Deur Maryke Roberts. Foto’s: Clifford Roberts

Die 13de kykNET Silwerskermfees is tans by The Bay Hotel in Kampsbaai onderweg en loop Saterdagaand met die gesogte Silwerskermtoekennings vir Film en Televisie by die Kaapstadse Internasionale Konferensiesentrum ten einde.

Die program is propvol met kortfilms, dokkies en speelfilms, wat almal meeding om met die gesogte trofee vir beste in hul kategorie weg te stap.

Voor elke première kom die sterre in hul mooiste aandklere en paradeer op die bloutapyt, waar die kameraflitse glans verleen en onderhoude gevoer word oor hul rolle.

Smiddae word daar skouer geskuur met regisseurs, akteurs, kinematograwe en nuwe idees vir projekte aan besluitnemers by die Silwermark voorgelê. Dit bied die geleentheid vir in-persoon voorleggings aan beide kykNET en Showmax in ’n verskeidenheid inhoudskategorieë.

Die fees wys ook uitgesoekte films elders in Kaapstad met opwindende gratis gemeenskapsvertonings in minder gegoede woonbuurte.

Tina Kruger, Programbestuurder: kykNET Silwerskermfees, sê: “Stories was nog altyd noodsaaklik vir mense om sin van hul bestaan te maak. By die kykNET Silwerskermfees – in die minlike Kampsbaai – word oorspronklike Suid-Afrikaanse stories jaarliks gekoester en gevier.

“Saam met die wêreld- of Suid-Afrikaanse premières van die jongste rolprente, vertoon die Silwerskermfees die werk van jong talent in ’n reeks diverse kortfilms en kort dokumentêre, wat met die fees se finansiële ondersteuning en mentorskap vervaardig is. Kortfilms deur ervare filmmakers is daarop gemik om gehore te roer en opkomende talent te inspireer. Die propvol feesprogram sluit paneelbesprekings, werkswinkels en bedryfsgerigte meesterklasse in wat deur bekende plaaslike en internasionale kenners aangebied word.

Die fees word oor vier dae aangebied en met die potblou hemele, spierwit strande en Tafelberg wat in die verte wink, is dit waarlik die Cannes van Suid-Afrikaanse film.

Kaartjies vir Vrydag en Saterdag se vertonings by The Bay Hotel se Rotunda en Theatre on the Bay ‘n entjie verder in Kampsbaai, is by Quicket te koop.

Lees ook: Boer soek ’n vrou: Die boere ontmoet hul keuses – is daar liefde in die lug?

The post Glans en swier by SA se Cannes appeared first on rooi rose.

Leon Schuster, Vinette Ebrahim en Marida Swanepoel word by die Silwerskermtoekennings vereer vir hulle lewensbydraes tot die vermaakwêreld in Suid-Afrika. Leon en Vinette word Saterdagaand 23 Augustus by die Silwerskermtoekennings vir Film en Televisie in die Kaapstadse Internasionale Konferensiesentrum (Kiks) gehuldig, en Marida ontvang daardie oggend haar eerbewys by die toekenningsgeleentheid in The Bay Hotel.

Leon Schuster

(Foto: Gallo Images / Sunday Times / Alon Skuy)

Leon Schuster is ’n filmmaker, komediant, akteur en sanger, maar bowenal het hy ’n reusebydrae tot nasiebou gelewer.

Leon, gebore en getoë in Bloemfontein, het ’n BA-graad aan die Universiteit van die Vrystaat verwerf, waar hy vir die Shimlas rugby gespeel het. Ná ’n draai as onderwyser het sy loopbaan in alle erns in 1975 by die SAUK begin.

Die radioprogram Die Vrypostige Mikrofoon en flieks soos You Must Be Joking en Oh Shucks, It’s Schuster het van Leon ’n huishoudelike naam gemaak. Hy het ook vir een van die grootste Suid-Afrikaanse treffers gesorg toe hy in 1995 sy liedjie “Hie’ kommie Bokke” uitgereik het.

