Deur Maryke Roberts. Foto’s: Clifford Roberts en Lucy Markewicz

Die bekroonde wynplaas, Vriesenhof, op Stellenbosch, die plek waar die oud-Springbok Jan Boland Coetzee en Kanonkop se eerste wynmaker, sedert 1980 internasionaal-geliefde wyne maak, het pas ‘n nuwe hoofstuk tot hul geskiedenis bygevoeg: ‘n restaurant wat die hele plaashuis oorgeneem het, skryf Maryke Roberts.

Die restaurant, Die Stoep, laat jou weer kind op jou oupa se plaas word: jy trek in die winter al agter die sonnetjie aan en in die somer al agter die skaduwee. Binne die huis met sy dik mure, swaar houtbalke en die seëninge van die voorvaders, is die spens gevul met die beste voorrade uit die omgewing; die buite oond brand vir pizzadeeg en geroosterde geregte van weleer.

Die spyskaart is eenvoudig en kompak, maar boet beslis nie op geur in nie. Daar is onder meer kalamata-olywe met suurlemoen, knoffel en brandrissie; krakerige artisjokke met knoffel aioli, koljander en pietersielie-olie of gebraaid oesters met confit suurlemoen en vinkel; of kaas-en-vleis charcuterie met soetigheid en suurdeeg melba om te peusel terwyl jy die wyne per glas kan bestel.

Die spyskaart is vol liplekkertes wat met die plaas se bekroonde wyne geniet kan word.

Vir voorgereg kan jy kies tussen lekkertes soos erfenis-tamatieslaai; steak tartare, Burrata met geroosterde murgpampoentjie of geelstert crudo met gerookte eiervrug.

Hoofgeregte word alles oor die kole berei en sluit van geskroeide broccoli met beet hummus en chimichuri tot gebraaide swaardvis met basilie-kappertjiebotter en vinkel-komkommerslaai tot geelvin tuna, geroosterde varklies met geskroeide pynappel of biefstuk met beenmurg jus in.

As jy nie baie honger is nie en eerder meer van die wyne wil proe, loer gerus na die sydisse. Geen doodgewone rys of gebakte aartappel hier nie. O, nee. Laat jou mond water vir gebraaide Napa-kool met spek, sprietuie en wortelpuree; geskroeide vy, bokmelkkaas, roket en heuning vinaigrette; geroosterde beet met okkerneute, feta en ment of geskroeide geelmielie met spesery grondboontjie en koljander.

Pizza-slawe sal ver gaan om pizzas soos hierdie te kry. Dit word met 48 uur oue suurdeeg gemaak; met die hand gerek en die bestanddele is die ware Jakob: van fior di latte tot Serrano ham en San Marzano-tamaties.

Jy kan vir nagereg nog ‘n glas wyn bestel en die kaasbord geniet, of iets ligter soos die braambessie pannacotta met ‘n lemmetjiekors, maar as jy behoorlik wil poering, oorweeg die kole gebakte donkersjokolade en lemoen potjie fondant. Dit kom met melktert roomys en is genoeg vir twee of drie mense – afhangend van die vraatsug-vlak!

Al die plaas se bekroonde wyne is per glas of per bottel beskikbaar. Vriesenhof is lid van Stellenbosch Wynroetes, die land se oudste en grootste wynroete.

Lees ook: Nuwe herfsspyskaart by Creation is meer as kos en wyn

Ek dink die webwerf-beskrywing dat Die Stoep ‘n “ontvlugting na tradisie met asemrownde uitsigte en ‘n warm, rustieke atmosfeer” bied, heeltemal in die kol is. Jy voel nie net versadig van die maag nie, maar ook van die gees as jy weer deur die lae hekkie in die wit muurtjie terugstap na jou motor toe.

Ek leen sommer hier by die gewilde sanger, Jak de Priester, wat op ‘n slag ‘n hele rubriek gewy het aan die waarde van ‘n stoep. Hy noem ‘n stoep ‘n “seëning”.

Sela.

Lees ook: Voltooi jou kuier in Kaapstad met ’n ete by Marble Cape Town

The post Kom verwyl die ure op dié bekende stoep appeared first on rooi rose.

Deur Maryke Roberts. Foto’s: Clifford Roberts 

Terwyl Suid-Afrika jaarliks sy erfenis in September vier, is daar geen beter oomblik as nou, om ‘n glas Roodeberg met vriende te klink nie – dis immers ‘n oorspronklike en ‘n geliefde huishoudelike naam. 

‘n Spesiale verjaardagpartytjie is wel tydens Erfenismaand by Mertia-restaurant op Stellenbosch gehou en ‘n paar gelukkige gaste kon deel in die pret. Nie net is die handelsmerk se driekwarteeu gevier nie, daar is ook ouer wyne geproe – waarvan die oudste 49 jaar! Gaste moes met elke oesjaar wat geproe is, staan as hulle jonger as die wyn was. 

Marais Uys (Mertia-eienaar), Justin Corrans (hoof Wynmaker by KWV) en Matt van den Berg (Mertia se uitvoerende sjef).

Roodeberg, wat in 1949 deur die visioenêre Dr. Charles Niehaus gestig is, het sy naam te danke aan die asemrowende rooikleurige sonsondergange oor die Paarl-berge. Nou, terwyl Roodeberg 75 jaar vier onder die einste son wat sy naam geïnspireer het, reflekteer dit op ‘n reis ryk aan stories wat in die lewens van sy verbruikers ingeweef is. 

Die eerste bottel Roodeberg – wat oorspronklik ontwikkel is as ‘n eerlike Kaapse rooiwyn – is uit die 1946-oes gemaak. Dr Niehaus was die opvolger van dr. Abraham Izak Perold, die KWV se hoofwynwetenskaplike en pa van Suid-Afrika se unieke druifsoort, Pinotage.  

Vir die eerste 55 jaar is Roodeberg uitsluitlik vir die uitvoermark gemaak en die versnit was ‘n geheim. Alhoewel dit nie tot 2004 sonder ‘n KWV-kwota plaaslik beskikbaar was nie, het Roodeberg nog altyd ikoniese status in die harte en gedagtes van Suid-Afrikaners geniet.  

Daar word gesê dat gesogte toetswedstrydkaartjies, biltong en dies meer “onder die tafel” geruil is vir  ‘n bottel of twee van dié gesogte rooiwyn. Volgens die tydskrif, Wynboer (nou Wineland) van Januarie 1986, was ‘n glasie Roodeberg vir Suid-Afrikaners in die buiteland, soos ‘n drukkie van die huis af. Dieselfde geld vandag nog. Vir baie mense roep Roodeberg goeie herinneringe op van mense, plekke en geleenthede, en van die deel van spesiale oomblikke met familie en vriende, dikwels met seldsame oesjare wat spesiaal vir daardie een geleentheid weggesteek is. 

Van die klassieke Roodeberg Red tot die avontuurlike Roodeberg Black en die lewendige Roodeberg Rosé (gemaak van rooi variëteite), weerspieël elke versnit die handelsmerk se diep generasie wynmaakkundigheid.  

James Ochse, Roodeberg se wynmaker – slegs die 12de in die handelsmerk se geskiedenis – het aan gaste vertel dat die kelderspan se versnydingssfilosofie berus op ‘n diepliggende begrip van die wingerde, die streke waarmee die kelderspan werk en dat hulle waardeer wat elke variëteits-element bydra.  

Sandy Goliath, Roodeberg se handelsmerkbestuurder en James Ochse, Roodeberg se wynmaker, proe die 1975 voor gaste dit gaan geniet.

“Hierdie wenformule strek verder as keldermure: Roodeberg gaan nie net oor die wyn self nie – dit gaan oor die herinneringe wat jy daarmee skep. Dit gaan daaroor om om die tafel bymekaar te kom, te talm by ou stories en nuwes te maak,” sê James.  

“Roodeberg was nog altyd op die kuns van versnyding geskoei,” het hy vertel. “Selfs die Rosé is ‘n versnit.” 

Hy het vertel dat die span wyn maak om nou te geniet, maar ook met goeie verouderingspotensiaal. 

Die eerste oesjaar wat kleiner vate in gebruik gekom het, was 1989. 

