Om seker te maak dat kinders daagliks die korrekte voedingstowwe inneem om gesonde groei, ontwikkeling en ‘n aktiewe lewenstyl te ondersteun, is dikwels ‘n bron van kommer vir ouers. Die verantwoordelikheid is selfs groter wanneer kinders ernstig aan sport deelneem. Sportdeelname en die oefening wat daarmee gepaard gaan, verhoog verder die intensiteit en frekwensie van wat die liggaam benodig. Of jou kind sopas met skoolsport begin het, of belofte as ’n toekomstige ster toon, dit is uiters belangrik vir sy of haar prestasie, herstel en algemene gesondheid om die wetenskap van sportvoeding te verstaan.

Die basiese beginsels van sportvoeding vir aktiewe kinders

Geregistreerde dieetkundige Rosey Lombard sê: “’n Gebalanseerde dieet is die grondslag van sportvoeding. Vir kinders wat gereeld aan sport deelneem, is daar egter verskeie belangrike bykomende aspekte. Dit sluit in gefokusde voeding wat prestasie tydens oefening en kompetisies ondersteun, asook ná sportdeelname herstel en langtermyngesondheid verseker.”

Lees ook: Hoe om ’n trae kind te motiveer

’n Goed gebalanseerde dieet vir aktiewe kinders sluit die volgende in:

• Koolhidrate – die primêre energiebron vir die brein en spiere tydens sport. Koolhidrate kan ’n bron van dieetvesel wees en is uiters belangrik vir dermgesondheid. Voedsel soos volgraan brood, rys, aartappels, vrugte en groente verskaf volhoubare energie wat nodig is om vir hoë-energie aktiwiteite voor te berei en daarmee deur te druk.
• Proteïene – die boustene wat nodig is vir spierontwikkeling, -groei en -herstel. As deel van ‘n dieet wat verskeidenheid insluit is  melk, joghurt, kaas, hoender, vis, eiers en peulgewasse goeie proteïen bronne. Dit dra  gewoonlik by tot die  kind se daaglikse proteïenbehoeftes sonder dat enige bykomende aanvullings benodig word.
• Vette – noodsaaklik vir die funksionering van liggaamselle en die verskaffing van gekonsentreerde energie. Gesonde vette soos avokado, grondboontjiebotter, olyfolie en neute kan die energieinhoud (kJ) van maaltye verhoog sonder om te veel volume by te voeg.
• Vitamiene en minerale – ruimskoots beskikbaar in kleurryke vrugte en groente om die liggaam se gesonde funksioneering te ondersteun. Vitamiene help om die immuunstelsel te ondersteun en algemene gesondheid te bevorder, en minerale soos kalium en magnesium is noodsaaklik vir spierfunksie.

Die rol van suiwel in sportvoeding

“Suiwelprodukte speel ’n belangrike rol in die dieet van jong atlete,” sê Maretha Vermaak, geregistreerde dieetkundige by Rediscover Dairy. “Dit verskaf hoëgehalte proteïen, wat deurslaggewend is vir die verbetering van sportprestasie en om herstel ná oefening aan te help.

“Navorsing toon dat so min as 500 ml melk of gegeurde melk ná hoë-intensiteit oefening, al die regte bestanddele bevat om spiere te help herstel en te bou, wat gedurende oefening afgebreek is. Deur ’n drankie wat so voedsaam soos melk is binne ’n uur ná ’n oefensessie in te neem, help jou liggaam om energievlakke te handhaaf en beperk die afbreek van spierweefsel. Dit maak dit vir die kind moontlik om die volgende dag weer net so hard te oefen. Behalwe vir proteïen, verskaf suiwel ook koolhidrate vir energie; kalium, natrium en magnesium om elektroliete te vervang wat deur sweet verlore gaan, en vloeistof om dehidrasie te voorkom. Melk en melk produkte is besonders ryk aan kalsium, ’n mineraal wat belangrik is om sterk bene te bou en om spierfunksie te ondersteun en te handhaaf.”

Lees ook: Aktiewe kinders is slimmer kinders

Hier is voorbeelde van ideale tussen-in happies vir ná oefening:

• Melk of gegeurde melk
• Jogurt of drinkbare jogurt
• Gladdejantjies (“smoothies”) gemaak van jogurt en melk
• Graanvlokkies met melk of jogurt
• Kaastoebroodjies
• Gebakte aartappel met maaskaas

Pas jou kind se voeding aan volgens sy/haar behoeftes

Elke kind is anders, en sy of haar voedingsbehoeftes verskil na gelang van faktore soos ouderdom, intensiteit van aktiwiteit en persoonlike voorkeure. Ouers moet seker maak dat die kind se inname voldoende energie (kilojoules) bevat om aan hulle daaglikse behoeftes vir algemene funksionering, groei, sportprestasie en herstel te kan voorsien. “Een manier om seker te maak dat jou kind genoeg energie inneem, is om gesonde vette by maaltye en versnaperinge te voeg” sê Rosey. “Dit kan byvoorbeeld wees om grondboontjiebotter by ’n ‘smoothie’ of avokado by ’n kaastoebroodjie te voeg, of ’n handvol neute in sy of haar kosblik te sit” gee sy raad. Vette bevat meer as dubbel die energie per gram in vergelyking met koolhidrate of proteïene; dit is dus ’n gekonsentreerde bron van energie”

Volhoubare energie en hidrasie voor oefening – Dit is uiters belangrik dat jou kind voldoende energie voor oefening inneem deur middel van ’n koolhidraatgebaseerde versnapering. Dit kan ’n vinnige ‘smoothie’ wees, of joghurt met vrugte, graanvlokkies met melk of roosterbrood met grondboontjiebotter en konfyt. Hidrasie is net so belangrik – moedig jou kind aan om deur die loop van die dag water of melk te drink om optimale hidrasievlakke te handhaaf.

Herstel ná oefening – Die doel ná oefening is om die energie wat verbruik is te vervang en om spierweefselse herstel te ondersteun. Dit is ideaal om binne die eerste uur ná oefening ’n koolhidraat- en proteïenryke versnapering soos gegeurde melk, jogurt met vrugte of ’n toebroodjie met kaas en heuning in te neem. As jou kind nie lus is vir eet nie, kan ’n ‘smoothie’ of melkskommel ’n goeie alternatief wees om die herstelproses ’n hupstoot te gee.

Rosey sluit af: “Sportvoeding vir kinders behoort nie ingewikkeld te wees vir ouers nie, veral nie as jy reeds ’n sterk grondslag van gebalanseerde daaglikse maaltye het nie. Dan is dit net ’n kwessie van om daarop te let  om voor sportdeelname aan hul energiebehoeftes te voldoen en om ná sport op proteïenryke versnaperinge vir herstel te konsentreer. Ouers het ’n groot verskeidenheid keuses oor hoe om aan die voedingsbehoeftes van hulle ontluikende atlete te voldoen, en gelukkig is baie melk en suiwelprodukte onder kinders se gunstelingkos.”

