en ons kombuis opgetree en my ouers aanhoudend gevra: “Watter liedjie wil julle hê moet ek volgende sing?” Nadat die skoolklok in die middae gelui het, het ek huis toe gejaag om agter my mikrofoon te kom waar ek elke dag vir vier ure lank sou sing. Ek het nog altyd die lewendigste en tuis agter ’n mikrofoon gevoel.

Wat is die grootste lesse wat jou loopbaan jou tot dusver geleer het?

Daar is 12 rondtes in ’n boksgeveg. Die lewe het my pa 12 keer plat geslaan, maar hy het elke keer weer opgestaan. Hy het my geleer om dieselfde te doen: Om terug te veg en aan te hou baklei, maak nie saak hoe seer dit is nie. Aanhouers wen werklik. Ek het ook geleer om in myself te glo, want ek is my eie grootste kompetisie, niemand anders nie. En net so belangrik as wat dit is om in die oomblik te leef, is dit ook belangrik om dié oomblikke met die regte mense te deel – mense wat in jou glo en jou onvoorwaardelik liefhet.

 

View this post on Instagram

 

A post shared by 𝕊 𝔸 𝕄 𝔸 ℕ 𝕋 ℍ 𝔸 𝕃 𝔼 𝕆 ℕ 𝔸 ℝ 𝔻 (@samanthaleonard_artist)

Wat inspireer jou wanneer jy liedjies kies om te sing of self te skryf?

Ek vra myself af: “Wat is die doel agter enigiets in die lewe as dit nie mense dien nie?” Dit moet tog iets vir iemand beteken. Só voel ek ook oor elke liedjie wat ek sing of wat ek self skryf: Al twee kom vanaf regte, persoonlike ervarings in my lewe en loopbaan.

Waarmee is jy besig wanneer jy nie gehore met jou stem betower nie?

Ek voel daar is ’n wanopvatting van musikant-wees. Mense sê gereeld vir my: “Dis seker so lekker om net ’n uur se vertoning te doen en die res van die week vakansie te hou.” Daardie “vakansiedae” is wanneer ons die hardste werk. ’n Sangloopbaan bestaan uit baie laat aande, opofferings, en konstante druk om relevant te bly in ’n bedryf wat altyd nuwe talent oplewer. Ek werk van sonsopkoms tot sonsondergang om my talent te verbeter en om die beste moontlike weergawe van myself te wees – nie net as kunstenaar nie, maar ook as mens.

Ek wil die verandering wees wat ek in die wêreld wil sien deur te wys hoe ’n vertrek kan ophelder as daar meer as net een lig skyn. Wees lief vir mekaar, want al wat ons op die einde van die dag het, is mekaar.

Wie is jou droomkunstenaar om ’n duet mee te sing?

Hierdie is vir my onmoontlik om te beantwoord. Daar is soveel magic en inspirasie wat kom van verskillende en uiteenlopende kunstenaars om die wêreld heen. Jessie J is vir my persoonlik ’n massiewe inspirasie. Sy is ’n sterk vrou met ’n sagte hart. Sy het ’n stem wat mense stilmaak en laat luister, want sy sing uit ’n plek van egtheid.

Volg Samantha op Instagram!

Die Kontrak word op Sondae om 18:30 op eExtra (Openview kanaal 105 en DStv-kanaal 195) uitgesaai. Of kyk saam op die eVOD-app. Herhaalde uitsendings is elke Saterdag om 17:00 op eTV.

Lees ook: Vyf-vinnige-vrae-Vrydag met 2 Brunettes on a Budget

The post Vyf-vinnige-vrae-Vrydag met Die Kontrak se Samantha Leonard appeared first on rooi rose.

Lady Gaga stel eie skoonheidshandelsmerk bekend  – Deur Zoë Salzwedel. Hooffoto: Greatstock/ Shutterstock  

Lady Gaga se grimering is lank reeds ’n onderwerp van wye bespreking. Van haar uitspattige “The Fame Monster”-tydperk tot haar afgeronde “Joanne”-fase, is dié aktrise en sanger se voorkoms nog altyd ’n verlenging van haar unieke kunstigheid.

Lees ook: Bradley Cooper: ’n Ster soos min

En nou, na maande van bespiegelinge in die skoonheidsbedryf, stel Gaga amptelik ’n skoonheidshandelsmerk, genaamd Haus Laboratories, bekend. En dít boonop eksklusief deur die gewilde aanlyn-kleinhandelreus Amazon!