Selfs ná 75 jaar bly Roodeberg standvastig in sy strewe na kwaliteit terwyl innovasie gul omhels word. “Die band wat Suid-Afrikaners met Roodeberg het, is besonders. Dit is ‘n wyn wat mense nie net drink nie – hulle deel dit, gee dit geskenk en gee dit aan en skep nuwe stories met elke bottel. En terwyl Roodeberg na die toekoms kyk, doen hy dit met dieselfde sorg en liefde wat dit nog altyd gedefinieer het, en gaan voort om wyne te maak wat meer as net ‘n ervaring is—hulle is deel van die lewe se grootste oomblikke,” het Sandy Goliath, Roodeberg se handelsmerkbestuurder vertel. 

“In 1995 is die twee biljoenste bottel geproduseer en ons is trots op hoe die handelsmerk steeds groei,” het sy bygevoeg. 

Al Roodeberg se oesjare word gemaak om nou te geniet, maar het uitstekende verouderingspotensiaal.

Die oudste wyn wat geproe is – die Roodeberg 1975 – is ‘n versnit van Cabernet Sauvignon, Shiraz, Pinotage, Cinsault en Tinta Barocca en het nog baie vrug. “Roodeberg is altyd Cabernet en Shiraz-gedrewe en sal altyd vier of vyf verskillende kultivar-komponente hê. Die afgelope paar jaar het hy Pinotage gehou, maar ook Cabernet Franc en Merlot ingebring en die Cinsault en Tinta Barocca begin weglaat.

Een van die ander wyne wat gaste kon proe en met middagete kon geniet, is die Roodeberg Black 2021. James het gesê: “Wanneer die Tandemuis, Kersvader, die Loch Ness monster en die Paashaas bymekaar kom, is die Roodeberg Black 2021 wat hulle sou drink. Dit sou dan al die legendes om een tafel versamel het,” het hy gesê.

Die oesjare wat gaste voor middagete kon proe en ook saam met die ete kon geniet.

Gaste het die Roodeberg Classic Rosé2024 met peuselhappies geniet ; daarna wildsvleis met haselneut en seldery saam met die Roodeberg Classic Red Blend 2022; toe varklies, met okkerneut en raap met die Roodeberg Reserve 2021 geniet. Die hoofmaal was vrywei beeshaas met geel aartappels en ‘n melkrolletjie wat met die Roodeberg Dr. Charles Niehaus 2020 geniet is. Nagereg van Valrhona, swartbessie en timurpeper is met die Roodeberg 2021 bedien. 

Die 2022-oesjaar is tans op winkelrakke en die wyn word nooit dadelik nadat dit gebottelleer is, vrygestel nie. Dis tans Cabernet Sauvignon en Shiraz nou ook Petit Verdot, Tanat, Pinotage en Petit Syrah. 

Die 2022-oesjaar is tans op winkelrakke en die wyn word nooit dadelik nadat dit gebottelleer is, vrygestel nie.

Lees ook: Tekstiele eer vakmanskap én Afrika-landskappe

The post Roodeberg vier 75 jaar van erfenis, herinneringe en samesyn appeared first on rooi rose.

Deur Maryke Roberts. Foto’s Clifford Roberts 

Elke moontlike saal, gallery, ouditorium en kuierplek is spesiaal ingerig vir die fees. Vanjaar se feestema is “Speel” en dis beslis wat daar op die dorp gebeur. 

Die fees bied waarlik iets vir almal en daar is klassieke musiek uitvoerings in die Endler; orrel-uitvoerings in die Moederkerk, die feeskunstenaar, Marlene Steyn, se werk in die Sasol Kunsmuseum, boekbesprekings, opelug musiekkonserte en lewendige uitsendings van RSG vanaf Die Khaya.  

Lees ook: Pieter Smith vertel die storie van Afrikaanse musiek op Pretoria FM

Dr Kosmologiese klavier-improvisasies en kwantum-doedelsak-uitvoerings: Dr. Philip Southey – of vir sy Afrikaanse studente aan die US Doktor Soutie – is benewens fisikadosent ook ’n bekwame pianis en kitaar- en doedelsakspeler. Hy het ‘n wonderlike uiteenlopende vertoning van wetenskap en musiek aangebied.

Daar is rondwandelings met kunstenaars, besoeke aan Dylan Lewis se beeldhoutuin en sommer baie leefstyl-geleenthede waar jy met bekendes kan skouerskuur. 

Saans begin die vermaak met insiggewende wynskool-aanbiedings deur die Stellenbosch Wynroetes, waar jy meer oor Suid-Afrika se vonkelwyn en unieke wynkultivars kan leer, met wynmakers gesels en sommer van die land se voorste wyne proe. 

Die Stellenbosch Wynroetes Wynskool het verskeie kultivars en wynstyle op hul program. Hier is die wynmakers wat die Cap Classique aanbieding en -proe gelei het, van links: Narina Cloete (Blaauwklippen), Shawn Mathyse (Ken Forrester), Nathan Valentine (Villiera), Danna de Jong (Simonsig) en twee vrolike vroue Lizemari Geldenhuys (Kleine Zalze en Heidi Dietstein (Spier).

Die fees het verlede naweek afgeskop met ‘n langtafel in die Open Window-kampus by Oude Molen waar meer as 450 gaste saamgekuier het met lekker musiek en die wonderlike braaikos van Johnny Hamman van John Joseph Anatomy of Food. Gure weer het die straatfees binnetoe gedwing, maar tóé is dit so intiem en gesellig, dat niemand die lang laning eikebome bo hul koppe mis nie. 

Die pragtige langtafel moes vanjaar binnenshuis aangebied word, maar die gure weer het beslis nie die speel-gees gedemp nie.

Die ateljee-besoeke by kunstenaars is ‘n groot treffer. Hier kuier feesgangers by Andries Gouws in Jamestown waar hy sy kunsreis beskryf, terwyl daar na sy kunswerke gekyk kan word.

Die program is nog propvol en aan tot Sondagaand en daar is kaartjies vir verskeie produksies beskikbaar.

Meer inligting hier: https://woordfees.co.za/ 

Lees ook: Die Emmy-toekennings se nápartytjie: Wenners en wonderwerke

The post Die Woordfees is een groot speel-plesier appeared first on rooi rose.

Deur Maryke Roberts. Foto’s: Clifford Roberts

Dis hoe die Suid-Afrikaanse wynbedryf die afgelope naweek Internasionale Sauvignon Blanc Dag op Stellenbosch gevier het.

Die Stellenbosch Rolbalklub se lede het hom hand gee met die reëls en puntetellings, terwyl joernaliste, wynmakers en bemarkers met ‘n glas van hul gunsteling Sauvignon, hul slag met die balle getoon het. Dis die derde jaar wat die rolbaldag gehou is en RJ Botha, voorsitter van die Sauvignon Blanc SA-vereniging en keldermeester by Kleine Zalze Wyne, vertel daar is op rolbal besluit, “omdat jongmense dit trendy – soos Sauvignon Blanc – vind en dis ook nie so tegnies soos onder meer gholf nie. Iemand kan dit vinnig leer speel en die interaktiewe spel leen hom tot netwerk tussen spanlede asook tussen verskillende spanne. Dit is in die eerste plek die doel om ‘n netwerkgeleentheid met die fokus op Sauvignon Blanc te skep.”

Spanne is voor die tyd ingedeel en elke groep het iemand uit elke bedryf ingesluit, Uit die 24 spanne wat deelgeneem het, is die wenspan (Anton Oosthuizen – Beveratech, Estian de Wet – Constantia Uitsig, Carel Botha – Le Grand Chasseur en Johannes Richter – Wineland Media) aangewys en hulle het met heerlike pryse weggestap.

Van die 120 wyne wat deelnemers kon proe, was 100 van oorsee en 20 plaaslik, maar dit was gou duidelik dat ons patrioties Suid-Afrikaans is, want die plaaslike wyne was eerste opgedrink! Die style was ook lekker uiteenlopend en het gehoute, ongehoute, verouderde en jonger wyne ingesluit. Die oorsese wyne het van Oostenryk, Frankyk en Italië gekom en die diversiteit van Sauvignon Blanc goed vertoon.

Tussen die gesels en gespeel deur, kon deelnemers aan roosterkoek met konfyt en kaas, of biltong of snoekpatee; braaibroodjies en worsrolletjies smul.

