Kwiksilwer, die vintage Ford Granada in die speelfilm Die Kwiksilwers, is nie sommer enige kar nie. Vir Elsabe Marais (Lida Botha) is dit ’n tydkapsule vol herinneringe aan haar oorlede man, wat gereeld saam met haar avonture in dié motor aangepak het.

Saam met drie bejaarde vriendinne onderneem die koppige Elsabe ’n reis deur die Karoo om ’n meteorietstorting in Sutherland te beleef. Die res van die onwaarskynlike viertal is Anna (June van Merch), Elsabe se inmengerige buurvrou, die flambojante Mienkie (Susanne Beyers) en teruggetrokke Katie (Theresa Sedras). Hulle moet binne drie dae by Sutherland uitkom terwyl hulle Elsabe se oorbeskermende seun Wikus (Jacques Bessenger) probeer ontduik.

Lees ook: PAS BEKEND | Nuwe kykNET-reeks verken dramas en intriges van nuuskantoor

Die Kwiksilwers het by verlede jaar se Silwerskermfees die toekenning as die gehoor se gunsteling gewen, en nou is dié sielvolle drama-komedie op pad filmteaters toe. Dit begin op 1 Mei landwyd in teaters wys.

Lees ook: Koopgids: Ietsie spesiaals vir Ma

Jordy Sank, Gabriella Blumberg en Marista van Eeden, wat vir ’n Silwerskermtoekenning vir beste draaiboek benoem is, wys met dié rolprent dat die ouderdom g’n rede is om te gaan lê nie.

“Lida was in haar laat tagtigs toe ons die fliek geskiet het, maar sy was die mees energieke persoon op stel! Al die vroue, ook June, Susanne en Theresa, het soveel bygedra tot die drama én die komedie,” sê Jordy. “Hulle het vir soveel van die fliek se persoonlikheid en vreugde gesorg en gewys mens is nooit te oud om iets nuuts te leer en nuwe ervarings te hê nie.”

Hy is vol lof vir wat die Silwerskermfees vir Suid-Afrikaanse stories beteken.

“Ek dink dit is een van die belangrikste filmfeeste in Suid-Afrika omdat dit vir jong filmmakers die geleentheid gee om hul stem te laat hoor, meer as enige ander bemarkingsplatform op die kontinent. Dit gee my die geleentheid om flieks te skep wat nie andersins gemaak sou kon word nie. Ek is baie dankbaar vir die platform om al hierdie interessante verhale te kan vertel.”

Die Kwiksilwers het benewens die toekenning as die gehoor se gunsteling, nog twee toekennings by die Silwerskermtoekennings gewen – vir beste klankontwerp (Sound Surgeon Studios en Morné Marais) en beste grimering en haarstilering (Hanri Neethling). Jordy is benoem as beste regisseur, Susanne as beste vroulike byspeler en Lida en June in die kategorie vir beste aktrise. Die fliek is ook as beste speelfilm benoem.

Die film word deur Filmfinity versprei.

Die Kwiksilwers gee Suid-Afrikaners die perfekte geleentheid om hul vriende en families te gryp vir ‘n lekker padreis na die fliekteater.

Lees ook: The Mommy Club se Johandri: “As dit soos hoërskooldrama voel, hou ek my afstand”

Amptelike Lokprent: Die Kwiksilwers

Die Kwiksilwers begin op 1 Mei landwyd in rolprentteaters wys.

Lees ook: Wen groot met The Harvest Table!

The post ‘Die Kwiksilwers’ is hier – maak reg vir ’n film-avontuur soos geen ander nie! appeared first on rooi rose.

Deur Maryke Roberts. Foto’s: Clifford Roberts 

Die 12de Silwerskermfees is die afgelope week in Kampsbaai by The Bay Hotel en Theatre on the Bay gehou. Talle speelfilms, kortfilms en kort dokumentêre films het meegeding om die gesogte kristal rolprentkamera-trofee. Altesaam 50 akteurs, aanbieders en persoonlikhede is in verskeie afdelings vanjaar vereer by twee geleenthede: een die oggend by die hotel en die tweede helfte die aand by die Kaapstadse Internasionale Konferensiesentrum. 

Voor elke premiére het die filmspanne en akteurs op die blou tapyt verskyn, waar onderhoude met hulle gevoer is en foto’s geneem is. Dis soos die Cannes-filmfees in Frankryk, net beter, want dis alles in Afrikaans! 

Die uitgebreide Silwermark bied die geleentheid vir persoonlike voorleggings by die fees aan beide kykNET en Showmax in ’n verskeidenheid van Afrikaanse inhoudskategorieë. 

Die geleentheid om met regisseurs en ander besluitnemers te gesels oor moontlike projekte, is van onskatbare waarde, het vele sprekers verklaar. Werkswinkels en slypskole tydens die fees, help ook met korrekte voorleggins en ander waardevolle wenke. 

Die fees het bewys dat dit ’n belangrike platform vir sowel gevestigde as opkomende filmmakers is. Saam met die wêreld- of Suid-Afrikaanse premières van die jongste rolprente, vertoon die Silwerskermfees die werk van jong talent in ’n reeks diverse kortfilms wat met die fees se finansiële ondersteuning en mentorskap vervaardig is.  

Ses speelfilms, “Die Bloedhonde”, “Die dekonstruksie van Retta Blom”, “Die Kwiksilwers”, “Gebokste liefde”, “Hier.Na” en “Som van Twee” het in die speelfilm-afdeling meegeding. “Die Kwiksilwers” is die feesgunsteling. “Som van Twee” het met die meeste pryse weggestap, waaronder beste draaiboek, beste oorspronklike klankbaan, beste redigering, beste manlike byspeler (Pierre Breytenbach), beste regie, beste akteur (James Borthwick) en beste speelfilm algeheel. 

“Hier.Na” wen beste klank-ontwerp in ‘n speelfilm en beste grimering en haarstilering. 

“Baas se honne” wen die beste Shot-gun kortfilm; “Maak stil die geblaf” wen die beste kort dokumentêre film; en “Marie se laaste dag” wen die beste kortfilm deur ‘n opkomende filmmaker. 

Die sterre en filmmakers van “Die Bloedhonde” geniet hul oomblik van glorie voor die vertoning Vrydagaand.

Denise Newman (aktrise), Hans Strydom (akteur) en Roberta Durrant (TV-vervaardiger) is vereer vir hul lewensbydraes. 

• Die kykNET Silwerskermfees kortfilms en dokkies word vanaf 7 September elke Saterdag om 20:00 op kykNET, DStv-kanaal 144 uitgesaai. 

Lees ook: kykNET Silwerskermtoekennings vir Film en TV: Hier’s vanjaar se wenners!

The post Land se bestes by Silwerskermfees te sien appeared first on rooi rose.