Besoek https://www.rediscoverdairy.co.za/sport-nutrition/ vir meer inligting oor die voordele van suiwel en sportvoeding vir kinders.

Lees ook: Visieprobleme in kinders: wat jy moet weet

The post Die krag van suiwelvoeding vir jong atlete appeared first on rooi rose.

Oefen-truuks vir lente. Foto: Pexels

Dis moeilik om na die lang wintermaande weer in ’n oefenroetine te kom aangesien jou fiksheidsvlakke gedaal het en jou oefenklere dalk bietjie stywerig pas.

Hier is nuttige wenke om ’n lentebries oor jou oefen-roetine te laat waai.

1. Jou voete is gemaak om mee te loop

Die weer is beter en jy kan nie meer die koue of verkoues as verskoning gebruik om op die rusbank te bly lê nie. Stel jou wekker vroeër of gebruik die voordeel van die langer dae om in die buitelug ’n vinnige stappie in te kry.

2. Kom uit

Probeer om in die buitelug te oefen. Dit kan baie vervelig wees om elke dag in die gimnasium te oefen. Die buitelug sal jou gemoed lig en die goedvoel-hormone sal jou help om lekkerder te oefen. Dit is ideaal om van die wintermorbiditeit ontslae te raak.

3. Maak oefening interessant

Daar is baie dinge in die buitelug wat jy kan gebruik om jou oefenprogram interessanter te maak. Klim trappe in die park, gebruik die park se bankies. Stap steiltes uit.

Lees ook: 4 redes hoekom dit belangrik is om rugoefeninge te doen

The post Oefen-truuks vir lente appeared first on rooi rose.

Die Haaie: Curriebeker-kampioene én wenners van ons harte! Deur Zoë Salzwedel. Hooffoto: Wavebreakmedia/istock images

Of jy nou ’n stoere ondersteuner van die Haaie is of nie, is een ding seker: Hulle is beslis ’n rugbyspan met hope gees! Dis nie net hulle rugby nie, maar ook hulle manewales op sosiale media wat ons gaande het. Dis duidelik dat rugby maar net een van die “sports”-soorte is waarin hulle uitblink. Boonop lyk hulle behoorlik in hulle element voor die kamera!

Ons het ’n bietjie op hulle sosiale media platforms gaan rondkrap en op ’n klomp lekkertes afgekom. Die Haaie is mal daaroor om parodie-video’s te maak. Hulle het reeds hulle ritmiese danspassies en indrukwekkende spiere op gewilde trefferliedjies soos Vanilla Ice se Ice Ice Baby, Snoop Dogg en David Guetta se Make You Sweat en Backstreet Boys se Everybody (Backstreet’s Back) vertoon.

Allesbehalwe ysig:

The post Die Haaie: Curriebeker-kampioene én wenners van ons harte! appeared first on rooi rose.

Deur Catherine Schenck. Foto @kwesesports

Caster Semenya het op Donderdag, 8 Maart 2018 weer nuwe hoogtes bereik. Sy het deelgeneem aan die Athletix Grand Prix-atletiekkampioenskappe wat by die Universiteit van Pretoria gehuisves is. In die 1 000 m-wedloop vir vroue het sy nie net eerste plek behaal nie, maar ook sommer die Suid-Afrikaanse rekord hiervoor gebreek. Die vorige rekord is gehou deur Ilze de Kock Wicksell, wat die item in 1983 met ’n tyd van 2:37:00 gehardloop het. Caster het hierdie rekord met haar tyd van 2:35:43 gebreek, meer as een en ’n kwart sekonde vinniger as de Kock Wicksell. In die tweede en derde plekke was die Ugandese atlete, Halimah Nakaayi met 2:37:55 en Winnie Nanyondo met 2:37:98, kort op mekaar se hakke. Die wedloop se pas is aangegee deur die 400 m-hekkiesatleet, Wenda Nel. Na afloop van die wedloop het Semenya genoem dat sy gevoel het die wedloop het te vinnig begin. Sy het egter ook genoem dat sy baie bly was oor die sukses wat sy behaal het en dat die feit dat sy ’n nuwe nasionale rekord gebreek het hierdie ervaring regverdig, en dat sy in haar skik is met die afloop van gebeure.

Verskeie ander Suid-Afrikaanse atlete het ook baie goed gevaar.

Suid-Afrika se eie Anaso Jobodwana het die 100 m-atleet Justin Gatlin uitgestof in die mans se 150 m-naelloop. Jobodwana se tyd was 15:08, met Roscoe Engel wat tweede plek ingeneem het met 15:17 en Luxolo Adams in die derde plek met 15.18. Gatlin moes gelukkig wees met vierde plek met ’n tyd van 15:23. Jobodwana het die afgelope twee jaar met ’n besering gesukkel en hierdie was dus ’n belowende terugkeer. Verder het hy die vorige dag pa geword!

The post Caster Semenya breek SA 1000 m-rekord appeared first on rooi rose.

Deur Catherine Schenck. Foto Twitter @rogerfederer 

Die wêreldbekende tennisster Roger Federer het verlede week ’n droomweek gehad nadat hy sy 97ste loopbaantitel het by die ABN AMRO-Tenniswêreldtoernooi in Rotterdam gewen het. Dit beteken ook dat hy nou weer die nommer een-titel dra in die tennisranglyse. Federer is die oudste tennisspeler wat die nommer 1-rangplek hou. Hy is 36. die vorige oudste manlike speler met hierdie titel was André Agassi op die ouderdom van 33, en die oudste vroulike speler was Serena Williams wat op 35 nog nommer een was. Sy het sedertdien laer af op die skaal beweeg. Federer het in 2004 die eerste keer die nommer-een posisie beklee op die ouderdom van 22 en kon in 2012 laas hiermee spog. Verlede jaar hierdie tyd was Federer gereken as 17de op die lys, maar na ’n kragtoer van ’n jaar is hy uiteindelik weer heel bo – en hy voel baie goed daaroor.

The post Naweeknuus 20 Februarie 2018 appeared first on rooi rose.

°Die menslike liggaam kan net vir ’n rukkie by ’n kerntemperatuur van 41 °C oorleef. Maar ons vergeet dat dit tot 50% warmer is op ’n tennisbaan as op die grasperke en onder die sambrele langs die baan. ’n Dagtemperatuur van selfs net 30 °C kan op die tennisbaan opstoot na diep in die dertigs. Tog speel ons kinders gereeld tennis op dae wat die temperatuur op 36 °C en selfs 38 °C staan. Op die tennisbaan stoot sulke temperature vir seker op tot bo 40 °C.

Moet jou kind op tipiese Februarie-dae tennis speel?

Draf jy en/of jou man soms en selfs gereeld saam met die kinders op die tennisbaan? Mooi so! Die International Tennis Federation, wat tennis onder alle ouderdomme help bevorder, sê hoe ouer jy raak, hoe meer tas hitte jou aan. Al die wenke vir jou kinders is net so voordelig vir julle.