Daar was altesaam 24 wynprodusente wat in die 24 spanne opgedeel is. Een van die bekende gaste wat deel van die prettige dag was, is Anzél Rabie van die gewilde televisieprogram, “Anzél in die Boland”.

Die gewildheid van Sauvignon Blanc kan nie betwyfel word nie. Van die totale wingerd-oppervlakte van 87 848 ha is 55% wit en 45% rooi druiwe; waarvan Sauvignon blanc 10 028 ha (11.4% van alle kultivars) beslaan.

Sauvignon blanc het met 7.6% gegroei, ten spyte van die feit totale aangeplante oppervlakte oor 10 jaar met 11.9% gedaal het. Aanplantings van dié kultivar het die afgelope jaar ook met 41 ha toegeneem. Die binnelandse verbruik het ook van 14481484,18 liter tot 15321441,76 van 2022 tot 2023 toegeneem.

Al meer wynliefhebbers ontdek ook die veelsydigheid van die druif en veral gehoute, en verouderde Sauvignon Blanc. Die hele idee dat net rooiwyne beter smaak met veroudering, is vinnig besig om te verdwyn en die verouderingspotensiaal van witwyne, soos Sauvignon Blanc is nou ‘n lekker besprekingspunt.

Maar ‘n rolbaldag om ‘n internasionale wyndag te gedenk, is nie al waarmee die Sauvignon Blanc SA-span besig is nie.

Die FNB Sauvignon Blanc SA Top 10 kompetisie se inskrywings open op 25 Junie; die beoordeling word van 27-29 Augustus gedoen en die #SauvignonBlancSA Gholfdag word op 30 Augustus by die Stellenbosch Gholfklub gehou.

Die wenners van die FNB Sauvignon Blanc SA Top 10-toekennings vir 2024 word op 16 Oktober aangekondig.

Lees ook: Wynproe en stap: Die nuutste ervaring by Blaauwklippen

The post Sauvignon Blanc Dag op prettige manier gevier appeared first on rooi rose.

Dis vanjaar die sesde jaar wat dit gehou word en Spier – tuiste van een van die grootste kontemporêre kunsversamelings in die land – glo in die mag van visuele kuns om te onderrig en te inspireer, sodat ons bymekaar en van die wêreld kan leer.

Die lig-uitstalling is oral op die plaas se mooi grasperk en tussen die historiese geboue installeer en bestaan uit 21 verskillende lig- en video kunswerke. As jy net voor sononder arriveer, kan jy die lekker kos en wyn van die plaas geniet en soos die eerste sterre oor die berge opkom, word die ligkuns aangeskakel.

Die ligkuns kurators, Vaughn Sadie en Jay Pather, het keurig gekies om die idee dat kuns ’n spieël vir die samelewing is, tot uiting te bring. Die kunstenaars wat vanjaar deel is van die uitstalling, raak groot temas en uitdagings in ons moderne wêreld aan en kyk onder meer na klimaatsverandering, rassisme, kolonialisme, hoe tegnologie ons lewens domineer en hoe ons soek na die ware betekenis van die lewe.

Maar moenie glo dat die gewigtigheid van hierdie idees wegneem van die kunstenaars se vermoëns om lig, interaksie en introspeksie in te nooi nie.

Die kurators sê: “Hierdie werke kombineer verwondering, deelname en denke; dis ’n ruimte vir viering, wat oomblikke van ontsnapping en fantasie bied, en oomblikke wanneer ons weer dieper insig met die wêreld daarbuite ervaar.

“Hierdie ligte en kleure sal jou sintuie wakker maak. Jy kan dalk ’n betowerende, kleurvolle netwerk van swamme in Stevie Thompson se “Mycelium” teëkom, of gekonfronteer word met die vaag lyne tussen ontspanning en onoplettendheid, in Alan Alborough se werk ‘ZZZZ’.

“Jy sal dalk Abri de Swardt se “Flood Light” of Naadira Patel en Sarah de Villiers se “Assembling Lines” teëkom en wonder hoe ons ons planeet van die mensdom se oordaad en kortsigtigheid kan red.

Toegang na die Spier Ligkuns-uitstalling is gratis. Bespreek jou sonsak-piekniek of ete by een van die lekker eetplekke op die plaas, wat almal tot 21:00 oop is vir die duur van die fees.

Lees ook: Die KKNK is amptelik aan’t woeker en woel!

The post Gaan verloor jouself by Spier se ligkuns appeared first on rooi rose.

Deur Maryke Roberts. Foto’s: Clifford Roberts en verskaf.

Die Lady May 2018 is pas bekend gestel en die landgoed vier ook 20 jaar sedert May de Lencquesaing die landgoed gekoop het. Sy was die vorige eienaar van Bordeaux se Château Pichon-Lalande

Om middagete op die terras by Vine Bistro te geniet, wat jou baie aan iewers op die Franse platteland herinner, is ’n ware fees. Ons proe die nuwe Lady May 2018 met Dirk van Zyl, keldermeester en Afrika verkoopsbestuurder.

Nicolas Bureau, hoof uitvoerende beampte van Glenelly en May se kleinseun, is druk besig in vergaderings, maar kom groet vinnig en klink ’n glasie op dié nuwe vrystelling.

Dirk druk sy neus in sy glas en adem die heerlike aromas diep in. Hy vertel dat die 2018 oesjaar daardie baie berugte droogte-oes was en die wingerde het swaar gekry. “Dit was nie so warm nie, maar droog. Dit was Glenelly se kleinste oes ooit en net 50% van gewone jare. Maar die vrugte het baie konsentrasie en groot sorg is geneem om nie elegansie te verloor nie.”

Maar in sy oë kan jy sien dat hy gelukkig is met hierdie oesjaar. Hy erken dat mens maar altyd krities is wanneer jy oes. “Wyn moet tyd en plek vasvang. Dit moenie lig en blomagtig wees nie, want dit sou nie getrou wees aan 2018 nie.”

Dirk het twee jaar gelede by die plaas aangesluit en sê die wingerde is nou meer volwasse en hul span verstaan die wingerde beter.

Die 120 hektaar plaas aan die voete van die berge buite Stellenbosch met sy indrukwekkende betonkelder het 58 hektaar wingerd en kan nie hul aanplantings uitbrei nie. Die wingerde is oorwegend rooi met minder as 10% wit. Dirk vertel hulle het tans 45% Cabernet Sauvignon en wil dit graag vermeerder na meer as 55% en hulle beplan om ook hul Merlot-wingerde te laat groei.

Hy vertel bietjie oor die interessante navorsing oor die SA wyngeskiedenis wat op hul webwerf vervat is en ek maak ’n nota in my geheue. Ek gaan later meer lees by: https://glenellyestate.com/our-history-timeline/

Maar terug by die Lady May in ons glas. “Die rede vir hierdie plaas is Lady May. Ons hou van ons ander wyne, maar die hoofrede hoekom ons hier is, is Lady May. Die persentasies verskil van oesjaar tot oesjaar, omdat net die beste druiwe daarin gaan,” vertel hy terwyl ons aan heerlike geregte peusel.

Die 2018-oesjaar is ’n versnit van 85% Cabernet Sauvignon, 6% Cabernet franc, 6% Petit Verdot en 3% Merlot. Daar is 13 757 bottels gemaak en dis in 750ml en 1,5 l Magnums beskikbaar. Die wyn is vir 24 maande in Franse eikehoutvate verouder.

Met nagereg is ons reg vir ’n middagslapie, maar Dirk belowe ons sal nie spyt wees as ons sy raad volg nie: “As jy so lekker versadig is, gaan stap deur die tuine of besoek die indrukwekkende glasmuseum hieronder die restaurant. May de Lencquesaing se glasversameling wat in die wynkelder gehuisves word, is een van die grootste versamelings in privaat besit ter wêreld. Die uitstallings wissel van die 1ste en 2de eeu tot moderne klassieke werke, insluitend stukke deur Salvador Dali en Lino Tagliapietra.”

Ons doen toe net dit. En weet, voortaan is dit ons somer-kuierplek!

Lees ook: Erfenis-reeks vir Lozärn Wines bekendgestel

The post Nuwe wyn vrystelling en verjaardag vir pragplaas appeared first on rooi rose.