Leon se narratiewe rolprente, soos There’s a Zulu on My Stoep en Mr Bones, het plaaslike loketrekords verpletter, met Suid-Afrikaners van alle agtergronde wat aanklank gevind het by sy komiese blik op die land. There’s a Zulu on My Stoep het ook gewildheid in Amerika geniet, maar uit sy 18 vollengterolprente is dit Mama Jack wat vir Leon die naaste aan die hart lê.

“As iemand wat vreugde vir Suid-Afrikaners gebring het,” sê Leon is hoe hy onthou wil word.

Vinette Ebrahim

Vinette was op hoërskool toe sy by The Space-teater in Kaapstad betrokke geraak het. Rolle in legendariese produksies soos Fiela se kind, Boesman and Lena en Buckingham Palace, District Six het gevolg. In 2000 het Vinette haar verskyning as Charmaine Meintjies (née Beukes) in die sepie 7de Laan gemaak en kort daarna volksbesit geword. Intussen het sy steeds in die teater gewerk aan produksies soos Miss Africa South, Vaselinetjie en My naam is Ellen Pakkies.

Sedert sy die Laan en sy mense gegroet het, het sy nuwe hoogtes bereik met rolle in Binnelanders, Generations, Diepe waters en Kelders van geheime, asook in TV-reekse soos Lioness, Koek, Legacy en die minireeks Evita in Excelsior. Sy het ook uitgeblink in vollengterolprente soos Barakat, Swirl en God Is African. Daarbenewens is Vinette ’n trotse mentor vir jonger spelers, skrywers en regisseurs.

“Die hoogtepunt van my loopbaan is die mense saam met wie ek gewerk het,” sê Vinette. “Elke projek waaraan ek gewerk het, was spesiaal, maar die mense … my medespelers, die crew, die produksiespan.”

Hoe voel sy oor hierdie toekenning?

“Een-en-vyftig jaar in die bedryf is ’n leeftyd – vir my altans. Hoe voel ek oor die toekenning? Geïnspireerd om nog te gee. Dis nog lank nie verby nie!”

Marida Swanepoel

Wanneer daar oor die geskiedenis van Afrikaanse TV gepraat word, is daar een naam wat altyd opkom: Marida Swanepoel.

Marida se wortels lê in die Kaap waar sy, onder meer, ’n meestersgraad in Afrikaans aan die Universiteit van Stellenbosch behaal het. Sy het by die SAUK in Johannesburg as omroeper aangesluit, en ná haar huwelik met Nic Swanepoel en die geboorte van hulle drie kinders, Elsje, Jan Adriaan en Franci, het sy radioverhale begin skryf. Later het sy by SAUK-TV se oorklankingsafdeling ingeval.

Marida behaal ’n tweede meestersgraad, hierdie keer in linguistiek, en met die begin van kykNET in November 1999, word haar kundigheid uitstekend as kanaalhoof ingespan. Onder haar leiding word oorspronklike inhoud vir die kanaal geskep, onder meer kykNET se eerste eie dramareeks.

“Ek is diep geraak deur die erkenning,” sê Marida. “Ons het hard gewerk in die beginjare, foute gemaak, dae en nagte deur gesloof, baie gelag, oplossings gekry en diep vriendskapsbande gesmee.

“Die 17 jaar by kykNET sal ek vir niks verruil nie. Die kultuur binne M-Net was warm en ondersteunend. Almal het mekaar geken. Elke afdeling in die maatskappy het gehelp waar hulle kon en wou hê jy moet slaag. Dit was deel van kykNET se sukses. Een groot liefdevolle familie. Wat meer kan ’n mens vra?”

Sedert haar aftrede is sy steeds ’n gereelde feesganger, uitstekende gespreksgenoot en raadgewer. Die vermaakwêreld in Suid-Afrika sou veel armer sonder Marida gewees het.

Die kykNET Silwerskermtoekennings vir Film en Televisie vind Saterdag 23 Augustus om 19:00 in die Kiks plaas en sal Sondag 24 Augustus om 19:00 op kykNET (DStv-kanaal 144) uitgesaai word.

Lees ook: Spoorloos keer terug met ’n ontploffende vyfde seisoen!

The post Drie legendes vanjaar by die Silwerskermtoekennings vereer appeared first on rooi rose.