Wat is die maksimum temperatuur vir veilige tennis?

Dit hang af van ’n verskeidenheid faktore, sê Liza Duckitt, sportwetenskaplike wat in kondisionering spesialiseer. Sy werk in die Paarl, ’n Bolandse dorp wat berug is vir sy kookwarm somersdae.

“Jou kind kan tennnis speel solank sy liggaam in staat is om sy temperatuur onder 40 °C te hou. Die liggaam koel af deur te sweet. Die vraag is dus nie hoe warm dit is nie, maar of die omgewing toelaat dat jou kind doeltreffend genoeg kan sweet om af te koel.”

“Sweet, hidrasie, temperatuur en humiditeit beïnvloed mekaar direk. Mens kan heelwat doen om koel te bly op die tennisbaan.”

Hoe om jou kind te help om sy beste tennis te speel, selfs op baie warm dae

1. Kweek hitte-verdraagsaamhei lank voor Februarie 

Die liggaam is wonderlik aanpasbaar, en kan leer om uitstekend by hoë temperature te funksioneer, sê Liza. “Maar dit neem tyd. As jou kind in die lente begin speel en regdeur die somer bly speel, is hy teen Februarie goed in staat om hitte te hanteer. As hy eers teen middel Januarie begin speel en nie aan hitte gewoond is nie, gaan hy nie dieselfde mate van hitte-verdraagsaamheid as’n ander tennisspeler hê nie.”

2. Laat hom in gepaste tennisklere speel

“Kinders wil almal koel lyk. Dit is reg, solank hulle bly by los klere wat lug deurlaat sodat hulle kan afkoel. Die nuwe materiale is juis ontwerp om sweet deur te laat. Laat jou kind hou by ligter kleure. Dit weerkaats sonlig, wat help dat hy koeler bly. Ek sal tog aanraai dat ouers belê in ’n geskikte hemp of twee vir warm dae.”

3. Kies ’n koeler haarstyl

“Die regte haarstyl kan ’n groter verskil maak as wat mens sou verwag, veral as jou kind maklik warm kry. Probeer ’n poniestert of korter, losser hare vir jou dogter – enige styl wat help dat sweet op die kop maklik verdamp.”

4. Speel met ’n piek of hoed wat lug deurlaat

“Party mense kla dat hoede hulle warmer hou. Maar dit beskerm die gesig teen sonbrand.

5. Kry ’n goeie sportsonskerm

Ons son is kwaai. Ons weet ook dat sonblootstelling eers na baie jare in velkanker kan ontwikkel. Daarom is ’n sonskerm met ’n SPF van minstens 30 ononderhandelbaar.

“Laat jou kind se velkleur jou lei. ‘n Kind met ‘n blas en donker vel kan wegkom met ‘n SPF 30. Hoe ligter, hoe hoër moet die SPF wees. Blonde kinders moet die hoogste moontlike SPF gebruik – ten minste 50. As jy nie weet watom te kies nie gebruik liewer ‘n hoër SPF as ‘n laer een.

“En onthou, as jou kind ’n toernooi speel, moet hy elke twee ure weer sonskerm aanwend. Hulle sweet en vee dit af.”

6. Kies die beste drankie vir hidrasie

Die Internasionale Tennisfederasie (ITF), onder wie die groot Grand Slams soos Wimbledon en die Australiese Ope val, beveel doodgewone water aan.

Hulle sê sportdrankies met meer as 5 g suiker per 100 ml vloeistof (kyk op die etiket) bly langer in die maag as skoon water. Gevolglik neem dit die liggaam langer om vog daaruit op te neem as uit water. Dit maak water ’n beter drankie as vrugtesappe en sportdrankies wat tipies van 10 g tot 40 g suiker per 100 ml bevat.

Liza stem saam: “Sportdrankies bevat eintlik te veel suiker. Water is heeltemal goed genoeg vir gewone wedstryde en oefensessies van onder twee uur. As jou kind tog lus is daarvoor, verdun dit om die helfte met water.”

7. Laat hom ’n halfuur voor tennis reeds begin water drink

Die ITF sê tennisspelers kan tot vier liter water binne ’n uur van harde spel uitsweet. Terselfdertyd kan die liggaam nie meer as 1.5 liter in ’n uur opneem nie. Om die stadiger opname met die vinniger verlies te versoen, beveel hulle aan dat tennisspelers rondom 500 ml (2 koppies) vloeistof in die halfuur voor die wedstryd of oefensessie drink. So bou hulle ’n stewige voorsprong op.

8. Verskaf deurlopend water

Die belangrikste ding op die tennisbaan is om heeltyd gehidreerd te bly, sê Liza. “Sorg dat jou kind met vrymoedigheid tydens die wedstryd tyd neem om water te drink. Sowat 200 ml water na elke twintig minute is ’n goeie riglyn.”

9. Evalueer die soort hitte

Sweet verdamp baie moeiliker in ’n klam klimaat met ’n hoë humiditeit, terwyl jy jouself makliker koel sweet in ’n droër omgewing waar verdamping makliker plaasvind.

Kortom, dit is gevaarliker om tennis te speel by ’n laer temperatuur met ’n hoër humiditeit as by ’n hoër temperatuur in ’n droër klimaat met ’n laer humiditeit.

Die Amerikaanse weerdiens het ’n tabel opgestel om jou te help om die wisselwerking tussen humiditeit, temperatuur en veiligheid vir sport te evalueer. Kry die tabel  hier as jy wil sien hoe veilig die temperatuur/humiditeit dit op die oomblik vir tennis maak.

As algemene riglyne: Hou die weersvoorspelling dop en wees baie versigtiger vir hittte-uitputting by temperature bo 32 °C en/of ’n humiditeit bo 60%.

10. Moenie tydens ’n wedstryd droog aantrek nie

Dit lyk asof jou kind gemakliker moet voel as hy na ’n harde stel sy klewerige, natgeswete hempie verruil vir ’n vars een. Maar dit werk nie, sê die ITF. Volgens hulle is dit beter om in sy papnat hemp te bly speel. Die rede? Afkoeling begin eers as die hemp deurnat gesweet is. Dus begin jou kind eers afkoel nadat die nuwe hemp papnat van die sweet is, wat ’n goeie tydjie kan neem. Die skoon hemp vertraag dus afkoeling.

11. Koel tussenin af

Help hom eerder om op ander maniere sy liggaamstemperatuur af te bring, sê die ITF:

• Sorg vir koel, nat handdoeke langs die baan, sodat jou kind tussen stelle (of elke vier potte) sy gesig, kop, arms en bene kan afkoel.
• Hou ’n bak koel water byderhand waarin hy sy gesig en hande kan afspoel vir vinnige afkoeling.
• ’n Spuitmis met skoon water is ook heerlik koel op die kop, gesig en selfs bene.