Deur: Clifford Roberts. Foto’s: Clifford Roberts

‘n Algehele 264 wyne het vanjaar by hierdie kompetisie ingeskryf.

Die wenners is by die Lanzerac Wynlandgoed op Stellenbosch aangekondig.

Bo-aan die lys was vyf trofee-wenners, naamlik Alto Cabernet Sauvignon 2018, gekies as vanjaar se beste wyn; Rietvallei Wyne, as beste produsent en wynlandgoed; Arbeidsgenot Wyne wat die Malmesbury-streek verteenwoordig, vir beste area; en, Slanghoek Wynkelder se Vinay Vin Rosé NV in die kategorie vir lae alkohol rosé.

Dit is die derde agtereenvolgende jaar dat Rietvallei met die trofee vir Beste Landgoed wegstap.

Nasionale wenners van al die kultivars en style is ook aangewys en het vanjaar 35 produsente van regoor die Kaapse wynlande ingesluit.

Die uitblinkers se sukses berus op goeie besluite, byvoorbeeld, waar kultivars geplant word omdat sommige vaar beter op sekere plekke as ander, en dan is daar ook die komplekse wynmaak-proses. Die mikpunt vir meeste premium-produsente – en beslis vir dié wat by die kompetisie ingeskryf het – is om die egtheid van ‘n spesifieke oesjaar so helder as moontlik in die wyn te weerspieël.

Dit is hiervandaan dat die Franse woord terroir sy ontstaan het. Terroir word algemeen gebruik om die natuurlike omgewing te beskryf waar ‘n wyn sy oorsprong gehad het. Dit sluit in onder andere grondtipes, hellings en klimaat.

Om aan die Terroir SA-kampioenskap deel te neem, moet wyne gesertifiseer wees as enkel-wingerd wyne, landgoed-geproduseerde wyne en wyne van ‘n afdeling of distrik nie betrokke in meer as een afdeling. Wyn word ten opsigte van kwaliteit oorweeg, maar ook ten opsigte van ‘n sy bo-gemiddelde weerspieëling van terroir. Die kompetisie is uitsonderlik omdat elke inskrywing deur die hele paneel van vyf spesialiste beoordeel word.

Die SA Terroir-toekennings is ‘n uitvloeisel van die Wyn van Oorsprong-skema wat vanjaar 50 jaar oud is. Dit is in 1973 ingehuldig en het verskeie gedaantes ondergaan, maar word steeds beskou as een van die beste stelsels om die egtheid van wyn in die bottel en wat op die etiket verskyn, te bevestig.

Tydens die geleentheid op Stellenbosch verlede week is ‘n spesiale toekenning ook aan die Wyn en Spiritus-raad vir hul bydra tot die volgehoue sukses van die Wyn van Oorsprong-skema.

Die funksie is Saterdag op KykNet se Ontbytsake uitgesaai.

Lees ook: Hierdie is geen geloofsdaad, maar van talent

The post Top wyne in vanjaar se Terroir-kompetisie aangewys appeared first on rooi rose.

Deur Maryke Roberts. Foto’s: Clifford Roberts

Die plaas dateer uit 1682 en word gereken as een van die oudste wynplase in Stellenbosch. Die plaas het verlede jaar 340 se erfenis gevier en Van Loveren is ook sedert 2022 ‘n trotse aandeelhouer van Blaauwklippen.

Nie alleen is die plaas die tuiste van ’n kelder, proelokaal, herehuis wat uit 1789 dateer nie, deli, fietsroete en weeklikse naweekmark nie, maar ook dié plek waar die Kamers/Makers jaarliks gehou word nie, daar is ook ’n pragtige glaskatedraal vir funksies soos troues en herdenkings. Daar is elke naweek pretdraf en -trap, luukse akkommodasie in die Jonkershuis en Herehuis en uitsigte oor die Hottentots-Holland- en Simonsberge wat jou aan ou Meesters se olieverfwerk herinner.

Narina vertel: “Blaauwklippen is steeds ’n wynplaas, alhoewel dit ’n sterk leefstyl aanbieding het.”

Om op die plaas te gaan kuier – so teen die laaste stuiptrekkings van die oes – is ’n insiggewende gedoente. Verlede jaar is 175 ton druiwe geoes en vanjaar meer as dubbel soveel, 460 ton.

Narina neem ons eers deur die kelder, waar wyn gis, verouder en oorgepomp word. Elke kwartaal van die jaar het sy eie roetine en uitdagings. Terwyl ons deur die kelder stap, vertel sy dat dit die eerste maal in 30 jaar is wat Chardonnay op die plaas gemaak word. Sy koop die beste Stellenbosch Chardonnay druiwe in en verouder die wyn dan vir 11 maande in hout.

Sy vertel: “Malbec-druiwe is so vol sap en raak maklik pap; die bye draai daarom en ek verstaan hoekom die bye so mal oor Malbec is. Toe sy sien ek lig my kamera, “Malbec maak nie mooi foto’s nie – hy maak wel baie mooi wyn!”

Ons kom op die einde van die oes op die plaas aan en sien hoe die laaste druiwe inkom. Malbec maak glo nie mooi foto’s nie, maar lekker wyn, aldus Narina!

Die plaas het nie verniet verlede jaar dubbelgoud vir sy Malbec – die eerste keer in 20 jaar – by die Veritas-toekennings ontvang. Narina se trots is duidelik as sy byvoeg dat mense al begin om vir Blaauwklippen Malbec te vra. “Cabernet Sauvignon was nog altyd die ster van die show – nie net vir die groter Stellenbosch nie, maar ook hier op Blaauwklippen – maar Malbec is besig om dit verby te steek. Ons Malbec is ’n baanbekers wat verskeie pryse gewen het wat mens nêrens anders kry nie.”

Sy eksperimenteer met nuwe hout en ook ouer vate vir veroudering van hul Malbec, om verskillende geurprofiele te kry.

Haar reis tot op Blaauwklippen het haar onder meer oeste by Glen Carlou Vineyards, Dornier Wines, AA Badenhorst Family Wines en Stellenzicht Wine Estate laat voltooi. Sy was vir ses jaar wynmaker by Quoin Rock Winery en dien op verskeie wynproepanele en -kompetisies.

Maar haar oë blink as sy oor haar lewe op Blaauwklippen praat. Die plaas het verskeie wynreekse, waarvan die premium-reeks onder meer die Bordeaux-versnit, De Blaauwe Klip 2017 (die plaas se eerste naam), Cabernet Sauvignon 2020, Malbec 2021 en Cabernet Franc 2019, insluit. Daar is ook ’n lekker verskeidenheid skroefdop-wyn en Narina sê dis om te verseker daar is iets vir elke smaak en sak!

Narina Cloete vier vandeesmaand haar sewende jaar as die wynmaker op Blaauwklippen.

Blaauwklippen is al jare bekend vir sy voorslag Zinfandel, ’n kultivar wat nie baie algemeen in Suid-Afrika geplant word nie, maar hier maak Narina vonkelwyn en Rosé daarvan. Die vonkelwyn is die land se enigste van Zinfandel. Dit verouder vir 28 maande op die gismoer.

Sy vertel: “Rosé word al gewilder en al meer mense vra vir Rosé by plase wat dalk nie gehoute witwyne het nie. Dis oor die algemeen ’n voller wyn.”

Hul Rosé van Malbec en Zinfandel is ’n lekker Provensaalse-styl Rosé en heerlik veelsydig. Dit staan sy man selfs ryker disse vir die winter en somer, vertel sy.

Die proelokaal is waar ons vashaak vir ’n kuier. Eers die dag se gejaag afspoel met yskoue Brut 2020 Cap Classique. Sy verlekker haar in die uitdrukkings op ons gesigte toe die roosblaar en nektariengeure deurslaan en in lemoenbloeisel, aarbeie en suurlemoen draai.

Hoe lekker is hierdie vlagskip-wyn voor die kaggel nie? De Blaauwe Klip 2017, is na die plaas se eerste naam vernoem en ’n volronde Cabernet Sauvignon gebaseerde versnit.

Die plaas het enkelkultivar Zinfandel 2019, maar sy het nie van 2020-2023 gemaak nie, want vertel sy met ’n knipoog, dis nie alleen ’n niche mark nie, sy het haar Zinfandel-druiwe nodig vir Cap Classique en Rosé!