Elke jaar gaan die gesogte kykNET Silwerskermtoekennings vir Film en TV net van krag tot krag. En vanjaar se televisie-benoemdes, wat verskeie genres en formate insluit, weerspieël weer eens die uitsonderlike talent en kreatiwiteit in die Afrikaanse vermaaklikheidslandskap. 

Die toekenningsgeleentheid, wat die beste speelfilm en -akteurs van die fees saam met top-televisieprestasies vereer, vind op Saterdag 23 Augustus by die Kaapstadse Internasionale Konferensiesentrum (Kiks) plaas. 

By die glansryke afsluitingsfunksie van die kykNET Silwerskermfees word die ikoniese blou tapyt vir die grootste sterre in die land uitgerol en top-musikante gaan vir vermaak sorg. Die geleentheid word deur Armand Aucamp en Rozanne McKenzie aangebied, en gaste kan uitsien na optredes deur Early B, Janie Bay en Elandré. 

Dit sal die volgende aand, Sondag 24 Augustus, om 19:00 op kykNET (DStv-kanaal 144) uitgesaai word. 

“Terwyl Suid-Afrika se beste akteurs wêreldwyd sou kon presteer, sou internasionale akteurs nie kon vermag wat Suid-Afrikaanse talent daagliks doen nie,” sê Waldimar Pelser, direkteur van M-Net se Premium-kanale. “Ons mense het die uitnemende vermoë om iets op die skerm vas te vang van wat dit beteken om nóú híér te wees en te leef. 

“Dis verstommend hoe dinamies hierdie klein bedryf is, en geweldig lekker om vanjaar se benoemdes vir ’n oomblik in die kollig te sien staan voordat die harde werk van film- en TV-maak hervat,” sê hy. “Hierdie benoemdes weet beter as enigiemand hoeveel bloedsweet dit verg. Ons eer hulle daarvoor, want hulle maak kykers se lewens eindeloos ryker.” 

Die TV-benoemings vir die kykNET Silwerskermtoekennings vir Film en Televisie is: 

1. Beste hoofspeler in ’n komedie

• Jai’prakash Sewram – Banana Air (S1) 

• Emile Smit – Mince jou hare (S1) 

• Bianca Flanders – Mince jou hare (S1) 

• Pietie Beyers – Pronk Primêr (S1) 

2. Beste byspeler in ’n komedie

• Gershwin Mias – Mince jou hare (S1) 

• Lee-Ann van Rooi – Mince jou hare (S1) 

• Laura-Lee Mostert – Pronk Primêr (S1) 

• Tobie Cronjé – Pronk Primêr (S1) 

3. Beste akteur in ’n drama

•  Frank Opperman – Nêrens, Noord-Kaap (S2) 

• Waldemar Schultz – Die Byl (S6) 

• Jacques Bessenger – Een keer om die son (S1) 

• Charlton George – Juffrou X (S1) 

4. Beste aktrise in ’n drama

•  Milan Murray – Die Byl (S6) 

• Jana Kruger – Een keer om die son (S1) 

• Donnalee Roberts – Een keer om die son (S1) 

• Trix Vivier – Juffrou X (S1) 

• Ilse Klink – Nêrens, Noord-Kaap (S2) 

5. Beste manlike byspeler in ’n drama

• Albert Pretorius – Nêrens, Noord-Kaap (S2) 

• Geon Nel – Nêrens, Noord-Kaap (S2) 

• Liam Bosman – Een keer om die son (S1) 

• Gershwin Mias – Juffrou X (S1) 

• De Klerk Oelofse – Nêrens, Noord-Kaap (S2) 

6. Beste vroulike byspeler in ’n drama

• Melissa Willering – Die Byl (S6) 

• Alma van Heerden – Een keer om die son (S1) 

• Anja Taljaard – Juffrou X (S1) 

• Daneel van der Walt – Nêrens, Noord-Kaap (S2) 

• Marion Holm – Nêrens, Noord-Kaap (S2) 

7. Beste akteur in ’n telenovela of sepie

• Germandt Geldenhuys – Binnelanders (S14) 

• Hykie Berg – Binnelanders (S14) 

• Justin Strydom – Diepe waters (S3) 