Haus Laboratories word in September gelyktydig in nege lande op drie vastelande bekend gestel,  insluitend die Verenigde Koninkryk, die VSA, Japan, Frankryk en Duitsland.

Haus Laboratories is die eerste gróót skoonheidsreeks wat uitsluitlik op Amazon bekend gestel en verkoop sal word. Voorafbestellings kan vanaf 15 Julie 2019 (Amazon Prime Day) op Amazon geplaas word.

Wat is Amazon Prime Day?

Amazon Prime Day is Amazon se groot webwerf-uitverkoping. Vanjaar vind dit op 15 en 16 Julie plaas.
Onthou: Jy moet ’n Amazon Prime-lid wees om toegang  tot die fantastiese Amazon Prime Day-aanbiedings te verkry.

Lady Gaga het in ’n onderhoud met The Business of Fashion gesê dat sommige maatskappye haar wou dwing om Haus Laboratories aan te pas om by hul korporatiewe beeld in te pas, en daarom het sy gekies om dit op Amazon bekend te stel. Amazon help ook om dié reeks vir almal toeganklik te maak, wat blykbaar een van die hoofredes is waarom Gaga en haar beleggerspan op dié maatskappy besluit het.

Gaga kry haar inspirasie vir Haus Laboratories uit haar vroeë dae as ’n aspirant-sanger in Manhattan, ’n tyd toe sy goedkoop grimering moes gebruik om haar kenmerkende voorkoms te skep. “Dis kleurryke grimering wat my van Stefani Germanotta in Lady Gaga verander het.”

“Kleur is transformatief – dis kragtig, dis pragtig, en dis hoe ek my stem deur grimering gevind het,” het die sanger in haar onderhoud aan TBoF gesê. “Ek het myself ontdek, maar ander mense het my vir mý ontdek deur die manier waarop ek myself met grimering uitgedruk het.”

The post Lady Gaga stel eie skoonheidshandelsmerk bekend appeared first on rooi rose.

Nóg Suid-Afrikaanse bekendes en hul troetelkinders! – Deur Zoë Salzwedel. Hooffoto: Pixabay

Lees ook: Plaaslike bekendes en hul troetelkinders!

Zak Hendrikz

Die gewilde akteur, vervaardiger en regisseur is mal oor donkies – tot dié mate dat hy selfs met hulle boer! Zak en sy vennoot, Jesse Christelis, se plaas en onderneming is op ’n kleinhoewe buite Randfontein geleë waar hulle met donkies van ’n baie skaars en gesogte bloedlyn teel – ’n bont donkie met blou oë.

Saam het Zak en Jesse in 2012 The Donkey Diary gestig, en ook besluit om voorheen mishandelde donkies te koop en te rehabiliteer. Teen Oktober 2016 het Zak en Jesse (persoonlik) meer as 250 donkies gerehabiliteer en uitgeplaas. Dié taak val onder hul sekondêre maatskappy, Donkeys and dwarf goats SA.

The post Nóg Suid-Afrikaanse bekendes en hul troetelkinders! appeared first on rooi rose.

Nie net hou sy Suid-Afrika se naam hoog nie, maar Robyn Waters is ook ’n inspirasie vir so baie mense regoor die wêreld. In Julie het Robyn en haar ma, Zuzette Waters, na Los Angeles gereis sodat Robyn aan die wêreldkampioenskappe vir uitvoerende kunste (WCOPA) kon gaan deelneem. Robyn was die enigste Suid-Afrikaanse sanger wat deurgedring het na die finale vertoning.

Robyn is baie ingestel op die energie van die gehoor, veral omdat sy hulle nie kan sien nie. Sy sê dit is eers wanneer jy die gehoor se intense energie voel, dat jy besef hoe groot die geleentheid werklik is.

En senuwees? Robyn sê dat sy aanvanklik eers senuweeagtig was, maar dat dit verdwyn sodra sy die eerste noot begin sing.

