Haar resepteboek Marinda se koskas bevat resepte vir lipleklekker kos wat jy in ’n japtrap kan berei sonder fieterjasies of vreemde bestanddele. Die resepte is in eenvoudige taal geskryf vir elke dag se gebruik, vir elke kosliefhebber.

Marinda Engelbrecht se tjipshoender

Bestanddele

1 gaar hoender, ontbeen en gevlok

1 groot pak kaas-en-uie-aartappelskyfies, gekrummel

250 ml gaar rys

2 pakkies hoendersoppoeier

850 ml melk

125 ml mayonnaise

Lees ook: Spek-en-eier-pasta

Metode

1.  Voorverhit oond tot 180ᵒC.

2.  Meng hoender, helfte van skyfies en rys en skep in oondbak.

3.  Meng soppoeier, melk en mayonnaise en giet oor hoender. Strooi orige fyn skyfies bo-oor.

4.  Bak vir 30 minute tot gaar. Sit met slaai voor. 

Marinda se koskas omslag

Marinda Engelbrecht  is ’n voorslag in die kombuis en hou nie van vaal kos nie, selfs afval moet met ’n bietjie kleur voorgesit word. 

Lees ook: Heel gebraaide hoender

The post Marinda Engelbrecht se tjipshoender appeared first on rooi rose.

Alida Ryder se bekende blog, Simply Delicious, is een van my gunsteling-kosblogs. Haar boek, Heerlik en Maklik: Hartskos is ook ’n staatmaker in my kombuis.

“My ma was nie baie lief vir kos maak nie, maar so nou en dan wou sy ons bederf en het dan vir ons dié steaks gemaak. Sy het vroegmiddag al begin om die steak plat te slaan en dit was altyd so lekker om by die kombuistafel te sit en toe te kyk hoe sy die steaks vinnig in die meel, eier en dan weer in meel druk voor hulle in die warm vet gebraai word. Wanneer ek na haar verlang, is dit steeds die gereg wat ek die graagste maak.”

My ma se brosgebraaide lendeskyf

Genoeg vir 4

• 4 lendeskywe (sirloin steaks)
• 500 ml (2 k) meel, met sout en peper gegeur
• 2 eiers, geklits
• olie vir braai
• suurlemoenskyfies
• groenslaai om mee te bedien

1 Slaan die steak met ’n vleishamer plat. Voorverhit 60 ml olie in ’n groot pan oor hoë hitte.
2 Druk die steaks eers in die gegeurde meel, dan in die eier en dan weer in die meel.
3 Braai tot goudbruin en gaar.
4 Sit op kombuispapier om die oortollige olie te absorbeer en sit dadelik voor met romerige kapokaartappels of bros gebraaide skyfies en ’n groenslaai.

Lees ook: RESEP: Armand Aucamp se witvis met vanieljesous van Tahiti

The post Brosgebraaide lendeskyf appeared first on rooi rose.

JY KAN mayonnaise maak

Dit is baie belangrik dat al die bestanddele by kamertemperatuur is. Gebruik ’n baie skoon glasbak.

• Klits 2 eiergele, ’n knypie sout, 5ml Dijon-mosterd en 15 ml suurlemoensap met ’n elektriese handklitser tot dik. As jy hope energie het, kan jy dit met die hand doen. Die mengsel sal ligter lyk, want dit het nou ’n emulsie gevorm.
• Voeg die helfte van 300 ml olie druppel vir druppel by die eiermengsel tot die mengsel verdik en ’n emulsie vorm. Voeg die res van die olie ’n bietjie vinniger by – sowat ’n eetlepel per slag, of voeg dit in ’n dun straaltjie by. Klits tot dik en blink. Jy kan ’n druppel suurlemoensap byvoeg as dit lyk of die sous nie al die olie kan absorbeer nie. Dit sal die sous effens verdun en jy sal nog olie kan bymeng.

Wenke

• Hou die mayonnaise in die yskas en gebruik binne vier tot vyf dae.
• Onthou, tuisgemaakte mayonnaise bevat rou eier, swanger vroue en klein kindertjies moet dit liefs vermy.
• Olie met sterk geure, soos olyfolie, is nie geskik vir mayonnaise nie, want die geur is te oorheersend. Jy kan wel ’n eetlepel of twee aan die einde byvoeg.
• Sit ’n klam lappie onder die mengbak terwyl jy klits sodat die bak stewig op die werkvlak staan.
• Dit klink na moeite om die olie so bietjie vir bietjie by te voeg, maar dis uiters noodsaaklik. As jy dit te vinnig byvoeg, sal die mayonnaise skei. *Indien die mayonnaise skei: Begin met ’n nuwe eiergeel in ’n skoon bak. Voeg die geskifte mayonnaisemengsel bietjie vir bietjie by (soos jy die olie byvoeg) en klits goed. Voeg die res van die olie soos verduidelik by.
• Geur basiese mayonnaise met suurlemoen- of lemmetjieskil, wasabi of ’n knypie brandrissievlokkies.

Skyfies met ’n verskil

Skyfies hoef nie vetterig of ongesond te wees nie. Gebruik vir ’n slag groente soos beet, preie en botterskorsie om peuselhappies op te tower. Los die tamatiesous, sit hierdie skyfies met lieflike doopsouse en gegeurde sout voor.

• Parmesaan-en-botterskorsie-skyfies Sny ’n botterskorsie in papierdun skyfies. Meng met ’n ¹⁄³ k gesmelte botter, 1 k gerasperde parmesaan, ’n paar takkies vars tiemie. Geur met sout en swartpeper. Bak vir 20 min. by 200 °C tot goudbruin.

• Sny knol- en wortelgroente soos preie, beet, patats, witwortels en wortels met ’n skiller in dun skyfies. Diepbraai tot goudbruin en bros. Geur met sout.

• Diepbraai repies eiervrug tot goudbruin. Geur met sout en gemaalde swartpeper en sit voor met Griekse jogurt en ’n skyfie suurlemoen.

• Jy kan groenteskyfies ook met ’n paar brandrissievlokkies, suurlemoenskil, gekneusde koljandersaad, gerookte paprika, of kruie soos roosmaryn en tiemie geur.

The post Skyfies en mayonnaise appeared first on rooi rose.