Narina doen daarna ’n wynproe met ons van haar gunstelinge (bykans al die wyne!) en vertel Blaauwklippen is 115 hektaar groot, waarvan 40 onder wingerd.

Ons is gelukkig om na ons lekker lang proe, van die laaste gaste te wees, wat by die restaurant kuier, want dit ondergaan ’n groot opknapping en ek kan nie wag om te sien hoe dit daar gaan uitsien nie.

Ná ete, kan jy lekker aan die 10 jaar oue potketel brandewyn of Before & After aperitif teug. As vonkelwyn nie jou kuif deurmekaarwaai nie, probeer die plaas se gins.

• Blaauwklippen se nuwe restaurant, De Blaauwe Kitchen, open op 1 Augustus. Die proelokaal, The Tasting House & IS Art Gallery het op 1 Julie geopen en is daagliks van 10:00 tot 18:00 oop. Hier kan jy verskeie wyn-en-kos pasmaat proeë, kaas-en-vleisborde, pizzas of kleinbordjie-geregte geniet.

Lees ook: WEN een van twee kaste van De Krans se portstylwyne!

The post Al lê die berge nog so blou… op Blaauwklippen appeared first on rooi rose.

Vanaf 20 April om 20:00 op kykNET (DStv-kanaal 144) maak Amy Kleinhans-Curd, Mariska Thorpe, Karen Schwendtke, Candice Bester, Michelle van Zyl en Anita Lloyd hul droomhuise se deure, hulle harte en hulle lewens vir kykers oop.

Skuif nader om te sien hoe hierdie ses unieke, interessante en dinamiese huisvroue ondernemings begin, aantrek vir sukses, stylvol rondrits, skoonheidsroetines gedissiplineerd navolg en dít alles met hul veeleisende persoonlike lewens balanseer. Hulle deel ook die struikelblokke, nederlae en oorwinnings so tussen die prettige en humoristiese oomblikke deur.

Die Real Housewives van die Wynlande is in en om Franschhoek, Paarl, Stellenbosch en Somerset-Wes verfilm en deur Red Pepper Productions vervaardig.

Hier is ’n paar interessante feite oor die ses vroue van Die Real Housewives van die Wynlande om jou behoorlik nuuskierig te maak:

Die voormalige Mej. Suid-Afrika Amy Kleinhans-Curd is met die Nieu-Seelandse sakeman Leighton Curd getroud. Amy is ’n ma van vier, woon in Franschhoek en is die direkteur van verskeie maatskappye, waaronder die huiswerkhulplyn vir onderwysers, Dial-A-Teacher, wat in 2000 saam met die Nelson Mandela Fonds gestig is. Hul plase in Franschhoek, Swellendam en in die Wieg van die Mensdom is net ’n paar van die dinge wat Amy besonder besig hou. Sy stel binnekort haar eie Cap Classique-vonkelwyn sowel as haar eie velsorgreeks onder die naam Amelia (haar geboortenaam) bekend. Sy is ’n betrokke ma en reël, onder meer, ’n jaarlikse swemfees vir die skool wat haar kinders bywoon.

Mariska Thorpe, wat geruime tyd ’n welvaartbestuurder was, woon saam met haar man, Quintus, en hulle dogter, Ocean, in dieselfde kompleks in Franschhoek as Amy en haar gesin. Mariska hou nie van stilsit nie. Sy en Quintus verhandel aandele, maar sy bestuur ook ’n onderneming wat tweedehandse klere nuwe lewe gee. Mariska en haar man is kranige landlopers, oftewel trail runners, en sy is ’n perfeksionis in alles wat sy aanpak.

Karen Schwendtke woon in Val de Vie tussen die Paarl en Franschhoek. Sy is ’n suksesvolle sakevrou met ’n BCom Rek-graad van UP en ’n MBL van Unisa agter haar naam en ook ’n graad in Visual Basic-programmering van Harvard in Amerika. Ten spyte van lang werksure maak sy ook tyd vir groot liefdadigheidsprojekte. In tye van nasionale nood het sy met die voorsiening van water en veevoer gehelp. Kinders lê haar na aan die hart en sy is betrokke by fondsinsameling vir CHOC (Childhood Cancer Foundation SA). Sy is die trotse ma van twee dogters, Saskia en Arabella.

Candice Bester bly in die Aan de Weber-landgoed in Stellenbosch. Sy is die ma van Emma en is getroud met Werner. Sy was lank as sangeres in die uitvoerende kunste betrokke, maar het die verhoog vir die korporatiewe wêreld verruil. Daar het sy, onder meer, haar merk gemaak as die bemarkingsbestuurder vir Quench, wat deur die TFG-groep gekoop is. Candice droom egter steeds daarvan om in die toekoms weer agter die mikrofoon te staan. Sy speel graag gholf, het ’n groot versameling whiskies en fasiliteer ’n maandelikse vasvrae-aand. Candice en Werner is in die proses om ’n restaurant oop te maak.

Michelle van Zyl is ’n mediese dokter wat in trauma gespesialiseer het en daarna ’n suksesvolle algemene mediese praktyk gehad het. Deesdae is sy ’n estetika-dokter wat haar op behandelings soos Botox toespits. Sy en haar man, dr. André Olivier, woon in die Boskloof Eco Estate in Somerset-Wes. Hulle is die ouers van Hanno en Heidi. André het ook twee seuns uit sy vorige huwelik, wat in Namibië woon. Michelle onthaal graag en droom daarvan om haar eie geselsprogram op TV te hê.

Anita Lloyd woon buitekant die Paarl in ’n pragtige vallei. Sy en haar man, Boyce, is skoolliefdes en sy het haar loopbaan as onderwyseres opgegee om hom in sy beroep te ondersteun. Hulle het vir tien jaar dwarsoor die wêreld vir Boyce se werk gewoon voor uiteindelik na Suid-Afrika teruggekeer het. Boyce is sedert 2016 die uitvoerende hoof van KWV. Anita het ’n meestersgraad in linguistiek en het ’n voorliefde vir die studie van tale. Buiten haar man en haar katjies is Anita se grootste prioriteite haar huis, kuns en reis.

Die Real Housewives-franchise het in Maart 2006 sy debuut in Amerika met The Real Housewives of Orange County gemaak. Intussen is daar elf verskillende reekse in Amerika vervaardig en 21 internasionale weergawes waaronder reekse tel wat in Durban, Johannesburg en Kaapstad geskiet is. Die Real Housewives van Pretoria, wat in Oktober 2022 op kykNET begin het, was die eerste Afrikaanse reeks.

Die Real Housewives van die Wynlande begin op 20 April 2023 om 20:00 op kykNET (DStv-kanaal 144).

Lees ook: Teatersterre skitter by toekennings

The post Ontmoet die ses vroue van Die Real Housewives van die Wynlande appeared first on rooi rose.

Deur: Maryke Roberts. Foto’s: Maryke Roberts

Covid het die teaterbedryf baie hard getref en met teaters wat vir bykans 18 maande gesluit was, het 2022 nuwe geleenthede gebring, maar onder baie moeilike omstandighede. Om dus 71 kwalifiserende produksies te kon beoordeel – ’n goeie opstaan na pre-pandemiese vlakke – was vir die beoordelaarspaneel ’n ware voorreg.

Die beoordelingspaneel vir die 2022 teaterjaar wat die genomineerdes en wenner gekies het, is Africa Melane (voorsitter), Dr. Beverley Brommert, Hadley Tituss, Dr. Lwando Scott, Mariana Malan, Marina Griebenow, Tracey Saunders en Dr. Wayne Muller.

Voor die toekennings begin het, is daar eers hulde gebring aan al die kunstenaars wat in 2022 en tot op datum oorlede is.

Contested Bodies, was die mees bekroonde produksie vir 2022 en het 16 benoemings ontvang. Dis vervaardig deur Abrahamse en Meyer Productions en het toekennings ingepalm vir beste regisseur – Fred Abrahamse, beste kostuumontwerp – Marcel Meyer en die rolverdeling van Matthew Baldwin, Lungile Lallie en Marcel Meyer het erkenning gekry vir die beste optrede deur ’n ensemble.