Die WCOPA (Wêreldkampioenskappe vir Uitvoerdende Kunste) word jaarliks in Julie gehou by die Long Beach Perfoming Arts Centre in Los Angeles. Sy was deel van die Suid-Afrikaanse span wat die voorreg gehad het om ons land te verteenwoordig, waar daar ook 45 ander lande deelgeneem het. Die afdelings het onder meer Sang, Rolspel, Modelwerk, Dans en Instrumentaal ingesluit. Sy het in April gekwalifiseer vir Sang, nadat sy aangewys is as “Vocalist of the Year 2017” deur SACOPA, wat gehou word in Nasrec. Verder het sy ook vir Instumentaal gekwalifiseer nadat sy die algemene wenner was van klavierspel in haar ouderdomsgroep.

Die Suid-Afrikaanse span by die WCOPA

Robyn het 3 goue medaljes by WCOPA verower, 2 vir Opera en in die Ope-katagorie (waar deelnemers enigiets kon sing), en dan ook die hoogste goud wat jy kan ontvang in die finale vertoning. Sy het ook silwer vir country-musiek en wêreldmusiek ontvang, asook brons in die broadway en verskeidenheid-afdelings. Sy was ook die wenner van die bedryfstoekenning (industry award) wat toegeken word aan deelnemers met die belowenste talent. Die toekenings word deur mense van die Hollywood-vermaaklikheidsbedryf toegeken.

As jy vir Robyn vra hoe sy oor haar prestasies voel, bly sy nederig. “Ek was en is nog steeds baie verbaas dat ek gewen het. Die kompetisie was ongelooflik sterk, veral in die sangafdeling. Dit is ’n lang pad van voorbereiding en daar is soveel talentvolle SA-sangers soos Mart-Marie en Christine, wat dit ook verdien het om daar te staan,” sê Robyn.

Robyn verkies dit om opera te sing, aangesien dit baie uitdagend is en ook die mees ekspresiewe genre is. Sy vertel dat dit haar wegneem na ’n ander wêreld, ’n wêreld waarin sy haar emosies kan uitleef. Sy probeer ook ander genres soos Jazz en Country en is gelukkig genoeg om ’n mentor te hê wat haar ondersteun en in haar glo.

Van kleins af het Robyn op haar oupa se klavier begin speel en haar eie liedjies opgemaak. Nadat haar oupa vir haar gesê het sy het ’n mooi stem, het sy besluit om te begin sing. Mev. Elmarie van Aarde, wat musiek by die Pionierskool op Worcester gee, het vir Robyn die geleentheid gegee om by funksies en talent-aande te sing. Sy het dit baie geniet en besluit dit is wat sy eendag wil doen. Haar ouers het besluit om haar te ondersteun en nie druk op haar te plaas nie en haar pa het besluit dit moet Robyn se eie keuse wees as sy vir sanglesse wil gaan. Op die ouderdom van 12 het Robyn by Mev. Anchen Swart op Worcester begin lesse neem en ook begin deelneem aan plaaslike kompetisies, waarin sy toe baie goed gevaar het.

In 2014 het Robyn die Gemini-sangkompetisie gewen. Sy het ook in 2015 die geleentheid gekry om deel te wees van die RMB Starlight Classics, wat jaarliks by die Vergelegen Estate in Somerset Wes aangebied word. Sy kon toe saam met die Kaapse Filharmoniese Orkes sing en het ook die geleentheid gekry om ’n duet saam met Nianell te sing. Robyn beskryf dit as ’n droom wat waar geword het. “Soos die lot dit wou hê, het ek my Opera Mentor Maudee Montierre ontmoet. Dit was bedoel om te wees. Sy verstaan my en het ongelooflik baie geduld met die uitdagings wat saam met my blindheid kom.”

Hier is die video van Robyn se optrede by WCOPA

Om die druk van kompetisies te beheer glo sy aan goeie voorbereiding. Sy glo ook, soos haar Mentor haar geleer het, om die storie agter die liedjie te verstaan sodat jy jou emosies kan gebruik wanneer jy daaroor sing, dit help haar ook om die woorde makliker te onthou, veral as dit in ’n ander taal is. By kompetisies lees of skryf sy sodat sy kalm kan bly. Robyn se uitkyk op die lewe is dat alles soveel makliker is as jy dit met liefde doen.

Robyn sal graag nog saam met Loyiso Bala wil sing en dan wil sy ook graag weer saam met die filharmoniese orkes optree. Twee internasionale sangers waarmee sy ook eendag die verhoog sal wil deel is Josh Groban en Andrea Bochelli.