12. Speel in die koeler tyd van die dag

Die warmste tyd van die dag is tussen 11.00 en 15.00. Ouers het selde hieroor beheer maar dit is tog heel dikwels moontlik om te reël dat tennis, veral wedstryde, eerder vroeg of laat gespeel word as in die middel van die dag. Kinders (en ouer mense) kan nie hitte so goed hanteer soos tieners en twintigers nie. Wedstrydorganiseerders en afrigters behoort dus ook die deelnemers se ouderdom in ag te neem.

13. Laastens: Hoekom is yskoue water nie goed wanneer jy tennis speel nie?

Baie ouers daag op met reuse yshouers vol ys om hul kind se water yskoud te hou. Ander glo ysies help die jong tennisspelers afkoel.

Die ITF sê egter yswater is glad nie ’n goeie idee nie, en Liza stem saam:

“As jy hom ysies of yskoue water gee, moet sy liggaam energie gebruik om dit na liggaamstemperatuur te kry. Dit tap sy energie onnodig. Gee hom liewer water teen normale kamertemperatuur – so 20 °C. Dit word verreweg die maklikste opgeneem en hidreer jou kind die doeltreffendste.”

The post Tennis: jou kind en sonsteek appeared first on rooi rose.

Agter ons rekordbrekende goue seun is daar ’n Tannie Ans, en volgens ons susterkoerant, die Bloemfontein Courant, het die internasionale atletiekgesag, die IAAF, haar erken as afrigter van die jaar vir 2017.

Die Namibiër Ans Botha (75), wat nou in Bloemfontein woon en die Universiteit van Vrystaat se atlete afrig, was op haar dag self ’n atleet. Sy het haar dogter begin afrig omdat sy nie ’n paslike afrigter in Namibië kon vind nie en later het sy ander atlete begin help om hul volle potensiaal te bereik. Een van haar bekendste atlete is Wayde van Niekerk.

Wayde, Tannie Ans se steratleet, is in Oktober vanjaar met sy verloofde Cheshney getroud. Hy is ook tans besig om te herstel van beserings en sal eers later volgende jaar weer begin deelneem aan kompetisies.

The post Tannie Ans is IAAF se afrigter van die jaar vir 2017 appeared first on rooi rose.

Elsje Neethling is kleiner en fyner as wat ek gedink het. Dalk het ek gedink sy moet groter wees omdat sy al soveel jaar so dapper – en uitgesproke – teen kanker veg.

“Ek is waarskynlik met ’n breingewas gebore en het met pyn grootgeword,” vertel sy, asof dit maar die verloop van die lewe is. “Maar omdat ek hiperaktief is, kon ek nooit stil genoeg lê vir breinskanderings nie. Daarom is die gewas eers gediagnoseer toe ek dertien was. Daar was wel vroeër talle tekens dat dinge nie pluis is nie. Ek het al hoe sieker, maerder en naarder geword.”

Toe volg die hoofpyne en balansprobleme, en toe, op 16 Januarie 1992, word sy wakker en sy kan nie loop of sien nie. Die diagnose was verpletterend: choroïed pleksus karsinoom, ’n baie seldsame en aggressiewe breingewas.

“Destyds was daar net vier mense in die wêreld wat die gewas gehad het, en niemand het dit oorleef nie.” Dokters het voorspel sy gaan net twee maande leef.

Dis nou 25 jaar en elf spinale operasies later, en sy leef steeds. Uitbundig, glimlaggend, al leef sy daagliks met pyn en sit meestal in ’n rolstoel. Maar, erken sy, ná elke operasie herstel sy ’n bietjie moeiliker. “Jy verloor elke keer iets wat jou menswees aantas. Maar ek is steeds volkome vrou, en opgewonde om te kan leef.”

Sy lag met haar oë toe sy vertel hoe “liries” sy kan raak wanneer sy soggens wakker word. “Man, oor enigiets, selfs net my oggendkoffie. Enige dag wat ek nie in die hospitaal wakker word nie, is ’n goeie dag!”

Kort voor ons onderhoud is sy weer onverwags geopereer, dié keer om ’n nie-kwaadaardige gewas aan haar voet te verwyder. Daarna mag sy twee maande lank glad nie geloop het nie.

Sy woon deesdae in haar ouers se woonstel op Hermanus, en geniet dié nuwe hoofstuk in haar lewe. Sy laat net nie toe dat die pyn en ongemak haar onderkry nie. Sy woon boonop alleen, vir die eerste keer in haar lewe ver weg van ma San-Marie en pa Ryk. “Ek het ’n paar maande gelede Kaap toe getrek, en vir die eerste ruk het ek in ’n woonstel reg langs Groentemarkplein in Kaapstad gewoon. Maar Kaapstad was net te besig en ’n bietjie te loud.” Vir ’n gebore en getoë Vrystater is dit ’n heerlikheid om in ’n woonstel met ’n see-uitsig te woon, skaars honderd meter van waar die branders breek. “Daardie heel eerste aand het die branders vir my soos onweer geklink. Ek is mal oor die Kaap en wou nog altyd hier bly.”

Hermanus is ’n heerlike plek met wonderlike mense. ’n Bietjie soos Bloemfontein by die see, skerts sy. Sy voel heel tuis daar. “Daar is soveel kreatiwiteit en kunstenaars. Ek ontmoet sulke interessante mense, en dit gee my energie. Daar het ’n nuwe wêreld vir my oopgegaan.”

Om finansieel te oorleef verkoop sy haar kralewerk op kunsmarkte. Sulke tipiese Elsje-skeppings: uniek en kleurryk. Anders. Want niks aan haar is gewoon of vaal nie. Van haar besonderse blou oë tot die kleurryke krale om haar fyn polse en die wit bloes met die bont borduurwerk wat sy tydens ons onderhoud aanhet. Sy het dié bloes op ’n vakansie in Mexiko gekoop. Daar was sy so betower deur die sangeres Frida Kahlo se huis dat sy haar skip verpas het.

“Ek was maar nog altyd my ma se hippiekind,” vertel sy. Ouboet Ryk, Olimpiese swemmer en deesdae sakeman (sy noem hom Rykie), en haar laatlamsussie, Jean-Marié, ’n regsgeleerde in Ierland, is ernstiger, meer gefokus.

“Ek is die wild child, die een met die blomme in die hare. Toe Rykie verlede jaar gevra is om my op ’n radioprogram voor te stel,  het hy gelag en gesê: ‘she’s colourful, she talks a lot, and did I mention she’s colourful?’ Ek pimp tot my krukke op met vlaggies en lapblomme uit Mexiko.”

“Ek pimp tot my krukke op met vlaggies en lapblomme uit Mexiko”

Elsje het haarself in 2008 leer kralewerk doen toe sy weer lank in die hospitaal was. Haar vriende het krale aangedra en gehoop dit sal haar kop en hande besig hou. Toe begin die verpleegpersoneel van haar krale koop. “Sommer so van die drip stand af,” onthou sy. Nou gee dit vir haar ’n klein inkomste, wat hoofsaaklik maar vir haar mediese fonds betaal. Haar familie help met die res. “Sonder hulle sou ek nie hierdeur kon kom nie.”