JM Coetzee se boek, Life & Times of Michael K is deur Lara Foot vir die verhoog verwerk en het die gesogte Beste Produksie-toekenning ingepalm. Dis ’n gesamentlike produksie tussen die Baxterteater, Theatre der Welt in Düsseldorf en Les Théâtres de la Ville de Luxembourg.

Die toekenning vir die beste vertolking deur ’n akteur is deur oorlede Mncedisi Shabangu ingepalm, vir sy vertolking van Zacharia in Athol Fugard se toneelstuk Blood Knot.

Mwenya Kabwe het die toekenning gewen vir die beste vertolking deur ’n aktrise in ’n toneelstuk vir haar rol as Rosa Feigel in Hold Still, wat ook bekroon is as die beste nuwe Suid-Afrikaanse teks vir die skrywer, Nadia Davids.

Die Mozart-opera, Le Nozze di Figaro, het skoonskip gemaak met Conroy Scott en Brittany Smith wat die toekennings vir die beste optredes in onderskeidelik die kategorieë vir mans en vroue in ’n opera gewen het.

Mikayla Joy Brown van die Universiteit Stellenbosch het die mees belowende studente-toekenning gewen.

Vanjaar se 58ste Fleur du Cap Teatertoekennings is die laaste wat onder die Distell-banier geborg is, omdat die maatskappy oorgekoop is deur Heineken. Van links is Distell-personeellede betrokke by die glansryke geleentheid: Eric Leong Son (waarnemende direkteur: Korporatiewe Aangeleenthede – CARA), Phumza Lungiswa Rengqe (Distell se korporatiewe bemarkingsbestuurder) en Simone Benjamin-Carolissen (projekbestuurder van onder meer die Fleur du Cap Teater-toekennings), tydens die geleentheid.

David Kramer en Peter Cazalet het vanjaar se Lewenslange Bydrae-toekennings ontvang vir hul groot bydrae tot die nasionale en internasionale kuns- en vermaaklikheidsbedryf.

Empatheatre, ’n navorsingsgebaseerde, teatermaak-metodologie het die Innovasie in Teater-toekenning ontvang. Die beoordelaarspaneel het gesê hul vermoë om verbindings tussen mense en plekke te bou en deur hul praktyk van openbare storievertelling en luister is onoortreflik.

Berenice Barbier wen die Beste optrede deur ’n ondersteunende aktrise in ’n toneelstuk vir Who’s Afraid of Virginia Woolf as Honey.

Die kunstenaars wat die aand se vermaak tussen die oorhandigings verskaf het, het onder meer die Imbewu Marimba Band; Hassan Addas Band; Kayline Lavendal Ndhlovu en Zinzi Nogagu; die Mzansi Tenors; Janel Speelman; Zimbini Makwetu en DJ Shelly ingesluit.

Lees ook: Blitsidees met vanielje

The post Teatersterre skitter by toekennings appeared first on rooi rose.

Deur Maryke Roberts. Foto’s: Clifford Roberts 

Wyne van Suid-Afrikaanse, Swis en Argentynse oorsprong is met interessante peuselhappies gepasmaat. Gaste kon buite op die sypaadjie onder die sambrele kuier, terwyl die son sy goue strale oor die historiese Moederkerk aan die onderpunt van die straat gooi. 

Gaste kuier met Debbie Thompson (heel regs), wynmaker by Le Grand Domaine Wines, wat die lekker vonkelwyn gemaak het.

Gaste is met oesters en Le Grand Domaine Cap Classique ontvang, terwyl daar lekker gesels is met die wynmaker, Debbie Thompson, wat dié vonkelwyn gemaak het. Die vonkelwyn spog met 4.5 sterre in die Platter-wyngids, silwer medalje by Veritas 2022 en 91 punte in Decanter. Dis ’n 50% Chardonnay en 50% Pinot Noir versnit. 

Die wynkroeg is vir die aand omskep in ’n informele proe-plek met tafels waar die verskillende wyne bedien is en kelners wat met die skinkborde peuselhappies bedien het. 

Die eerste wyne was die Switserse Celliers de Vétroz Fendant 2022 en Argentynse Finca la Anita Chardonnay 2018 uit die Mendoza-streek. Eersgenoemde is ’n Chasselas en is nie houtverourder nie. Die twee witwyne is met erfenistamatie-flesse; salm en roomkaas bruschetta; eiervrug bruschetta en hoender sosaties met grondboontjiebottersous bedien.  

Die tweede stel wyne was die Switserse Les Celliers de Vetroz Shiraz 2016 en Argentynse Finca La Anita Malbec 2017 en Finca La Anita Pinot Noir 2018, wat met gepeperde beeshaas met Aioli en Fritto Misto (seekat en garnale) bedien is. 

Die Argentynse Finca La Anita Malbec 2017 is met gepeperde beeshaas met Aioli en Fritto Misto (seekat en garnale) bedien.

Die sterre van die aand was die derde stel wyne, Magna Finca Malbec 2014, Symphonie ermitage flétrie 2014 en Rapsodie amigne flétrie 2012, wat met ’n indrukwekkende koek wat uit verskillende kase gebou, bedien is. Die Magna Finca Malbec 2014 kom uit 76 jaar oue wingerde wat meer as 850 m bo seespieël groei. 

Nagereg was mini Franse appeltertjies. 

Lees ook: Laat die kurke klap vir Klein Roosboom se vlagskip borrels

The post Eerste verjaardag vir dié indrukwekkende wynkroeg appeared first on rooi rose.

Deur Maryke Roberts. Foto’s: Clifford Roberts en verskaf 

Die Spier wynplaas buite Stellenbosch is bekend vir vele aspekte: dit het die afgelope bykans 30 jaar een van die sentras vir bekroonde wyne geword; was ’n kunspionier wat nie net jaarlikse kunsfeeste aangebied het nie, maar ook ligvertonings hou en kuns-installasies akkommodeer, en met hul eie groentetuin, organiese en biodinamiese boerderypraktyke, die toekoms met ’n goeie skeut groen aanpak. 

Reg in die hartjie van Spier is die historiese herehuis: ’n elegante dame met ’n gewel wat uit 1822 dateer. Oor die laaste paar maande is sy pragtig gerestoureer om klein, intieme kos- en wynervarings aan te bied. Terwyl jy smul aan die beste kos en wyn, sit jy tussen sommige van Suid-Afrika se bekendste kontemporêre kunsstukke uit die Spier-versameling, en verwonder jou aan die pragtige balans tussen oud en nuut. 

Sjef Phil Carmichael bied die eerste reeks etes  – elke Vrydagaand in Maart – aan. Vanuit ’n oop kombuis soos uit toeka se dae, berei hy vyfgang feesmaaltye, wat keurig met Spier se vlagskipwyne gepasmaat word – wat die hoogtepunt van die kunsvaardigheid en kunsvlyt van Spier se wynmaak verteenwoordig.

Sjef Phil Carmichael bied die eerste reeks etes – elke Vrydagaand in Maart – aan.

Phil het van 2013 tot 2021 as uitvoerende sjef van die EDITION Hotel London gedien, en het uitgebreide ervaring in kombuise met Michelin-sterre. As uitvoerende sjef van MAZE Prague, het hy ’n Michelin-ster verwerf binne die eerste jaar van die restaurant se opening. 

Dis liefde wat hom na Suid-Afrika gelok het – eers ’n lewensmaat en nou die land – en hy staan trots in die herehuis se deur met ons kuier. 

“Wat The Manor House betref, was dit ’n uitbundige ontmoeting van familie en vriende, wat die eerste keer die idee laat ontstaan ​​het dat ek in die kombuis sal kook en dit het my in staat gestel om plaaslike geure en -produkte te fokus. Ek verkies om plaaslike bestanddele vanuit ons eie groente- en kruietuin en van verskaffers soos Farmer Angus wat op die plaas woon, se produkte te gebruik. Ek kies elke verskaffer met ’n soortgelyke etos as ons s’n,” vertel hy, terwyl die ander sjefs die finale afrondings aan ons voorgereg aanbring. 