Robyn gesels oor die tyd toe sy en haar ma saam in Los Angeles was:

“Dit was vir ons baie lekker om te dink ons is daar op die ‘4th of July.’ Ons het vuurwerke gaan kyk by die Queen Mary in Long Beach. Ons het tussen optredes ook ’n draai gaan maak by die Hollywood Walk of Fame, Dolby Theatre waar die Emmy’s toegeken word asook die Starlight Tours gedoen. Verder moes ons natuurlik Starbucks gaan probeer (ek is baie lief vir koffie!) Die enigste negatiewe ervaring was die kos. Hulle kos is nie so lekker soos Suid-Afrikaanse kos nie – hulle weet nie wat ‘slaptjips’ is nie. Op die laaste dag was ons in L.A. by Universal Studios. WOW! Ek sal almal aanraai om dit te doen. Ek was op elkeen van die ritte … om blind te wees het sy voordele. Dit was ongelooflik lekker. My ma is darem ’n bok vir sports en geniet dit net so baie.”

Robyn en haar ma, Zuzette by WCOPA

Zuzette is baie trots op haar dogter en alles wat sy al bereik het. Volgens haar is sy en Donavin, Robyn se pa, haar grootste ondersteuners. Sy vertel dat Robyn ongelooflike deursettingsvermoë het en baie hard werk vir wat sy wil bereik. Vir hulle is dit baie belangrik dat Robyn net geniet wat sy doen.

Die grootste uidaging met die reis na Los Angeles was die fondsinsameling. Robyn kon nie op haar eie gaan nie en moes iemand saamneem wat haar kon begelei, so dit het die koste verdubbel. Om geld in te samel het Robyn ’n CD gemaak met haar gunstelingliedjies wat sy verkoophet.

“Daar is gelukkig ook engele daar buite wat glo in my talent. Vir hulle moet ek dankie sê. Die geleenthede wat ek kry is te danke aan hulle en iets wat ek nooit vir myself sou kon droom nie.”

Robyn beskryf haar sangloopbaan as ’n “work in progress.” Sy sê sy het nog baie om te leer voordat sy ’n sukses daarvan kan maak. Sy is ook onlangs gekies om deel te wees van ’n TV-produksie deur Neil van Deventer (regiseur van Dis ek, Anna), waar hulle jong talent saam met die Afrikaanse groep Spoegwolf bekendstel. Hulle werk tans daaraan.

Robyn se storie is opnuut ’n bewys dat as jy in jouself en in jou drome glo, jy enigeiets kan bereik.

The post Blinde SA-sangeres wen 7 medaljes in L.A. appeared first on rooi rose.

“Iets van my het saam met my pa gesterf. Dit voel of ’n stuk van my uitgeruk is.”

Sangeres Helena Hettema sê sy is rou, seer en voel leeg nadat rowers haar 82-jarige pa, die legendariese Springbok-tydrenjaer Jan Hettema, in Junie op sy plaas naby Boschkop doodgeskiet het.

Haar emosies ry nog wipplank sedert die tragedie.

“My pa het nie vyande gehad nie. Dis vir my moeilik om te dink dat twee mans met balaklawas en gewere hom een oggend halfnege op sy plaas doodgemaak het.”

Jan se vrou van 41 jaar, Elsa, ’n sterk, positiewe, maar brose vrou met artritis is in die voorval deur die gesig geslaan en met ’n rekenaarkabel vasgebind. Sy kry traumaberading en het Kaap
toe verhuis.

Lees ook: Watter kosse veroorsaak jig?

“Die rowers het slegs elektroniese goed soos sy skootrekenaar en selfone, asook kontant en ’n pistool gesteel. Ons dink hy het hulle onverwags betrap. Hy en sy hondjie Tansi het na die hek gestap, want hy het ’n geluid buite gehoor. Hy het die mans tussen die bome gewaar en terug huis toe gehardloop om Elsa en Happiness, die huishulp, te waarsku. Hy het uitasem geskree ‘sluit die deure!’ maar hulle het hom ingehaal en in die kombuis geskiet. Hulle het seker gedink hy het ’n geweer, of hy het iets gesê wat hulle laat skrik het. Hy is van naby geskiet. Hy was daarop gefokus om die situasie te red … hy was ’n koelkop sportman wat enigiets kon hanteer. Dit is vir my ’n vertroosting.”

’n Vriend van Helena, ’n sielkundige by die polisie, het haar vertel aanvallers gebruik dikwels voor ’n aanval dwelms.