Haar ouers waak langs haar hospitaalbed met elke operasie of terugslag, en sy vertel opgewonde dat hulle dit ook oorweeg om volgende jaar Kaap toe te trek. “My ma-hulle is wonderlik. Hulle wil net hê ek moet gelukkig wees,” sê sy, en vertel van die keer ná ’n operasie toe haar verligte ma gesê het: “My kind, jy kan nou maar ’n tatoe op jou voorkop kry vir al wat ek omgee.”

Dis juis by haar ma wat sy die kreatiewe gene gekry het. Op skool het sy kuns as vak geneem, en van kleins af was dit dramaklasse, kunswedstryde en dansklasse. Sy het graag agter die skerms by SUKOVS gaan werk en aan die agtergrondtonele help verf. En  saam met Tobie Cronje in The Wizard of Oz gespeel, verklap sy terloops.

“Ek was ’n regte drama-queen en entertainer. Ek het heeltyd konsert gehou met die arme Jean-Marié, haar opge-dress en oral saamgesleep.” Hulle al drie het geswem. “Maar ná swem was dit dansklas of iets – ek het sommer so in die kar my leotard aangetrek,” onthou sy.

Ma en dogter het albei joernalistiek studeer, en Elsje het tien jaar as joernalis gewerk. As student het sy ook so ’n bietjie by Radio Puk uitgesaai. Sy het saam met die veteraanskrywer Maretha Maartens ’n boek oor haar kankerstryd geskryf. “Ek is besig met nog ’n boek, en het ook ’n kinderboek geskryf, gemik op siek kinders.”

Haar ouers duik gereeld in ons gesprek op. “Hulle het ons aan so baie dinge en plekke en ander kulture blootgestel. Ek was seker so elf toe ek vir die eerste keer oorsee is, Spanje toe. Ek het my aan alles vergaap. My ouers het ons gelowig grootgemaak, en geleer om nooit op ander neer te sien nie.”

Elsje se kanker is die afgelope twee jaar in remissie. “Maar dit los jou nooit regtig nie,” sê sy. “Dinge is so goed of sleg soos jou laaste skandering.” Vir die eerste keer lig haar vrolike masker. Haar oë versluier vir ’n oomblik. Maar toe is die vrolike geesdrif terug.

“Dinge is so goed of sleg soos jou laaste skandering.”

“Ek leef voluit tussen skanderings – ek put myself soms skoon uit. Ek glo ’n mens moet die beste van die lewe maak. Anders gaan die kanker jou kom haal. Of wat dit ook al is wat jou vreugde steel. Ons het mos maar almal iets.”

In 1997 het haar kanker skoonveld verdwyn. ’n Wonderwerk, volgens die medici. “Die Here het my genees,” verklaar sy, kort en kragtig. Sy het steeds elke jaar pligsgetrou vir haar skanderings gegaan, en in 2007 het die kanker weer toegeslaan, hierdie keer in haar stuitjie. “Dit was ’n gróót skok,” erken sy. Waarskynlik nog meer omdat sy toe op trou gestaan het. Hulle is getroud, maar ongelukkig het die huwelik nie gehou nie.

Maar Elsje Neethling laat nie toe dat enigiets – kanker of egskeiding – haar onderkry nie. Al lyk sy geensins siek of gestremd waar sy oorkant my aan die tafel sit nie, beteken dit glad nie dat haar pad tot hier toe maklik was nie.

“In 2015, ná nog ’n operasie, het dokters nie veel hoop gehad dat ek sal herstel nie. Ek moes selfs vir ’n lang ruk na ’n rehabilitasiekliniek gaan.” Om in ’n rolstoel te wees, bring allerhande komplikasies. Sy vertel van die geleidelike verlies van normale liggaamsfunksies, soos haar linkerbeen wat heeltemal verlam is, en die keer toe sy ’n tweede reeks bestralings op dieselfde plek moes kry om te keer dat die kanker versprei. “Dit word nie sommer gedoen nie, en ek was nogal ontsteld daaroor. Toe vra die dokter reguit: ‘wil jy dan eerder doodgaan?’ So, om in ’n rolstoel te wees is vir my ’n troosprys, nie ’n doodsvonnis nie. Dis oukei, al is dit nie vir almal om my altyd oukei nie.”

Sy kan nog met krukke oor die weg kom – “jis, ek kan nogal lekker vinnig loop met my krukke, hoor!” – maar soms sukkel sy met haar balans, en boonop is sy gedeeltelik blind in haar linkeroog, wat dinge verder kompliseer. “Ek voel veiliger in ’n rolstoel, en beweeg makliker.” Die rolstoel het nadele, soos mense wat dink haar IK is aangetas. “Party praat selfs harder en stadiger, asof ek doof en dom is,” sê sy op haar reguit manier. Maar dit het darem voordele ook, skerts sy. “Ek kry altyd die beste parkering! En dis ’n trekpleister vir interessante mense.”

“Ek kry altyd die beste parkering! En dis ’n trekpleister vir interessante mense.” 

Sy glo die Here het haar met ’n doel in ’n rolstoel laat beland. “Ek het in overdrive geleef voor ek siek geword het. Ek wou 48 uur se lewe in elke dag inpas, skoon bang ek mis iets. Ek dink Hy wou hê ek moet ’n bietjie stadiger leef, en stop om die rose te ruik.” En daar is dalk nog ’n ander rede, dink sy: “Gestremdes is sitting ducks vir boelies en skurke en mense met vooroordele. Maar gelukkig is ek mos nou nie op my mond geval nie, en ’n vegter teen ongeregtigheid.”

Haar kankerpad het haar empatie gegee vir ander wat swaarkry. “Iets gebeur met jou as jy ’n gebrek ontwikkel, ’n soort geestelike bewustheid. Ek voel ander se pyn aan.” Sy is juis die naweek van ons onderhoud in Pretoria om ’n vriend wat aan MNS ly te kom bemoedig. “Ons rol maar so saam,” skerts sy. Dis ook hoekom sy selfs deur haar eie kankerstryd probeer het om ander te bemagtig. So het sy vir kankerlyers by staatshospitale klasse in kralewerk gegee. Maar ja, dit was hartseer elke keer wanneer een van die vroue nie opdaag vir ’n klas nie en sy moet hoor sy is intussen oorlede. “Dit was elke keer ’n realiteits-check, iets wat ’n mens herinner aan dit waarteen jy stry.”

Sy doen wat gedoen moet word om so gesond moontlik te bly en te stry teen die agteruitgang wat die kanker meebring. So het sy twee jaar lank elke dag twee kilometer geswem by haar ma se swemklub. “Ek eet ook baie gesond, baie slaaie en gestoomde groente en so aan, en gebruik ’n ingevoerde voedselaanvulling.” Sy het gedurig pyn, en beproef alles wat dalk verligting sal bring. “Fisio, akupunktuur, wat ook al. Maar dis maar ’n progressiewe agteruitgang … ”

Wat hou haar gemotiveerd om aan te hou veg? “Humor, kuns, krale, lag … Ek kies vreugde. Ek wil lewe, ek wil uitgaan, goeie koffie gaan drink iewers. Maar natuurlik kry ek my afdae. Ek sien dit soos ’n spoedhobbel op my feespad. Die Here hou my positief. Ek praat honderde kere op ’n dag met Hom. Alles is Sy genade.”