“Phil is ’n natuurlike keuse om die kos-aanbieding in hierdie nuwe ruimte te lei,” sê Mariota Enthoven – Spier se familie-eienaar. “Hy het homself werklik verbind tot ons herlewingsbenadering tot boerdery op hierdie grond. Hy is baie opgewonde daaroor om terug te keer na die basiese beginsels – kook met bestanddele wat met sorg geboer word, en in goeie grond. Hy is heeltemal aan boord met Spier se kosfilosofie. 

Phil voeg by: “In my kombuis is daar geen foefies of tierlantyntjies nie: ons laat uitsonderlike bestanddele vir hulself praat deur minimale inmenging en eenvoudige, tydlose kooktegnieke. Ons gebruik vlamme, rook en kole om geregte te kook. Vuur is meer as net ’n tegniek; dis die sleutelbestanddeel.” 

Van vrywei beesvleis tot keurige seisoenale groente, al die bestanddele wat hy gebruik, kom van Spier se weivelde en tuine en omliggende bure. Fermentasie (wat lei tot kimchi, suurkool, kombucha en ander gefermenteerde lekkernye) en snoet-tot-stert-gebruik van vleis, verminder beide vermorsing en verseker ’n breë en opwindende spektrum van geur en tekstuur. 

“Die Manor House sal ’n ruimte wees waarin gesprekke oor voedselsekerheid en volhoubaarheid die middelpunt kan wees,” sê Mariota. “Ons gebruik elke maaltyd wat ons maak, as ’n geleentheid om stories te vertel oor die voedselrevolusie waarvan Spier trots is om deel te wees: stories oor ons herlewingsboerdery, organies verboude kostuin, organiese wingerde en sorgvuldig-gemaakte wyne.” 

Maar Spier is meer as net kos. Dis die wyn wat wêreldwyd die praatwerk doen. Johan Jordaan, Spier se keldermeester en kundige sommelier, Georgio Meletiou, was nou betrokke by die samestelling van The Manor House se wynpasmaats. Dit verseker dat die volle uitdrukking van terroir bereik word, deur ’n storie deur elke mondvol te vertel. 

Alexandru Vasilescu en Johan Jordaan, Spier se keldermeester, klink ’n glasie van die Spier Cap Classique RD, wat 84 maande op die gismoer deurgebring het.

Phil het gaste verwelkom met die woorde: “Welkom in my huis. Om weer lewe in die herehuis te blaas, was ’n voorreg. Om saam met besoekers ons kuns, wyn en kos te kom vier, is wat alles die moeite werd maak. Ek sien meesterklasse, gedigtelesings, boekbekendstellings en klein intieme vieringe hier.” 

Die voorgereg, Erfenistamatiesslaai met kappertjiesaad, sorghumblaar, chorizo en feta, met heerlike tamaties uit Megan McCarthy en haar span se tuin op die plaas, is gepasmaat met die Frans K. Smit White Blend 2018, ’n Sauvignon Blanc en Semillon versnit. Johan verduidelik: “Om suur in disse te balanseer met goeie wyn, is ’n kuns. En ’n goeie sjef los ruimte vir daardie balans en pasmaat. Sauvignon Blanc is ons geheim.” 

Hy sê Suid-Afrikaanse wynmakers en wynliefhebbers het “hierdie angs oor Sauvignon se oesjaar. Dit moet wyn van dieselfde kalenderjaar wees. Ons doen dit nie. Ons stel die wyn vry wanneer dit reg is, al is dit eers vier of vyf jaar later. Die bewys van wat daardie wagperiode aan die wyn doen, is in jou glas.”  

Ons sit by kerslig en ’n sweempie meubelpolitoer met wit linne soos 200 jaar gelede. Die blou en wit borde soos Simon van der Stel sou gebruik, ’n ode aan die herehuis se ouderdom en erfenis. 

Annabelle Schreuders, Spier se hoof operasionele bestuurder, het vertel: “Die beste manier om die huis terug te bring na haar vorige glorie, is om wyn, kos en kuns terug te bring binne haar mure. Phil se kos laat nie net innovasie toe nie, maar jy kan proe wat jy eet. Dis eerlike geregte uit die hart én uit die grond.” 

Die hoender en preie terrine met groenboneslaai en tuinkruie is met die 21 Gables Chenin Blanc geniet. Johan het verduidelik dat dié wynreeks vernoem is na die 21 Kaap-Hollandse geuwels op die plaas. “Die wyn oorheers nie, dis die gom wat ons wynbedryf bymekaar hou. Die druiwe kom uit 1983 wingerde in Durbanville. Ouer wingerde bring net ’n ander dimensie na die wyn. 

“As ek hierdie wyn ruik, is dit my ouma se kombuis met perskes wat kook op die stoof. Sommige is nog in die bak op die kombuistafel. Anders kook al met vanieljepeule. Dis die geure wat my neus vul.” 

Die Farmer Angus Beef Wellington is met Creative Block 5 Bordelaise-sous en die Frans K. Smith Red Blend geniet. Daarby is gerookte beenmurg kapokaartappels met stadiggeroosterde beesstert en wortels uit die tuin, geniet. 

Wit sjokolade en kokosneut pannacotta met grenedella, sesam en kardomyn is saam met die Spier Cap Classique RD, wat 84 maande op die gismoer deurgebring het, bedien. 

Benewens twee elegante eetkamers, is The Manor House ook die tuiste van die Drawing Room – ’n wonderlike ruimte vir voor- en na-ete drankies en versnaperinge. En tussen die gange, kan gaste na die Voorkamer gaan vir privaat geselsies, waar Wim Botha se treffende Mieliepap Pietà te sien is. 

Johan het gesê hoewel baie mense aan Spier as ’n reuse plaas dink, die aandag aan die fynere detail nie agterweë bly nie. “Ons probeer nie perfek wees nie, ons wil iets vir elkeen bied en is beslis nie vervelig nie. Maar in ons wyne streef ons na perfeksie, want umami is nie ’n smaak nie; dis ’n ruimte nie.” 

Lees ook: Gerookte snoekslaai met mosterdslaaisous

The post Spier herehuis herleef met kuns, kos en wyn appeared first on rooi rose.

Deur Maryke Roberts. Foto’s: Clifford Roberts en verskaf.

Tokara wyn- en olyflandgoed buite Stellenbosch het die jaar nie net met die vrystelling van nuwe oesjare afgeskop nie, maar ook met ’n hernieude volhoubaarheidsplan wat in 2023 werklik tot uiting kom. 

Gaste is by die luukse Ellerman House in Bantrybaai in Kaapstad – deel van die Relais & Chateaux-groep – onthaal om ’n kykie te kry in wat alles op die plaas beplan word vir die toekoms. Aan die voete van Leeukop, is praatjies oor volhoubaarheid van een van Suid-Afrika se bekendste landgoedere en die erfenis wat in Ellerman House bewaar word, die perfekte pasmaat. 

Die baie interessante wynrak in die onthaalgedeelte van Ellerman House, is nie net ’n besprekingspunt as dekor-item nie, maar ook as uitmuntende versameling raar wyne.

Die boetiekhotel is ’n oorspronklike Kaaps Edwardiaanse herehuis wat in 1906 gebou is en vir meer as 115 jaar lank oor Bantrybaai uitkyk. Daar is slegs 13 slaapkamers en twee privaat villa’s, maar die kuns- en wynversameling is ongeëwenaar. 

Ellerman House-personeel en gaste by die geleentheid is van links Fransie Roux van Tokara, Karien Bendle van Ellerman House en Wayve Kolevsohn, groep sommelier van The Royal Portfolio.

Met onbelemmerde uitsigte oor die Atlantiese Oseaan, het gaste aan die Tokara Methode Cape Classique 2016 geteug, met vernapperinge van oesters, botterkerrie-happies en Bruschetta met tamatie en knoffel. Die vonkelwyn was vir ses jaar op die gismoer, wat dit een van Suid-Afrika se langstes op die gismoer maak. Die oorgrote meerderheid vonkelwyne wat in die tradisionele Franse metode gemaak word, is tussen een en drie jaar op die gismoer. 

Gaste is verwelkom met Tokara se yskoue vonkelwyn, Cap Classique 2016, wat pas disgorge is en nog nie eers ’n etiket het nie, en Sauvignon blanc.

Stuart Botha, wynmaker by Tokara het aan gaste vertel dat die matige rypwordseisoen van 2022, dit beslis een van die oesjare gaan wees waarna ons in toekoms gaan terugverwys. 