“Dit maak sin, want Elsa sê hulle het ’n kil, doodse blik in hul oë gehad. Maar ek wil nie in daardie spasie gaan waar ek die mense se gesigte kan sien nie.”

Sy wil nie wraak sweer nie, maar glo die mans sal gevang word en dat God se geregtigheid sal geskied.

“Hy sien alles. Daar is goedheid én boosheid in die wêreld en ek glo in Suid-Afrika se toekoms! Maar dié soort aanvalle is ’n Suid-Afrikaanse ding. Die Suid-Afrika waarin ek glo, is Madiba se Suid-Afrika. Ek het een keer in Londen probleme met ’n visum gehad en die liedjie ‘Citizen’ op die CD Rooiwynliefde geskryf:

“I am a child of the universe, citizen of mother earth, tear up the paper money, let in the sun.”

Seer laat ’n mens dieper voel, sê sy. Die afgelope paar jaar moes sy ’n paar keer dood en trauma verwerk. Haar kêrel en haar eks-man is albei in motorongelukke oorlede. Toe sy getroud was, het sy ’n baba met ’n ektopiese swangerskap verloor, en ’n dag voor haar pa is haar deeltydse pianis en goeie vriend, liedjieskrywer Eugene Vermaak, oorlede. Verlede jaar is haar geliefde pianis, André Wessels, ook oorlede.

“Op die oomblik is daar ’n gebrek aan vreugde in my … ’n groot leemte. Onlangs was my pa saam met my en Eugene op die verhoog. Nou is albei dood.

“My pa moes nie so gesterf het nie. Nie so wreed nie. Maar hy was die soort wat in ’n oogwink moes gaan en nie stadig moes oud word nie. Hy moes soos ’n verskietende ster gaan, en hy het!”

Sy wil haar pa onthou soos hy was en op sy vol en kampioen-lewe fokus en nie op sy laaste oomblikke nie.

Maar sy gaan die kuiertjies mis.

“Hy het elke Maandag by my kom kuier. Dit is kosbare herinneringe. Ek kon die hek hoor oopgaan. Hy het altyd singend en fluitend met die oprit opgestap. Dan het hy my begin roep asof ek miskien nie daar is nie: ‘Helena! Helena!’ Elke keer om presies halftien. Hy was ’n sportman en altyd stiptelik.

“Die laaste keer toe ek en my verloofde, Thys, by hulle op die plaas was, het ons gelag, wyn gedrink en my pa en Thys het sigare gerook wat hy altyd uit Afrika gebring het. Ons het goeie tye op die plaas gehad. My pa het die plek gekoop toe ek twaalf was.”

Sy vermoed haar pa kon sy dood aanvoel.

“Hy het die Maandag voor sy dood vir ’n vriend gevra of sy testament reg is en gesê hy is nie bang om dood te gaan nie. Dit is vir my ’n groot troos.”

Omdat so baie van haar pa se vriende oorlede is, het sy hom met hul laaste kuier gevra watter soort begrafnis hy sou wou hê. “Dis asof ek dit ook aangevoel het.”

Sy sê Jan Hettema was ’n legende. Hy het nog soveel planne gehad en was nog so doenig. Hy was gesond, fiks en vol energie. Hy was besig met voorbereidings vir ’n Hollandse dag in Julie en sou ook later ’n toespraak by die Pretoriase Buiteklub gegee het.

“Hy was nie blasé oor die lewe nie, hy was opgewonde en vol verwondering daaroor; ’n positiewe en dinamiese man wat die dag aangegryp het.”

Sy en haar pa het ’n liefde vir musiek gedeel en graag saam musiek gemaak. As dogtertjie het sy op sy skoot gesit en “Master Jack” gesing. Hy het ’n paar keer in haar loopbaan saam met haar opgetree en het ’n natuurlike sangtalent gehad.

“Die laaste keer wat hy saam met my opgetree het, wou hy Frank Sinatra se ‘My Way’ sing. Hy het gevoel dit pas by hom, en dit is waar. My pa het dinge op sy manier gedoen. Ek weet nou dit is gepas dat hy juis daardie liedjie met ons laaste optrede saam gesing het.”

Jan Hettema was ’n eerlike, reguit Hollander, lag sy dogter. Dit het nie vir hom saak gemaak of mense van hom hou of nie.