• Gershwin Mias – Skemergrond (S1) 

• Dann-Jaques Mouton – Skemergrond (S1) 

• Irvine van der Merwe – Suidooster (S10) 

8. Beste aktrise in ’n telenovela of sepie

• Mienke Ehlers – Wyfie (S2) 

• Jill Levenberg – Suidooster (S10) 

• Marlee van der Merwe – Binnelanders (S14) 

• Nadia Valvekens – Diepe waters (S3) 

• Sandi Schultz – Diepe waters (S3) 

• Minke Marais – Reënboogrant (S1) 

9. Beste byspeler in ’n telenovela of sepie

• Lorraine Burger – Binnelanders (S14) 

• Shimmy Isaacs – Skemergrond (S1) 

• Gretchen Ramsden – Skemergrond (S1) 

• Dirk Stoltz – Skemergrond (S1) 

• Char Carrie – Suidooster (S10) 

• Therese Bam – Wyfie (S2) 

10. Beste nuweling in ’n telenovela of sepie

• Zandélle Meyer – Binnelanders (S14) 

• Julian Robinson – Binnelanders (S14) 

• Caleb Swanepoel – Diepe waters (S3) 

• Mila de Villiers – Reënboogrant (S1) 

• Hunter Plaatjies – Skemergrond (S1) 

11. Beste aanbieder van ’n vermaaklikheidsprogram

• Emo Adams – Oppie noot 

• Rian van Heerden – Wie word ’n miljoener? 

• De Klerk Oelofse – Kyk wie praat 

• Aiden Thomas – Sê jou sê 

• Elwira Standili – Koortjies met Elwira Standili 

12. Beste aanbieder van ’n leefstylprogram (gekombineerd met sommige gesels- en joernaalprogramme)

• Erns Grundling – Elders (S7: Ligtoringroete) 

• Lundi Khoisan – Fiësta 

• Anzél Rabie – Anzél in die Boland 

• Leah – Lottoland help ’n dorp 

• Hannon Bothma – Glam guru 

• Neil Sandilands – Die groot niks 

• Minki van der Westhuizen – Lamb champs: Die hart en siel van skaapboerdery 

• Ewan Strydom – Bravo! 

13. Beste aanbieder van ’n aktuele- of geselsprogram

• Lee-Ann van Rooi – Waar daar ’n wil is 

• Hannes van Wyk – Kwêla 

• Bonné de Bod – Bewonder en bewaar met Bonné de Bod 

• Lourensa Eckard – In gesprek (S9) 

• Rian van Heerden – Laataand by Rian 

14. Beste aanbieder van ’n realiteitsprogram

• Ewan Strydom – Plaasjapie 

• Marciel Hopkins – Boer soek ’n vrou 

• Robbie Kruse – Klein paradys 

• Bertus Basson & Kobus Botha – Kokkedoor: Vuur & vlam 

15. Beste ensemble-aanbiederspan

• Breyton Paulse, Hamilton Wessels, Rika Nieuwoudt, Rikus de Beer, Janina Oberholzer, Jean de Villiers, Jonathan Mokuena, Jannie du Plessis, Tommy Dickson (Chef Vaatjie) – Toks & tjops 

• Dawie Roodt, Charlene Lackay, Leon Gropp, Corli Prinsloo, Anneke de Beer – Ontbytsake 

• Pierre Breytenbach, Jennifer Myburgh, Su-an Müller-Marais – Die groot ontbyt 

Die legendes vir lewensbydraes in die televisiebedryf word op 6 Augustus vanjaar aangekondig. 

Die wenners van die kykNET Silwerskermfees se ander kategorieë sal ook op Saterdag 23 Augustus tydens ’n oggend-toekenningsgeleentheid by The Bay-hotel aangekondig word. 

Kaartjies vir die Silwerskermfees is by Quicket beskikbaar. 

Die Silwerskermfees word deur Openserve, Stad Kaapstad, die Dagbreek Trust en die National Film and Video Foundation geborg.

Lees ook: Vyf redes hoekom jy Govan Ontbloot moet kyk

The post TV-benoemings vir vanjaar se kykNET Silwerskermtoekennings bekend appeared first on rooi rose.