“Die Here hou my positief. Ek praat honderde kere op ’n dag met Hom. Alles is Sy genade.”

Haar mantra is eenvoudig: “Worry less, pray more. As my lewe een mens gehelp het, moet ek glo dit was alles die moeite werd.” En, sê sy doodernstig voor ons groet, sy wil tog net nie eendag voor haar Skepper staan en sê sy het ’n vervelige lewe gelei nie.

Maar daaroor hoef sy haar nie te bekommer nie. ’n Week of twee ná ons onderhoud lees ek in ’n dagblad sy het haar eerste les in branderplankry gehad in die golwe by Muizenberg, danksy Adaptive Surfing South Africa, ’n vereniging vir branderplankryers met gebreke. Vrywilligers het haar touwys gemaak, en sy het haar gate uit geniet, agterstevoor duikpak of te not, volgens haar facebook-inskrywing. “How to spot a Free Stater on a surfboard: wetsuit wrong way around. Wahaaaahaaa! As jy nie meer vir jouself kan lag nie, nè.” Tipies Elsje was daar geen keer aan haar in die water nie. “Ek het op my eie begin paddle. Hulle het vir my gesê ‘you paddle like a demon’.” Sy het dit selfs reggekry om op haar hurke op die branderplank te sit.

“Dit was asof ek vlerke gekry het.”

Jy kan Elsje se pragtige krale aanlyn bestel by hip-e.co.za

The post Onstuitbare Elsje Neethling appeared first on rooi rose.

As jy een van die derduisende fietsryers is wat op Sondag, 12 November (begfiets) en 19 November (padfiets) aan die 947-fietswedrenne gaan deelneem, is dit nie te laat om ’n sportmassering te kry nie. Nico Britz van Fourways is ’n gekwalifiseerde terapeut in sport en kliniese massering en hy glo dat ’n sportmassering net die ding is voor ’n groot wedren soos die 947-fietswedren.

“As jy oefen, is jou liggaam onder druk en ’n goeie massering gaan jou sirkulasie en senuwestelsel help om te ontspan. Dit help jou spiere om te herstel na harde oefening en verbeter ook die werking van jou limfstelsel deur blokkasies uit te vryf. Hoewel ’n massering nie kan help om melksuur uit jou spiere te dryf nie, kan dit jou wel help om van die effek van melksuur te herstel.”

Nico het 17 jaar se ondervinding en sê hoewel dit groot voordele vir atlete inhou, is dit nie net hulle wat by ’n goeie massering baat vind nie. “Mense wat hard werk en onder druk is, of selfs kinders kan voordele hieruit trek. Dit kan ook jou immuunstelsel stimuleer en die vloei van energie in jou liggaam verbeter.”

Wanneer is die beste tyd om ’n massering te kry?

As jy die voordeel in ’n wedren wil voel, moet jy so vier dae voor die wedren vir ’n massering gaan. Nooit nader as 48 uur nie, want die massering stimuleer die liggaam wat jou spiere seer kan laat voel as jy dit direk voor ’n wedren doen. Jy kan dit ook inspan om ná ’n wedren te herstel. As jou spiere baie styf en seer is, wag drie tot vier dae voor jy ’n massering kry sodat jy die volle voordeel daaruit kan trek.

Wenke

• ’n Sportmassering is ’n gespesialiseerde massering. Vra voor die tyd of jou terapeut ondervinding en opleiding daarin het.

• As dit jou eerste sportmassering is, bespreek dit eerder ’n week voor die wedren om seker te maak jy het geen sensitiewe spiere teen wedrendag nie. Net soos jy nooit nuwe skoene of klere in ’n wedren uittoets nie, moet jy ook nie ’n massering kort voor ’n wedren  probeer as jy dit nog nie vantevore gedoen het nie.

• Onthou, ’n sportmasseerder is nie ’n sportdokter nie. Hoewel ’n sportterapeut styfheid en inflammasie in die liggaam kan verlig, moet jy ’n dokter gaan sien as die pyn nie drie dae na ’n massering beter is nie. Dieselfde geld ’n ernstige besering sonder ’n diagnose.

• Dehidrasie kan jou fascia (die lagie weefsel wat jou spiere bedek) en spiere styf maak. Maak seker jy neem genoeg vloeistof in voor jou massering.

• Moenie ’n groot maaltyd voor ’n massering eet nie. Eerstens is dit ongemaklik om op ’n vol maag op die masseertafel te lê, en tweedens vertraag ’n massering jou liggaam se ander stelsels soos vertering.

• Dis heel normaal as jou spiere gevoelig is na ’n massering. Dit verdwyn na 48 uur en is die rede waarom jy nie ’n massering korter as 48 uur voor ’n wedren moet skeduleer nie.

• Moenie dieselfde dag oefen na jou massering nie. Wag eerder tot die volgende dag. Neem eerder ’n heerlike bad wat jy met epsomsout dokter (kyk by winkels soos Pick &Pay).

Kontak Nico Britz Sport Massage by 083 439 4184 vir afsprake.

The post Sportmasserings appeared first on rooi rose.

David Bellairs, direkteur van die Cape Town Cycle Tour sê daar was ’n tegniese kwessie met hul direkte e-pos-stelsel. “Weens hierdie probleem, en om mense ’n kans te gee om na betaaldag hul inskrywings te finaliseer, het ons besluit om die inskryfdatum vir volgende jaar se toer uit te skuif.”

Voornemende fietsryers kan op die Cycle Tour se amptelike webwerf inskryf: capetowncycletour.com

Internasionale fietsryers moet voor 23 Februarie inskryf.

Op 11 Maart 2018 sal fietsryers op die ou historiese Parade regstaan om vanaf die nuwe beginpunt in Kasteelstraat langs die Kasteel weg te spring. Die nuwe wegspringpunt is maar net een van vele nuwighede om te verseker dat die ikoniese fietswedren ’n hoogtepunt vir elke fietsryer wat deelneem, bly. Die roete is steeds die gebruiklike 109 km.

Na verlede jaar se groot teleurstelling, toe gevaarlike sterk winde die wedren in die wiele gery het, is koppe bymekaar gesit en heelwat beplanning gedoen om ’n meer wind-vriendelike wegspringpunt te kry.

“Ons besef dat min areas immuun is teen die Kaapse Dokter, maar ons glo hierdie skuif gaan die risiko vir gevaarlike dwarrelwinde tussen geboue verminder.” Heelwat werk is in samewerking met die Disaster Management Services, City of Cape Town, Pedal Power Association en kenners op die gebied van meteorologie gedoen om meer duidelikheid te kry oor wind by die wegspring en tydens die wedren en daar word ook nuut gekyk na riglyne vir wind.