Min mense weet Jan was in sy jong dae ’n talentvolle ontwerp-tekenaar wat hoogs tegniese ontwerpe by die WNNR en die Atoomenergiekorporasie gemaak het vir die gebruik van son- energie en toerusting vir gebruik in breinoperasies. Hy het ook ’n paar renmotors ontwerp en opgebou, onder meer die Duphet saam met sy vriend Doepie du Plessis.

“Hy was ’n perfeksionis en het alles wat hy aangepak het met passie gedoen. Hy was nie net ’n Springboktydrenjaer nie, maar het ook Springbokkleure in fietsry verwerf. Hy het in 1956 aan die Olimpiese Spele in Melbourne deelgeneem en in 1958 aan die Empire Games in Cardiff.”

Haar pa het ook die eer gehad om ’n driekuns as Suid-Afrikaanse tydrenkampioen te verwerf, en is in die jare sestig drie keer agtereenvolgens genooi om saam met prinses Grace in Monaco tee te drink.

’n Paar dae ná haar pa se dood het sy ’n gedig vir hom geskryf en op facebook gepubliseer:

…Ek is jou nagtegaal
En jy vir ewig my lied
In ewigheid, vir ewig
Verwikkel in my hart is jy
En saam dans ek en jy
deur die tydlose sterregang
Want “Unforgettable is what you are”

Sy moes twee dae ná haar pa se dood by ’n intieme restaurant/teater in Pretoria optree. Sy het besluit om nie die vertoning af te stel nie.

“Ek het al my gevoel in my liedjies uitgestort en mense het gesê dit was my beste vertoning tot nog toe. Die mense het naby my gesit en ons het soos ’n familie gevoel. Hulle was nie net ’n gehoor nie en ek kon die liefde aanvoel wat hulle uitstraal. Ek het my vertoning met die lees van die gedig begin.”

Deur die trauma van haar pa se dood was haar verloofde Matthys haar “rots en juweel” en dit is vir haar lekker om te weet haar pa het van hom gehou.

’n Troos ná haar groot verlies, is dat sy aan die hiernamaals, die onsterflikheid van die gees glo.

“Hoewel daar tog tye is wanneer ek donker voel oor my verlies, is ek nie die soort mens wat met bitterheid wil rondstap nie. Ek glo jy moet jou gesig na die son draai anders gaan die donker jou insluk. Geregtigheid is die Skepper se werk. Ek kan nie toelaat dat omstandighede my vergif nie, want dan kan ek nie wees wat ek wil wees nie.

“Ek glo ook aan die liefde en al het party mense die geneigdheid tot boosheid in hulle, het die mens ook goed in hom. Ek het ongelooflik baie liefde van mense ontvang ná my pa se dood. Ek glo aan lig. Liefde is lig en oorwin die dood. Ek glo aan die gees en die gees is onsterflik. My pa se gees sal altyd by my wees.”

Liedjies en drome

Die skryf van liedjies en gedigte is ’n gawe waarvoor sy dankbaar is. Dit is genesend.

“Ek skryf ’n liedjie soos ‘Citizen’ in een sessie klaar as hy vloei. Soms kom die woorde eerste en dan die musiek. Dis ’n magical ding. Daar is nie ’n formule nie. Ek sien ’n beeld soos ’n straatkind met ’n wit gesig wat in die motors se ligte dans en dan skryf ek daaroor. ’n Oomblik … ”

Sy het ’n aanleg en voorliefde vir tale en kan onder meer Frans vlot praat. Sy sing ook in Italiaans, Nederlands en Vlaams.

“Vir my kom musiek en woorde altyd saam en het ’n ritme. Ek moet dit kan voel. Dit is ’n sielsding en nie ’n analitiese ding nie. Die liedjie ‘Divided Heart’ het ek op een slag vanweë inspirerende verlange by Brighton Beach in Engeland geskryf.”

Sy droom om meer op Europese verhoë op te tree sodat sy haar musiek en Suid-Afrika meer bekend kan stel en droom ook dat SA musiek op oorsese radiostasies gehoor sal word.

“Dis vir my hartseer dat so min Suid-Afrikaanse musiek in Europa bekend is, want ons speel so baie van hulle musiek. Ek sal ook graag ’n rol in ’n fliek wil speel, want ek het my loopbaan as aktrise by TRUK begin.”

The post Helena Hettema: ’n ster verskiet appeared first on rooi rose.