Stuart het tussen die verskillende kosgange deur, vertel van die nuwe oesjaar-vrystelling wat gaste kon proe, waaronder die Bordeaux-styl vlagskip versnitte, die Cabernet Sauvignon-gedrewe Tokara Director’s Reserve Red 2020 en die Director’s Reserve White 2020; die Reserve Collection Cabernet Sauvignon 2020 en die Tokara Elgin Reserve Collection Sauvignon Blanc 2022 en die Tokara Reserve Collection Syrah 2019. 

Tokara het ook onlangs die TELOS 2017, die derde oesjaar van hierdie beperkte oplaag wyne wat oorsee bykans volpunte by wynkenners ontvang het, vrygestel. 

Die twee wyne wat saam met voorgereg bedien is, is die Tokara Directors Reserve White 2020 en Tokara Reserve Collection Chardonnay 2022, die ideale pasmaats vir die gebraaide geelstert met Malei-mayonnaise, nartjie Ponzu, kerrieblaar en gepekelde uitjies.  

GT Ferreira, eienaar van Tokara, saam met Francé Beyers (Stellenbosch Visio).

Stuart het met die voorgereg vertel dat die 2020-oesjaar uit ’n wynmakersperspektief uitstaande was. “Ek besef al meer die waarde van bottelveroudering. Die Tokara Directors Reserve White 2020 word net soveel meer volrond met ouderdom.” 

Die hoofgereg van Laingsburg lamskouer met truffel-en-parmesaanpap, Chakalaka en boontjies is met die Tokara Directors Reserve Red 2020, Tokara Reserve Collection Cabernet Sauvignon 2020 en Tokara Reserve Collection Syrah 2019 bedien. 

Die hoofgereg van Laingsburg lamskouer met truffel-en-parmesaanpap, Chakalaka en boontjies is met die Tokara Directors Reserve Red 2020, Tokara Reserve Collection Cabernet Sauvignon 2020 en Tokara Reserve Collection Syrah 2019 bedien.

Nagereg van kasjoeneut Semifreddo met appelkoos en gerookte sjokolade is met die Tokara potketel brandewyn XO bedien, waarvan die onderskeie komponente tussen tien en 16 jaar oud is. 

Nagereg van kasjoeneut Semifreddo met appelkoos en gerookte sjokolade is met die Tokara potketel brandewyn XO bedien, waarvan die onderskeie komponente tussen tien en 16 jaar oud is.

Karl Lambour, Tokara se algemene bestuurder het vertel: “By Tokara is die kwaliteit van ons wyne net een faset van ’n langtermyn-verbintenis tot sy mense, die omgewing, en om ’n nalatenskap vir toekomstige geslagte na te laat. Volhoubaarheid, ondersteun deur die ingebruikneming van ’n 780 kW sonkrag-aanleg, is ’n groot fokusarea by Tokara. 

“Hierdie beduidende belegging in son-energie het nie net ’n impak op die beskerming van die omgewing nie, maar dit help ook om die kontinuïteit van ons bedrywighede in ’n onvoorspelbare energievoorsieningstydperk te verseker. Deur by verandering aan te pas en ’n groener toekoms te verseker, posisioneer ons onsself as ’n lewensvatbare besigheid vir almal wat betrokke is.” 

Hy het ook gesê hul personeel is deel van die plaas se volhoubaarheid. Daar is ’n indrukwekkende behuisingsprojek vir personeel, wat baie naby aan die plaas geleë is en baie van die personeel het lang werksrekords. 

Aidan Morton, wat sedert 2000 die wingerdboukundige op die plaas is, vertel dat ’n suksesvolle kompos- en herwinningsprogram wat die afgelope dekade in plek is, verder die plaas se toewyding aan volhoubaarheid onderskryf. 

“Deur voortdurend te ontwikkel en vorentoe te kyk in terme van verantwoordelike wynproduksie in pas met internasionale markverwagtinge, het Tokara die mikpunt verhoog met nuwe uitstaande oesjare, van sy belangrikste fokusvariëteite  Cabernet Sauvignon and Sauvignon blanc. 

“Alles is deel van ons volhoubaarheidsfokus – van waterbeplanning tot hoe die wingerde geplant word. Virusse word met natuurlike roofdiere beheer. En ons verleng die wingerde se leeftyd met slim snoeitegnieke.” 

Lees ook: Valentynsoentjies met whisky-karamelsous

The post Hernieude volhoubaarheidsfokus en nuwe oesjare vrygestel appeared first on rooi rose.

Deur Maryke Roberts. Foto’s: Maryke Roberts 

Die tweede Internasionale Chenin blanc kongres is onlangs op Stellenbosch gehou.

Soggens is aan praatjies gewy en smiddae kon almal na verskillende wingerde uitry vir praktiese studie-ervarings en met wynmakers oor hul Chenin-wingerde en -uitdagings gesels.  

Die president van die Académie du Chenin en van die Internasionale Chenin kongres wat in 2019 in Angers, Frankryk gehou is, Evelyne de Pontbriand van Domaine du Closel en Ina Smith, bestuurder van die SA Chenin Blanc vereniging en organiseerder van die kongres op Stellenbosch.

Die eerste kongres is in 2019 in Angers, Frankryk gehou en verskeie wynmakers, wingerdboukundiges en bemarkers van Suid-Afrika het dié kongres bygewoon. 

Johan Burger van Fakulteit AgriWetenskappe, Departement Genetika by die Universiteit Stellenbosch (links) en Dr. Patrice This van die Universiteit Montpellier in Frankryk (regs) het oor die Chenin-kloonprojek: Die wat, hoekom en hoe om ’n wetenskaplike basis vir intravariëtale diversiteit te vestig, gesels en Patrick Baudouin (middel) het ’n wynmakersperspektief en insigte oor die toekoms van Chenin blanc in die konteks van genetiese vooruitgang gelewer.

Ken Forrester van Ken Forrester Vineyards wat deur baie as Suid-Afrika se Mnr. Chenin gereken word, is die voorsitter van die Chenin Blanc vereniging en het gesê die vereniging is baie opgewonde oor die vooruitsigte vir Chenin blanc. “Die kultivar het ’n lang pad gekom. Net 20 jaar gelede was dit ’n baie ander storie en nou is Chenin in die kollig en baie gewild – onder wynmakers én wyndrinkers.” 

In die sessie, “Klimaatsverandering: Soek vir antwoorde”, het drie vroue gepraat: Prof. Stephanie Midgeley, Wetenskaplike: Klimaatsverandering en Risiko-evaluering by Departement van Landbou, Wes-Kaap, saam met Rosa Kruger (regs) Stigter van die Old Vine Project (OVP) en Tara Southey oor data-gedrewe besluitnemingsinstrumente: die Terraclim-geïntegreerde data-instrument wat op Chenin-scenario’s toegepas word.

Net minder as 60% van die wêreld se wingerde is onder Chenin in Suid-Afrika. In Frankryk word 63% van alle Chenin-produksie in sjampanje en vonkelwyn gebruik. In Frankryk is 10 500 hektaar onder Chenin en dis die 16de mees aangeplante druifvariëteit. 

Dis Suid-Afrika se mees aangeplante variëteit en bykans 53 % van die wêreldproduksie van Chenin blanc kom van hier. Frankryk is in die tweede plek met 28%, die Verenigde State met 9% en Argentinië 7% en Australië lewer slegs 2%. 

Die heel eerste wingerde wat in Suid-Afrika deur Jan van Riebeeck laat plant is en die eerste wyn wat in 1659 gemaak is, was Chenin, wat toe as Steen bekend was. Dit het ook in Frankryk onder verskeie name bekend gestaan, waaronder Pineau de Loire, Pineau blanc en Pinot d’Anjou. 

Chenin blanc se veelsydigheid is selfs in die wynproe ten toon gestel, want daar was soetwyne van Australië, stilwyne van Indië, Frankryk en Suid-Afrika en vonkelwyn van Suid-Afrika, soos hierdie Loose Cannon Cap Classique van Bosman Familiewingerde buite Wellington.

Lees ook: Heerlike aand van wyn en kos wag op jou

The post Chenin kongres lok produsente van alle uithoeke appeared first on rooi rose.