Die CTCT is die grootste individuele fietsren ter wêreld waar amptelike tye geneem word en neem fietsryers deur van die mooiste areas in die Skiereiland.

Die nuwe wegspringarea bied meer spasie wat moontlik ’n ontbytstasie sal insluit en ander dienste ook. Dit sal ook die sentrale MyCity-busstasie in Hertzogstraat oopstel wat voorheen deur die wegspring langs die stadsaal oorgeneem het.

Bly op datum met die jongste nuus oor die CTCT op Facebook by cycletour | Twitter @CTCycleTour of Instagram @ctcycletour

The post Inskryfdatum vir CTCT uitgeskuif na 3 Oktober appeared first on rooi rose.

As jy nog nie vir die Telkom 947 Cycle Challenge op 11, 12 November (bergfiets) en 19 November (padfiets) ingeskryf het nie, sal jy moet wikkel. Inskrywings sluit binne die volgende twee weke en hierdie jaar is dit die twintigste herdenking. Besoek cyclechallenge.co.za vir inskrywings.

Lees ook: Ons gesels met Louis Meintjes

Die padfietswedren op Sondag, 19 November is naas die Cape Town Cycle Challenge die tweede grootste gereguleerde fietswedren in die wêreld. Die padfietswedren strek oor 94,7 km en daar is gewis ’n paar tranetrekker-bulte wat jou gaan laat wens dat jy meer aandag aan jou oefenprogram gegee het.

Daar is drie afstande in die bergfietswedrenne. Op die Saterdag is daar die 25 km en 55 km wedrenne en jy moet ’n kwalifiserende wedren vir die 55 km voltooi. Dit is vir die meer ervare ryers en so voorkom dit die frustrasie van opeenhoping van ryers by moeiliker tegniese gedeeltes. Daar is ook ’n 10 km-wedren vir beginners en jonger ryers op die Sondag. Net die ding vir die hele gesin solank almal bo sewe jaar oud is.

Die Kiddies Ride op Saterdag is vir tjokkertjies van twee tot tien jaar oud en wissel in afstande van 1 km tot 5 km.

Die bergfietswedrenne beloof om jou sommer baie interessante paadjies in en om Johannesburg te wys en boonop is dit nooit elke jaar presies dieselfde roete nie. Die langer roete loop deur seksies in Steyn City en Heron Bridge College wat nie gewoonlik oop is vir Jan Publiek nie en die 25 km-roete sluit seksies in Glenfernness en Cluny Farm in.

Dit maak nie saak wat jou vlak van vaardigheid of fiksheid is nie, daar gaan ’n wedren wees wat jou soos ’n handskoen pas. Gelukkig is daar nog twee en ’n half maande oor waar jy jou fiksheid tot ongekende hoogste kan verbeter. As jy ’n lid van ’n gim is, is dit ideaal om deur die week “spin” of “wattbike”-sessies te doen om jou kardio-fiksheid te verbeter.

Lees ook: Oefen jouself fiks en sterk

Naweke is die tyd om jou ysterperd in die buitelug los te laat en die heerlike lente-weer te geniet. Begin geleidelik om beserings te verhoed. Dit is altyd beter om eerder ’n bietjie onfiks en sonder beserings by die wegspring op te daag as oorgeoefen en met al wat skeet en besering is.

Lees ook: Rol die skete weg

As jy nie lid van ‘n gim is nie en nie deur die week kan ry nie, kan jy deur die week hardloop. Dis net sulke goeie oefening en gaan jou sommer lekkker fiks maak vir fietsry.

As jy in koue angssweet uitslaan by die blote gedagte aan steil afdraende of ander tegniese uitdagings, het jy steeds genoeg tyd om jou vaardighede op te skerp. Kontak gerus die PwC Bike Park in Sandton (010 591 9273) vir privaat- of groeplesse. Die geld wat jy hierop uitgee gaan jou eindelose pret verskaf en boonop geld by die fisio en hospitaal se ongevalle spaar.

Lees ook: Balans jou beste wapen op ’n bergfiets

Maak seker dat jy altyd ’n identiteitsbandjie dra en moenie op jou eie op afgeleë plekke bergfiets ry nie.

The post Fietsry kraai koning by die 20ste 947-uitdaging appeared first on rooi rose.

Louis Meintjes (25) het vanjaar algeheel 8ste plek behaal in die Le Tour de France-padfietswedren. Hy was net 8:02 minute agter die algehele wenner, Chris Froome. Hy is ook tweede geplaas in die kategorie vir fietsryers onder 26 in dié wedren. Hy het verlede jaar dieselfde plekke behaal, wat ’n  uitsonderlike prestasie vir ’n jong jaer op hierdie vlak van mededinging is. Hy was ook een van vier Suid-Afrikaners wat vanjaar aan die wedren deelgeneem het en word deur kommentators en sy mededingers gereken as iemand om dop te hou.

Hy het tydens die Vuelta a España tyd ingeruim om met rooi rose te gesels.

Vertel ons meer van jouself. Waar kom jy vandaan en wat het jy gedoen voordat jy professioneel begin fietsry het?

Ek kom van Rustenburg af. Ek was by die Bergsig Akademie op skool. Na skool het ek my eerste jaar se studies voltooi in Besigheidsekonomie deur UNISA totdat ek professioneel begin fietsry het. Met my fietsry-skedule en met die hoeveelheid wat ek reis was dit ’n bietjie moeilik om ook my studies te balanseer.

Hoe en hoekom het jy begin fietsry?

As kind het ek altyd ’n fiets gehad – óf ’n BMX óf ’n bergfiets. Soos ek groter geword het, het ek deel geword van ’n plaaslike klub wat gereeld oefenritte meegemaak het. Ek het nogal swaargekry tydens hierdie ritte want ek was op ’n bergfiets en almal anders was op padfietse. Ek het dit steeds baie geniet en dit het my gemotiveer om beter te raak en ek het uiteindelik besluit om ’n padfiets aan te skaf sodat ek kon byhou by die ander ouens.

Ry jy nou nog bergfiets?

Ek het ’n bergfiets by die huis in Rustenburg sodat ek ’n bietjie my oefening kan meng tydens ’n afseisoen, maar ek ry slegs professioneel padfiets.

Waar bly jy op die oomblik? En waar oefen jy en jou spanmaats?

Wanneer ek in Europa is, woon ek in Andorra. Tydens ’n afseisoen, wanneer ek in Suid-Afrika is, woon ek in Rustenburg. Met fietsry oefen jy nie eintlik saam met jou spanmaats nie behalwe as julle naby aan mekaar bly. Die enigste keer wanneer julle saamry, is by georganiseerde spanbyeenkomstes en wedrenne. Andersins oefen jy sonder hulle.

Wat doen jy wanneer jy nie op jou fiets is nie?

Ons reis konstant, so daar is nie baie tyd vir enigiets anders nie. Wanneer jy reis en gedurende wedrenne is jy gereeld op jou foon om kontak te hou met jou mense tuis. Wanneer ek terugkom by die huis in Andorra is daar gewoonlik baie adminstratiewe sake en take om na om te sien want dit hoop op omdat ek so gereeld weggaan.

Beskryf ’n gewone dag in die lewe van Louis Meintjes.

Ek word wakker, eet ontbyt, oefen, eet middagete en spandeer dan die res van die middag om inkopies te doen of om allerhande ander take klaar te kry. Ek is baie geïnteresseerd in voedsaamheid, so ek eksperimenteer altyd met kos en ek kyk wat beter vir my werk. Ek sal gewoonlik iets soos hawermout en eiers vir ontbyt eet. Middagete hang af van hoe hard my oefensessie was: as dit moeilik was dan sal ek dalk pasta met vleis en groente eet en vir aandete is dit gewoonlik vleis en groente.

Wat is jou toekomsplanne?

Ek het sopas ’n kontrak geteken met DimensionData vir Qhubeka vir 2018. Dit sal wonderlik wees om terug in ’n Suid-Afrikaanse span te wees en ons mikpunt is om baie goed te vaar in volgende jaar se Le Tour de France.

Is daar iemand spesiaal in jou lewe?

Nie op hierdie stadium nie, nee.

Wat is jou gunsteling-wedren?

Dit is die Le Tour de France. Dis een van die eerste wedrenne waarna ek as kind gekyk het en dis groter as enige ander resies. Dis die één wedren waarvoor al die beste fietsryers in die wêreld mik. Almal wat by die beginstreep aanmeld lyk op hul beste en is topfiks – wat die kompetisie baie rof maak. Om ’n goeie uitslag op die Tour te kry is baie meer spesiaal as enige ander wedrenne op die kalender.

Jy is bekend as ’n klimmer, en ook vir tydtoetse. Watter tegniek of vaardighede moet jy hê daarvoor en hoe verskil die vaardighede?

Ek moet nog aan alles werk want dis nie asof ek elke naweek ’n resies wen nie. Die ouens wat die multi-dagwedrenne wen se tegniek is goed afgerond en het sterk punte in alle areas. Die roetes van die wedrenne verander heeltyd so jy kan nie net in een area spesialiseer nie. As jy byvoorbeeld te veel tyd spandeer op tydtoetse (time trials), en die Tour het dalk volgende jaar nie soveel daarvan as hierdie jaar nie, dan kan jy jouself benadeel. So, ek dink dis belangrik om gebalansseerd te wees en om aan alles te werk.

Wat was jou gunsteling-oomblik tydens die 2017 Tour?

Om klaar te maak. Om in Parys uit te kom is só moeilik en daar is só baie goed wat jy moet vermy om dit tot by die eindstreep te maak dat dit ’n baie groot prestasie is as jy dit wel regkry. Daar is soveel belegging en toewyding van almal se kant af dat dit werklik wonderlik is as jy ’n goeie resultaat namens almal kan lewer.

Wat was die moeilikste deel vanjaar?

Ek ervaar eintlik die weke wat na die resies toe lei as die moeilikste deel. Dis die punt waar jy soveel werk gedoen het en nou sit jy net rond en hoop dat jy genoeg voorberei het vir die resies. Om te wag is die moeilikste want jou gedagtes maal oor die vrees vir die onbekende. Jy wonder hoe jy sal vergelyk met die res, so daar is baie gedagtes wat deur jou kop maal.

Jy kan seker nie bekostig om ’n slegte dag te hê tydens ’n multi-dagwedren soos die Tour nie. Hoe volhou ’n mens jou stamina en konsentrasie oor so ’n lang tyd?

Jy het nie ’n keuse nie; jy moet net. Die spanne leen baie goeie ondersteuning aan die fietsryers en die bemanning sorg vir alles in die agtergrond sodat jy net op jou werk kan fokus. Dis ook goed om die wedren in kleiner blokke op te breek. Eerstens fokus ek op die dag wat voorlê en daarna begin ek aan die volgende dag dink. Die resies het gewoonlik twee rusdae gedurende die drie weke so my fokus is gewoonlik net om tot by die volgende rusdag uit te kom. Die wedren duur drie weke lank en as jy net daarop fokus om dit tot die einde van die drie weke te maak, gaan dit ’n baie lang resies word.

Fietsry word gereeld gesien as ’n “solo”-sport: dis net jy en jou fiets. Nietemin vorm fietsryers deel van ’n span in die groot wedrenne. Hoe belangrik is spanwerk in hierdie konteks?

Fietsry is baie anders as meeste ander sportsoorte want alhoewel daar net een ou is wat oor die wenstreep ry om te wen, sal die oorwinning nie moontlik wees sonder die ondersteuning van ’n span nie. Gewoonlik het die span een doelwit voor oë en al nege fietsryers is toegewy aan hierdie doelwit. As jy nie hierdie sportsoort verstaan nie is dit moeilik om al die legkaartstukkies te sien wat in plek moet val soos die wedren vorder, maar aan die einde as jy iemand sien wen, het al sy spanmaats hulle spelplan uitgevoer oor die afgelope paar ure om te verseker dat dit kon gebeur.

The post Ons gesels met Louis Meintjes appeared first on rooi rose.

Irene Primary School bied hul jaarlikse Moonlight Fun Run aan op Vrydagaand, 8 September 2017. Hierdie is ’n wonderlike geleentheid om Irene te besoek en deel te neem aan die geselligheid.

Afstande, begintyd, en koste

• Die 8km-roete skop af om 18h30 en die inskrywingsfooi is R90.

• Die 4km-roete skop af om 19h00 en sal R60 kos.

• Persone in rolstoele, persone met gestremdhede en blinde atlete neem gratis deel.

• Honde aan leibande is welkom.

Inskrywings

• Deelnemers kan op die dag van die pretlopie inskryf: inskrywings open om 16h00.

• Deelnemers kan ook vooraf aanlyn inskryf. Aanlyninskrywings sluit op 4 September 2017.

• Deelnemers kan ook inskryf vir die gelukkige trekking.

Plek

Die wegspringplek is by die Oval in Irene. GPS-koördinate is S 25° 8′ 68.21″ / E 28° 21′ 99.57″

Vir verdere inligting

Stuur ’n e-pos na pta@ireneprimary.co.za

of bel 012 667 1037/8

Daar is opwindende pryse op die spel en almal wat klaarmaak kry ’n medalje!

The post Moonlight Fun Run/Walk appeared first on rooi rose.

Ryk Neethling is pas aangestel as die uitvoerende direkteur vir Prinses Charlene van Monaco se stigting in Suid-Afrika, wat fokus op waterveiligheid en swemopvoeding vir jongmense. Dié pos is vrywillig, en volgens berigte is Prinses Charlene baie bly dat Ryk die pos aanvaar het aangesien hy perfek is vir dié titel.

The post Ryk Neethling aangewys as direkteur van Prinses Charlene se waterveiligheidstigting appeared first on rooi rose.